Naʻe Ui Ia ʻe he ʻOtuá ko e “Pilinisesi”

NAʻE mālanga hake ʻa Sela mei heʻene ngāué peá ne hanga atu ki he tafatafaʻaki langí. ʻI heʻene tataki fakapotopotó, naʻe ngāue fiefia mo tōtōivi ai ʻa e kau sevānití. Naʻe fai foki ʻe he tokotaha faʻa ngāue ko Selá ʻene tafaʻaki ʻaʻaná. Sioloto atu ki heʻene milimili hono ongo nimá mo fotofota ke ʻosi atu ʻa e mamaté. Mahalo pē naʻá ne nōfoʻi ʻi hono monomono ha mahae ʻi he tēniti naʻe hoko ko hona ʻapí. Naʻe mole ʻa e lanu ʻo e tupenu fulufuluʻi kosí tupu mei heʻene fuoloa taʻu ʻi he laʻaá mo e ʻuhá, ʻo fakamanatu ai kia Sela ʻa e taimi lōloa kuó na nofo hikihiki holo aí. Ne mole atu ʻa e houa efiafí pea liliu eni ʻo maamangia ange. Naʻá ne sio ki he mavahe ʻa ʻĒpalahamea ʻi he pongipongí, pea naʻá ne sio fakamamaʻu atu eni mo e ʻamanaki ʻi he feituʻu tatau pē. ʻI he hā mai ʻa e fōtunga anga-maheni ʻo hono husepānití ʻi ha funga moʻunga ofi maí, ne hā mai ha malimali ʻi he fofonga fakaʻofoʻofa ʻo Selá.

Ne ʻosi atu ha hongofuluʻi taʻu mei hono taki ʻe ʻĒpalahame hono fāmili tokolahí ʻo nau kolosi ʻi he Vaitafe ʻIufaletesí ʻo nau ʻalu hifo ki Kēnaní. Naʻe tokoni loto-lelei ʻa Sela ki hono husepānití ʻi he fuʻu fononga ko eni ki he feituʻu naʻe teʻeki ʻilo ki aí, he naʻá ne ʻilo ʻe fakahoko ʻe hono husepānití ha ngafa mahuʻinga ʻi he taumuʻa ʻa Sihová ke ne maʻu ha hako mātuʻaki fakahōifua mo ha puleʻanga. Neongo ia, ko e hā ʻa e tafaʻaki ʻe lava ke fakahoko ʻe Selá? Naʻá ne paʻa pea naʻá ne taʻu 75 ʻi he taimi ko ení. ʻOku pau pē naʻá ne fifili, ‘ʻE lava fēfē ke hoko moʻoni ʻa e talaʻofa ʻa Sihová lolotonga ia ko e uaifi au ʻo ʻĒpalahamé?’ Ko e meʻa mahino pē ia kapau naʻá ne ongoʻi loto-moʻua​—pe aʻu ʻo taʻefaʻakātaki.

ʻOku tau fifili foki ʻi he taimi ʻe niʻihi pe ʻe hoko fakakū mai ʻa e ngaahi talaʻofa ʻa e ʻOtuá. ʻOku tātātaha ke haʻu faingofua ʻa e faʻa kātakí, tautefito ʻi he taimi ʻoku tau tatali ai ki he fakahoko ʻo ha ʻamanaki ʻoku tau koloaʻaki. Ko e hā ʻe lava ke tau ako mei he tui ʻa e fefine ʻiloá ni?

Naʻe toki foki mai ʻa e fāmilí mei ʻIsipite. (Sēnesi 13:1-4) Naʻa nau ʻapitanga ʻi he konga fonua māʻolunga ʻi he hahake ʻo Pētelí, pe Lusá, hangē ko ia naʻe uiʻaki ʻe he kau Kēnaní. Mei he feituʻu tokalelei māʻolungá ni, naʻe malava ai ʻa Sela ke ne sio ki he konga lahi ʻo e Fonua ʻo e Talaʻofá. Naʻe ʻi ai ha ngaahi kolo Kēnani mo e ngaahi hala naʻe ʻalu ai ʻa e kau fonongá ki he ngaahi fonua mamaʻó. Neongo ia, ʻi he meʻa kotoa naʻe sio ki ai ʻa Selá, naʻe ʻikai ha meʻa ai ʻe tatau mo hono kolo totonú. Naʻá ne tupu hake ʻi ʻUa, ko ha kolo lahi ʻi Mesopotēmia naʻe maile ʻe 1,200 (kilomita ʻe 1,900) ʻa e fononga ki aí. Naʻá ne mavahe mei ai mei he tokolahi ʻo hono kāingá, mei he ngaahi faingamālie ʻo ha kolo lahi tuʻumālie ʻi he ngaahi māketi mo e ʻotu falekoloa, pea mei hono ʻapi lelei naʻe ʻato mo holisi fefeka, pea naʻa mo e vai naʻe taki ki aí! Neongo ia, kapau te tau sioloto atu kia Sela ʻoku sio fakamamaʻu mata mamahi ki he hahaké, ʻo fakaʻamua ʻa e ngaahi fiemālie ʻo hono ʻapi naʻe kei siʻi hake aí, heʻikai ke tau ʻiloʻi ʻa e fefine anga-fakaʻotua ko ení.

Fakatokangaʻi ʻa e meʻa naʻe fakamānavaʻi ʻa e ʻapositolo ko Paulá ke ne tohi ʻi he taʻu nai ʻe 2,000 ki mui ai. ʻI he lea ʻo fekauʻaki mo e tui ʻa Sela mo ʻĒpalahamé, naʻá ne pehē: “Kapau naʻa nau hanganaki fakakaukau ki he feituʻu naʻa nau mavahe mei aí, naʻa nau mei maʻu ha faingamālie ke nau foki.” (Hepelū 11:8, 11, 15) Naʻe ʻikai ke toe sio ʻa Sela pe ko ʻĒpalahame ʻo fakaʻamua ʻa e kuohilí. Kapau naʻá na nōfoʻi ʻi he fakakaukau peheé, naʻá na mei fili nai ke na foki ki ʻapi. He ʻi ʻUá, naʻe ʻikai te na mei maʻu ai ʻa e monū fisifisimuʻa naʻe fakahaaʻi ange ʻe Sihová. Pea ne mei pehē haʻana mole atu mei he manatu ʻa e faʻahinga ʻo e tangatá kae ʻikai hoko ko e ongo faʻifaʻitakiʻanga fakatoʻoaloto ʻo e tuí ʻa ia kuo aʻu ki he loto ʻo e laui miliona.

ʻI he ʻikai ke sio ki muí, naʻe sio ʻa Sela ia ki muʻa. Ko ia naʻá ne hanganaki tokoni ki hono husepānití ʻi heʻene ʻāunofo ʻi he fonuá, tokoni ʻi hono faʻo ʻa e tēnití, fakateka ʻa e fanga manú, mo toe fokotuʻu ʻa e tēnití. Naʻá ne kātekina ʻa e faingataʻa mo e ngaahi liliu lahi. Naʻe fakafoʻou ʻe Sihova ʻene talaʻofa kia ʻĒpalahamé​—ka naʻe kei ʻikai pē ke fai ha lave kia Sela!​—Sēnesi 13:14-17; 15:5-7.

Fakaʻosí, naʻe pehē ʻe Sela kuo taimi ke ne lea kia ʻĒpalahame ʻo fekauʻaki mo ha palani naʻá ne faʻufaʻu ʻi hono ʻatamaí. Sioloto atu ki he hā mei hono fofongá ʻa e ngaahi ongoʻi taʻelototatau ʻi heʻene pehē: “Kātaki muʻa! Kuo taʻofi ʻe Sihova au mei haʻaku fanau.” Hili iá naʻá ne kole ki hono husepānití ke ne hoko ko ha tamai ʻa ha fānau fakafou ʻi heʻene kaunangá, ʻa Hekaʻā. ʻE lava ke ke sioloto atu ki he ongoʻi faingataʻaʻia ʻa Sela ʻi heʻene kole ki hono husepānití ʻa e meʻa ko iá? ʻOku hā ngali kehe nai ʻa e kole ko iá kiate kitautolu ʻi he ʻaho ní, ka naʻe ʻikai ngali kehe ia ʻi he taimi ko iá ki ha tangata ke ne ʻai ha uaifi hono ua, pe sinifu, koeʻuhi ke maʻu ha ʻea.b Naʻe ongoʻi nai ʻe Sela ko e founga eni ʻe fakahoko ai ʻa e taumuʻa ʻa e ʻOtuá ke tupu mai ha puleʻanga ʻo e ngaahi matakali fakafou ʻia ʻĒpalahamé? Pe ko e hā pē ʻa e tuʻungá, naʻe loto-lelei ʻa Sela ke ne fai ha feilaulau faingataʻa. Ko e hā ʻa e tali ʻa ʻĒpalahamé? ʻOku tau lau naʻá ne ‘fanongo ki he meʻa naʻe leaʻaki ʻe Selá.’​—Sēnesi 16:1-3.

ʻOku fokotuʻu mai ʻe he fakamatalá naʻe ueʻi ʻe Sihova ʻa Sela ke ne fai ʻa e feilaulau ko iá? ʻIkai. ʻI hono kehé, ko e fokotuʻu naʻe fai ʻe Selá ʻoku hā mei ai ha vakai mātuʻaki fakaetangata. Naʻá ne fakakaukau naʻe tupu mei he ʻOtuá ʻa ʻene faingataʻaʻiá, pea naʻe ʻikai malava ke ne sioloto atu ʻoku maʻu ʻe he ʻOtuá ha toe fakaleleiʻanga ʻe taha. Ko e fakaleleiʻanga ʻa Selá ʻe hoko mai ai ʻa e mamahi mo e faingataʻa kiate ia. Kae kehe, naʻe hā mei heʻene fokotuʻú ʻa e ʻikai ha siokitá. ʻI ha māmani ʻoku tā-tuʻo-lahi hono fakamuʻomuʻa ai ʻe he kakaí ʻenau ngaahi holi fakafoʻituituí ʻi he meʻa kehe kotoa pē, ʻikai ʻoku mātuʻaki maongo ai ʻa e laumālie taʻesiokita naʻe ʻia Selá? Kapau ʻoku tau loto-lelei ke fakamuʻomuʻa ʻa e ngaahi taumuʻa ʻa e ʻOtuá ʻi heʻetau ngaahi mahuʻingaʻia siokitá, te tau faʻifaʻitaki ai ki he tui ʻa Selá.

Naʻe ʻikai fuoloa kuo hoko ʻa Hekaʻā ʻo feitama kia ʻĒpalahame. ʻI he tui nai ne ʻai ia ʻe heʻene feitamá ke ne mahuʻinga ange ʻia Selá, naʻe kamata ke taʻetokaʻi ai ʻe Hekaʻā ʻa hono pulé. He fakalotomamahi lahi ē ki he fefine paʻa ko Selá! ʻI hono fakaʻatā ʻe ʻĒpalahame pea poupou ki ai mo e ʻOtuá, naʻe tauteaʻi ai ʻe Sela ʻa Hekaʻā ʻi ha founga ʻoku ʻikai fakahaaʻi. Naʻe fanauʻi ʻe Hekaʻā ha foha ko ʻIsimeʻeli pea naʻe ʻosi atu ha ngaahi taʻu. (Sēnesi 16:4-9, 16) ʻI he taimi hono hokó ʻoku fakahaaʻi ʻe he lēkōtí ha pōpoaki meia Sihova, naʻe taʻu 89 ʻa Sela, pea taʻu 99 hono husepānití. Ko ha pōpoaki fakaofo ē naʻá na maʻú!

Naʻe toe talaʻofa ʻa Sihova ki hono kaumeʻa ko ʻĒpalahamé ʻo pehē te Ne fakatokolahi hono hakó. Naʻe liliu foki ʻe he ʻOtuá ʻa e hingoa ʻo e tangatá. ʻI he aʻu mai ki he tuʻunga ko ení, naʻe ʻiloa ia ko ʻEpalame. Ka naʻe toe fakahingoa ia ʻe Sihova ko ʻĒpalahame, ʻa ia ʻoku ʻuhingá ko e “Tamai ʻa ha Fuʻu Kakai (Fuʻu Tokolahi).” Pea ʻi he taimi ko ení, ko e ʻuluaki taimi ia naʻe fakahaaʻi ai ʻe Sihova ʻa e kaunga ʻa Selá. Naʻá ne liliu hono hingoá mei he Sēlaí, ʻa ia naʻe ʻuhinga nai ki he meʻa hangē ko e “Fakakikihi,” ki he Sela, ʻa e hingoa ʻoku tau maheni kotoa mo iá. Ko e hā ʻa e ʻuhinga ʻo e Selá? Ko e “Pilinisesi”! Naʻe fakamatalaʻi ʻe Sihova ʻa e ʻuhinga naʻá ne fili ai ʻa e hingoa ko iá ki he fefine ʻofeina ko ení: “Te u tāpuakiʻi ia pea te u foaki atu foki kiate koe ha foha ʻiate ia; te u tāpuakiʻi ʻa Sela pea te ne hoko ko ha ngaahi puleʻanga; ʻe hoko mai meiate ia ʻa e ngaahi tuʻi ʻo ha ngaahi kakai.”​—Sēnesi 17:5, 15, 16.

Ko e fuakava ʻa Sihova ke ʻomai ha hako ʻa ia te ne tāpuakiʻi ʻa e kotoa ʻo e ngaahi puleʻangá ʻe fakahoko ia fakafou ʻi he tama ʻa Selá! Ko e hingoa naʻe fili ʻe he ʻOtuá maʻá e tamasiʻí, ko e ʻAisake, ʻoku ʻuhingá ko e “Kata.” ʻI he fuofua ʻilo ʻa ʻĒpalahame ki he taumuʻa ʻa Sihova ke tāpuakiʻi ʻa Sela ʻaki haʻane tama pē ʻaʻaná, naʻá ne ‘tō foʻohifo pea kamata ke ne kata.’ (Sēnesi 17:17) Naʻá ne ʻohovale pea mo tōtuʻa ʻene fiefiá. (Loma 4:19, 20) Pea fēfē ʻa Sela ia?

ʻIkai fuoloa naʻe haʻu ha kau tangata ʻe toko tolu, ko ha kau sola, ki he tēniti ʻo ʻĒpalahamé. Ko e lolotonga ia ʻa e vela ʻa e ʻahó, ka naʻe fakavave leva ʻa e ongo mātuʻa taʻumotuʻá ni ke talitali ʻa e kau ʻaʻahí ni. Naʻe pehē ʻe ʻĒpalahame kia Sela: “Fakatoʻotoʻo! ʻOmai ha fua mahoaʻa lelei ʻe tolu, natu ʻa e takaongá, pea ngaohi ha ngaahi foʻi mā.” Ko ha ngāue lahi ʻa e anga-talitali kakaí ʻi he taimi ko iá. Naʻe ʻikai ke tuku pē ʻe ʻĒpalahame ʻa e kotoa ʻo e ngāué ki hono uaifí; naʻá ne fakavave ke tāmateʻi mai ha kiʻi pulu pea teuteu mo ha meʻakai mo ha inu lahi ange. (Sēnesi 18:1-8) Ko e “kau tangata” ko iá ko e kau ʻāngelo ʻa Sihova! ʻOku ngalingali naʻe ʻi he fakakaukau ʻa e ʻapositolo ko Paulá ʻa e meʻá ni ʻi he taimi naʻá ne tohi ai: “ʻOua ʻe ngalo ʻa e anga-talitali kakaí, he naʻe fakafou ai hono talitali ʻe he niʻihi ha kau ʻāngelo ʻi he taʻeʻilo.” (Hepelū 13:2) ʻE lava ke ke faʻifaʻitaki ki he faʻifaʻitakiʻanga fisifisimuʻa ʻo e anga-talitali kakaí naʻe fokotuʻu ʻe ʻĒpalahame mo Selá?

ʻI he taimi naʻe toe leaʻaki ai ʻe ha taha ʻo e kau ʻāngeló kia ʻĒpalahame ʻa e talaʻofa ʻa e ʻOtuá fekauʻaki mo hano fāʻeleʻi ʻe Sela ha tamá, naʻe ʻikai ke fai ha sio kia Sela, naʻá ne ʻi hono tēnití pē ʻo fanongo. Ko e fakakaukau ki heʻene fāʻele ʻi hono taʻumotuʻá naʻe mātuʻaki ngali kehe kiate ia ʻo ʻikai malava ai ke ne faʻa fakamaʻumaʻu​—naʻá ne kata loto, ʻo pehē: “Hili ia ʻeku vaivai pea kuo motuʻa mo hoku ʻeikí, te u maʻu moʻoni koā ʻa e fiefia ko ení?” Naʻe fakatonutonu ʻe he ʻāngeló ʻa Sela ʻaki ha fehuʻi hangatonu, “ʻOku ʻi ai koā ha meʻa ʻe fuʻu lahi fau kia Sihova?” Ko e tali ʻa Selá naʻe fai ʻi he ilifia, taukapo mo anga-maheni. Naʻá ne kaila: “Naʻe ʻikai te u kata!” Naʻe tali ange ʻe he ʻāngeló: “ʻIo, naʻá ke kata.”​—Sēnesi 18:9-15.

Naʻe fakahaaʻi ʻe he kata ʻa Selá naʻe siʻi ʻene tuí? ʻIkai ʻaupito. ʻOku pehē ʻe he Tohi Tapú: “ʻI he tuí foki naʻe maʻu ai ʻe Sela ʻa e mālohi ke tuʻituʻiaʻi ha tama, neongo naʻá ne fakalaka atu ʻi he taʻumotuʻa ke fanaú, koeʻuhí naʻá ne tui ko e Tokotaha naʻá ne fai ʻa e talaʻofá ʻoku faitōnunga.” (Hepelū 11:11) Naʻe ʻilo ʻe Sela ʻa Sihova; naʻá ne ʻilo te ne lava ʻo fakahoko ha talaʻofa pē kuó ne fai. Ko hai ʻiate kitautolu ʻoku ʻikai fiemaʻu ki ai ha tui lahi ange ai? ʻOku lelei ke tau ʻiloʻi lelei ange ʻa e ʻOtua ʻo e Tohi Tapú. ʻI heʻetau fai peheé, te tau ʻiloʻi ai naʻe tonu hono maʻu ʻe Sela ʻa e tui naʻá ne maʻú. Ko e moʻoni ko Sihová ʻoku faitōnunga mo fakahoko ʻene talaʻofa kotoa pē​—ʻi ha taimi, te ne fai nai eni ʻi ha founga te ne fakaʻohovaleʻi kitautolu ʻo tau ofo ai pe kata ʻi he taʻetui!

ʻI he taʻu 90 ʻa Selá, naʻá ne fiefia ai ʻi he mōmeniti naʻá ne ʻunaloto ki ai ʻi he kotoa ʻo ʻene moʻui ko ha tokotaha lahí. Naʻá ne fāʻeleʻi ha tama ki hono husepāniti ʻofaʻangá ʻa ia naʻá ne taʻu teau ʻi he taimi ko iá! Naʻe fakahingoa ʻe ʻĒpalahame ʻa e kiʻi pēpeé ko ʻAisake, pe “Kata,” hangē tofu pē ko ia naʻe folofolaʻaki ʻe he ʻOtuá. ʻOku tau sioloto atu nai ki he ongosia ʻa Selá kae malimali fiefia ʻo hangē ko ia naʻá ne leaʻakí: “Kuo ʻai au ʻe he ʻOtuá ke u kata; ko e tokotaha kotoa pē ʻe fanongo ki aí te ne kata fakataha mo au.” (Sēnesi 21:6) Ko e meʻaʻofa fakaemana ko eni meia Sihová ʻoku pau pē naʻá ne ʻai ia ke fiefia ʻo aʻu ki he ngataʻanga ʻo hono ngaahi ʻahó. Kae kehe, naʻá ne toe maʻu ai ʻa e ngaahi fatongia lahi.

ʻI he taʻu nima ʻa ʻAisaké, naʻe fai ʻe he fāmilí ha kātoanga kai ke fakaʻilongaʻiʻaki ʻa hono mavae ʻa e kiʻi tamá. Ka naʻe ʻikai lelei ʻa e meʻa kotoa. ʻOku tau lau “naʻe hanganaki fakatokangaʻi ʻe Sela” ha tōʻonga ʻikai lelei. Ko ʻIsimeʻeli, ko e tama taʻu 19 ʻa Hekaʻaá naʻá ne hanganaki manukiʻi ʻa siʻi ʻAisaké. Naʻe ʻikai ko ha fakamatalili pē eni. Naʻe fakamānavaʻi ʻa e ʻapositolo ko Paulá ki mui ʻo ne ui ʻa e ʻulungaanga ʻo ʻIsimeʻelí ko ha fakatanga. Naʻe sio ʻa Sela ki he natula totonu ʻo e houtamaki ko ení: ko ha mātuʻaki fakamanamana ki he moʻui fiefia ʻa ʻene tamá. Naʻe lāuʻilo ʻa Sela ko ʻAisaké naʻe mahulu hake ia mei hono tuʻunga ko ʻene tamá; naʻe vaheʻi kiate ia ha ngafa tefito ʻi he taumuʻa ʻa Sihová. Ko ia naʻe ueʻi ai ia ke ne loto-toʻa ʻo lea hangatonu kia ʻĒpalahame. Naʻá ne kole ange ke tukuange atu ʻa Hekaʻā mo ʻIsimeʻeli.​—Sēnesi 21:8-10; Kalētia 4:22, 23, 29.

Ko e hā ʻa e tali ki ai ʻa ʻĒpalahamé? ʻOku tau lau: “Ko e meʻa naʻá ne leaʻaki fekauʻaki mo e foha ʻo ʻĒpalahamé naʻe mātuʻaki taʻefakafiemālie ia kiate ia.” Naʻá ne ʻofa ʻia ʻIsimeʻeli, pea naʻe fakakuihi ia ʻe heʻene ongo fakaetamaí ʻi he meʻá ni. Kae kehe, naʻe ʻafioʻi lelei ʻe Sihova ʻa e meʻá ni, ko ia naʻá ne kau mai. ʻOku tau lau: “Naʻe folofola leva ʻa e ʻOtuá kia ʻĒpalahame: ‘ʻOua te ke taʻefiemālie ʻi he meʻa ʻoku leaʻaki ʻe Sela kiate koe fekauʻaki mo e tamasiʻí pea ʻi he fekauʻaki mo hoʻo kaunangá. Fanongo kiate ia, he ko ia ʻe ui ko ho hakó ʻe fou mai ia ʻia ʻAisake.’” Naʻe fakapapauʻi ange ʻe Sihova kia ʻĒpalahame ʻe kei fai pē ʻa e tokonaki maʻa Hekaʻā mo ʻene tamá. Naʻe talangofua leva ʻa e tokotaha faitōnunga ko ʻĒpalahamé.​—Sēnesi 21:11-14.

Ko Sela ko ha uaifi moʻoni ia ʻo ʻĒpalahame, ko ha fakakakato moʻoni ia. Naʻe ʻikai tala ange pē ʻe Sela ki hono husepānití ʻa e meʻa pē naʻe loto hono husepānití ke fanongo ki aí. ʻI heʻene sio ki ha palopalema, ki ha meʻa naʻe kaunga ki he fāmilí mo honau kahaʻú, naʻá ne fakahaaʻi moʻoni ia ki hono husepānití. Ko ʻene lea hangatonú ʻoku ʻikai totonu ke maʻuhala ia ko ha taʻefakaʻapaʻapa. Ko hono moʻoní, ko e ʻapositolo ko Pitá, ko ha tangata mali, naʻá ne lave ki mui kia Sela ko ha faʻifaʻitakiʻanga lelei ia ʻo ha uaifi naʻá ne fakahaaʻi ʻa e fakaʻapaʻapa ki hono husepānití. (1 Kolinitō 9:5; 1 Pita 3:5, 6) Ko e moʻoni, kapau naʻe fakalongolongo pē ʻa Sela ʻi he fekauʻaki mo e meʻá ni, naʻe ʻikai te ne mei fakaʻapaʻapa ai kia ʻĒpalahame, he naʻe mei hoko ai ha mole lahi kiate ia mo e fāmilí fakakātoa. Naʻe leaʻaki anga-ʻofa ʻe Sela ʻa e meʻa naʻe fiemaʻu ke ne leaʻakí.

ʻOku koloaʻaki ʻe he ngaahi uaifi tokolahi ʻa e faʻifaʻitakiʻanga ʻa Selá. ʻOku nau ako meiate ia ke fetuʻutaki faitotonu mo fakaʻapaʻapa ki honau ngaahi husepānití. ʻOku fakaʻamu nai ʻa e ngaahi uaifi ʻe niʻihi, ʻi ha taimi, ke kau mai ʻa Sihova ʻo hangē ko ia naʻá ne fai ʻi he fekauʻaki mo Selá. Neongo ia, ʻoku nau ako mei he tui, ʻofa mo e kātaki fisifisimuʻa ʻa Selá.

Neongo naʻe ui ʻe Sihova tonu ʻa e fefiné ni ko e “Pilinisesi,” naʻe ʻikai ke ʻamanekina ʻe he fefiné ni ke fakafeangai fakaʻeiʻeiki ange kiate ia. ʻOku ʻikai ha ofo ʻi he taimi naʻá ne mate ai ʻi hono taʻu 127, “naʻe kamata ke tengihia mo tangi ʻa ʻĒpalahame koeʻuhi ko Sela.” c (Sēnesi 23:1, 2) Naʻá ne manatu moʻoni ki heʻene “Pilinisesi” ʻofeiná. ʻOku ʻikai ha veiveiua, ʻoku toe manatu mo Sihova ki he fefine faitōnunga ko ení—pea ʻokú ne taumuʻa ke toe fakafoki mai ia ke moʻui ʻi ha māmani palataisi. ʻOku fakatatali mai ha kahaʻu taʻengata mo fakafiefia kia Sela​—pea mo e faʻahinga kotoa ʻoku faʻifaʻitaki ki heʻene tuí.​—Sione 5:28, 29.