“ʻAi Ho Loto ki he” Temipale ʻo e ʻOtuá!

“Hakoʻi-tangata . . . ʻai ho loto ki he meʻa kotoa te u fakaha atu . . . fakaha ki he fale ʻo Isileli ʻa e meʻa kotoa te ke sio ki ai.”​—ISIKELI 40:4.

 1. Ko e hā ʻa e tuʻunga naʻe ʻi ai ʻa e kakai fili ʻa e ʻOtuá ʻi he 593 K.M.?

KO E taʻu 593 K.M. ia, ko e taʻu ia hono 14 ʻo e fakaheeʻi ʻo ʻIsilelí. Ki he kau Siu naʻe nofo ʻi Pāpiloné, ko honau fonua ʻofaʻangá kuo pau pē ne hā ngali mamaʻo moʻoni. ʻI he taimi naʻe sio fakamuimui ai ʻi Selusalema ʻa e tokolahi taha ʻo kinautolú, naʻe vela ia, havehave hono fuʻu ʻaá, maumau hono ngaahi fale molumalú. Ko e temipale ʻo Sihová​—ʻa ia naʻe hoko ko e lāngilangi taupotu ʻo e koló, ʻa e senitā pē ʻe taha ki he lotu maʻá ʻi he foʻi māmaní kotoa​—kuo holo hifo ia ʻo hoko ko e fokotuʻunga maka. He taimí ni, ko e konga lahi taha ʻo hono fakaheeʻi ʻo ʻIsilelí naʻe kei tuʻu pē ia mei muʻa. Ko e taʻu ia ʻe 56 ki muʻa he fakatauʻatāina naʻe talaʻofá.​—Selemaia 29:10.

 2. Ko e hā ne fakalotomamahiʻi ai ʻa ʻIsikeli ʻi he manatu ki he temipale ʻo e ʻOtuá ʻi Selusalemá?

² Kuo pau pē naʻe fakalotomamahiʻi ʻe he meʻá ni ʻa e palōfita anga-tonu ko ʻIsikelí ʻi he fakakaukau atu ki he temipale ʻo e ʻOtuá ʻi heʻene maumau ʻo holofa kilomita ʻe lauingeau hono mamaʻó, ko ha potu lala ʻoku ʻahia ʻe he fanga manu kaivaó. (Selemaia 9:11) Ko ʻene tamaí tonu, ʻa Pusi, naʻe ngāue ai ko ha taulaʻeiki. (Isikeli 1:3) Naʻe mei fiefia ʻa ʻIsikeli he monū tatau, ka kuo ʻave ia ʻo fakaheeʻi fakataha mo e houʻeiki ʻo Selusalemá ʻi he 617 K.M., ʻi he lolotonga ʻo ʻene kei siʻí. ʻI he taimi ko ení ʻi hono taʻu 50 nai, ʻoku hangehangē pē naʻe ʻiloʻi ʻe ʻIsikeli ʻe ʻikai te ne moʻui ʻo toe sio ʻi Selusalema pe kau ʻi hono toe langa ʻo hono temipalé. Fakaʻuta atu leva, ki he fuʻu ongoʻi kuo pau naʻe ʻia ʻIsikeli ke maʻu ha vīsone ʻo ha temipale lāngilangiʻia!

 3. (a) Ko e hā ʻa e taumuʻa ʻo e vīsone ʻa ʻIsikeli ki he temipalé? (e) Ko e hā ʻa e ngaahi tafaʻaki tefito ʻe fā ʻo e vīsoné?

³ Ko e vīsone lahi ko ení, ʻi heʻene fakafonu ʻa e vahe ʻe hiva ʻo e tohi ʻa ʻIsikelí, naʻá ne tokonaki ai ki he kau Siuta fakahēʻí ha talaʻofa fakatupu tui mālohi. ʻE toe fakafoki mai ʻa e lotu maʻá! ʻI he ngaahi senituli leva talu mei ai, ʻo aʻu mai pē ki hotau ʻahó ni, ko e vīsoné ni kuo hoko ia ko e matavai ʻo e fakalototoʻa ki he kau ʻofa kia Sihová. ʻO anga-fēfē? Tau vakaiʻi angé pe ko e hā hono ʻuhinga ʻo e vīsone fakaekikite ʻa ʻIsikelí ki he kau ʻIsileli ne fakahēʻí. ʻOku ʻi ai hono ngaahi tafaʻaki tefito ʻe fā: ko e temipalé, ko e tuʻunga taulaʻeikí, ko e ʻeikí, pea mo e fonuá.

Toe Fakafoki ʻo e Temipalé

 4. Naʻe ʻave ki fē ʻa ʻIsikeli ʻi he kamata ʻo ʻene vīsoné, ko e hā naʻá ne sio ai ki aí, pea ko hai naʻá ne fakaʻeveʻevaʻi iá?

⁴ ʻUluakí, ʻoku ʻomai ʻa ʻIsikeli ki “ha moʻunga maʻolunga ʻaupito.” ʻI he fakatonga ʻo e moʻungá ʻoku ʻi ai ha temipale lahi fakaʻulia, ʻo hangē ha kolo ʻoku ʻāʻí. Ko ha ʻāngelo ʻa ia “ko hono fotunga naʻe ha hange ko e palasa,” ʻokú ne ʻave ʻa e palōfitá ʻo fakaʻeveʻevaʻi takai ʻi he falé. (Isikeli 40:​2, 3) ʻI he hoko atu ʻa e vīsoné, ʻoku mamata ʻa ʻIsikeli ki he ʻāngeló ʻokú ne fua mātuʻaki tokanga ʻa e ngaahi hoaʻi matapā faitatau ʻe tolu ʻo e temipalé fakataha mo honau ngaahi loki kaʻaté, ko ha lotoʻā ʻi tuʻa, ko ha lotoʻā ʻi loto, ngaahi loki kai, ko ha ʻōlita, mo e feituʻu toputapu ʻo e temipalé fakataha mo hono Potu Tapú mo e Potu Toputapú.

 5. (a) Ko e hā ʻa e fakapapau ne ʻoange ʻe Sihova kia ʻIsikelí? (e) Ko e hā ʻa e “ngaahi ʻangaʻanga ʻo honau ngaahi tuʻi” naʻe pau ke toʻo mei he temipalé, pea ko e hā naʻe mahuʻinga ai ení?

⁵ ʻOku hā mai leva ʻa Sihova tonu ʻi he vīsoné. ʻOkú ne hāʻele ki he temipalé ʻo fakapapauʻi kia ʻIsikeli te Ne ʻafio ai. Ka naʻá Ne fiemaʻu ha fakamaʻa ʻo Hono falé, ʻi heʻene folofola: “Ko eni ke nau tuku atu ʻenau tango, mo e ngaahi ʻangaʻanga ʻo honau ngaahi tuʻi, ke mamaʻo mo au, pea te u nofo ʻi honau lotolotonga ʻo taʻengata.” (Isikeli 43:​2-4, 7, 9) Ko e “ngaahi ʻangaʻanga ʻo honau ngaahi tuʻi” ʻoku hā mahino ko e lave ia ki he ngaahi ʻaitolí. Naʻe fakaʻuliʻi ʻe he kau taki mo e kakai angatuʻu ʻo Selusalemá ʻa e temipale ʻo e ʻOtuá ʻaki ʻa e ngaahi ʻaitolí, pea ko hono olá, naʻa nau ʻai ia ko e ngaahi tuʻi. (Fakafehoanaki mo Emosi 5:26.) ʻI he ʻikai hoko ko e ngaahi ʻotua pe ngaahi tuʻi ʻoku moʻuí, ko e ngaahi meʻá ni ko e ngaahi meʻa ʻoku mate mo ʻuli ʻi he vakai mai ʻa Sihová. Kuo pau ke toʻo kinautolu.​—Livitiko 26:30; Selemaia 16:18.

 6. Naʻe ʻuhinga ki he hā ʻa hono fua ʻo e temipalé?

⁶ Ko e hā ʻa e poini ʻo e konga ko eni ʻo e vīsoné? Naʻá ne fakapapauʻi ki he kau fakahēʻí ʻa hono toe fakafoki kakato mai ʻa e lotu maʻá ʻi he temipale ʻo e ʻOtuá. ʻIkai ko ia pē, ko hono fua ʻo e temipalé naʻe tokonaki mai ai ha fakapapauʻiʻanga fakaʻotua ko e vīsoné naʻe fakapapauʻi fakaʻaufuli ʻe fakahoko. (Fakafehoanaki mo Selemaia 31:​39, 40; Sakalaia 2:​2-8.) Ko e tauhi ʻaitoli kotoa pē ʻe fakamaʻa ia. ʻE toe tāpuakiʻi leva ʻe Sihova hono falé.

Ko e Tuʻunga Taulaʻeikí mo e ʻEikí

 7. Ko e hā ʻa e fakamatala ʻoku fai fekauʻaki mo e kau Līvaí pea mo e kau taulaʻeikí?

⁷ Ko e tuʻunga taulaʻeikí naʻe pau ke toe fou ia ʻi ha tuʻunga fakamaʻa, pe sivi. Naʻe pau ke valokiʻi ʻa e kau Līvaí ʻi heʻenau hehema ki he tauhi ʻaitolí, lolotonga ia naʻe pau ke fakaongoongoleleiʻi mo fakapaleʻi ʻa e ngaahi foha fakaetaulaʻeiki ʻo Sātokí ʻi heʻenau nofo maʻá.a Neongo ia, ko e ongo kulupú fakatouʻosi te na maʻu ʻa e ngaahi tuʻunga ʻo e ngāue ʻi he fale ʻe toe fakafoki mai ʻo e ʻOtuá​—ʻo fakatuʻunga, taʻetoeveiveiua, ʻi honau tuʻunga anga-tonu tāutahá. ʻIkai ko ia pē, naʻe tuʻutuʻuni ʻa Sihova: “Pea te nau ako ki hoku kakai ʻa e meʻa ʻoku tapu mo e meʻa ʻoku taʻetapu, pea ke nau ʻilo ʻa e meʻa ʻoku taʻemaʻa mo e meʻa ʻoku maʻa.” (Isikeli 44:​10-​16, 23) Ko ia, naʻe pau ke toe fakafoki mai ʻa e tuʻunga fakataulaʻeikí, pea ko e kītaki anga-tonu ʻa e kau taulaʻeikí ʻe fakapaleʻi.

 8. (a) Ko hai ʻa e ngaahi ʻeiki ʻo ʻIsileli he kuonga muʻá? (e) ʻI he ngaahi founga fē naʻe longomoʻui ai ʻi he lotu maʻá, ʻa e ʻeiki ʻi he vīsone ʻa ʻIsikelí?

⁸ ʻOku toe lave ʻa e vīsoné ki he tokotaha naʻe ui ko e ʻeiki. Talu pē mei he ngaahi ʻaho ʻo Mōsesé, mo hono maʻu ʻe he puleʻangá ʻa e ngaahi ʻeiki. Ko e foʻi lea faka-Hepelū ki he ʻeikí, ko e na·si’ʹ, ʻoku lava ke ʻuhinga ia ki ha ʻulu ʻo ha fāmili tukufakaholo ʻo ha matakali pe naʻa mo ha puleʻanga. ʻI he vīsone ʻa ʻIsikelí, ko e kau pule ʻo ʻIsilelí ʻi he tuʻunga ko ha kalasí ʻoku valokiʻi ʻi heʻenau lōmekina ʻa e kakaí, pea ʻoku enginakiʻi ke nau taʻefilifilimānako mo faitotonu. Neongo ʻoku ʻikai mei he kalasi taulaʻeikí, ʻoku longomoʻui ʻa e ʻeikí ʻi ha founga tuʻu-ki-muʻa ʻi he lotu maʻá. ʻOkú ne hū atu pea hū ki tuʻa ʻi he lotoʻā ʻi tuʻá fakataha mo e ngaahi matakali taʻetaulaʻeikí, tangutu ʻi he hūʻanga ʻo e Matapā Hahaké, pea ʻoatu ʻa e niʻihi ʻo e ngaahi feilaulaú ki he kakaí ke nau fai. (Isikeli 44:​2, 3; 45:​8-​12, 17) ʻOku fakapapauʻi ai ʻe he vīsoné ki he kakai ʻa ʻIsikelí ko e puleʻanga ʻe toe fakafokí ʻe tāpuakiʻi fakataha mo e kau taki alafaʻifaʻitakiʻanga, ko e kau tangata ʻa ia te nau poupouʻi ʻa e tuʻunga taulaʻeikí ʻi hono fokotuʻutuʻu maau ʻa e kakai ʻa e ʻOtuá, pea hoko ko e ngaahi faʻifaʻitakiʻanga lelei ʻi he ngaahi meʻa fakalaumālié.

Ko e Fonuá

 9. (a) Naʻe pau ke vahevahe fēfē ʻa e fonuá, ka ko hai heʻikai maʻu hano tofiʻa tukufakaholó? (e) Ko e hā ʻa e meʻaʻofa māʻoniʻoní, pea ko e hā naʻe ʻi aí?

⁹ Fakaʻosí, ko e vīsone ʻa ʻIsikelí ʻoku kau ki ai ha vakai fakalūkufua ki he fonua ʻo ʻIsilelí. Naʻe pau ke vahevahe ia ko ha konga kelekele maʻá e matakali taki taha. Ko e ʻeikí foki te ne maʻu ha tofiʻa tukufakaholo. Kae kehe, ko e kau taulaʻeikí ʻe ʻikai, he naʻe folofola ʻa Sihova, “Ko au pe honau ʻapi to [“tofiʻa tukufakaholó,” NW].” (Isikeli 44:​10, 28; Nomipa 18:20) Naʻe fakahaaʻi ʻe he vīsoné, ko e konga kelekele ʻo e ʻeikí ʻe tuʻu ia ʻi he ongo tafaʻaki ʻo ha feituʻu makehe naʻe ui ko e meʻaʻofa māʻoniʻoni. Ko ha konga kelekele tapafā eni naʻe vahevahe ki he konga ʻe tolu​—ko ʻolungá maʻá e kau Līvai fakatomalá, ko lotomālie maʻá e kau taulaʻeikí, pea ko laló maʻá e koló mo hono kelekele mahú. Ko e temipale ʻo Sihová ʻe tuʻu ia ʻi he konga kelekele ʻa e kau taulaʻeikí, ʻi he lotomālie ʻo e meʻaʻofa tapafaá.​—Isikeli 45:​1-7, NW.

10. Ko e hā hono ʻuhinga ʻo e kikite fekauʻaki mo hono vahevahe ʻo e fonuá ki he kau Siuta anga-tonu ne fakahēʻí?

¹⁰ He fakalototoʻa moʻoni ē kuo pau naʻe ʻi he loto ʻo e faʻahinga fakaheeʻi ko iá! Naʻe fakapapauʻi ki he fāmili taki taha te nau maʻu ha tofiʻa tukufakaholo ʻi he fonuá. (Fakafehoanaki mo Maika 4:4.) ʻE maʻu ʻe he lotu maʻá ha tuʻuʻanga hakeakiʻi, tefito ʻi ai. Pea fakatokangaʻi, ʻi he vīsone ʻa ʻIsikelí, ko e ʻeikí hangē ko e kau taulaʻeikí, te ne nofo ʻi he fonua kuo meʻaʻofaʻaki ʻe he kakaí. (Isikeli 45:16) Ko ia ʻi he fonua ʻe toe fakafokí, naʻe pau ke meʻaʻofa ʻa e kakaí ki he ngāue ʻa e faʻahinga ko ia ne fokotuʻu ʻe Sihova ke takí, ʻo poupouʻi kinautolu ʻaki e fāitaha mo ʻenau tatakí. ʻI hono fakakātoá, ko e fonuá ni ko ha fakatātā ia ʻo e fokotuʻutuʻu maau, fāitaha, mo e malu.

11, 12. (a) ʻOku fakapapauʻi fakaekikite fēfē ʻe Sihova ki hono kakaí te ne tāpuakiʻi honau fonua ne toe fakafokí? (e) Ko e hā naʻá ne fakatātaaʻi ʻa e ʻuluʻakau ʻi he ongo kauvaí?

¹¹ ʻE tāpuakiʻi ʻe Sihova honau fonuá? ʻOku tali ʻe he kikité ʻa e fehuʻí ni ʻaki ha fakatātā fakalotomāfana. ʻOku tafe mai ha kiʻi vaitafe mei he temipalé, ʻo faai pē ki he fālahi ange ʻene ʻalú, ʻo hoko ia ʻo tafe mālohi ʻi he taimi ʻokú ne aʻu atu ai ki he Tahi Maté. ʻOkú ne fakamoʻui ai ʻa e vai taʻemoʻuí, pea ʻoku lakalakaimonū ai ha toutaiʻanga ika he konga lahi ʻo e matātahí. ʻI he ongo kauvaí ʻoku lahi ai ʻa e ʻuluʻakau ʻoku fua ʻi he taʻú kotoa, ʻokú ne ʻomai ʻa e meʻakai mo e faitoʻo.​—Isikeli 47:​1-​12.

¹² Ki he faʻahinga fakahēʻí, naʻe toe fakaongo mai mo fakapapauʻi ʻe he talaʻofa ko ʻení ʻa e ngaahi kikite ki muʻa ange ʻo e toe fakafoki naʻa nau tukulotoá. Naʻe laka hake he tuʻo tahá, ʻa hono fakamatalaʻi ʻe he kau palōfita fakamānavaʻi ʻa Sihová ʻi ha ngaahi kupuʻi lea fakaepalataisi, ha ʻIsileli ʻe toe fakafoki mai mo toe nofoʻi. Ko e ngaahi feituʻu mamate ne toe moʻuí naʻe hoko ia ko ha tuʻunga-lea fakaekikite ke toe lāulea ki ai. (Aisea 35:​1, 6, 7; 51:3; Isikeli 36:35; 37:​1-​14) Ko ia, naʻe lava ke ʻamanekina ʻe he kakaí, ko e ngaahi tāpuaki foaki-moʻui ʻa Sihová ʻe tafe mai ia ʻo hangē ha vaitafé mei he temipale naʻe toe fakafoʻoú. Fakatatau ki ai, ʻe toe fakamoʻui hake ha puleʻanga ne mate fakalaumālie. ʻE tāpuakiʻiʻaki ʻa e kakai ne toe fakafokí ha kau tangata tuʻu-ki-muʻa fakalaumālie​—ko e kau tangata māʻoniʻoni mo mālohi ʻo hangē ko e ʻuluʻakau he tafaʻaki ʻo e ongo kauvai fakaevīsone ko iá, ko e kau tangata ʻa ia te nau takimuʻa ʻi hono toe langa ha fonua maumau. Ko ʻAisea foki naʻá ne tohi ʻo fekauʻaki mo e “gaahi akau oe maonioni” ʻa ia te nau “toe fokotuu aia naʻe fakaauha fuoloa.”​—Aisea 61:​3, 4, PM.

ʻE Fakahoko ʻAfē ʻa e Vīsoné?

13. (a) ʻI he ʻuhinga fē ne tāpuakiʻi ai ʻe Sihova hono kakai ne toe fakafokí ʻaki ʻa e “gaahi akau oe maonioni”? (e) Naʻe anga-fēfē hono fakahoko ʻa e kikite fekauʻaki mo e Tahi Maté?

¹³ Naʻe siva e ʻamanaki ʻa e kau fakaheeʻi ne toe fokí? Mole ke mamaʻo! Naʻe foki ha toenga ne toe fakafokí ki honau fonua ʻofaʻangá ʻi he 537 K.M. ʻI ha taimi, ʻi he malumalu ʻo e tataki ʻa e “gaahi akau oe maonioni”​—hangē ko ia ko e sikalaipe ko ʻĒselá, ko e ongo palōfita ko Hākeai mo Sākalaiá, pea mo e Taulaʻeiki Lahi ko Siosiuá​—ko e ngaahi feituʻu ne fuoloa hono maumauʻí ne toe langa. Ko e ngaahi ʻeikí, hangē ko ia ko Nehemaia mo Seluipēpelí, naʻá na pule taʻefilifilimānako mo faitotonu ʻi he fonuá. Naʻe toe fakafoʻou ʻa e temipale ʻo Sihová, mo ʻene ngaahi tokonaki ki he moʻuí​—ʻa e ngaahi tāpuaki ʻo e moʻui fou ʻi heʻene fuakavá​—naʻe toe tafe mai ia. (Teutalonome 30:19; Aisea 48:​17-​20) Ko e tāpuaki ʻe taha ko e ʻiló. Naʻe toe fakafoki ʻa e tuʻunga taulaʻeikí ki he ngāué, pea naʻe fakahinohinoʻi ʻe he kau taulaʻeikí ʻa e kakaí ʻi he Laó. (Malakai 2:7) Ko hono olá, naʻe toe moʻui hake fakalaumālie ʻa e kakaí pea nau toe hoko ko e kau sevāniti fua lahi ʻa Sihova, hangē ko ia naʻe fakatātaaʻi ʻe he Tahi Mate ne fakamoʻui peá ne fakatupu ha toutaiʻanga ika lahí.

14. Ko e hā naʻe pau ai ke ʻi ai hano fakahoko ʻo e kikite ʻa ʻIsikelí ʻo lahi ange ia ʻi he meʻa naʻe hoko hili e foki ʻa e kau Siú mei honau fakaheeʻi ki Pāpiloné?

¹⁴ Ko e ngaahi meʻa ko eni ne hokó ko e fakahoko pē ia ʻo e vīsone ʻa ʻIsikelí? ʻIkai; ʻoku fakahaaʻi ai ʻa e meʻa lahi mamaʻo ange ia. Fakakaukau ange: Ko e temipale ko ia naʻe sio ki ai ʻa ʻIsikelí heʻikai lava moʻoni ke langa ʻo hangē ko ia naʻe fakamatalaʻí. Ko e moʻoni, naʻe fakakaukau fakamātoato ʻa e kau Siú ki he vīsone ko iá pea aʻu ʻo ngāueʻaki fakahangatonu ʻa e ngaahi fakaikiiki ʻe niʻihi.b Kae kehe, ko e temipale fakaevīsoné fakalūkufua naʻe fuʻu lahi ia naʻa mo haʻane feʻunga ʻi Moʻunga Molaia, ʻa e tuʻuʻanga ki muʻa ʻo e temipalé. Tānaki atu ki aí, ko e temipale ʻa ʻIsikelí naʻe ʻikai ʻi he koló ia ka naʻe mamaʻo ʻi ha konga fonua mavahe, ka naʻe langa ʻa e temipale hono uá ia ʻi he tuʻuʻanga ko ia naʻe tuʻu ai ʻa e temipale ki muʻá, ʻi he kolo ko Selusalemá. (Esela 1:​1, 2) ʻIkai ko ia pē, ʻoku ʻikai ha vaitafe moʻoni naʻe teitei hoko mai mei he temipale ʻi Selusalemá. Ko ia naʻe sio ʻa ʻIsileli ʻo e kuonga muʻá ʻi hano fakahoko siʻisiʻi pē ʻo e kikite ʻa ʻIsikelí. ʻOku fakahuʻunga ʻi he meʻá ni kuo pau pē ʻoku ʻi ai hano fakahoko lahi ange, fakalaumālie ʻo e vīsone ko ení.

15. (a) Naʻe ngāue ʻanefē ʻa e temipale fakalaumālie ʻo Sihová? (e) Ko e hā ʻokú ne fakahaaʻi naʻe ʻikai fakahoko ʻa e vīsone ʻa ʻIsikelí lolotonga e moʻui ʻa Kalaisi ʻi māmaní?

¹⁵ ʻOku hā mahino, kuo pau ke tau vakai ki hono fakahoko tefito ʻo e vīsone ʻa ʻIsikeli ki he temipale lahi fakalaumālie ʻo Sihová, ʻa ia naʻe lāulea lahi ki ai ʻa e ʻapositolo ko Paulá ʻi he tohi Hepeluú. Naʻe ngāue ʻa e temipale ko iá ʻi he taimi naʻe pani ai ʻa Sīsū Kalaisi ko hono Taulaʻeiki Lahi ʻi he 29 T.S. Ka naʻe fakahoko ʻa e vīsone ʻa ʻIsikelí ʻi he ʻaho ʻo Sīsuú? ʻOku hā mahino naʻe ʻikai. Ko Sīsū, ʻi hono tuʻunga ko e Taulaʻeiki Lahí, naʻá ne fakahoko ʻa e mahuʻinga fakaekikite ʻo e ʻAho Fakaleleí fakafou ʻi heʻene papitaisó, ko ʻene pekia fakaefeilaulaú, mo ʻene hū ki he Potu Toputapú, ʻa hēvani tonu. (Hepelu 9:24) Neongo ia, ʻoku mahuʻingá, he ʻoku ʻikai ha lave ʻe taha ʻi he vīsone ʻa ʻIsikelí ki he taulaʻeiki lahí pe ko e ʻAho Fakaleleí. Ko ia, ʻoku hā ngalingali naʻe ʻikai tuhu ʻa e vīsone ko ení ki he ʻuluaki senituli T.S. Ko e hā leva ʻa e vahaʻa taimi ʻoku ngāueʻaki ia ki aí?

16. Ko e ʻātakai ʻo e vīsone ʻa ʻIsikelí ʻokú ne fakamanatu mai kiate kitautolu ʻa e toe kikite fē, pea ʻoku anga-fēfē hono tokoniʻi kitautolu ʻe he meʻá ni ke ʻiloʻilo ai ki he taimi ʻo hono fakahoko tefito ʻo e vīsone ʻa ʻIsikelí?

¹⁶ Ki ha tali, tau toe foki angé ki he vīsoné tonu. Naʻe tohi ʻe ʻIsikeli: “Naʻa ne ʻomi au ʻi he ngaahi visone fakaʻotua ki he fonua ʻo Isileli, ʻo ne tuku hifo au ʻi ha moʻunga maʻolunga ʻaupito, pea naʻe tuʻu ai mei he saute ha meʻa naʻe langa hange ko e kolo.” (Isikeli 40:2) Ko e ʻātakai ki he vīsoné ni, ʻa e “moʻunga maʻolunga ʻaupito,” ʻokú ne fakamanatu mai kiate kitautolu ʻa e Maika 4:1: “ʻE hoko ʻo pehe ʻi he kuonga ʻamui, ʻe fokotuʻu ʻa e moʻunga ʻo e fale ʻo Sihova ko e ʻulu ʻo e ngaahi moʻunga, pea ʻe mahiki hake ia ʻi he ngaahi foʻi maʻolunga; pea ʻe tafe ki ai ʻa e ngaahi kakai.” Ko fē ʻa e taimi ʻoku fakahoko ai ʻa e kikité ni? ʻOku fakahaaʻi ʻi he Maika 4:5 ʻoku kamata ʻa e meʻá ni lolotonga ʻoku kei lotu ʻa e ngaahi puleʻangá ki he ngaahi ʻotua loí. Ko hono moʻoní, kuo hoko ia ʻi hotau taimí, “ʻi he kuonga ʻamui,” ʻa hono hiki hake ʻa e lotu maʻá, ʻo toe fakafoki ki hono tuʻunga totonú ʻi he moʻui ʻa e kau sevāniti ʻa e ʻOtuá.

17. ʻOku anga-fēfē hono tokoniʻi kitautolu ʻe he kikite ʻi he Malakai 3:​1-5 ke fakapapauʻi ʻa e taimi naʻe fakamaʻa ai ʻa e temipale ʻi he vīsone ʻa ʻIsikelí?

¹⁷ Ko e hā naʻá ne ʻai ke ala lava ʻa e toe fakafoki ko ení? Manatuʻi, ʻi he meʻa mahuʻinga taha naʻe hoko ʻi he vīsone ʻa ʻIsikelí, ʻoku haʻu ai ʻa Sihova ki he temipalé ʻo ne kouna mai ke fakamaʻa ʻa hono falé mei he tauhi ʻaitolí. Naʻe fakamaʻa ʻanefē ʻa e temipale fakalaumālie ʻo e ʻOtuá? ʻI he Malakai 3:​1-5, naʻe tomuʻa tala ai ʻe Sihova ʻa e taimi ʻa ia ʻe “haʻu . . . ki hono temipale” ʻo fakafeʻao mai ʻe heʻene “Angelo ʻo e Kovinanite,” ko Sīsū Kalaisi. Ko e taumuʻá? “ʻOku ne hange ko e afi ʻo e sivi siliva, pe hange ko e sopu ʻa fōkofu.” Ko e sivi ko ení naʻe kamata ia he lolotonga ʻo e taimi ʻo e tau lahi ʻuluaki ʻa māmaní. Ko e olá? Kuo ʻafio ʻa Sihova ʻi hono falé ʻo tāpuakiʻi ʻa e fonua fakalaumālie ʻo hono kakaí mei he 1919 ʻo faai mai ai. (Aisea 66:8) Te tau fakaʻosi leva nai ai, ko e kikite ʻa ʻIsikeli ki he temipalé ʻokú ne aʻusia hano fakahoko mahuʻinga lolotonga ʻa e ngaahi ʻaho fakaʻosí.

18. ʻE fakahoko fakaʻosi ʻafē ʻa e vīsone temipalé?

¹⁸ Hangē ko e ngaahi kikite kehe ʻo e toe fakafokí, ʻoku ʻi ai ha toe fakahoko lahi ange ʻo e vīsone ʻa ʻIsikelí, ko e fakaʻosí ia, ʻi Palataisi. Ko e taimi pē ko iá ʻe toki maʻu ai ʻe he faʻahinga loto-totonu ʻo e tangatá ʻa e ngaahi ʻaonga kakato ʻo e fokotuʻutuʻu fakaetemipale ʻa e ʻOtuá. ʻE toki tuku atu leva ʻe Kalaisi ʻa e mahuʻinga ʻo ʻene feilaulau huhuʻí, ʻi he fāitaha mo ʻene tuʻunga taulaʻeiki fakahēvani ko e toko 144,000. Ko e faʻahinga talangofua kotoa ʻo e tangatá ʻi he malumalu ʻo e pule ʻa Kalaisí ʻe hiki hake ki he tuʻunga haohaoá. (Fakahā 20:​5, 6) Kae kehe, heʻikai lava ke hoko ʻa Palataisi ko e taimi tefito ia ʻo e fakahoko ʻo e vīsone ʻa ʻIsikelí. Ko e hā ʻoku ʻikai aí?

ʻOku Fakahangataha ʻa e Vīsoné ki Hotau ʻAhó

19, 20. Ko e hā kuo pau ai ke hoko he ʻahó ni ʻa e fakahoko tefito ʻo e vīsoné ʻo ʻikai ʻi Palataisí?

¹⁹ Naʻe mamata ʻa ʻIsikeli ki ha temipale ʻa ia naʻe fiemaʻu ke fakamaʻa mei he tauhi ʻaitolí mo e feʻauaki fakalaumālié. (Isikeli 43:​7-9) ʻE ʻikai lava moʻoni eni ke tuhu ki he lotu kia Sihova ʻi Palataisí. ʻIkai ngata aí, ko e kau taulaʻeiki ʻi he vīsoné ʻoku nau fakatātaaʻi ʻa e kalasi taulaʻeiki paní lolotonga ʻo ʻenau kei ʻi māmaní, ʻikai ʻi he hili ʻenau toetuʻu fakahēvaní pe ʻi he lolotonga ʻa e Taʻu ʻe Taha Afé. Ko e hā hono ʻuhingá? Fakatokangaʻi ko e kau taulaʻeikí ʻoku fakatātaaʻi ʻoku nau ngāue ʻi he lotoʻā ʻi lotó. Ko e ngaahi kupu ʻi he ngaahi ʻīsiu ki muʻa ʻo e Taua Leʻo kuo fakahaaʻi ai ko e lotoʻā ko ení ʻokú ne fakatātaaʻi ʻa e tuʻunga fakalaumālie laulōtaha ʻo e kau taulaʻeiki tokoni ʻa Kalaisí lolotonga ʻenau kei ʻi he māmaní.c Toe fakatokangaʻi ʻoku fakamamafaʻi ʻi he vīsoné ʻa e taʻehaohaoa ʻa e kau taulaʻeikí. ʻOku tala kiate kinautolu ke fai ʻa e ngaahi feilaulau ki heʻenau ngaahi angahalá tonu. ʻOku fakatokanga kiate kinautolu ʻo fekauʻaki mo e fakatuʻutāmaki ʻa e hoko ʻo taʻemaʻa​—fakalaumālie mo fakaeʻulungāngá. Ko ia ai, ʻoku ʻikai te nau fakatātaaʻi ʻa e faʻahinga pani kuo toetuʻú, ʻa ia naʻe tohi ki ai ʻa e ʻapositolo ko Paulá: “ʻE ifi ʻa e talupite, pea ʻe fokotuʻu ʻa e pekia, ʻo taʻefaʻaʻauha.” (1 Kolinito 15:​52, fakaʻītali ʻamautolu; Isikeli 44:​21, 22, 25, 27.) Ko e kau taulaʻeiki ʻi he vīsoné ʻoku nau feohi mo ngāue fakahangatonu ki he kakaí. ʻE ʻikai ke pehē ia ʻi Palataisi, ʻi he taimi ʻe ʻi hēvani ai ʻa e kalasi fakaetaulaʻeikí. Ko ia ai, ʻoku ʻomai ʻe he vīsoné, ha fakatātā lelei ʻo e founga ngāue vāofi ʻa e kau paní mo e “fuʻu kakai lahi” ʻi māmani he ʻaho ní.​—Fakahā 7:9; Isikeli 42:14.

²⁰ Ko ia, ko e vīsone ʻa ʻIsikeli ki he temipalé ʻokú ne fakahaaʻi ʻa e ngaahi ola lelei ʻo ha fakamaʻa fakalaumālie ʻoku lolotonga fakahoko he ʻahó ni. Ka ko e hā ʻene ʻuhinga ia kiate koé? ʻOku ʻikai ko ha fifili fakateolosia noaʻia pē ʻeni ia. Ko e vīsoné ni ʻoku fekauʻaki lahi ia mo hoʻo lotu ʻi he ʻaho ki he ʻaho ki he ʻOtua moʻoni pē ʻe taha, ko Sihová. ʻI heʻetau kupu hono hokó, te tau vakai ai ki he foungá.

[Fakamatala ʻi lalo]

ʻOkú Ke Manatuʻi?

◻ Ko e hā ʻa e fuofua fakahoko ʻo e vīsone ʻa ʻIsikeli ki he temipalé mo hono tuʻunga taulaʻeikí?

◻ Naʻe anga-fēfē hono muʻaki fakahoko ʻo e vīsone ʻa ʻIsikeli ki hono vahevahe ʻo e fonuá?

◻ ʻI hono toe fakafoki ʻa e ʻIsileli ʻo e kuonga muʻá, ko hai naʻe ngāue ʻi he tuʻunga ko e ngaahi ʻeiki anga-tonú pea ko hai naʻe ngāue ʻi he tuʻunga ko e “gaahi akau oe maonioni”?

◻ Ko e hā kuo pau ai ke fakahoko tefito ʻa e vīsone temipale ʻa ʻIsikelí lolotonga e ngaahi ʻaho fakaʻosí?