“Ko e Temipale” pea mo e “ʻEiki” he ʻAhó Ni

“Pea ʻe hu mai ʻa e ʻeiki ʻo e kakai fakataha mo kinautolu ʻi heʻenau hu mai, pea te nau hu ki tuʻa fakataha.”​—ISIKELI 46:10.

1, 2. Ko e hā ʻa e moʻoni tefito ʻokú ne tokoniʻi kitautolu ke vete ha konga lahi ʻo e ʻuhinga ʻo e vīsone ʻa ʻIsikeli ki he temipalé?

KO E kau lāpai ʻe niʻihi ʻo e kuonga muʻá naʻe ʻikai te nau fiemālie fakaʻaufuli ki he tohi ʻa ʻIsikelí. Fakatatau ki he Talamatá, ko e niʻihi ʻo kinautolu naʻe aʻu ʻo nau fakakaukau ke toʻo ʻa e tohí mei he ngaahi tohi ʻo e Ngaahi Konga Tohitapu Māʻoniʻoní. Naʻa nau maʻu ha taimi mātuʻaki faingataʻa ʻaupito fekauʻaki mo e vīsone ki he temipalé pea fakahaaʻi ʻoku fakalaka atu ia ʻi he mahino ʻa e tangatá. Kuo fakapuputuʻuʻi ʻa e kau mataotao faka-Tohitapu kehe ʻe he vīsone ʻa ʻIsikeli ki he temipale ʻo Sihová. Fēfē kitautolu?

² Talu mei hono toe fakafoki ʻo e lotu maʻá, kuo tāpuakiʻi ʻe Sihova hono kakaí ʻaki ʻa e ngaahi maama lahi ʻo e ʻilo fakalaumālié, ʻo kau ai ʻa e ʻiloʻilo fekauʻaki mo e temipale fakalaumālie ʻo e ʻOtuá​—ʻa e fokotuʻutuʻu ʻa Sihova ki he lotu maʻá.a Ko e moʻoni tefito ko ení ʻokú ne tokoniʻi kitautolu ke vete ha konga lahi ʻo e ʻuhinga ʻo e vīsone ʻa ʻIsikeli ki he temipalé. Tau vakai fakalelei angé ki he ngaahi tafaʻaki ʻe fā ʻo e vīsone ko ení​—ko e temipalé, ko e kau taulaʻeikí, ko e ʻeikí, pea mo e fonuá. Ko e hā ʻa e ʻuhinga ʻo e ngaahi meʻá ni he ʻaho ní?

Ko e Temipalé mo Koe

 3. Ko e hā ʻoku tau ako mei he ʻaofi māʻolungá mo e ngaahi tātongitongi ʻi he ngaahi hūʻanga ki he temipalé?

³ Fakaʻuta atu angé ʻoku fakaʻeveʻevaʻi kitautolu ʻi he temipale fakaevīsone ko ení. ʻOku tau fakaofiofi atu ʻo kaka hake ʻi ha sitepu ʻe fitu ki he taha ʻo e ngaahi fuʻu matapā lalahí. ʻI loto ʻi he hūʻanga ko ení, ʻoku tau hanga hake ʻi he ofoofo. Ko hono ʻaofí ʻoku laka hake ia he mita ʻe 30 ʻi ʻolunga ʻiate kitautolu! ʻOku fakamanatu mai ai kiate kitautolu ko e ngaahi tuʻunga ki he hū ki he fokotuʻutuʻu ʻa Sihova ki he lotú ʻoku māʻolunga. Ko e ngaahi hueloʻi maama mei he ngaahi matapā sioʻatá ʻokú ne fakamāmaʻi ʻa e ngaahi tātongitongi ʻo e ʻulu paame he holisí, ʻa ia naʻe ngāueʻaki ʻi he ngaahi Konga Tohitapú ke fakatātaaʻi ʻa e faitotonú. (Sāme 92:12; Isikeli 40:​14, 16, 22) Ko e feituʻu toputapu ko ení ʻoku maʻá e faʻahinga ko ia ʻoku faitotonu fakaeʻulungaanga mo fakalaumālié. ʻI he fehoanakimālie mo iá, ʻoku tau loto ke nofo faitotonu ai pē koeʻuhi kae ala tali ʻe Sihova ʻetau lotú.​—Sāme 11:7.

 4. Ko hai ʻoku ʻikai ngofua ke hū ki he temipalé, pea ko e hā ʻoku akoʻi mai kiate kitautolu ʻi he meʻá ni?

⁴ ʻI he ongo tafaʻaki taki taha ʻo e halá, ʻoku ʻi ai ʻa e ngaahi loki kaʻate ʻe tolu. ʻE fakaʻatā kitautolu ʻe he kau kaʻaté ki he loto temipalé? Naʻe tala ʻe Sihova kia ʻIsikeli ʻe ʻikai ha taha muli ʻa ia ʻoku “taʻekamu hono loto” ʻe lava ke hū. (Isikeli 40:10; 44:9) Ko e hā ʻa e ʻuhinga ʻo iá? ʻOku tali ʻe he ʻOtuá ke hoko ko ʻene kau lotu ʻa e faʻahinga pē ko ia ʻoku ʻofa ki heʻene ngaahi laó mo moʻui fakatatau ki aí. (Selemaia 4:4; Loma 2:29) ʻOkú ne talitali lelei ʻa e faʻahinga peheé ki hono tēniti fakalaumālié, ʻa hono fale faiʻanga lotú. (Sāme 15:​1-5) Talu pē mei hono toe fakafoki mai ʻo e lotu maʻá ʻi he 1919, mo hono poupouʻi mo fakamaʻalaʻala fakalakalaka ʻe he kautaha fakaemāmani ʻa Sihová ʻa ʻene ngaahi lao fakaeʻulungāngá. Ko kinautolu ko ia ʻoku nau fakafisi loto-lelei ke talangofuá ʻoku ʻikai kei talitali lelei kinautolu ke feohi mo ʻene kakaí. ʻI he ʻahó ni, ko e tōʻongafai makatuʻunga faka-Tohitapu ʻo hono kapusi ʻa e kau faihala taʻefakatomalá kuo ngāue ia ke tauhi ʻetau founga-lotú ke maʻa mo ʻasinisini.​—1 Kolinito 5:13.

 5. (a) Ko e hā ʻa e ngaahi faitatau ʻoku ʻi ai ʻi he vīsone ʻa ʻIsikelí mo e vīsone ʻa Sione naʻe hiki ʻi he Fakahā 7:​9-​15? (e) ʻI he vīsone ʻa ʻIsikelí, ko hai ʻoku fakatātaaʻi ʻe he matakali ʻe 12 ʻoku nau lotu ʻi he lotoʻā ʻi tuʻá?

⁵ ʻOku hoko atu ʻa e halá ki he lotoʻā ʻi tuʻá, ʻa ia ʻoku lotu mo fakahīkihikiʻi ai ʻe he kakaí ʻa Sihova. ʻOku fakamanatu mai ʻe he meʻá ni kiate kitautolu ʻa e vīsone ʻa e ʻapositolo ko Sioné fekauʻaki mo e “fuʻu kakai lahi” ʻoku nau lotu kia Sihova “ʻi hono temipale ʻi he ʻaho mo e po.” ʻOku hā ʻa e ʻulu paame ʻi he ongo vīsoné fakatouʻosi. ʻI he vīsone ʻa ʻIsikelí ʻoku teuteuʻiʻaki kinautolu ʻa e ngaahi holisi ʻo e hala hūʻangá. ʻI he vīsone ʻa Sioné ʻoku toʻo ʻe he kau lotú ʻa e ngaahi vaʻa paame ʻi honau nimá, ʻi hono fakaʻilongaʻi ʻenau fiefia ʻi hono fakahīkihikiʻi ʻo Sihová, pea ʻi hono talitali lelei ʻa Sīsū ko honau Tuʻí. (Fakahā 7:​9-​15) ʻI he potu tohi ʻo e vīsone ʻa ʻIsikelí, ko e matakali ʻe 12 ʻo ʻIsilelí ʻokú ne fakatātaaʻi ʻa e “fanga sipi kehe.” (Sione 10:16; fakafehoanaki mo Luke 22:​28-​30.) Ko e taha koe ʻo e faʻahinga ko ia ʻoku nau maʻu ʻa e fiefia ʻi hono fakahīkihikiʻi ʻo Sihova ʻaki ʻa e fanongonongo atu hono Puleʻangá?

 6. Ko e hā ʻa e taumuʻa ʻo e ngaahi loki kai ʻi he lotoʻā ʻi tuʻá, pea ko e hā ʻa e monū ʻe fakamanatu nai ʻe he meʻá ni ki he faʻahinga ko ia ʻo e fanga sipi kehé?

⁶ ʻI heʻetau ʻeveʻeva ʻi he lotoʻā ʻi tuʻá, ʻoku tau sio ai ki he ngaahi loki kai ʻe 30 ʻa ia ʻoku maʻu ʻinasi ai ʻa e kakaí mei heʻenau ngaahi feilaulau loto-fiefoakí. (Isikeli 40:17) ʻI he ʻahó ni, ko e faʻahinga ko ia ʻo e fanga sipi kehé ʻoku ʻikai te nau fai ha ngaahi feilaulau monumanu, ka ʻoku ʻikai te nau haʻu mola pē ki he temipale fakalaumālié. (Fakafehoanaki mo Ekisoto 23:15.) Naʻe tohi ʻa e ʻapositolo ko Paulá: “Ke tau ʻatu ʻiate ia pe [Sīsū], maʻu ai pe, ha feilaulau fakafetaʻi ki he ʻOtua, ʻa é ko e fua ʻo e loungutu ʻoku takua hono huafa. Kaeʻumaʻā, ʻoua naʻa ngalo ʻa e fai ʻofa mo e fai tokoni: he ko e alā feilaulau pehe ʻoku hohóʻia ai ʻa e ʻOtua.” (Hepelu 13:​15, 16; Hosea 14:2) Ko ha monū lahi ia ke ʻoatu kia Sihova ha ngaahi feilaulau pehē.​—Palovepi 3:​9, 27.

 7. Ko e hā ʻoku fakapapauʻi mai kiate kitautolu ʻi hono fua ʻo e temipalé?

⁷ ʻOku mamata ʻa ʻIsikeli ʻi hono fua ʻe ha ʻāngelo ʻa e temipale fakaevīsone ko ení. (Isikeli 40:3) ʻI he tuʻunga meimei tatau, naʻe tala ai ki he ʻapositolo ko Sioné: “Tuʻu ʻo fua ʻa e Temipale ʻo e ʻOtua, mo e olita, mo kinautolu ʻoku nau fai ai ʻenau lotu.” (Fakahā 11:1) Ko e hā ʻa e ʻuhinga ʻo e fua ko ení? ʻI he ongo tuʻungá fakatouʻosi ʻoku ngāue moʻoni eni ko ha fakapapauʻiʻanga, ko ha fakaʻilonga ʻe ʻikai ha meʻa ʻe lava ke ne taʻofi ʻa Sihova mei hono fakahoko ʻo ʻene ngaahi taumuʻa fekauʻaki mo e lotu maʻá. Hangē pē ko e ʻaho ní, te tau fakapapauʻi nai ʻe ʻikai ha meʻa​—naʻa mo ha fakafepaki anga-kakaha mei he ngaahi puleʻanga mālohí​—ʻe lava ke ne taʻofi ʻa hono toe fakafoki ʻo e lotu maʻá.

 8. Ko hai ʻoku hū ʻi he ngaahi matapaá ki he lotoʻā ʻi lotó, pea ko e hā ʻoku fakamanatu mai kiate kitautolu ʻe he ngaahi matapā ko ení?

⁸ ʻI heʻetau kolosi atu ʻi he lotoʻā ʻi tuʻá, te tau sio ai ʻoku ʻi ai ʻa e matapā ʻe tolu ʻoku fou atu ai ki he lotoʻā ʻi lotó; ko e ngaahi matapā ʻi lotó ʻoku nau laine taha pea lahi tatau mo e ngaahi matapā ʻi tuʻá. (Isikeli 40:​6, 20, 23, 24, 27) Ko e kau taulaʻeikí pē ʻe lava ke nau hū ki he lotoʻā ʻi lotó. Ko e ngaahi matapā ʻi lotó ʻokú ne fakamanatuʻi mai kiate kitautolu ko e kau paní kuo pau ke nau aʻusia ʻa e ngaahi tuʻunga mo e ngaahi lao ʻa e ʻOtuá, ka ko e ngaahi tuʻunga mo e ngaahi lao tatau ia ʻokú ne tataki ʻa e kau Kalisitiane moʻoní kotoa. Ka ko e hā ʻa e ngāue ʻa e kau taulaʻeikí, pea ko e hā hono ʻuhinga ʻi he ʻaho ní?

Ko ha Kau Taulaʻeiki Anga-Tonu

9, 10. Kuo anga-fēfē hono tokonaki mai ʻe he “tuʻunga taulaʻeiki fakatuʻi,” hangē ko ia naʻe tomuʻa fakatātaaʻi ʻe he kalasi taulaʻeiki ʻi he vīsone ʻa ʻIsikelí, ʻa e fakahinohino fakalaumālié?

⁹ ʻI he kuonga ki muʻa he Kalisitiané, naʻe fai ʻe he kau taulaʻeikí ʻa e ngāue mālohi ʻi he temipalé. Ko hono tāmateʻi ʻo e fanga monumanu feilaulaú, feilaulauʻi kinautolu ʻi he ʻōlitá, pea mo hono tauhi ʻo e kaungātaulaʻeikí mo e kakaí ko ha ngāue fiemaʻu ivi fakaesino ia. Ka naʻe ʻi ai ʻenau ngāue mahuʻinga kehe. Naʻe tuʻutuʻuni ʻa Sihova fekauʻaki mo e kau taulaʻeikí: “Te nau ako ki hoku kakai ʻa e meʻa ʻoku tapu mo e meʻa ʻoku taʻetapu, pea ke nau ʻilo ʻa e meʻa ʻoku taʻemaʻa mo e meʻa ʻoku maʻa.”​—Isikeli 44:23; Malakai 2:7.

¹⁰ ʻOkú ke houngaʻia ʻi he ngāue mālohi mo anga-fakatōkilalo ko ia kuo fai ʻi he tuʻunga ko ha kulupu ʻe he kau paní, “ko e tuʻunga taulaʻeiki fakatuʻi,” koeʻuhi ko e lotu maʻá? (1 Pita 2:9) Hangē pē ko e kau taulaʻeiki Līvai ʻo e kuonga muʻá, kuo nau takimuʻa ʻi hono fai ʻa e fakahinohino fakalaumālié, ʻo tokoniʻi ʻa e kakaí ke mahino kiate kinautolu ʻa e meʻa ʻoku maʻa mo fakahōifua ʻi he vakai mai ʻa e ʻOtuá mo ia ʻoku ʻikaí. (Mātiu 24:45) Ko e fakahinohino peheé, ʻa ia ʻoku haʻu ʻo fakafou mai ʻi he ngaahi tohi makatuʻunga he Tohitapú mo e ngaahi fakataha mo e fakataha-lahi faka-Kalisitiané, kuó ne tokoniʻi ai ʻa e laui miliona ke hoko ʻo fakalelei mo e ʻOtuá.​—2 Kolinito 5:20.

11. (a) Naʻe anga-fēfē hono fakamamafaʻi ʻi he vīsone ʻa ʻIsikelí ʻa e mahuʻinga ʻo e tuʻunga maʻá ʻi he tafaʻaki ʻa e kau taulaʻeikí? (e) ʻI he ngaahi ʻaho fakaʻosí, kuo anga-fēfē hono fakamaʻa ʻo e kau paní ʻi ha ʻuhinga fakalaumālie?

¹¹ Kae kehe, kuo pau ke fai ʻe he kau taulaʻeikí ʻa e meʻa lahi ange ia ʻi hono akoʻi pē ʻa e niʻihi kehé ke hoko ʻo maʻá; kuo pau ke nau maʻa mo kinautolu. Ko ia ai, naʻe tomuʻa sio ʻa ʻIsikeli ki ha founga hono sivi ʻo e kau taulaʻeiki ʻo ʻIsilelí. (Isikeli 44:​10-​16) ʻI he tuʻunga meimei tatau, ʻoku fakahaaʻi ʻe he hisitōliá ʻi he 1918, naʻe ʻafio mai ʻa Sihova “ko e [tokotaha] sivi” ʻi hono temipale fakalaumālié, ʻo vakaiʻi ʻa e kalasi taulaʻeiki paní. (Malakai 3:​1-5) Ko kinautolu ko ia ne fakamāuʻi ʻoku nau maʻa fakalaumālié pe kuo nau fakatomala ʻi he tauhi ʻaitoli ki muʻá naʻe fakangofua ke hokohoko atu ʻi he monū ko ia ko e ngāue ʻi hono temipale fakalaumālié. Neongo ia, hangē ko e tokotaha kotoa pē, ʻoku lava ke hoko ʻa e faʻahinga tāutaha paní ʻo taʻemaʻa​—fakalaumālie mo fakaeʻulungaanga. (Isikeli 44:​22, 25-​27) Naʻe pau ke nau ngāue mālohi ke nofoʻaki ‘taʻeha ʻila mei he mamaní.’​—Semisi 1:​27; fakafehoanaki mo Maake 7:​20-​23.

12. Ko e hā ʻoku totonu ai ke tau houngaʻia ʻi he ngāue ʻa e kau paní?

¹² Ko kitautolu taki taha te tau ʻeke nai, ‘ʻOku ou houngaʻia he faʻifaʻitakiʻanga kuo fokotuʻu ʻe he kau paní he ngaahi taʻu lahi ko ia ʻo ʻenau ngāue anga-tonú? ʻOku ou faʻifaʻitaki ki heʻenau tuí?’ ʻOku lelei ki he faʻahinga ko ia ʻo e fuʻu kakai lahí ke manatuʻi ʻe ʻikai te nau maʻu maʻu pē ʻa e kau paní ʻiate kinautolu ʻi heni ʻi māmani. Fekauʻaki mo e kau taulaʻeiki ʻi he vīsone ʻa ʻIsikelí, naʻe pehē ʻe Sihova: “ʻE ʻikai te mou vahe hanau ʻapi to [ʻo e fonuá] ʻi Isileli: ko au pe honau ʻapi to.” (Isikeli 44:28) ʻI he tuʻunga meimei tatau, ʻoku ʻikai ha nofoʻanga taʻengata ʻo e kau paní ʻi māmani. ʻOku nau maʻu ha tofiʻa fakahēvani, pea ko e faʻahinga ko ia ʻo e fuʻu kakai lahí ʻoku nau vakai ki ai ko ha monū ia ke poupouʻi mo fakalotolahiʻi kinautolu lolotonga ʻenau kei heni ʻi māmaní.​—Mātiu 25:​34-​40; 1 Pita 1:​3, 4.

Ko e ʻEikí​—Ko Hai Ia?

13, 14. (a) Ko e hā kuo pau ai ko e ʻeikí ʻoku mei he fanga sipi kehé? (e) Ko hai ʻoku fakatātaaʻi ʻe he ʻeikí?

¹³ Sai, ʻoku malanga hake ai ha foʻi fehuʻi mahuʻinga. Ko hai leva ʻoku fakafofongaʻi ʻe he ʻeikí? Koeʻuhi he ʻoku lau kiate ia fakatouʻosi ko ha tokotaha tāutaha pea ko ha kulupu, te tau pehē nai ʻokú ne fakafofongaʻi ha kalasi ʻo e kau tangata. (Isikeli 44:3; 45:​8, 9) Ka ko hai? Ko e moʻoni ʻoku ʻikai ko e kau paní ia. ʻI he vīsoné, ʻokú ne ngāue vāofi mo e kau taulaʻeikí, ka ʻoku ʻikai ko ha taha ia ʻo kinautolu. ʻI he ʻikai tatau mo e kalasi taulaʻeikí, ʻoku foaki ange kiate ia ha tofiʻa ʻi he fonuá pea ko ia ai, ʻoku ʻi ai hono kahaʻu ʻi heni he māmaní, ʻikai ʻi hēvani. (Isikeli 48:21) ʻIkai ko ia pē, ʻoku pehē ʻe he Isikeli 46:10: “Pea ʻe hu mai ʻa e ʻeiki ʻo e kakai fakataha mo kinautolu [ko e ngaahi matakali ʻikai taulaʻeikí] ʻi heʻenau hu mai [ki he lotoʻā ʻi tuʻa ʻo e temipalé], pea te nau hu ki tuʻa fakataha.” ʻOku ʻikai te ne hū ki he lotoʻā ʻi lotó ka ʻoku lotu ʻi he lotoʻā ʻi tuʻá, ʻo hū ki loto mo hū ki tuʻa ʻi he temipalé fakataha mo e kakaí. Ko e ngaahi meʻa tefito ko ení ʻokú ne fokotuʻu mahino ai ʻa e ʻeikí ʻi he lotolotonga ʻo e fuʻu kakai lahi ʻo e fanga sipi kehé.

¹⁴ ʻOku hā mahino ʻoku ʻi ai ha kiʻi fatongia ʻo e ʻeikí he lotolotonga ʻo e kakai ʻa e ʻOtuá. ʻI he lotoʻā ʻi tuʻá, ʻokú ne tangutu ʻi he hūʻanga ʻo e Matapā Hahaké. (Isikeli 44:​2, 3) ʻOku fakahaaʻi leva ʻe he meʻá ni ha tuʻunga ʻo e leʻo, meimei tatau mo ia ʻi he kau tangata taʻumotuʻa ʻi ʻIsilelí, ʻa ia naʻa nau tangutu ʻi he matapā ʻo e koló ʻo fai ʻa e fakamāú. (Lute 4:​1-​12; Palovepi 22:22) Ko hai ʻi he lotolotonga ʻo e fanga sipi kehé ʻoku nau fai ʻa e ngaahi ngāue leʻo he ʻaho ní? Ko e kau mātuʻa ʻoku nau maʻu ʻa e ʻamanaki fakaemāmaní ʻa ia kuo fakanofo ʻe he laumālie māʻoniʻoní. (Ngāue 20:28) Ko ia, ko e kalasi ʻeikí ʻoku teuʻi atu kinautolu he taimí ni mo e ʻamanaki ke ngāue ʻamui ange ʻi ha fatongia fakaepule ʻi he māmani foʻoú.

15. (a) ʻOku anga-fēfē hono fakamaama ʻe he vīsone ʻa ʻIsikelí ʻa e vahaʻangatae ʻi he vahaʻa ʻo e kau mātuʻa ʻoku nau ʻi he fuʻu kakai lahí mo e kalasi taulaʻeiki paní? (e) Ko e hā ʻa e takimuʻa kuo fai ʻe he kau mātuʻa paní ʻi he kautaha fakaemāmani ʻa e ʻOtuá?

¹⁵ Neongo ia, ko e hā ʻa e vahaʻangatae he ʻahó ni ʻi he vahaʻa ʻo e kalasi taulaʻeiki paní mo e kau tangata taʻumotuʻa pehē, ʻa ia, ʻi honau tuʻunga ko e konga ʻo e fuʻu kakai lahí, ʻoku nau ngāue ʻi he ngaahi tuʻunga tauhí? ʻOku fakahā mai he vīsone ʻa ʻIsikelí ko e kau mātuʻa ʻa ia ko e kau mēmipa ʻo e fuʻu kakai lahí ʻoku nau maʻu ha ngafa tokoni mo puleʻia, lolotonga ia ko e kau paní ʻoku nau fai ʻa e taki fakalaumālié. ʻO anga-fēfē? Manatuʻi, ko e kau taulaʻeiki ʻi he vīsoné naʻe ʻoange kiate kinautolu ʻa e fatongia ke fakahinohinoʻi ʻa e kakaí ʻi he ngaahi meʻa fakalaumālié. Naʻe toe tala foki kiate kinautolu ke nau ngāue ko ha kau fakamaau ʻi he ngaahi keisi fakalaó. Tānaki atu ki ai, naʻe vaheʻi ki he kau Līvaí ke “leʻo” ʻi he ngaahi matapā ʻo e temipalé. (Isikeli 44:​11, 23, 24) ʻOku hā mahino, naʻe pau ke fakamoʻulaloa ʻa e ʻeikí ki he ngaahi ngāue fakalaumālie mo e tuʻunga taki ʻa e kau taulaʻeikí. ʻOku feʻungamālie leva, ʻi he kuonga ʻo onopōní kuo takimuʻa ai ʻa e kau paní ʻi he lotu maʻá. Ko e fakatātaá, ko e kau mēmipa ʻo e Kulupu Pule ʻo e Kau Fakamoʻoni ʻa Sihová kuo fili mei honau lotolotongá. Ko e kau mātuʻa pani anga-tonu peheé kuo nau akoʻi ʻa e kalasi ʻeiki tupulekiná ni ʻi he laui hongofuluʻi taʻu, ʻi hono teuʻi ʻa e kau mēmipa ʻamanekina ʻo e kalasi ko ení ki he ʻaho ʻa ia te nau fakahoko ai honau tuʻunga kakato ʻo e mafaí ʻi he māmani foʻou ʻa e ʻOtuá ka hoko maí.

16. Fakatatau ki he Aisea 32:​1, 2, kuo pau ke ngāue fēfē ʻa e kotoa ʻo e kau mātuʻá?

¹⁶ Ko e faʻahinga ʻovasia fēfē, ʻa e kau mēmipa ʻamanekina ko ení, ʻa ia ʻoku nau teu atu ki he ngaahi fatongia fakalahi ʻi he tuʻunga ko e kalasi ʻeikí? Ko e kikite ʻoku ʻi he Aisea 32:​1, 2 ʻoku pehē: “Vakai ʻe pule maʻoniʻoni ha tuʻi; pea ko e meʻa ki he houʻeiki te nau fai ʻenau pule ʻo tāu mo e konisitutone. Pea ʻilonga ha ʻeiki, te ne hange ha fakaū mei he matangi, mo e toitoiʻanga mei he ʻalotamaki; hange ko e ngaahi mangaʻi vai ʻi ha potu momoa, hange ko e malu ʻo ha makatuʻu kafakafa ʻi ha fonua puhengia.” Ko e kikité ni ʻoku lolotonga fakahoko ia he ʻahó ni ʻi he kau mātuʻa Kalisitiané​—kau paní mo e fanga sipi kehé​—heʻenau ngāue ke maluʻi ʻa e tākangá mei he “ʻalotamaki” ko ia hangē ko e fakatangá mo e fakalotosiʻí.

17. ʻOku totonu ke anga-fēfē ʻa e vakai ʻa e kau tauhi-sipi Kalisitiané kiate kinautolú, pea ʻoku totonu ke anga-fēfē ʻa e vakai ʻa e tākangá kiate kinautolú?

¹⁷ Ko e ongo foʻi lea ko e “pilinisi” mo e “ʻeiki,” ʻa ia ʻokú na ʻuhinga meimei tatau ʻi he faka-Hepeluú, ʻoku ʻikai ke ngāueʻaki ia ko ha ongo hingoa fakalakanga kuo faʻufaʻu ke hakeakiʻiʻaki ʻa e tangatá. ʻI hono kehé, ʻokú na fakamatalaʻi ʻa e fatongia ʻoku fua ʻe he kau tangatá ni ʻi hono tokangaʻi ʻa e fanga sipi ʻa e ʻOtuá. ʻOku fakatokanga mālohi ʻa Sihova: “ʻA e houʻeiki Isileli, maʻuā muʻa, ʻo tuku hoʻomou fai fakamalohi, mo fakaehaua, pea mou fai ki he konisitutone mo e totonu.” (Isikeli 45:9) ʻOku lelei ki he kau mātuʻa kotoa pē ʻi he ʻaho ní ke nau tukulotoʻi ʻa e akonaki ko iá. (1 Pita 5:​2, 3) Ko e tākangá leva ʻoku nau ʻiloʻi kuo tokonaki mai ʻe Sīsū ʻa e kau tauhi-sipi ko e “meʻaʻofa ki he tangata.” (Efeso 4:8) Ko honau ngaahi tuʻunga tāú ʻoku fokotuʻu ia ʻi he folofola fakamānavaʻi ʻa e ʻOtuá. (1 Timote 3:​1-7; Taitusi 1:​5-9) Ko ia ai, ʻoku muimui ʻa e kau Kalisitiané ʻi he takimuʻa ʻa e kau mātuʻá.​—Hepelu 13:7.

18. Ko e hā ʻa e ngaahi fatongia ʻe niʻihi ʻo e kalasi ʻeiki ʻoku ʻamanekiná he taimí ni, pea ko e hā ʻa hono fatongia ki he kahaʻú?

¹⁸ ʻI he kuonga ʻo e Tohitapú naʻe maʻu ʻe he ngaahi ʻeiki ʻe niʻihi ʻa e tuʻunga mafai lahi, pea siʻi ʻa e niʻihi. ʻI he ʻahó ni, ko e kau mātuʻa ʻo e fuʻu kakai lahí ʻoku nau maʻu ʻa e ngaahi fatongia lahi kehekehe. ʻOku ngāue ʻa e niʻihi ʻi he fakatahaʻanga ʻe taha; ʻoku ngāue ʻa e niʻihi ʻi he ngaahi fakatahaʻanga lahi ko e kau ʻovasia fefonongaʻaki; ʻoku ngāue ʻa e niʻihi kehe ʻi he kotoa ʻo e ngaahi fonuá ko e kau mēmipa ʻo e Kōmiti Vaʻá; ko e niʻihi ʻoku nau tokoni fakahangatonu ki he ngaahi kōmiti kehekehe ʻo e Kulupu Pulé. ʻI he māmani foʻoú, ʻe fokotuʻu ai ʻe Sīsū ʻa e “kau pilinisi ʻi he kotoa ʻo e māmaní” ke nau takimuʻa ʻi he lotolotonga ʻo e kau lotu ʻa Sihova ʻi māmaní. (Sāme 45:​16, NW) ʻOku ʻikai ha veiveiua te ne fili ʻa e tokolahi ʻo e faʻahingá ni mei he lotolotonga ʻo e kau mātuʻa anga-tonu ʻo e ʻaho ní. Koeʻuhi ko e kau tangatá ni ʻoku nau fakamoʻoniʻi kinautolu he taimí ni, te ne fili ke fakafatongiaʻaki ʻa e tokolahi ʻa e ngaahi monū lahi ange ʻi he kahaʻú ʻi heʻene fakaeʻa ʻa e ngafa ʻo e kalasi ʻeikí ʻi he māmani foʻoú.

Ko e Fonua ʻo e Kakai ʻa e ʻOtuá he ʻAho Ní

19. Ko e hā ʻoku fakafofongaʻi ʻe he fonua ʻi he vīsone ʻa ʻIsikelí?

¹⁹ ʻOku toe fakatātaaʻi ʻi he vīsone ʻa ʻIsikelí ʻa e fonua ʻo ʻIsileli naʻe toe fakafokí. Ko e hā ʻoku fakafofongaʻi ʻe he tafaʻaki ko eni ʻo e vīsoné? Ko e ngaahi kikite kehe ʻo e toe fakafokí, naʻe tomuʻa tala ai ko e fonuá, ʻa ʻIsileli, ʻe hoko ia ko ha palataisi ʻo hangē ko ʻĪtení. (Isikeli 36:​34, 35) ʻI he ʻahó ni, ʻoku tau fiefia ʻi ha “fonua” kuo toe fakafoki, pea ʻoku faka-ʻĪteni mo ia foki ʻi ha tuʻunga. ʻI ha tuʻunga meimei tatau, ʻoku tau faʻa lea fekauʻaki mo hotau palataisi fakalaumālié. Kuo fakaʻuhingaʻi ʻe he Taua Leʻo hotau “fonua” ʻi he tuʻunga “ko e nofoʻanga ʻo e ngāue” ʻo e kakai fili ʻa e ʻOtuá.b Ko fē pē ha feituʻu ʻe ʻi ai nai ha sevāniti ʻa Sihova, ʻokú ne ʻi he fonua ko ia kuo toe fakafokí kehe pē ʻokú ne feinga ke poupouʻi ʻa e lotu moʻoní ʻaki ʻene ʻaʻeva ʻi he topuvaʻe ʻo Kalaisi Sīsuú.​—1 Pita 2:21.

20. Ko e hā ʻa e tefitoʻi moʻoni ʻoku tau ako nai mei he “meʻaʻofa māʻoniʻoni” ʻi he vīsone ʻa ʻIsikelí, pea ʻe anga-fēfē nai ʻetau ngāueʻaki ʻa e tefitoʻi moʻoni ko ení?

²⁰ Fēfē leva ʻa e konga fonua naʻe ui ko e “meʻaʻofa māʻoniʻoní”? Ko e meʻaʻofa eni ʻa e kakaí ki hono poupouʻi ʻo e kau taulaʻeikí mo e koló. ʻI he tuʻunga meimei tatau, “ko e kakai kotoa ʻo e fonua” naʻe pau ke nau meʻaʻofaʻaki ha konga ʻo e fonuá maʻá e ʻeikí. Ko e hā hono ʻuhinga ʻo e meʻá ni ʻi he ʻahó ni? Ko e moʻoni, ʻoku ʻikai pehē ia ko e kakai ʻa e ʻOtuá ʻoku totonu ke fakakavengaʻaki ha kalasi haʻa faifekau maʻu vāhenga. (2 Tesalonaika 3:8) Ka, ko e poupou ʻoku foaki ki he kau mātuʻá ʻoku fakatefito fakalaumālie ia. ʻOku kau ki ai ʻa e tokoni ʻi he ngāue lolotongá mo fakahāhā ha laumālie fāitaha mo anganofo. Kae kehe, hangē ko ia ʻi he ʻaho ʻo ʻIsikelí, ko e meʻaʻofa ko ení ʻoku fai ia “kia Sihova,” ʻikai ki ha tangata pē.​—Isikeli 45:​1, 7, 16, NW.

21. Ko e hā nai ʻoku tau ako mei hono vahevahe ʻo e fonuá ʻi he vīsone ʻa ʻIsikelí?

²¹ ʻOku ʻikai ko e ʻeikí pē mo e kau taulaʻeiki kuo vaheʻi ange ki ai ʻa e ngaahi nofoʻanga ʻi he fonua ko eni ne toe fakafokí. Ko hono vahevahe ʻo e fonuá ʻoku hā ai ko e matakali taki taha ʻi he matakali ʻe 12 ʻoku ʻi ai hono tofiʻa malu. (Isikeli 47:​13, 22, 23) Ko ia, ko e faʻahinga ko ia ʻo e fuʻu kakai lahí ʻoku ʻikai ngata pē ʻi heʻenau maʻu ha nofoʻanga ʻi he palataisi fakalaumālie he ʻaho ní ka te nau toe maʻu foki ha konga fonua kuo vaheʻi ange ʻi he taimi te nau maʻu ai ha nofoʻanga ʻi he feituʻu fakaemāmani ʻo e Puleʻanga ʻo e ʻOtuá.

22. (a) ʻOku fakafofongaʻi ʻe he kolo ʻi he vīsone ʻa ʻIsikelí ʻa e hā? (e) Ko e hā nai ʻoku tau ako mei he maʻu ʻe he koló ʻa e ngaahi matapā ʻi hono ngaahi tafaʻakí kotoa?

²² Fakaʻosí, ko e hā ʻoku fakafofongaʻi ʻe he kolo ʻi he vīsoné? ʻOku ʻikai ko ha kolo fakahēvani ia, he ʻoku tokoto ia he lotolotonga ʻo e fonua “ngofua” (taʻetoputapú). (Isikeli 48:​15-​17) Ko ia kuo pau pē ko e meʻa fakaemāmani ia. Sai, ko e hā ʻa e koló? ʻIkai ʻokú ne fakahaaʻi ʻa e fakakaukau ʻo ha kakai ʻoku nau fakatahataha ko ha kulupu ʻo fokotuʻu ha meʻa kuo faʻufaʻu mo fokotuʻutuʻu maau? ʻIo. Ko ia ai, ʻoku hā ʻoku fakatātaaʻi ʻe he koló ʻa e tuʻunga puleʻi fakaemāmani ʻa ia ʻoku ʻaonga ki he faʻahinga kotoa ʻa ia ʻe faʻuʻaki ʻa e sōsaieti fakaemāmani māʻoniʻoní. ʻE ngāue ia ʻi hono tuʻunga kakató ʻi he “fonua foʻou” ka hoko maí. (2 Pita 3:13) Ko e ngaahi matapā ʻo e koló ʻi he ngaahi tafaʻakí kotoa, ko e taha maʻá e matakali taki taha, ʻokú ne fakatātaaʻi lelei ʻa e taʻefakapulipuli. ʻI he ʻahó ni, ko e kakai ʻa e ʻOtuá ʻoku ʻikai te nau ʻi ha malumalu ʻo ha founga puleʻi fakapulipuli, mo fakafufū. Ko e fanga tokoua fua fatongiá kuo pau ke nau fotungofua; ko e ngaahi tefitoʻi moʻoni ʻokú ne tataki kinautolú ʻoku ʻiloa ia ʻe he tokotaha kotoa. Ko e moʻoniʻi meʻa ko ia ko e kakai mei he matakali kotoa pē ʻoku nau ngoueʻi ʻa e fonua ko ia ʻokú ne poupouʻi ʻa e koló ʻokú ne fakamanatu mai kiate kitautolu, ko e fanga sipi kehé ʻoku nau poupouʻi, naʻa mo e ʻi ha founga fakamatelie, ʻa e ngaahi fokotuʻutuʻu fakaepuleʻi kuo fai maʻá e kakai ʻa e ʻOtuá ʻi māmani lahí.​—Isikeli 48:​19, 30-​34.

23. Ko e hā te tau vakai ki ai ʻi he kupu hoko maí?

²³ Ko ia, ko e hā leva ʻa e vaitafe ʻoku tafe mai mei he feituʻu toputapu ʻo e temipalé? Ko e hā ʻokú ne fakafofongaʻi ia he ʻaho ní pea aʻu atu ai ki he kahaʻú, ko e tuʻunga-lea ia ʻo e kupu hono tolu mo e fakaʻosi ʻi he ngaahi kupu hokohoko ko ení.

[Fakamatala ʻi lalo]

◻ Ko e hā ʻoku fakatātaaʻi ʻe he temipale ʻi he vīsone ʻa ʻIsikelí?

◻ Ko hai ʻoku fakatātaaʻi ʻe he kau taulaʻeiki ʻoku nau ngāue ʻi he temipalé?

◻ Ko e hā ʻa e kalasi ʻeikí, pea ko e hā ʻa e niʻihi ʻo hono ngaahi fatongiá?

◻ Ko e hā ʻa e fonua ʻi he vīsone ʻa ʻIsikelí, pea ʻi he ʻuhinga fē ʻoku vahevahe ai ki he matakali ʻe 12?

◻ Ko e hā ʻoku fakatātaaʻi ʻe he koló?

[Fehuʻi ki he Ako]

[Taiakalami/Mape ʻi he peesi 15]

(Ki he fakamatala kuo fokotuʻú, sio ki he tohi)

Ko e vahevahe ʻo e fonuá hangē ko ia naʻe fakamatalaʻi ʻi he vīsone ʻa ʻIsikelí

KO E MATAKALI ʻE TAHAUÁ

Ko e Tahi Lahí

Tahi ʻo Kālelí

Vaitafe Sioataní

Tahi Māsimá

TANI

ʻASA

NAFITALAI

MANASE

ʻIFALEMI

LŪPENI

SIUTA

KO E ʻEIKÍ

PENISIMANI

SIMIONE

ʻĪSAKA

SEPULONI

KATA

[Taiakalami]

FAKALAHI ʻO E MEʻAʻOFA MĀʻONIʻONÍ

A. “Sihova Tonu ʻOkú Ne ʻI Ai” (Sihova-Sama); E. fonua mahu ʻo e koló

Konga ʻo e Kau Līvaí

Potu Toputapu ʻo Sihová

Konga ʻo e Kau Taulaʻeikí

E A E