Kumi kia Sihova ʻAki ha Loto Kuo Mateuteu

KO E taulaʻeiki ʻIsileli ko ʻĒselá ko ha tokotaha fekumi, mataotao, hiki-tatau, mo e faiako tuʻu-ki-muʻa ia ʻo e Laó. Ki he kau Kalisitiane he ʻaho ní ko ha toe faʻifaʻitakiʻanga lelei ia ʻo e ngāue ʻaufuatoó. ʻO anga-fēfē? ʻI heʻene tauhi maʻu ʻa ʻene anga-līʻoa fakaʻotuá neongo ʻa ʻene nofo ʻi Pāpiloné, ko ha kolo naʻe fonu ʻi he ngaahi ʻotua loí mo e lotu fakatēmenioó.

Naʻe ʻikai ke hokonoa pē ʻa e anga-līʻoa fakaʻotua ʻa ʻĒselá. Naʻá ne ngāue ki ai. Ko e moʻoni, ʻokú ne tala mai kiate kitautolu naʻá ne “tuku . . . ʻa hono loto ke feingaʻi ʻa e lao ʻa Sihova, pea ke fai ki ai.”—Esela 7:​10, fakaʻītali ʻamautolu.

ʻI he hangē ko ʻĒselá, ko e kakai ʻa Sihova ʻi he ʻaho ní ʻoku nau loto ke fai ʻa e meʻa kotoa ʻoku fiemaʻu ʻe Sihova meiate kinautolú, lolotonga ʻa ʻenau nofo ʻi ha māmani ʻa ia ʻoku fakafili ki he lotu moʻoní. Ko ia, tau sivisiviʻi ʻa e ngaahi founga ʻa ia ʻe lava ai ʻe kitautolu foki ʻo teuʻi hotau lotó, ʻa e tangata ʻi lotó—ʻo kau ai ʻetau ngaahi fakakaukaú, ngaahi tōʻongá, ngaahi holí, mo e ngaahi fakaueʻilotó—ke “feingaʻi ʻa e lao ʻa Sihova, pea ke fai ki ai.”

Teuʻi Hotau Lotó

“Ke teuteu” ʻoku ʻuhingá “ke mateuteu ki muʻa ki ha taumuʻa: ʻoku fokotuʻu ki ha tuʻunga ki hano ngāueʻaki tefito, tokangaʻi, pe puleʻi.” Ko e moʻoni, kapau kuó ke hoko mai ki ha ʻilo totonu ʻo e Folofola ʻa e ʻOtuá pea kuó ke fakatapui hoʻo moʻuí kia Sihova, tā kuo fakamoʻoniʻi pau ʻe ho lotó ke ʻi ha tuʻunga mateuteu pea ʻe lava ke fakahoa ia ki he “kelekele lelei” naʻe lea ʻa Sīsū fekauʻaki mo ia ʻi heʻene pealapeli fekauʻaki mo e tokotaha-tūtūʻí.—Mātiu 13:​18-23.

Ka neongo ia, ʻoku fiemaʻu ʻe hotau lotó ʻa e tokanga tuʻumaʻu mo e fakaleleiʻi. Ko e hā hono ʻuhingá? Ko e ʻuhinga ʻe ua. ʻUluakí, koeʻuhi ko e ngaahi hehema fakatupu maumaú, hangē ko e ngaahi tea ʻi ha ngoue, ʻe lava pē ke ʻosi faiaka ia, tautefito lolotonga ʻa e “kuonga fakamui” ko ení ʻi he taimi ʻoku fonu lahi ange ai ʻi ha toe taimi ʻa e “ʻea” ʻo e fokotuʻutuʻu ʻa Sētané fakataha mo e ngaahi tenga fakamamahi ʻo e fakakaukau fakakakanó. (2 Timote 3:​1-5; Efeso 2:​2, NW) Ko e ʻuhinga hono uá ʻoku fekauʻaki ia mo e kelekelé tonu. ʻI hono tuku taʻetokangaʻí, ʻe vave leva ʻa e pakukā nai ʻa e kelekelé, ʻo fefeka, pea hoko ai ʻo taʻefua. Pe ko e luelue taʻetokanga holo ʻa e kakai mātuʻaki tokolahi ʻi he ngoué ʻo tāmoloki hifo ʻa e kelekelé ʻo hoko ko ha konga fefeka. Ko e kelekele fakaefakatātā ʻo hotau lotó ʻoku meimei tatau. ʻE hoko nai ia ʻo taʻefua kapau ʻe fakaliʻeliʻaki pe tāmoloki ʻe he kakai ʻoku ʻikai haʻanau mahuʻingaʻia ʻi haʻatau lelei fakalaumālié.

He mahuʻinga leva ē ko ia, kiate kitautolu hono kotoa ke ngāueʻaki ʻa e naʻinaʻi ʻa e Tohitapú: “ʻI he meʻa kotoa ʻoku ke tauhi, muʻomuʻa ʻa e lama ʻo ho loto, he ʻoku founga mei ai ʻa e ngaahi meʻa ʻoku ʻasi ʻi he moʻui.”—Palovepi 4:23 (Lea Fakatātā, PM).

Ngaahi Meʻa Tefito ʻOku Nau Fakaleleiʻi ʻa e “Kelekele” ko Hotau Lotó

Tau vakai angé ki ha ngaahi meʻa tefito ʻe niʻihi, pe ngaahi ʻulungaanga, te nau fakaleleiʻi ʻa e “kelekele” ʻo hotau lotó koeʻuhi ke ne ʻai ke lava ʻo tupu moʻui lelei. Ko e moʻoni, ʻoku ʻi ai ʻa e ngaahi meʻa lahi ʻa ia ʻe lava ke nau fakaleleiʻi hotau lotó, ka te tau vakai heni ki ha meʻa ʻe ono: ko hano ʻiloʻi ʻa ʻetau fiemaʻu fakalaumālié, anga-fakatōkilalo, faitotonu, manavahē fakaʻotua, tui, mo e ʻofa.

“Monūʻiaā ka ko kinautolu ʻoku ongoʻi masiva honau laumalie,” ko e lea ia ʻa Sīsuú. (Mātiu 5:3, fakaʻītali ʻamautolu.) ʻI he hangē ko e fiekaia fakasinó ʻa ia ʻokú ne fakamanatu mai kiate kitautolu ʻetau fiemaʻu ke kaí, ko ha lāuʻilo ki heʻetau fiemaʻu fakalaumālié ʻokú ne hanganaki ʻai kitautolu ke tau fiekaia ki he meʻakai fakalaumālié. ʻI he fakanatulá, ʻoku maʻu ʻe he tangatá ha hoholi ki ha meʻakai pehē koeʻuhi he ʻokú ne ʻomai ʻa e ʻuhinga mo e taumuʻa ki he moʻuí. Ko e ngaahi tenge mei he fokotuʻutuʻu ʻo e ngaahi meʻa ʻa Sētané pe ko e fakapikopiko ʻataʻatā ʻi heʻene hoko mai ke akó te ne fakaongonoaʻi nai ʻa hotau konisēnisí mei he fiemaʻu ko ení. Neongo ia, naʻe pehē ʻe Sīsū: “Oku ikai moʻui ʻa e tangata ʻi he ma pe, ka ʻi he ngāhi folofola kotoa pe ʻoku ʻalu atu mei he fofonga ʻo e ʻOtua.”—Mātiu 4:4.

ʻI ha founga hangatonu, ko ha meʻakai tuʻumaʻu, palanisi, mo fakatupu moʻui lelei ʻoku tokoni ia ki he moʻui lelei fakasinó, pea ʻoku nau toe tataki ʻa e sinó ke ne fakatupu ha ʻuakai ki he houa kai hokó ʻi he hoko mai ʻa e taimi ko iá. ʻOku hoko moʻoni ʻa e meʻa tatau ʻi ha ʻuhinga fakalaumālie. Heʻikai nai ke ke fakakaukau hifo kiate koe tonu ko ha tokotaha ako tōtōivi, ka ʻo kapau te ke ʻai ia ko ha tōʻonga ke lau fakaʻaho ʻa e Folofola ʻa e ʻOtuá peá ke ako ʻa e ngaahi tohi makatuʻunga ʻi he Tohitapú ʻi ha tuʻunga tuʻumaʻu, te ke ʻilo ai ʻe tupulaki ʻa hoʻo ʻuakai ki aí. Ko hono moʻoní, te ke fakatuʻotuʻa loto-vēkeveke atu ai ki ho ngaahi taimi ki he ako Tohitapú. Ko ia ʻoua ʻe foʻingofuá; ngāue mālohi ke fakatupulekina ha ʻuakai fakatupu moʻui lelei fakalaumālie.

Fakamoluuʻi ʻe he Anga-Fakatōkilaló ʻa e Lotó

Ko e anga-fakatōkilaló ko ha meʻa tefito mātuʻaki mahuʻinga ia ʻi hono maʻu ha loto kuo mateuteú koeʻuhi he ʻokú ne ʻai kitautolu ke akoʻingofua pea tokoniʻi kitautolu ke tau mateuteu lahi ange ke tali ʻa e akonaki mo e fakatonutonu anga-ʻofá. Fakakaukau angé ki he faʻifaʻitakiʻanga lelei ʻa Tuʻi Siosaiá. Lolotonga ʻa ʻene pulé naʻe maʻu ai ha tohi naʻe ʻi ai ʻa e Lao ʻa e ʻOtuá naʻe ʻomai ʻo fakafou mai ʻia Mōsesé. ʻI he fanongo ʻa Siosaia ki he ngaahi lea ʻo e Laó peá ne fakatokangaʻi ʻa e hē mamaʻo ʻa ʻene fanga kuí mei he lotu maʻá, naʻá ne hae hono valá peá ne tangi ʻi he ʻao ʻo Sihová. Ko e hā naʻe laveʻi loloto ai ʻe he Folofola ʻa e ʻOtuá ʻa e loto ʻo e tuʻí? ʻOku pehē ʻe he fakamatalá ko hono lotó naʻe “molū,” ko ia naʻá ne fakatōkilaloʻi ia ʻi heʻene fanongo ki he ngaahi folofola ʻa Sihová. Naʻe fakatokangaʻi ʻe Sihova ʻa e loto-fakatōkilalo mo ongongofua ʻo Siosaiá, peá ne tāpuakiʻi ia ʻo fakatatau ki ai.—2 Tuʻi 22:​11, 18-​20, NW.

Naʻe fakaivia ʻe he anga-fakatōkilaló ʻa e kau ākonga “taʻe kolisi . . . pea taʻe maʻu tuʻunga” ʻa Sīsuú ke nau mahinoʻi pea ngāueʻaki ʻa e ngaahi moʻoni fakalaumālie naʻe ʻikai ʻiloʻi ʻe he faʻahinga ko ia naʻa nau “poto mo ʻiloʻilo” ka ʻi he founga “fakakakano” peé. (Ngāue 4:13; Luke 10:21; 1 Kolinito 1:26) Ko e faʻahinga ki muí naʻe ʻikai te nau mateuteu ke tali ʻa e folofola ʻa Sihová koeʻuhi he naʻe fakafefekaʻi honau lotó ʻe he hīkisiá. ʻE fai ha ofo ʻi he fehiʻa ʻa Sihova ʻi he hīkisiá?—Palovepi 8:13; Taniela 5:​20.

Faitotonú mo e Manavahē Fakaʻotuá

Naʻe tohi ʻe he palōfita ko Selemaiá ʻo pehē “ko e fungani ʻi he meʻa kākā ka ko e loto, pea ʻoku hilio hono kovi: ko hai te ne lava ke ʻilo ia?” (Selemaia 17:9) ʻOku fakahāhaaʻi ʻe he kākā ko ení ʻa ia tonu ʻi he ngaahi founga kehekehe, hangē ko e taimi ko ia ʻoku tau fai ai ha ngaahi kalofanga maʻatautolu ʻi he taimi ʻoku tau faihala aí. ʻOku toe hā ia ʻi he taimi ʻoku tau tukunoaʻi ai ʻa e ngaahi mele mafatukituki fakafoʻituituí. Kae kehe, ko e faitotonú, te ne tokoniʻi kitautolu ke tau maʻu ʻa e ikunaʻi ʻo ha loto kākā ʻaki hono tokoniʻi kitautolu ke tau fehangahangai mo e moʻoni fekauʻaki mo kitautolú tonu koeʻuhi ke tau lava ai ʻo fakalakalaka. Naʻe fakahāhā ʻe he tokotaha-tohi-sāmé ʻa e faitotonu pehē ʻi heʻene lotu: “Fisifisi au, ʻEiki, pea ke fakaʻata au; sivi ʻaki ʻa e afi hoku kofuua, mo hoku mafu.” ʻOku hā mahino, naʻe ʻosi teuʻi ʻe he tokotaha-tohi-sāmé ʻa hono lotó ke ne tali ʻa e sivi mo e ʻahiʻahiʻi ʻe Sihová, neongo kapau naʻe ʻuhinga nai iá ko hono ʻiloʻi ʻa e ʻi ai ʻa e ngaahi fasi-ʻa-anga taʻemaʻá, koeʻuhi ke lava ʻo ikuʻi ʻa e ngaahi meʻá ni.—Sāme 17:3; 26:2.

Ko e manavahē fakaʻotuá, ʻa ia ʻoku kau ai ʻa e “fehiʻa ki he kovi,” ko ha tokoni mālohi ia ʻi he ngāue sivi ko ení. (Palovepi 8:13) Lolotonga ʻa e houngaʻia ʻi he ʻaloʻofa mo e anga-lelei ʻa Sihová, ko ha tokotaha ʻoku manavahē moʻoni kia Sihová ʻoku lāuʻilo ai pē ia ʻoku maʻu ʻe Sihova ʻa e mālohi ke ne fakahoko mai ha tautea, naʻa mo e maté, ki he faʻahinga ko ia ʻoku nau talangataʻa kiate iá. Naʻe fakahaaʻi ʻe Sihova ko e faʻahinga ko ia ʻoku nau manavahē kiate iá te nau toe talangofua foki kiate ia ʻi heʻene lea ʻo kau ki ʻIsileli: “Pehe mai kuo pehe honau loto maʻupe, ke nau ʻapasia kiate au, mo tauhi ʻeku ngaahi fekau, koeʻuhi ke nau tuʻumalie mo ʻenau fanau foki ʻo taʻengata!”—Teutalonome 5:29.

ʻOku hā mahino, ko e taumuʻa ʻo e manavahē fakaʻotuá, ko e ʻikai ke tauhi kitautolu ʻi ha tuʻunga ʻo e anga-nofo tailiili, ka ke ueʻi kitautolu ke talangofua ki heʻetau Tamai ʻofá, ʻa ia ʻoku tau ʻilo ʻoku ʻi hono lotó ʻa e ngaahi meʻa mahuʻinga lahi taha kiate kitautolú. Ko hono moʻoní, ʻoku māʻolunga ʻa e manavahē fakaʻotua peheé pea fakatupunga fiefia, ʻa ia naʻe fakahāhaaʻi feʻunga ʻānoa ʻe Sīsū Kalaisi tonu.—Aisea 11:3 (Isaia, PM); Luke 12:5.

Ko ha Loto Kuo Mateuteu ʻOku Fonu Ia ʻi he Tuí

Ko ha loto ʻoku mālohi ʻi he tuí ʻokú ne ʻiloʻi ko e hā pē ʻoku fiemaʻu pe tataki ʻe Sihova fakafou ʻi heʻene Folofolá ʻoku tonu maʻu pē ia, pea ʻoku maʻá e lelei taha pē maʻatautolu. (Aisea 48:​17, 18) Ko ha tokotaha ʻoku loto pehē ʻokú ne maʻu ʻa e fiemālie lahi mo e nonga mei hono ngāueʻaki ʻa e enginaki ʻi he Palovepi 3:​5, 6, ʻa ia ʻoku pehē: “Falala ki he ʻEiki ʻaki ʻa e kotoa ʻo ho loto, ʻo ʻouae fāki ki ho poto oʻou: ke ke fakaongo kiate ia ʻi ho hala kotoa pe, pea ʻe fakatonutonu ʻe ia ho ngaahi ʻalunga.” Kae kehe, ko ha loto ʻoku ʻikai tuí ʻe toumoua ia ke falala kia Sihova, tautefito kapau ko hono fai iá ʻoku kau ki ai ha ngaahi feilaulau, hangē ko hono fakafaingofuaʻi ʻe he tokotahá ʻa ʻene moʻuí koeʻuhi ke hangataha ki he ngaahi meʻa ʻo e Puleʻangá. (Mātiu 6:33) ʻI ha ʻuhinga lelei, ʻoku vakai ʻa Sihova ki ha loto taʻetui ʻoku “kovi” ia.—Hepelu 3:​12.

Ko ʻetau tui kia Sihová ʻoku tapua atu ia ʻi he ngaahi tafaʻaki lahi, ʻo kau ai ʻa e ngaahi meʻa ʻoku tau fai fakapulipuli ʻi hotau ʻapí tonu. Ko e fakatātaá, ko e tefitoʻi moʻoni ʻi he Kaletia 6:7: “ʻOua naʻa tuku ke fakahalaʻi kimoutolu: talaʻehai ʻoku ala pāʻusiʻi ʻa e ʻOtua; he ʻilonga pe meʻa ʻoku to ʻe ha tangata, ko ia ia te ne utu foki.” Ko ʻetau tui ki he tefitoʻi moʻoni ko ení ʻe tapua atu ia ʻi he ngaahi meʻa hangē ko e ngaahi faiva ʻoku tau sio aí, ko e ngaahi tohi ʻoku tau laú, ko e lahi ʻo e ako Tohitapu ʻoku tau faí, pea ʻi heʻetau ngaahi lotú. ʻIo, ko ha tui mālohi ʻa ia ʻokú ne ueʻi kitautolu ke tau tūtuuʻi “ʻi he laumalie” ko ha kī tefito ia ki hono maʻu ha loto ʻa ia ʻoku mateuteu ke ne tali ʻa e Folofola ʻa Sihová pea ke talangofua ki ai.—Kaletia 6:8.

Ko ʻOfa—ʻA e ʻUlungaanga Tuʻu-Ki-Muʻa Tahá

Laka hake ʻi he kotoa ʻo e ngaahi ʻulungaanga kehé, ʻoku ʻai moʻoni ʻe he ʻofá ʻa e kelekele ʻo hotau lotó ke ne tali ʻa e Folofola ʻa Sihová. Ko ia ai, ʻi hono fakahoa ia mo e tuí pea mo e ʻamanakí, naʻe fakamatalaʻi ʻe he ʻapositolo ko Paulá ʻa e ʻofá “ko honau tuʻukimuʻa” ia ʻi he ngaahi ʻulungaanga ko ení. (1 Kolinito 13:13) Ko ha loto ʻoku fonu ʻi he ʻofa ki he ʻOtuá ʻokú ne maʻu ʻa e fiemālie lahi mei he talangofua kiate iá; ʻoku ʻikai moʻoni ke taʻefiemālie ia ʻi he ngaahi fiemaʻu ʻa e ʻOtuá. Naʻe pehē ʻe he ʻapositolo ko Sioné: “Ko eni ia ʻa e ʻofa ki he ʻOtua, ʻa ʻetau tauhi ki heʻene ngaahi tuʻutuʻuni. Pea ʻoku ʻikai ke fakamafasia ʻa ʻene ngaahi tuʻutuʻuni.” (1 Sione 5:​3, 4) ʻI he ngaahi lea meimei tatau, naʻe pehē ʻe Sīsū: “Kapau ʻoku ʻofa ha taha kiate au, te ne tauhi ʻeku lea: pea ʻe ʻofa kiate ia ʻa ʻeku Tamai.” (Sione 14:23) Fakatokangaʻi ko e ʻofa ko iá ʻoku fakafetongi mai ia. ʻIo, ʻoku ʻofa lahi ʻa Sihova ki he faʻahinga ko ia ʻoku nau ʻunuʻunu kiate ia ʻi he ʻofá.

ʻOku ʻafioʻi ʻe Sihova ʻoku tau taʻehaohaoa pea faiangahala maʻu pē kiate ia. Neongo ia, ʻoku ʻikai te ne tauhi ia tonu ke mamaʻo meiate kitautolu. Ko e meʻa ʻoku kumi ki ai ʻa Sihova ʻi heʻene kau sevānití ko ha “loto haohaoa,” ko e taha ʻa ia ʻokú ne ueʻi kitautolu ke tauhi loto-lelei kiate ia ʻaki ha “laumalie tonunga.” (1 Kalonikali 28:9 [1 Fakamatala Mea Hokohoko, PM]) Ko e moʻoni, ʻoku ʻafioʻi ʻe Sihova ʻoku fiemaʻu ʻa e taimi mo e feinga kiate kitautolu ke fakatupulekina ʻa e ngaahi ʻulungaanga lelei ʻi hotau lotó pea ke fakatupu ai ʻa e fua ʻo e laumālié. (Kaletia 5:​22, 23) Ko ia ai, ʻokú ne anga-kātaki kiate kitautolu, “he ʻoku ne ʻilo ʻe ia hota anga; ʻoku ne manatu ai pe ko e efu pe kitaua.” (Sāme 103:14) ʻI he fakakaukauloto ki he fakakaukau tatau, naʻe ʻikai ʻaupito fakaangaʻi kakaha ʻe Sīsū ʻa ʻene kau ākongá ʻi heʻenau ngaahi fehālaakí kae tokoniʻi anga-kātaki mo fakalototoʻaʻi kinautolu. ʻIkai ʻoku ueʻi koe ʻe he ʻofa, meesi, mo e anga-kātaki pehē ʻa Sihova mo Sīsuú ke ke ʻofa lahi ange ai kiate kinaua?—Luke 7:47; 2 Pita 3:9.

Kapau ʻokú ke ʻiloʻi ʻi ha taimi ko ha fāinga ia ke taʻaki fuʻu hake ʻa e ngaahi tōʻonga faiaka loloto hangē ha teá pe ke laiki ʻa e ngaahi tukuʻanga ʻo e ngaahi fasi-ʻa-anga hangē ha ʻumeá, ʻoua ʻe hoko ʻo loto-foʻi pe loto-siʻi. ʻI hono kehé, hanganaki ngāue ki hono fai ha fakalelei ʻi hoʻo “kītaki ʻi he lotú,” ʻo kau ai ʻa e toutou hū kia Sihova ki hono laumālié. (Loma 12:​12, NW) ʻI heʻene tokoni loto-leleí, te ke hangē ai ko ʻĒselá ʻo lavameʻa ʻi hono maʻu ha loto kuo mateuteu kakato “ke feingaʻi ʻa e lao ʻa Sihova, pea ke fai ki ai.”

[Fakatātā ʻi he peesi 31]

Naʻe tauhi maʻu ʻe ʻĒsela ʻa ʻene anga-līʻoa fakaʻotuá naʻa mo e ʻi heʻene ʻi Pāpiloné

[Maʻuʻanga ʻo e Tā ʻi he peesi 29]

Garo Nalbandian