Tokanga Anga-ʻOfa ʻa Sihova ki Heʻene Kau Sevāniti Taʻumotuʻá

“Talaʻehai ʻoku fai taʻetotonu ʻa e ʻOtua ke ne fakangaloʻi hoʻomou ngaue, mo e ʻofa ki hono huafa naʻe ha ʻiate kimoutolu.”—HEP. 6:10.

1, 2. (a) Ko e sio ki ha tokotaha ʻulu hinaá ʻoku fakamanatu atu nai ai kiate koe ʻa e hā? (e) ʻOku anga-fēfē ʻa e vakai mai ʻa Sihova ki he kau Kalisitiane taʻumotuʻá?

ʻI HE taimi ʻokú ke sio ai ki he faʻahinga taʻumotuʻa ʻi he fakatahaʻangá ʻoku nau ʻulu hinaá, ʻokú ke manatuʻi ha talanoa ʻi he tohi Tanielá ʻi he Tohi Tapú? ʻI ha vīsone naʻá Ne ʻoange kia Taniela, naʻe fakahaaʻi ai ia ʻe he ʻOtua ko Sihová ʻokú ne ʻulu hinā. Naʻe tohi ʻe Taniela: “Naʻa ku moʻu sioa pe, kaeʻoua ke fokotuʻu ʻani ngaahi taloni, pea ʻafio mai ʻa Talumeimuʻa: ko hono kofu naʻe hange ko e sinou, ʻo hinaekiaki, pea ko hono louʻulu naʻe hange ko e fulufuluʻi sipi maʻa.”—Tan. 7:9.

² ʻI hono tuʻunga fakanatulá, ʻoku faʻa maʻu ʻe he fulufuluʻi sipí ʻa e lanu maʻa hinehina. Ko ia ai, ko e ʻulu hinaá mo e hingoa fakalakanga ko e “Talumeimuʻa” ʻoku fakahanga ai ʻa e tokangá ki he fuʻu taʻu lahi mo e poto ʻo e ʻOtuá, ʻa ia ʻoku fakatou tuha ia mo ʻetau ʻapasia loloto tahá. ʻOku fēfē leva ʻa e vakai mai ʻa Talumeimuʻa, ʻa Sihova, ki heʻetau kau tangataʻeiki mo e kau fineʻeiki taʻumotuʻá? ʻOku pehē ʻi he folofola ʻa e ʻOtuá ko e “ʻuluhina ko e kalauni matamatalelei ʻoku maʻu ʻi he hala ʻo e faitotonu.” (Pal. 16:31) ʻIo, kapau kuo hoko ha Kalisitiane faitōnunga ʻo ʻulu hinā pe ʻulu tea, ko ha fōtunga matuʻotuʻa pehē ʻoku fakaʻofoʻofa ia ʻi he vakai mai ʻa e ʻOtuá. ʻOkú ke vakai ki ho fanga tokoua mo e tuofāfine taʻumotuʻá ʻo hangē ko e vakai kia kinautolu ʻa Sihová?

Ko e Hā ʻOku Nau Mātuʻaki Mahuʻinga Aí?

 3. Ko e hā ʻoku mātuʻaki mahuʻinga ai kiate kitautolu ʻa e kaungātui taʻumotuʻá?

³ ʻOku ʻi he haʻohaʻonga ʻo e kau sevāniti taʻumotuʻa ʻofeina ko ia ʻa e ʻOtuá ʻa e kau mēmipa ʻo e Kulupu Pule ʻa e Kau Fakamoʻoni ʻa Sihová, ko e kau ʻovasia fefonongaʻaki lolotonga pea ki muʻa, kau tāimuʻa faivelenga, mo e kau malanga matuʻotuʻa ʻo e Puleʻangá—ko e fanga tokoua mo e fanga tuofāfine ʻoku nau ngāue faitōnunga ʻi heʻetau ngaahi fakatahaʻangá. ʻOkú ke ʻiloʻi nai ʻa e niʻihi kuo nau malangaʻi faivelenga ʻa e ongoongo leleí ʻi he laui hongofuluʻi taʻu pea ko ʻenau faʻifaʻitakiʻanga leleí kuo tokoni ia ki hono ueʻi ʻa e faʻahinga taʻu iiki angé pea fakafuo ʻenau moʻuí. Ko e kaungātui taʻumotuʻa ʻe niʻihi kuo nau fua ʻa e ngaahi fatongia mamafa pea kuo nau kātekina ʻa e fakatangá koeʻuhi ko e ongoongo leleí. Ko Sihova mo e “tamaioeiki agatonu mo boto” ʻoku nau fakahoungaʻi lahi ʻenau ngaahi tokoni kotoa ʻi he kuohilí mo e lolotongá ni ki he ngāue ʻo e Puleʻangá.—Mt. 24:45, PM.

 4. Ko e hā ʻoku totonu ai ke tau fakaʻapaʻapaʻi e kau Kalisitiane taʻumotuʻá pea lotu maʻanautolú?

⁴ Ko e faʻahinga faitōnunga taʻumotuʻa peheé ʻoku nau tuha mo e fakahoungaʻi mo e tokaʻi ʻe he kau sevāniti kehe ʻa e ʻOtua ko Sihová. Ko hono moʻoní, ko e Lao ʻa e ʻOtuá kuo ʻomai fakafou ʻia Mōsesé ʻoku fakafehokotaki ai ʻa e fakaʻatuʻi mo e fakaʻapaʻapa ki he kau taʻumotuʻá pea mo e manavahē kia Sihová. (Liv. 19:32) ʻOku totonu ke tau lotu maʻu pē maʻá e faʻahinga faitōnunga ko ení pea fakamālō ki he ʻOtuá ʻi heʻenau ngaahi ngāue ʻofá. Naʻe lotu ʻa e ʻapositolo ko Paulá maʻa hono kaungāngāue ʻofeiná, ʻa e iiki mo e lalahi.—Lau ʻa e 1 Tesalonaika 1:2, 3.

 5. ʻE lava fēfē ke tau maʻu ʻaonga mei he feohi mo e kau lotu taʻumotuʻa ʻa Sihová?

⁵ ʻIkai ko ia pē, ko e faʻahinga kotoa ʻi he fakatahaʻangá ʻoku lava ke nau maʻu ʻaonga mei he feohi mo e kau Kalisitiane taʻumotuʻá. Fakafou ʻi he ako, sio mo e meʻa kuo hokosiá, kuo tātānaki ai ʻe he kau lotu taʻumotuʻa faitōnunga ʻa Sihová ʻa e ʻilo mātuʻaki mahuʻinga. Kuo nau ako ke ngāueʻi ʻa e kātakí pea fakahāhā ʻa e kaungāongoʻi, pea ʻi heʻenau tuku atu ʻa e meʻa kuo nau akó ki he toʻutangata hono hokó ʻoku nau maʻu ai ʻa e fiefia mo e fiemālie lahi. (Sāme 71:18) Fānau, mou poto ʻo ʻutu mei he matavai ko eni ʻo e ʻiló ʻo hangē ko haʻamou ʻutu vai mei ha vaitupu loloto.—Pal. 20:5.

 6. ʻE lava fēfē ke ke fakahāhā ki he faʻahinga taʻumotuʻá ʻokú ke fakamahuʻingaʻi moʻoni kinautolu?

⁶ ʻOkú ke ʻai ke ʻiloʻi ʻe he faʻahinga taʻumotuʻá ʻokú ke koloaʻaki kinautolu ʻo hangē ko hono koloaʻaki kinautolu ʻe Sihová? Ko e founga ʻe taha ʻe lava ke ke fai ai iá ko hono tala ange ʻa e lahi ʻo hoʻo ʻofa ʻiate kinautolu ʻi heʻenau faitōnungá pea mo hoʻo fakamahuʻingaʻi ʻenau fakakaukaú. ʻIkai ngata aí, ʻi hoʻo fai ki he meʻa kuó ke ako meiate kinautolú, ʻokú ke fakahāhā ai ʻoku moʻoni hoʻo fakaʻapaʻapa kiate kinautolú. ʻOku lava ke manatu ʻa e kau Kalisitiane taʻumotuʻa tokolahi ki he faleʻi fakapotopoto naʻa nau maʻu mei he faʻahinga taʻumotuʻa faitōnungá mo e anga ʻenau maʻu ʻaonga mei he fai ki ai ʻi he kotoa ʻo ʻenau moʻuí.a

Fakahaaʻi ʻa e Ongoʻi ʻOfá ʻi he Ngaahi Founga ʻAonga

 7. Ko hai ʻoku ʻoange ki ai ʻe Sihova ʻa e fatongia tefito ke tokangaʻi ʻa e faʻahinga taʻumotuʻá?

⁷ ʻOku ʻoange ʻe he ʻOtuá ki he ngaahi fāmili ʻo e faʻahinga taʻumotuʻá ʻa e fatongia tefito ke tokonaki maʻanautolu. (Lau ʻa e 1 Timote 5:4, 8.) ʻOku hōifua ʻa Sihova ʻi he taimi ʻoku fakahoko ai ʻe he ngaahi fāmilí honau fatongia ki he ngaahi kāinga taʻumotuʻá pea fakahaaʻi ai ʻoku nau tokanga fekauʻaki mo e faʻahinga taʻumotuʻá ʻo hangē ko Iá. ʻOku tokoniʻi ʻe he ʻOtuá ʻa e ngaahi fāmili ko ení pea tāpuakiʻi kinautolu ʻi heʻenau ngaahi feingá pea ʻi he kotoa ʻo ʻenau ngaahi feilaulaú.b

 8. Ko e hā ʻoku totonu ai ke fakahāhā ʻe he ngaahi fakatahaʻangá ʻenau tokanga ki he kau Kalisitiane taʻumotuʻá?

⁸ ʻOku toe hōifua ʻa Sihova ʻi he taimi ʻoku tokoniʻi ai ʻe he ngaahi fakatahaʻanga fakalotofonuá ʻa e faʻahinga taʻumotuʻa faitōnunga ʻoku nau masiva ka ʻoku ʻikai hanau ngaahi mēmipa ʻi he fāmilí ʻe kau ʻi he tuí pe loto-lelei ke tokangaʻi kinautolu. (1 Tim. 5:3, 5, 9, 10) ʻOku fakahaaʻi ai ʻe he ngaahi fakatahaʻangá ʻoku nau maʻu ʻa e ‘kaungāmamahi, feʻofaʻaki fakalotu, mo e manavaʻofa’ ki he kau taʻumotuʻá. (1 Pita 3:8) Ko ʻenau tokanga ki he kau mēmipa taʻumotuʻa ʻi he fakatahaʻangá ʻoku fakatātaaʻi lelei ia ʻe Paula ʻi heʻene fakahaaʻi kapau ʻoku mamahi ha kupu ʻe taha ʻo e sino fakaetangatá, “ʻoku kaungā mamahi mo ia ʻa e kupu kotoa pe.” (1 Kol.1Ko 12:26) Ko e ngāue ʻaonga mo manavaʻofa maʻá e faʻahinga taʻumotuʻá ʻoku fakahāhā ai ʻa e tefitoʻi moʻoni ʻoku tuʻu mei mui ʻi he akonaki ʻa Paulá: “Mou fetoutou fefuaʻaki homou ngaahi mafaisiaʻanga: pea ʻi hoʻomou fai pehē, kuo mou ʻosiki ʻaupito ʻa e lao ʻa Kalaisi.”—Kal. 6:2.

 9. Ko e hā ʻa e ngaahi mafasiaʻanga ʻe lava ke hoko ki ha taha ʻi he taʻumotuʻá?

⁹ Ko e hā ʻa e ngaahi mafasiaʻanga ʻoku fua ʻe he faʻahinga taʻumotuʻá? Ko e tokolahi ʻoku nau helaʻia vave. ʻOku nau ongoʻi nai ʻi hono fai naʻa mo e ngaahi meʻa tefitó—ʻa e ʻalu ki he toketaá, fai ʻo e ngāue fakapepá, fakamaʻa ʻo e falé, teuteu ʻa e meʻatokoní—ʻoku mahulu atu ia ʻi heʻenau malavá. Koeʻuhi ko e fiekaiá mo e fieinuá ʻoku fakaʻaʻau ke mole ia ʻi he ʻalu ʻa e taʻumotuʻá, ʻoku nau fakakaukau nai ai ʻoku ʻikai fiemaʻu ia ke nau kai pe inu ke lahi ʻo hangē ko ia ʻoku totonu ke nau faí. ʻOku lava ke pehē mo e kai fakalaumālié. Ko e hoholo ʻa e matá mo e telingá ʻokú ne ʻai nai ʻa e lautohí mo e fanongo ki he ngaahi polokalama fakalaumālié ke faingataʻa, pea ko e teuteu pē ke ʻalu ki he ngaahi fakataha faka-Kalisitinaé ʻe hoko nai ia ko e fakaongosia. Ko e hā leva ʻe lava ke fai ʻe he niʻihi kehé maʻá e faʻahinga taʻumotuʻa peheé?

Founga ʻe Lava Ai Ke Ke Tokoní

10. Ko e hā ʻe lava ke fai ʻe he kau mātuʻá ke fakapapauʻi ʻoku maʻu ʻe he faʻahinga taʻumotuʻá ʻa e tokoni ʻaonga?

¹⁰ ʻI he ngaahi fakatahaʻanga lahi, ʻoku tokangaʻi ai ʻa e kau taʻumotuʻá ʻi ha founga alafaʻifaʻitakiʻanga. Ko e fanga tokoua mo e fanga tuofāfine ʻofá ʻoku nau tokoniʻi kinautolu ʻi he faifakataú, feimeʻatokoní mo e fakamaʻá. ʻOku nau tokoniʻi ʻa e kau taʻumotuʻá ke nau ako, teuteu ki he ngaahi fakatahá, pea ke ʻalu maʻu pē ʻi he ngāue fakafaifekaú. Ko e Kau Fakamoʻoni kei siʻi angé ʻoku nau ʻalu fakataha mo kinautolu pea tokonaki ʻa e meʻalele. Kapau ʻoku ʻikai lava ke mavahe ʻa e faʻahinga taʻumotuʻá mei ʻapi, ʻoku fakahoko kinautolu ʻi he telefoní ki he ngaahi fakatahá pe hiki tepi ʻa e ngaahi fakatahá maʻanautolu. ʻI he faingamālié, ʻoku fakapapauʻi ʻe he kau mātuʻá ʻoku fakahoko ʻa e ngaahi fokotuʻutuʻu ʻaonga koeʻuhi ke fakalato ʻa e ngaahi fiemaʻu ʻa e faʻahinga taʻumotuʻa ʻi he fakatahaʻangá.c

11. Fakamatala ki he anga hono tokoniʻi ʻe ha fāmili ha tokoua taʻumotuʻa.

¹¹ Ko e kau Kalisitiane tāutahá foki ʻe lava ke nau fakaaʻu atu ʻa e anga-talitali kakai pea fakahāhā ʻa e nima-homo. Hili e mate ʻa e uaifi ʻo ha tokoua taʻumotuʻa ʻe taha, naʻe ʻikai ke ne kei lava ke totongi ʻa e falé ʻo taʻekau ai e penisoni ʻa e uaifí. Ko ia mo hono uaifí naʻá na ako Tohi Tapu mo ha fāmili—ko e tamai, faʻē, mo e ongo tamaiki fefine taʻu hongofulu tupu—ʻa ia naʻe ʻi ai honau fuʻu fale lahi. Naʻe ʻoange kiate ia ʻe he fāmilí ha loki ʻe ua ke ne nofo ai. Naʻe feʻunga mo e taʻu ʻe 15 ʻenau kai fakataha, fiefia mo e feʻofaʻaki fakatokouá. Ko e ongo kiʻi ua īkí naʻa na maʻu ʻaonga lahi ʻi he ako mei heʻene tuí mo e lahi ʻo ʻene taukeí, pea naʻá ne maʻu ʻaonga ʻe ia mei he feohi fiefiá. Naʻe nofo ʻa e tokoua taʻumotuʻa ko ení mo kinautolu ʻo aʻu ki heʻene toki mate ʻi hono taʻu 89. ʻOku kei fakamālō pē ʻa e fāmilí ki he ʻOtuá ʻi he ngaahi tāpuaki lahi naʻa nau maʻu ʻi heʻenau feohi mo iá. Kuo ʻikai ‘mole ʻenau totongí’ ʻi hono tokoniʻi ha kaungā ākonga ʻo Sīsū Kalaisi.—Mt. 10:42.d

12. Ko e hā ʻe lava ke ke fai ke fakahaaʻi ai hoʻo tokanga ʻofa ki he fanga tokoua mo e fanga tuofāfine taʻumotuʻá?

¹² ʻOku ʻikai nai te ke ʻi ha tuʻunga ke tokoniʻi ha tokoua pe tuofefine taʻumotuʻa ʻi he founga naʻe fai ʻe he fāmili ko ení, ka ʻe malava ke ke tokoniʻi ʻa e faʻahinga taʻumotuʻá ke nau maʻu ʻa e ngaahi fakatahá pea ʻalu ʻi he ngāue fakafaifekaú. ʻE toe lava foki ke ke fakaafeʻi kinautolu ki ho ʻapí pea fakakau kinautolu ʻi he taimi ʻokú ke ʻalu ai ʻo ʻevá. ʻE lava ke ke ʻaʻahi kia kinautolu, tautefito ʻi he taimi ʻoku nau puke ai pe ʻikai lava ʻo ʻalu holó. ʻIkai ngata aí, ʻe lava pea ʻoku totonu maʻu pē ke ke tōʻongafai kiate kinautolu ʻi he tuʻunga ko e kakai lalahi matuʻotuʻa. Lolotonga ʻoku nau kei maʻu ʻa e malava fakaʻatamaí, ʻoku totonu ke fakakau ʻa e kau Kalisitiane taʻumotuʻá ʻi he fai kotoa pē ʻa e fili ʻoku kaunga kiate kinautolú. Naʻa mo e faʻahinga kuo mole ʻa e konga lahi ʻo ʻenau malava fakaʻatamaí ʻoku lava ke nau ʻiloʻi pe ʻoku fakaʻapaʻapaʻi koā honau tuʻunga ngeiá.

Heʻikai Fakangaloʻi ʻe Sihova Hoʻo Ngāué

13. Ko e hā ʻoku mahuʻinga ai ʻa e fakahāhā ʻo e fakaʻatuʻi ki he ngaahi ongoʻi ʻa e kau Kalisitiane taʻumotuʻá?

¹³ ʻOku fiemaʻu ke fakahaaʻi ʻa e fakaʻatuʻi ki he ngaahi ongoʻi ʻa e faʻahinga taʻumotuʻá. ʻOku fakanatula pē ke mamahi lahi ʻa e kau taʻumotuʻá ʻi heʻenau taʻemalava ke fakahoko ʻa e meʻa kotoa naʻa nau malava ke fai ʻi he taimi naʻa nau kei siʻi ange ai mo moʻui lelei angé. Hangē ko ení, ko ha tuofefine naʻe ngāue longomoʻui kia Sihova ʻi he taʻu nai ʻe 50 pea naʻá ne hoko ko ha tāimuʻa tuʻumaʻu naʻá ne maʻu ha mahaki fakatupu tāvaivaia pea naʻe faingataʻa ʻa ʻene maʻu ʻa e ngaahi fakatahá. ʻI he taimi naʻá ne fakahoa ai ʻene ngāue fakafaifekau ki muʻá mo hono tuʻunga fakangatangata lolotongá, naʻá ne kamata tangi. Naʻá ne punou pea lea pē mo tangi, “ʻOku ʻikai ke u kei lava ha meʻa.”

14. Ko e hā ʻa e fakalototoʻa ʻe lava ke maʻu ʻe he kau sevāniti taʻumotuʻa ʻa Sihová mei he ngaahi sāmé?

¹⁴ Kapau ko ha tokotaha taʻumotuʻa koe, kuó ke maʻu ha ongoʻi mamahi pehé? Pe ʻoku ʻi ai ha ngaahi taimi ʻokú ke ongoʻi ai kuo liʻaki nai koe ʻe Sihova? Naʻe maʻu nai ʻe he tokotaha-tohi-sāmé ʻa e ngaahi ongoʻi meimei tatau ʻi hono ngaahi taʻu ki muí, he naʻá ne kōlenga kia Sihova: “Oua naa jiaki au i he aho o eku motua; oua naa liaki au oka mole iate au eku malohi. . . . Koeni foki, E Otua, i he eku motua mo ulu hina, oua naa ke liaki au.” (Sāme 71:9, 18, PM) Ko e moʻoni, naʻe ʻikai ʻaupito teu ʻe Sihova ke liʻaki ʻa e tokotaha-faʻu ʻo e saame ko iá, pea heʻikai te Ne liʻaki koe. ʻI ha toe saame ʻe taha, naʻe fakahāhā ai ʻe Tēvita ʻa ʻene falala pau ki he tokoni ʻa e ʻOtuá. (Lau ʻa e Sāme 68:19.) ʻOku pau moʻoni kapau ko ha Kalisitiane taʻumotuʻa faitōnunga koe, ʻoku kau mo koe ʻa Sihova pea ʻe hokohoko atu ʻene fakaivia koe ʻi he ʻaho ki he ʻaho.

15. Ko e hā ʻe lava ke ne tokoniʻi ʻa e faʻahinga taʻumotuʻá ke nau tauhi maʻu ha fakakaukau pau?

¹⁵ Ko e meʻa kotoa kuo fai mo lolotonga fai ʻe kimoutolu Kau Fakamoʻoni taʻumotuʻa ʻa Sihová maʻá e lāngilangi ʻo e ʻOtuá ʻoku ʻikai ʻaupito mamaʻo mei heʻene fakakaukaú. “Talaʻehai ʻoku fai taʻetotonu ʻa e ʻOtua ke ne fakangaloʻi hoʻomou ngaue, mo e ʻofa ki hono huafa naʻe ha ʻiate kimoutolu,” ko e lau ia ʻa e Tohi Tapú. (Hep. 6:10) Ko ia ai, talitekeʻi ʻa hono fakatupulekina ha fakakaukau taʻepau, ʻi he fakakaukau hala koeʻuhi ko e taʻumotuʻá, ʻoku ʻikai te ke kei ʻaonga ai kia Sihova. Feinga ke fetongi ʻa e loto-mafasiá, mo e fakakaukau fakatuʻatamakí ʻaki ʻa e fakakaukau pau. Fiefia ʻi ho ngaahi tāpuakí mo hoʻo ʻamanaki ki he kahaʻú! ʻOku tau maʻu “ha ʻamui mo ha ʻamanaki”—ko e lelei taha ia ʻe ala maʻú—pea ʻoku fakapapauʻi mai eni ʻe hotau Tokotaha-Fakatupú. (Sel. 29:11, 12; Ng. 17:31; 1 Tim. 6:19) Fakakaukauloto ki hoʻo ʻamanakí, ngāue ke kei talavou ai pē ʻi ho lotó mo e ʻatamaí, pea ʻoua ʻaupito ʻe fakasiʻisiʻia ʻa e mahuʻinga ʻo hoʻo ʻi ai ʻi he fakatahaʻangá!e

16. Ko e hā naʻe fakakaukau ai ʻa e tokoua taʻumotuʻa ʻe taha ʻoku totonu ke tuku ʻene ngāue ko ha mātuʻá, ka naʻe anga-fēfē hono fakaʻaiʻai ia ʻe he kulupu ʻo e kau mātuʻá?

¹⁶ Fakakaukau kia ʻIoane, ʻa ia ʻi hono taʻu 80 ʻokú ne tokangaʻi taimi-kakato ʻa hono uaifi faitōnunga ʻokú ne vaivai he taimí ni ko Sani.f ʻOku taufetongi ʻa e fanga tuofāfiné ʻi he nofo mo Saní koeʻuhi kae lava ʻa ʻIoane ʻo ʻalu ki he ngaahi fakatahá pea ʻi he ngāue fakafaifekaú. Kae kehe, ki muí ni mai, naʻe ongoʻi ai ʻe ʻIoane kuó ne ʻi he tuʻunga ongosia fakaeongo pea kamata ai ke ne fakakaukau ʻoku ʻikai kei totonu ke ne hoko ko ha mātuʻa ʻi he fakatahaʻangá. “Ko e hā hono ʻaonga ʻo ʻeku kei hoko ko ha mātuʻá?” ko ʻene ʻeke ia mo mokulu pē hono loʻimatá. “ʻOku ʻikai ke u kei fakahoko ha ngāue ʻaonga ʻi he fakatahaʻangá.” Naʻe fakapapauʻi ange ʻe hono ngaahi kaungā mātuʻá naʻe mahuʻinga taʻehanotatau ʻa ʻene taukeí mo ʻene fakafuofuá. Naʻa nau fakaʻaiʻai ia ke hokohoko atu ʻene ngāue ko ha mātuʻá, neongo ai pē ʻa e fakangatangata ʻo e meʻa ʻokú ne fakahokó. ʻI he loto-toʻa lahí, ʻoku hokohoko atu ai ʻa ʻIoane ʻi he ngāue ko ha mātuʻá, ʻo maʻu tāpuaki mei ai ʻa e fakatahaʻangá.

ʻOku Tokanga Moʻoni ʻa Sihova

17. Ko e hā ʻa e fakapapau ʻoku ʻomai ʻe he Tohi Tapú ki he kau Kalisitiane taʻumotuʻá?

¹⁷ ʻOku fakamahino ʻe he Tohi Tapú ko e faʻahinga taʻumotuʻá ʻe lava ke hokohoko atu ʻenau lakalakaimonū fakalaumālié neongo ʻa e ngahi palopalema ʻoku haʻu fakataha mo e taʻumotuʻá. Naʻe talaki ʻe he tokotaha-tohi-sāmé: “Ko e kau to ʻi he fale ʻo Sihova . . . te nau fua ai pe ʻi heʻenau motuʻa; te nau mohu huhuʻa mo laumata.” (Sāme 92:13, 14) Ko e ʻapositolo ko Paulá, ʻa ia naʻá ne fekuki nai mo ha faingataʻaʻia fakaesino, ‘naʻe ʻikai te ne foʻi, neongo naʻe ʻauʻauha hono ngeʻesi tangatá.’—Lau ʻa e 2 Kolinito 4:16-18.

18. Ko e hā ʻoku fiemaʻu ai ʻe he kaungātui taʻumotuʻá mo honau kau tauhí ʻa e tokoni ʻa e niʻihi kehé?

¹⁸ Ko e ngaahi fakatātā lahi ʻi onopooni ʻoku fakamoʻoniʻi ai ko e kau taʻumotuʻá ʻe lava ke nau “fua ai pe.” Ka ko e ngaahi pole ʻo e mahamahakí mo e taʻumotuʻá ʻe lava ke taulōfuʻu, ʻo aʻu ki he faʻahinga ʻoku nau maʻu ʻa e ngaahi mēmipa ʻi he fāmilí ʻoku nau tokanga mo tukupā ke tokoniʻi kinautolú. Ko e kau tauhí foki te nau hoko nai mo kinautolu ʻo ongosia. ʻOku maʻu ʻe he fakatahaʻangá ʻa e monū mo e fatongia ke ngāueʻi ʻenau ʻofá maʻá e faʻahinga taʻumotuʻá mo e faʻahinga ʻoku nau tokangaʻi kinautolú. (Kal. 6:10) Ko e tokoni peheé, ko hono moʻoní, ʻoku fakahaaʻi ai ʻoku ʻikai ke tau tala ki he faʻahinga peheé ke nau ō ʻo ‘fai pe honau fakamafaná, mo fai pe honau fakamakoná’ ʻo ʻikai tokoniʻi kinautolu ʻi he ngaahi founga ʻaonga.—Sem. 2:15-17.

19. Ko e hā ʻoku lava ai ke vakai atu ʻa e kau Kalisitiane taʻumotuʻa faitōnungá ki he kahaʻú fakataha mo e falala pau?

¹⁹ Ko e taʻumotuʻá ʻe liliu nai ai ʻi ha tuʻunga ʻa e ngaahi ngāue ʻa ha Kalisitiane, ka ʻoku ʻikai fakasiʻisiʻi ʻe he taimí ʻa e ʻofa ʻa Sihova ki heʻene kau sevāniti taʻumotuʻa mateakí. ʻI hono kehé, ko e kotoa ʻo e kau Kalisitiane faitōnuga ko ení ʻoku nau mahuʻinga ʻi heʻene vakaí, pea heʻikai ʻaupito te ne liʻaki kinautolu. (Sāme 37:28; Ai. 46:4) ʻE fakaivia mo tataki kinautolu ʻe Sihova ʻi he kotoa ʻo ʻenau taʻumotuʻá.—Sāme 48:14.

[Fakamatala ʻi lalo]

ʻE Fēfē Haʻo Tali?

• Ko e hā ʻokú ke vakai ai ʻoku mahuʻinga ʻa e kau Kalisitiane taʻumotuʻa faitōnungá?

• ʻE lava fēfē ke tau fakahaaʻi ʻa e tokanga ʻofa ki he kaungālotu taʻumotuʻá?

• Ko e hā ʻe lava ke ne tokoniʻi ʻa e kau sevāniti taʻumotuʻa ʻa Sihová ke nau maʻu ha fakakaukau pau?

[Fakatātā ʻi he peesi 18]

Ko e ngaahi mēmipa ʻo e fakatahaʻangá ʻoku nau fakamahuʻingaʻi lahi ʻa e kau taʻumotuʻá