Naʻe Fanauʻi Kinautolu ko e Kakai Fili ʻa e ʻOtuá

“Kuo fili koe e Jihova ko ho Otua ke hoko koe kakai ofeina kiate ia.”—TEUTALONOME 7:​6, PM.

1, 2. Ko e hā ʻa e ngaahi ngāue kāfakafa naʻe fakahoko ʻe Sihova maʻa hono kakaí, pea ko e hā ʻa e vahaʻangatae naʻe maʻu ʻe he kau ʻIsilelí mo e ʻOtuá?

ʻI HE 1513 K.M., naʻe fokotuʻu ai ʻe Sihova hano vahaʻangatae foʻou mo ʻene kau sevāniti ʻi he māmaní. ʻI he taʻu ko iá naʻá ne tuku hifo ai ha puleʻanga hau ʻi he māmaní pea fakahaofi ʻa e kau ʻIsilelí mei he nofo pōpulá. ʻI heʻene fai iá, naʻá ne hoko ai ko honau Fakamoʻui mo e Tokotaha-ʻOku-ʻAʻana. Ki muʻa ke fai ʻeni ʻe he ʻOtuá, naʻá ne tala kia Mōsese: “Lea ki he fānau a Isileli, Ko au ko Jihova, bea teu omi akimoutolu kitua mei he gaahi kavega ae kakai Ijibite, bea teu fakagata a hoo mou bobula kiate kinautolu, bea teu huhui akimoutolu aki ae nima kuo mafao, moe gaahi tautea lahi: Bea teu maʻu akimoutolu kiate au ko hoku kakai, bea teu iate kimoutolu ko ho mou Otua.”—Ekisoto 6:​6, 7, PM; Ek 15:​1-7, 11.

² ʻI he taimi siʻi hili ʻenau Hiki mei ʻIsipité, naʻe maʻu ai ʻe he kau ʻIsilelí ha vahaʻangatae fuakava mo honau ʻOtuá, ʻa Sihova. ʻI he ʻikai ke feangai mo e faʻahinga tāutahá, ngaahi fāmilí pe nofo ʻa kāingá, ʻe maʻu ʻe Sihova ia ʻi he taimi ko ʻení ha kakai fokotuʻutuʻu maau, ko ha puleʻanga ʻi he māmaní. (Ekisoto 19:​5, 6; 24:7) Naʻá ne ʻoange ki hono kakaí ha ngaahi lao ʻa ia te ne puleʻi ʻenau nofó pea ko e meʻa mahuʻinga angé, ko ʻenau lotú. Naʻe pehē ʻe Mōsese kiate kinautolu: “Koefeʻia ha fuʻu puleʻanga ʻoku ai hanau ʻOtua ofi mai ʻo hange ko e ofi ʻa Sihova ko hotau ʻOtua ʻoka tau ka tautapa ki ai? Pea koefeʻia ha fuʻu kakai ʻoku ai haʻanau ngaahi tuʻutuʻuni mo konisitutone totonu, ʻo hange ko e lao ko e ni ʻa ia ʻoku ou tuku ʻi homou ʻao he ʻaho ni?”—Teutalonome 4:​7, 8.

Fanauʻi ki ha Puleʻanga ʻo e Kau Fakamoʻoni

3, 4. Ko e hā ha ʻuhinga mahuʻinga ki he hoko ʻa ʻIsileli ko ha puleʻangá?

³ ʻI he laui senituli ki mui, naʻe fakamanatu ai ʻe Sihova ki he kau ʻIsilelí fakafou ʻi heʻene palōfita ko ʻAiseá ha ʻuhinga mahuʻinga ki heʻenau hoko ko ha puleʻangá. Naʻe pehē ʻe ʻAisea: “Ko eni ʻa e folofola ʻa Sihova, ʻa ia naʻa ne ngaohi koe, ʻe Sekope, mo ia naʻa ne faʻu koe, ʻe Isileli: ʻOua te ke manavahe, he kuo u huhuʻi koe; kuo u ui hingoa koe; ʻoku oʻoku koe. He ko au Sihova ʻa ho ʻOtua, ko e Tapuha ʻo Isileli, ʻa ho Fakamoʻui; . . . ʻomi hoku ngaahi foha mei he mamaʻo na, mo hoku ngaahi ʻofefine mei he ngataʻanga ʻo mamani; ʻa ia kotoa ʻoku uiʻaki hoku hingoa: he kuo u fakatupu ia moku fakalangilangiʻi; kuo u faʻu ia; ʻio, kuo u ngaohi. Ko kimoutolu ʻa e kau fakamoʻoni aʻaku—ko Sihova ia mei he Taʻehamai—mo e sevaniti aʻaku kuo u fili: . . . ko e kakai kuo u ngaohi maʻaku, te nau aʻau hoku fakamalo.”—Aisea 43:​1, 3, 6, 7, 10, 21.

⁴ ʻI he tuʻunga ko ha kakai ʻoku ui ʻaki ʻa e huafa ʻo Sihová, ʻe hoko ai ʻa e kau ʻIsilelí ko ha kau fakamoʻoni ki hono tuʻunga-haú ʻi he ʻao ʻo e ngaahi puleʻangá. Te nau hoko ko ha kakai ‘naʻe fakatupu moʻó e langilangi ʻo Sihová.’ Te nau fakalau ‘ʻa e fakamālō ʻo Sihová,’ ʻo fakahā ʻene ngaahi ngāue fakaofo ʻo e fakahaofí pea fakalāngilangiʻi ai ʻa hono huafa māʻoniʻoní. ʻI hono ʻai mahinó, te nau hoko ko ha puleʻanga ʻo e kau fakamoʻoni maʻa Sihova.

 5. ʻI he founga fē naʻe hoko ai ʻa ʻIsileli ko ha puleʻanga ʻosi fakatapuí?

⁵ ʻI he senituli hono 11 K.M., naʻe fakahā ai ʻe Tuʻi Solomone naʻe ʻai ʻe Sihova ʻa ʻIsileli ko ha puleʻanga mavahe. Naʻá ne pehē ʻi heʻene lotu kia Sihová: “Kuo ke vaheʻi kinautolu mei he ngaahi kakai ʻo mamani moʻao tofiʻa.” (1 Tuʻi 8:53) Naʻe toe maʻu ʻe he kau ʻIsilelí fakatāutaha ha vahaʻangatae makehe mo Sihova. Ki muʻa hení, naʻe tala ʻe Mōsese kiate kinautolu: “Ko e fanau kimoutolu ʻa Sihova ko homou ʻOtua: . . . He ko e kakai tapu koe kia Sihova ko ho ʻOtua.” (Teutalonome 14:​1, 2) Ko ia ai, naʻe ʻikai fiemaʻu ki he fānau ʻIsilelí ia ke nau fakatapui ʻenau moʻuí kia Sihova. Naʻe fanauʻi mai kinautolu ia ko e ngaahi mēmipa ʻo e kakai fakatapui ʻa e ʻOtuá. (Sāme 79:13; 95:7) Ko e toʻutangata foʻou taki taha naʻe akoʻi ki ai ʻa e ngaahi lao ʻa Sihová pea naʻe pau ke nau tauhi ia koeʻuhi ko e fuakava naʻá ne haʻi ʻa ʻIsileli kia Sihová.—Teutalonome 11:​18, 19.

Tauʻatāina ke Fili

 6. Ko e hā ʻa e fili naʻe pau ke fai ʻe he kau ʻIsilelí fakatāutaha?

⁶ Neongo naʻe fanauʻi mai ʻa e kau ʻIsilelí ʻi ha puleʻanga ʻosi fakatapui, naʻe pau ki he tokotaha tāutaha ke ne fai ha fili fakafoʻituitui ke tauhi ʻa e ʻOtuá. Ki muʻa ke nau hū ki he Fonua ʻo e Talaʻofá, naʻe tala ʻe Mōsese kiate kinautolu: “ʻOku ou ui ni ki langi mo mamani ke hopo he ʻaho ni mo kimoutolu, ke fakamoʻoni kuo u fokotuʻu ʻi ho ʻao ʻa e moʻui mo e mate, ʻa e monu mo e mala: ko ia ke ke fili ki he moʻui ka ke moʻui, ʻa koe mo ho hako, ke ʻofa kia Sihova ko ho ʻOtua, ke fakaongo ki hono leʻo, pea ke pikitai kiate ia: he ko ia ia hoʻo moʻuiʻanga, mo e loloaʻanga ʻo ho ngaahi ʻaho: ka ke nofo ʻi he kelekele naʻe fuakava [ai] ʻe Sihova ki ho tupuʻanga, kia Epalahame, kia Aisake, pea kia Sekope, ke ʻatu moʻonautolu.” (Teutalonome 30:​19, 20) Ko ia ai, naʻe pau ki he kau ʻIsilelí fakatāutaha ke nau fili ke ʻofa kia Sihova, ke fakaongo ki hono leʻó, pea ke pīkitai kiate ia. Koeʻuhi naʻe maʻu ʻe he kau ʻIsilelí ʻa e tauʻatāina ke filí, naʻe pau ai ke nau tali ʻa e ngaahi ola ʻo ʻenau filí.—Teutalonome 30:​16-18.

 7. Ko e hā naʻe hoko ʻi he hili ʻa e mate ʻa e toʻutangata ʻo Siosiuá?

⁷ ʻOku fakahāhaaʻi mahino mai ʻe he vahaʻa taimi ʻo e kau Fakamāú ʻa e ngaahi ola ʻo e faitōnungá pea mo e taʻefaitōnungá. Ki muʻa siʻi pē pea kamata ʻa e vahaʻa taimi ko iá, naʻe muimui ʻa e kau ʻIsilelí ʻi he faʻifaʻitakiʻanga lelei ʻa Siosiuá pea naʻe tāpuekina ai kinautolu. “Naʻe tauhi ʻa Sihova ʻe he kakai lolotonga ʻa e moʻui ʻa Siosiua, pea lolotonga ʻa e moʻui ʻa e kau matuʻa naʻa nau tolonga ʻia Siosiua, ʻakinautolu naʻa nau mamata ki he ngaue lahi ʻa Sihova, ʻa ia kuo ne fai maʻa Isileli.” Kae kehe, ʻi ha taimi hili ʻa e mate ʻa Siosiuá, “naʻe tupu ki mui ha toʻutangata kehe, ʻa ia kuo ʻikai te nau ʻilo ʻa Sihova, ʻumaʻa ʻa e ngāue naʻa ne fai maʻa Isileli. Pea naʻe fai ʻe haʻa Isileli ʻa e meʻa naʻe tau kovi ki he finangalo ʻo Sihova.” (Fakamaau 2:​7, 10, 11) ʻOku hā mahino, naʻe ʻikai ke koloaʻaki ʻe he toʻutangata kei siʻi ange mo taʻetaukei ko ʻení ʻa honau tofiʻa ko e kau mēmipa ʻo ha kakai ʻosi fakatapuí, ʻa ē naʻe fakahoko ʻe Sihova ko honau ʻOtuá ha ngaahi ngāue kāfakafa maʻanautolu ʻi he kuohilí.—Sāme 78:​3-7, 10, 11.

Moʻuiʻaki ʻEnau Fakatapuí

8, 9. (a) Ko e hā ʻa e fokotuʻutuʻu naʻá ne fakaʻatā ai ʻa e kau ʻIsilelí ke nau fakahāhā ʻenau fakatapui kia Sihová? (e) Ko e hā naʻe maʻu ʻe he faʻahinga ko ia naʻa nau fai ʻa e ngaahi feilaulau loto-tauʻatāiná?

⁸ Naʻe ʻoange ʻe Sihova ki hono kakaí ha ngaahi faingamālie ke nau moʻuiʻaki ai ʻenau fakatapui ko ha puleʻangá. Hangē ko ʻení, naʻe tokonaki mai ʻe heʻene Laó ha founga ʻo e ngaahi feilaulaú pe ngaahi foakí, ʻa ia ko e niʻihi naʻe pau ke fakahoko, lolotonga iá ko e niʻihi ai naʻe fai ʻi he loto-tauʻatāina. (Hepelu 8:3) Naʻe kau ʻi he ngaahi feilaulau peheé ʻa e ngaahi feilaulau-tutu, ngaahi feilaulau-meʻakai, mo e ngaahi feilaulau-ʻofa, ʻa ia ko e ngaahi meʻaʻofa loto-tauʻatāina kotoa ia naʻe foaki kia Sihova ke maʻu mai ʻaki ʻene hōifuá mo fakahaaʻi ʻa e fakamālō.—Livitiko 7:​11-13.

⁹ Naʻe hāngaifofonga ʻa Sihova ki he ngaahi feilaulau loto-tauʻatāina ko iá. Naʻe pehē ko e feilaulau-tutú mo e feilaulau-meʻakaí “koe mea namu kakala kia Jihova.” (Livitiko 1:​9, PM; Li 2:2) ʻI he feilaulau-ʻofá, naʻe foaki ai ʻa e toto mo e ngako ʻo e monumanú kia Sihova, lolotonga iá ko e konga ʻo e kanomaté naʻe kai ia ʻe he kau taulaʻeikí mo e tokotaha foaki feilaulaú. Naʻe hoko ia ko ha houa kai fakaefakatātā ʻokú ne fakaʻilongaʻi ha vahaʻangatae melino mo Sihová. Naʻe pehē ʻe he Laó: “Ka mou ka feia ha ngaahi feilaulau ʻofa kia Sihova, mou fai pe ke ne hoifua ai kiate kimoutolu.” (Livitiko 19:5) Neongo naʻe ʻosi fakatapui ʻa e kau ʻIsilelí kotoa kia Sihova fakafou ʻi honau fāʻeleʻi maí, ko e faʻahinga ko ia naʻa nau fai mohu ʻuhinga ʻenau fakatapuí ʻaki hono fai ʻa e ngaahi feilaulau loto-tauʻatāiná naʻe ‘hoifua ʻa Sihova kiate kinautolu’ peá ne tāpuakiʻi lahi kinautolu.—Malakai 3:10.

10. Naʻe anga-fēfē hono fakahaaʻi ʻe Sihova ʻene taʻehōifuá ʻi he ngaahi ʻaho ʻo ʻAiseá pea mo Malakaí?

¹⁰ Kae kehe, naʻe toutou taʻefaitōnunga ʻa e puleʻanga ʻosi fakatapui ʻo ʻIsilelí kia Sihova. Naʻe pehē ʻe Sihova kiate kinautolu fakafou ʻi heʻene palōfita ko ʻAiseá: “Oku heeki te ke omi ae faga lami o hoo gaahi feilaulau tutu; bea teeki ai te ke fakaabaaba aki hoo gaahi feilaulau. Nae ikai teu fekau ke ke tauhi au aki ha mea foaki.” (Aisea 43:​23, PM) Tānaki atu ki ai, ko e ngaahi feilaulau naʻe ʻikai ke fai loto-leleí pea ʻikai fai ʻi he ʻofá naʻe ʻikai mahuʻinga ia ʻi he vakai ʻa Sihová. Ko e fakatātaá, ʻi he taʻu nai ʻe 300 hili ʻa ʻAiseá, ʻi he ngaahi ʻaho ʻo e palōfita ko Malakaí, naʻe feilaulauʻaki ai ʻe he kau ʻIsilelí ʻa e fanga manu naʻe mele. Ko ia ai, naʻe tala ʻe Malakai kiate kinautolu: “Oku ikai teu lelei ia iate kimoutolu, oku behe e Jihova oe gaahi kau tau, bea e ikai teu maʻu ha feilaulau mei ho mou nima. . . . bea naa mou omi aia nae lavea, bea moe ketu, bea moe mahaki; nae behe be a hoo mou omi ae feilaulau: bea e totonu koa a eku maʻu ia mei ho mou nima? oku behe e Jihova.”—Malakai 1:​10, 13, PM; Emosi 5:22.

Siʻaki ʻi he Tuʻunga ko ha Puleʻanga ʻOsi Fakatapui

11. Ko e hā ʻa e faingamālie naʻe ʻoange ki ʻIsilelí?

¹¹ ʻI he taimi naʻe hoko ai ʻa e kau ʻIsilelí ko ha puleʻanga ʻosi fakatapui kia Sihová, naʻá ne talaʻofa ange kiate kinautolu: “Kabau te mou tuitala mooni ki hoku leʻo, o tauhi eku fuakava, te mou iate au koe koloa lelei lahi i he kakai kotoabe: he oku ooku a mamani kotoabe. Bea te mou iate au koe buleaga oe kau taulaeiki, moe kakai maonioni.” (Ekisoto 19:​5, 6, PM) ʻE hā ʻa e Mīsaia naʻe talaʻofaʻakí ʻi honau lotolotongá ʻo ʻoange kiate kinautolu ʻa e ʻuluaki faingamālie ke hoko ai ko e kau mēmipa ʻo e Puleʻanga ʻo e ʻOtuá. (Senesi 22:​17, 18; 49:10; 2 Samiuela 7:​12, 16; Luke 1:​31-33; Loma 9:​4, 5) Ka ko e tokolahi taha ʻo e puleʻanga ʻIsilelí naʻe ʻikai te nau moʻuiʻaki ʻenau fakatapuí. (Mātiu 22:14) Naʻa nau siʻaki ʻa e Mīsaiá pea faai atu pē ʻo nau fakapoongi ia.—Ngāue 7:​51-53.

12. Ko e hā ʻa e lea naʻe fai ʻe Sīsū ʻoku fakahaaʻi ai naʻe siʻaki ʻa ʻIsileli ʻi honau tuʻunga ko e puleʻanga ʻosi fakatapui kia Sihová?

¹² ʻI ha ngaahi ʻaho siʻi ki muʻa heʻene pekiá, naʻe tala ange ai ʻe Sīsū ki he kau taki lotu Siú: “Kuo teʻeki koā ke mou lau ʻi he Tohitapu? Ko e maka ne fakataleʻi ʻe he kau tufunga kuo hoko ʻo tuliki tauʻolunga: ko e meʻa mei he ʻEiki ia, pea fakaofo ki hotau mata. Ko ia ʻoku ou tala atu, ʻE toʻo meiate kimoutolu ʻa e Puleʻanga ʻo e ʻOtua, pea ʻe tuku ki ha kakai ʻoku fua ʻo tāu mo ia.” (Mātiu 21:​42, 43) ʻI hono fakahaaʻi naʻe siʻaki kinautolu ʻe Sihova ʻi he tuʻunga ko ha puleʻanga ʻosi fakatapui kiate Iá, naʻe pehē ʻe Sīsū: “E Jelusalema, Jelusalema, akoe oku ke tamateʻi ae kau balofita, mo ke tologaki aki ae maka akinautolu oku fekau atu kiate koe, kuo liuga fiha eku fie tanaki fakataha hoo fānau, o hage koe tanaki fakataha e he motua moa ene fānau i hono lalo kabakau, ka nae ikai te mou loto ki ai! Vakai, kuo jiaki ho mou fale kiate kimoutolu ke lala aubito.”—Mātiu 23:​37, 38, PM.

Ko ha Puleʻanga Foʻou ʻOsi Fakatapui

13. Ko e hā ʻa e folofola fakaekikite naʻe fai ʻe Sihova ʻi he ngaahi ʻaho ʻo Selemaiá?

¹³ ʻI he taimi ʻo e palōfita ko Selemaiá, naʻe tomuʻa tala ai ʻe Sihova ha meʻa foʻou fekauʻaki mo hono kakaí. ʻOku tau lau: “Vakai ʻoku hoko mai ha taimi—ko Sihova ia mei he Taʻehamai—ʻa ia te u fai ai mo e fale ʻo Isileli mo e fale ʻo Siuta ha fuakava foʻou—taha kehe ʻa e fuakava ne u fai mo ʻenau ngaahi kui ʻi he taimi naʻa ku puke honau nima ke taki mai mei Isipite; ʻa e kovinanite ko ia aʻaku naʻa nau maumauʻi, ʻosi naʻa ku nofo ʻe au ko honau husepaniti—ko Sihova ia mei he Taʻehamai. Ka ko eni ʻa e kovinanite te u fai mo e fale ʻo Isileli hili ʻa e taimi ko é—ko Sihova eni mei he Taʻehamai—te u ʻai ki loto ʻeku lao, ʻio, te u tongi ia ki honau loto; pea te u nofo ko honau ʻOtua, pea te nau nofo ko hoku kakai.”—Selemaia 31:​31-33.

14. ʻAnefē pea makatuʻunga ʻi he hā ʻa e hoko mai ʻa e puleʻanga foʻou ʻosi fakatapui ʻa Sihová? Fakamatalaʻi ʻa e puleʻanga foʻou ko iá.

¹⁴ Naʻe fakatoka ʻa e makatuʻunga ki he fuakava foʻou ko ʻení ʻi he taimi naʻe pekia ai ʻa Sīsuú peá ne foaki ki mui ai ʻa e mahuʻinga ʻo hono taʻataʻa naʻe lilingí ki heʻene Tamaí, ʻi he 33 T.S. (Luke 22:20; Hepelu 9:​15, 24-26) Kae kehe, ʻi hono huaʻi hifo ʻa e laumālie māʻoniʻoní ʻi he Penitekosi ʻo e 33 T.S. pea mo hono fanauʻi ʻo ha puleʻanga foʻoú, ʻa e “Isileli oe Otua,” naʻe ngāue leva ai ʻa e fuakava foʻoú. (Kaletia 6:​16, PM; Loma 2:​28, 29; 9:6; 11:​25, 26) Naʻe pehē ʻe he ʻapositolo ko Pitá ʻi heʻene tohi ki he kau Kalisitiane paní: “Ko kimoutolu ko e haʻa fili, ko e tuʻunga taulaʻeiki fakatuʻi, ko e kakai tapu, ko e faʻahinga ʻoku maʻane meʻa tonu, koeʻuhiā ke mou ongoongoa atu ʻa e ngaahi lelei ʻo ʻEne ʻAfio, ʻa ia naʻa ne ui mai kimoutolu mei he poʻuli ki he maama fakaofo aʻana: ʻa kimoutolu ʻa ia ko e ʻataʻi kakai ʻi muʻa, ka ko eni ko e kakai ʻa e ʻOtua.” (1 Pita 2:​9, 10) Ko e vahaʻangatae makehe ʻo Sihova mo e puleʻanga ʻo ʻIsilelí naʻe ngata ia. ʻI he 33 T.S., naʻe hiki ai ʻa e hōifua ʻa Sihová mei ʻIsileli ʻi he māmaní ki he ʻIsileli fakalaumālie, ko e fakatahaʻanga Kalisitiané, ko ‘ha kakai ʻoku fua ʻo tāu’ mo e Puleʻanga Faka-Mīsaiá.—Mātiu 21:43.

Fakatapui Fakatāutaha

15. ʻI he ʻaho ʻo e Penitekosi ʻo e 33 T.S., ko e hā ʻa e papitaiso naʻe enginaki ʻa Pita ki heʻene kau fanongó ke nau fouá?

¹⁵ ʻI he hili ʻa e Penitekosi ʻo e 33 T.S., ko e tokotaha tāutaha kotoa, Siu pe Senitaile, naʻe pau ke ne fai ha fakatapui fakafoʻituitui ki he ʻOtuá pea papitaiso ʻi he “Huafa ʻo e Tamai mo e ʻAlo mo e Laumalie Maʻoniʻoni.”a (Mātiu 28:19) ʻI he Penitekosí, naʻe tala ange ai ʻe he ʻapositolo ko Pitá ki he kau Siu mo e kau ului Siu fiefanongó: “Mou fei mo fakatomala, pea taki taha papitaiso ʻi he huafa ʻo Sīsū ko e Misaia, ki he fakamolemole ʻo hoʻomou ngaahi angahala, pea te mou maʻu ʻa e meʻaʻofa ko e Laumālie Maʻoniʻoni.” (Ngāue 2:38) Naʻe pau ki he kau Siu mo e kau ului Siu ko iá ke nau fakaʻilongaʻi ʻaki ʻenau papitaisó ʻa e ʻikai ngata pē ʻi heʻenau fakatapui ʻenau moʻuí kia Sihová kae toe pehē foki ki heʻenau tali ʻa Sīsū ko e founga ia ʻe fakamolemoleʻi ai ʻe Sihova ʻenau ngaahi angahalá. Naʻe pau ke nau lāuʻilo kia Sīsū ko e Taulaʻeiki Lahi ia ʻa Sihová pea ko honau Takí ia, ʻa ia ko e ʻUlu ʻo e fakatahaʻanga Kalisitiané.—Kolose 1:​13, 14, 18.

16. ʻI he ʻaho ʻo Paulá, naʻe anga-fēfē ʻa e hoko ʻa e kau Siu mo e kau Senitaile naʻe hehema totonu honau lotó, ko e konga ʻo e ʻIsileli fakalaumālié?

¹⁶ Hili ha ngaahi taʻu mei ai, naʻe pehē ʻe he ʻapositolo ko Paulá: “Naʻa ku kamata tala ke nau fakatomala pea tafoki ki he ʻOtua, he ʻenau fai ʻa e ngaahi ngāue ʻoku hoa mo e fakatomala; pea u fua fai ʻi Tamasikusi, pea hili ia ʻi Selusalema, mo e fonua kotoa ʻo Siutea, pea ki he Senitaile.” (Ngāue 26:20) ʻI he hili hono fakatuipauʻi ʻa e kakaí, ʻa e kau Siú mo e kau Senitailé ʻo pehē ko Sīsū ʻa e Kalaisí, ʻa e Mīsaiá, naʻe tokoniʻi kinautolu ʻe Paula ke nau fakatapui mo papitaiso. (Ngāue 16:​14, 15, 31-33; 17:​3, 4; 18:8) ʻI he tafoki ki he ʻOtuá, naʻe hoko ai ʻa e kau ākonga foʻou ko iá ko e ngaahi mēmipa ʻo e ʻIsileli fakalaumālié.

17. Ko e hā ʻa e ngāue silaʻi ʻoku ofí ni ke ngatá, pea ko e hā ʻa e ngāue kehe ʻoku lolotonga fakahoko vavé?

¹⁷ ʻI he ʻahó ni, ko hono silaʻi fakaʻosi ʻo e toenga ʻo e kau ʻIsileli fakalaumālié ʻoku ofi. ʻI heʻene kakato iá, ʻe fakamafaiʻi leva ʻa e kau “ʻangelo ʻe toko fa” ʻoku nau pukepuke ʻa e ngaahi matangi ʻo e fakaʻauha ko e “mamahi lahi” ke nau tukuange mai kinautolu. ʻI he taimi tatau, ko hono fakatahatahaʻi ʻo e “fuʻu kakai lahi,” ʻa ia ʻoku nau ʻamanaki ke moʻui taʻengata ʻi he māmaní, ʻoku fakahoko vave ia. ʻOku fili tauʻatāina ʻa e “fanga sipi kehe” ko ʻení ke nau ngāueʻi ʻa e tui ki he “taʻataʻa ʻo e Lami” pea papitaiso ko hono fakaʻilongaʻi ʻo ʻenau fakatapui kia Sihová. (Fakahā 7:​1-4, 9-15; 22:17; Sione 10:16; Mātiu 28:​19, 20) ʻOku ʻi honau lotolotongá ʻa e fānau tokolahi kuo tauhi hake ʻe he ngaahi mātuʻa Kalisitiane. Kapau ko ha taha koe ʻo e fānau ko iá, te ke mahuʻingaʻia ʻi hono lau ʻa e kupu hoko maí.

[Fakamatala ʻi lalo]

ʻI he Fakamanatú

• Ko e hā naʻe ʻikai fiemaʻu ai ki he kau ʻIsileli kei siʻí ke nau fai ha fakatapui fakafoʻituitui kia Sihová?

• Naʻe malava fēfē ʻe he kau ʻIsilelí ke fakahāhā naʻa nau moʻuiʻaki ʻenau fakatapuí?

• Ko e hā naʻe siʻaki ai ʻe Sihova ʻa ʻIsileli ʻi he tuʻunga ko ha puleʻanga ʻosi fakatapuí, pea naʻe anga-fēfē hono fetongi iá?

• Mei he Penitekosi ʻo e 33 T.S. ʻo faai mai, ko e hā naʻe pau ke fai fakatouʻosi ʻe he kau Siú mo e kau Senitailé ka nau hoko ai ko e kau mēmipa ʻo e ʻIsileli fakalaumālié?

[Fakatātā ʻi he peesi 21]

Ko e fānau ʻIsilelí naʻe fanauʻi mai ko e ngaahi mēmipa ʻo e kakai fili ʻa e ʻOtuá

[Fakatātā ʻi he peesi 23]

Naʻe pau ki he ʻIsileli taki taha ke ne fai ha fili fakafoʻituitui ke tauhi ʻa e ʻOtuá

[Fakatātā ʻi he peesi 23]

Naʻe ʻoange ʻe he ngaahi feilaulau loto-tauʻatāiná ki he kau ʻIsilelí ʻa e faingamālie ke fakahāhā ai ʻenau ʻofa kia Sihová

[Fakatātā ʻi he peesi 25]

Hili ʻa e Penitekosi ʻo e 33 T.S., naʻe pau ki he kau muimui ʻo Kalaisí ke nau fai ha fakatapui fakafoʻituitui ki he ʻOtuá pea fakaʻilongaʻi ia ʻaki ʻa e papitaiso