Meʻa ʻOku Fiemaʻu Moʻoni ke Hoko Ai ʻo Fiefiá

KO Sihova, ʻa e “ʻOtua fiefiá,” mo Sīsū Kalaisi, “ʻa e tokotaha fiefia mo e Pule pē tahá,” ʻokú na ʻafioʻi lelei taha ʻa e meʻa ʻe hoko ai ʻa e fiefiá. (1 Timote 1:​11, NW; 1Ti 6:​15, NW) Ko ia ai, ʻoku ʻikai ko ha meʻa fakaʻohovale ʻa e pehē ko e kī ki he fiefiá ʻoku maʻu ia ʻi he Folofola ʻa e ʻOtuá, ko e Tohi Tapú.​—Fakahā 1:3; 22:7.

ʻI heʻene Malanga ʻiloa he Moʻungá, ʻoku fakamatalaʻi ai ʻe Sīsū ʻa e meʻa ʻoku fiemaʻu ke hoko ai ʻo fiefiá. ʻOkú ne fakamatala: “Fiefiaā ka ko kinautolu” ʻoku (1) nau ʻiloʻi ʻa ʻenau fiemaʻu fakalaumālié, (2) mamahí, (3) anga-maluú, (4)  fiekaia mo fieinua ki he māʻoniʻoní, (5) mohu mēsí, (6) loto maʻá, (7) fakamelinó, (8) fakatangaʻi koeʻuhi ko e māʻoniʻoní pea (9) manukia mo fakatangaʻi koeʻuhi ko iá.​—Mātiu 5:​3-​11, NW.a

ʻOku Totonu ʻa e Ngaahi Fakamatala ʻa Sīsuú?

Ko e moʻoni ʻo e niʻihi ʻo e ngaahi fakamatala ʻa Sīsuú ʻoku fiemaʻu ki ai ha kiʻi fakamatala. Ko hai ia te ne fakaʻikaiʻi ko ha tokotaha anga-malū, mohu meesi mo fakamelino ʻo ueʻi ʻe ha loto maʻá ʻe fiefia ange ia ʻi ha tokotaha ʻiteʻita, fakafetau mo taʻefaimeesi?

Kae kehe, te tau fifili nai ki he ʻuhinga ʻoku lava ke pehē ai ʻoku fiefia ʻa e kakai ʻoku nau fiekaia mo fieinua ki he māʻoniʻoní pe ʻoku nau mamahí. Ko e faʻahinga tāutaha peheé ʻoku nau maʻu ha vakai totonu ki he ngaahi tuʻunga ʻo e māmaní. ʻOku nau “mapuhoi mo toʻe koeʻuhi ko e ngaahi fakalielia ʻoku fai” ʻi hotau ʻahó. (Isikeli 9:4) Ko e meʻá ni tonu ʻoku ʻikai te ne ʻai kinautolu ke nau fiefia. Kae kehe, ʻi heʻenau ako fekauʻaki mo e taumuʻa ʻa e ʻOtuá ke ʻomai ʻa e ngaahi tuʻunga māʻoniʻoni ki he māmaní mo e fakamaau totonu ki he faʻahinga lōmekiná, ʻoku ʻikai ha ngataʻanga ʻo ʻenau fiefiá.​—Aisea 11:4.

Ko e ʻofa ki he māʻoniʻoní ʻoku toe fakatupunga ai ʻa e faʻahinga tāutaha ke nau mamahi ʻi heʻenau faʻa taʻemalava ke fai ʻa e meʻa ʻoku totonú. ʻOku nau hoko ai ʻo ʻiloʻi ʻa ʻenau fiemaʻu fakalaumālié. Ko e kakai peheé ʻoku nau loto-lelei ke hanga ki he ʻOtuá ki ha tataki koeʻuhi ʻoku nau ʻiloʻi ko ia tokotaha pē ʻe lava ke ne tokoniʻi ʻa e kakaí ke nau ikuʻi honau ngaahi vaivaiʻangá.​—Palovepi 16:​3, 9; 20:24.

Ko e kakai ʻoku mamahí, ʻoku fiekaia mo fieinua ki he māʻoniʻoní, pea ʻoku nau ʻiloʻi ʻa ʻenau fiemaʻu fakalaumālié ʻoku nau lāuʻilo fekauʻaki mo e mahuʻinga ʻo hono maʻu ha vahaʻangatae lelei mo e Tokotaha-Fakatupú. Ko ha vahaʻangatae lelei mo e tangatá ʻoku tokoni ia ki he fiefiá, kae huanoa ange ai ha vahaʻangatae lelei mo e ʻOtuá. ʻIo, ko e faʻahinga ʻoku ʻofa fakamātoato ki he meʻa ʻoku totonú, ʻa ia ʻoku nau loto-lelei ke tali ʻa e tataki fakaʻotuá, ʻe lava moʻoni ke pehē ʻoku nau fiefia.

Kae kehe, te ke ʻiloʻi nai ʻoku faingataʻa ke tui ʻe lava ke fiefia ha tokotaha ʻa ia ʻoku fakatangaʻi mo manukia. Ka, kuo pau pē ʻoku moʻoni, koeʻuhi naʻe leaʻaki ia ʻe Sīsū tonu. Ko ia ai, ʻoku totonu ke fēfē ʻa hono mahinoʻi ʻa ʻene ngaahi leá?

Fakatangaʻi kae Fiefia —ʻE Lava Fēfē ke Hoko Ia?

Fakatokangaʻi naʻe ʻikai ke pehē ʻe Sīsuú ko e manukiá mo e fakatangá tonu ʻoku iku ia ki he fiefia. Naʻá ne fakahaaʻi mahino: “Fiefiaā ka ko kinautolu kuo fakatangaʻi koeʻuhi ko e māʻoniʻoní, . . . ʻi he taimi ʻoku manukia ai kimoutolu mo fakatangaʻi kimoutolu ʻe he kakaí . . . koeʻuhi ko au.” (Mātiu 5:​10, 11, NW) Ko ia, ʻoku tupu pē ʻa e fiefiá kapau ʻoku tofanga ha tokotaha ʻi ha manuki koeʻuhi ko ʻene hoko ko ha muimui ʻo Kalaisí pea koeʻuhi ko hono fakafuo ʻa ʻene moʻuí ʻo fakatatau ki he ngaahi tefitoʻi moʻoni māʻoniʻoni naʻe akoʻi ʻe Sīsuú.

ʻOku fakatātaaʻi eni ʻe he meʻa naʻe hoko ki he muʻaki kau Kalisitiané. Ko e kau mēmipa ʻo e Sanetalimí, ʻa e fakamaauʻanga māʻolunga faka-Siú, naʻa “nau ui ange ʻa e kau Aposetolo ʻo haha, ʻo nau fekau ke ʻoua te nau toe malangaʻaki ʻa e huafa ʻo Sisū, ʻo nau toki tuku ange.” Naʻe anga-fēfē ʻa e tali ʻa e kau ʻapositoló? “Pea ʻalu ai kinautolu mei he haʻohaʻonga ʻo e Sanetalimi, ʻoku nau fiefia koeʻuhi kuo lau kinautolu ʻoku nau tāu ke ngaohikoviʻi koeʻuhi ko e huafa. Pea ko e ʻaho kotoa pē, ʻi he Temipale pea ʻi ʻapi, naʻe ʻikai tuku ʻenau ako mo malangaʻaki ʻa Sisu, ko e Misaia ia.”—Fakaʻītali ʻamautolu; Ngāue 5:​40-42; 13:​50-52.

Naʻe ʻomai ʻe he ʻapositolo ko Pitá ʻa e fakamaama lahi ange ki he fehokotaki ʻi he vahaʻa ʻo e manukiá mo e fiefiá. Naʻá ne tohi: “Ka kuo manukia kimoutolu ʻi he huafa ʻo Kalaisi, ta ko e toki kakai monuʻia [pe fiefia] kimoutolu; he ʻoku nofoʻi kimoutolu ʻe he Laumalie ʻoku aʻana ʻa e langilangi, ʻio ko e Laumalie ʻo e ʻOtua.” (1 Pita 4:14) ʻIo, ko e faingataʻaʻia ʻi he tuʻunga ko ha Kalisitiané ʻi hono fai ʻa e meʻa ʻoku totonú, neongo ko e faingataʻaʻia ko iá ʻoku ʻikai lelei, ʻokú ne ʻomai ʻa e fiefia ʻa ia ʻoku hoko ʻi hono ʻiloʻi ʻokú te maʻu ʻa e laumālie māʻoniʻoni ʻo e ʻOtuá. ʻOku anga-fēfē ʻa e fehokotaki ʻa e laumālie ʻo e ʻOtuá ki he fiefiá?

Ngaahi Ngāue ʻa e Kakanó pe Fua ʻo e Laumālié?

Ko e laumālie māʻoniʻoni ʻo e ʻOtuá ʻoku nōfoʻi pē ia ʻi he faʻahinga ʻoku talangofua ki he ʻOtuá ʻi hono tuʻunga ko e pulé. (Ngāue 5:​32) ʻOku ʻikai foaki ʻe Sihova ʻa hono laumālié ki he faʻahinga ʻoku nau fai “ʻa e ngaahi ngaue ʻa Kakano.” Ko e ngaahi ngāue ko iá ko e “feʻauaki, ko e angaʻuli, ko e pauʻu, ko e tauhi-aitoli, ko e fai tuki, ko e fetāufehiʻaʻaki, ko e fetuʻusi, ko e meheka, ko e feʻiteʻitani, ko e fakafelaulauhi, ko e fakavahavahaʻa, ko e fakafaʻafaʻahi, ko e femehekaʻaki, ko e fefakapongaki, ko e faʻa konā, ko e faʻa kai, mo e ngaahi alāmeʻa pehe.” (Kaletia 5:​19-21) Ko e moʻoni, ʻoku failahia ʻi he māmani ʻo e ʻaho ní ʻa e “ngaahi ngaue ʻa Kakano.” Neongo ia, ko e faʻahinga ʻoku nau fai iá ʻoku ʻikai te nau maʻu ʻa e fiefia moʻoni mo tuʻuloá. ʻI hono kehé, ko hono fai ʻa e ngaahi meʻa ko iá ʻokú ne maumauʻi ʻa hoto vahaʻangatae lelei mo e kāingá, ngaahi kaungāmeʻá pea mo e ngaahi mahení. ʻIkai ngata aí, ʻoku fakahaaʻi ʻe he Folofola ʻa e ʻOtuá ko e faʻahinga ʻoku nau “fai meʻa pehe, ʻe ʻikai hanau tofiʻa ʻi he puleʻanga ʻo e ʻOtua.”

ʻI hono kehé, ʻoku foaki ʻe he ʻOtuá ʻa hono laumālié ki he faʻahinga ʻoku nau fakatupulekina ʻa e “fua ʻo e laumālié.” Ko e ngaahi ʻulungāanga ʻoku faʻuʻaki ʻa e fua ko ení ko e “ʻofa, fiefia, melino, kātaki-fuoloa, anga-lelei, lelei, tui, anga-malū mo e mapuleʻi-kita.” (Kaletia 5:​22, 23, NW) ʻI heʻetau fakahāhā ʻa e ngaahi ʻulungāangá ni, ʻoku tau fakatupu ai ʻa e ngaahi tuʻunga ki hono maʻu ha ngaahi vahaʻangatae melino mo e niʻihi kehé pea mo e ʻOtuá, ʻa ia ʻoku iku ai ki he fiefia moʻoní. (Sio ki he puha.) Ko e meʻa ʻoku mahuʻinga lahi angé, ʻi hono fakahāhā ʻa e ʻofá, anga-leleí, leleí mo e ngaahi ʻulungāanga fakaʻotua kehé, ʻoku tau fakafiefiaʻi ai ʻa Sihova pea maʻu ʻa e ʻamanaki fiefia ʻo e moʻui taʻengata ʻi he māmani foʻou māʻoniʻoni ʻa e ʻOtuá.

Fiefiá ko ha Meʻa ke Fili ki Ai

ʻI he taimi naʻe kamata ako fakamātoato ai ʻa e Tohi Tapú ʻe ha ongo meʻa ʻokú na nofo ʻi Siamane, ko Wolfgang mo Brigitte, naʻá na maʻu ʻa e ngaahi meʻa fakamatelie lahi ʻa ia ʻoku ongoʻi ʻe he kakaí ʻoku fiemaʻu ke hoko ai ʻo fiefiá. Naʻá na kei siʻi pea moʻui lelei. Naʻá na tui ʻa e ngaahi vala mamafa, nofo ʻi ha ʻapi teuteuʻi fakaʻofoʻofa pea maʻu ha pisinisi lavameʻa. Ko e lahi ʻo hona taimí naʻe fakamoleki ia ʻi he tuli ki he ngaahi meʻa fakamatelié, ka naʻe ʻikai ke ʻoange ʻe he meʻa ko iá kia kinaua ʻa e fiefia moʻoní. Neongo ia ʻi he faai mai ʻa e taimí, naʻe fai ai ʻe Wolfgang mo Brigitte ha fili mahuʻinga. Naʻá na kamata ke līʻoa ʻa e taimi lahi mo e feinga lahi ange ʻi he tuli ki he ngaahi meʻa fakalaumālié pea kumi ki ha ngaahi founga ke ʻunuʻunu ofi ange ai kia Sihova. Ko ʻena filí naʻe vave ʻa ʻene iku ki ha liliu ʻi heʻena fakakaukaú, ʻa ia naʻe iku ʻo ueʻi ai kinaua ke na fakafaingofuaʻi ʻa ʻena moʻuí pea ke na ngāue ko ha ongo tāimuʻa, pe ko e ongo ʻevangeliō taimi-kakato ʻo e Puleʻangá. ʻI he ʻahó ni, ʻokú na ngāue ai ko e ongo ngāue pole ʻi he ʻōfisi vaʻa ʻo e Kau Fakamoʻoni ʻa Sihova ʻi Siamané. Tānaki atu ki ai, ʻokú na ako ha lea faka-ʻĒsia koeʻuhi ke tokoniʻi ʻa e kau mulí ke nau ako ʻa e moʻoni ʻoku maʻu ʻi he Folofola ʻa e ʻOtuá, ko e Tohi Tapú.

Naʻe maʻu ʻe he ongo meʻá ni ʻa e fiefia moʻoní? ʻOku pehē ʻe Wolfgang: “Talu mei heʻema hoko ʻo kau lahi ange ʻi he tuli ki he ngaahi meʻa fakalaumālié, kuó ma fiefia lahi ange pea hokosia ʻa e fiemālie lahi ange. Ko e tauhi ʻaufuatō kia Sihová kuó ne toe ʻai ke mālohi ʻa ʻema nofo malí. Naʻá ma maʻu ha nofo mali fiefia ki muʻa, ka naʻe ʻi ai homa ngaahi ngafa mo e ngaahi manako ʻa ia naʻá ne fusi kimaua ki he ngaahi feituʻu kehekehe. ʻI he taimi ní ʻokú ma tuli fāʻūtaha ki he taumuʻa tatau.”

Ko e Hā ʻOku Fiemaʻu ke Hoko Ai ʻo Fiefiá?

ʻI ha fakamatala nounou: Fakaʻehiʻehi mei he “ngaahi ngaue ʻa Kakano” pea fakatupulekina ʻa e ‘fua ʻo e laumālie [ʻo e ʻOtuá].’ Ke hoko ʻo fiefiá, ʻoku fiemaʻu ke te hoholi ke maʻu ha vahaʻangatae vāofi mo e ʻOtuá. Ko ha tokotaha ʻoku feinga ke ne maʻu ení ʻe feʻungamālie ia mo e fakamatala ʻa Sīsū fekauʻaki mo ha tokotaha fiefiá.

Ko ia ai, ʻoua ʻe fakaʻosi hala ʻaki ko e fiefiá ʻe ʻikai lava ke ke aʻusia. Ko hono moʻoní, ʻi he lolotongá ni ʻoku ʻikai nai te ke maʻu ha moʻui lelei pe ʻoku aʻu nai ʻo ke maʻu ha ngaahi palopalema ʻi hoʻo nofo malí. Mahalo pē ko e ngaahi pale ʻo e hoko ko ha mātuʻa tauhi fānaú kuó ke fakalaka mei ai, pe ʻokú ke fāinga nai ke maʻu ha ngāue lavameʻa. Mahalo pē ʻoku ʻikai ke kei fonu ʻa hoʻo uāletí ʻo hangē ko ia naʻe angaʻakí. Ka neongo ia, loto-toʻa; ʻoku ʻikai ha ʻuhinga ke siva ai hoʻo ʻamanakí! Ko e pule ʻa e Puleʻanga ʻo e ʻOtuá te ne solova ʻa e ngaahi palopalemá ni mo e laui teau lahi ange. Ko e moʻoni, kuo vavé ni ke hanga ʻe Sihova ko e ʻOtuá ʻo fakahoko ʻa ʻene talaʻofa ʻoku fakahaaʻi ʻe he tokotaha-tohi-sāmé: “Ko hoʻo puleʻanga ko e puleʻanga ʻo e ngaahi kuonga kotoa . . . ʻOku ke folahi ho nima, pea ke fakamakona ʻa e holi ʻa e meʻa moʻui kotoa.” (Sāme 145:​13, 16) Hangē ko ia ʻoku lava ke fakamoʻoniʻi ʻe he laui miliona ʻo e kau sevāniti ʻa Sihova takatakai ʻi he māmaní, ko e hanganaki manatuʻi ʻa e talaʻofa fakafiemālie ko eni ʻa Sihová ʻe tokoni lahi ia ki hoʻo fiefia he ʻaho ní.​—Fakahā 21:3.

[Fakamatala ʻi lalo]

[Puha/Fakatātā ʻi he peesi 6]

Ngaahi Meʻa Tefito ʻOku Tokoni ki he Fiefiá

Ko e ʻofá ʻokú ne ueʻi ʻa e niʻihi kehé ke nau ʻofaʻi koe.

Ko e fiefiá ʻokú ne ʻoatu kia koe ʻa e mālohi ke fekuki ai mo e ngaahi palopalemá.

Ko e melinó ʻokú ne tokoniʻi koe ke tauhi ʻa ho ngaahi vahaʻangataé ke ʻatā mei he fekeʻikeʻí.

Ko e kātaki-fuoloá ʻokú ne fakamafeia koe ke ke hanganaki fiefia neongo ʻa e taimi ʻokú ke ʻi he malumalu ai ʻo e ʻahiʻahí.

Ko e anga-leleí ʻokú ne tohoakiʻi mai ʻa e niʻihi kehé kiate koe.

Ko e lelei ʻi hoʻo tafaʻakí ʻokú ne ʻai ʻa e niʻihi kehé ke nau tali ʻi he taimi ʻokú ke fiemaʻu ai ʻa e tokoní.

Ko e tuí ʻe fakapapauʻi ai kia koe ʻa e tataki ʻofa ʻa e ʻOtuá.

Ko e anga-maluú te ne ʻoatu kia koe ʻa e nonga ʻi he lotó, ʻatamaí mo e sinó.

Ko e mapuleʻi-kitá ʻoku ʻuhinga iá ʻe siʻi ange ai ʻa hoʻo ngaahi fehālaakí.

[Fakatātā ʻi he peesi 7]

Ke maʻu ʻa e fiefiá, ʻoku fiemaʻu ke ke fakalato ʻa hoʻo ngaahi fiemaʻu fakalaumālié