Tuku ke Talaki ʻe he Toko Taha Kotoa ʻa e Lāngilangi ʻo Sihová

“Tuku kia Sihova ʻa e kololia [pe lāngilangi] mo e malohinga. Tuku kia Sihova ʻa e kololia hono huafa.”​—SĀME 96:​7, 8.

1, 2. Mei he matavai fē ʻoku tuku ai ʻa e fakahīkihikí kia Sihová, pea ko hai kinautolu ʻoku uki ke kau fakataha ki aí?

KO Tēvita, ʻa e foha ʻo Sesé, naʻá ne tupu hake ko ha tamasiʻi tauhi-sipi ʻi he feituʻu Pētelihemá. Kuo pau pē naʻá ne sio fakamamaʻu ki he tuʻunga kāfakafa ʻo e langi fetuʻuá ʻi he lōngonoa ʻa e poó lolotonga ʻa ʻene tokangaʻi ʻa e ngaahi tākanga ʻa ʻene tamaí ʻi he ngaahi feituʻu kaikaiʻanga maomaonganoa ko iá! ʻOku ʻikai ha veiveiua, ʻi heʻene manatuʻi ʻa e ngaahi ongoʻi mālohi ko iá, ʻi he taimi naʻe fakamānavaʻi ai ia ʻe he laumālie māʻoniʻoni ʻo e ʻOtuá, naʻá ne faʻu ai mo hivaʻi ʻa e ngaahi lea fakaʻofoʻofa ʻo e Sāme hono 19: “Ko e ngaahi langi ʻoku nau tala ʻa e nāunauʻia [pe lāngilangi] ʻo e ʻOtua; pea ʻoku fakaha ʻe he ʻatā ʻa e ngaue ʻa hono nima. ʻOku ʻasi atu ʻi he fonua kotoa ʻenau ʻotu tohi; pea aʻu ʻenau ngaahi lea ki he ngataʻanga ʻo mamani.”​—Sāme 19:​1, 4.

² ʻI he ʻikai ha lea, ʻikai ha ngaahi foʻi lea, ʻikai ha leʻó, ko e langi naʻe fakaofo hono faʻu ʻe Sihová ʻokú ne talaki ʻa hono lāngilangí, ʻi he ʻaho ki he ʻaho mo e pō ki he pō. ʻOku ʻikai ʻaupito tuku ʻe he fakatupú ʻa ʻene talaki ʻa e lāngilangi ʻo e ʻOtuá, pea ʻoku ʻai ke te ongoʻi ʻoku ʻikai hato mahuʻinga ʻi he fakakaukau atu ki he fakamoʻoni fakalongolongo ko ení ʻi heʻene fakaeʻa atu ia ki he “fonua kotoa” ke sio ki ai ʻa e kau nofo kotoa ʻi aí. Kae kehe, ko e fakamoʻoni fakalongolongo ʻa e fakatupú ʻoku ʻikai ke feʻunga ia. ʻOku uki ʻa e faʻahinga faitōnunga ʻo e tangatá ke nau kau fakataha ʻi he lea he tuʻunga ko e fakamoʻoní. Ko ha tokotaha-tohi-saame naʻe ʻikai fakahā hono hingoá naʻá ne leaʻaki ki he kau lotu faitōnungá ʻa e ngaahi lea fakamānavaʻi ko ení: “Tuku kia Sihova ʻa e kololia mo e malohinga. Tuku kia Sihova ʻa e kololia hono huafa.” (Sāme 96:​7, 8) Ko e faʻahinga ʻoku ʻi ai honau vahaʻangatae vāofi mo Sihová ʻoku nau fiefia ke fai ha tali ki he ekinaki ko iá. Ko ia, ko e hā ʻoku kau ki hono tuku ʻa e lāngilangí ki he ʻOtuá?

 3. Ko e hā ʻoku tuku ai ʻe he tangatá ʻa e lāngilangí ki he ʻOtuá?

³ ʻOku fiemaʻu ʻa e meʻa lahi ange ʻi he leá pē. Ko e kau ʻIsileli ʻo e ʻaho ʻo ʻAiseá naʻa nau fakalāngilangiʻi ʻa e ʻOtuá ʻaki honau loungutú, ka ko e tokolahi tahá naʻe ʻikai te nau loto-moʻoni. Fakafou ʻia ʻAisea, naʻe pehē ʻe Sihova: “Ko e meʻa ʻi he ʻunu mai ʻa e kakai ni ʻaki honau ngutu, mo fakalangilangiʻi au ʻaki honau loungutu, ka ko honau loto kuo nau fakamamaʻo meiate au.” (Aisea 29:13) Ko ha fakahīkihiki pē naʻe leaʻaki ʻe he faʻahinga tāutaha ko iá naʻe taʻeʻuhinga ia. Ke hoko ʻo mohu ʻuhingá, ko e fakahīkihikí kuo pau ke mapuna hake ia mei ha loto ʻoku fonu ʻi he ʻofa kia Sihova pea mo ha lāuʻilo loto-moʻoni fekauʻaki mo hono lāngilangi laulōtahá. Ko Sihova pē taha ʻa e Tokotaha-Fakatupú. Ko ia ʻa e Māfimafi-Aoniú, ko e Tokotaha-Faitotonú, ko e fakasino tonu ia ʻo e ʻofá. Ko ia ʻa e matavai ʻo hotau fakamoʻuí pea ko e Hau totonu ia ʻa ia ʻoku moʻuaʻaki ki ai ʻa e fakamoʻulaloá ʻe he toko taha kotoa ʻoku moʻui ʻi hēvani pea ʻi māmani. (Fakahā 4:​11; 19:1) Kapau ʻoku tau tui moʻoni ki he ngaahi meʻá ni, tau fakalāngilangiʻi ia ʻaki ʻa e kotoa ʻo hotau lotó.

 4. Ko e hā ʻa e ngaahi fakahinohino naʻe fai ʻe Sīsū ki he founga ke fakalāngilangiʻi ai ʻa e ʻOtuá, pea ʻoku lava fēfē ke tau fakahoko iá?

⁴ Naʻe tala mai ʻe Sīsū Kalaisi kia kitautolu ʻa e founga ke fakalāngilangiʻi ai ʻa e ʻOtuá. Naʻá ne pehē: “Ko e meʻa ko ia kuo fakalangilangiʻi ai ʻa ʻeku Tamai, koeʻuhi ke iku ki hoʻomou fua lahi, mo hoʻomou mātuʻaki hoko ko e kau ako aʻaku.” (Sione 15:8) ʻOku anga-fēfē ʻetau fua lahí? ʻUluakí, ʻaki ʻa e kau ʻaufuatō ʻi hono malangaʻi ʻa e ‘ongoongolelei ʻo e puleʻangá’ pea kau fakataha ai mo e ngaahi meʻa fakatupú kotoa ʻi he fai ʻo e “fakaha” fekauʻaki mo e ‘ngaahi ʻulungaanga taʻehāmai’ ʻo e ʻOtuá. (Mātiu 24:14; Loma 1:20) ʻIkai ngata aí, ʻi he foungá ni ʻoku tau kau kotoa ki ai—hangatonu pe taʻefakahangatonu—ʻi hono ngaohi ʻa e kau ākonga foʻou ʻoku nau fakalahi atu ʻa e hiva ʻo e fakahīkihiki kia Sihova ko e ʻOtuá. Ko hono uá, ʻoku tau fakatupulekina ʻa e fua ʻoku fakatupu ʻia kitautolu ʻe he laumālie māʻoniʻoní pea feinga ke faʻifaʻitaki ki he ngaahi ʻulungaanga māʻolunga ʻo Sihova ko e ʻOtuá. (Kaletia 5:​22, 23; Efeso 4:32e [5:​1, PM]; Kolose 3:​10) Ko hono olá, ʻoku fakalāngilangiʻi ai ʻe hotau ʻulungāanga fakaʻahó ʻa e ʻOtuá.

“Ki he Fonua Kotoabe”

 5. Fakamatalaʻi ʻa e anga hono fakamamafaʻi ʻe Paula ʻa e fatongia ʻo e kau Kalisitiané ke fakalāngilangiʻi ʻa e ʻOtuá ʻaki hono vahevahe atu ʻenau tuí ki he niʻihi kehé.

⁵ Ko Paula ʻi heʻene tohi ki he kau Lomá naʻá ne fakamamafaʻi ai ʻa e fatongia ʻo e kau Kalisitiané ke fakalāngilangiʻi ʻa e ʻOtuá ʻaki ʻa e vahevahe atu ʻenau tuí ki he niʻihi kehé. Ko ha kaveinga tefito ʻo e tohi Lomá ko e pehē ko ia ko e faʻahinga pē ʻoku nau ngāueʻi ʻa e tui kia Sīsū Kalaisí ʻe lava ke fakahaofí. ʻI he Loma vahe 10 ʻo ʻene tohí, naʻe fakahaaʻi ai ʻe Paula ko e ʻIsileli fakaekakano ʻi hono ʻahó naʻe kei feinga ke ne lavaʻi ha tuʻunga māʻoniʻoni ʻaki ʻa e muimui ki he Lao ʻa Mōsesé, lolotonga ia “ko Kalaisi ko e fakangata ia ʻo lao.” Ko ia ai, ʻoku pehē ʻe Paula: “Kapau te ke fakaha ʻaki ho ngutu, ko e ʻEiki ʻa Sisu, pea ke tui ʻaki ho loto, kuo fokotuʻu ia ʻe he Otua mei he pekia, ʻe fakamoʻui koe.” Mei he taimi ko iá ʻo faai mai ai, “[kuo] ʻikai ha fai kehekehe ki he Siu mo e Kalisi: he ʻoku taha ai pe ʻa e ʻEiki ʻo e kakai kotoa pe, pea mohu meʻa maʻa e kakai kotoa pe ʻoku tautapa kiate ia. He ʻilonga ʻa ia ʻe tautapa ki he huafa ʻo e ʻEiki ʻe fakamoʻui.”​—Loma 10:​4, 9-​13.

 6. Naʻe anga-fēfē hono ngāueʻaki ʻe Paula ʻa e Sāme 19:4?

⁶ ʻOku ʻeke totonu leva ʻe Paula: “Te nau lava fefe ke tautapa ki ha toko taha ʻoku teʻeki ke nau tui ki ai? pea te nau lava fefe ke tui ki ha toko taha kuo teʻeki ke nau fanongo ki ai? pea fefe haʻanau fanongo ʻoka ʻikai ha taha ke malanga?” (Loma 10:14) Fekauʻaki mo ʻIsilelí, ʻoku pehē ʻe Paula: “Kuo ikai te nau talagofua kotoabe ki he ogoogolelei.” Ko e hā naʻe ʻikai talangofua ai ʻa ʻIsilelí? Ko e ʻikai te nau talí naʻe tupu ia mei he ʻikai ha tuí, ʻo ʻikai ko e ʻikai ha faingamālié. ʻOku fakahaaʻi eni ʻe Paula ʻaki ʻene hiki lea mei he Sāme 19:4 pea ngāueʻaki ia ki he ngāue fakamalanga faka-Kalisitiané kae ʻikai ki he fakamoʻoni fakalongolongo ʻa e fakatupú. ʻOkú ne pehē: “Io, koe mooni, kuo aʻu atu e nau fakaogo ki he fonua kotoabe, bea moe nau lea ki he gaahi gataaga o mamani.” (Loma 10:​16, 18, PM) ʻIo, hangē ko e fakalāngilangiʻi ʻa Sihova ʻe he meʻa fakatupu ʻikai ke moʻuí, naʻe malangaʻi ʻe he kau Kalisitiane he ʻuluaki senitulí ʻa e ongoongo lelei ʻo e fakamoʻuí ʻi he feituʻu kotoa pē pea fakahīkihikiʻi ai ʻa e ʻOtuá ʻi he “fonua kotoabe.” ʻI heʻene tohi ki he kau Kolosé, naʻe toe fakamatalaʻi ai ʻe Paula ʻa e anga ʻo e mafolalahia ʻa e ongoongo leleí. Naʻá ne pehē ko e ongoongo leleí kuo malangaʻi ia “ki he meʻa moʻui kotoa pe ʻi he lalo langi.”—Kolose 1:23.

Kau Fakamoʻoni Faivelenga

 7. Fakatatau kia Sīsū, ko e hā ʻa e fatongia ʻoku maʻu ʻe he kau Kalisitiané?

⁷ Ngalingali, naʻe hiki ʻe Paula ʻene tohi ki he kau Kolosé ʻi he taʻu nai ʻe 27 hili ʻa e pekia ʻa Sīsū Kalaisí. Naʻe lava fēfē ke mafola ʻa e ngāue fakamalangá ʻo aʻu ki Kolose ʻi ha kiʻi taimi nounou pehē? Naʻe hoko iá koeʻuhí naʻe faivelenga ʻa e kau Kalisitiane ʻi he ʻuluaki senitulí, pea naʻe tāpuakiʻi ʻe Sihova ʻenau faivelengá. Naʻe tomuʻa tala ʻe Sīsū ko hono kau muimuí te nau hoko ko e kau malanga longomoʻui ʻi heʻene pehē: “Kuo pau ke tomuʻa fanongonongo ʻa e ongoongolelei ki he ngaahi kakai kotoa pē.” (Maake 13:10) Naʻe tānaki atu ki he kikite ko iá ʻe Sīsū ʻa e fekau ʻoku lēkooti ʻi he ngaahi veesi fakaʻosi ʻo e Kōsipeli ʻa Mātiú: “Ko ia ke mou ō, ʻo ngaohi ʻa e ngāhi kakai kotoa pe ko ʻeku kau ako, ʻi he papitaiso kinautolu ki he Huafa ʻo e Tamai mo e ʻAlo mo e Laumalie Maʻoniʻoni, mo e akoʻi kinautolu ke tauhi ʻa e ngāhi meʻa kotoa pe kuo u tuʻutuʻuni atu.” (Mātiu 28:​19, 20) Taimi nounou hili ʻa e hāʻele hake ʻa Sīsū ki hēvaní, naʻe kamata ke fakahoko ʻe hono kau muimuí ʻa e ngaahi lea ko iá.

8, 9. Fakatatau ki he tohi Ngāué, naʻe anga-fēfē ʻa e tali ʻa e kau Kalisitiané ki he ngaahi fekau ʻa Sīsuú?

⁸ Hili ʻa hono huaʻi hifo ʻa e laumālie māʻoniʻoní ʻi he Penitekosi ʻo e 33 T.S., ko e ʻuluaki meʻa naʻe fai ʻe he kau muimui mateaki ʻa Sīsuú ko e ʻalu ʻo malanga, ʻo tala ki he fuʻu kakai ʻi Selusalemá “ʻa e ngaahi meʻa lalahi ʻa e ʻOtua.” Ko ʻenau malangá naʻe mātuʻaki ola lelei, pea ko e “ngaahi laumālie, feʻunga nai mo e toko tolu afe” naʻe papitaisó. Naʻe hoko atu ʻa e kau ākongá ke fakahīkihikiʻi fakahāhā mo faivelenga ʻa e ʻOtuá, fakataha mo e ngaahi ola lelei.—Ngāue 2:​4, 11, 41, 46, 47.

⁹ Ko e ngaahi ngāue ʻa e kau Kalisitiane ko iá naʻe vave ʻa hono fakatokangaʻi ʻe he kau taki lotú. ʻI he hohaʻa ʻi he lea loto-toʻa ʻa Pita mo Sioné, naʻa nau fekauʻi ʻa e ongo ʻapositoló ke tuku ʻena malangá. Naʻe tali ange ʻe he ongo ʻapositoló: “ʻE ʻikai te ma faʻa tuku ʻema lea ki he ngaahi meʻa naʻa ma sio ki ai mo fanongoa.” Hili hono fakamanamanaʻi pea tukuangé, naʻe foki ʻa Pita mo Sione ki hona fanga tokouá, pea naʻa nau lotu fakataha kia Sihova. Naʻa nau kole loto-toʻa kia Sihova: “Tuku ki hoʻo kau tamaioʻeiki, ke ʻoua ʻaupito te mau māluʻia ʻi heʻemau malangaʻaki hoʻo folofola.”—Ngāue 4:​13, 20, 29.

10. Ko e hā ʻa e fakafepaki naʻe kamata ke haá, pea naʻe anga-fēfē ʻa e tali ʻa e kau Kalisitiane moʻoní?

¹⁰ Ko e lotu ko iá naʻe fehoanaki ia mo e finangalo ʻo Sihová, hangē ko ia naʻe hoko ʻo hā mahino ki mui siʻi ange. Naʻe puke ʻa e kau ʻapositoló pea naʻe tukuange fakaemana leva kinautolu ʻe ha ʻāngelo. Naʻe tala ange ʻe he ʻāngeló kia kinautolu: “Mou ʻalu ʻo tuʻu ʻi he Temipale, ʻo malangaʻaki ki he kakai ʻa e ngaahi folofola kotoa pe ʻo e moʻui ko ia.” (Ngāue 5:​18-20) Koeʻuhi naʻe talangofua ʻa e kau ʻapositoló, naʻe hokohoko atu hono tāpuakiʻi kinautolu ʻe Sihová. Ko ia ai, “ko e ʻaho kotoa pe, ʻi he Temipale pea ʻi ʻapi, naʻe ʻikai tuku ʻenau ako mo malangaʻaki ʻa Sisu, ko e Misaia ia.” (Ngāue 5:42) ʻOku hā mahino, ko e fakatanga mālohí naʻe ʻikai te ne malava ke taʻofi fakaʻaufuli ʻa e kau muimui ʻo Sīsuú mei hono ʻoatu fakahāhā ʻa e lāngilangí ki he ʻOtuá.

11. Ko e hā ʻa e fakakaukau ʻa e muʻaki kau Kalisitiané ki he ngāue fakamalangá?

¹¹ Naʻe vave hono puke ʻo Sitīveni pea tolomakaʻi ki he maté. Ko hono fakapōngí naʻe kamata ai ʻa e fakatanga kakaha ʻi Selusalema, pea ko e kotoa ʻo e kau ākongá tuku kehe ʻa e kau ʻapositoló naʻe fakamālohiʻi ai kinautolu ke nau movete mamaʻo. Naʻa nau loto-siʻi ʻi he fakatangá? Mole ke mamaʻo. ʻOku tau lau: “Ko kinautolu naʻe vetekina naʻa nau ʻalu atu pe mo malangaʻaki ʻa e folofola.” (Ngāue 8:​1, 4) Ko e faivelenga ko ia ʻi hono talaki ʻa e lāngilangi ʻo e ʻOtuá naʻe toutou mātā ia. ʻI he Ngāue vahe 9, ʻoku tau lau ai ko e Fālesi ko Saula ʻo Tāsusí, lolotonga ʻene fononga ki Tāmasikusi ke kamata fakatangaʻi ʻa e kau ākonga ʻi aí, naʻá ne sio ai ʻi ha vīsone kia Sīsū pea naʻe taaʻi ia ʻo ne kui. ʻI Tāmasikusi, naʻe fakamoʻui fakaemana ai ʻe ʻAnanaia ʻa e tuʻunga kui ʻo Saulá. Ko e hā ʻa e ʻuluaki meʻa naʻe hoko ʻa Saula—ʻa ia naʻe ʻiloa ki mui ko e ʻapositolo ko Paulá​—ʻo faí? ʻOku pehē ʻe he lēkōtí: “Pea ne hanga leva ʻo malangaʻaki ʻa Sisu ʻi he ngaahi falelotu, ʻo pehē, Ko e ʻAlo ʻo e ʻOtua ia.”—Fakaʻītali ʻamautolu; Ngāue 9:20.

Naʻe Kau ʻa e Toko Taha Kotoa ʻi he Malangá

12, 13. (a) Fakatatau ki he kau faihisitōliá, ko e hā ʻa e meʻa naʻe taau ke fakatokangaʻi fekauʻaki mo e muʻaki fakatahaʻanga Kalisitiané? (e) ʻOku anga-fēfē ʻa e feongoongoi ʻa e tohi Ngāué pea mo e ngaahi lea ʻa Paulá mo e ngaahi fakamatala ʻa e kau faihisitōliá?

¹² ʻOku ʻilolahia naʻe kau ʻa e toko taha kotoa ʻi he muʻaki fakatahaʻanga Kalisitiané ʻi he ngāue fakamalangá. ʻI he fekauʻaki mo e kau Kalisitiane ʻi he ngaahi ʻaho ko iá, ʻoku tohi ʻe Philip Schaff: “Ko e fakatahaʻanga kotoa pē ko ha sōsaieti fakamisinale ia, pea ko e toko taha tui Kalisitiane kotoa pē ko ha misinale.” (History of the Christian Church) ʻOku fakamatala ʻa W. S. Williams: “Ko e fakamoʻoni fakalūkufuá ko e Kalisitiane kotoa pē ʻi he muʻaki Siasí, tautefito ki he faʻahinga naʻa nau maʻu ʻa e meʻaʻofa ʻo e mafai fakaefakamoʻuí [ngaahi meʻaʻofa ʻo e laumālié], naʻa nau malangaʻi ʻa e kōsipelí.” (The Glorious Ministry of the Laity) ʻOkú ne toe fakahaaʻi mālohi: “Ko e malangá naʻe ʻikai ʻaupito fakataumuʻa ʻe Sīsū Kalaisí ke hoko ko e monū ʻataʻatā pē ia ʻo e ngaahi lakanga pau ʻo e ngāue fakafaifekaú.” Naʻa mo Selisasi, ko ha fili motuʻa ʻo e lotu faka-Kalisitiané, naʻá ne tohi: “Ko e kau ngāue fulufuluʻi sipí, kau ngaohi suú, kau ngaohi letá, ko e taʻelava lahi taha ʻo lautohi mo taʻeako ʻi he faʻahinga ʻo e tangatá, ko e kau malanga faivelenga kinautolu ʻo e kōsipelí.”

¹³ Ko e tonu mātē ʻo e ngaahi fakamatala ko iá ʻoku hā ia ʻi he lēkooti fakahisitōlia ʻo e tohi Ngāué. ʻI he Penitekosi ʻo e 33 T.S., hili hono huaʻi hifo ʻo e laumālie māʻoniʻoní, ko e kotoa ʻo e kau ākongá, kakai tangatá mo e kakai fefiné, naʻa nau talaki fakahāhā ʻa e ngaahi meʻa lalahi ʻa e ʻOtuá. Hili ʻa e fakatanga naʻe hoko atu ʻi hono fakapoongi ʻo Sitīvení, ko e kau Kalisitiane kotoa pē naʻe movete mamaʻó naʻa nau fakamafola lahi ʻaupito ʻa e ongoongo leleí. ʻI ha taʻu nai ʻe 28 ki mui, naʻe tohi ai ʻa Paula ki he kau Kalisitiane Hepelū kotoa pē, ʻo ʻikai ki ha kiʻi kalasi pē ʻo e haʻa faifekaú, ʻi heʻene pehē: “Ko ia ke tau ʻatu ʻiate ia pe, maʻu ai pe, ha feilaulau fakafetaʻi ki he ʻOtua, ʻa é ko e fua ʻo e loungutu ʻoku takua hono huafa.” (Hepelu 13:15) ʻI hono fakamatalaʻi ʻene fakakaukau tonu ʻo fekauʻaki mo e ngāue fakamalangá, naʻe pehē ʻe Paula: “He ne ogo oku ou malaga aki ae ogoogolelei, oku ikai koia oku ou vikiviki ai: he kuo tuku tonu ia kiate au; io, e malaia au, o kabau e ikai teu malaga aki ae ogoogolelei!” (1 Kolinito 9:​16, PM) ʻOku hā mahino, ko e kau Kalisitiane faitōnunga kotoa pē ʻi he ʻuluaki senitulí naʻa nau ongoʻi ʻa e meʻa tatau.

14. Ko e hā ʻa e vahaʻangatae ʻi he vahaʻa ʻo e tuí mo e malangá?

¹⁴ Ko e moʻoni, ko ha Kalisitiane moʻoni kuo pau ke ne kau ʻi he ngāue fakamalangá koeʻuhí ʻoku fehokotaki taʻelava ke fakamavaheʻi ia mo e tuí. Naʻe pehē ʻe Paula: “ʻOku fai ʻa e tui ʻaki ʻa e loto ke maʻu ʻa e fakatonuhia, ka ʻoku fai ʻa e fakaha ʻaki ʻa e ngutu ke maʻu ʻa e fakamoʻui.” (Loma 10:10) Ko ha kulupu siʻisiʻi pē ia ʻi he loto fakatahaʻangá—hangē ha kalasi haʻa faifekau—ʻoku ngāueʻi ʻa e tuí pea maʻu ai ʻa e fatongia ke malangá?a Ko e moʻoni ʻoku ʻikai! Ko e kau Kalisitiane moʻoni kotoa pē ʻoku nau fakatupulekina ha tui mālohi ki he ʻEiki ko Sīsū Kalaisí pea ʻoku ueʻi kinautolu ke nau fai ha talaki fakahāhā ʻo e tui ko iá ki he niʻihi kehé. He ka ʻikai, ko ʻenau tuí ʻoku mate. (Semisi 2:​26) Koeʻuhi ko e kau Kalisitiane mateaki kotoa pē ʻi he ʻuluaki senituli ʻo Hotau Kuongá naʻa nau fakahāhā ʻenau tuí ʻi he foungá ni, naʻe fanongoa ai ha fuʻu kaila ʻo e fakahīkihiki ki he huafa ʻo Sihová.

15, 16. ʻOmai ha ngaahi fakatātā ke fakahaaʻi ai naʻe fakalakalaka ʻa e ngāue fakamalangá neongo ʻa e ngaahi palopalemá.

¹⁵ ʻI he ʻuluaki senitulí, naʻe tāpuakiʻi ʻe Sihova ʻa hono kakaí ʻaki ʻa e tupu neongo ʻa e ngaahi palopalema ʻi loto pea ʻi tuʻa ʻi he fakatahaʻangá. Ko e fakatātaá, ʻoku lēkooti ʻi he Ngāue vahe 6 ha taʻefelotoi ʻi he vahaʻa ʻo e kau ului lea faka-Hepeluú mo e lea faka-Kalisí. Naʻe fakaleleiʻi ʻa e palopalemá ʻe he kau ʻapositoló. Ko hono olá, ʻoku tau lau: “Naʻe tupu maʻu pē ʻa e folofola ʻa e ʻOtua; pea fakatokolahi ʻaupito ʻa e lau ʻo e kau ako ʻi Selusalema; kaeʻumaʻā ko e fuʻu tokolahi ʻo e kau taulaʻeiki naʻa nau fakavaivaiʻi kinautolu ʻo tui.”​—Ngāue 6:7.

¹⁶ Ki mui ai, naʻe tupu hake ai ha ngaahi vātamaki fakapolitikale ʻi he vahaʻa ʻo Tuʻi Hēlota ʻAkilipa ʻo Siuteá pea mo e kakai ʻo Taia mo Saitoní. Ko e kau nofo ʻo e ongo kolo ko iá naʻa nau fai ha kole melino naʻe anga-fakahekeheke, pea ʻi he tali ki aí naʻe fai ai ʻe Hēlota ha lea ki he kakaí. Ko e fuʻu kakai naʻa nau fakatahatahá naʻa nau kamata kalanga: “Ko e folofola ʻa ha ʻOtua, ʻo ʻikai ko ha tangata.” ʻI he taimi pē ko iá, naʻe taaʻi ai ʻe ha ʻāngelo ʻa Sihova ʻa Hēlota ʻAkilipa, pea naʻá ne mate “ko e inanga [ia] ʻo e ʻikai te ne tuku ʻa e kololia ki he ʻOtua.” (Ngāue 12:​20-23) Ko ha meʻa fakaʻohovale ē ki he faʻahinga naʻe tuʻu ʻenau ʻamanakí ʻi he kau pule fakaetangatá! (Sāme 146:​3, 4) Kae kehe, ko e kau Kalisitiané, naʻe hokohoko atu ʻenau fakalāngilangiʻi ʻa Sihová. Ko ia ai, “ko e folofola ʻa e ʻOtua naʻe tuputupu maʻu pe, ʻo fakatokolahi” neongo ʻa e ngaahi taʻetuʻumaʻu fakapolitikale ko iá.—Ngāue 12:24.

Taimi ko Iá mo e ʻAhó Ni

17. ʻI he ʻuluaki senitulí, ko e hā naʻe kau fakataha ki ai ʻa e fuʻu tokolahi fakautuutu ʻi hono faí?

¹⁷ ʻIo, ko e fakatahaʻanga Kalisitiane ʻi māmani lahi ʻi he ʻuluaki senitulí naʻe faʻuʻaki ia ʻa e kau fakahīkihiki faivelenga mo longomoʻui ʻa Sihova ko e ʻOtuá. Naʻe kau ʻa e kau Kalisitiane mateaki kotoa pē ʻi hono fakamafola ʻa e ongoongo leleí. Naʻe fetaulaki ʻa e niʻihi mo e faʻahinga naʻa nau tali, pea hangē ko ia naʻe leaʻaki ʻe Sīsuú, naʻa nau akoʻi kinautolu ke talangofua ki he ngaahi meʻa kotoa pē naʻá ne fekaú. (Mātiu 28:​19, 20) Ko e olá naʻe tupu ai ʻa e fakatahaʻangá, pea naʻe kau fakataha ai ʻa e faʻahinga tāutaha tokolahi ange mo Tuʻi Tēvita ʻo e kuonga muʻá ʻi hono tuku ʻa e fakahīkihikí kia Sihová. Naʻa nau fakaongo atu kotoa ʻa e ngaahi lea fakamānavaʻí: “Kau fakafetaʻi ki he ʻAfiona ʻaki hoku loto kotoa, ʻe Atonai ko hoku ʻOtua; ʻo fakahikihikiʻi ho huafa ʻo taʻengata. He kuo lahi kiate au hoʻo mēsi.”—Sāme 86:​12, 13.

18. (a) Ko e hā ʻa e faikehekehe ʻoku fakatokangaʻi ʻi he vahaʻa ʻo e fakatahaʻanga Kalisitiane ʻi he ʻuluaki senitulí pea mo e Puleʻanga-Haʻa-Kalisitiane he ʻaho ní? (e) Ko e hā ʻe lāulea ki ai ʻi he kupu hoko maí?

¹⁸ ʻI he vakai ki he meʻá ni, ko e ngaahi lea ʻa e palōfesa teolosia ko Allison A. Trites ʻoku fakatupu fakakaukau. ʻI heʻene fakahoa ʻa e Puleʻanga-Haʻa-Kalisitiane ʻi onopōní mo e ʻuluaki lotu faka-Kalisitiané, naʻá ne pehē: “Ko e ngaahi siasi he ʻaho ní ʻoku faʻa tupulekina ia ʻi he tupu fakapaiolosií (ʻi hono fai ʻe he fānau ʻi he lotoʻi siasi fakalotofonuá ha fakahaaʻi fakafoʻituitui ʻo e tuí) pe tupu ʻi he hikí (taimi ʻoku hiki mai ai ʻe ha toko taha haʻu foʻou ʻa ʻene tuʻunga mēmipá mei ha siasi fakalotofonua ʻe taha). Kae kehe, ʻi he tohi Ngāué, ko e tupulekiná ko e tupu ʻi he fakaului, he ko e toki kamata pē ia ʻe he siasí ʻa ʻene ngāué.” ʻOku ʻuhinga ení ko e lotu faka-Kalisitiane moʻoní ʻoku ʻikai kei tupu ia ʻi he founga naʻe pehē ʻe Sīsū ʻoku totonu ke ʻi aí? Ko e moʻoni ʻoku ʻikai. Ko e kau Kalisitiane moʻoni he ʻaho ní ʻoku nau faivelenga ʻi he founga kotoa pē ʻi hono tuku fakahāhā ʻa e fakahīkihikí ki he ʻOtuá ʻo hangē pē ko e kau Kalisitiane ko ia ʻi he ʻuluaki senitulí. Te tau sio ki he meʻá ni ʻi he kupu hoko maí.

[Fakamatala ʻi lalo]

ʻE Lava Ke Ke Fakamatalaʻi?

• ʻI he ngaahi founga fē ʻoku tau fakalāngilangiʻi ai ʻa e ʻOtuá?

• Ko e hā ʻa e ngāueʻaki ʻaonga naʻe fai ʻe Paula fekauʻaki mo e Sāme 19:4?

• Ko e hā ʻa e vahaʻangatae ʻi he vahaʻa ʻo e tuí mo e malangá?

• Ko e hā naʻe taau ke fakatokangaʻi fekauʻaki mo e fakatahaʻanga Kalisitiane ʻi he ʻuluaki senitulí?

[Fakatātā ʻi he peesi 8, 9]

ʻOku hokohoko fakamoʻoni ʻa e ngaahi langí ki he lāngilangi ʻo Sihová

[Maʻuʻanga Tā]

Courtesy of Anglo-Australian Observatory, photograph by David Malin

[Fakatātā ʻi he peesi 10]

Ko e ngāue fakamalangá mo e lotú ʻokú na fehokotaki vāofi