Maluʻi Papau mei ha Tauhele ʻa Sētane

ʻI HE teu ke kolosi ʻa e kau ʻIsileli ʻo e kuonga muʻá ʻi he Vaitafe Sioataní ki he fonua naʻe talaʻofa ʻe he ʻOtuá maʻanautolú, naʻe ʻasi atu ha kau ʻaʻahi. Ko e kau ʻaʻahí ko e kau fefine muli ʻa ia naʻa nau fakaafeʻi ʻa e kau tangatá ki ha kātoanga. Naʻe hā ngali ko ha faingamālie makehe eni. Ko hono maʻu ha ngaahi kaungāmeʻa foʻou, tauʻolunga pea kai mo e meʻakai lelei naʻe lava ke hā fakamānako ʻaupito. Neongo ko e ngaahi anga fakafonua mo e tōʻonga ʻa e kau fefine ko iá naʻe ʻikai fehoanaki mo e Lao ʻa e ʻOtuá naʻe ʻoange ki ʻIsilelí, ko e kau tangata ʻIsileli ʻe niʻihi naʻa nau pehē nai: ‘Te mau lavaʻi pē ʻe kimautolu. Te mau tokanga.’

Ko e hā e meʻa naʻe hokó? ʻOku tala mai ʻe he fakamatala fakamānavaʻí: “Naʻe kamata . . . ke fehokotaki fakasino taʻetaau ʻa e kakaí mo e ngaahi ʻofefine ʻo Mōapé.” Ko hono moʻoní, naʻe loto ʻa e kau fefiné ke lotu ʻa e kau tangata ʻIsileli ko iá ki he ngaahi ʻotua loí. Pea naʻe pehē! ʻOku hā mahino “naʻe hoko ai ʻo houhau ʻa Sihova ʻi ʻIsileli.”​—Nōm. 25:1-3.

Naʻe maumauʻi ʻe he kau ʻIsileli ko iá ʻa e Lao ʻa e ʻOtuá ʻi he founga ʻe ua: Naʻa nau punou ki he ngaahi ʻaitolí, pea naʻa nau fai ʻa e fehokotaki fakasino taʻetaau. Naʻe mate ʻa e laui afe koeʻuhi ko ʻenau talangataʻá. (ʻEki. 20:4, 5, 14; Teu. 13:6-9) Ko e hā naʻe toe mātuʻaki fakamamahi ai ʻa e tuʻungá ni? Ko e taimí. Kapau naʻe ʻikai maumauʻi ʻe he kau tangatá ʻa e Lao ʻa e ʻOtuá, ko e laui afe ʻo e kau ʻIsileli ko iá naʻe teu ke nau kolosi ʻi Sioatani ki he Fonua ʻo e Talaʻofá.​—Nōm. 25:5, 9.

ʻI he fekauʻaki mo e ngaahi meʻa ko iá, naʻe tohi ʻe he ʻapositolo ko Paulá: “Ko e ngaahi meʻa naʻe hoko kiate kinautolú naʻe tohi ia ko hotau fakahinohino, koeʻuhi ko e faʻahinga ko ia ʻo kitautolu ʻoku moʻui ʻi he ngataʻanga ʻo e fokotuʻutuʻu ko ení ke ʻoua naʻa tau hangē ko kinautolú.” (1 Kol. 10:7-11) ʻOku ʻikai ha veiveiua naʻe fiefia ʻa Sētane ʻi he tō ʻa e niʻihi ʻo e kau ʻIsileli ko iá ʻi he angahala mamafá pea ʻikai ai ke nau taau ke hū ki he Fonua ʻo e Talaʻofá. He fakapotopoto ē kiate kitautolu ke manatuʻi ʻa e fakatokanga ko iá, ʻo ʻiloʻi ʻoku ʻikai ha meʻa ʻe toe saiʻia ange ai ʻa Sētane ka ko ʻene taʻofi kitautolu mei he hū ki he māmani foʻou ʻa e ʻOtuá!

ʻOku tauheleʻi ʻe Sētane ʻa e kau Kalisitiané, ʻo ngāueʻaki ʻa e ngaahi founga ʻokú ne ʻiloʻi leleí pea kuo ola lelei ʻi he kakai tokolahi. Hangē ko ia naʻe lave ki ai ki muʻa ʻi he kau ʻIsilelí, naʻá ne ngāueʻaki ʻa e fehokotaki fakasino taʻetāú. ʻI hotau taimí, ko e ʻulungaanga taʻetāú ʻoku hokohoko atu ʻene hoko ko ha tauhele fakatuʻutāmaki. Ko e founga ola lelei ʻe taha ʻe lava ke maʻu ai kitautolú ko e ʻata fakalieliá.

ʻI he ʻahó ni, ʻe lava ke vakai ha taha ki he ʻata fakalieliá ʻo ʻikai ʻilo ki ai ha taha. ʻI he laui hongofuluʻi taʻu kuohilí, ko ha tokotaha naʻe loto ke sio ʻi he ʻata fakalieliá naʻe pau ke ne ʻalu ki ha fale faiva ke sio ai ʻi he ngaahi faiva taʻetāú pe ko e fale tohi ʻa e kakai lalahí ke fakatau ha tohi ʻoku hā ai ʻa e ʻata fakalieliá. Ngalingali ko e tokolahi naʻe ʻikai ke nau ʻalu ki he ngaahi feituʻu ko ení koeʻuhí naʻa nau fakamāʻia naʻa sio atu kiate kinautolu ʻa e kakai kehé. Ka ʻi he taimí ni, ko ha tokotaha ʻoku hū ki he ʻInitanetí ʻe lava ke ne sio ki he ʻata fakalieliá ʻi he ngāueʻangá pe naʻa mo e ʻi ha kā. Pea ʻi he ngaahi fonua lahi, ko ha tangata pe fefine ʻe lava ke sio ʻi he ʻata fakalieliá ʻo ʻikai fiemaʻu ke mavahe mei ʻapi.

ʻOku ʻikai ko ia pē. Ko e ngaahi meʻangāue toʻotoʻó kuo ʻai ai ke faingofua ange ke sio ʻi he ʻata fakalieliá. ʻI he lue ʻa e kakaí ʻi he halá pe heka ʻi ha pasi pe lēlue, ʻe lava ke nau vakai ki he ngaahi ʻata taʻetāú ʻi heʻenau meʻangāue toʻotoʻó.

Koeʻuhi kuo toe faingofua ange ke sio ki he ʻata fakalieliá pea mo e ʻikai ke ʻiloʻi ha taha ʻokú ne fai peheé, ko e ʻata fakalieliá kuo fakatupu maumau ange ʻi he ʻahó ni ʻi he kuohilí. Ko e faʻahinga taʻefaʻalaua ʻoku nau sio ʻi he ʻata fakalieliá ʻoku maumauʻi ai ʻenau nofo malí, tokaʻi-kitá mo honau konisēnisí. Ko e kovi angé, ʻoku nau ʻai ke ʻi ha tuʻunga fakatuʻutāmaki hono maumauʻi ʻenau kaumeʻa mo e ʻOtuá. ʻOku lava ke ke fakapapauʻi ko e ʻata fakalieliá ʻoku fakatupu maumau ki he faʻahinga ʻoku nau sio aí. ʻI he ngaahi tuʻunga lahi, ʻokú ne fakatupunga ha lavea fakaeongo lahi. Ko e ngaahi lavea ko iá ʻe māmālie nai ʻene saí ka ʻe fakatupunga nai ai ha uesia tuʻuloa.

Kae kehe, ʻoku totonu ke tau ʻiloʻi ʻoku ʻomai ʻe Sihova ʻa e maluʻi mei he tauhele ko eni ʻa Sētané. Kapau ʻoku tau loto ke maʻu ʻa e maluʻi ʻa Sihová, kuo pau ke tau fai ʻa e meʻa naʻe ʻikai ke fai ʻe he kau tangata ʻIsilelí​—“mātuʻaki talangofua” kiate ia. (ʻEki. 19:5) ʻOku fiemaʻu ke tau ʻiloʻi ʻoku fehiʻa ʻaupito ʻa e ʻOtuá ʻi he ʻata fakalieliá. Ko e hā ʻoku tau lea pehē aí?

ʻI he fakakaukau ki he meʻá ni: Ko e lao ʻa e ʻOtuá ki he puleʻanga ʻIsilelí naʻe makehe ʻi he kuonga muʻá. ʻI he hangē ha ʻā, naʻe lava ke fakamavaheʻi ai ʻa ʻIsileli mei he kakai takatakaí mo ʻenau ngaahi tōʻonga fakalieliá. (Teu. 4:6-8) Ko e ngaahi lao ko iá naʻe ʻai ai ke māʻalaʻala ʻa e moʻoni mātuʻaki mahuʻinga: ʻOku fehiʻa ʻa Sihova ʻi he fehokotaki fakasino taʻetāú.

Naʻe lave ʻa Sihova ki he ngaahi meʻa taʻetaau naʻe fai ʻe he ngaahi puleʻanga takatakaí peá ne tala ki he kau ʻIsilelí: “Kuo pau ke ʻoua naʻa mou fai ʻa e meʻa ʻoku fai ʻe kinautolu ʻi he fonua ko Kēnaní, ʻa ia ʻoku ou ʻomi kimoutolu ki aí. . . . ʻOku taʻemaʻa ʻa e fonuá, pea te u ʻomai ʻa e tautea ki ai ʻi heʻene faihalá.” Ki he ʻOtua māʻoniʻoni ʻo ʻIsilelí, ko e tōʻonga moʻui ʻa e kau Kēnaní naʻe fakalielia pea ko e fonua naʻa nau nofo aí naʻe taʻemaʻa mo ʻuli.​—Liv. 18:3, 25.

Neongo naʻe tauteaʻi ʻe Sihova ʻa e kau Kēnaní, ko e kakai ʻe niʻihi naʻe hokohoko atu pē ʻenau fai ʻa e fehokotaki fakasino taʻetāú. ʻI he taʻu ʻe 1,500 tupu ki mui ai, naʻe fakamatalaʻi ʻe Paula ʻa e ngaahi puleʻanga naʻe nofo ai ʻa e kau Kalisitiané “kuo ʻikai ke nau toe maʻu ʻa e ongoʻi fakaeʻulungaanga totonu kotoa pē.” Ko hono moʻoní, “kuo nau tuku atu kinautolu ki he faikovi taʻemīngao, ke tōʻongaʻaki ʻa e faʻahinga kotoa pē ʻo e taʻemaʻá ʻi he havala.” (ʻEf. 4:17-19) ʻI he ʻahó ni foki, ko e kakai tokolahi ʻoku nau ʻulungaanga taʻetaau taʻemīngao. Ko ia kuo pau ki he kau lotu moʻoní ke nau fakaʻehiʻehi ʻi he mamaʻo taha ʻe ala lavá mei he sio ki he ngaahi tōʻonga taʻetaau ʻa e faʻahinga ʻi he māmani ko ení.

Ko e sio ʻi he ʻata fakalieliá ko ha taʻefakaʻapaʻapaʻi lahi ia ʻo e ʻOtuá. Naʻá ne ngaohi ʻa e tangatá ʻi hono ʻīmisí mo hono tataú pea ʻomai ʻa e malava ke ʻiloʻi ʻa e tonú pe halá. Naʻe fakapotopoto ʻa e ʻOtuá ʻi hono ʻomai ʻa e fakangatangata totonu ki he fehokotaki fakasinó. Naʻá ne fakataumuʻa ia ke hoko ko ha meʻa ʻe lava ke fiefia fakataha ai ʻa e ngaahi hoa malí. (Sēn. 1:26-28; Pal. 5:18, 19) Kae fēfē ʻa e faʻahinga ʻoku nau faʻu mo pouaki ʻa e sio ʻi he ʻata fakalieliá? ʻOku nau mātuʻaki tukunoaʻi ʻa e ngaahi tuʻunga ʻa e ʻOtuá. ʻIo, ko e kakai ʻoku nau pouaki ʻa e sio ʻi he ʻata fakalieliá ʻoku nau lumaʻi ʻa Sihova. ʻE fakamāuʻi ʻe he ʻOtuá ʻa e faʻahinga ʻoku nau tukunoaʻi ʻene ngaahi tuʻungá ʻaki ʻenau faʻu pe pouaki ʻa e ngaahi meʻa taʻetāú.​—Loma 1:24-27.

Kae fēfē ʻa e kakai ʻoku nau lau pe vakai ʻiloʻilo pau ki he ʻata fakalieliá? ʻOku ongoʻi nai ʻa e niʻihi ʻoku ʻikai fakatupu maumau ʻa e fakafiefia ko iá. Neongo ia, ʻoku nau poupouʻi moʻoni ʻa e faʻahinga ʻoku nau taʻefakaʻapaʻapaʻi ʻa e ngaahi tuʻunga ʻa Sihová. Naʻe ʻikai nai ko ʻenau taumuʻá eni ʻi heʻenau kamata sio ʻi he ʻata fakalieliá. Ka ʻoku hā mahino ko e kau lotu ki he ʻOtua moʻoní ʻoku totonu ke nau fehiʻa ʻaupito ʻi he ʻata fakalieliá. ʻOku ekinaki mai ʻa e Tohi Tapú: “Ko kimoutolu ʻoku ʻofa kia Sihová, mou fehiʻa ʻi he meʻa ʻoku koví.”​—Saame 97:10.

Naʻa mo e faʻahinga ʻoku nau loto ke fakaʻehiʻehi mei he sio ʻi he ʻata fakalieliá ʻoku lava ke nau ʻilo ʻoku faingataʻa ke fai peheni. ʻOku tau taʻehaohaoa, pea kuo pau nai ke tau faitau ke talitekeʻi ʻa e ngaahi holi taʻemaʻa fakaefehokotaki fakasinó. ʻIkai ko ia pē, ko hotau loto taʻehaohaoá te tau kumi kalofanga nai ai ke sio ʻi he ʻata fakalieliá. (Sel. 17:9) Ka ko e tokolahi kuo nau hoko ko e kau Kalisitiané kuo nau ikuna ʻi he faitau ko ení. Ko hono ʻiloʻi ení ʻe lava ke hoko ia ko ha fakalototoʻa kapau ʻokú ke faitau mo ha meʻa meimei tatau. Fakatokangaʻi ʻa e founga ʻe lava ke tokoniʻi ai koe ʻe he Folofola ʻa e ʻOtuá ke fakaʻehiʻehi mei he tauhele ʻa Sētane fakafou he ʻata fakalieliá.

Hangē ko ia naʻe lave ki ai ki muʻá, naʻe fakaʻatā ʻe he kau ʻIsileli tokolahi ke taki kinautolu ʻe he ngaahi holi fehālaakí ki he fakatamakí. Ko e meʻa tatau ʻe lava ke hoko ʻi he ʻaho ní. Ko e tokoua faʻē taha ʻa Sīsū ko Sēmisí naʻá ne fakamatala ki he fakatuʻutāmakí: “Ka ʻoku ʻahiʻahiʻi ʻa e tokotaha taki taha ʻi hono tohoakiʻi mo fakataueleʻi ʻe heʻene holi pē ʻaʻaná. Ko e holí leva, ʻi heʻene hoko ʻo tuʻituʻiá, ʻokú ne fanauʻi mai ʻa e angahala.” (Sēm. 1:14, 15) ʻI he tupu ha holi taʻetaau ʻo aʻu ki ha tuʻunga pau ʻi he loto ʻo ha tokotaha, ngalingali ko e tokotaha ko iá te ne fai ha angahala. Ko ia kuo pau ke tau toʻo atu ʻa e ngaahi fakakaukau taʻetāú, ʻo ʻoua ʻe nōfoʻi ai.

Kapau ʻoku fakataueleʻi koe ʻe he ngaahi fakakaukau taʻetāú, fai ha ngāue fakavave. Naʻe pehē ʻe Sīsū: “Kapau leva ko ho nimá pe ko ho vaʻé ʻokú ne ʻai koe ke ke tūkiá, tuʻusi ia ʻo liʻaki. . . . Pehē foki, kapau ko ho matá ʻokú ne ʻai koe ke ke tūkiá, kapeʻi ia ʻo liʻaki.” (Māt. 18:8, 9) Naʻe ʻikai ʻuhinga mai ʻa Sīsū ia ke tau fai moʻoni eni ki he ngaahi konga hotau sinó. Naʻá ne fakatātaaʻi ʻa e fiemaʻu ke toʻo ʻa e meʻa ʻoku fakatupu tūkiá​—vave mo pau. ʻE lava fēfē ke tau ngāueʻaki ʻa e akonaki ko ení ʻi he fekauʻaki mo e ʻata fakalieliá?

Kapau te ke fetaulaki mo ha ʻata fakalielia, ʻoua te ke fakakaukau, ‘Te u lavaʻi pē ʻe au.’ Sio kehe ʻi he taimi pē ko iá. Tāmateʻi ʻa e televīsone ʻi he taimi pē ko iá. Tāmateʻi leva ʻa e komipiutá pe meʻangāue toʻotoʻó. Tokangataha ki ha meʻa ʻoku maʻa. Ko hono fai ení ʻe lava ke ke mapuleʻi ai hoʻo fakakaukaú kae ʻikai fakaʻatā ʻa e ngaahi holi fehālaakí ke ne puleʻi koe.

Fēfē kapau kuó ke malava ʻo taʻofi ʻa e sio ʻi he ʻata fakalieliá, ka ʻokú ke faʻa manatuʻi he taimi ʻe niʻihi ʻa e meʻa naʻá ke sio aí? Ko e ʻata pe fakakaukau fakalieliá ʻe lava ke nofo ia ʻi he ʻatamai ʻo ha taha ʻi ha taimi fuoloa. ʻE lava ke hoko eni ʻi ha faʻahinga taimi pē. Kapau ʻoku hoko ia, te ke ongoʻi nai ʻoku tenge koe ke ke fai ha meʻa taʻemaʻa, hangē ko e fakalielia-toko-taha. Ko ia ʻiloʻi ko e ngaahi fakakaukau peheé ʻe lava ke malanga fakafokifā hake, pea mateuteu ke tauʻi ia.

Fakaivimālohiʻi hoʻo fakapapau ke fakamoʻulaloa hoʻo fakakaukaú mo e tōʻongá ki he finangalo ʻo e ʻOtuá. Hoko ʻo hangē ko e ʻapositolo ko Paulá, naʻá ne loto-lelei ke “tuki pohu ʻa [hono] sinó mo taki ia hangē ha pōpulá.” (1 Kol. 9:27) ʻOua ʻe fakaʻatā ʻa e ngaahi holi taʻemaʻá ke ne taki pōpula koe. “Fai homou liliú ʻaki hono fakafoʻou homou ʻatamaí, koeʻuhi ke mou lava ʻo fakamoʻoniʻi kiate kimoutolu ʻa e finangalo lelei mo fakahōifua mo haohaoa ʻo e ʻOtuá.” (Loma 12:2) Manatuʻi: Ko e fakakaukau pea ngāue ʻo fehoanaki mo e finangalo ʻo e ʻOtuá te ne ʻoatu ʻa e fiemālie lahi mamaʻo ange ia ʻi he ʻulutukua ki he ngaahi holi angahalaʻiá.

Feinga ke manatuʻi ʻa e ngaahi veesi Tohi Tapu pau. Pea ʻi he taimi ʻoku malanga hake ai ʻa e ngaahi fakakaukau fehālaakí, ʻai ke ke fakakaukau fekauʻaki mo e ngaahi konga Tohi Tapu ko iá. Ko e Saame 119:37; ʻAisea 52:11; Mātiu 5:28; ʻEfesō 5:3; Kolose 3:5; mo e 1 Tesalonaika 4:4-8 te ne tokoniʻi koe ke ke maʻu ʻa e fakakaukau ʻa Sihova fekauʻaki mo e ʻata fakalieliá mo e meʻa ʻokú ne ʻamanekina meiate koé.

Fēfē kapau ʻi he tuʻunga ʻe niʻihi ko e holi ke sio pe fakakaukau fekauʻaki mo e ngaahi meʻa taʻetāú ʻoku hoko ʻo ʻikai meimei lava ʻo ikuʻi? Muimui ofi ki hotau Faʻifaʻitakiʻangá, ʻa Sīsū. (1 Pita 2:21) Hili ʻa e papitaiso ʻa Sīsuú, naʻe hanganaki fakataueleʻi ia ʻe Sētane. Ko e hā naʻe fai ʻe Sīsuú? Naʻá ne hanganaki talitekeʻi ia. ʻI hono toutou ngāueʻaki ʻa e ngaahi konga Tohi Tapú, naʻá ne talitekeʻi ai ʻa e ngaahi fakatauele ʻa Sētané. Naʻá ne pehē: “ʻAlu ki mamaʻo, Sētane!” Pea naʻe mavahe meiate ia ʻa Sētane. Hangē pē ko e ʻikai ʻaupito ke foʻi ʻa Sīsū ʻi he faitau mo e Tēvoló, ʻoku totonu ke ke pehē foki mo koe. (Māt. 4:1-11) Ko Sētane mo hono māmaní ʻe hokohoko atu ʻenau feinga ke fakafonu ho ʻatamaí ʻaki ʻa e ngaahi fakakaukau taʻetāú, kae ʻoua ʻe foʻi ʻi he faitaú. ʻE lava ke ke ikuna ʻi he faitau mo e sio ʻi he ʻata fakalieliá. ʻI he tokoni ʻa Sihová, ʻe lava ke ke ikunaʻi ho filí.

Falala kakato kia Sihova ʻi he lotu. Naʻe pehē ʻe Paula: “ʻAi ke ʻilo hoʻomou ngaahi kolé ʻe he ʻOtuá . . . pea ko e nonga ʻa e ʻOtuá ʻa ia ʻoku fakalaka atu ʻi he mahino kotoa pē te ne maluʻi homou lotó pea mo homou ngaahi mafai fakaefakakaukaú fakafou ʻia Kalaisi Sīsū.” (Fil. 4:6, 7) Ko e nonga ʻa e ʻOtuá ʻokú ne ʻomai ʻa e fakafiemālie ʻi he faitau mo e angahalá. Kapau te ke ʻunuʻunu ofi kia Sihova, “te ne ʻunuʻunu ofi mai kiate [koe].”​—Sēm. 4:8.

Ko e maluʻi lelei taha mei ha fakamanamana pē ko e ʻunuʻunu ofi ki he Hau ʻo e ʻunivēsí. Naʻe pehē ʻe Sīsū: “ʻOku haʻu ʻa e pule ʻo e māmaní [ʻa Sētane], pea ʻoku ʻikai hano mafai kiate au.” (Sione 14:30) Ko e hā naʻe maʻu ai ʻe Sīsū ʻa e falala pau peheé? Naʻe tuʻo taha ʻene pehē: “Ko e Tokotaha naʻá ne fekau mai aú ʻokú ne kau mo au; naʻe ʻikai te ne siʻaki au ke u toko taha, koeʻuhi ʻoku ou fai maʻu pē ʻa e ngaahi meʻa ʻoku fakahōifua kiate iá.” (Sione 8:29) ʻI hoʻo fai ʻa e ngaahi meʻa ʻoku fakahōifua kia Sihová, heʻikai ʻaupito foki te ne liʻaki koe. Fakaʻehiʻehi mei he tauhele ʻo e sio ʻi he ʻata fakalieliá, pea heʻikai malava ʻe Sētane ke ne maʻu tuʻuloa koe.