ʻOkú Ke Tuku ʻa Sihova Ke Ne Fakafehuʻi Koe?

ʻOKU ʻi he Tohi Tapú ʻa e fehuʻi ʻe laui teau ʻoku hūhū loloto ki he lotó. Ko hono moʻoní, ko e ʻOtua tonu ko Sihová ʻokú ne ngāueʻaki ʻa e fehuʻí ke akoʻiʻaki ʻa e ngaahi moʻoni mahuʻinga. Ko e fakatātaá, naʻe ngāueʻaki ʻe Sihova ha ngaahi fehuʻi ʻi heʻene fakatokanga kia Keini ke fakatonutonu ʻa hono ʻalunga fakatupu ʻauhá. (Sen. 4:6, 7) ʻI he ngaahi taimi kehe, naʻe feʻungaʻānoa ʻa e foʻi fehuʻi pē ʻe taha meia Sihová ke ne ueʻi ha tokotaha ke ne fai ha ngāue pau. ʻI he fanongo ki hono ʻeke ʻe Sihova: “Ko hai te u fekau, ʻio, ko hai ʻe ʻalu maʻatautolu?” naʻe tali ʻa e palōfita ko ʻAiseá: “Ko au eni; fekau au.”—Ai. 6:8, 9.

Ko Sīsū, ʻa e Faiako Lahí, naʻá ne toe ngāueʻaki ola lelei ʻa e fehuʻí. ʻOku hiki he ngaahi Kōsipelí ʻa e fehuʻi ʻa Sīsū laka hake he tuʻo 280. Neongo naʻá ne ngāueʻaki ʻi ha taimi ʻa e fehuʻí ke fakasīlongoʻi ʻa hono kau fakaangá, ʻoku faʻa hoko ko ʻene taumuʻá ke aʻu ki he loto ʻo ʻene kau fanongó, ʻo ueʻi kinautolu ke nau fakakaukauloto ki honau tuʻunga fakalaumālié tonu. (Mt. 22:41-46; Sione 14:9, 10) ʻI he tuʻunga meimei tatau, ko e ʻapositolo ko Paulá, ʻa ia naʻá ne hiki ʻa e tohi ʻe 14 ʻo e Ngaahi Konga Tohi Tapu Faka-Kalisi Kalisitiané, naʻá ne ngāueʻaki ʻi he tuʻunga fakalotoʻi ʻa e fehuʻí. (Loma 10:13-15) Hangē ko ení, ko ʻene tohi ki he kau Lomá pē ʻoku ʻi ai ha fehuʻi lahi. Ko e fehuʻi ʻa Paulá ʻoku ueʻi ai ʻene kau lautohí ke nau ʻiloʻi ʻa e “kilukilua ʻa e koloa mo e poto mo e ʻilomeʻa ʻa e ʻOtua.”—Loma 11:33.

Lolotonga ʻoku ueʻi ʻi ha fehuʻi ʻe niʻihi ke fai mai ha tali, ko e ngaahi fehuʻi kehé ʻoku fakataumuʻa ia ke ne langaʻi ha fakakaukau lahi ange. ʻOku hiki ʻi he ngaahi Kōsipelí ʻa hono ngāueʻaki lahi ʻe Sīsū ʻa e fehuʻi langaʻi fakakaukaú. ʻI he taimi ʻe taha, naʻe fakatokanga ai ʻa Sīsū ki heʻene kau ākongá: “Vakai, telia ʻa e levani ʻa e kau Falesi, pea mo e levani ʻa Helota,” ʻo ʻuhinga ia ki heʻenau mālualoí mo e ngaahi akonaki loí. (Mk. 8:15; Mt. 16:12) Naʻe ʻikai maʻu ʻa e ʻuhingá ʻe he kau ākonga ʻa Sīsuú pea naʻa nau kamata fealēleaʻaki ko e ʻuhingá ki heʻenau fakangaloʻi ke ʻomai ha maá. Fakatokangaʻi ange hono ngāueʻaki ʻe Sīsū ʻa e fehuʻí ʻi he fetalanoaʻaki nounou naʻe hoko atu aí. “Naʻa ne pehē kiate kinautolu, Ko e ha ʻoku mou fealeleaʻaki ai koeʻuhi ʻoku ʻikai haʻamou ma? Kuo teʻeki koā ke ʻuhinga kiate kimoutolu pē oʻo? kuo fefeka koā ʻa e loto ʻomoutolu? ʻOku mou mata koā, kae ʻikai mamata? pea ʻoku mou telinga, kae ʻikai ongo? . . . Kuo teʻeki koā ke mahino kiate kimoutolu?” Naʻe fakataumuʻa ʻa e fehuʻi ʻa Sīsuú ki ha tali fakakaukau, ʻi hono ueʻi ʻene kau ākongá ke nau fakakaukauloto ki he ʻuhinga moʻoni ʻo ʻene leá.—Mk. 8:16-21.

“Kau Fehuʻi Atu”

Naʻe ngāueʻaki ʻe he ʻOtua ko Sihová ʻa e fehuʻí ke fakatonutonu ʻa e fakakaukau ʻa ʻene sevāniti ko Siopé. Fakafou ʻi ha ngaahi fehuʻi lahi, naʻe akoʻi ai ʻe Sihova ʻa Siope fekauʻaki mo ʻene taʻemahuʻinga ʻi hono fakahoa ki hono Tokotaha-Ngaohí. (Siope, vahe 38-41) Naʻe ʻamanekina ʻe Sihova ke fanongo ki ha tali ki he fehuʻi taki taha ko iá? ʻOku ʻikai ngalingali naʻe pehē. Ko e fehuʻi hangē ko ení “Naʻa ke ʻi fe ʻi heʻeku tanupou ʻa mamani?” ʻoku hā mahino naʻe ʻuhingá ke ne ueʻi ʻa e fakakaukau mo e ongoʻi ʻa Siopé. ʻI he hili ʻa e fehuʻi fakalahi ko iá, naʻe ʻikai mei lava ke toe lea ʻa Siope. Naʻá ne pehē pē: “Ko e ha haʻaku tali ʻe fai? Ko e ʻai pe hoku nima ki hoku ngutu.” (Siope 38:4; 40:4) Naʻe maʻu ʻe Siope ʻa e ʻuhingá peá ne fakatōkilalo. Kae kehe, naʻe ʻikai akoʻi pē ʻe Sihova ia ʻa Siopé ke ne anga-fakatōkilalo. Naʻe toe fakatonutonu ai mo ʻene fakakaukaú. ʻI he founga fē?

Neongo ko Siopé “ko e tangata haohaoa mo angatonu,” naʻe fakahaaʻi ʻi he taimi ʻe niʻihi ʻi heʻene leá ha fakakaukau hala, ʻa ia naʻe fakatokangaʻi ʻe ʻIlaiū ʻi heʻene valokiʻi ʻa Siope ʻi heʻene “fakatonuhiaʻi ia ʻe ia, ʻo tuku ʻa e ʻOtua.” (Siope 1:8; 32:2; 33:8-12) Ko ia ai, naʻe toe fakatonutonuʻi ʻe he fehuʻi ʻa Sihová ʻa e mahino ʻa Siopé. ʻI heʻene folofola kia Siope mei he loto taufá, naʻe pehē ʻe he ʻOtuá: “Ko hai tu hena ʻoku ʻai ke ha fakaʻuiʻuilatai ʻa e tuʻutuʻuni ʻaki ʻene ngaahi lea taʻepoto? Huke muʻa ho vala hange ha toʻa; kau fehuʻi atu ka ke hinoiʻi au.” (Siope 38:1-3) Fakafou ʻi he fehuʻí, naʻe tohoakiʻi leva ai ʻe Sihova ʻa e tokangá ki hono poto mo e mālohi taʻefakangatangatá hangē ko ia kuo fakahāhā ʻi heʻene ngaahi ngāue fakaofó. Ko e fakamaama ko ení naʻe tokoniʻi ai ʻa Siope ke ne falala ki he fakamaau ʻa Sihová mo ʻene founga fai ʻo e ngaahi meʻá ʻo ʻikai ʻi ha taimi pehē ki muʻa. Ko ha hokosia fakaofo moʻoni ia kia Siope—ke fakafehuʻi ʻe he ʻOtua Māfimafi-Aoniú tonu!

Founga ʻOku Lava Ai Ke Tau Tuku ke Fakafehuʻi Kitautolu ʻe Sihová

Fēfē kitautolu? ʻE lava ke tau maʻu ʻaonga mo kitautolu foki mei he fehuʻi ʻoku hiki ʻi he Tohi Tapú? ʻIo, ʻe malava! Ko hono fakaʻatā ʻa e ngaahi fehuʻi ko iá ke ʻai ke tau kiʻi tuʻu ʻo fakakaukaú ʻe lava ke ne ʻomai ʻa e pale fakalaumālie lahi. Ko e ngaahi fehuʻi fakaueʻiloto ʻi he Folofola ʻa e ʻOtuá ʻoku ʻai ai ia ke ola leleí. Ko e moʻoni, “ko e folofola ʻa e ʻOtua, ko e . . . koto malohi, . . . pea ʻoku ne vavangaʻi ʻa e ngaahi holi mo e fakakaukau ʻo e loto.” (Hep. 4:12) Kae kehe, ke maʻu ʻa e ʻaonga lahi tahá, ʻoku fiemaʻu ke tau fakahanga ʻa e ngaahi fehuʻi ko iá kia kitautolu, ʻo hangē pē ʻoku fakafehuʻi fakafoʻituitui kitautolu ʻe Sihová. (Loma 15:4) Tau vakai angé ki ha ngaahi fakatātā.

“ʻO ʻikai fai totonu koā ʻa e Tuʻi Fakamāu ʻo mamani katoa?” (Sen. 18:25) Ko e fehuʻi ko eni ʻoku fiemaʻu ke tali lotó naʻe fai ia ʻe ʻĒpalahame kia Sihova ʻi he taimi ʻo ʻEne fakamāuʻi ʻa Sōtoma mo Komolá. Naʻe fakakaukau ʻa ʻĒpalahame ʻoku mole ke mamaʻo ke faifai ange pea lava ke ngāue taʻetotonu ʻa Sihova—ʻo tāmateʻi fakataha ʻa e māʻoniʻoní mo e angahalá. ʻOku tapua atu mei he fehuʻi ʻa ʻĒpalahamé ʻa ʻene tui lahi ki he tuʻunga māʻoniʻoni ʻo Sihová.

ʻI he ʻahó ni, ʻoku hehema nai ai ʻa e niʻihi ke fakamahalo fekauʻaki mo e ngaahi meʻa ʻoku kau ki he fakamaau ʻa Sihova ʻi he kahaʻú, hangē ko ia pe ko hai tonu ʻe hao ʻi ʻĀmaketoné pe ko hai ʻe toetuʻú. ʻI he ʻikai fakaʻatā ʻa e fakakaukau peheé ke ne fakahohaʻasi kitautolú, ʻe lava ke tau manatuʻi ʻa e fehuʻi ʻa ʻĒpalahamé. ʻI hono ʻiloʻi ʻa e tuʻunga ʻo Sihova ko ha Tamai fakahēvani anga-lelei pea falala kakato ki heʻene fakamaau totonú mo e mēsí, hangē ko ʻĒpalahamé, ʻoku taʻofi ai kitautolu mei he fakamole taimi mo e ivi ʻi he hohaʻa taʻetotonu, veiveiua fakatupu vaivai mo e fakafekiki taʻeʻaonga.

“Ko hai ʻiate kimoutolu ʻe lava ʻe heʻene loto-moʻuá ke tānaki atu ha kiupite ʻe taha ki he lōloa ʻo ʻene moʻuí?” (Mt. 6:27, NW) ʻI he lea ki ha fuʻu kakai naʻe kau ai ʻene kau ākongá, naʻe ngāueʻaki ʻe Sīsū ʻa e fehuʻi ko ení ke fakamamafaʻi ʻa e fiemaʻu ke nau tuku kinautolu ki he tokanga ʻofa ʻa Sihová. Ko e ngaahi ʻaho fakaʻosi ʻo e fokotuʻutuʻu fulikivanu ko ení ʻokú ne fakatupunga ʻa e loto-moʻua lahi, ka ko e tokangataha ki aí heʻikai fakalōloa ai ʻetau moʻuí pe fakaleleiʻi ʻa e tuʻunga ʻo e moʻuí.

ʻI he taimi pē ʻoku tau ongoʻi loto-moʻua ai fekauʻaki mo kitautolu pe ko e faʻahinga ʻoku tau ʻofa aí, ko hono fakamanatuʻi ʻa e fehuʻi ʻa Sīsuú ʻe lava ke tokoniʻi ai kitautolu ke ʻoua ʻe tō ʻa e fakamamafá ki heʻetau loto-moʻuá. ʻE lava ke tokoni ia ke taʻofi ʻa e hohaʻá mo e fakakaukau taʻepaú ʻa ē ʻokú ne fakavaivaiʻi fakaefakakaukau, fakaeongo mo fakaesino kitautolú. Hangē ko ia naʻe fakapapauʻi mai ʻe Sīsuú, ko ʻetau Tamai fakahēvaní, ʻa ia ʻokú ne fafanga ʻa e fanga manupuna ʻo e langí mo fakateunga ʻa e mohuku ʻo e ngoué, ʻokú ne ʻafioʻi kotoa ʻa ʻetau fiemaʻú.—Mt. 6:26-34.

“ʻE hikofi koā ʻe ha tangata ha afi, ʻo ʻai ki hono fatafata, ʻo ʻikai mofia hono kofu?” (Pal. 6:27) Ko e ʻuluaki vahe ʻe hiva ʻo e Palovepí ʻoku kau ai ʻa e lea nounou ʻa ha tamai ʻokú ne tuku atu ʻa e poto ʻaonga ki hono fohá. Ko e fehuʻi ʻoku hiki ʻi hení ko e ʻuhinga ia ki he nunuʻa fakamamahi ʻo e tonó. (Pal. 6:29) Kapau ʻoku tau toki ʻiloʻi ʻoku tau kau ʻi ha tōʻonga fakamalinga pe tauhi ha holi fakaefehokotaki fakasino hala, ʻoku totonu ke tatangi ʻa e fehuʻi ko ení ʻo hangē ha meʻa fakatokangá ki hotau ʻatamaí. Ko hono moʻoní, ko e fehuʻí ni ʻoku lava ke ʻeke ia ʻi ha taimi pē ʻoku fakataueleʻi ai ha taha ke ne fou ʻi ha ʻalunga taʻefakapotopoto. He mahino moʻoni ē ko ʻene fakamamafaʻi ʻa e tefitoʻi moʻoni ʻaonga ʻi he Tohi Tapú: ‘Te ke utu pē meʻa naʻá ke toó’!—Kal. 6:7.

“Kohai koe, oku ke fakamāuʻi ae tamaioeiki ae tagata kehe?” (Loma 14:4, PM) ʻI heʻene tohi ki he kau Lomá, naʻe lāulea ai ʻa Paula ki he palopalema naʻe malanga hake ʻi he fakatahaʻangá ʻi he ʻuluaki senitulí. Ko e kau Kalisitiane ʻe niʻihi, ʻi heʻenau haʻu ko ia mei he ngaahi puipuituʻa fakafonua kehekehé, naʻa nau hehema ke faifakamaau ki he ngaahi fili mo e ngāue ʻa honau kaungātuí. Ko e fehuʻi ʻa Paulá naʻe fakamanatu ai ke nau fetalitalileleiʻaki kinautolu pea tuku ʻa e fakamāú kia Sihova.

Hangē ko ia he ʻaho ní, ko e kakai ʻa Sihová ʻoku nau haʻu mei he tuʻunga kehekehe ʻo e moʻuí. Neongo ia, kuo fakatahaʻi kitautolu ʻe Sihova ʻi he fāʻūtaha mahuʻinga. ʻOku tau tokoni ki he fāʻūtaha ko iá? Kapau ʻoku tau hehema ke fakahāhā vave ʻa e ʻikai leleiʻia ʻi ha ngāue fakamātoato ʻa ha tokoua, he fakapotopoto moʻoni ē ke ʻeke hifo kia kitautolu ʻa e fehuʻi naʻe fai ʻe Paulá!

Tohoakiʻi ʻe he Fehuʻí Ke Tau Ofi Ange Ai kia Sihova

Ko e ngaahi fakatātā ko ení ʻoku fakahāhā ai ʻa e mālohi ʻo e fehuʻí ʻoku ʻi he Folofola ʻa e ʻOtuá ke sivisiviʻi ai ʻe ha taha ʻa ia tonu. ʻI he fakakaukau ki he potutohi ʻo e fehuʻi taki taha ʻe lava ke tokoniʻi ai kitautolu ke ngāueʻaongaʻaki ia ki hotau tuʻungá tonu. Pea ʻi heʻetau lau ʻa e Tohi Tapú, te tau fakatokangaʻi ai ʻa e toe ngaahi fehuʻi ʻaonga.—Sio ki he puha ʻi he peesi 14.

Ko hono fakaʻatā ʻa e fehuʻi fakaueʻiloto ʻoku maʻu ʻi he Folofola ʻa e ʻOtuá ke maongo loloto kia kitautolú ʻe tokoni ia ke tau fakatatau ʻa hotau ʻatamaí mo e lotó ki he ngaahi founga māʻoniʻoni ʻa Sihová. Hili hono fakafehuʻi ia ʻe Sihová, naʻe fakapapauʻi ange ʻe Siope: “Ne u fanongo kiate koe ʻaki ʻa e fanongo ʻa e telinga; ka ko eni kuo mātāʻi koe ʻe hoku mata.” (Siope 42:5) ʻIo, naʻe hoko ʻa Sihova ʻo moʻoni ange kia Siope, ʻo hangē ia naʻá Ne ʻi ai tonu ʻi muʻa ʻiate iá. Naʻe fakamatalaʻi ia ki mui ʻe he ākonga ko Sēmisí ʻo peheni: “ʻUnuʻunu atu ki he ʻOtua, pea ʻe ʻunuʻunu mai ia kiate kimoutolu.” (Sem. 4:8) ʻOfa ke tau fakaʻatā ʻa e konga kotoa ʻo e Folofola ʻa e ʻOtuá, ʻo kau ai ʻa e ngaahi fehuʻí, ke ne tokoniʻi kitautolu ke tau tupu fakalaumālie pea “mātāʻi” lelei ange ai pē ʻa Sihova!

[Puha ʻi he peesi 14]

ʻOku anga-fēfē hono tokoniʻi koe ʻe hono ʻeke ʻa e ngaahi fehuʻí ni ke ke ohi ai ʻa e vakai ʻa Sihova ki he ngaahi meʻá?

▪ “ ʻOku manako ʻe Sihova ki he ngaahi feilaulau-moifua mo e ngaahi feilaulau kehe ʻi he fai talangofua ki heʻene folofola?”—1 Sam. 15:22.

▪ “ Ko ia naʻa ne ngaohi ʻa e mata, ʻo ʻikai koā te ne sioa?”—Sāme 94:9.

▪ “ Ke kumi ʻe he kakaí honau lāngilangi pē ʻonautolú, ko ha lāngilangi ia?”—Pal. 25: 27, NW.

▪ “ ʻOku tonuhia ʻa hoʻo ʻita na?”—Siona 4:4.

▪ “ “Koeha hono aoga ki he tagata, o kabau te ne maʻu a mamani kotoabe, kae mole ai hono laumalie oona?”—Mt. 16:26, PM.

▪ “ Kohai te ne fakamavae akitautolu mei he ofa a Kalaisi?”—Loma 8:35, PM.

▪ “ Koeha oku aau, nae ikai te ke maʻu?”—1 Kol. 4:7, PM.

▪ “ [ʻOku] feohi fefe ʻa e maama mo e poʻuli?”—2 Kol. 6:14.

[Fakatātā ʻi he peesi 15]

Ko e hā ne ako ʻe Siope mei he ngaahi fehuʻi ʻa Sihová?