Ko ha Founga-Pule ki Hono Fakahoko ʻa e Taumuʻa ʻa e ʻOtuá

“[Ko e ʻOtuá] ʻoku ne ngāueʻi ʻa e ngaahi meʻa kotoa pē ʻo fakatatau ki he ʻalunga ʻo e tuʻutuʻuni ʻa hono finangaló.”​—EFESO 1:​11, NW.

 1. Ko e hā ʻe fakataha ai ʻa e ngaahi fakatahaʻanga kotoa ʻa e Kau Fakamoʻoni ʻa Sihová ʻi ʻEpeleli 12, 2006?

ʻI HE efiafi Pulelulu, ʻEpeleli 12, 2006, ʻe fakatahataha ai ʻa e kakai ʻe toko 16 miliona nai ke fakamanatu ʻa e Kai Efiafi ʻa e ʻEikí. ʻI he faiʻanga fakataha taki taha, ʻe ʻi ai ha tēpile ʻa ia ʻe ʻosi fokotuʻu ki ai ha mā taʻelēvani, ʻo fakafofongaʻi ʻa e sino ʻo Kalaisí, mo e uaine kulokula, ʻo fakatātaaʻi ʻa hono taʻataʻa naʻe lilingí. ʻI he ofi ke ʻosi ha malanga ʻoku fakamatalaʻi ai ʻa e ʻuhinga ʻo e Fakamanatu ʻo e pekia ʻa Sīsuú, ko e ongo meʻa fakamanatú ni—ʻuluakí ko e maá, pea toki hoko mai ʻa e uainé—ʻe paasi atu ia ʻi he lotolotonga ʻo e faʻahinga kotoa ʻe ʻi aí. ʻI ha ngaahi fakatahaʻanga siʻi pē ʻo e Kau Fakamoʻoni ʻa Sihová, ko ha toko taha pe lahi ange ʻi he kau maʻu fakamanatú ʻe maʻu ʻinasi mei he maá mo e uainé. Kae kehe, ʻi he ngaahi tuʻunga lahi, heʻikai ha taha ia ai ʻe maʻu ʻinasi mei ai. Ko e hā ko ha kau Kalisitiane tokosiʻi ai pē ʻe maʻu ʻinasí, ʻa e faʻahinga ko ia ʻoku ʻamanaki ke moʻui ʻi hēvaní, lolotonga iá ko e tokolahi tahá, ʻa e faʻahinga ko ia ʻoku nau ʻamanaki ke moʻui taʻengata ʻi he māmaní, ʻoku ʻikai ke nau maʻu ʻinasi ai kinautolu?

2, 3. (a) Naʻe anga-fēfē ʻa e hoko atu ʻa Sihova ke fakatupu ʻo fakatatau ki heʻene taumuʻá? (e) Ko e hā ʻa e taumuʻa naʻe fakatupu ai ʻe Sihova ʻa e māmaní mo e faʻahinga ʻo e tangatá?

² Ko Sihová ko ha ʻOtua ʻo e taumuʻa. ʻI hono fakahoko ʻene taumuʻá, ʻokú ne “ngāueʻi ʻa e ngaahi meʻa kotoa pē ʻo fakatatau ki he ʻalunga ʻo e tuʻutuʻuni ʻa hono finangaló.” (Efeso 1:​11, NW) Naʻá ne ʻuluaki fakatupu ʻa hono ʻAlo tofu-pē-taha-ne-fakatupú. (Sione 1:​1, 14; Fakahā 3:14) Hili iá, fakafou ʻi hono ʻAló, naʻe fakatupu ai ʻe Sihova ha fāmili ʻo e ngaahi foha laumālie pea faai mai ai ki he ʻuniveesi fakamatelié, ʻo kau ai ʻa e māmaní mo e tangata ʻi aí.—Siope 38:​4, 7; Sāme 103:​19-21; Sione 1:​2, 3; Kolose 1:​15, 16.

³ Naʻe ʻikai ke fakatupu ʻe Sihova ʻa e māmaní ko ha feituʻu ʻahiʻahi ia ki hono fakatokolahi ai ʻa hono fāmili ʻo e ngaahi foha laumālie ʻi hēvaní, hangē ko ia ʻoku akoʻi ʻe he ngaahi siasi lahi ʻo e Puleʻanga-Haʻa-Kalisitiané. Naʻá ne fakatupu ia ʻi ha taumuʻa pau naʻá ne fakakaukau ki ai, ke hoko ia ko e “nofoʻanga.” (Aisea 45:18) Naʻe fakatupu ʻe he ʻOtuá ʻa e māmaní maʻá e tangatá pea ko e tangatá maʻá e māmaní. (Sāme 115:16) Naʻe taumuʻá ke hoko ʻa e foʻi kolopé fakakātoa ko ha palataisi, ʻo fonu ʻi he faʻahinga māʻoniʻoni ʻo e tangatá, ʻa ia te nau ngoueʻi pea mo tokangaʻi ia. Naʻe ʻikai ʻaupito ke fokotuʻu atu ki he ʻuluaki ongo meʻa fakaetangatá ia ha ʻamanaki ʻe faai atu pē pea fai ha ō ki hēvani.—Senesi 1:​26-28; 2:​7, 8, 15.

Poleʻi ʻo e Taumuʻa ʻa Sihová

 4. Naʻe anga-fēfē hono poleʻi ʻa e founga ʻo hono ngāueʻaki ʻe Sihova hono tuʻunga-haú ʻi he kamataʻanga pē ʻo e hisitōlia ʻo e faʻahinga ʻo e tangatá?

⁴ Naʻe angatuʻu ha foha laumālie ʻo e ʻOtuá peá ne fakapapauʻi ke afeʻi ʻa e taumuʻa ʻa Sihová, ʻi hono ngāuekoviʻaki ʻa e meʻaʻofa fakaʻotua ko e tauʻatāina ke filí. Naʻá ne fakahohaʻasi ʻa e melino ʻoku hokosia ʻe he faʻahinga kotoa ʻoku nau fakahāhā ʻa e anganofo anga-ʻofa ki he tuʻunga-hau ʻo Sihová. Naʻe taki ʻe Sētane ʻa e ʻuluaki ongo meʻa fakaetangatá ke na kamata ʻi ha ʻalunga ʻo e tauʻatāina mei he ʻOtuá. (Senesi 3:​1-6) Naʻe ʻikai te ne fakaʻikaiʻi ʻa e mālohi ʻo Sihová, ka naʻá ne poleʻi ʻa ʻEne founga ʻo hono ngāueʻaki Hono tuʻunga-haú pea pehē ki Heʻene totonu ke pulé. Ko ia ai, ko e ʻīsiu tefito fekauʻaki mo e tuʻunga-hau ʻo Sihová naʻe malanga hake ia ʻi heni ʻi he māmaní, ʻi he kamataʻanga pē ʻo e hisitōlia ʻo e faʻahinga ʻo e tangatá.

 5. Ko e hā ʻa e ʻīsiu hono ua naʻe langaʻi haké, ʻo fakahuʻuhuʻungá kia hai?

⁵ Naʻe fekauʻaki vāofi ʻa e ʻīsiu tefito ko ia fekauʻaki mo e tuʻunga-hau aoniú mo ha ʻīsiu hono ua naʻe langaʻi hake ʻe Sētane ʻi he ngaahi ʻaho ʻo Siopé. Naʻe fehuʻia ʻe Sētane ʻa e taumuʻa ʻo e anganofo ʻa e ngaahi meʻamoʻui fakatupu ʻa Sihová kiate Iá pea mo e tauhi kiate Iá. Naʻe fakahuʻuhuʻu ʻa Sētane naʻa nau fai peheé ʻi ha ngaahi ʻuhinga siokita pea kapau ʻe ʻahiʻahiʻi te nau tafoki kinautolu mei he ʻOtuá. (Siope 1:​7-11; 2:​4, 5) Neongo naʻe langaʻi hake ʻeni ʻo fekauʻaki mo ha sevāniti fakaetangata ʻa Sihova, naʻe toe fekauʻaki ʻa e pole ko ʻení mo e ngaahi foha laumālie ʻo e ʻOtuá, naʻa mo e ʻAlo tofu-pē-taha-ne-fakatupu ʻo e ʻOtuá.

 6. Naʻe anga-fēfē hono fakamoʻoniʻi ʻe Sihova ʻene faitōnunga ki heʻene taumuʻá pea ki hono huafá?

⁶ ʻI he faitōnunga ki heʻene taumuʻá pea ki he ʻuhinga ʻo hono huafá, naʻe ʻai ai ʻe Sihova ʻa ia tonu ke hoko ko ha Palōfita pea mo ha Tokotaha-Fakamoʻui.a Naʻá ne tala kia Sētane: “Te u ʻai ke mo fetāufehiʻa ʻaki, ʻa koe mo e fefine, pea ko ho hako mo hono hako; ʻe laiki ʻe ia ho ʻulu, pea te ke laiki ʻe koe ʻa hono muivaʻe.” (Senesi 3:15) Fakafou ʻi he Hako ʻo ʻene “fefine,” pe ko e konga fakahēvani ʻo ʻene kautahá, ʻe tali ai ʻe Sihova ʻa e pole ʻa Sētané pea tokonaki ki he ngaahi hako ʻo ʻĀtamá ʻa e ʻamanaki ʻo e fakahaofi mo e moʻui.—Loma 5:21; Kaletia 4:​26, 31.

“Fakalilolilo Toputapu ʻo Hono Finangaló”

 7. Ko e hā ʻa e taumuʻa naʻe fakahā ʻe Sihova fakafou ʻi he ʻapositolo ko Paulá?

⁷ ʻI heʻene tohi ki he kau Kalisitiane ʻi ʻEfesoó, ʻoku fakamatalaʻi lelei ʻaupito ai ʻe he ʻapositolo ko Paulá ʻa e founga ʻoku fai ai ʻe Sihova ʻa e ngaahi meʻá ke fakahoko ʻene taumuʻá. Naʻe tohi ʻe Paula: “Naʻá ne fakaʻilo mai kiate kitautolu ʻa e fakalilolilo toputapu ʻo hono finangaló. ʻOku fakatatau ia ki heʻene loto-lelei ʻa ia naʻá ne taumuʻa ʻiate ia ki ha founga-pule ʻi he kakato ʻo e taimi kuo kotofá, ʻa ia ko e pehē, ke toe fakatahatahaʻi ʻa e ngaahi meʻa kotoa pē ʻia Kalaisi, ʻa e ngaahi meʻa ʻi hēvani mo e ngaahi meʻa ʻi māmani.” (Efeso 1:​9, 10, NW) Ko e taumuʻa lāngilangiʻia ia ʻa Sihová ke fakahoko mai ha ʻuniveesi fāʻūtaha ʻoku nofoʻi ʻe he ngaahi meʻamoʻui ko ia ʻoku nau anganofo anga-ʻofa ki hono tuʻunga-haú. (Fakahā 4:11) ʻE fakamāʻoniʻoniʻi ai hono huafá, fakamoʻoniʻi ai ʻa Sētane ko ha tokotaha-loi, pea ʻe fakahoko ai ʻa e finangalo fakaʻotuá “hange ko ia ʻi he langi ke pehe foki ʻi māmani.”—Mātiu 6:10.

 8. Ko e hā ʻa e ʻuhinga ʻo e foʻi lea naʻe liliu ko e “founga-pule”?

⁸ Ko e “loto-lelei,” pe taumuʻa ʻa Sihová, ʻe fakahoko ia fakafou ʻi “ha founga-pule.” Naʻe ngāueʻaki ʻe Paula ha foʻi lea ʻoku ʻuhinga fakafoʻilea ko e “puleʻi ha nofoʻanga.” ʻOku ʻuhinga ia, ʻo ʻikai ki ha puleʻanga, hangē ko e Puleʻanga Faka-Mīsaiá, ka ki ha founga ʻo hono puleʻi ʻo e ngaahi meʻá.b Ko e founga fakaofo ʻa ia ʻe fai ai ʻe Sihova ʻa e ngaahi meʻá ke fakahoko ʻene taumuʻá ʻoku kau ki ai ha “fakalilolilo toputapu” ʻa ia ʻe toki fakaʻilo fakalakalaka mai ʻi he faai mai ʻa e ngaahi senitulí.—Efeso 1:10; 3:​9, NW, fakamatala ʻi laló.

 9. Naʻe anga-fēfē hono fakahaaʻi fakalakalaka mai ʻe Sihova ʻa e fakalilolilo toputapu ʻo hono finangaló?

⁹ Fakafou ʻi ha ngaahi holongā fuakava, naʻe fakahaaʻi māmālie ai ʻe Sihova ʻa e founga ʻe fakahoko ai ʻene taumuʻa fekauʻaki mo e Hako naʻe talaʻofaʻaki ʻi ʻĪtení. Ko ʻene talaʻofa fuakava kia ʻĒpalahamé naʻe fakahaaʻi ai ʻe haʻu ʻa e Hako naʻe talaʻofá ki he māmaní ʻi he laine hohoko ʻo ʻĒpalahamé pea ko e founga ia ʻe tāpuakiʻi ai ʻa e “ngaahi puleʻanga ʻo mamani.” Naʻe toe fakahaaʻi ʻe he fuakava ko iá ʻe ʻi ai ʻa e niʻihi kehe ʻe feohi mo e konga tefito ʻo e hakó. (Senesi 22:​17, 18) Naʻe fakahaaʻi ʻe he fuakava Lao naʻe fai mo ʻIsileli fakakakanó ʻa e taumuʻa ʻa Sihova ke ʻi ai ha “buleaga oe kau taulaeiki.” (Ekisoto 19:​5, 6, PM) Naʻe fakahaaʻi ʻe he fuakava mo Tēvitá ʻe hoko ʻa e Hakó ko e ʻUlu ʻo ha Puleʻanga taʻengata. (2 Samiuela 7:​12, 13; Sāme 89:​3, 4) ʻI hono aʻutaki atu pē ʻe he fuakava Laó ʻa e kau Siú ki he Mīsaiá, naʻe fakahaaʻi ʻe Sihova ʻa e toe ngaahi tafaʻaki ʻo hono fakahoko ʻo ʻene taumuʻá. (Kaletia 3:​19, 24) Ko e faʻahinga ko ia ʻo e tangatá ʻe feohi mo e konga tefito ʻo e hakó ʻe faʻuʻaki kinautolu ʻa e “buleaga oe kau taulaeiki” naʻe tomuʻa talá pea ʻe ʻomai kinautolu ki “ha fuakava foʻou” ʻi he tuʻunga ko e “Isileli” foʻou, ko ha ʻIsileli fakalaumālie.—Selemaia 31:​31-34; Hepelu 8:​7-9.c

10, 11. (a) Naʻe anga-fēfē hono fakahaaʻi ʻe Sihova ʻa e Hako naʻe talaʻofá? (e) Ko e hā naʻe haʻu ai ki he māmaní ʻa e ʻAlo tofu-pē-taha-ne-fakatupu ʻo e ʻOtuá?

¹⁰ Ke fakahoko ʻa e founga-pule ki he taumuʻa ʻa e ʻOtuá, naʻe hoko mai ʻa e taimi ki he Hako naʻe tomuʻa talá ke ne hā ai ʻi he māmaní. Naʻe fekauʻi mai ʻe Sihova ʻa e ʻāngelo ko Kepalelí ke ne tala kia Mele te ne ʻaloʻi ha foha ʻa ia ʻe ui ko Sīsū. Naʻe pehē ʻe he ʻāngeló kiate ia: “E lahi ia, bea e ui ia koe Alo oe Fugani Maoluga; e age kiate ia e he Eiki koe Otua ae nofoa o ene tamai ko Tevita: Bea e bule ia ki he fale o Jekobe o taegata; bea e ikai hano gataaga o ene bule.” (Luke 1:​32, 33, PM) Naʻe hoko ai ʻo hā mahino ʻa e tokotaha ko e Hako naʻe talaʻofá.—Kaletia 3:16; 4:4.

¹¹ ʻE haʻu ki he māmaní ʻa e ʻAlo tofu-pē-taha-ne-fakatupu ʻo Sihová ke ʻahiʻahiʻi ki he taupotu tahá. ʻE ʻi he nima ʻo Sīsuú ʻa e tali haohaoa ki he pole ʻa Sētané. Te ne faitōnunga ai pē ki heʻene Tamaí? Naʻe kaunga ʻeni ʻi ha fakalilolilo toputapu. Naʻe fakamatalaʻi ki mui ʻe he ʻapositolo ko Paulá ʻa e ngafa ʻo Sīsuú: “Ko e meʻa taumamaʻo ʻa e misiteli [pe fakalilolilo toputapu] ʻo ʻete lotu—ʻa ia naʻe fakaha he kakano, naʻe fakatonuhia he laumalie, naʻe mātā ʻe he kau angelo, naʻe malangaekina ki he Senitaile, naʻe tui ki ai ʻi mamani, naʻe ʻohake ʻo ʻafio he langilangi.” (1 Timote 3:16) ʻIo, ʻi heʻene anga-tonu taʻeueʻia ʻo aʻu ki heʻene pekiá, naʻe ʻomai ai ʻe Sīsū ʻa e tali papau ki he pole ʻa Sētané. Ka naʻe kei tuʻu taʻefakahaaʻi pē ʻa e ngaahi fakaikiiki kehe ʻo e fakalilolilo toputapú.

‘Fakalilolilo Toputapu ʻo e Puleʻanga ʻo e ʻOtuá’

12, 13. (a) Ko e hā ʻa e tafaʻaki ʻe taha ʻo e ‘fakalilolilo toputapu ʻo e Puleʻanga ʻo e ʻOtuá’? (e) Ko e hā naʻe kau ʻi hono fili ʻe Sihova ha fika fakangatangata ʻo e faʻahinga ʻo e tangatá ke ō ki hēvaní?

¹² ʻI he lolotonga ʻo e taha ʻo ʻene ngaahi fononga fakamalanga ʻi Kālelí, naʻe fakahaaʻi ai ʻe Sīsū ko e fakalilolilo toputapú naʻe fekauʻaki vāofi ia mo hono Puleʻanga Faka-Mīsaiá. Naʻá ne tala ange ki heʻene kau ākongá: “Ko e ngaahi fakapulipuli [fakalilolilo toputapu, NW] ʻo e Puleʻanga ʻo Hēvaní [“Puleʻanga ʻo e ʻOtuá,” Maake 4:​11, Ko e Kōsipeli ʻe Fā], kuo ʻosi fakahā atu ia kiate kimoutolu.” (Mātiu 13:​11, KF) Ko e tafaʻaki ʻe taha ʻo e fakalilolilo ko iá naʻe kau ki ai ʻa hono fili ʻe Sihova ha “fanga sipi toko siʻi” ko e toko 144,000 ʻo e faʻahinga ʻo e tangatá ke nau feohi mo hono ʻAló ʻo hoko ko e konga ʻo e hakó, ke pule fakataha mo ia ʻi hēvani.—Luke 12:32; Fakahā 14:​1, 4.

¹³ Koeʻuhi naʻe fakatupu ʻa e faʻahinga ʻo e tangatá ke moʻui ʻi he māmaní, ko ha “matuʻaki fakatupu foʻou” ʻe Sihova naʻe fiemaʻu koeʻuhi ke ʻi ai ha niʻihi ʻo e faʻahinga ʻo e tangatá ke nau ō ki hēvani. (2 Kolinito 5:17) ʻI he lea ʻi he tuʻunga ko e taha ʻo e faʻahinga kuo fili ke kau ki he ʻamanaki fakahēvani makehé ni, naʻe tohi ʻe he ʻapositolo ko Pitá: “Ha tahaā ke fakamaloʻia, pe ko e ʻOtua mo Tamai ʻa hotau ʻEiki ko Sisu Kalaisi; ʻa ia, ʻi he lahi o ʻene meesi, naʻa ne fakatupufoʻou kitautolu ke maʻu ha ʻamanaki ʻoku moʻui, ko e meʻa ʻi he toetuʻu ʻa Sisu mei he pekia; ʻio ke maʻu ha tofiʻa ʻoku taʻeʻauha mo taʻemele mo taʻemae, ʻa ia kuo taʻofia ʻi hevani moʻomoutolu.”—1 Pita 1:​3, 4.

14. (a) Naʻe anga-fēfē ʻa e kau ʻa e faʻahinga ʻikai Siú ʻi he ‘fakalilolilo toputapu ʻo e Puleʻanga ʻo e ʻOtuá’? (e) Ko e hā ʻoku malava ai ke tau mahinoʻi ʻa e “ngaahi [meʻa] loloto ʻo e ʻOtua”?

¹⁴ Ko e toe konga ʻe taha ʻo e fakalilolilo toputapu fekauʻaki mo e Puleʻanga ʻi he kahaʻú ko e finangalo ʻa e ʻOtuá ke fakakau ʻa e faʻahinga ʻikai Siu ʻi he fika tokosiʻi ko ia ʻo e faʻahinga ʻo e tangatá ʻe ui ke pule fakataha mo Kalaisi ʻi hēvaní. Naʻe fakamatalaʻi ʻe Paula ʻa e tafaʻaki ko ʻeni ʻo e “founga-pule,” pe founga ʻo hono puleʻi ʻa e fakahoko ʻo ʻene taumuʻá: “[Ko e fakaliloliló ni] nae ikai fakailo i he gaahi kuoga i muʻa ki he gaahi foha oe tagata, o hage ko hono fakaha eni e he Laumalie ki he ene kau abosetolo maonioni moe kau balofita; Koeuhi ke kauga hoko ae kakai Jenitaile, bea i he jino be taha, bea kau i he ene talaofa ia Kalaisi i he ogoogolelei.” (Efeso 3:​5, 6, PM) Ko e mahino fekauʻaki mo e konga ko ʻeni ʻo e fakalilolilo toputapú naʻe fakahaaʻi ia ki he “kau abosetolo maonioni.” ʻI he tuʻunga meimei tatau ʻi he ʻahó ni, ka ne taʻeʻoua ʻa e tokoni ʻa e laumālie māʻoniʻoní, heʻikai ke tau mahinoʻi ʻa e “ngaahi [meʻa] loloto ʻo e ʻOtua.”—1 Kolinito 2:10; 4:1; Kolose 1:​26, 27.

15, 16. Ko e hā naʻe fili ai ʻe Sihova ʻa e ngaahi kaungā-pule ʻo Kalaisí mei he lotolotonga ʻo e faʻahinga ʻo e tangatá?

¹⁵ Ko e “toko taha kilu ma toko fa mano ma toko fa afe” ʻoku hā ʻoku nau tuʻu fakataha mo e “Lami” ʻi he funga Moʻunga Saione fakahēvaní ʻoku pehē “ne fakatau mei mamani,” “naʻe fakatau mei he kakai, ko e fuatapu maʻa e ʻOtua mo e Lami,” ʻa Kalaisi Sīsū. (Fakahā 14:​1-4) Naʻe fili ʻe Sihova ʻa e ʻuluaki ʻo hono ngaahi foha fakahēvaní ke hoko ko e konga tefito ia ʻo e hako naʻe talaʻofaʻaki ʻi ʻĪtení, ka ko e hā naʻá ne fili ai ʻa e ngaahi kaungāfeohi ʻo Kalaisí mei he lotolotonga ʻo e faʻahinga ʻo e tangatá? ʻOku fakamatala ʻa e ʻapositolo ko Paulá ko e fika fakangatangata ko ʻení naʻe “ui o tatau mo [e] tuutuuni” ʻa Sihová,” “fakatatau ki he meʻa naʻe ha lelei ki hono finangalo.”—Loma 8:​17, 28-30, PM; Efeso 1:​5, 11; 2 Timote 1:9.

¹⁶ Ko e taumuʻa ʻa Sihová ke fakamāʻoniʻoniʻi hono huafa lahi mo māʻoniʻoní pea fakatonuhiaʻi hono tuʻunga-hau fakalevelevá. ʻI heʻene “founga-pule” fakapotopoto taʻealafakatatauá, pe founga ʻo hono puleʻi ʻa e ngaahi meʻá, naʻe fekau hifo ʻe Sihova hono ʻAlo ʻuluaki-fakatupú ki he māmaní, ʻa ia naʻe ʻahiʻahiʻi ai ʻo aʻu ki he taupotu tahá. ʻIkai ngata aí, naʻe fakapapauʻi ʻe Sihova ko e Puleʻanga Faka-Mīsaia ʻo hono ʻAló ʻe fakakau ki ai ʻa e faʻahinga ʻo e tangata ʻa ia ne nau toe pouaki Hono tuʻunga-haú ʻo aʻu ki he maté.—Efeso 1:​8-12; Fakahā 2:​10, 11.

17. Ko e hā ʻe lava ai ke tau fiefia he ko Kalaisi mo hono ngaahi kaungā-pulé naʻa nau moʻui ki muʻa ko ha faʻahinga ʻo e tangatá?

¹⁷ Naʻe fakahāhaaʻi ʻe Sihova ʻene ʻofa lahi ki he ngaahi hako ʻo ʻĀtamá ʻaki hono ʻai ʻa hono ʻAló ke haʻu ki he māmaní pea ʻi hono fili mei he lotolotonga ʻo e faʻahinga ʻo e tangatá ʻa e faʻahinga ko ia te nau hoko ko e kaungā-ʻea ʻo e ʻAló ʻi he Puleʻangá. ʻE malava fēfē ke ʻaonga ia ki he faʻahinga kehe ko ia kuo nau fakamoʻoniʻi ʻenau faitōnunga kia Sihová, meia ʻĒpeli ʻo faai mai aí? ʻI hono fāʻeleʻi mai ʻo pōpula ki he angahalá mo e maté, ʻe fiemaʻu ki he faʻahinga taʻehaohaoa ʻo e tangatá ke fakamoʻui fakalaumālie mo fakaesino kinautolu pea ʻohake ki he haohaoá, ʻo fakatatau ki he muʻaki taumuʻa ʻa Sihova ki he faʻahinga ʻo e tangatá. (Loma 5:12) He fakafiemālie ē ki he faʻahinga kotoa ko ia ʻoku nau fakatuʻamelie atu ki he moʻui taʻengata ʻi he māmaní ke ʻilo ʻe fakahāhā ʻe honau Tuʻí kiate kinautolu ʻa e ʻofa mo e mahino lelei ʻo hangē tofu pē ko ia naʻá ne fai ki heʻene kau ākongá he lolotonga ʻene ngāue fakafaifekau ʻi he māmaní! (Mātiu 11:​28, 29; Hepelu 2:​17, 18; 4:15; 7:​25, 26) Pea he fakafiemālie ē kiate kinautolu ke ʻiloʻi ko e kaungā tuʻi-taulaʻeiki ʻo Kalaisi ʻi hēvaní naʻa nau hoko ki muʻa ko e kau tangata mo e kau fefine ʻo e tuí ʻa ia naʻa nau fetaulaki mo e ngaahi vaivai fakafoʻituituí pea hokosia ʻa e ngaahi pole ʻo e moʻuí ʻo hangē ko kitautolú!—Loma 7:​21-25.

Ko e Taumuʻa Taʻealaliliu ʻa Sihová

18, 19. Ko e hā ʻoku mahino ange ai ʻa e ngaahi lea ʻa Paula ʻi he Efeso 1:​8-11 kiate kitautolú, pea ko e hā ʻe lāulea ki ai ʻi he kupu hoko maí?

¹⁸ ʻOku tau mahinoʻi lelei ange he taimí ni ʻa e ʻuhinga ʻo e ngaahi lea ʻa Paula ki he kau Kalisitiane paní, hangē ko ia ʻoku maʻu ʻi he Efeso 1:​8-11 (NW). Naʻá ne pehē naʻe fakaʻilo ʻe Sihova kiate kinautolu “ʻa e fakalilolilo toputapu ʻo hono finangaló,” ʻo “vaheʻi . . . ko e ngaahi ʻea” kinautolu fakataha mo Kalaisi, pea ko kinautolú naʻe “tomuʻa fakapapauʻi . . . ki ai ʻo fakatatau ki he taumuʻa ʻaʻana ko ia ʻokú ne ngāueʻi ʻa e ngaahi meʻa kotoa pē ʻo fakatatau ki he ʻalunga ʻo e tuʻutuʻuni ʻa hono finangaló.” ʻOku tau ʻiloʻi ʻoku feʻungamālie ʻeni ʻi he “founga-pule” fakaofo ʻa Sihova ʻo e ngaahi meʻa ki he fakahoko ʻo ʻene taumuʻá. ʻOku toe tokoni ʻeni kiate kitautolu ke tau mahinoʻi ʻa e ʻuhinga ko ha kau Kalisitiane tokosiʻi ai pē ʻoku nau maʻu ʻa e Kai Efiafi ʻa e ʻEikí ʻoku nau maʻu ʻinasi ʻi he maá mo e uainé.

¹⁹ ʻI he kupu hoko maí, te tau sio ai ki he meʻa ʻoku ʻuhinga ki ai ʻa e Fakamanatu ʻo e pekia ʻa Kalaisí ki he kau Kalisitiane ko ia ko ʻenau ʻamanakí ʻoku fakahēvaní. Te tau toe ako ai ki he ʻuhinga ʻoku totonu ai ki he laui miliona ko ia ko ʻenau ʻamanakí ke moʻui taʻengata ʻi he māmaní ke nau mahuʻingaʻia lahi ʻaupito ʻi he meʻa ʻoku fakatātaaʻi ʻe he Fakamanatú.

[Fakamatala ʻi lalo]

ʻI he Fakamanatú

• Ko e hā naʻe fakatupu ai ʻe Sihova ʻa e māmaní pea tuku ki ai ʻa e tangatá?

• Ko e hā naʻe fiemaʻu pau ai ki he ʻAlo tofu-pē-taha-ne-fakatupu ʻo Sihová ke ʻahiʻahiʻi ʻi he māmaní?

• Ko e hā naʻe fili ai ʻe Sihova ʻa e ngaahi kaungā-pule ʻo Kalaisí mei he lotolotonga ʻo e faʻahinga ʻo e tangatá?