ʻOKÚ KE MUIMUI ʻI HE “HALA ʻOKU FUNGANI HAKE” ʻO E ʻOFÁ?

“KO E ʻOtua ko e ʻOfa.” Ko e ngaahi lea ko eni ʻa e ʻapositolo ko Sioné ʻoku fakahaaʻi ai ʻa e ʻulungaanga tuʻu-ki-muʻa taha ʻo e ʻOtuá. (1 Sione 4:8) Ko e ʻofa ʻa e ʻOtuá ki he faʻahinga ʻo e tangatá ʻokú ne ʻai ke tau malava ai ʻo ʻunuʻunu ofi kiate ia pea maʻu ai ha vahaʻangatae fakafoʻituitui mo ia. ʻI he founga kehe fē ʻoku ueʻi ai kitautolu ʻe he ʻofa ʻa e ʻOtuá? Kuo ʻi ai e lau ʻoku pehē: “ʻOku fakafuo mo oʻi kitautolu ʻe he meʻa ʻoku tau ʻofa aí.” Ko e moʻoni ia. Kae kehe, ʻoku toe moʻoni foki ʻoku fakafuo mo oʻi kitautolu ʻe he tokotaha ʻoku tau ʻofa aí pea ʻe he tokotaha ko ia ʻoku ʻofa ʻia kitautolú. ʻI hono fakatupu kitautolu ʻi he ʻīmisi ʻo e ʻOtuá, ʻoku tau maʻu ai ʻa e malava ke tapua atu ʻa e ʻofa ʻa e ʻOtuá ʻi heʻetau moʻuí. (Sen. 1:27) Ko ia ai, naʻe tohi ʻe he ʻapositolo ko Sioné ʻoku tau ʻofa ki he ʻOtuá “koeʻuhi naʻe tomuʻa ʻofa ʻe he ʻEne ʻAfio kiate kitautolu.”—1 Sione 4:19.

Foʻi Lea ʻe Fā ʻOku Nau Fakamatalaʻi ʻa e ʻOfá

Naʻe ui ʻe he ʻapositolo ko Paulá ʻa e ʻofá ko ha “hala ʻoku fungani hake.” (1 Kol. 13:1 [12:31, PM]) Ko e hā naʻá ne fakamatalaʻi peheni ai ʻa e ʻofá? Ko e hā ʻa e faʻahinga ʻofa naʻe lave ki ai ʻa Paulá? Ke ʻiloʻí, tau sivisiviʻi fakalelei angé ʻa e foʻi lea ko e “ʻofa.”

Ko e muʻaki lea faka-Kalisí naʻe ʻi ai e ngaahi foʻi lea tefito ʻe fā, naʻe ngāueʻaki ʻi he ngaahi founga kehekehe, ke fakamatalaʻi ʻaki ʻa e ʻofá: ko e stor·geʹ, eʹros, phi·liʹa, mo e a·gaʹpe. ʻI he ngaahi leá ni, ko e a·gaʹpe ʻa e foʻi lea naʻe ngāueʻaki ke fakamatalaʻi ʻa e ʻOtuá ʻa ia “ko e ʻOfa.”a ʻI he fekauʻaki mo e ʻofá ni, ʻoku pehē ʻe Palōfesa William Barclay ʻi heʻene New Testament: “Ko e agapē ʻoku fekauʻaki ia mo e ʻatamaí: ʻoku ʻikai ko ha ongo pē ia ʻoku ākenoa hake pē ʻi hotau lotó; ko ha tefitoʻi moʻoni ia ʻa ia ʻoku tau moʻui tonu ʻaki. Ko e agapē ʻoku fekauʻaki tefito ia mo e fakaʻamú.” ʻI he potutohi ko ení, ko e a·gaʹpe ko e ʻofa ia ʻoku puleʻi, pe tataki ʻe he tefitoʻi moʻoni, ka ʻoku faʻa ʻalu fakataha ia mo e ongoʻi mālohi. ʻI he ʻi ai ko ia ʻa e ngaahi tefitoʻi moʻoni lelei mo e koví, ʻoku hā mahino ko e kau Kalisitiané ʻoku totonu ke tataki kinautolu ʻe he ngaahi tefitoʻi moʻoni lelei, ʻa ia ʻoku fokotuʻu ʻi he Tohi Tapú ʻe Sihova ko e ʻOtuá tonu. ʻI he taimi ʻoku tau fakahoa ai ʻa e ngaahi fakamatala Fakatohitapu ki he a·gaʹpe mo engaahi kupuʻi lea kehe ʻoku ngāueʻaki ʻi he Tohi Tapú ke fakamatalaʻi ʻa e ʻofá, te tau mahinoʻi lelei ange ai ʻa e ʻofa ʻoku totonu ke tau fakahāhaá.

ʻOfa ʻi he Siakale ʻo e Fāmilí

Ko ha meʻa fakafiefia ia ke kau ki ha fāmili ʻofa mo fekoekoeʻi! Ko e stor·geʹ ko e foʻi lea faka-Kalisi ia naʻe faʻa ngāueʻaki ʻo ʻuhinga ki he ʻofa fakanatula ʻoku hoko ʻi he vahaʻa ʻo e ngaahi mēmipa ʻo e fāmili tatau. ʻOku feinga ʻa e kau Kalisitiané ke fakahāhā ʻa e ʻofa ki he ngaahi mēmipa ʻo honau fāmilí. Naʻe kikite ʻa Paula ʻo pehē ʻi he ngaahi ʻaho fakaʻosí ko e kakaí fakalūkufua te nau “taeʻofa-ki-hoʻota.”—2 Tim. 3:1, 3.

Ko e ʻofa fakanatula ʻoku totonu ke ʻi he vahaʻa ʻo e ngaahi mēmipa ʻo e fāmilí ʻoku fakamamahi ʻa e ʻikai ke ʻi he māmaní he ʻaho ní. Ko e hā ʻoku fakatōtama ai ʻa e tokolahi fau ʻoku ʻamanekina ke nau hoko ko e ngaahi faʻeé? Ko e hā ʻoku ʻikai fakahaaʻi ai ʻe he ngaahi fāmili lahi ha mahuʻingaʻia ʻi heʻenau mātuʻa taʻumotuʻá? Ko e hā ʻoku hokohoko atu ai ʻa e ʻalu he ʻataá ʻa e lahi ʻo e vete malí? Ko e tali moʻoní eni, Ko e ʻikai ha ʻofa ki hoʻota.

ʻIkai ko ia pē, ʻoku akoʻi ʻe he Tohi Tapú “ko e fungani ʻi he meʻa kākā ka ko e loto.” (Sel. 17:9) Ko e ʻofa ʻi he fāmilí ʻoku kau ki ai ʻa hotau lotó mo ʻetau ngaahi ongoʻí. Neongo ia, ʻoku fakatupu tokangá, he naʻe ngāueʻaki ʻe Paula ʻa e a·gaʹpe ke fakamatalaʻi ʻaki ʻa e ʻofa ʻoku totonu ke fakahāhā ʻe ha husepāniti ki hono uaifí. Naʻe fakahoa ʻe Paula ʻa e ʻofa ko iá ki he ʻofa ʻoku fakahāhā ʻe Kalaisi ki he fakatahaʻangá. (Ef. 5:28, 29) Ko e ʻofá ni ʻoku makatuʻunga ʻi he ngaahi tefitoʻi moʻoni kuo ʻomai ʻe Sihova, ko e Tupuʻanga ʻo e fokotuʻutuʻu ki he fāmilí.

Ko e ʻofa moʻoni ki he ngaahi mēmipa ʻo e fāmilí ʻoku ueʻi ai kitautolu ke fakahāhā ʻa e mahuʻingaʻia ʻi heʻetau mātuʻa taʻumotuʻá pe ueʻi ai kitautolu ke fua ʻa e fatongia ki heʻetau fānaú. ʻOku toe ueʻi ai ʻa e ngaahi mātuʻá ke nau fai ki heʻenau fānaú ʻa e akonaki anga-ʻofa ʻi he taimi ʻoku fiemaʻu aí pea taʻofi ai kinautolu mei he fai ʻo ha meʻa ʻi he ongoʻí pē, ʻa ia ʻoku faʻa iku ki he tōʻonga fakangofua tavale tōtuʻa ki he fānaú.—Ef. 6:1-4.

ʻOfa Fakaemanakó mo e Tefitoʻi Moʻoni Fakatohitapú

Ko e ʻofa fakaekakano ʻoku maʻu ʻe ha tangata mo ha fefine ʻi he fokotuʻutuʻu ʻo e nofo malí ko ha meʻaʻofa moʻoni ia mei he ʻOtuá. (Pal. 5:15-17) Kae kehe, ko e foʻi lea eʹros, ʻa ia ʻoku ʻuhinga ki he ʻofa fakaemanakó, ʻoku ʻikai ke ngāueʻaki ia ʻe he kau hiki Tohi Tapu fakamānavaʻí. Ko e hā hono ʻuhingá? ʻI ha ngaahi taʻu he kuohilí, naʻe ʻomai ai ʻi he Watchtower ʻa e fakamatala ko ení: “ʻI he ʻahó ni ʻoku hā ngali fai ʻe he māmaní kotoa ʻa e fehālaaki tatau naʻe fai ʻe he kau Kalisi ʻo e kuonga muʻá. Naʻa nau lotu kia Eros ko ha ʻotua, punou ʻi hono ʻōlitá pea fai ʻa e ngaahi feilaulau kiate ia. . . . Ka ʻoku fakahaaʻi ʻe he hisitōliá ko e lotu pehē ki he ʻofa fakaefehokotaki fakasinó ʻoku ʻomai pē ai ʻa e tuʻunga ololalo, fakalusa mo e movetevete. Mahalo pē ko e ʻuhinga ia naʻe ʻikai ngāueʻaki ai ʻe he kau hiki Tohi Tapú ʻa e foʻi leá.” Ke tau fakaʻehiʻehi mei he kau ki he ngaahi vā ʻoku makatuʻunga ʻataʻatā pē ʻi he fakaʻofoʻofa fakaesinó, ko e ngaahi ongoʻi fakaemanakó kuo pau ke fakavaivaiʻi ia, pe puleʻi ʻe he ngaahi tefitoʻi moʻoni Fakatohitapú. Ko ia ʻeke hifo angé kiate koé, ‘ʻOku mafamafatatau ʻeku ʻofa fakaemanakó mo e ʻofa moʻoni ki hoku kaumeʻá?’

Lolotonga ʻa e “tuʻunga ko e talavoú,” ʻi he taimi ʻoku faʻa mālohi ʻaupito ai ʻa e ongoʻi ki he fehokotaki fakasinó, ko e toʻutupu ʻoku nau pipiki ki he ngaahi tefitoʻi moʻoni Fakatohitapú te nau maʻa fakaeʻulungaanga ai pē. (1 Kol. 7:36, NW; Kol. 3:5) ʻOku tau vakai ki he nofo malí ko ha meʻaʻofa toputapu ia meia Sihova. Naʻe pehē ʻe Sīsū fekauʻaki mo e ongo meʻa malí: “Ko e meʻa kuo fakahoko ʻe he ʻOtua, ke ʻoua naʻa fakamavae ʻe ha tangata.” (Mt. 19:6) ʻI he ʻikai nofo fakataha pē koeʻuhi ko e ʻi ai ʻa e femanakoʻakí, ʻoku tau tukupā ki heʻetau nofo malí. ʻI he malanga hake ʻa e ngaahi palopalema ʻi he nofo malí, ʻoku ʻikai te tau kumi ki ha founga faingofua ke kalofi ai ka ʻoku tau feinga tōtōivi ke fakahāhā ʻa e ngaahi ʻulungaanga fakaʻotuá ke ʻai ke fiefia ʻetau moʻui fakafāmilí. Ko e ngaahi feinga peheé ʻe ʻomai ai ʻa e fiefia tuʻuloa.—Ef. 5:33; Hep. 13:4.

ʻOfa ʻi he Ngaahi Kaumeʻá

ʻE taʻeoli ʻa e moʻuí ʻi he ʻikai ha ngaahi kaumeʻá! ʻOku pehē ʻe ha palōveepi ʻi he Tohi Tapú: “ʻOku ʻi ai ha kaumeʻa ʻoku pipiki ofi ange ia ʻi ha tokoua.” (Pal. 18:24, NW) ʻOku fiemaʻu ʻe Sihova ke tau maʻu ha ngaahi kaumeʻa moʻoni. ʻOku ʻiloa ʻa e haʻi vāofi ʻo e kaumeʻa ʻi he vahaʻa ʻo Tēvita mo Sionatané. (1 Sam. 18:1) Pea ʻoku pehē ʻe he Tohi Tapú ko Sīsuú naʻá ne “ʻofa” ʻi he ʻapositolo ko Sioné. (Sione 20:2) Ko e foʻi lea faka-Kalisi ki he “ʻofá” pe “kaumeʻá” ko e phi·liʹa. ʻOku ʻikai ha meʻa ʻe hala ʻi hono maʻu ha kaumeʻa ofi ʻi he fakatahaʻangá. Kae kehe, ʻi he 2 Pita 1:7 (NW), ʻoku fakalototoʻaʻi mai ai ke tau tānaki ʻa e ʻofa (a·gaʹpe) ki heʻetau “feʻofaʻaki fakatokoua” (phi·la·del·phiʹa, ko ha foʻi lea fakatahaʻi ʻo e phiʹlos, ko e foʻi lea faka-Kalisi ki he “kaumeʻá,” mo e a·del·phosʹ, ko e foʻi lea faka-Kalisi ia ki he “tokouá”). Koeʻuhi ke fiefia ʻi he ngaahi kaumeʻa tuʻuloá, ʻoku fiemaʻu ke tau ngāueʻaki ʻa e akonaki ko ení. ʻOku lelei ke tau ʻeke hifo kia kitautolu, ‘ʻOku mafamafatatau ʻeku ongoʻi ki he kaumeʻá mo e ngaahi tefitoʻi moʻoni Fakatohitapú?’

ʻOku tokoniʻi kitautolu ʻe he Folofola ʻa e ʻOtuá ke fakaʻehiʻehi mei he filifilimānako ʻi heʻetau feangainga mo hotau ngaahi kaumeʻá. ʻOku ʻikai te tau ngāueʻaki ʻa e tuʻunga lōuá: ko ha tuʻunga vaivai ki hotau ngaahi kaumeʻá pea mo ha tuʻunga kehe ʻoku fefeka ange ki he kakai ʻoku ʻikai ko hotau kaumeʻá. ʻIkai ko ia pē, ʻoku ʻikai te tau fakahekeheke ke maʻu ai ha ngaahi kaumeʻa. Ko e meʻa ʻoku mahuʻinga tahá, ko hono ngāueʻaki ʻa e ngaahi tefitoʻi moʻoni Fakatohitapú ʻoku ʻomai ai kia kitautolu ʻa e ʻiloʻilo ʻoku fiemaʻu ke filifili lelei ai ʻa e ngaahi kaumeʻá pea ke fakaʻehiʻehi mei he “feohi kovi ʻokú ne maumauʻi ʻa e ngaahi ʻulungaanga leleí.”—1 Kol. 15:33, NW.

Haʻi Makehe ʻo e ʻOfá!

Ko e haʻi ʻokú ne fakafāʻūtahaʻi ʻa e kau Kalisitiané ʻoku makehe moʻoni! Naʻe tohi ʻa e ʻapositolo ko Paulá: “Ke taʻemālualoi hoʻomou ʻofa. . . . ʻI he ʻofa fakatokouá, mou maʻu ʻa e ʻofa māfana ʻiate kimoutolu.” (Loma 12:9, 10, NW) Ko e moʻoni, ʻoku maʻu ʻe he kau Kalisitiané ʻa e ‘ʻofa (a·gaʹpe) taʻemālualoi.’ Ko e ʻofa ko ení ʻoku ʻikai fakangatangata pē ia ki ha ongo ʻoku tupu-koso hake ʻi hotau lotó. ʻI hono kehé, ʻoku faiaka loloto ia ʻi he ngaahi tefitoʻi moʻoni Fakatohitapú. Kae kehe, ʻoku toe lave ʻa Paula ki he “ʻofa fakatokouá” (phi·la·del·phiʹa) mo e “ʻofa māfana” (phi·loʹstor·gos, ko ha foʻi lea fakatahaʻi ʻo e phiʹlos mo e stor·geʹ). Fakatatau ki he lau ʻa e mataotao ʻe taha, ko e “ʻofa fakatokouá” ko e “ʻofa ongoʻi, fakahāhā ʻa e anga-lelei, kaungāongoʻi mo e fai ʻo e tokoni.” ʻI hono fakatahaʻi mo e a·gaʹpe, ʻoku pouaki ai ʻa e feohi vāofi ʻi he lotolotonga ʻo e kau lotu ʻa Sihová. (1 Tes. 4:9, 10) Ko e fakalea kehe, naʻe liliu ko e “ʻofa māfaná,” ʻoku ʻasi tuʻo taha pē ʻi he Tohi Tapú pea ʻoku ʻuhinga iá ki he fekoekoeʻi vāofi māfana, hangē ko ia ʻi ha fāmili.b

Ko e haʻi ʻokú ne fakafāʻūtahaʻi ʻa e kau Kalisitiane moʻoní ko ha fakatahaʻi ia ʻo e ʻofa fakafāmilí mo e ʻofa ki he ngaahi kaumeʻa moʻoní pea mo e vā kotoa pē ʻoku puleʻi ʻe he ʻofa makatuʻunga ʻi he ngaahi tefitoʻi moʻoni Fakatohitapú. Ko e fakatahaʻanga Kalisitiané ʻoku ʻikai ko ha kalapu fakasōsiale ia pe ko ha kautaha fakamāmani, ka ko ha fāmili maʻumaʻuluta ʻoku fāʻūtaha ʻi he lotu ki he ʻOtua ko Sihová. ʻOku tau ui hotau kaungātuí ko e fanga tokoua mo e fanga tuofāfine, pea ʻoku tau vakai kia kinautolu ʻi he tuʻunga ko iá. Ko e konga kinautolu ʻo hotau fāmili fakalaumālié, ʻoku tau ʻofa ʻia kinautolu ʻi he tuʻunga ko e ngaahi kaumeʻa, pea ʻoku tau fakafeangai maʻu pē kia kinautolu ʻo fehoanaki mo e ngaahi tefitoʻi moʻoni Fakatohitapú. ʻOfa ke tau hokohoko atu kotoa ʻa e ngāue ki he haʻi ʻo e ʻofa ʻokú ne fakafāʻūtahaʻi mo fakaʻilongaʻi ʻa e fakatahaʻanga Kalisitiane moʻoní.—Sione 13:35.

[Fakamatala ʻi lalo]

[Fakatātā ʻi he peesi 12]

ʻOku anga-fēfē hoʻo ngāue ki he haʻi ʻo e ʻofa ʻokú ne fakafāʻūtahaʻi kitautolú?