Maʻu ʻAonga Lahi Ange mei Hoʻo Lau Tohi Tapú

 1. Ko e hā ʻokú ne fakahaaʻi ko e Folofolá naʻe mahuʻinga kia Sīsū?

SIOLOTO atu kapau naʻá ke ʻi ai ʻo fanongo ki he faiako ʻa Sīsuú. Naʻá ne toutou lave ki he Ngaahi Konga Tohi Tapu Māʻoniʻoní ʻa ia naʻá ne maʻuloto kotoa ia! Ko hono moʻoní, ʻi he ngaahi fuofua lea ʻa Sīsū naʻe hiki hili ʻene papitaisó pea mo ʻene ngaahi lea fakaʻosi ki muʻa peá ne pekiá, naʻá ne toʻo-lea mei he Folofolá.b (Teu. 8:3; Saame 31:5; Luke 4:4; 23:46) Pea ʻi he lolotonga ʻo e taʻu ʻe tolu mo e konga ʻi he ongo vahaʻa taimi ko iá, naʻe faʻa lau mo toʻo-lea ʻa Sīsū mei he Folofolá ʻi he ʻao ʻo e kakaí pea fakamatalaʻi ia.​—Māt. 5:17, 18, 21, 22, 27, 28; Luke 4:16-20.

 2. ʻI he tupu hake ʻa Sīsuú, ko e hā naʻe tokoni kiate ia ke ne ʻiloʻi lelei ai ʻa e Folofolá? (Sio ki he tā ʻi he takafí.)

² ʻI he ngaahi taʻu ki muʻa ke kamata ʻa e ngāue fakafaifekau ʻa Sīsuú, naʻá ne toutou lau mo fanongo ki he Folofola ʻa e ʻOtuá. ʻI ʻapi, ʻoku ʻikai ha veiveiua naʻá ne fanongo ki he toʻo-lea hangatonu ʻa Mele mo Siosifa mei he Folofolá lolotonga ʻa e fetalanoaʻaki fakaʻaho ʻa e fāmilí.c (Teu. 6:6, 7) ʻOku lava ke tau fakapapauʻi naʻe ʻalu maʻu pē ʻa Sīsū ki he sinakoké ʻi he Sāpate kotoa mo hono fāmilí. (Luke 4:16) Lolotonga ʻene ʻi aí, kuo pau pē naʻá ne fanongo tokanga ki hono lau ʻo e Folofolá. ʻI he faai atu ʻa e taimí, naʻe ako ʻe Sīsū ke lau ʻa e Ngaahi Tohi Māʻoniʻoni ko iá ʻiate ia pē. Pea ko hono olá, naʻe ʻikai ngata pē hono ʻiloʻi lelei ʻe Sīsū ʻa e Folofolá ka naʻá ne toe ʻofa foki ai pea fakaʻatā ia ke tākiekina ʻene ngaahi ngāué. Ko e fakatātaá, manatuʻi ʻa e meʻa naʻe hoko ʻi he temipalé ʻi he taʻu 12 pē ʻa Sīsuú. Ko e kau faiako naʻa nau ʻiloʻi lelei ʻa e Lao ʻa Mōsesé naʻa nau “ofoofo ai pē ʻi heʻene [Sīsū] mahinó mo ʻene ngaahi talí.”​—Luke 2:46, 47, 52.

 3. Ko e hā te tau lāulea ki ai ʻi he kupu ko ení?

³ Ko kitautolu foki ʻe lava ke tau hoko ʻo ʻiloʻi mo ʻofa ʻi he Folofola ʻa e ʻOtuá ʻi heʻetau lau maʻu pē ʻa e Folofolá. Ka ʻe lava fēfē ke tau maʻu ʻa e ʻaonga lahi tahá mei he meʻa ʻoku tau laú? ʻE lava ke tau ako mei he meʻa naʻe leaʻaki ʻe Sīsū ki he faʻahinga ko ia naʻa nau alāanga mo e Laó, kau ai ʻa e kau sikalaipé, kau Fālesí mo e kau Sātusí. Ko e kau taki lotu ko iá naʻa nau faʻa lau ʻa e Folofolá, ka naʻe ʻikai ke nau maʻu ʻaonga mei he meʻa naʻa nau laú. Naʻe fakamamafaʻi ʻe Sīsū ʻa e meʻa ʻe tolu naʻe ʻikai ke fai ʻe he kau tangata ko ení ke nau maʻu ʻaonga lahi ange ai mei he Folofolá. Ko ʻene ngaahi lea kiate kinautolú te ne tokoniʻi kitautolu ke fakaleleiʻi ʻetau malava (1) ke mahinoʻi ʻa e meʻa ʻoku tau laú, (2) ke kumi ki ha ngaahi koloa fakalaumālie, pea (3) ke fakaʻatā ʻa e Folofola ʻa e ʻOtuá ke ne fakafuo kitautolu.

 4. Ko e hā ʻoku akoʻi mai ʻe he Luke 10:25-29 fekauʻaki mo hono lau ʻa e Folofola ʻa e ʻOtuá?

⁴ ʻOku tau loto ke mahinoʻi ʻa e ʻuhinga ʻo e meʻa ʻoku tau lau ʻi he Folofola ʻa e ʻOtuá. He ka ʻikai, heʻikai lava ke tau maʻu ʻaonga kakato mei hono lau iá. Ko e fakatātaá, fakakaukau ki he fetalanoaʻaki ʻa Sīsū mo ha “tangata naʻe mataotao ʻi he Laó.” (Lau ʻa e Luke 10:25-29.) ʻI he taimi naʻe ʻeke ai ʻe he tangatá pe ko e hā naʻe fiemaʻu ke ne fai ka ne maʻu ai ʻa e moʻui taʻengatá, naʻe taki ia ʻe Sīsū ki he Folofola ʻa e ʻOtuá ʻaki ʻene ʻeke: “Ko e hā ʻoku hiki ʻi he Laó? ʻOku fēfē hoʻo mahinoʻi iá?” Ko e tangatá naʻe malava ke ne ʻoatu ʻa e tali totonú ʻaki ʻene toʻo-lea mei he folofolá fekauʻaki mo e ʻofa ki he ʻOtuá mo e ʻofa ki he kaungāʻapí. (Liv. 19:18; Teu. 6:5) Kae fakatokangaʻi ʻa e meʻa naʻá ne leaʻaki hokó: “Ko hai moʻoni ʻa hoku kaungāʻapí?” Naʻe fakahaaʻi ʻe he tangatá naʻe ʻikai ke ne mahinoʻi ʻa e ʻuhinga moʻoni ʻo e meʻa naʻá ne laú. Ko hono olá, naʻe ʻikai ke ne ʻiloʻi ʻa e founga ke ngāueʻaki totonu ai ʻa e ngaahi foʻi folofola ko iá ʻi heʻene moʻuí.

 5. ʻOku lava fēfē ke fakalahi ʻetau mahinó ʻe he lotú mo hono lau māmālie ʻo e Folofolá?

⁵ ʻE lava ke tau fakalahi ʻetau mahinoʻi ʻa e Folofola ʻa e ʻOtuá ʻaki hono fakatupulekina ʻa e tōʻonga lautohi lelei. Ko e niʻihi eni ʻo e ngaahi fokotuʻu ʻe lava ke tokoni kiate koe. Lotu ki muʻa ke kamata hoʻo lau iá. ʻOku tau fiemaʻu ʻa e tokoni ʻa Sihová ke mahinoʻi ʻa e Folofolá, ko ia ʻe lava ke tau kole ʻa hono laumālie māʻoniʻoní ke ne tokoniʻi kitautolu ke tokangataha. Pea lau māmālie ia. ʻE tokoniʻi ai koe ke ke mahinoʻi ʻa e fakamatalá. ʻE ʻaonga nai ke ke lau leʻo-lahi ia pe lau fakataha mo ha hiki-leʻo ʻo e Tohi Tapú. ʻE lava ke ke sioloto atu ai ki he meʻa ʻokú ke laú, ʻa ia ʻe fakamaʻu ai ʻa e Folofola ʻa e ʻOtuá ki ho ʻatamaí mo e lotó. (Sios. 1:8) ʻI he ʻosi hoʻo lau iá, toe lotu ʻo fakamālō kia Sihova ki he meʻaʻofa ko ʻene Folofolá pea kole ke ne tokoniʻi koe ke ngāueʻaki ʻa e meʻa kuó ke laú.

 6. Ko e hā ʻe lava ke tokoni ai kiate koe ʻa hono ʻeke hifo ʻa e ngaahi fehuʻí pea hiki ha kiʻi nouti nounou lolotonga hoʻo laú? (Sio foki ki he fakatātaá.)

⁶ Ko e toe fokotuʻu eni ʻe ua ke fakalahi ai hoʻo mahinoʻi ʻa e Tohi Tapú. ʻEke hifo kiate koe ʻa e ngaahi fehuʻi fekauʻaki mo e meʻa ʻokú ke laú. ʻI hoʻo fakakaukau ki ha fakamatala pau, ʻeke hifo: ‘Ko hai ʻa e faʻahinga tefito ʻi he talanoá? Ko hai ʻoku leá? Ko ʻene leá kia hai, pea ko e hā hono ʻuhingá? Ko fē ʻa e feituʻu mo e taimi ʻoku hoko ai ení?’ Ko e ngaahi fehuʻi ko iá te ne tokoniʻi koe ke fakakaukau mo muimui ʻi he meʻa tefito ʻoku fai ki ai ʻa e talanoá. Pehē foki, hiki ha kiʻi nouti nounou lolotonga hoʻo laú. ʻI he taimi ʻokú ke tohi aí, ʻokú ke hanga ai ʻo liliu hoʻo ngaahi fakakaukaú ki he fanga foʻi lea, ʻa ia ʻoku tokoni ia ke fakamāʻopoʻopo ai hoʻo fakakaukaú. ʻOku toe tokoni foki ʻa e hiki noutí ke ke manatuʻi ʻa e meʻa ʻokú ke laú. Te ke hikiʻi hifo nai ʻa e ngaahi fehuʻi, ko e ola hoʻo fekumí, ko e ngaahi poini tefitó, ko e founga ʻe lava ke ke ngāueʻaki ai ʻa e meʻa kuó ke laú pe ko hoʻo hiki pē hoʻo ngaahi ongoʻí. Te ke fakatokangaʻi nai ko e hiki ʻa e ngaahi nouti ko iá ʻe lava ke ne tokoniʻi koe ke ke vakai ki he Folofola ʻa e ʻOtuá ko ʻene pōpoaki fakafoʻituitui kiate koe.

 7. Ko e hā ʻa e ʻulungaanga ʻoku tau fiemaʻu ʻi heʻetau lau ʻa e Tohi Tapú, pea ko e hā hono ʻuhingá? (Mātiu 24:15)

⁷ Naʻe lave ʻa Sīsū ki ha ʻulungaanga mahuʻinga ʻoku fiemaʻu kiate kitautolu kapau ʻoku tau loto ke mahinoʻi ʻa e meʻa ʻoku tau lau ʻi he Folofola ʻa e ʻOtuá​—ko e ʻiloʻilo. (Lau ʻa e Mātiu 24:15.) Ko e hā ʻa e ʻiloʻilo? Ko e malava ia ke mahinoʻi ʻa e felāveʻi ha foʻi fakakaukau mo ha toe fakakaukau ʻe taha pea mo ʻene kehe mei ha fakakaukau ʻe taha pea ke vakai ki he meʻa ʻoku ʻikai ke hā māʻalaʻala mai ʻi he taimi pē ko iá. ʻIkai ko ia pē, hangē ko ia naʻe fakahaaʻi ʻe Sīsuú, ʻoku tau fiemaʻu ʻa e ʻiloʻiló ke ʻiloʻi ai ʻa e ngaahi meʻa ʻokú ne fakahoko ʻa e kikite ʻi he Tohi Tapú. ʻOku tau fiemaʻu foki ʻa e ʻulungaanga ko ení koeʻuhi ke lava ʻo tau maʻu ʻaonga kakato ai mei he meʻa kotoa ʻoku tau lau ʻi he Tohi Tapú.

 8. ʻE lava fēfē ke tau lau fakataha mo e ʻiloʻilo?

⁸ ʻOku foaki ʻe Sihova ki heʻene kau sevānití ʻa e ʻiloʻiló. Ko ia hanga kiate ia ʻi he lotu, pea kole kiate ia ke ne tokoniʻi koe ke fakatupulekina ʻa e ʻulungaanga ko ení. (Pal. 2:6) ʻE lava fēfē ke ke ngāue ʻo fehoanaki mo hoʻo lotú? Sivisiviʻi fakalelei ʻa e meʻa ʻokú ke laú, pea vakai ki he anga ʻene felāveʻi mo e ngaahi meʻa kehe ʻokú ke ʻiloʻí. Ke tokoni kiate koé, fekumi ʻi heʻetau ʻū tohi tokoni ki he ako Tohi Tapú, hangē ko e Tataki Fakaefekumi Maʻá e Kau Fakamoʻoni ʻa Sihová. Ko e ngaahi meʻangāue ko ení te ne tokoniʻi koe ke ke ʻiloʻi ʻa e ʻuhinga ʻo ha fakamatala Fakatohitapu pea sio ki he ngaahi founga ʻe lava ke ke ngāueʻaki ai ia ʻi hoʻo moʻuí. (Hep. 5:14) ʻI hoʻo lau fakataha mo e ʻiloʻiló, ʻe tupulaki ai ʻa hoʻo mahinoʻi ʻa e Folofolá.

 9. Ko e hā ʻa e moʻoni Fakatohitapu mahuʻinga naʻe tukunoaʻi ʻe he kau Sātusí?

⁹ Ko e kau Sātusí naʻa nau ʻiloʻi fakaʻāuliliki ʻa e ʻuluaki tohi ʻe nima ʻo e Ngaahi Konga Tohi Tapu Faka-Hepeluú, ka naʻa nau tukunoaʻi ʻa e ngaahi moʻoni mahuʻinga ʻi he ngaahi tohi fakamānavaʻi ko iá. Ko e fakatātaá, fakakaukau ki he anga ʻo e tali ʻa Sīsū ʻi hono fehuʻia ia ʻe he kau Sātusí fekauʻaki mo e toetuʻú. Naʻá ne ʻeke ange: “Kuo ʻikai koā te mou lau ʻi he tohi ʻa Mōsesé, ʻi he fakamatala fekauʻaki mo e ʻakau talatalá, ʻa e folofola ʻa e ʻOtuá kiate ia: ‘Ko e ʻOtua au ʻo ʻĒpalahame mo e ʻOtua ʻo ʻAisake mo e ʻOtua ʻo Sēkope’?” (Mk. 12:18, 26) Neongo naʻe tuʻo lahi nai hono lau ʻe he kau Sātusí ʻa e fakamatala ko iá, ko e fehuʻi ʻa Sīsuú naʻe fakahaaʻi ai naʻa nau tukunoaʻi ha moʻoni Fakatohitapu mahuʻinga​—ko e akonaki ʻo e toetuʻú.​—Mk. 12:27; Luke 20:38.d

10. Ko e hā ʻoku totonu ke tau tokanga ki ai ʻi heʻetau lau ʻa e Tohi Tapú?

¹⁰ Ko e hā ʻa e lēsoni ʻoku tau ako mei aí? ʻI heʻetau lau ʻa e Tohi Tapú, ʻoku tau loto ke tokanga ki he meʻa kotoa ʻe lava ke akoʻi mai ʻe ha veesi pe ko ha talanoa Fakatohitapu. ʻOku ʻikai ngata pē ʻetau loto ke ʻiloʻi ʻa e ngaahi akonaki tefitó kae pehē foki ki he ngaahi moʻoni mo e tefitoʻi moʻoni loloto ʻoku fufuú.

11. ʻI he fekauʻaki mo e 2 Tīmote 3:16, 17, ʻe lava fēfē ke ke maʻu ʻa e ngaahi koloa ʻi he Tohi Tapú?

¹¹ ʻE lava fēfē ke ke maʻu ʻa e ngaahi koloa fakalaumālié ʻi he taimi ʻokú ke lau ai ʻa e Tohi Tapú? Fakakaukau ki he meʻa ʻoku leaʻaki ʻi he 2 Tīmote 3:16, 17. (Lau.) Fakatokangaʻi ko e “potu Folofola kotoa pē . . . ʻoku ʻaonga” ki he (1) akonaki, (2) valoki, (3) fakatonutonu, pea (4) akonekina. ʻE lava ke ke maʻu ʻa e ʻaonga ko ia ʻe faá naʻa mo e mei he ʻū tohi Tohi Tapu ʻoku ʻikai ke ke faʻa ngāueʻakí. Sivisiviʻi ʻa e fakamatalá ke vakai ki he meʻa ʻoku akoʻi atu ai fekauʻaki mo Sihová, ko ʻene taumuʻá pe fekauʻaki mo e ngaahi tefitoʻi moʻoni fakaʻotuá. Fakakaukau ki he founga ʻoku ʻaonga ai ia ki he valokí. Fai eni ʻaki ʻa e vakai ki he founga ʻoku tokoniʻi ai koe ʻe he ngaahi vēsí ke ʻiloʻi pea talitekeʻi ʻa e ngaahi hehema pe tōʻonga fehālaakí pea ʻaʻeva ai pē ʻi ha ʻalunga faitōnunga. Sivisiviʻi ʻa e founga ʻe lava ke ngāueʻaki ai ʻa e fakamatalá ke fakatonutonu ha vakai hala, mahalo naʻá ke fetaulaki mo ia ʻi he ngāue fakafaifekaú. Pea kumi ki ha akonaki ʻoku ʻomai ʻi he ngaahi vēsí ʻe lava ke ne akoʻi koe ke tapua atu ʻa e fakakaukau ʻa Sihová. ʻI hoʻo fakakaukau maʻu pē ki he ʻaonga ʻe fā ko ení, te ke maʻu ai ʻa e ngaahi koloa fakalaumālie ʻe lava ke ne fakakoloa hoʻo lau Tohi Tapú.

12. Ko e hā naʻe ʻeke ai ʻe Sīsū ki he kau Fālesí ʻa e fehuʻi “Kuo teʻeki koā ke mou lau?”

¹² Naʻe ʻeke foki ʻe Sīsū ʻa e fehuʻi “Kuo teʻeki koā ke mou lau?” ke fakahaaʻi naʻe maʻu ʻe he kau Fālesí ha vakai hala fekauʻaki mo e Folofolá. (Māt. 12:1-7)e ʻI he taimi ko iá, naʻe taukaveʻi ʻe he kau Fālesí ko e kau ākonga ʻa Sīsuú naʻa nau maumauʻi ʻa e Sāpaté. ʻI he tali ki aí, naʻe lave ʻa Sīsū ki ha fakatātā Fakatohitapu ʻe ua pea toʻo-lea mei he tohi ʻa Hōseá ke fakahaaʻi ko e kau Fālesí naʻe ʻikai ke nau mahinoʻi ʻa e lao ʻo e Sāpaté pea ʻikai ke nau fakahāhā ʻa e mēsí. Ko e hā naʻe ʻikai fakafuo ai ʻa e kau tangata ko ení ʻe heʻenau lau ʻa e Folofola ʻa e ʻOtuá? Koeʻuhí naʻa nau lau ia fakataha mo e laumālie fakaanga mo e hīkisia. Ko e anga ʻenau vakaí naʻá ne taʻofi kinautolu mei hono mahinoʻi ʻa e meʻa naʻa nau laú.​—Māt. 23:23; Sione 5:39, 40.

13. Ko e hā ʻa e vakai ʻoku totonu ke tau maʻu ʻi heʻetau lau ʻa e Tohi Tapú, pea ko e hā hono ʻuhingá?

¹³ ʻOku tau ako mei he ngaahi lea ʻa Sīsuú ʻoku fiemaʻu ke tau lau ʻa e Tohi Tapú fakataha mo e vakai totonú. ʻI he ʻikai hangē ko e kau Fālesí, kuo pau ke tau loto-moʻoni mo akoʻingofua. Kuo pau ke tau “tali anga-malū ʻa hono tō ʻiate [kitautolu] ʻa e folofolá.” (Sēm. 1:21) Kapau ʻoku tau anga-malū, te tau fakaʻatā ʻa e Folofola ʻa e ʻOtuá ke faiaka ʻi hotau lotó. Ko ʻetau toki fakaʻehiʻehi pē mei ha laumālie fakaanga pe hīkisia ʻe fakafuo ai kitautolu ʻe he ngaahi lēsoni ʻi he Tohi Tapú fekauʻaki mo e mēsí, manavaʻofá mo e ʻofá.

14. ʻOku lava fēfē ke tau tala pe ʻoku tau fakaʻatā ʻa e Tohi Tapú ke ne fakafuo kitautolu? (Sio foki ki he fakatātaá.)

¹⁴ Ko e founga ʻoku tau fakafeangai ai ki he niʻihi kehé ʻoku fakahaaʻi ai pe ʻoku tau fakaʻatā ʻa e Folofola ʻa e ʻOtuá ke ne fakafuo kitautolu. Naʻe ʻikai fakaʻatā ʻe he kau Fālesí ʻa e Folofola ʻa e ʻOtuá ke aʻu ki honau lotó, pea ko hono olá, naʻa nau “fakahalaiaʻi ʻa e faʻahinga taʻehalaiá.” (Māt. 12:7) ʻI he tuʻunga meimei tatau, ko e anga ʻetau vakai mo e fakafeangai ki he niʻihi kehé ʻoku fakahaaʻi ai pe kuo tau fakaʻatā ʻa e Folofola ʻa e ʻOtuá ke ne fakafuo kitautolu. Ko e fakatātaá, ʻoku tau hehema ke lave ki he lelei ʻoku tau vakai ki ai ʻi he niʻihi kehé, pe ʻoku tau fakavave ke fakalau ʻenau tōnounoú? ʻOku tau faimeesi pea mateuteu ke fakamolemole pe ʻoku tau fakaanga pea tukulotoʻi ʻa e ʻitá? Ko e sivisiviʻi-kita peheé ʻe lava ke fakahaaʻi ai pe ʻoku tau fakaʻatā ʻa e meʻa ʻoku tau laú ke ne fakafuo ʻetau fakakaukaú, ongoʻí mo e tōʻongá.​—1 Tīm. 4:12, 15; Hep. 4:12.

15. Naʻe anga-fēfē ongoʻi ʻa Sīsū fekauʻaki mo e Folofola Māʻoniʻoní?

¹⁵ Ko Sīsū naʻá ne ʻofa ʻi he Folofola Māʻoniʻoní, pea ko ʻene ngaahi ongoʻí naʻe fakahaaʻi fakaekikite ia ʻi he ngaahi lea ʻi he Saame 40:8: “Ke fai ho finangaló, ʻe hoku ʻOtua, ko hoku mamaná ia, pea ko hoʻo laó ʻoku ʻi hoku loto fatú.” Ko hono olá, naʻá ne fiefia mo lavameʻa ʻi he tauhi kia Sihová. Ko kitautolu foki ʻe lava ke tau fiefia mo lavameʻa kapau ʻoku tau ngāue ke ʻai ʻa e Folofola ʻa e ʻOtuá ki hotau lotó.​—Saame 1:1-3.

16. Ko e hā ʻa e ngaahi meʻa te ke fai ke ke maʻu ʻaonga lahi ange ai mei hono lau ʻa e Folofola ʻa e ʻOtuá? (Sio ki he puha “Tokoniʻi Koe ʻe he Lea ʻa Sīsuú ke Mahinoʻi ʻa e Meʻa ʻOkú Ke Laú.”)

¹⁶ ʻI he fehoanaki mo e ngaahi lea mo e faʻifaʻitakiʻanga ʻa Sīsuú, ʻofa ke tau fakamāsilaʻi ʻetau pōtoʻi lau Tohi Tapú. ʻE lava ke tau fakaleleiʻi ʻetau mahinoʻi ʻa e ngaahi fakamatala Fakatohitapú ʻaki ʻa e lotu, lau māmālie ia, ʻeke ʻa e ngaahi fehuʻi, pea hiki ha kiʻi nouti nounou. ʻE lava ke tau ngāueʻaki ʻa e ʻiloʻiló ʻaki hono sivisiviʻi fakalelei ʻa e meʻa ʻoku tau laú fakataha mo e tokoni ʻa ʻetau ʻū tohi Fakatohitapú. ʻE lava ke tau fakalahi ʻetau ngāueʻaki ʻa e Folofolá, naʻa mo e ngaahi fakamatala ʻoku ʻikai ke tau loko alāanga mo iá, ʻaki ʻa e kumi ki he ngaahi koloa fakalaumālie ʻoku maʻu ʻi he ngaahi fakamatala ko iá. Pea ʻe lava ke tau fakaʻatā ʻa e Folofola ʻa e ʻOtuá ke ne fakafuo kitautolu ʻaki hono tauhi maʻu ʻa e vakai totonu ʻi heʻetau lau iá. ʻI heʻetau kīvoi ʻi he ngaahi founga ko ení, te tau maʻu ʻaonga lahi ange ai mei heʻetau lau Tohi Tapú pea ʻunuʻunu ofi ange ai kia Sihova.​—Saame 119:17, 18; Sēm. 4:8.