Sēfita Tauhi ʻa ʻEne Tukumoʻui kia Sihová

ʻOKU foki atu ha fuʻu toʻa hau hili ia haʻane fakatauʻatāinaʻi ʻa hono fonuá mei he fakafeʻātungiá. Ko hono ʻofefiné ʻokú ne lele atu ke fakafetaulaki kiate ia, ʻo ne tauʻolunga fiefia mo tā ha kiʻi nafa. ʻI he ʻikai te ne fiefia ʻi he sio atu kiate iá, ʻokú ne hae ʻa hono kofú. Ko e hā ʻokú ne fai pehē aí? ʻOku ʻikai nai te ne kaungāfiefia mo hono ʻofefiné ʻi heʻene toe foki moʻui atú? Ko e hā ʻa e tau kuó ne ikuná? Ko hai ʻa e tangatá ni?

Ko e tangatá ko Sēfita, ko e taha ia ʻi he kau fakamaau ʻo ʻIsileli ʻi he kuonga muʻá. Ka ke tali ʻa e ngaahi fehuʻi kehé pea mo sio ki he kaunga ʻa e fakamatalá kia kitautolú, ʻoku fiemaʻu ke tau vakai ki he puipuituʻa ʻo e toe fakataha anga-kehe ko ení.

Ko ha Faingataʻa Lahi ʻi ʻIsileli

ʻOku moʻui ʻa Sēfita ʻi ha taimi ʻo e faingataʻaʻia lahi. Kuo liʻaki ʻe hono kaungā ʻIsilelí ʻa e lotu maʻá pea ʻoku nau tauhi ki he ngaahi ʻotua ʻo Saitoni, Mōape, ʻĀmoni mo Filisitiá. ʻOku tuku atu ai ʻe Sihova ʻa hono kakaí ki he kau ʻĀmoní mo e kau Filisitiá, ʻa ia ʻokú na fakafeʻātungiaʻi kinautolu ʻi he taʻu ʻe 18. ʻOku tautefito ʻa e faingataʻaʻiá ki he kau nofo ʻi Kiliatí, ʻi he hahake ʻo e Vaitafe Sioataní.a Faifai pē, ʻoku foki mai ʻa e fakakaukau lelei ʻa e kau ʻIsilelí, ʻoku nau kumi loto-fakatomala ki he tokoni ʻa Sihová, kamata ke nau tauhi kiate ia pea nau toʻo atu ʻa e ngaahi ʻotua mulí mei honau lotolotongá.—Fakamaau 10:​6-16.

ʻOku fokotuʻu ʻapitanga ʻa e kau ʻĀmoní ʻi Kiliati, pea ʻoku fakatahataha ʻa e kau ʻIsilelí ke fakafetaulaki kia kinautolu. Ka ʻoku ʻikai ke ʻi ai ha ʻeikitau ʻo ʻIsileli. (Fakamaau 10:​17, 18) ʻI he taimi tatau, ko Sēfita ʻoku ʻi ai tonu hono faingataʻaʻia. Kuo tuli ia ʻe hono ngaahi tokoua tamai-taha mānumanú koeʻuhi ke nau kaihaʻasi ʻa hono tofiʻá. Ko ia ʻoku hiki ai ʻa Sēfita ki Topi, ko ha feituʻu ʻi he hahake ʻo Kiliatí pea ʻokú ne eʻa atu ai ki he ngaahi fili ʻo ʻIsilelí. Ko e “kau tagata launoa,” ʻa ia ʻoku ngalingali ko e faʻahinga ne mole ʻenau ngāué koeʻuhi ko e kau fakafeʻātungiá pe naʻa nau angatuʻu ʻo ʻikai fie ngāue pōpula kiate kinautolú, ʻoku nau fakatahataha mai kia Sēfita. ʻOku nau “alu fano mo ia” mahalo ʻo ʻuhingá ʻoku nau kau mo Sēfita ʻi heʻene ʻohofi ʻa e ngaahi feituʻu fakafili ofi maí. Ngalingali koeʻuhi ko e pāteʻi mo e toʻa anga-kehe ʻa Sēfita ʻi he taú, ʻoku ui ai ia ʻi he Tohi Tapú “koe tagata toʻa lahi.” (Fakamaau 11:​1-3, PM) Ko hai leva te ne taki ʻa ʻIsileli ʻi he fepaki mo e kau ʻĀmoní?

‘Haʻu o Hoko ko Ho Mau Eiki Tau’

ʻOku kōlenga ʻa e mātuʻa ʻo Kiliatí kia Sēfita: “Haʻu koe, o hoko ko ho mau eiki tau.” Kapau ko ʻenau ʻamanakí te ne tali leva ʻa e faingamālié ni ke ne foki ai ki hono fonuá, ʻoku hala ʻenau maʻú. ʻOkú ne tali: “Ikai naa mou fehia kiate au, bea kabuji au mei he fale o eku tamai? Koeha kuo mou haʻu ai kiate au i hoo mou tuutamaki?” He taʻetotonu moʻoni ia ke nau ʻuluaki talitekeʻi ʻa Sēfita pea nau toe ōmai eni kiate ia ki ha tokoni!—Fakamaau 11:​4-7, PM.

Ko e tuʻunga pē taha ʻe taki ai ʻa Sēfita ʻi Kiliatí. ʻOkú ne tala ange: ‘Kapau ʻe tuku ʻe Sihova ʻa ʻAmoni ki hoku nimá, te u hoko ko homou pule!’ Ko e ikuná ʻe ʻoatu ai ʻa e fakamoʻoni ʻo e poupou ʻa e ʻOtuá, ka ʻoku toe fakataumuʻa foki ʻe Sēfita ke fakapapauʻi ʻe ʻikai ke liʻaki ʻa e pule fakaʻotuá ʻi he ʻosi pē ʻa e faingataʻá.—Fakamaau 11:​8-11.

Feangainga mo ʻĀmoni

ʻOku feinga ʻa Sēfita ke fai ha felotoi mo e kau ʻĀmoní. ʻOkú ne ʻoatu ha kau talafekau ki honau tuʻí ke ʻiloʻi ʻa e ʻuhinga ki hono teu ʻohofi ʻa e kau ʻĀmoní. ʻOku fai mai ʻa e talí ko ha tukuakiʻi ʻo pehē: ʻI he haʻu ʻa e kau ʻIsilelí mei ʻIsipité, naʻa nau nofo ʻi he fonua ʻo e kau ʻĀmoní, pea ʻoku totonu ke fakafoki mai ia.—Fakamaau 11:​12, 13.

ʻI hono ʻiloʻi lelei ʻe Sēfita ʻa e hisitōlia ʻo ʻIsilelí, ʻokú ne fakahaaʻi pōtoʻi ʻa e ʻikai ke moʻoni ko ia ʻa e taukaveʻi ne fai ʻe he kau ʻĀmoní. ʻOkú ne tala ange kia kinautolu naʻe ʻikai ke fakahohaʻasi ʻe he kau ʻIsilelí ʻa ʻĀmoni, Mōape pe ʻĪtomi ʻi heʻenau mavahe mai mei ʻIsipité; pea naʻe ʻikai foki ke maʻu ʻe ʻĀmoni ʻa e fonua ʻoku nau fakakikihiʻí ʻi he taimi ʻo e ʻEkisoto ʻa ʻIsilelí. Naʻe maʻu ia ʻe he kau ʻĀmolí ʻi he taimi ko iá, ka naʻe tuku ʻe he ʻOtuá ʻa honau tuʻí, ʻa Sīhoni, ki he nima ʻo ʻIsilelí. ʻIkai ko ia pē, kuo nofo ʻa e kau ʻIsilelí ʻi he feituʻu ko iá ʻi he taʻu ʻe 300. Ko e hā ʻoku toki ʻekeʻi ai ia ʻe he kau ʻĀmoní he taimi ní?—Fakamaau 11:​14-22, 26.

ʻOku toe tokanga foki ʻa Sēfita ki ha ʻīsiu ʻoku fekauʻaki tefito mo e faingataʻaʻia ʻa ʻIsilelí: Ko hai ʻa e ʻOtua moʻoní? Ko Sihova pe ko e ngaahi ʻotua ʻo e fonua kuo nofo ai ʻa ʻIsilelí? Kapau ne ʻi ai ha mafai ʻe taha ʻo Kīmosi, ʻikai naʻá ne mei ngāueʻaki ia ke kei tauhi ʻaki ʻa e fonua ʻo hono kakaí? Ko ha fakakikihi eni ʻi he vahaʻa ʻo e lotu loi ʻoku taukapoʻi ʻe he kau ʻĀmoní, pea mo e lotu moʻoní. Ko ia ʻoku fakaʻosi totonu ʻaki ʻe Sēfita: “Ko Sihova ko e Fakamāu, ʻe fakamāu ʻe ia he ʻaho ni ʻi he vahaʻa ʻo haʻa Isileli mo haʻa Amoni.”—Fakamaau 11:​23-27.

ʻOku ʻikai ke fanongo ʻa e tuʻi ʻo ʻĀmoní ki he pōpoaki taʻefakavaivai ʻa Sēfitá. “Bea [ʻoku] hoko ae Laumalie o Jihova kia Jefita, bea [ʻoku] alu atu ia i Kiliati, mo Manase,” ngalingali ʻo uki ʻa e kau tangata sino mālohí ki ha tau.—Fakamaau 11:​28, 29, PM.

Tukumoʻui ʻa Sēfitá

ʻI he holi vēkeveke ʻa Sēfita ki he tataki fakaʻotuá, ʻokú ne fai ai ha tukumoʻui ki he ʻOtuá: “Kapau te ke tuku moʻoni ʻa haʻa Amoni ki hoku nima, pea ka pehe, pea ʻilonga ʻa ia ʻe fuofua haʻu mei he matapa ʻo hoku fale ke fakafetaulaki kiate au ʻi heʻeku foki tuʻumalie mai mei haʻa Amoni, ʻe ʻa Sihova ia; pea te u ʻatu ia ko e feilaulau-moifua.” ʻI he tali ki aí, ʻoku tāpuakiʻi ʻe he ʻOtuá ʻa Sēfita ʻaki ʻene fakamafeia ia ke ne taaʻi ʻa e ngaahi kolo ʻĀmoni ʻe 20 ʻaki ha “tā lahi ʻaupito,” ʻo ikuʻi ai ʻa e ngaahi fili ʻo ʻIsilelí.—Fakamaau 11:​30-33.

ʻI he foki atu ʻa Sēfita mei he taú, ʻoku fakafetaulaki kiate ia ʻa hono ʻofefine ne ʻofa ai, ʻa ia ko ʻene tamá pē ia ʻe taha! “[ʻI heʻene] mamata kiate ia,” ko e lau ia ʻa e fakamatalá, “naʻa ne haehae hono kofu, ʻo ne pehe, ʻOiaue ngaʻata, kuo ke matuʻaki fakatokilaloʻi au; ʻio ko e taha koe ʻo hoku kau fakamamahi: he kuo u faʻai hoku pokoʻi ngutu ni ki he ʻOtua, pea ʻe ʻikai te u lava ke foki.”—Fakamaau 11:​34, 35.

ʻE feilaulau moʻoni ʻaki ʻe Sēfita ʻa hono ʻofefiné? ʻIkai. Naʻe ʻikai malava ke ne fakakaukau pehē. ʻOku fakaliliʻa ʻa Sihova ʻi he feilaulau ʻaki ʻa e tangatá, ko e taha ʻi he ngaahi tōʻonga fulikivanu ʻa e kau Kēnaní. (Livitiko 18:21; Teutalonome 12:31) Naʻe ʻikai ngata pē ʻi he kau ʻa e laumālie ʻo e ʻOtuá ʻia Sēfita ʻi heʻene fai ʻa ʻene tukumoʻuí ka naʻe toe tāpuakiʻi foki ʻe Sihova ʻa ʻene ngaahi feingá. ʻOku fakaongoongoleleiʻi ʻe he Tohi Tapú ʻa Sēfita ʻi heʻene tuí pea pehē ki hono ngafa ʻi he fekauʻaki mo e taumuʻa ʻa e ʻOtuá. (1 Samiuela 12:11; Hepelu 11:​32-34) Ko ia ko ha feilaulau ʻaki ʻa e tangatá—ha fakapō—ʻoku ʻikai ʻaupito ko e meʻa ia naʻá ne fakakaukau ki aí. Ko e hā leva naʻe fakakaukau ki ai ʻa Sēfita ʻi heʻene fai ʻa e tukumoʻui ke feilaulau ʻaki ha tokotaha kia Sihová?

ʻOku hā mahino naʻe ʻuhinga ʻa Sēfitá te ne līʻoa ʻa e tokotaha te ne fetaulaki mo iá ke ngāue maʻataʻatā maʻá e ʻOtuá. Ko e Lao ʻa Mōsesé naʻe fakaʻatā ai ke faiʻaki ʻa e moʻuí ha tukumoʻui kia Sihova. Hangē ko ení, naʻe ngāue ʻa e kakai fefiné ʻi he potu toputapú, ʻo ʻutu vai nai. (Ekisoto 38:8; 1 Samiuela 2:22) Ko e meʻa siʻi pē ʻoku ʻiloʻi ʻo fekauʻaki mo e ngāue peheé pe ko hano faʻa fai tuʻumaʻu ia. ʻOku ngalingali ko e faʻahinga līʻoa makehe pehē naʻe ʻi he fakakaukau ʻa Sēfitá ʻi he taimi naʻá ne fai ai ʻa ʻene tukumoʻuí, pea ʻoku ngalingali ko ʻene palōmesí naʻe fakahuʻunga ai ʻa e ngāue tuʻumaʻu.

Ko e ʻofefine ʻo Sēfitá pea ki mui ai ko e tamasiʻi ko Sāmiuelá naʻá na ngāue ke fakahoko ʻa e ongo tukumoʻui ʻa ʻena ongo mātuʻa anga-fakaʻotuá. (1 Samiuela 1:11) ʻI hono tuʻunga ko ha tokotaha lotu mateaki kia Sihová, naʻe tui tatau pē ʻa e ʻofefine ʻo Sēfitá mo ʻene tamaí ʻoku totonu ke fakahoko ʻa ʻene tukumoʻuí. Ko e feilaulaú naʻe lahi, he naʻe ʻuhingá heʻikai ʻaupito te ne mali. Naʻá ne tangi koeʻuhi ko ʻene nofo tāupoʻoú he ko e taha ʻIsileli kotoa naʻá ne loto ke ʻi ai hano hako tukufakaholo. Kia Sēfita, ko hono fakahoko ʻo e tukumoʻuí naʻe ʻuhinga iá ko e ʻikai te ne toe feʻao mo ʻene tama ʻofeina pē tahá.—Fakamaau 11:​36-39.

Ko e moʻui ʻa e tāupoʻou faitōnunga ko ení naʻe ʻikai mole noa. Ko e ngāue taimi-kakato ʻi he fale ʻo Sihová ko ha founga lelei ʻaupito, fakafiemālie mo taau ke ne fakalāngilangiʻi ai ʻa e ʻOtuá. Ko ia, “ko e taʻu kotoa pe naʻe ʻalu ʻa e kau taʻahine Isileli ke sani ʻa e ʻofefine ʻo Sefita, ko e tangata Kiliati.” (Fakamaau 11:40) Pea ko e moʻoni naʻe fiefia ʻa Sēfita ʻi he tauhi ʻa hono ʻofefiné kia Sihová.

Ko e tokolahi ʻi he kakai ʻa e ʻOtuá he ʻaho ní ʻoku nau fili ha moʻui ʻo e ngāue taimi-kakato ko e kau tāimuʻa, kau misinale, kau faifekau fefonongaʻaki pe ngaahi mēmipa ʻo e fāmili Pētelí. ʻE ʻuhinga nai eni ko e ʻikai ha sio ki he fāmilí ʻi he lahi ʻe loto nai ki ai ha taha. Ka neongo ia, ʻoku malava ke fiefia ʻa e tokotaha kotoa ʻi he ngāue toputapu pehē ʻoku fai kia Sihová.—Sāme 110:3; Hepelu 13:​15, 16.

Angatuʻu ki he Tataki Fakaʻotuá

ʻI he vakai atu ki he ʻaho ʻo Sēfitá, ʻoku tau sio ai ki he fakafisingaʻi ʻe he kau ʻIsileli tokolahi ʻa e tataki ʻa Sihová. Neongo ʻa e fakamoʻoni ʻo e tāpuaki fakaʻotua ne maʻu ʻe Sēfitá, ʻoku fakakikihi mo ia ʻa e kau ʻIfalemí. Ko honau lotó ke ʻilo pe ko e hā naʻe ʻikai te ne ui ai kinautolu ki he taú. ʻOku aʻu ki heʻenau teu ke tutu ʻa e fale ʻo Sēfitá mo ia!—Fakamaau 12:1.

ʻOku tala ange ʻe Sēfita naʻá ne ui ʻa e kau ʻIfalemí, ka naʻe ʻikai te nau fai ange ha tali. Pe ko e hā pē ʻa e tuʻungá, naʻe ikuna ʻa e ʻOtuá ʻi he taú. ʻOku nau ʻita nai he taimi ní ko e ʻikai ke kumi faleʻi ange ʻa e kau Kiliatí ʻi heʻenau fili ʻa Sēfita ko honau ʻeikitaú? Ko hono moʻoní, ko e taʻeloto ʻa ʻIfalemí ʻoku fakahaaʻi ai ʻa e angatuʻu kia Sihova, pea ʻoku ʻikai ke toe ʻi ai ha fili ka ko hono tauʻi kinautolu. ʻI he tau ʻoku hoko atu aí, ʻoku ikuʻi ai ʻa e kau ʻIfalemí. ʻI he ʻikai malava ke nau puʻaki totonu ʻa e foʻi lea naʻe sivi ʻaki kinautolu ko e “Siipoleti,” ʻoku ʻiloʻingofua ai ʻa e kau ʻIfalemi ʻoku holá. ʻI hono fakakātoá ko e kau ʻIfalemi ʻe toko 42,000 ʻoku ʻauha ʻi he fepaki ko ení.—Fakamaau 12:​2-6.

Ko ha taimi fakamamahi moʻoni eni ʻi he hisitōlia ʻo ʻIsilelí! Ko e ngaahi tau naʻe ikunaʻi ʻe he kau fakamaau ko ʻOtenili, ʻĒhuti, Pēlaki mo Kitioné naʻá ne ʻomai ʻa e nonga. ʻI he taimi ko ení ʻoku ʻikai fai ha lave ia ki ha nonga. ʻOku fakamulituku ʻaki pē ʻe he fakamatalá ʻo pehē: “Naʻe fai fakamāu ʻi Isileli ʻa Sefita, ʻo ono taʻu; [peá ne] pekia . . . pea naʻe telio ʻi ha taha ʻo e ngaahi kolo Kiliati.”—Fakamaau 3:​11, 30; 5:31; 8:28; 12:7.

Ko e hā ʻoku malava ke tau ako mei he ngaahi meʻa kotoa ko ení? Neongo ko e moʻui ʻa Sēfitá naʻe fonu faingataʻa, naʻá ne faitōnunga ki he ʻOtuá. Ko e fuʻu toʻá ni naʻá ne lave kia Sihova ʻi heʻene lea ki he mātuʻa ʻo Kiliatí, ki he kau ʻĀmoní, ki hono ʻofefiné mo e kau ʻIfalemí, ʻio, ʻi he taimi naʻá ne fai ai ʻa ʻene tukumoʻuí. (Fakamaau 11:​9, 23, 27, 30, 31, 35; 12:3) Naʻe tāpuakiʻi ʻe he ʻOtuá ʻa e līʻoa ʻa Sēfitá, ʻo ne ngāueʻaki ia mo hono ʻofefiné ke na pouaki ʻa e lotu maʻá. ʻI ha taimi naʻe liʻaki ai ʻe he niʻihi ʻa e ngaahi tuʻunga fakaʻotuá, naʻe pīkitai pē ki ai ʻa Sēfita. ʻI he hangē ko Sēfitá, te ke talangofua maʻu pē kia Sihova?

[Fakamatala ʻi lalo]