Fakaʻapaʻapaʻi ʻa e Meʻaʻofa ko e Moʻuí

 1. Ko hai naʻá ne foaki mai ʻa e moʻuí?

KO Sihova “ʻa e ʻOtua moʻuí.” (Selemaia 10:10) Ko ia ʻa hotau Tokotaha-Fakatupú, pea kuó ne foaki mai ʻa e moʻuí. ʻOku pehē ʻe he Tohi Tapú: “Naʻá ke fakatupu ʻa e ngaahi meʻa kotoa pē, pea koeʻuhi ko ho finangaló naʻa nau hoko ai ʻo ʻi ai pea naʻe fakatupu ai kinautolu.” (Fakahā 4:11) ʻIo, naʻe fiemaʻu ʻe Sihova ke tau maʻu ʻa e moʻuí. Ko e moʻuí ko ha meʻaʻofa mahuʻinga ia meiate ia.​—Lau ʻa e Saame 36:9.

 2. ʻE lava fēfē ke tau ʻai ke lavameʻa ʻa ʻetau moʻuí?

² ʻOku foaki mai ʻe Sihova ʻa e meʻa ʻoku fiemaʻu ke hokohoko atu ai ʻetau moʻuí, hangē ko e meʻakaí mo e vaí. (Ngāue 17:28) Kae mahulu hake aí, ʻokú ne fiemaʻu ke tau fiefia ʻi he moʻuí. (Ngāue 14:15-17) Ke lavameʻa ʻi he moʻuí, ʻoku fiemaʻu ke tau talangofua ki he lao ʻa e ʻOtuá.​—ʻAisea 48:17, 18.

 3. Ko e hā naʻe fai ʻe Sihova ʻi hono tāmateʻi ʻe Keini ʻa ʻĒpelí?

³ ʻOku akoʻi mai ʻe he Tohi Tapú ko ʻetau moʻuí mo e moʻui ʻa e kakai kehé ʻoku mahuʻinga kia Sihova. Ko e fakatātaá, ʻi he taimi naʻe ʻita lahi ai ʻa Keini​—ko e foha ʻo ʻĀtama mo ʻIví—​ʻi hono tehina ko ʻĒpelí, naʻe fakatokanga ʻa Sihova kia Keini ʻoku fiemaʻu ke ne mapuleʻi ʻa ʻene ʻitá. Ka naʻe ʻikai ke fanongo ʻa Keini, pea naʻá ne ʻita lahi ʻo ne “ʻohofi . . . ʻa ʻĒpeli ko hono tokouá ʻo ne tāmateʻi ia.” (Sēnesi 4:3-8) Naʻe tautea ʻe Sihova ʻa Keini heʻene fakapoongi ʻa ʻĒpelí. (Sēnesi 4:9-11) Ko ia ko e ʻitá mo e tāufehiʻá ʻoku fakatuʻutāmaki koeʻuhí ʻe lava ke na ʻai ke tau hoko ʻo fakamālohi pe anga-fakamamahi. Heʻikai lava ha tokotaha pehē ke ne maʻu ʻa e moʻui taʻengatá. (Lau ʻa e 1 Sione 3:15.) Ke fakahōifuaʻi ʻa Sihova, kuo pau ke tau ako ke ʻofa ʻi he kakai kotoa pē.​—1 Sione 3:11, 12.

 4. Ko e hā ʻoku akoʻi mai ʻe he taha ʻo e ngaahi lao naʻe ʻoange ʻe he ʻOtuá ki he kau ʻIsilelí ʻo fekauʻaki mo e meʻaʻofa ko e moʻuí?

⁴ ʻI he taʻu ʻe laui afe ki mui ai, ʻi heʻene ʻoange ʻa e Fekau ʻe Hongofulú kia Mōsesé naʻe fakahaaʻi ai ʻe Sihova ʻokú ne vakai ki he moʻuí ʻoku mahuʻinga. Ko e taha eni ʻo e ngaahi laó: “Kuo pau ke ʻoua naʻá ke fakapō.” (Teutalōnome 5:17) Kapau naʻe tāmateʻi ʻosi fakakaukauʻi pē ʻe ha taha ha taha, ʻe tāmateʻi ʻa e tokotaha ko iá.

 5. ʻOku anga-fēfē ʻa e ongoʻi ʻa e ʻOtuá ʻo fekauʻaki mo e fakatōtamá?

⁵ ʻOku anga-fēfē ʻa e ongoʻi ʻa e ʻOtuá ʻo fekauʻaki mo e fakatōtamá? ʻOku mahuʻinga kia Sihova naʻa mo e moʻui ʻa ha kiʻi tama teʻeki fanauʻi. ʻI he Lao naʻe ʻoange ʻe Sihova ki he kau ʻIsilelí, naʻe pehē ai ʻe Sihova kapau ʻe fakalaveaʻi ʻe ha taha ha faʻē pea mate ai ʻene pēpeé, ʻe tāmateʻi ʻa e tokotaha ko iá. (Lau ʻa e ʻEkisoto 21:22, 23; Saame 127:3.) ʻOku akoʻi mai ʻe he meʻá ni ʻoku hala ʻa e fakatōtamá.​—Sio ki he Fakamatala ʻi he Ngataʻangá 28.

6, 7. ʻE anga-fēfē ʻetau fakahaaʻi kia Sihova ʻoku tau vakai ki he moʻuí ʻoku mahuʻinga?

⁶ ʻE lava fēfē ke tau fakahaaʻi kia Sihova ʻoku tau vakai ki heʻetau moʻuí mo e moʻui ʻa e niʻihi kehé ʻoku mahuʻinga? ʻAki ʻa e ʻikai ke tau fai ha meʻa ʻe fakatuʻutāmaki ki heʻetau moʻuí pe ko e moʻui ʻa e kakai kehé. Ko ia heʻikai ke tau ngāueʻaki ʻa e tapaká pe betel nut pe ngāuehalaʻaki ʻa e faitoʻo kona tapú, he ʻoku fakatuʻutāmaki kiate kitautolu pea ʻe lava ke ne tāmateʻi kitautolu.

⁷ Naʻe foaki mai ʻe he ʻOtuá ʻetau moʻuí mo hotau sinó, pea ʻoku totonu ke tau ngāueʻaki ia ʻo fakatatau ki heʻene fiemaʻú. Ko ia ʻoku fiemaʻu ke tau tokangaʻi lelei hotau sinó. Kapau heʻikai, te tau hoko ʻo taʻemaʻa ʻi he vakai ʻa e ʻOtuá. (Loma 6:19; 12:1; 2 Kolinitō 7:1) Heʻikai lava ke tau lotu kia Sihova, ʻa ia naʻá ne foaki mai ʻetau moʻuí, kapau ʻoku ʻikai te tau vakai ki he moʻuí ʻoku mahuʻinga. Neongo kapau ʻoku mātuʻaki faingataʻa nai ke taʻofi ʻa e ngaahi tōʻonga ʻoku koví, ʻe tokoniʻi kitautolu ʻe Sihova kapau ʻoku tau feinga koeʻuhi ʻoku tau vakai ki he moʻuí ʻoku mahuʻinga.

 8. Ko e hā te tau fai ke fakapapauʻi ʻoku ʻikai ke tau ʻai ke ʻi ha tuʻunga fakatuʻutāmaki ʻetau moʻuí pe ko e moʻui ʻa e niʻihi kehé?

⁸ Kuo tau ako ko e moʻuí ko ha meʻaʻofa mahuʻinga. ʻOku falala mai ʻa Sihova te tau fai hotau lelei tahá ke ʻoua ʻaupito naʻa tau ʻai ʻetau moʻuí pe ko e moʻui ʻa e niʻihi kehé ke ʻi ha tuʻunga fakatuʻutāmaki. ʻOku tau fai eni ʻaki ʻa e founga ʻo ʻetau fakaʻuli ʻi heʻetau kaá, motopaikí, pe ko ha meʻalele pē. ʻOku tau fakaʻehiʻehi mei he sipoti fakatuʻutāmaki pe fakamālohí. (Saame 11:5) ʻOku tau toe fai hotau lelei tahá ke ʻai hotau ʻapí ke malu. Naʻe fekauʻi ʻe Sihova ʻa e kau ʻIsilelí: “Kapau te ke langa ha fale foʻou, kuo pau ke ke ngaahi foki ha ʻā [pe ʻā maʻulalo] ʻi ho funga falé, koeʻuhí ke ʻoua naʻá ke ʻomi ha halaia ʻi he toto ki ho falé koeʻuhí ko e tō ha taha mei ai.”​—Teutalōnome 22:8.

 9. ʻOku totonu ke fēfē ʻa e meʻa ʻoku tau fai ki he fanga manú?

⁹ Naʻa mo e meʻa ʻoku tau fai ki he fanga manú ʻoku mahuʻinga ia kia Sihova. ʻOkú ne fakaʻatā mai ke tau tāmateʻi ʻa e fanga manú ki he kiki pea ki he vala, pea ʻokú ne fakaʻatā mai ke tau tāmateʻi ha monumanu kapau ʻoku fakatuʻutāmaki ki heʻetau moʻuí. (Sēnesi 3:21; 9:3; ʻEkisoto 21:28) Ka heʻikai ke tau fakamamahiʻi ha monumanu pe tāmateʻi koeʻuhí pē ke maʻu ai ha fiefia.​—Palōveepi 12:10.

10. ʻOku tau ʻilo fēfē ʻoku fakafofongaʻi ʻe he totó ʻa e moʻuí?

¹⁰ ʻOku toputapu ʻa e totó kia Sihova he ʻoku fakafofongaʻi ʻe he totó ʻa e moʻuí. ʻI he hili hono fakapoongi ʻe Keini ʻa ʻĒpelí, naʻe tala ange ʻe Sihova kia Keini: “Ko e toto ē ʻo ho tokouá ʻoku tangi hake kiate au mei he kelekelé.” (Sēnesi 4:10) Naʻe fakafofongaʻi ʻe he toto ʻo ʻĒpelí ʻene moʻuí, pea naʻe tauteaʻi ʻe Sihova ʻa Keini ʻi heʻene tāmateʻi ʻa ʻĒpelí. ʻI he hili ʻa e Lōmaki ʻi he ʻaho ʻo Noá, naʻe toe fakahaaʻi ʻe Sihova ʻoku fakafofongaʻi ʻe he totó ʻa e moʻuí. Naʻe fakaʻatā ʻe Sihova ʻa Noa mo hono fāmilí ke nau kai ʻa e kakano ʻo e fanga manú. Naʻá ne pehē: “Ko e manu kotoa pē ʻoku ngaue ʻa ia ʻoku moʻuí te nau hoko ko hoʻomou meʻakai. Hangē tofu pē ko ʻeku tuku atu kiate kimoutolu ʻa e mohuku lau matá, ʻoku ou tuku atu kinautolu kotoa pē kiate kimoutolu.” Kae kehe, naʻe ʻi ai ʻa e meʻa ʻe taha naʻe tuʻutuʻuni ʻe Sihova ke ʻoua te nau kai: “Ko e kakano ʻoku ʻi ai ʻene moʻuí​—ʻa hono totó—​kuo pau ke ʻoua te mou kai ia.”​—Sēnesi 1:29; 9:3, 4.

11. Ko e hā ʻa e tuʻutuʻuni fekauʻaki mo e totó naʻe ʻoange ʻe he ʻOtuá ki he puleʻanga ʻIsilelí?

¹¹ ʻI he taʻu nai ʻe 800 hili hono tala ʻe Sihova kia Noa ke ʻoua ʻe kai ʻa e totó, naʻá ne toe tuʻutuʻuni ki hono kakaí: “Kapau ʻe tulimanu ha taha ʻo e kau ʻIsilelí pe ko ha muli ʻoku nofo ʻi homou lotolotongá peá ne maʻu ha manu kaivao pe ko ha manupuna ʻa ia ʻe lava ke kai, kuo pau ke ne lilingi ʻa hono totó pea ʻufiʻufi ia ʻaki ʻa e efú.” Naʻá ne toe pehē: “Kuo pau ke ʻoua naʻa mou kai ʻa e toto.” (Livitiko 17:13, 14) Naʻe kei fiemaʻu pē ʻe Sihova ʻa hono kakaí ke nau vakai ki he totó ʻoku toputapu. Naʻe lava ke nau kai kakanoʻi-manu kae ʻikai ko e totó. ʻI heʻenau tāmateʻi ha monumanu ke nau kaí, naʻe pau ke nau lilingi hono totó ki he kelekelé.

12. ʻOku anga-fēfē ʻa e vakai ʻa e kau Kalisitiané ki he totó?

¹² ʻI ha ngaahi taʻu hili ʻa e pekia ʻa Sīsuú, naʻe fakataha ʻa e kau ʻapositoló mo e kau mātuʻa ʻi he fakatahaʻanga Kalisitiane ʻi Selusalemá ke nau fili pe ko e hā ʻa e konga ʻo e Lao naʻe ʻoange ki he kau ʻIsilelí ʻe kei ngāueʻaki ʻe he kau Kalisitiané. (Lau ʻa e Ngāue 15:28, 29; 21:25.) Naʻe tokoniʻi kinautolu ʻe Sihova ke nau mahinoʻi naʻe kei mahuʻinga pē kiate ia ʻa e totó pea naʻe kei fiemaʻu pē ke nau vakai ki ai ʻoku toputapu. Naʻe ʻikai lava ke kai pe inu ʻe he muʻaki kau Kalisitiané ʻa e totó pe kai ʻa e kakanoʻi-manu naʻe ʻikai fakatafe fakaleleí. Kapau naʻa nau kai ia, naʻe kovi tatau pē ia mo e lotu ki he ʻaitolí pe fehokotaki fakasino taʻetāú. Talu mei he taimi ko iá, mo e fakafisi ʻa e kau Kalisitiane moʻoní ke kai pe inu ʻa e totó. Fēfē ʻa e ʻahó ni? ʻOku kei fiemaʻu pē ʻe Sihova ke tau vakai ki he totó ʻoku toputapu.

13. Ko e hā ʻoku ʻikai tali ai ʻe he kau Kalisitiané ʻa e huhu totó?

¹³ ʻOku ʻuhinga ení ʻoku totonu ki he kau Kalisitiané ke nau toe fakafisi mei he huhu totó? ʻIo, ʻoku pehē. Naʻe tuʻutuʻuni mai ʻe Sihova ke ʻoua te tau kai pe inu ʻa e totó. Kapau naʻe tala atu ʻe ha toketā ke ʻoua te ke inu ʻolokaholo, te ke huhu pē ia ki ho sinó? ʻIkai ʻaupito! ʻI he founga tatau, ko e tuʻutuʻuni ke ʻoua ʻe kai pe inu ʻa e totó ʻoku ʻuhinga iá heʻikai te tau tali ha huhu toto.​—Sio ki he Fakamatala ʻi he Ngataʻangá 29.

14, 15. ʻOku mahuʻinga fēfē ki ha Kalisitiane ke ne fakaʻapaʻapaʻi ʻa e moʻuí mo talangofua kia Sihova?

¹⁴ Fēfē kapau ʻoku tala mai ʻe he toketaá te tau mate kapau heʻikai te tau huhu toto? Kuo pau ke fili ʻe he tokotaha taki taha pe te ne talangofua ki he lao ʻa e ʻOtuá ki he totó. ʻOku fakaʻapaʻapaʻi lahi ʻe he kau Kalisitiané ʻa e meʻaʻofa ʻa e ʻOtuá ko e moʻuí, pea te tau kumi ki ha faitoʻo kehe ke kei hokohoko atu ʻetau moʻuí; ka heʻikai ke tau tali ha huhu toto.

¹⁵ ʻOku tau feinga mālohi he hokohoko atu ʻetau moʻui leleí, ka ʻi he mahuʻinga ʻa e moʻuí ki he ʻOtuá, heʻikai ke tau tali ha huhu toto. ʻOku mahuʻinga ange ke talangofua kia Sihova ʻi he feinga ke fakalōloa ʻetau moʻuí ʻaki ha talangataʻa kiate ia. Naʻe pehē ʻe Sīsū: “ʻIlonga ʻa ia ʻokú ne loto ke fakahaofi ʻene moʻuí ʻe mole ia, ka ʻilonga ʻa ia ʻe mole ʻene moʻuí koeʻuhi ko aú te ne maʻu ia.” (Mātiu 16:25) ʻOku tau loto ke talangofua kia Sihova he ʻoku tau ʻofa ʻiate ia. ʻOkú ne ʻiloʻi ʻa e meʻa ʻoku lelei taha kiate kitautolú, pea ʻoku tau vakai ki he moʻuí ʻoku mahuʻinga mo toputapu, ʻo hangē pē ko e vakai ʻa Sihová.​—Hepelū 11:6.

16. Ko e hā ʻoku talangofua ai ʻa e kau sevāniti ʻa e ʻOtuá kiate iá?

¹⁶ ʻOku fakapapauʻi ʻe he kau sevāniti faitōnunga ʻa e ʻOtuá ke talangofua ki heʻene lao fekauʻaki mo e totó. Heʻikai te nau kai pe inu ʻa e totó, pea heʻikai te nau tali ʻa e totó ʻi ha ʻuhinga fakafaitoʻo.a Kae kehe, te nau tali ha faitoʻo kehe ke fakahaofi ʻenau moʻuí. ʻOku nau tuipau ko e Tokotaha-Fakatupu ʻo e moʻuí mo e totó ʻokú ne ʻiloʻi ʻa e meʻa ʻoku lelei taha kiate kinautolú. ʻOkú ke tui ʻokú ne ʻiloʻi ʻa e meʻa ʻoku lelei taha kiate koé?

17. Ko e hā ʻa e ngāueʻaki pē ʻe taha ʻo e totó naʻe fakaʻatā ʻe Sihova ʻi ʻIsilelí?

¹⁷ ʻI he Lao naʻe ʻoange ʻe he ʻOtuá kia Mōsesé, naʻe tala ai ʻe Sihova ki he kau ʻIsilelí: “Ko e moʻui ʻa e kakanó ʻoku ʻi he totó, pea ko au tonu kuó u ʻoatu ia ʻi he ʻōlitá koeʻuhi ko kimoutolu ke faiʻaki ha feilaulau ʻufiʻufi angahala [pe kole ki ha fakamolemole] maʻa hoʻomou moʻuí, he ko e totó ʻoku faiʻaki ʻa e feilaulau ʻufiʻufi angahalá.” (Livitiko 17:11) ʻI he faiangahala ʻa e kau ʻIsilelí, naʻe lava ke nau kole ʻa e fakamolemole ʻa Sihová ʻaki ʻenau feilaulauʻi ha monumanu pea kole ki he taulaʻeikí ke ne lilingi ha konga ʻo hono totó ʻi he ʻōlita ʻi he temipalé. Ko e founga pē eni ʻe taha naʻe fakaʻatā ʻe Sihova ʻa e kau ʻIsilelí ke nau ngāueʻaki ai ʻa e totó.

18. Ko e hā ʻoku ʻai ʻe he feilaulau ʻa Sīsuú ke tau malava ʻo maʻú?

¹⁸ ʻI he haʻu ʻa Sīsū ki māmaní, naʻá ne fetongi ʻa e lao ki he feilaulau monumanú ʻaki ʻene foaki ʻa ʻene moʻuí, pe taʻataʻá, ke fakamolemoleʻi ʻetau angahalá. (Mātiu 20:28; Hepelū 10:1) Naʻe mātuʻaki mahuʻinga ʻa e moʻui ʻa Sīsuú he ʻi he hili hono fokotuʻu hake ʻe Sihova ʻa Sīsū ki hēvaní, naʻe ʻoange ai ʻe Sihova ki he faʻahinga kotoa ʻo e tangatá ʻa e faingamālie ki he moʻui taʻengatá.​—Sione 3:16; Hepelū 9:11, 12; 1 Pita 1:18, 19.

19. Ko e hā kuo pau ke tau fai ke tau ‘ʻataʻatā ai mei he toto ʻo e tangata kotoa pē’?

¹⁹ ʻOku tau houngaʻia ʻia Sihova ʻi heʻene meʻaʻofa fisifisimuʻa ko e moʻuí! Pea ʻoku tau loto ke tala ki he kakaí kapau ʻoku nau tui kia Sīsū, ʻe malava ke nau moʻui taʻengata. ʻOku tau ʻofa ʻi he kakaí, pea te tau fai ʻa e meʻa kotoa te tau malavá ke akoʻi kinautolu ki he founga ke maʻu ai ʻa e moʻuí. (ʻIsikeli 3:17-21) Pea ʻe lava ke tau pehē hangē ko e ʻapositolo ko Paulá: “ʻOku ou ʻataʻatā au mei he toto ʻo e tangata kotoa pē, he kuo ʻikai te u tauholomui mei hono tala atu kiate kimoutolu ʻa e finangalo kotoa ʻo e ʻOtuá.” (Ngāue 20:26, 27) ʻIo, ʻoku tau fakaʻapaʻapaʻi lahi ʻa e moʻuí mo e totó ʻi heʻetau talanoa ki he niʻihi kehé fekauʻaki mo Sihova mo e mahuʻinga kiate ia ʻa e moʻuí.