ʻE Lava Fēfē Ke Ke Hoko ko e Kaumeʻa ʻo e ʻOtuá?

1, 2. Ko hai ʻa e niʻihi ʻo e ngaahi kaumeʻa ʻo Sihová?

KO HAI ʻokú ke loto ke hoko ko ho kaumeʻá? Ko ha taha ʻokú ke saiʻia ai. Ko ha taha ʻokú ke fetaulaki lelei mo ia pea ʻokú ne fetaulaki lelei mo koe. Ko ha taha ʻokú ne maʻu ʻa e angaʻitangata lelei mo e ngaahi ʻulungaanga ʻokú ke leleiʻia ai.

² ʻOku filifili ʻe Sihova ko e ʻOtuá ha niʻihi ʻo e faʻahinga ʻo e tangatá ke hoko ko hono ngaahi kaumeʻa. Ko e fakatātaá, ko ʻĒpalahamé ko e taha ia ʻo e ngaahi kaumeʻa ʻo Sihová. (ʻAisea 41:8; Sēmisi 2:23) Naʻe toe leleiʻia ʻa Sihova ʻia Tēvita. Naʻá ne pehē ko Tēvitá ‘ko ha tangata ʻoku fehoanakimālie mo hono finangaló.’ (Ngāue 13:22) Pea naʻe “mahuʻinga ʻaupito” ʻa e palōfita ko Tanielá kia Sihova.​—Taniela 9:23.

 3. Ko e hā naʻe kaumeʻa ai mo Sihova ʻa ʻĒpalahame, Tēvita, mo Tanielá?

³ Naʻe anga-fēfē ʻa e hoko ʻa ʻĒpalahame, Tēvita, mo Taniela ko e ngaahi kaumeʻa ʻo Sihová? Naʻe pehē ʻe Sihova kia ʻĒpalahame: “Kuó ke fanongo ki hoku leʻó.” (Sēnesi 22:18) ʻOku hoko ʻa Sihova ko ha kaumeʻa ʻo e faʻahinga ʻoku nau anga-fakatōkilalo ʻo talangofua kiate iá. Naʻa mo ha puleʻanga ʻo ha kakai naʻe lava ke nau hoko ko hono ngaahi kaumeʻa. Naʻe fakamatalaʻi ʻe Sihova ki he puleʻanga ʻIsilelí: “Talangofua ki hoku leʻó, pea te u hoko ko homou ʻOtua, pea te mou hoko ko hoku kakai.” (Selemaia 7:23) Ko ia ko koe foki ʻoku fiemaʻu ke ke talangofua kia Sihova kapau ʻokú ke fiemaʻu moʻoni ke ke hoko ko hono kaumeʻa.

4, 5. ʻOku anga-fēfē hono maluʻi ʻe Sihova ʻa hono ngaahi kaumeʻá?

⁴ ʻOku pehē ʻe he Tohi Tapú ʻoku kumi ʻa Sihova ki ha ngaahi founga “ke fakahāhā hono mālohí koeʻuhi ko e faʻahinga ko ia ʻoku kakato honau lotó kiate iá.” (2 Kalonikali 16:9) ʻI he Saame 32:8, ʻoku talaʻofa ai ʻa Sihova ki hono ngaahi kaumeʻá: “Te u ʻoatu kiate koe ʻa e fakamaama pea fakahinohino koe ʻi he hala ʻoku totonu ke ke fou aí. Te u ʻoatu kiate koe ʻa e faleʻi pea ʻe ʻiate koe ʻa hoku fofongá.”

⁵ ʻOku fiemaʻu ʻe ha fili mālohi ke taʻofi kitautolu mei he hoko ko e ngaahi kaumeʻa ʻo e ʻOtuá. Ka ʻoku loto ʻa Sihova ke ne maluʻi kitautolu. (Lau ʻa e Saame 55:22.) ʻI he hoko ko e ngaahi kaumeʻa ʻo Sihová, ʻoku tau tauhi kiate ia ʻaki hotau lotó kotoa. ʻOku tau mateaki kiate ia naʻa mo e ʻi he ngaahi tuʻunga faingataʻá. Pea ʻoku tau maʻu ʻa e falala pau tatau mo ia naʻe maʻu ʻe he tokotaha-tohi-sāmé. Naʻá ne tohi fekauʻaki mo Sihova: “Koeʻuhi ʻokú ne ʻi hoku nima toʻomataʻú, ʻe ʻikai ʻaupito ke u ngaue.” (Saame 16:8; 63:8) ʻOku anga-fēfē ʻa e feinga ʻa Sētane ke taʻofi kitautolu mei he hoko ko e ngaahi kaumeʻa ʻo e ʻOtuá?

 6. Ko e hā naʻe taukaveʻi ʻe Sētane fekauʻaki mo e faʻahinga ʻo e tangatá?

⁶ ʻI he Vahe 11 naʻa tau ako ai naʻe poleʻi ʻe Sētane ʻa Sihova pea tukuakiʻi ia ko ha tokotaha loi mo taʻefaitotonu ʻi he ʻikai te ne fakaʻatā ʻa ʻĀtama mo ʻIvi ke na fili pē ʻiate kinaua ʻa e meʻa naʻe tonú mo e meʻa naʻe halá. Ko e tohi ʻa Siope ʻi he Tohi Tapú ʻoku akoʻi mai ai kiate kitautolu ʻoku toe tukuakiʻi ʻe Sētane ʻa e faʻahinga ʻo e tangatá ʻa ia ʻoku nau loto ke hoko ko e ngaahi kaumeʻa ʻo e ʻOtuá. ʻOku taukaveʻi ʻe Sētane ʻoku nau tauhi ki he ʻOtuá koeʻuhi pē ko e meʻa ʻoku lava ke nau maʻu meiate Iá, ʻo ʻikai koeʻuhí ʻoku nau ʻofa ʻiate Ia. ʻOku aʻu ʻo taukaveʻi ʻe Sētane ʻe lava ke ne fakatafokiʻi ha taha pē mei he ʻOtuá. Tau sio angé ki he meʻa ʻe lava ke tau ako meia Siopé mo e anga hono maluʻi ia ʻe Sihová.

7, 8. (a) Naʻe anga-fēfē ʻa e ongoʻi ʻa Sihova fekauʻaki mo Siopé? (e) Ko e hā naʻe leaʻaki ʻe Sētane fekauʻaki mo Siopé?

⁷ Ko hai ʻa Siope? Ko ha tangata lelei ia ʻa ia naʻe moʻui ʻi he taʻu nai ʻe 3,600 kuohilí. Naʻe pehē ʻe Sihova ʻi he taimi ko iá naʻe ʻikai ha tangata ʻe hangē ko iá ʻi he māmaní. Naʻe fakaʻapaʻapa loloto ʻa Siope ki he ʻOtuá, pea naʻá ne fehiʻa ki he meʻa naʻe koví. (Siope 1:8) ʻIo, naʻe hoko ʻa Siope ko ha kaumeʻa moʻoni ʻo Sihova.

⁸ Naʻe taukaveʻi ʻe Sētane naʻe tauhi ʻa Siope ki he ʻOtuá ʻi ha ngaahi ʻuhinga siokita. Naʻe pehē ʻe Sētane kia Sihova: “ʻIkai kuó ke ʻaaʻi malu takai ia mo hono falé mo e meʻa kotoa pē kuó ne maʻú? Kuó ke tāpuakiʻi ʻa e ngāue ʻa hono nimá pea kuo mafola atu ʻene fanga monumanú ʻi he fonuá. Ka ko eni, mafao atu muʻa ho nimá peá ke taaʻi ʻa e meʻa kotoa pē ʻokú ne maʻú, pea te ne laukovi moʻoni kiate koe ʻi ho fofongá tonu.”​—Siope 1:10, 11.

 9. Ko e hā naʻe fakaʻatā ʻe Sihova ʻa Sētane ke ne faí?

⁹ Naʻe tukuakiʻi ʻe Sētane ʻa Siope ʻokú ne tauhi pē kia Sihová koeʻuhi ko e meʻa naʻe lava ke ne maʻu meiate Iá. Naʻe toe taukaveʻi ʻe Sētane te ne lava ke ʻai ʻa Siope ke tuku ʻene tauhi kia Sihová. Naʻe ʻikai ke loto-tatau ʻa Sihova mo Sētane, ka naʻá Ne fakaʻatā ʻa Sētane ke ne ʻahiʻahiʻi pe naʻe hoko ʻa Siope ko ha kaumeʻa ʻo Sihová koeʻuhí naʻá ne ʻofa ʻiate Ia.

10. Naʻe anga-fēfē hono ʻohofi ʻe Sētane ʻa Siopé, pea naʻe anga-fēfē ʻa e fakafeangai ki ai ʻa Siopé?

¹⁰ ʻUluakí, naʻe kaihaʻasi pe fakaʻauha ʻe Sētane ʻa e fanga monumanu kotoa ʻa Siopé. Hili iá naʻe tāmateʻi ʻe Sētane ʻa e tokolahi taha ʻo e kau sevāniti ʻa Siopé. Naʻe mole meia Siope ʻa e meʻa kotoa pē. ʻI hano ʻohofi fakaʻosi, naʻe tāmateʻi ʻe Sētane ʻa e fānau ʻe toko hongofulu ʻa Siopé ʻi ha fuʻu matangi. Ka naʻe kei mateaki pē ʻa Siope kia Sihova. “ʻI he kotoa ʻo e meʻá ni, naʻe ʻikai fai ʻe Siope ha angahala pe tukuakiʻi ʻa e ʻOtuá ki hono fai ha meʻa ʻoku hala.”​—Siope 1:12-19, 22.

11. (a) Ko e hā naʻe toe fai ʻe Sētane kia Siopé? (e) Naʻe anga-fēfē ʻa e fakafeangai ki ai ʻa Siopé?

¹¹ Naʻe ʻikai ke foʻi ʻa Sētane. Naʻá ne poleʻi ʻa e ʻOtuá ʻaki ʻene pehē: “Taaʻi ʻa hono huí mo hono kakanó, pea te ne laukovi moʻoni kiate koe ʻi ho fofongá tonu.” Ko ia naʻe taaʻi ʻe Sētane ʻa Siope ʻaki ha mahaki langa fakaʻulia. (Siope 2:5, 7) Ka naʻe kei mateaki pē ʻa Siope kia Sihova. Naʻá ne pehē: “ʻE ʻikai te u tuku ange [pe liʻaki] ʻeku anga-tonú ʻo aʻu ki haʻaku mate!”​—Siope 27:5.

12. Naʻe anga-fēfē hono fakamoʻoniʻi ʻe Siope ko ha tokotaha loi ʻa Sētane?

¹² Naʻe ʻikai ʻiloʻi ʻe Siope ha meʻa fekauʻaki mo e ngaahi tukuakiʻi naʻe fai ʻe Sētané pe ko e ʻuhinga naʻá ne faingataʻaʻia lahi pehē aí. Naʻá ne fakakaukau ko Sihova ʻa e tupuʻanga ʻo ʻene ngaahi faingataʻaʻiá. (Siope 6:4; 16:11-14) Ka neongo ia, naʻe kei mateaki pē ʻa Siope kia Sihova. Ko ia naʻe ʻikai ha toe veiveiua. Naʻe ʻikai ke siokita ʻa Siope. Ko e kaumeʻa ia ʻo e ʻOtuá he naʻá ne ʻofa ʻiate Ia. Ko e ngaahi tukuakiʻi naʻe fai ʻe Sētané naʻe loi kotoa!

13. Ko e hā ʻa e ola ʻo e mateaki ʻa Siopé?

¹³ Neongo naʻe ʻikai ʻiloʻi ʻe Siope ʻa e meʻa naʻe hoko ʻi hēvaní, naʻá ne mateaki ki he ʻOtuá pea fakamoʻoniʻi ko Sētané ko ha tokotaha kovi. Naʻe fakapaleʻi ʻe Sihova ʻa Siope ʻi heʻene hoko ko hono kaumeʻa mateakí.​—Siope 42:12-17.

14, 15. Ko e hā ʻa e tukuakiʻi ʻoku fai ʻe Sētane ki he kakai tangata mo e kakai fefine kotoa pē?

¹⁴ ʻE lava ke ke ako ʻa e ngaahi lēsoni mahuʻinga mei he meʻa naʻe hoko kia Siopé. ʻI he ʻahó ni, ʻoku tukuakiʻi kitautolu ʻe Sētane ʻoku tau tauhi pē kia Sihová koeʻuhi ko e meʻa ʻoku lava ke tau maʻu meiate Iá. ʻI he Siope 2:4, naʻe taukaveʻi ai ʻe Sētane: “ʻE tuku atu ʻe ha tangata ʻa e meʻa kotoa ʻokú ne maʻú koeʻuhí ko ʻene moʻuí.” Ko ia ʻoku tukuakiʻi ʻe Sētane ʻoku siokita ʻa e kakai tangata mo e kakai fefine kotoa, ʻo ʻikai ko Siope pē. Hili ʻa e taʻu ʻe laui teau mei he mate ʻa Siopé, naʻe kei laukovi pē ʻa Sētane kia Sihova mo tukuakiʻi ʻa ʻene kau sevānití. Ko e fakatātaá, ʻi he Palōveepi 27:11, ʻoku tau lau ai: “ʻE hoku foha, ke ke hoko ʻo poto, peá ke ʻai ke fiefia hoku lotó, koeʻuhi ke u lava ʻo fai ha tali kiate ia ʻokú ne luma [pe laukovi] mai kiate aú.”

¹⁵ ʻE lava ke ke fili ke talangofua kia Sihova pea hoko ko Hono kaumeʻa mateaki, ʻo fakamoʻoniʻi ko Sētané ko ha tokotaha loi. Neongo kapau ʻoku fiemaʻu ke ke fai ha ngaahi liliu lalahi ʻi hoʻo moʻuí ke ke hoko ai ko ha kaumeʻa ʻo e ʻOtuá, ko e fili lelei taha ia ʻe faifai ange peá ke malava ke faí! Ko e fili ko ení ko ha meʻa mafatukituki. ʻOku taukaveʻi ʻe Sētane heʻikai te ke mateaki ki he ʻOtuá ʻi haʻo palopalemaʻia. ʻOkú ne feinga ke kākaaʻi kitautolu ke tau hoko ʻo taʻemateaki ki he ʻOtuá. Anga-fēfē?

16. (a) Ko e hā ʻa e ngaahi founga ʻoku ngāueʻaki ʻe Sētane ʻi heʻene feinga ke taʻofi ʻa e kakaí mei he tauhi kia Sihová? (e) ʻOku anga-fēfē ʻa e feinga ʻa e Tēvoló ke taʻofi ʻa koe tonu mei he tauhi kia Sihová?

¹⁶ ʻOku ngāueʻaki ʻe Sētane ʻa e ngaahi founga lahi kehekehe ʻi heʻene feinga ke taʻofi kitautolu mei he hoko ko e kaumeʻa ʻo e ʻOtuá. ʻOkú ne ʻoho “hangē ha laione ngungulú, ʻo kumi ki ha taha ke ne folofua.” (1 Pita 5:8) ʻOua ʻe ʻohovale ʻi he taimi ʻoku feinga ai ho ngaahi kaumeʻá, ngaahi mēmipa ʻo e fāmilí, pe ko e niʻihi kehé ke taʻofi koe mei hono ako ʻa e Tohi Tapú pea mei hono fai ʻa e meʻa ʻoku totonú. Te ke ongoʻi nai ai ʻo hangē ʻoku ʻohofi koé.a (Sione 15:19, 20) ʻOku toe fakapuli foki ʻa Sētane “ko ha ʻāngelo ia ʻo e māmá.” Ko ia te ne feinga ke kākaaʻi kitautolu ke talangataʻa kia Sihova. (2 Kolinitō 11:14) Ko ha toe founga ʻe taha ʻoku ngāueʻaki ʻe Sētane ʻi heʻene feinga ke taʻofi kitautolu mei he tauhi kia Sihová ko hono ʻai ke tau fakakaukau ʻoku ʻikai ʻaupito ke tau taau feʻunga ke tauhi ki he ʻOtuá.​—Palōveepi 24:10.

17. Ko e hā ʻoku tau talangofua ai kia Sihová?

¹⁷ ʻI heʻetau talangofua kia Sihová, ʻoku tau fakamoʻoniʻi ai ko Sētané ko ha tokotaha loi. Ko e hā te ne tokoniʻi kitautolu ke tau talangofuá? ʻOku pehē ʻe he Tohi Tapú: “Kuo pau ke ke ʻofa kia Sihova ko ho ʻOtuá ʻaki ho lotó kotoa mo hoʻo moʻuí kotoa pea mo ho mālohí kotoa.” (Teutalōnome 6:5) ʻOku tau talangofua kia Sihová koeʻuhí ʻoku tau ʻofa ʻiate ia. ʻI he tupulaki ʻetau ʻofa kia Sihová, te tau loto ai ke fai ʻa e meʻa kotoa pē ʻokú ne kole mai ke tau faí. Naʻe tohi ʻe he ʻapositolo ko Sioné: “Ko e meʻa ʻeni ʻoku ʻuhinga ki ai ʻa e ʻofa ki he ʻOtuá, ko ʻetau tauhi ʻene ngaahi fekaú; pea ko ʻene ngaahi fekaú ʻoku ʻikai ke fakamafasia.”​—1 Sione 5:3.

18, 19. (a) Ko e hā ʻa e ngaahi meʻa ʻe niʻihi ʻoku pehē ʻe Sihova ʻoku halá? (e) ʻOku anga-fēfē ʻetau ʻiloʻi ʻoku ʻikai ke kole mai ʻe Sihova ke tau fai ʻa e meʻa heʻikai malava ke tau faí?

¹⁸ Ka ko e hā ʻa e niʻihi ʻo e ngaahi meʻa ʻoku tala mai ʻe Sihova ʻoku halá? ʻOku ʻi ai ha ngaahi fakatātā ʻi he puha “Fehiʻa ʻi he Meʻa ʻOku Fehiʻa Ai ʻa Sihová.” ʻUluakí, te ke fakakaukau nai ko e niʻihi ʻo e ngaahi meʻá ni ʻoku ʻikai ke fuʻu kovi ia. Ka ʻi hoʻo lau ʻa e ngaahi veesi Tohi Tapú pea fakakaukau fakalelei fekauʻaki mo iá, te ke toki mahinoʻi ai ʻa e fakapotopoto ʻo e talangofua ki he ngaahi lao ʻa Sihová. Te ke toe ongoʻi nai ʻoku fiemaʻu ke ke fai ha ngaahi liliu ʻi hoʻo moʻuí. Neongo ʻoku faingataʻa nai eni ʻi he taimi ʻe niʻihi, kapau te ke fai ʻa e ngaahi liliu ko iá, te ke maʻu ʻa e nonga mo e fiefia ʻoku haʻu mei he hoko ko ha kaumeʻa mateaki ʻo e ʻOtuá. (ʻAisea 48:17, 18) ʻOku anga-fēfē ʻetau ʻiloʻi ʻe malava ke tau fai ʻa e ngaahi liliu ko ení?

¹⁹ ʻOku ʻikai ʻaupito ke kole mai ʻe Sihova ke tau fai ha meʻa heʻikai malava ke tau fai. (Teutalōnome 30:11-14) ʻI hono tuʻunga ko ha Kaumeʻa moʻoní, ʻokú ne ʻiloʻi lelei ange kitautolu ʻiate kitautolu. ʻOkú ne ʻiloʻi hotau ngaahi mālohingá mo hotau ngaahi vaivaiʻangá. (Saame 103:14) ʻOku fakalototoʻaʻi mai ʻe he ʻapositolo ko Paulá: “Ko e ʻOtuá ʻoku faitōnunga, pea ʻe ʻikai te ne tuku ke ʻahiʻahiʻi kimoutolu ʻo fakalaka atu ia ʻi he meʻa ʻoku malava ke mou kātekiná, kae fakataha mo e ʻahiʻahí te ne ʻai foki mo ha haoʻanga koeʻuhi ke mou malava ai ke kātakiʻi ia.” (1 Kolinitō 10:13) ʻOku malava ke tau falala pau ʻe ʻomi maʻu pē ʻe Sihova ʻa e mālohi ke tau fai ʻa e meʻa ʻoku totonú. Te ne ʻoatu kiate kimoutolu “ʻa e mālohi ʻoku mahulu atu ia ʻi he tuʻunga anga-mahení” ke tokoniʻi kimoutolu ke kātekina ʻa e ngaahi tuʻunga faingataʻá. (2 Kolinitō 4:7) ʻI he hili hono hokosia ʻa e tokoni ʻa Sihova lolotonga ʻa e ngaahi taimi peheé, naʻe lava ai ke pehē ʻe Paula: “ʻOku ou malava ʻa e meʻa kotoa pē koeʻuhi ʻoku ou maʻu ʻa e ivi fakafou ʻi he tokotaha ko ia ʻokú ne ʻomai kiate au ʻa e mālohí.”​—Filipai 4:13.

20. Ko e hā ʻa e ngaahi ʻulungaanga ʻoku totonu ke ke faʻifaʻitaki ki aí, pea ko e hā hono ʻuhingá?

²⁰ Kapau ʻoku tau loto ke hoko ko ha kaumeʻa ʻo Sihova, kuo pau ke tau taʻofi ʻa hono fai ʻa e meʻa ʻoku pehē ʻe Sihova ʻoku halá, ka kuo pau ke tau toe fai ʻa e meʻa lahi ange. (Loma 12:9) Ko e ngaahi kaumeʻa ʻo e ʻOtuá ʻoku nau ʻofa ʻi he meʻa ʻokú ne ʻofa aí. ʻOku fakamatalaʻi ia ʻi he Saame 15:1-5. (Lau.) ʻOku faʻifaʻitaki ʻa e ngaahi kaumeʻa ʻo Sihová ki hono ngaahi ʻulungāngá pea fakahāhā ʻa e “ʻofa, fiefia, melino, kātaki, anga-lelei, lelei, tui, anga-malū, mapuleʻi-kita.”​—Kalētia 5:22, 23.

21. ʻE lava fēfē ke ke ako ke fakahāhā ʻa e ngaahi ʻulungaanga ʻoku ʻofa ai ʻa e ʻOtuá?

²¹ ʻE lava fēfē ke ke ako ke fakahāhā ʻa e ngaahi ʻulungaanga fakaʻofoʻofa ko iá? ʻOku fiemaʻu ke ke ako ʻa e meʻa ʻoku ʻofa ai ʻa Sihová ʻaki hono lau mo ako maʻu pē ʻa e Tohi Tapú. (ʻAisea 30:20, 21) ʻI hoʻo fai ení, ʻe tupulaki ai hoʻo ʻofa kia Sihová, pea ʻi he tupulaki ʻa hoʻo ʻofa kiate iá, te ke loto ai ke talangofua kiate ia.

22. Ko e hā ʻa e olá kapau te ke talangofua kia Sihova?

²² Ko e ngaahi liliu ʻoku fiemaʻu nai ke ke fai ʻi hoʻo moʻuí ʻe lava ke fakahoa ia ki hono vete atu ha ngaahi kofu motuʻa pea tui ʻa e ngaahi kofu foʻou. ʻOku pehē ʻe he Tohi Tapú ʻoku fiemaʻu ke ke “huʻi atu ʻa e angaʻitangata motuʻá” peá ke kofuʻaki “ʻa e angaʻitangata foʻoú.” (Kolose 3:9, 10) Neongo ʻe ʻikai nai ke faingofua, ʻi he taimi ʻoku tau fai ai ʻa e ngaahi liliu ko ení pea talangofua kia Sihová, ʻokú ne talaʻofa mai te ne ʻomai kiate kitautolu ha “fuʻu totongi.” (Saame 19:11) ʻIo, fili ke talangofua kia Sihova pea fakamoʻoniʻi ko Sētané ko ha tokotaha loi. Tauhi kia Sihova, ʻo ʻikai koeʻuhi ko ha pale ʻi he kahaʻú, ka koeʻuhi ko e ʻofa taʻesiokita. Te ke toki hoko leva ai ko ha kaumeʻa moʻoni ʻo e ʻOtuá!