Te Ke Tūkia Koeʻuhi ko Sīsū?

 1. Ko e hā nai naʻá ne ʻai koe ke ke ʻohovale ʻi hoʻo fuofua feinga ke vahevahe ʻa e pōpoaki ʻo e Tohi Tapú ki he niʻihi kehé?

ʻOKÚ KE manatuʻi ʻa e mōmeniti naʻá ke fuofua ʻiloʻi ai kuó ke maʻu ʻa e moʻoní? Ko e ngaahi akonaki ʻa e Tohi Tapú naʻá ke akó naʻe hā ngali ʻoku mahino māʻalaʻala! Naʻá ke ongoʻi ʻe loto ʻa e tokotaha kotoa ke tali ʻa e ngaahi meʻa kuó ke tui ki aí. Naʻá ke tuipau ko e pōpoaki ʻo e Tohi Tapú te ne ʻoange kiate kinautolu ha moʻui mohu ʻuhinga ʻi he taimí ni pea mo ha ʻamanaki fakaofo ki he kahaʻú. (Saame 119:105) Ko ia naʻá ke vahevahe vēkeveke ʻa e moʻoni kuó ke maʻú ki ho ngaahi kaumeʻá mo e kāingá kotoa. Ka ko e hā ʻa e meʻa naʻe hokó? Naʻá ke ʻohovale ʻi hono talitekeʻi ʻe he tokolahi ʻa e meʻa naʻá ke tala angé.

2-3. Naʻe anga-fēfē ʻa e fakafeangai ʻa e tokolahi taha ʻo e kakai ʻi he taimi ʻo Sīsuú kiate iá?

² ʻOku ʻikai ha taha ʻo kitautolu ʻoku totonu ke ʻohovale ʻi hono talitekeʻi ʻe he niʻihi kehé ʻa e pōpoaki ʻoku tau malangaʻí. ʻI he taimi ʻo Sīsuú, ko e tokolahi tahá naʻa nau talitekeʻi ia, neongo naʻá ne fakahoko ʻa e ngaahi mana, ʻo fakamoʻoniʻi ai naʻá ne maʻu ʻa e poupou ʻa e ʻOtuá. Ko e fakatātaá, naʻe fokotuʻu ʻe Sīsū ʻa Lāsalosi​—ko ha mana naʻe ʻikai lava ke fakaʻikaiʻi ʻe hono kau fakafepakí. Kae kehe, ko e kau taki Siú naʻe ʻikai ke nau tali ʻa Sīsū ko e Mīsaiá. Naʻe aʻu ʻo nau loto ke tāmateʻi ʻa Sīsū mo Lāsalosi!​—Sione 11:47, 48, 53; 12:9-11.

³ Naʻe ʻiloʻi ʻe Sīsū ko e tokolahi taha ʻo e kakaí te nau fakafisi ke tali ia ko e Mīsaiá. (Sione 5:39-44) Naʻá ne tala ki ha kulupu ʻo e kau ākonga ʻa Sione Papitaisó: “Fiefia ē ko e tokotaha ʻoku ʻikai te ne maʻu ha ʻuhinga ke tūkia ai ʻiate aú.” (Māt. 11:2, 3, 6) Ko e hā naʻe talitekeʻi ai ʻe he tokolahi ʻa Sīsuú?

 4. Ko e hā te tau lāulea ki ai ʻi he kupu ko ení?

⁴ ʻI he kupu ko ení, pehē ki he kupu hokó, te tau sivisiviʻi ai ʻa e ngaahi ʻuhinga naʻe ʻikai ke tui ai kia Sīsū ʻa e tokolahi ʻi he ʻuluaki senitulí. Te tau toe vakai foki ki he ʻuhinga ʻoku fakaʻatā ai ʻe he tokolahi ʻi he ʻahó ni kinautolu tonu ke nau hoko ʻo tūkia. Ko e mahuʻinga tahá, te tau ako foki ki he ʻuhinga ʻe lava ke tau maʻu ai ha tui mālohi kia Sīsū koeʻuhi ke ʻoua te tau tūkia.

 5. Ko e hā nai naʻe fakamulituku ai ʻa e niʻihi ko Sīsū naʻe ʻikai ko e Mīsaia naʻe tomuʻa talá?

⁵ Naʻe tūkia ʻa e tokolahi koeʻuhi ko e puipuituʻa ʻo Sīsuú. Naʻa nau ʻiloʻi ko Sīsū ko ha faiako laulōtaha pea naʻá ne fakahoko ʻa e ngaahi mana. Ka naʻa nau vakai kiate ia ko ha foha pē ʻo ha tufunga masiva. Pea naʻá ne haʻu mei Nāsaleti, ko ha kolo naʻe vakai nai ki ai naʻe ʻikai ke fuʻu mahuʻinga. Naʻa mo Nātaniela, ʻa ia naʻá ne hoko ko ha ākonga ʻa Sīsū, ʻi he ʻuluaki taimí naʻá ne pehē: “ʻE lava koā ke haʻu ha meʻa lelei mei Nāsaleti?” (Sione 1:46) Naʻe ʻikai nai ke saiʻia ʻa Nātaniela ʻi he kolo naʻe nofo ai ʻa Sīsū ʻi he taimi ko iá. Pe naʻá ne fakakaukau nai ki he kikite ʻi he Maika 5:2, ʻa ia naʻe tomuʻa tala ai ko e Mīsaiá ʻe ʻaloʻi ʻi Pētelihema, ʻo ʻikai ʻi Nāsaleti.

 6. Ko e hā naʻe totonu ke ne tokoniʻi ʻa e kakai ʻi he taimi ʻo Sīsuú ke nau ʻiloʻi ko Sīsū ʻa e Mīsaiá?

⁶ Ko e hā ʻoku leaʻaki ʻe he Folofolá? Naʻe tomuʻa tala ʻe he palōfita ko ʻAiseá ko e ngaahi fili ʻo Sīsuú heʻikai ke nau tokanga ki he ‘ngaahi fakaikiiki ʻo e tupuʻanga ʻo e Mīsaiá.’ (ʻAi. 53:8) Ko e ngaahi fakaikiiki lahi ko iá naʻe kikiteʻi. Kapau naʻe vaheʻi ʻe he kakai ko iá ha taimi ke sivisiviʻi ai ʻa e ngaahi moʻoniʻi meʻá kotoa, naʻa nau mei ʻiloʻi ko Sīsū naʻe ʻaloʻi ʻi Pētelihema pea ko e hako ia ʻo Tuʻi Tēvita. (Luke 2:4-7) Ko ia ko e feituʻu naʻe ʻaloʻi ai ʻa Sīsuú naʻe fehoanaki mo e kikite ʻi he Maika 5:2. Ko e hā leva ʻa e palopalemá? Naʻe mātuʻaki fakavave ʻa e kakaí ke fai ha fakamulituku. Naʻe ʻikai ke nau maʻu ʻa e ngaahi moʻoniʻi meʻá kotoa. Koeʻuhi ko e meʻá ni, naʻa nau tūkia.

 7. Ko e hā ʻoku talitekeʻi ai ʻe he tokolahi ʻa e kakai ʻa Sihová ʻi he ʻahó ni?

⁷ ʻOku tau vakai ki he palopalema tatau ʻi he ʻahó ni? ʻIo. Ko e tokolahi taha ʻo e kakai ʻa Sihová ʻoku nau haʻu mei ha puipuituʻa māʻulalo; ʻoku vakai ki ai ʻa e tokolahi ko e kau “taʻeako mo lāuvale.” (Ngā. 4:13) ʻOku ongoʻi ʻe he niʻihi heʻikai lava ke akoʻi ʻe he kakai ʻa e ʻOtuá ʻa e Tohi Tapú koeʻuhi naʻe ʻikai ke nau maʻu tohi fakamoʻoni ako mei ha ʻapiako teolosia ʻiloa. ʻOku taukaveʻi ʻe he niʻihi ko e Kau Fakamoʻoni ʻa Sihová ko ha “lotu ʻAmelika,” neongo, ko hono moʻoní, ʻoku fakafuofua ki he Fakamoʻoni ʻa Sihova ʻe toko 1 ʻi he toko 7 ʻoku nofo ʻi ʻAmeliká. Lolotonga ia kuo tala ki he niʻihi ko e Kau Fakamoʻoní ʻoku ʻikai ke nau tui kia Sīsū. ʻI he faai mai ʻa e ngaahi taʻú, kuo ui ʻa e kakai ʻa Sihová ko e “kau Kominiusi,” “kau sipai ʻAmelika” mo e “kau fakatupu moveuveu.” Koeʻuhi ko e faʻahinga ʻoku tala ki ai ʻa e ngaahi talanoa ko ení ʻoku ʻikai ke nau maʻu pe ʻikai ke nau tali ʻa e ngaahi moʻoniʻi meʻá, ʻoku nau tūkia.

 8. Fakatatau ki he Ngāue 17:11, ko e hā ʻoku totonu ke fai ʻe he kakaí kapau ʻoku nau loto ke nau ʻiloʻi ʻa e kau sevāniti ʻa e ʻOtuá ʻi he ʻaho ní?

⁸ ʻE lava fēfē ke fakaʻehiʻehi ha taha mei he hoko ʻo tūkiá? ʻOku fiemaʻu ke sivisiviʻi ʻe he kakaí ʻa e ngaahi moʻoniʻi meʻá. Ko e meʻa ia naʻe fakapapauʻi ʻe he tokotaha-tohi Kōsipeli ko Luké ke faí. Naʻá ne ngāue mālohi ke “fakatotoloʻi ʻa e ngaahi meʻa kotoa pē mei he kamataʻangá ʻo tonu.” Naʻá ne loto ke “ʻiloʻi kakato” ʻe heʻene kau lautohí “ʻa e papau ʻo e ngaahi meʻa” naʻa nau fanongo ai fekauʻaki mo Sīsuú. (Luke 1:1-4) Ko e kakai Siu ʻi Pēlea ʻo e kuonga muʻá naʻa nau hangē ko Luké. ʻI heʻenau fuofua fanongo ʻi he ongoongo lelei fekauʻaki mo Sīsuú, naʻa nau fakahoa ʻa e Ngaahi Konga Tohi Tapu Faka-Hepeluú ke fakapapauʻi ʻa e meʻa naʻe tala ange kiate kinautolú. (Lau ʻa e Ngāue 17:11.) ʻI ha founga meimei tatau, ʻoku fiemaʻu ke vakaiʻi ʻe he kakai ʻi he ʻaho ní ʻa e ngaahi moʻoniʻi meʻá. Kuo pau ke nau fakahoa ʻa e meʻa kuo akoʻi ange ʻe he kakai ʻa e ʻOtuá mo e meʻa ʻoku leaʻaki ʻe he Folofolá. ʻOku fiemaʻu foki ke nau ako fekauʻaki mo e meʻa kuo fai ʻe he kakai ʻa Sihova ʻi onopōní. Kapau ʻoku nau vakaiʻi fakalelei ʻa e puipuituʻá, heʻikai ke nau fakaʻatā ʻa e tomuʻa fehiʻá pe fanongo talanoá ke ne fakakuihi kinautolu.

 9. Ko e hā naʻe hoko ʻi he fakafisi ʻa Sīsū ke fakahā ha fakaʻilonga mei hēvaní?

⁹ Ko e niʻihi ʻi he taimi ʻo Sīsuú naʻe ʻikai ke nau fiemālie ʻi heʻene ngaahi akonaki fakaofó. Naʻa nau fiemaʻu ha meʻa lahi ange. Naʻa nau kounaʻi ia ke ne fakamoʻoniʻi ko ia ʻa e Mīsaiá ʻaki hono fakahoko “ha fakaʻilonga mei hēvani.” (Māt. 16:1) Mahalo naʻe makatuʻunga ʻenau kounaʻi ʻa e meʻá ni ʻi he ʻikai ke nau mahinoʻi ʻa e Taniela 7:13, 14. Kae kehe, naʻe ʻikai ko e taimi ia ʻa Sihova ke fakahoko ai ʻa e kikite ko iá. Ko e meʻa naʻe akoʻi ʻe Sīsuú naʻe feʻungaʻānoa ia ke nau tuipau ai ko ia ʻa e Mīsaiá. Ka ʻi heʻene fakafisi ke ʻoange kiate kinautolu ʻa e fakaʻilonga naʻa nau kumi ki aí, naʻa nau tūkia.​—Māt. 16:4.

10. Naʻe anga-fēfē hono fakahoko ʻe Sīsū ʻa e meʻa naʻe tohi ʻe ʻAisea fekauʻaki mo e Mīsaiá?

¹⁰ Ko e hā ʻoku leaʻaki ʻe he Folofolá? Naʻe tohi ʻe he palōfita ko ʻAiseá fekauʻaki mo e Mīsaiá: “Heʻikai te ne kalanga pe hiki hake hono leʻó, pea heʻikai te ne ʻai hono leʻó ke ongona ʻi he halá.” (ʻAi. 42:1, 2) Naʻe fai ʻe Sīsū ʻene ngāue fakafaifekaú ʻi ha founga fakanānā pea ʻikai tohoakiʻi ʻa e tokangá kiate ia. Naʻe ʻikai ke ne langa ha ngaahi temipale masani, pea naʻe ʻikai ke ne tui ha ngaahi kofu fakalotu makehe pe loto ke uiʻaki ia ha ngaahi hingoa fakalakanga makehe. ʻI he taimi naʻe hopoʻi ai ʻa Sīsuú, naʻá ne fakafisi ke fakahōhōʻiaʻi ʻa Tuʻi Hēlota ʻaki hono fakahoko ha mana. (Luke 23:8-11) Naʻe fai ʻe Sīsū ha ngaahi mana, ka ko ʻene taumuʻa tefitó ke malangaʻi ʻa e ongoongo leleí. “Ko e ʻuhinga ʻeni naʻá ku haʻu aí,” ko e meʻa ia naʻá ne tala ange ki heʻene kau ākongá.​—Mk. 1:38.

11. Ko e hā ʻa e ngaahi ʻamanekina hala ʻoku maʻu ʻe he niʻihi ʻi he ʻahó ni?

¹¹ ʻOku tau vakai ki he palopalema tatau ʻi he ʻahó ni? ʻIo. ʻI he ʻahó ni ʻoku saiʻia ʻa e tokolahi ʻi he ngaahi fale lotu lalahi ʻo ʻi ai ʻa e ngaahi fakatātā mamafá, ko e kau faifekau mo e ngaahi hingoa fakalakanga māʻolunga, pea mo e ngaahi ouau ko hono tupuʻangá mo hono ʻuhingá kuo ngalo ʻi he tokolahi tahá. Ka ko e hā ʻoku ako ʻe he kakai ʻoku nau maʻu ʻa e ngaahi houa lotú fekauʻaki mo e ʻOtuá mo ʻene taumuʻá? Ko e faʻahinga ʻoku nau maʻu ʻetau ngaahi fakataha faka-Kalisitiané ʻoku nau ako ʻa e meʻa ʻoku fiemaʻu ʻe Sihova meiate kitautolú mo e founga ke ngāue ai ʻo fehoanaki mo hono finangaló. Ko hotau ngaahi Fale Fakatahaʻangá ʻoku maʻa mo taau, ka ʻoku ʻikai ke fuʻu tōtuʻa hono teuʻí. Ko e faʻahinga ʻoku nau takimuʻá ʻoku ʻikai ke nau tui ha teunga makehe; pe ko ha ngaahi hingoa fakalakanga makehe. ʻOku makatuʻunga ʻetau ngaahi akonakí mo e tuí ʻi he Folofola ʻa e ʻOtuá. Neongo ia, ʻoku tūkia ʻa e tokolahi ʻi he ʻahó ni koeʻuhi ʻoku nau fakakaukau ko ʻetau founga lotú ʻoku fuʻu faingofua pea ko e meʻa ʻoku tau akoʻí ʻoku ʻikai ke fehoanaki ia mo e meʻa ʻoku nau fie fanongo ki aí.

12. Hangē ko ia ʻoku fakamatalaʻi ʻi he Hepelū 11:1, 6, ʻoku totonu ke langa hake ʻetau tuí ʻi he hā?

¹² ʻE lava fēfē ke tau fakaʻehiʻehi mei he hoko ʻo tūkiá? Naʻe tala ʻe he ʻapositolo ko Paulá ki he kau Kalisitiane ʻi Lomá: “ʻOku toki tui pē ha tangata ʻi he hili ʻene fanongo ki he folofolá. Pea ʻoku fanongoa ʻa e folofolá ʻi he malanga ʻa ha taha fekauʻaki mo Kalaisi.” (Loma 10:17) Ko ia ʻoku tau langa hake ʻetau tuí ʻaki hono ako ʻa e Folofolá, ʻo ʻikai ko e kau ʻi he ngaahi ouau fakalotu taʻefakatohitapú, tatau ai pē pe ʻoku hā fakamānako fēfē ʻa e ngaahi ouau ko ení. Kuo pau ke tau langa hake ʻa e tui mālohí ʻo makatuʻunga ʻi he ʻilo totonu koeʻuhi “ʻi he ʻikai ha tuí ʻoku ʻikai malava ke fakahōifuaʻi ʻa e ʻOtuá.” (Lau ʻa e Hepelū 11:1, 6.) Ko ia ai, ʻoku ʻikai fiemaʻu ke tau vakai ki ha fakaʻilonga makehe mei hēvani ke fakamoʻoniʻi ai kuo tau maʻu ʻa e moʻoní. Ko hono vakaiʻi fakalelei ʻa e ngaahi akonaki fakatupu tui mālohi ʻi he Tohi Tapú ʻoku feʻungaʻānoa ia ke ne fakatuipauʻi kitautolu pea toʻo atu ha faʻahinga veiveiua pē.

13. Ko e hā naʻá ne fakatupunga ʻa e tokolahi ke fakahalaiaʻi ʻa Sīsuú?

¹³ ʻI he taimi ʻo Sīsuú, naʻe puputuʻu ʻa e kau ākonga ʻa Sione Papitaisó koeʻuhi ko e ʻikai ke ʻaukai ʻa e kau ākonga ʻa Sīsuú. Naʻe fakamatalaʻi ʻe Sīsū ʻoku ʻikai ha ʻuhinga ke nau ʻaukai lolotonga ʻene kei moʻuí. (Māt. 9:14-17) Neongo ia, ko e kau Fālesi mo e niʻihi ʻo e kau fakafepaki ʻo Sīsuú naʻa nau fakahalaiaʻi ia koeʻuhi ko e ʻikai ke ne muimui ʻi heʻenau ngaahi anga fakafonuá mo e talatukufakaholó. Naʻa nau ʻita ʻi heʻene fakamoʻui ʻa e faʻahinga naʻe puké ʻi he Sāpaté. (Mk. 3:1-6; Sione 9:16) ʻI he tafaʻaki ʻe taha, naʻa nau fakangali-lotu ʻo taukaveʻi ke fakatoputapuʻi ʻa e Sāpaté; ka ʻi he tafaʻaki ʻe tahá, naʻe ʻikai ke kovi kiate kinautolu ʻenau fefakatauʻaki ʻi he temipalé. Naʻa nau ʻita tōlili ʻi hono fakahalaiaʻi kinautolu ʻe Sīsū ʻi he meʻa ko iá. (Māt. 21:12, 13, 15) Pea ko e faʻahinga naʻe malanga ki ai ʻa Sīsū ʻi he sinakoke ʻi Nāsaletí naʻa nau ʻita lahi ʻi he lave ʻa Sīsū ki ha tuʻunga ʻikai lelei ʻi he hisitōliá naʻe fakaeʻa ai ʻenau siokitá mo e taʻetuí. (Luke 4:16, 25-30) Naʻe tūkia ʻa e tokolahi ʻi he ʻikai ke fai ʻe Sīsū ʻa e meʻa naʻa nau ʻamanekina te ne faí.​—Māt. 11:16-19.

14. Ko e hā naʻe fakahalaiaʻi ai ʻe Sīsū ʻa e ngaahi talatukufakaholo fakaetangata naʻe ʻikai fehoanaki mo e Folofolá?

¹⁴ Ko e hā ʻoku leaʻaki ʻe he Folofolá? Naʻe folofola ʻa Sihova fakafou ʻi heʻene palōfita ko ʻAiseá: “ʻOku ʻunuʻunu mai ʻa e kakaí ni ʻaki honau ngutú pea ʻoku nau fakaʻapaʻapa kiate au ʻaki honau loungutú, ka kuo hiki mamaʻo honau lotó meiate au; pea ko ʻenau manavahē kiate aú ʻoku makatuʻunga ʻi he ngaahi tuʻutuʻuni ʻa e tangatá ʻa ia kuo akoʻi kiate kinautolú.” (ʻAi. 29:13) Naʻe totonu hono fakahalaiaʻi ʻe Sīsū ʻa e ngaahi talatukufakaholo fakaetangata naʻe ʻikai fehoanaki mo e Folofolá. Ko e faʻahinga naʻa nau fokotuʻu ʻa e ngaahi lao mo e talatukufakaholo faʻu ʻe he tangatá ʻo māʻolunga ia ʻi he Folofolá naʻa nau talitekeʻi ʻa Sihova mo e tokotaha naʻá ne fekau mai ko e Mīsaiá.

15. Ko e hā ʻoku ʻikai ke saiʻia ai ʻa e tokolahi ʻi he ʻahó ni ʻi he Kau Fakamoʻoni ʻa Sihová?

¹⁵ ʻOku tau vakai ki he palopalema tatau ʻi he ʻahó ni? ʻIo. ʻOku loto-mamahi ʻa e tokolahi ʻi he ʻikai ke kau fakataha ʻa e Kau Fakamoʻoni ʻa Sihová mo kinautolu ʻi hono kātoangaʻi ʻa e ngaahi talatukufakaholo taʻefakatohitapu, hangē ko e faiʻahó mo e Kilisimasí. ʻOku ʻita ʻa e niʻihi ʻi he ʻikai ke kau fakataha mo kinautolu ʻa e Kau Fakamoʻoni ʻa Sihová ʻi he ngaahi kātoanga fakapuleʻangá pe ʻikai ke muimui ʻi he ngaahi anga fakafonua ʻi he putú ʻa ia ʻoku ʻikai ke fehoanaki mo e Folofola ʻa e ʻOtuá. Ko e faʻahinga ʻoku nau tūkia ʻi he founga ko ení ʻoku nau tui moʻoni nai ʻoku nau lotu ki he ʻOtuá ʻi ha tuʻunga fakahōifua. Ka heʻikai lava ke nau fakahōifuaʻi ia kapau ʻoku nau saiʻia ange ʻi he ngaahi talatukufakaholo ʻa e māmaní ʻi he ngaahi akonaki māʻalaʻala ʻa e Tohi Tapú.​—Mk. 7:7-9.

16. Fakatatau ki he Saame 119:97, 113, 163-165, ko e hā kuo pau ke tau faí pea ko e hā kuo pau ke tau fakaʻehiʻehi mei aí?

¹⁶ ʻE lava fēfē ke tau fakaʻehiʻehi mei he hoko ʻo tūkiá? ʻOku fiemaʻu ke tau fakatupulekina ha ʻofa mālohi ki he ngaahi lao mo e tefitoʻi moʻoni ʻa Sihová. (Lau ʻa e Saame 119:97, 113, 163-165.) ʻI he taimi ʻoku tau ʻofa ai kia Sihová, te tau talitekeʻi ha faʻahinga talatukufakaholo pē ʻoku taʻefakahōifua kiate ia. Heʻikai ke tau fakaʻatā ha meʻa ke ne vaetuʻua ʻetau ʻofa kia Sihová.

17. Ko e hā ʻa e ngaahi ʻamanekina naʻe taki atu ai ʻa e tokolahi ke tūkia ʻi he taimi ʻo Sīsuú?

¹⁷ Naʻe loto ʻa e niʻihi ʻi he taimi ʻo Sīsuú ke fai ha liliu fakapolitikale. Naʻa nau ʻamanekina ke fakatauʻatāinaʻi kinautolu ʻe he Mīsaiá mei he pule fakaaoao ʻa e kau Lomá. Ka ʻi heʻenau feinga ke fakanofo ʻa Sīsū ko honau tuʻí, naʻá ne talitekeʻi ia. (Sione 6:14, 15) Ko e niʻihi kehe​—kau ai ʻa e kau taulaʻeikí​—naʻa nau hohaʻa naʻa fai ʻe Sīsū ha liliu fakapolitikale ʻe fakaʻitaʻi ai ʻa e kau Lomá, ʻa ia naʻa nau ʻoange ki he kau taki lotu ko iá ha mafai. Ko e ngaahi hohaʻa fakapolitikale ko iá naʻe fakatupunga ai ʻa e kau Siu tokolahi ke nau tūkia.

18. Ko e hā ʻa e ngaahi kikite fekauʻaki mo e Mīsaiá naʻe tukunoaʻi ʻe he tokolahi?

¹⁸ Ko e hā ʻoku leaʻaki ʻe he Folofolá? Neongo naʻe tomuʻa tala ʻe he ngaahi kikite lahi ko e Mīsaiá ʻe faai atu pē ʻo hoko ko ha Pāteʻi Tau ikuna, naʻe fakahaaʻi ʻi ha ngaahi kikite kehe ʻe pau ke ne ʻuluaki pekia koeʻuhi ko ʻetau angahalá. (ʻAi. 53:9, 12) Ko ia ko e hā naʻa nau maʻu ai ʻa e ngaahi ʻamanekina halá? Ko e tokolahi ʻi he taimi ʻo Sīsuú naʻa nau tukunoaʻi ha kikite pē naʻe ʻikai ke talaʻofa mai ai ha fakaleleiʻanga vave ki heʻenau palopalemá.​—Sione 6:26, 27.

19. Ko e hā ʻa e ngaahi ʻamanekina kuo tūkia ai ʻa e tokolahi ʻi he ʻahó ni?

¹⁹ ʻOku tau vakai ki he palopalema tatau ʻi he ʻahó ni? ʻIo. Ko e tokolahi ʻi he ʻahó ni ʻoku nau tūkia koeʻuhi ko ʻetau tuʻu-ʻatā ʻi he fekauʻaki mo e ngaahi meʻa fakapolitikalé. ʻOku nau ʻamanekina ke tau kau ʻi he filí. Kae kehe, ʻoku tau ʻiloʻi ʻi he vakai ʻa Sihová, kapau te tau fili ha taki fakaetangata ke pule mai kiate kitautolu, ʻoku tau talitekeʻi ai Ia. (1 Sām. 8:4-7) ʻOku pehē nai ʻe he kakaí ʻoku totonu ke tau langa ʻa e ngaahi ʻapiako mo e falemahaki pehē foki ki hono fai ʻa e ngaahi ngāue ʻofa kehe. ʻOku nau tūkia koeʻuhi ʻoku tau tokangataha ki he ngāue fakamalangá, ʻo ʻikai ko hono fakaleleiʻi leva ʻa e ngaahi palopalema ʻi he māmaní.

20. Hangē ko ia ʻoku fakamamafaʻi ʻi he lea ʻa Sīsū ʻi he Mātiu 7:21-23, ko e hā ʻetau taumuʻa tefitó?

²⁰ ʻE lava fēfē ke tau fakaʻehiʻehi mei he hoko ʻo tūkiá? (Lau ʻa e Mātiu 7:21-23.) ʻOku totonu ko ʻetau taumuʻa tefitó ko hono fai ʻa e ngāue naʻe fekau mai ʻe Sīsū ke tau faí. (Māt. 28:19, 20) ʻOku totonu ke ʻoua ʻaupito ʻe fakaleluʻi kitautolu ʻe he ngaahi ʻīsiu fakapolitikale mo fakasōsiale ʻi he māmani ko ení. ʻOku tau ʻofa ʻi he kakaí pea tokanga fekauʻaki mo ʻenau palopalemá, ka ʻoku tau ʻiloʻi ko e founga lelei taha ke tokoniʻi ai hotau kaungāʻapí ko hono akoʻi kinautolu fekauʻaki mo e Puleʻanga ʻo e ʻOtuá pea tokoniʻi kinautolu ke nau hoko ʻo kaumeʻa mo Sihova.

21. Ko e hā ʻoku totonu ke tau fakapapauʻi ke faí?

²¹ ʻI he kupu ko ení, kuo tau lāulea ai ki ha tūkiaʻanga ʻe fā naʻá ne fakatupunga ʻa e tokolahi ke talitekeʻi ʻa Sīsū ʻi he ʻuluaki senitulí pea lava ke ne fakatupunga ʻa e niʻihi he ʻahó ni ke talitekeʻi ʻa e kau muimui ʻo Sīsuú. Ka ko e ngaahi meʻa pē eni ʻoku fiemaʻu ke tau fakaʻehiʻehi mei aí? ʻIkai. ʻI he kupu hokó, te tau sivisiviʻi ai ha toe tūkiaʻanga ʻe fā. ʻOfa ke tau fakapapauʻi ke fakaʻehiʻehi mei he hoko ʻo tūkiá pea tauhi ʻetau tuí ke mālohi!