Fakatupulekina ʻa e Laumālie ʻo e Houngaʻiá

ʻI HA tuʻunga fakavavevave ʻoku fakahaofi ai ʻe ha toketā ʻi he Vahefonua Niu ʻIoké ʻa e moʻui ʻa Marie. Ka ko e tokotaha taʻu 50 ko Marie ʻoku ʻikai te ne fakamālō ki he toketaá pe totongi ʻa hono moʻuá. He toki taipe moʻoni ia ʻo e taʻehoungaʻiá!

ʻOku pehē ʻe he Tohitapú, ʻi he taimi ʻe taha, ʻi heʻene hū atu ki ha kolo, naʻe fetaulaki ai ʻa Sīsū mo e kau tangata ʻe toko 10 naʻa nau maʻu ʻa e mahaki fakalilifu ko e kiliá. Naʻa nau kalanga leʻo-lahi mai kiate ia: “ʻEī, Sīsū, ʻaloʻofa mai.” Naʻe fekau atu ʻa Sīsū: “Mou ō pe, ʻo fakaha kimoutolu ki he kau taulaʻeiki.” Naʻe tali ʻe he kau kiliá ʻa ʻene fakahinohinó, pea ʻi heʻenau oó, naʻe kamata ke nau sio mo ongoʻi naʻe toe foki mai ʻenau moʻui leleí.

Naʻe hoko atu pē ʻa e toko hiva ʻo e kau kilia naʻe fakamoʻuí ʻi honau fonongá. Ka ko e kilia ʻe tahá, ko ha Samēlia, naʻe foki ia ʻo kumi kia Sīsū. Ko e tokotaha kilia ko ʻeni ki muʻá naʻá ne fakahīkihikiʻi ʻa e ʻOtuá, pea ʻi heʻene ʻilo ʻa Sīsuú, naʻá ne tō ki hono vaʻé, ʻo fakamālō kiate ia. ʻI he tali ki aí, naʻe pehē ʻe Sīsū: “ʻIkai naʻe toko hongofulu naʻe fakamaʻa? pea kofaʻā ʻa e toko hiva? ʻOku ʻikai ʻiloa mai koā hanau taha kuo foki ke fai ha fakafetaʻi ki he ʻOtua; ka ko siʻi muli ni pe?”​—Luke 17:​11-19.

ʻOku fakahuʻunga ha lēsoni mahuʻinga ʻi he fehuʻi: “Pea kofaʻā ʻa e toko hiva?” Hangē ko Marie, naʻe ʻi ai ha tōnounou mafatukituki ʻa e kau kilia ʻe toko hivá​—naʻe ʻikai te nau fakahā ʻa e houngaʻiá. ʻOku fuʻu mālohi ʻaupito ʻa e taʻehoungaʻia peheé ʻi he ʻahó ni. Ko e hā ʻa e ʻuhinga ki he meʻá ni?

Tupuʻanga Tefito ʻo e Taʻehoungaʻiá

ʻOku tupu tefito ʻa e taʻehoungaʻiá mei he siokitá. Fakakaukau angé ki heʻetau ʻuluaki ongo mātuʻa fakaetangatá, ʻa ʻĀtama mo ʻIvi. Naʻe fakatupu kinaua ʻe Sihova fakataha mo e ngaahi ʻulungaanga fakaʻotua pea tokonaki ʻa e meʻa kotoa pē ki heʻena fiefiá, ʻo kau ai ha ʻapi ngoue fakaʻofoʻofa, ngaahi ʻātakai haohaoa, mo e ngāue mohu ʻuhinga mo fakafiemālie. (Senesi 1:​26-29; 2:​16, 17) Ka ʻi he malumalu ʻo e tenge ʻo e hūhū ʻa Sētane ki heʻena tokanga pē kiate kinauá, ʻi hona tuʻunga ko e ongo meʻa malí naʻá na ʻulutukua ki he talangataʻá pea taliʻaki ʻa e loto-fehiʻa ki he failelei ʻa Sihová.​—Senesi 3:​1-5; Fakahā 12:9.

Toe fakakaukau ange ki he kakai ʻo ʻIsileli ʻi he kuonga muʻá, ʻa ia naʻe fili ʻe he ʻOtuá ke hoko ko ʻene koloa makehé. He houngaʻia ē kuo pau naʻe ʻi ai ʻa e ngaahi mātuʻa ʻIsileli kotoa pē ʻi he pō ʻo Nīsani 14, 1513 K.M.! ʻI he pō mahuʻinga ko iá, naʻe ʻomai ai ʻe he ʻāngelo ʻa e ʻOtuá ʻa e mate ki he “ʻuluaki tama kotoa pe ʻi he fonua ko Isipite” kae fakalaka atu ʻi he ngaahi fale ʻosi fakaʻilongaʻi lelei ʻo e kau ʻIsilelí. (Ekisoto 12:​12, 21-24, 30) Pea ʻi he hoko ʻo fakahaofi mei he kau tau ʻa Feló ʻi he Tahi Kulokulá, fakataha mo e ngaahi loto fonu ʻi he houngaʻiá, naʻe ‘toki hiva ʻa Mosese mo haʻa Isileli kia Sihova.’​—Ekisoto 14:​19-28; 15:​1-21.

Ka neongo ia, ʻi ha ngaahi uike pē hili ʻa e mavahe mei ʻIsipité, “naʻe lāunga ʻa e fakataha kotoa ʻo haʻa Isileli.” He vave ē ko ʻenau tō ʻo maʻu ʻe he taʻehoungaʻiá! Naʻa nau ongoʻi ʻa e tō mei he “feangai mo e ngaahi kulo kakano, mo kai ma ʻo makona,” ko ia naʻa nau fiefia ai ʻi ʻIsipite, ʻa e fonua ʻo ʻenau nofo pōpulá. (Ekisoto 16:​1-3) ʻOku hā mahino, ʻoku ngāue ʻa e siokitá ʻo fakafepaki ki hono fakatupulekina mo e fakahāhā ʻo e houngaʻiá.

ʻI he hoko ko e fānau tukufakaholo ʻa ʻĀtama angahalaʻiá, ʻoku fanauʻi mai ʻa e faʻahinga kotoa pē ʻo e tangatá mo ha hehema siokita pea mo ha mahei ki he taʻehoungaʻiá. (Loma 5:12) Ko e taʻefakamāloó ko ha toe konga foki ia ʻo e laumālie siokita ʻokú ne puleʻi ʻa e kakai ʻo e māmani ko ʻení. Hangē ko e ʻea ʻoku tau mānavaʻakí, ko e laumālie ko iá ʻoku ʻi he feituʻu kotoa pē, pea ʻokú ne uesia kitautolu. (Efeso 2:​1, 2) ʻOku fiemaʻu leva ke tau fakatupu ha loto-houngaʻia. ʻE anga-fēfē haʻatau fai pehē?

Kuo Pau ke Fakalaulauloto!

ʻOku fakamatalaʻi ʻe he Webster’s Third New International Dictionary ʻa e loto-houngá ko e “tuʻunga ʻo e hoko ʻo houngaʻia: ongoʻi māfana mo anga-fakakaumeʻa ki ha tokotaha tokoni ʻo fakaʻaiʻai ʻa e taha ko iá ke toe totongi mai ha meʻaʻofa.” ʻOku ʻikai lava ke fakamoʻui mo tāmateʻi ʻo hangē ha mīsiní ʻa e ongó; kuo pau ke tupu vave hake ia ʻi he loto ʻo ha taha. Ko e houngaʻiá ʻoku lahi ange ia ʻi hono fakahāhā pē ʻo e ngaahi ʻulungaanga leleí pe ko ha founga ʻo e anga fakaʻapaʻapá; ʻoku tupu ia mei he lotó.

ʻE lava fēfē ke tau ako ke ongoʻi loto-houngaʻia? ʻOku tuku ʻe he Tohitapú ʻa e lahi ʻo e meʻa ʻoku tau ongoʻí ki he ngaahi fakakaukau ʻoku tau filí. (Efeso 4:​22-24) Ko e ako ke ongoʻi houngaʻiá ʻoku kamata ia ʻaki ʻa e houngaʻia ʻi he fakalaulauloto ki he anga-ʻofa ʻoku tau maʻú. ʻI he fekauʻaki mo ʻení, ʻoku pehē ʻe Dr. Wayne W. Dyer, ʻa ia ʻoku ngāue ʻi he malaʻe ki he moʻui lelei fakaeʻatamaí: “ʻOku ʻikai lava ke ʻi ai haʻo ongoʻi (ongo ʻo e lotó) ʻi he ʻikai te ke ʻuluaki aʻusia ha fakakaukau.”

Ko e fakatātaá, vakai angé ki he meʻa fekauʻaki mo e fakamālō ki he meʻa fakatupu takatakai ʻiate kitautolú. ʻI hoʻo sio ki ha langi fetuʻua ʻi ha pō tafitonga, ʻoku fēfē hoʻo ongoʻi fekauʻaki mo e meʻa ʻokú ke aʻusiá? Naʻe fakamatalaʻi ʻe Tuʻi Tēvita ʻa e manavahē naʻá ne ongoʻí: “Kau ka vakai ho ngaahi langi na, ko e ngaue ʻa ho louhiʻinima, ʻa e mahina mo e ngaahi fetuʻu, ʻa ia kuo ke fokotuʻu; ko e ha ʻa e tangata ke ke manatu ai kiate ia?” Pea ʻi he lōngonoa ʻo e poó, naʻe lea ʻa e ngaahi fetuʻú kia Tēvita, ʻo ueʻi ia ke ne tohi: “Ko e ngaahi langi ʻoku nau tala ʻa e nāunauʻia ʻo e ʻOtua; pea ʻoku fakaha ʻe he ʻatā ʻa e ngaue ʻa hono nima.” Ko e hā naʻe mātuʻaki uesia loloto ai ʻa Tēvita ʻi he langi fetuʻuá? ʻOkú ne tali ʻe ia tonu: “Kuo u fakakaukau ki he ngaahi meʻa kuo ke feia: ʻoku ou fakalaulauloto ki he ngaue ʻa ho nima.”​—Sāme 8:​3, 4; 19:1; 143:5.

Naʻe houngaʻia foki ʻa e foha ʻo Tēvita ko Solomoné ʻi he mahuʻinga ʻo e fakakaukau fekauʻaki mo e ngaahi meʻa fakaofo ʻo e fakatupú. Hangē ko ʻení, fekauʻaki mo e tafaʻaki ʻo e kaunga ʻa e ngaahi konga ʻao ʻuhá ʻi hono fakaivifoʻou ʻa hotau māmaní, naʻá ne tohi: “Ko e ngaahi vaitafe kotoa ʻoku nau toka ki tahi, ka ʻoku ʻikai ke fonu ai ʻa e tahi; ko e potu ʻoku tafe ai ʻa e ngaahi vaitafe ʻoku nau foki ke tafe ai.” (Koheleti 1:7) Ko ia, ʻi he hili hono fakaivifoʻou ʻe he ʻuhá mo e ngaahi vaitafé ʻa e māmaní, ʻoku toe liliu honau ngaahi vaí mei he ʻōsení ʻo foki ki he ngaahi ʻaó. ʻE mei fēfē ʻa e māmani ko ʻení kapau ʻoku ʻikai ʻa e fakamaʻa mo e liliu ko ʻeni ʻo e vaí? He houngaʻia ē kuo pau naʻe ongoʻi ʻe Solomoné ʻi he taimi naʻá ne nōfoʻi ai ʻi he ngaahi fakakaukau ko ʻení!

ʻOku toe fakamahuʻingaʻi foki ʻe ha taha houngaʻia ʻa hono vā mo e ngaahi mēmipa ʻi he fāmilí, ngaahi kaungāmeʻá, mo e ngaahi mahení. ʻOku puke ʻe heʻenau tōʻonga anga-ʻofá ʻa ʻene tokangá. ʻI heʻene fakakaukau loto-houngaʻia ki heʻenau anga-ʻofá, ʻokú ne ongoʻi fakamālōʻia ʻi hono lotó.

Fakahaaʻi ʻa e Houngaʻiá

He foʻi lea faingofua ē ko e “māloó”! ʻOku mātuʻaki faingofua ke puʻaki ha lea pehē. Pea ʻoku lahi ʻa e ngaahi faingamālie ke fai pehē. ʻOku fakaivifoʻou fēfē ha lea Mālō fakalotomāfana mo loto-moʻoni ki ha taha ʻokú ne fakaava mai ha matapā kiate kitautolu pe toʻo hake ha meʻa naʻa tau fakatooki! Ko e fanongo ki he lea ko iá ʻoku lava ke ne ʻai ʻa e ngāue ʻa ha kalake ʻi ha falekoloa pe ko ha tokotaha tali-tēpile ʻi ha falekai pe ko e tangata tufa meilí ke faingofua ange mo fakafiemālie ange.

Ko hono ʻave ʻa e ngaahi kaati fakamāloó ko ha founga feʻungamālie ia ke fakahaaʻiʻaki ʻa e houngaʻia ki he ngaahi tōʻonga anga-ʻofá. Ko e ngaahi kaati lahi ʻoku ala maʻu ʻi he ngaahi falekoloá ʻoku nau fakahaaʻi lelei ʻa e ngaahi fakakaukaú. Kae ʻikai ko ha fakahāhā anga-ʻofa fakafoʻituitui ia ke tānaki atu ki ai ʻa e ngaahi lea ʻo e houngaʻiá ʻi hoʻo tohinima pē ʻaʻaú? ʻE aʻu ʻo saiʻia ange ʻa e niʻihi ia ke ʻoua ʻe ngāueʻaki ha kaati kuo pulusi, kae ʻave ha nouti fakafoʻituitui.​—Fakafehoanaki mo Palovepi 25:11.

ʻOku hangehangē, ko e faʻahinga ko ia ʻoku taau taha ki heʻetau houngaʻiá ko e faʻahinga ko ē ʻoku ofi taha kiate kitautolu ʻi ʻapí. ʻOku pehē ʻe he Tohitapú ʻo fekauʻaki mo e uaifi fitá: “ʻOku tuʻu hake . . . hono husepaniti foki, ʻo ne fakamalo kiate ia.” (Palovepi 31:28) ʻIkai ko e ngaahi lea fakamālō fakamātoato ʻa ha husepāniti ki hono uaifí ʻoku tokoni ia ki ha ʻapi, ʻātakai melino mo fiefia? Pea ʻikai ʻoku fiefia foki ʻa e husepānití ke foki ki ʻapi ki ha fakafeʻiloaki māfana mo loto-houngaʻia mei hono uaifí? ʻI he ngaahi ʻahó ni, ʻoku lahi ʻa e ngaahi tenge ʻi he nofo malí, pea ʻi he taimi ʻoku lahi ai ʻa e ngaahi tengé, ʻoku faingofua ʻa e hoko fakafokifā ʻa e ʻitá. Ko e taha ʻoku loto-houngaʻiá ʻoku mateuteu ia ke fai ha ngaahi fakangofua pea ʻoku vave ia ke fakangaloʻi mo fakamolemole.

ʻOku fiemaʻu foki ki he toʻutupú ke nau lāuʻilo ke ʻoatu ki heʻenau ngaahi mātuʻá ʻa e ngaahi lea houngaʻia fakamātoato. Ko e moʻoni, ʻoku ʻikai ke haohaoa ʻa e ngaahi mātuʻá, ka ʻoku ʻikai ko ha ʻuhinga ia ke taʻehoungaʻia ai ki he meʻa kuo nau fai maʻamoutolú. Ko e ʻofa mo e tokanga kuo nau ʻoatu talu mei homou fanauʻí ʻoku ʻikai lava ke fakatau mai ia. Kapau kuo nau akoʻi kimoutolu ki he ʻiloʻi ʻo e ʻOtuá, ʻoku mou maʻu ai ha toe ʻuhinga ke loto-houngaʻia.

“Ko e fanau ko e ʻinasi meia Sihova,” ko e lau ia ʻa e Sāme 127:3. Ko ia ai, ʻoku totonu ke kumi ʻa e ngaahi mātuʻá ki ha ngaahi faingamālie ke fakaongoongoleleiʻi ai ʻenau fānaú ʻo ʻikai ko hono fakasio ʻa e fanga kiʻi meʻa iiki ke fakahohaʻasiʻaki kinautolu. (Efeso 6:4) Pea ko ha monū ē ʻoku nau maʻú ke tokoniʻiʻaki ʻa e faʻahinga iiki ʻi honau malumalú ke fakatupu ʻa e laumālie ʻo e houngaʻiá!​—Fakafehoanaki mo Palovepi 29:21.

Fakamālō ki he ʻOtuá

Ko Sihova ko e ʻOtuá ʻa e Tokotaha-Foaki ʻo e “foaki lelei kotoabe moe foaki haohaoa kotoabe.” (Semisi 1:​17, PM) Ko e meʻaʻofa ʻo e moʻuí ʻoku tautefito ʻene mahuʻingá, he ko e meʻa kotoa pē ʻoku tau maʻú pe palaní nai ʻe hoko ia ʻo taʻeʻaonga kapau ʻe mole ʻa ʻetau moʻuí. ʻOku naʻinaʻi mai ʻa e ngaahi Konga Tohitapú kiate kitautolu ke tau manatuʻi “ko e matavai ʻo e moʻui ʻoku ʻia [Sihova ko e ʻOtuá].” (Sāme 36:​5, 7, 9; Ngāue 17:28) Ke fakatupu ha loto-houngaʻia ki he ʻOtuá, ʻoku fiemaʻu ke tau fakalaulauloto ki heʻene ngaahi tokonaki loto-fiefoaki ʻokú ne fakatolonga ʻetau moʻui fakamatelie mo fakalaumālié. (Sāme 1:​1-3; 77:​11, 12) Ko ha loto pehē te ne ueʻi kitautolu ke fakahā ʻa e houngaʻia ʻi he leá mo e tōʻongá.

Ko e lotú ko e founga mahino ia ʻe taha ke fakahaaʻiʻaki ʻetau houngaʻia ki he ʻOtuá. ʻOku fakahaaʻi ʻe he tokotaha-tohi-sāme ko Tēvitá: “ʻE Sihova ko hoku ʻOtua, kuo ke fakalahi hoʻo ngaahi ngaue mana, mo hoʻo ngaahi fakakaukau maʻa homau faʻahinga: ʻoku ʻikai lava hono faʻu hokohoko atu.” (Sāme 40:5) ʻOfa ke ueʻi meimei tatau pehē kitautolu.

Naʻe toe fakapapauʻi ʻe Tēvita ke fakahaaʻi ki he ʻOtuá ʻa ʻene houngaʻia ʻi he ngaahi lea ʻokú ne leaʻaki ki he niʻihi kehé. Naʻá ne pehē: “Te u fakamalo kia Sihova ʻaki hoku loto kotoa; te u aʻau kotoa hoʻo ngaahi ngaue mana.” (Sāme 9:1) ʻI he lea ki he niʻihi kehé fekauʻaki mo e ʻOtuá, ʻo fakahaaʻi kitautolu ʻaki ʻa e vahevahe atu kiate kinautolu ʻa e moʻoni mei heʻene Folofolá, ʻoku ngalingali ko e founga lelei taha ia ke fakahaaʻiʻaki kiate ia ʻa ʻetau houngaʻiá. Pea ʻe tokoniʻi kitautolu ʻe he meʻá ni ke toe houngaʻia lahi ange ai ʻi he ngaahi tafaʻaki kehe ʻo e moʻuí.

“Ko ia ʻoku ne feilaulau ʻaki ʻa e fakafetaʻi, ʻoku ne fai moʻoni hoku fakalangilangiʻi, pea ʻoku ne tofa ʻa e hala ke u fakaha ki ai, ʻa e fakamoʻui,” ko e folofola ia ʻa Sihová. ʻOfa ke mou aʻusia ʻa e fiefia ko ia ʻoku hoko mai mei hono fakahaaʻi ʻa hoʻomou houngaʻia fakamātoato kiate iá.​—Sāme 50:23; 100:2.

[Fakatātā ʻi he peesi 7]

Ko e moʻuí ko ha meʻaʻofa mei he ʻOtuá. Fakapapauʻi ke tānaki atu ki ai ha fakakaukau fakafoʻituitui