Founga Naʻe Maʻu Ai ʻe ʻAna ʻa e Fiemālié

ʻOKU lotu leʻo-lahi ha fefine faitōnunga ʻo fakahīkihikiʻi ʻa Sihova. ʻOkú ne ongoʻi kuo fokotuʻu hake ia ʻe he ʻOtuá mei he efú, ʻo fetongi ʻa hono loto-mafasiá ʻaki ʻa e fiefia lahi.

Ko e hingoa ʻo e fefiné ko ʻAna. Ko e hā kuó ne fakatupunga ʻa e liliu fakaofo ʻi he anga ʻo ʻene ongoʻí? Ko e hā ʻokú ne fiefia ʻaupito ai he taimi ní? ʻE lava fēfē ke tau maʻu ʻaonga mei he meʻa naʻá ne hokosiá? Ke maʻu ʻa e tali ki he ngaahi fehuʻí ni, tau lāulea angé ki he talanoa ʻo ʻAná.

Fāmili ʻOku Tofanga he Faingataʻa

Ko ʻAná ko e taha ia ʻo e ongo uaifi ʻo ʻElikena, ko ha Līvai ʻoku nofo ʻi he feituʻu ko ʻIfalemí. (1 Samiuela 1:​1, 2a; 1 Kalonikali 6:​33, 34) Neongo ko e mali tokolahí naʻe ʻikai ko ha konga ia ʻo e muʻaki taumuʻa ʻa e ʻOtuá ki he faʻahinga ʻo e tangatá, ʻoku fakangofua mo ʻi ai hono tuʻutuʻuni ʻi he Lao ʻa Mōsesé. ʻOku lotu ʻa e fāmili ʻo ʻElikená kia Sihova, ka ʻoku faʻa tupu ʻi he ngaahi nofo mali tokolahí ʻa e fekeʻikeʻi, ʻo hangē ko ia ʻoku hā ʻi he lotoʻi fāmili ʻo ʻElikená.

ʻOku paʻa ʻa ʻAna, lolotonga iá ʻoku maʻu ʻe Pēnina ia ʻa ia ko e uaifi ʻe taha ʻo ʻElikená ha fānau. Ko Pēnina ʻa e fili ʻo ʻAná.—1 Samiuela 1:2e.

ʻOku fai ʻa e vakai ia ki he paʻá ko ha meʻa fakamā ʻi he lotolotonga ʻo e kau fefine ʻIsilelí pea aʻu ki he pehē ko ha fakaʻilonga ia ʻo e taʻefakahōifua ʻi he vakai ʻa e ʻOtuá. Ka ʻoku ʻikai ha fakaʻilonga ia ke pehē ai ko e taʻemalava ʻa ʻAna ke fanaú ko ha fakamoʻoni ia ʻo e taʻehōifua ʻiate ia ʻa e ʻOtuá. Kae kehe, ʻi he ʻikai feinga ke fakafiemālieʻi ʻa ʻAná, ʻoku ngāueʻaki ʻe Pēnina ia ʻa ʻene malava ke fanaú ke fakalotomamahiʻi ʻaki ʻa ʻAna.

Ngaahi Fononga ki he Potu Toputapu ʻo Sihová

Neongo ʻa e vātamaki ko ʻení, ʻoku fai ʻe he fāmili ʻo ʻElikená ha fononga fakataʻu ke ʻoatu ha ngaahi feilaulau ʻi he potu toputapu ʻo Sihová ʻi Sailo.a Ko e fononga mo e toe foki ko ʻeni ʻi he kilomita nai ʻe 60 ʻoku ngalingali ko e fononga lalo. Ko e ngaahi taimi ko ʻení kuo pau pē ʻa e tautefito ʻene faingataʻa kia ʻAná koeʻuhi ʻoku foaki ʻa e konga lahi ʻo e feilaulau ʻofá kia Pēnina mo ʻene fānaú, kae maʻu pē ʻe ʻAna ʻa e konga ʻe taha. ʻOku ngāueʻaki ʻe Pēnina ʻa e ngaahi faingamālie peheé ke manukiʻi ʻaki ʻa ʻAna, ʻo ʻai ia ke ne ongoʻi loto-mamahi koeʻuhí ʻoku hā ngali kuo “tapui” ʻe Sihova ʻa ʻene fanaú. ʻOku hoko ʻa e faingataʻa ko ʻení ʻi he taʻu taki taha, pea iku ai ʻa ʻAna ʻo tangi mamahi mo ʻikai fie kai. Ko e ngaahi fononga ʻoku totonu ke fakafiefia kiate iá ʻoku hoko ia ko e ngaahi taimi ʻo e loto-mamahi lahi. Ka neongo ia, ʻoku fai pē ʻe ʻAna ia ʻa e ngaahi fononga ko ʻeni ki he potu toputapu ʻo Sihová.—1 Samiuela 1:​3-7.

ʻOkú ke sio ki he founga naʻe fokotuʻu ai ʻe ʻAna ha faʻifaʻitakiʻanga lelei kiate kitautolú? ʻI he taimi ʻokú ke loto-siʻi aí, ʻoku anga-fēfē hoʻo tali ki aí? ʻOkú ke fakamakehekehe koe mo mavahe mei he feohi mo e kaungātuí? Naʻe ʻikai ke fai pehē ʻa ʻAna ia. Naʻá ne angaʻaki ʻa e kau fakataha mo e kau lotu kia Sihová. Neongo ʻa e ngaahi tuʻunga fakatupu loto-mafasiá, ʻoku totonu ke tau fai ʻa e meʻa tatau.—Sāme 26:12; 122:1; Palovepi 18:1; Hepelu 10:​24, 25.

ʻOku feinga ʻa ʻElikena ke fakafiemālie kia ʻAna mo ʻai ia ke ne tala ange ʻa ʻene ngaahi ongoʻi totonú. “Ana, ko e ha ʻoku ke tangi ai? pea ko e ha ʻoku ʻikai te ke kai ai? pea ko e ha ʻoku hohaʻa ai ho loto?” ko ʻene ʻeké ange ia. “ʻIkai ʻoku ou mahuʻinga kiate koe ʻi ha tama ʻe hongofulu?” (1 Samiuela 1:8) Mahalo ʻoku ʻikai ʻiloʻi ʻe ʻElikena ia ʻa e anga-kovi ʻa Pēniná, pea ʻoku fili nai ʻa ʻAna ke mamahi fakalongolongo pē ʻo ʻikai lāunga. Ko e hā pē ʻa e tuʻungá, ʻoku feinga ʻa e tokotaha anga-fakalaumālie ko ʻAná ki he melinó ʻaki ʻene hanga kia Sihova ʻi he lotu.

Fai ʻe ʻAna ha Fuakava

Ko e ngaahi feilaulau ʻofá naʻe kai ia ʻi he potu toputapu ʻo Sihová. ʻI he hili ʻene mavahe mei he loki kaí, ʻoku lotu ʻa ʻAna ki he ʻOtuá. (1 Samiuela 1:​9, 10) ʻOkú ne kōlenga: “Sihova Sapaoti e, kapau moʻoni te ke ʻafioʻi ʻa e mamahi ʻa hoʻo kaunanga, ka ke manatuʻi au, ʻo ʻikai ngalo hoʻo kaunanga, ka ke foaki mai ha hako tangata, pea te u toki tuku ia ki he ʻAfiona ʻi he ngaahi ʻaho kotoa pe o ʻene moʻui, pea ʻe ʻikai apo ha tele ki hono ʻulu.”—1 Samiuela 1:11.

ʻOku fakahangatonu ʻa e lotu ʻa ʻAná. ʻOkú ne kole maʻana ha tama tangata pea fuakava ʻe fakatapui ʻa e kiʻi tamá kia Sihova ko ha Nāsili ʻi he kotoa ʻene moʻuí. (Nomipa 6:​1-5) Ko ha faʻahinga fuakava pehē kuo pau ke loto ki ai ʻa hono husepānití, pea ko e ngaahi ngāue ki mui ʻa ʻElikená ʻoku hā ai ʻa ʻene loto ki he palōmesi ʻa hono uaifi ʻofeiná.—Nomipa 30:​6-8.

Ko e founga hono fai ʻe ʻAna ʻene lotú ʻoku pehē ai ʻe he Taulaʻeiki Lahi ko ʻĪlaí ʻokú ne konā. ʻOku lamulamu pē hono loungutú, ka ʻoku ʻikai ke fanongo atu ia ki ha lea, koeʻuhí ʻoku lea pē ʻa ʻAna ʻi hono lotó. ʻOku mātuʻaki fai loto-māfana ʻa e lotú. (1 Samiuela 1:​12-14) Fakaʻuta atu ki he anga ʻo e ongoʻi ʻa ʻAná ʻi hono lumaʻi ia ʻe ʻĪlai ʻo pehē ʻokú ne konaá! Neongo ia, ʻokú ne fakafeangai anga-fakaʻapaʻapa ki he taulaʻeiki lahí. ʻI hono ʻiloʻi ʻe ʻĪlai kuo lotu ʻa ʻAna ‘i he lahi o ʻene feigá mo ʻene mamahí,’ ʻokú ne pehē ange: “Ofa ke tuku kiate koe e he Otua o Isileli, ae kole aia kuo ke kole kiate ia.” (1 Samiuela 1:​15-17, PM) Ko ia ai, ʻoku ʻalu ʻa ʻAna mei ai ʻo kai, pea ʻoku “ʻikai toe [hohaʻa] hono fofonga.”—1 Samiuela 1:18.

Ko e hā ʻe lava ke tau ako mei he kotoa ʻo e meʻá ni? ʻI he taimi ʻoku tau lotu ai kia Sihova ʻo fekauʻaki mo e ngaahi meʻa ʻoku tau hohaʻa ki aí, ʻe lava ke tau ʻai ia ke ne ʻiloʻi ʻa e anga ʻetau ongoʻí pea fai ha ngaahi kole loto-moʻoni. Kapau ʻoku ʻikai lava ke tau toe fai ha meʻa ke fakaleleiʻiʻaki ʻa e palopalemá, ʻoku totonu ke tau tuku ia ki hono toʻukupú. ʻOku ʻikai ha toe ʻalunga lelei ange ia ke muimui ai.—Palovepi 3:​5, 6.

Hili ʻa e lotu tōtōiví, ʻoku mātuʻaki ngalingali ʻe hokosia ʻe he kau sevāniti ʻa Sihová ʻa e fiemālie meimei tatau mo ia naʻe maʻu ʻe ʻAná. ʻI he lave fekauʻaki mo e lotú, naʻe tohi ʻe he ʻapositolo ko Paulá: “Neongo pe ko e ha ʻa e meʻa, ʻoua te mou lotomoʻua ai; ka ʻi he meʻa kotoa pe tuku ke ha ki he ʻOtua hoʻomou ngaahi kole, ʻi he lotu mo e hufia, pea fai mo e fakafetaʻi. Pea ko e nonga ʻa e ʻOtua, ʻa ia ʻoku mamaʻo ʻi he tatae ʻa e ʻatamai kotoa pe, te ne maluʻi homou loto mo hoʻomou ngaahi fakakaukau ʻia Kalaisi Sisu.” (Filipai 4:​6, 7) ʻI heʻetau lī ʻetau kavengá kia Sihová, kuo pau ke tau fakaʻatā ia ke ne tokangaʻi. ʻI he hangē ko ʻAná, ʻe ʻikai leva ke toe fiemaʻu ke tau hohaʻa.—Sāme 55:22.

Foha Kuo ʻOatu Maʻa Sihova

ʻOku hanga ʻa e tokanga ʻa e ʻOtuá he taimí ni kia ʻAna; ʻokú ne feitama ʻo ne fanauʻi ha foha. (1 Samiuela 1:​19, 20) Ko e taha ʻeni ʻo e ngaahi tuʻunga siʻi ʻi he lēkooti he Tohi Tapú ʻoku fua ai ʻe he ʻOtuá ʻa e fatongia ki hono fanauʻi mai ʻo ha taha ʻa ia ʻe hoko ko ʻene sevāniti. Ko e foha ʻo ʻElikena mo ʻAna ko Samiuelá ʻe hoko ia ko e palōfita ʻa Sihova, ko e tokotaha te ne fakahoko ha ngafa mahuʻinga ʻi hono fokotuʻu ʻa e puleʻanga fakatuʻi ʻo ʻIsilelí.

ʻOku ʻikai ha veiveiua ʻoku kamata hono akoʻi ʻe ʻAna ʻa Samiuela ʻo fekauʻaki mo Sihová ʻi heʻene kei valevalé. Ka kuo ngalo nai ʻiate ia ʻa e fuakava naʻá ne faí? Mole ke mamaʻo! “ʻOua ke fakamavae ʻa e tamasiʻi, kau toki ʻave ia, ke ne ha ʻi he ʻao ʻo Sihova, ʻo nofo ai ʻo taʻengata,” ko ʻene leá ia. ʻI he taimi ʻoku fakamavaeʻi ai ʻa Samiuelá, ʻi heʻene taʻu tolú nai pe lahi siʻi hake ai, ʻoku ʻave ia ʻe ʻAna ke nofo ʻi he potu toputapu ʻo Sihová, ʻo fai tofu pē ki heʻene fuakavá.—1 Samiuela 1:​21-24; 2 Kalonikali 31:16.

Hili hono fai ʻo ha feilaulau kia Sihova, ʻoku taki atu ʻe ʻAna mo hono husepānití ʻa Samiuela kia ʻĪlai. ʻOku pau pē ʻoku puke ʻe ʻAna ʻa e nima ʻo ʻene kiʻi tamá ʻi heʻene pehē ange kia ʻĪlai: “E hoku eiki, hage oku mooni a hoo moui, e hoku eiki, ko au koe fefine nae tuu ofi kiate koe i heni, o lotu kia Jihova. [Naaku] kole ae tamajii ni; bea kuo tuku mai e Jihova a eku kole aia neu fai kiate ia: Koia foki oku ou toe atu ia kia Jihova; e tuku ia kia Jihova i he ene moui kotoabe.” Ko e kamata ia ʻa e ngāue makehe ʻa Samiuela ki he ʻOtuá ʻi he kotoa ʻo ʻene moʻuí.—1 Samiuela 1:​25-28, PM; 1Sa 2:11.

ʻI he ʻalu atu ʻa e taimí, ʻoku ʻikai ʻaupito ngalo ʻia ʻAna ʻa Samiuela. ʻOku pehē ʻe he Tohi Tapú: “Naʻe tuitui moʻona ʻe heʻene faʻe ha kiʻi kofu tōtōlofa, ʻo ne ʻave kiate ia ʻi he taʻu kotoa pe, ʻi heʻene ʻalu hake mo hono husepaniti ke feia ʻa e feilaulau fakataʻu.” (1 Samiuela 2:19) Ko e moʻoni ʻoku hokohoko atu ʻa e lotu ʻa ʻAna maʻa Samiuelá. ʻI heʻene ngaahi ʻaʻahi fakataʻú, ʻoku pau pē ʻokú ne fakalototoʻaʻi ia ke ne hanganaki faitōnunga ai pē ʻi hono fakahoko ʻa ʻene ngāue ki he ʻOtuá.

ʻI he taimi pehē ʻe taha, ʻoku tāpuakiʻi ʻe ʻĪlai ʻa e ongo mātuʻa ʻa Samiuelá peá ne pehē kia ʻElikena: “Tauange mo Sihova ke ne fakaai haʻo hako ʻi he fefine ni, ko e fetongi ʻo e taha naʻe kolea, ʻa ia naʻe kolea meia Sihova.” Fakatatau ki he ngaahi lea ko iá, ʻoku tāpuakiʻi ʻa ʻAna mo ʻElikena ʻaki ʻa e fānau tangata kehe ʻe tolu mo e ongo tamaiki fefine.—1 Samiuela 2:​20, 21.

He faʻifaʻitakiʻanga lelei ē ʻoku fokotuʻu ʻe ʻElikena mo ʻAna maʻá e ngaahi mātuʻa Kalisitiané! Kuo loto-lelei ʻa e ngaahi tamai mo e ngaahi faʻē tokolahi ke ʻoatu honau ngaahi fohá mo e ʻofefiné maʻa Sihova, ʻio, ʻaki hono fakalototoʻaʻi kinautolu ke nau tuli ki ha faʻahinga tuʻunga ʻo e ngāue fakafaifekau taimi-kakató ʻo mamaʻo mei ʻapi. ʻOku fakaongoongoleleiʻi ʻa e ngaahi mātuʻa ʻofa peheé koeʻuhi ko e ngaahi feilaulau ʻoku nau faí. Pea ʻe fakapaleʻi kinautolu ʻe Sihova.

Lotu Fiefia ʻa ʻAná

He hoko ē ʻo fiefia ko ʻAna ʻa ia naʻe paʻa ki muʻá! Ko e ngaahi lotu naʻe leaʻaki ʻe ha kau fefine ʻoku ʻikai faʻa lēkooti ia ʻi he Tohi Tapú. Kae kehe, ʻi he tuʻunga ʻo ʻAná, ʻoku tau ʻiloʻi ai ʻa e lotu ʻe ua. Ko e ʻuluakí ē ʻoku hā ai ʻa ʻene ongoʻí ʻi he taimi naʻe lumaʻi aí mo ʻene tofanga he mamahí, pea ko hono uá ko ha lotu fiefia ia ʻo e fakafetaʻi. “ʻOku hakahaka hoku loto ʻia Sihova,” ko e kamata ia ʻa ʻAná. ʻOkú ne fiefia he ‘ko siʻi paʻá kuo ne fanau,’ pea ʻokú ne fakahīkihikiʻi ʻa Sihova ko e Tokotaha-Hakeakiʻi, “ʻoku ne fokotuʻu mei he efu ʻa e lauvale.” Ko e moʻoni, ‘ʻoku ne hiki ʻa e masivá mei he tuʻungavevé.’—1 Samiuela 2:​1-10.

Ko e fakamatala fakamānavaʻi ʻoku lave ai ʻo kau kia ʻAná ʻoku fakahaaʻi ai ʻe lava ke fakalotomamahiʻi kitautolu ʻi he ngaahi tōnounou pe loto-kovi ʻa e niʻihi kehé. Neongo ia, kuo pau ke ʻoua te tau fakaʻatā ʻa e ngaahi ʻahiʻahi peheé ke ne toʻo meiate kitautolu ʻa e fiefia ʻi he tauhi kia Sihová. Ko ia ʻa e Tokotaha-Tali-Lotu lahí, ʻa ia ʻokú ne tali mai ʻa e ngaahi toʻe ʻa ʻene kakai faitōnungá, ʻo ne fakahaofi kinautolu mei he faingataʻá mo ʻoatu kiate kinautolu ʻa e fiemālie lahi fau mo e ngaahi tāpuaki kehe.—Sāme 22:​23-26; 34:​6-8; 65:2.

[Fakamatala ʻi lalo]

[Fakatātā ʻi he peesi 17]

Naʻe ʻoatu ʻe ʻAna ʻa Samiuela maʻa Sihova