Ko e Tokotaha Fēfē ʻa Sīsū?

ʻI heʻetau ako fekauʻaki mo e ngaahi meʻa naʻe leaʻaki mo fai ʻe Sīsū ʻi māmaní, ʻoku tau ʻiloʻi ai ʻa e ngaahi ʻulungaanga te ne ʻai kitautolu ke loto ke hoko ʻo kaumeʻa mo Sīsū pea mo ʻene Tamaí, ʻa Sihova. Ko e hā ʻa e niʻihi ʻo e ngaahi ʻulungaanga fakamānako ko ení? Pea ʻe lava fēfē ke tau faʻifaʻitaki kia Sīsū ʻi heʻetau moʻuí tonu?

1. ʻI he ngaahi founga fē ʻoku hangē ai ʻa Sīsū ko ʻene Tamaí?

ʻI hēvani, kuo siofi ai ʻe Sīsū ʻene Tamai anga-ʻofá pea ako meiate ia ʻi he taʻu ʻe laui piliona. Ko hono olá, ʻokú ne fakakaukau, ongoʻi mo ngāue hangē tofu pē ko iá. (Lau ʻa e Sione 5:19.) Ko hono moʻoní, ʻoku faʻifaʻitaki haohaoa ʻa Sīsū ki he ngaahi ʻulungaanga ʻo ʻene Tamaí ʻo ne pehē: “ʻIlonga ʻa ia kuó ne mātā aú kuó ne mātā foki ʻa e Tamaí.” (Sione 14:9) ʻI hoʻo ako ʻo fekauʻaki mo e ngaahi ʻulungaanga ʻo Sīsuú, te ke hoko ʻo ʻiloʻi lelei ange ai ʻa Sihova. Ko e fakatātaá, ko e manavaʻofa ʻa Sīsū ki he kakaí ʻoku hā mei ai ʻa e ongoʻi ʻa Sihova fekauʻaki mo koé.

2. Kuo anga-fēfē hono fakahāhā ʻe Sīsū ʻokú ne ʻofa ʻia Sihová?

Naʻe pehē ʻe Sīsū: “Koeʻuhi ke ʻilo ʻe māmani ʻoku ou ʻofa ʻi he Tamaí, ʻoku ou fai ʻo hangē tofu pē ko e meʻa kuo fekau mai ʻe he Tamaí ke u faí.” (Sione 14:31) ʻI heʻene ʻi māmaní, naʻe fakahaaʻi ʻe Sīsū ʻene ʻofa lahi ʻi heʻene Tamaí ʻaki ʻene talangofua kiate ia naʻa mo e taimi naʻe faingataʻa ai ke fai peheé. Pehē foki, koeʻuhi ko ʻene ʻofa lahi ʻi heʻene Tamaí, naʻá ne loto maʻu pē ke talanoa fekauʻaki mo Ia pea tokoniʻi ʻa e niʻihi kehé ke fakatupulekina ha kaumeʻa mo Ia.​—Sione 14:23.

3. Kuo anga-fēfē hono fakahāhā ʻe Sīsū ʻokú ne ʻofa ʻi he kakaí?

ʻOku pehē ʻe he Tohi Tapú ʻoku nēkeneka ʻa Sīsū “ʻi he faʻahinga ʻo e tangatá.” (Palōveepi 8:31, fakamatala ʻi lalo) Naʻá ne fakahaaʻi ʻa e ʻofa ko ení ʻaki ʻene fakalototoʻaʻi mo tokoniʻi taʻesiokita ʻa e kakaí. Naʻá ne fakahoko ʻa e ngaahi mana ʻo ʻikai fakahaaʻi pē hono mālohí tonu kae pehē foki ki heʻene manavaʻofá. (Maʻake 1:40-42) Naʻá ne fakafeangai anga-lelei ki he taha kotoa pea ʻikai tomuʻa fehiʻa ki ha taha. Naʻe ʻoatu ʻe heʻene ngaahi leá ʻa e fakafiemālie mo e ʻamanaki ki he faʻahinga loto-totonu kotoa naʻe fanongó. Naʻe loto-lelei ʻa Sīsū ke faingataʻaʻia pea mate koeʻuhi ko ʻene ʻofa ʻi he faʻahinga kotoa ʻo e tangatá. Ka ʻoku tautefito ʻene ʻofá ki he faʻahinga ʻoku muimui ki heʻene ngaahi akonakí.​—Lau ʻa e Sione 15:13, 14.

KELI LOLOTO ANGE

4. ʻOku ʻofa ʻa Sīsū ʻi heʻene Tamaí

ʻOku akoʻi mai ʻe he faʻifaʻitakiʻanga ʻa Sīsuú ʻa e founga ke tau fakahaaʻi ai ʻetau ʻofa ki he ʻOtuá. Lau ʻa e Luke 6:12 mo e Sione 15:10; 17:26. Hili hono lau ʻa e konga Tohi Tapu taki taha, lāulea ki he fehuʻi ko ení:

• ʻI he faʻifaʻitaki kia Sīsuú, ʻe lava fēfē ke tau fakahaaʻi ʻetau ʻofa kia Sihová?

6. ʻOku nima-homo ʻa Sīsū

Neongo naʻe ʻikai lahi ʻa e ngaahi meʻa ʻa Sīsuú, naʻá ne vahevahe atu ʻa e ngaahi meʻa naʻá ne maʻú mo e niʻihi kehé. ʻOkú ne tala mai ke tau nima-homo foki mo kitautolu. Lau ʻa e Ngāue 20:35, pea lāulea leva ki he fehuʻi ko ení:

• Fakatatau kia Sīsū, ʻe lava fēfē ke tau fiefiá?

Huluʻi ʻa e VITIOÓ, pea lāulea leva ki he fehuʻi hokó.

VITIŌ: Konga mei he​—“ʻOku ʻi Ai ʻa e Fiefia Lahi Ange ʻi he Foaki Atú” (4:00)

• Ko e hā ʻa e ngaahi founga ke tau nima-homo ai, neongo ʻoku ʻikai lahi ʻetau ngaahi meʻa fakamatelié?

Naʻá ke ʻiloʻi?

ʻOku akoʻi mai ʻe he Tohi Tapú ke tau lotu kia Sihova fakafou ʻi he hingoa ʻo Sīsuú. (Lau ʻa e Sione 16:23, 24.) ʻI heʻetau lotu ʻi he founga ko iá, ʻoku tau fakahaaʻi ai ʻoku tau lāuʻilo ki he meʻa kuo fai ʻe Sīsū ke tokoniʻi kitautolu ke hoko ko e kaumeʻa ʻo Sihová.

FAKANOUNOU

ʻOku ʻofa ʻa Sīsū ʻia Sihova, pea ʻokú ne ʻofa foki ʻi he kakaí. ʻOku hangē ʻa Sīsū ko ʻene Tamaí, ko ia ai ko e lahi ange hoʻo ʻilo ʻa Sīsuú, ko e lahi ange ia hoʻo hoko ʻo ʻilo ʻa Sihová.

Fakamanatu

• ʻI he hangē ko Sīsuú, ʻe lava fēfē ke tau fakahāhā ʻa e ʻofa kia Sihová?

• ʻI he hangē ko Sīsuú, ʻe lava fēfē ke tau fakahāhā ʻa e ʻofa ki he kakaí?

• Ko e hā ʻa e ʻulungaanga ʻo Sīsū ʻoku fakamānako taha kiate koé?

AKO LAHI ANGE

Vakai ki he niʻihi ʻo e ngaahi ʻulungaanga ʻo Sīsū ʻe lava ke tau faʻifaʻitaki ki aí.

“Ke Faʻifaʻitaki kia Sīsuú, Hoko ʻo . . .” (Toʻo mei he Ko Sīsū​—ʻA e Halá, Moʻoní mo e Moʻuí)

Ako ki he ʻuhinga ʻoku fiemaʻu ai ke tau lotu fakafou ʻi he hingoa ʻo Sīsuú.

“Ko e Hā ke Lotu Ai ʻo Fakafou he Huafa ʻo Sīsuú?” (Ko e Taua Leʻo, ʻEpeleli 1, 2008)

ʻOku lave ʻa e Tohi Tapú ki ha meʻa fekauʻaki mo e fōtunga ʻo Sīsuú?

“Naʻe Fōtunga Fēfē ʻa Sīsū?” (Kupu ʻi he uepisaití)

Ko e hā ʻe lava ke tau ako mei he founga naʻe fakafeangai ʻa Sīsū ki he kakai fefiné?

“Fakaʻapaʻapa mo e Ngeia ʻi he Tokangaekina ʻa e ʻOtuá” (Toʻo mei he Ko e Taua Leʻo)