Ko e ʻOtuá ʻOkú Ne Fakahā ʻEne ʻOfa Kiate Kitautolú

‘[ʻE] lava ʻa e ʻofa maʻataʻataá ke pule ko e tuʻi fakafou ʻi he māʻoniʻoní ʻo taki atu ki he moʻui taʻengata.’—LOMA 5:21, NW.

1, 2. Ko e hā e meʻaʻofa ʻe ua ʻe lava nai ke lāulea ki aí, pea ko fē ʻoku lahi angé?

“KO E tohi-tuku lahi taha ʻa e kau Lomá . . . ki he faʻahinga naʻa nau fetongi kinautolú ko ʻenau laó mo ʻenau mahinoʻi ko e moʻuí ʻoku totonu ke fakatatau ia ki he laó.” (Dr. David J. Williams ʻo e ʻUnivēsiti ʻo Melipoane, ʻAositelēliá) Tatau ai pē pe ko e hā nai ʻene fakalaó, ʻoku ʻi ai ha tohi-tuku pe meʻaʻofa ʻoku mahuʻinga lahi mamaʻo ange. Ko e meʻaʻofa ko ení ko ha ngaahi founga fakaʻotua ia ke maʻu ai ha tuʻunga fakahōifua mo māʻoniʻoni ki he ʻOtuá pea mo e ʻamanaki ʻo e fakamoʻuí mo e moʻui taʻengatá.

² ʻI ha ʻuhinga, naʻe ʻi ai e ngaahi tafaʻaki fakalao ki he founga naʻe ʻai ai ʻe he ʻOtuá ke ala maʻu ʻa e meʻaʻofa ko ení. ʻI he Loma vahe 5, naʻe ʻikai ʻomai ai ʻe he ʻapositolo ko Paulá ʻa e ngaahi tafaʻaki ko ení ko ha fakamatala fakalao fefeka. ʻI hono kehé, naʻá ne kamataʻaki ʻa e fakapapau fakafiefia ko ení: “Tau tuku ke fakatonuhiaʻi kitautolu ʻi he tui, ka tau maʻu melino ai mo e ʻOtua ʻi hotau ʻEiki ko Sisu Kalaisi.” Ko e faʻahinga ko ia ʻoku nau maʻu e meʻaʻofa ʻa e ʻOtuá ʻoku ueʻi kinautolu ke nau totongi ʻaki ʻenau ʻofa kiate ia. Ko e taha ai ʻa Paula. Naʻá ne tohi: “Kuo taumalingi ʻa e ʻofa ʻa e ʻOtua ʻi hotau loto ʻi he Laumalie Maʻoniʻoni.”—Loma 5:1, 5.

 3. Ko e hā e ngaahi fehuʻi ʻoku ʻuhinga lelei ʻene malanga haké?

³ Kae kehe, ko e hā ne fiemaʻu ai e meʻaʻofa anga-ʻofa ko ení? Naʻe lava fēfē ke ʻomai ia ʻe he ʻOtuá ʻi ha founga totonu mo potupotutatau? Pea ko e hā ʻoku fiemaʻu ke fai ʻe he faʻahinga tāutaha ke taau ki aí? Tau kumi angé ke maʻu ʻa e tali fakafiemālié pea sio ai ki he anga ʻo ʻenau fakamamafaʻi e ʻofa ʻa e ʻOtuá.

Fepaki e ʻOfa ʻa e ʻOtuá mo e Angahalá

4, 5. (a) ʻI he founga lahi fē naʻe fakahāhā ai ʻe Sihova ʻa ʻene ʻofá? (e) Ko e ʻilo ʻo e puipuituʻa ko e hā ʻoku ʻai ai ke tau malava ʻo mahinoʻi ʻa e Loma 5:12?

⁴ ʻI ha ngāue ʻo e ʻofa lahi, naʻe fekau mai ai ʻe Sihova ʻa hono ʻAlo-tofu-pē-taha-ne-fakatupú ke ne tokoniʻi ʻa e faʻahinga ʻo e tangatá. Naʻe fakahaaʻi ia ʻe Paula ʻo peheni: “Ko e ʻOtua ʻoku ne fakaha ʻa e moʻoni o ʻene ʻofa aʻana kiate kitautolu ʻi he pekia ʻa Kalaisi maʻatautolu, lolotonga ʻoku tau kei angahala.” (Loma 5:8) Fakakaukau ki he moʻoniʻi meʻa ʻe taha naʻe lave ki ai: “Lolotonga ʻoku tau kei angahala.” ʻOku fiemaʻu ke ʻilo ʻe he tokotaha kotoa ʻa e ʻuhinga ne hoko ai iá.

⁵ Naʻe fakahaaʻi ʻe Paula ʻa e meʻá ni, ʻo kamataʻaki e poini ko ení: “Ko e hoko ʻa e fakamoʻui naʻe tatau mo e hoko ʻa e angahala ki mamani, ʻi he tangata pe taha; mo e hoko ʻa e mate ʻi he angahala; mo ʻene aʻusia pehe ʻa e kakai kotoa pe ʻe he mate, koeʻuhi ne angahala kotoa pe.” (Loma 5:12) ʻOku tau ʻi ha tuʻunga ke mahinoʻi eni koeʻuhí naʻe ʻai ʻe he ʻOtuá ke ʻi ai ha lēkooti ki he founga ne kamata ai e moʻui ʻa e tangatá. Naʻe fakatupu ʻe Sihova ʻa e ongo meʻa fakaetangata ʻe toko ua, ko ʻĀtama mo ʻIvi. Ko e Tokotaha-Fakatupú ʻoku haohaoa, pea pehē pē mo e ʻuluaki ongo meʻa fakaetangata ko iá, ʻa ʻetau ongo kuí. Naʻe ʻoange ʻe he ʻOtuá kia kinaua ha fakahinohino fakangatangata ʻe taha ʻo fakahaaʻi ange kia kinaua ko e talangataʻa ki he lao ko iá ʻe ʻomai ai ha tautea mate. (Sen. 2:17) Kae kehe, naʻá na fili ke fai kākā ʻo maumauʻi e fakahinohino fakaʻatuʻi ʻa e ʻOtuá, ʻo na talitekeʻi ai ia ko e Tokotaha Foaki-Laó mo e Haú.—Teu. 32:4, 5.

 6. (a) Ko e hā naʻe mate ai e hako ʻo ʻĀtamá fakatouʻosi ki muʻa pea ʻi he hili hono ʻomai ʻe he ʻOtuá ʻa e Lao ʻa Mōsesé? (e) Ko e hā ʻe lava ke fakatātaaʻi ʻaki ha mahaki hangē ko e fānoa ʻa e totó?

⁶ Ko e toki hili pē ʻa e hoko ʻa ʻĀtama ko ha angahalá naʻá ne maʻu ai ha fānau, ʻo tuku atu ai ʻa e angahalá mo hono nunuʻá kia kinautolu kotoa. Ko e moʻoni, naʻe ʻikai te nau maumauʻi ʻa e lao fakaʻotuá ʻo hangē ko ia naʻe fai ʻe ʻĀtamá, ko ia naʻe ʻikai tukuakiʻi kinautolu ki he angahala tatau; pea naʻe teʻeki ke ʻomai ha lao. (Sen. 2:17) Kae kehe, ko e hako ʻo ʻĀtamá ne nau maʻu tukufakaholo ʻa e angahalá. Ko ia ai, naʻe hau ʻa e angahalá mo e maté ʻo aʻu ki he taimi naʻe ʻoange ai ʻe he ʻOtuá ki he kau ʻIsilelí ha lao, ʻa ia naʻe fakahaaʻi mahino ai ko e kau angahala kinautolu. (Lau ʻa e Loma 5:13, 14.) Ko e nunuʻa ʻo e angahala tukufakaholó ʻe fakatātaaʻi nai ia ʻaki ʻa e ngaahi mahaki pe mele tukufakaholo, hangē ko e ʻanīmia Metiteleniané, pe fānoa ʻa e totó. Kuó ke lau nai ʻo ʻilo ko ʻAlekisisi, foha ʻo e Lūsia ko Sā Nikolasi II mo ʻAlekisanitulaá, naʻá ne maʻu tukufakaholo e mahaki fānoa ʻa e totó. Ko ia ai, naʻa mo e ʻi ha fāmili pehē, ko e fānau ʻe niʻihi ʻoku ʻikai te nau faingataʻaʻia ʻi he ngaahi mahaki ko iá, ka ʻoku nau kei fetuku holo pē nai. ʻOku ʻikai pehē ʻa e angahalá ia. Ko e mele ʻo e angahala meia ʻĀtamá naʻe ʻikai ala kalofi. ʻOku fakamoʻulaloa ʻa e tokotaha kotoa pē ki ai. ʻOku fakatupu mate maʻu pē ia. Pea ʻoku tuku atu ia ki he fānau kotoa. ʻE faifai ange pea ikuʻi ʻa e tuʻunga ko iá?

Meʻa Kuo Tokonaki Mai ʻe he ʻOtuá Fakafou ʻIa Sīsū Kalaisí

7, 8. Naʻe anga-fēfē ʻa e taki atu ki ha ola kehekehe ʻa e ʻalunga ʻo e ongo tangata haohaoá?

⁷ Kuo fai ʻe Sihova ha tokonaki anga-ʻofa maʻá e faʻahinga ʻo e tangatá ke nau ikuʻi ai ʻa e angahala tukufakaholó. Naʻe fakamatalaʻi ʻe Paula ʻo pehē naʻe malava ení fakafou ʻi ha tangata kehe, ko ha tangata haohaoa ki mui ai—ko hono moʻoní, ko ha ʻĀtama hono ua. (1 Kol. 15:45) Ka ko e ʻalunga ʻo e ongo tangata haohaoá taki taha naʻe taki atu ia ki ha ola kehekehe ʻaupito. ʻO anga-fēfē?—Lau ʻa e Loma 5:15, 16.a

⁸ ‘ʻOku ʻikai ke tatau ʻa e tuʻunga ʻo e meʻaʻofá ia mo ia naʻe ʻi ai ʻa e tuʻunga ʻo e faihalá,’ ko e tohi ia ʻa Paulá. Naʻe halaia ʻa ʻĀtama ʻi he faihala ko iá, pea naʻe totonu ʻene maʻu ha tautea tamaki—naʻá ne mate. Ko ia ai, naʻe ʻikai ko ia toko taha pē ke maté. ʻOku tau lau: ‘Ko e faihala ē ʻa e tangata ʻe taha [ko iá] ʻoku mate ai ʻa e tokolahi.’ Ko e tautea totonu ʻo ʻĀtamá naʻe kounaʻi ai e meʻa tatau mei he tokotaha kotoa ʻo ʻene fānau taʻehaohaoá, kau ai kitautolu. Ka neongo ia, ʻe lava ke tau maʻu ʻa e fiemālie ʻi hono ʻiloʻi ko e tangata haohaoá, ʻa Sīsū, ʻe lava ke ne ʻomai ha ola fehangahangai. Ko e hā ʻa e olá? ʻOku tau ʻiloʻi ʻa e talí ʻi he lave ʻa Paula ki hano ‘lau ʻa e [faʻahinga ʻo e matakali kotoa pē] ʻoku nau māʻoniʻoni ki he moʻui.’—Loma 5:18, NW.

 9. Ko e hā naʻe fai ʻe he ʻOtuá ʻi hono lau ʻa e tangatá ʻoku māʻoniʻoní, hangē ko ia naʻe lave ki ai ʻi he Loma 5:15, 16?

⁹ Ko e hā e ʻuhinga ʻo e ngaahi foʻi lea faka-Kalisi ʻoku fakahaaʻi ai ʻa e ‘lau ʻoku māʻoniʻoní’ mo e ‘lau kinautolu ʻoku nau māʻoniʻoní’? Naʻe tohi ʻe ha tokotaha liliu Tohi Tapu fekauʻaki mo e foʻi fakakaukaú: “Ko ha metafoa fakalao ʻokú ne ʻai ha poini ke natula fakalao. ʻOku lau ai ki ha liliu ʻi ha tuʻunga ʻo ha taha ʻi he felāveʻi mo e ʻOtuá, ʻo ʻikai ko ha liliu ʻi loto ʻi he tokotahá . . . Ko e metafoá ʻokú ne fakatātaaʻi ʻa e ʻOtuá ko e fakamaau ʻa ia kuó ne fai ha tuʻutuʻuni ʻo taukapoʻi ʻa e tokotaha tukuakiʻi, ʻa ia kuo ʻomai ki he ʻao ʻo e fakamaauʻanga ʻa e ʻOtuá, hangē ko e laú, ʻi ha tukuakiʻi ki he taʻemāʻoniʻoni. Ka ʻoku fakatonuhiaʻi ʻe he ʻOtuá ʻa e tokotaha tukuakiʻí.”

10. Ko e hā naʻe fai ʻe Sīsū ʻa ia ne tokonaki mai ai ha makatuʻunga ki he tangatá ke lau ʻoku nau māʻoniʻoní?

¹⁰ Ko e hā e makatuʻunga naʻe lava ai ʻa e ‘Fakamāu māʻoniʻoni ʻo mamani katoá’ ʻo fakatonuhiaʻi ha tokotaha taʻemāʻoniʻoni? (Sen. 18:25) ʻI hono fakatoka ʻa e makatuʻungá, naʻe fekauʻi anga-ʻofa mai ai ʻe he ʻOtuá ʻa hono ʻAlo tofu-pē-taha-ne-fakatupú ki he māmaní. Naʻe fakahoko haohaoa ʻe Sīsū ʻa e finangalo ʻo ʻene Tamaí, neongo ʻa e ʻahiʻahí, manukiʻi tōtuʻá mo e ngaohikoviá. Naʻá ne tauhi ʻene anga-tonú ʻo aʻu ki he pekia ʻi ha ʻakau fakamamahi. (Hep. 2:10) ʻI hono feilaulauʻi ʻene moʻui fakaetangata haohaoá, naʻe fai ai ʻe Sīsū ha huhuʻi ʻa ia ʻe lava ai ke fakatauʻatāinaʻi, pe huhuʻi ʻa e fānau ʻa ʻĀtamá mei he angahalá mo e maté.—Mt. 20:28; Loma 5:6-8.

11. Ko e hā ʻa e fehoanakimālie ʻoku makatuʻunga ai ʻa e huhuʻí?

¹¹ ʻI ha tohi kehe, naʻe ui ai eni ʻe Paula ko ha “fetongi huhuʻi” fehoanakimālie. (1 Tim. 2:6) Ko e hā naʻe fehoanakimālié? Naʻe ʻomai ʻe ʻĀtama ʻa e taʻehaohaoá mo e maté ki he laui piliona, ko hono hakó. ʻOku moʻoni ko Sīsū, ʻi hono tuʻunga ko ha tangata haohaoá, naʻe lava ke ne hoko ko ha tupuʻanga ʻo e laui piliona ʻo e hako haohaoa.b Ko ia ai, naʻe mahinoʻi ko hano fakatahaʻi ʻa e moʻui ʻa Sīsuú tānaki atu ki ai mo e kotoa ʻo hono hako haohaoa ʻe malava ke maʻú naʻe faʻu ai ha feilaulau naʻe tatau mo ʻĀtama pea mo hono hako taʻehaohaoá. Kae kehe, ʻoku ʻikai pehē ʻe he Tohi Tapú ko ha hako pē ʻo Sīsū ʻe malava ke maʻu naʻe faʻuʻaki kinautolu ha konga ʻo e huhuʻí. Ko e Loma 5:15-19 (NW) ʻoku ʻomai ai ʻa e poini, ko e mate ʻa e ‘tangata pē ʻe toko tahá’ naʻe tokonaki mai ai ʻa e fakatauʻatāiná. ʻIo ko e moʻui haohaoa ʻa Sīsuú naʻe fehoanakimālie ia mo e moʻui ʻa ʻĀtamá. Ko e meʻa ke tokangataha ki aí, pea ʻoku totonu ke peheé, ko Sīsū Kalaisi toko taha pē. Naʻe malava ai ki he faʻahinga kotoa pē ke nau maʻu ʻa e meʻaʻofa taʻetotongi mo e moʻui koeʻuhi ko e ‘foʻi ngāue ʻe taha ʻo e fakatonuhia’ ʻa Sīsuú, ko ʻene ʻalunga talangofua mo e anga-tonu ʻo aʻu ki he pekia. (2 Kol. 5:14, 15; 1 Pita 3:18) Naʻe hoko fēfē mai nai ʻa e ola ko iá?

Fakatonuhia Makatuʻunga ʻi he Huhuʻí

12, 13. Ko e hā ʻoku fiemaʻu ai ʻe he faʻahinga ʻoku lau ʻoku nau māʻoniʻoní ʻa e meesi mo e ʻofa ʻa e ʻOtuá?

¹² Naʻe tali ʻe Sihova ko e ʻOtuá e feilaulau huhuʻi naʻe fai ʻe hono ʻAló. (Hep. 9:24; 10:10, 12) Ka neongo ia, ko e kau ākonga ʻa Sīsū ʻi he māmaní, kau ai ʻene kau ʻapositolo faitōnungá, ne nau taʻehaohaoa ai pē. Neongo ʻenau feinga mālohi ke fakaʻehiʻehi mei he faihalá, naʻe ʻikai ke nau lavameʻa maʻu pē. Ko e hā hono ʻuhingá? Koeʻuhi naʻa nau maʻu tukufakaholo ʻa e angahalá. (Loma 7:18-20) Ka naʻe malava ʻa e ʻOtuá pea naʻá ne fai ha meʻa fekauʻaki mo ia. Naʻá ne tali ʻa e ‘fetongi huhuʻi fehoanakimālié’ peá ne loto-lelei ke ngāueʻaki ia maʻa ʻene kau sevāniti fakaetangatá.

¹³ ʻOku ʻikai pehē naʻe moʻuaʻaki ʻe he ʻOtuá ki he kau ʻapositoló mo e niʻihi kehé ke ngāueʻaki ʻa e huhuʻí koeʻuhí ko ʻenau fakahoko ha ngaahi ngāue lelei ʻe niʻihi. ʻI hono kehé, naʻe ngāueʻaki ʻe he ʻOtuá ʻa e huhuʻí maʻanautolu koeʻuhí ko ʻene mēsí mo ʻene ʻofa lahí. Naʻá ne fili ke fakatonuhiaʻi ʻa e kau ʻapositoló mo e niʻihi kehé mei he fakamaau naʻe fai kia kinautolú, ʻo vakai kia kinautolu ʻoku nau ʻatā mei he halaia tukufakaholó. Naʻe ʻai ʻe Paula ke mahino ia: ‘ʻI he ʻofa maʻataʻatā ko ení kuo fakahaofi ai kimoutolu fakafou ʻi he tuí; pea ʻoku ʻikai ke hoko ʻa e meʻá ni koeʻuhí ko kimoutolu. Ka ʻi hono kehé, ko e meʻaʻofa ia ʻa e ʻOtuá.’—Ef. 2:8, NW.

14, 15. Ko e hā ʻa e pale naʻe tuku ki he faʻahinga ʻoku lau ʻe he ʻOtuá ʻoku nau māʻoniʻoní, ka ko e hā naʻe kei fiemaʻu ke nau faí?

¹⁴ Fakakaukau atu ko ha meʻaʻofa ē mei he Māfimafi-Aoniú ke ne fakamolemoleʻi ʻa e angahala tukufakaholo ʻa ha taha pea pehē ki he fehālaaki naʻá ne faí! ʻOku ʻikai lava ke ke fakalau ʻa e lahi ʻo e angahala naʻe fai ʻe he faʻahinga tāutaha ki muʻa ke nau hoko ko e kau Kalisitiané, neongo ia makatuʻunga ʻi he huhuʻí, ʻoku lava ai ke fakamolemoleʻi ʻe he ʻOtuá ʻa e ngaahi angahala ko iá. Naʻe tohi ʻe Paula: ‘Ko e meʻaʻofá ʻi he hili ʻa e ngaahi faihala lahí ko ha lau ʻoku māʻoniʻoni.’ (Loma 5:16, NW) Ko e kau ʻapositoló mo e niʻihi kehe ne nau maʻu ʻa e meʻaʻofa anga-ʻofa ko ení (ʻa hono lau ʻoku nau māʻoniʻoní) ne pau ke nau hokohoko atu ʻa e lotu ki he ʻOtua moʻoní ʻi he tui. Pea ko e hā ʻa e pale ki he kahaʻú? Ko e ‘faʻahinga ko ia [te] nau maʻu ʻo hulu fau ʻa e ʻofa maʻataʻataá mo e meʻaʻofa taʻetotongi ʻo e māʻoniʻoní ʻa ʻenau moʻui mo pule ko e ngaahi tuʻi fakafou ʻi he foʻi toko taha, ko Sīsū Kalaisi.’ Ko e moʻoni, ko e ola ʻo e meʻaʻofa ʻo e māʻoniʻoní ʻoku fehangahangai ia mo e faihala ʻa ʻĀtamá. Ko e meʻaʻofa ko iá ko hono ikuʻangá ko e moʻui.—Loma 5:17, NW; lau ʻa e Luke 22:28-30.

¹⁵ Ko e faʻahinga ʻoku nau maʻu ʻa e meʻaʻofa ko iá, ʻoku lau kinautolu ʻoku nau māʻoniʻoni, ʻo hoko ko e ngaahi foha fakalaumālie ʻo e ʻOtuá. ʻI he hoko ko e kaungāʻea mo Kalaisí, ʻoku nau maʻu ai ʻa e ʻamanaki ʻo e toetuʻu ki hēvani ko e ngaahi foha laumālie moʻoni ke nau “pule ko e ngaahi tuʻi” fakataha mo Sīsū Kalaisi. —Lau ʻa e Loma 8:15-17, 23.

Fakahāhā e ʻOfa ʻa e ʻOtuá ki he Niʻihi Kehé

16. ʻOku anga-fēfē nai hono maʻu ha meʻaʻofa ʻe he faʻahinga ʻoku nau maʻu ʻa e ʻamanaki ki he māmaní?

¹⁶ ʻOku ʻikai ko e faʻahinga kotoa pē ʻoku nau ngāueʻi ʻa e tui pea tauhi ki he ʻOtuá ko e kau Kalisitiane mateakí ʻoku nau ʻamanekina ke ‘pule ko e ngaahi tuʻi’ fakataha mo Kalaisi ʻi hēvani. ʻOku maʻu ʻe he tokolahi ha ʻamanaki makatuʻunga Fakatohitapu meimei tatau mo ia naʻe maʻu ʻe he kau sevāniti ʻa e ʻOtuá ki muʻa ʻi he Kalisitiané. ʻOku nau ʻamanaki ke moʻui taʻengata ʻi ha māmani palataisi. ʻE lava ke nau maʻu naʻa mo e ʻi he taimí ni ha meʻaʻofa anga-ʻofa mei he ʻOtuá pea vakai kia kinautolu ʻoku nau māʻoniʻoni fakataha mo e vakai atu ki he moʻui ʻi he māmaní? Makatuʻunga ʻi he meʻa naʻe tohi ʻe Paula ki he kau Lomá, ko e tali fakafiemālié ko e ʻio!

17, 18. (a) ʻI he vakai atu ki he tui ʻa ʻĒpalahamé, ne anga-fēfē vakai kiate ia ʻa e ʻOtuá? (e) Naʻe anga-fēfē lava ke vakai ʻa Sihova kia ʻĒpalahame ʻokú ne māʻoniʻoní?

¹⁷ Naʻe lāulea ʻa Paula ki ha faʻifaʻitakiʻanga tefito, ko ʻĒpalahame, ko ha tangata ʻo e tuí ʻa ia naʻe moʻui ki muʻa ke tokonaki ʻe Sihova ha lao ki ʻIsilelí pea ki muʻa fuoloa ʻi hono fakaʻatā ʻe Kalaisi ʻa e hala ki he moʻui fakahēvaní. (Hep. 10:19, 20) ʻOku tau lau: “Talaʻehai naʻe fou fakalao mai ʻa e talaʻofa kia Epalahame pe ko hono hako, ʻa e pehe ko e ea ia ʻe oʻona ʻa mamani: ka naʻe fou mai ʻi he maʻoniʻoni mei he tui.” (Loma 4:13; Sem. 2:23, 24) Ko ia naʻe lau ʻe he ʻOtuá ʻa e faitōnunga ko ʻĒpalahamé ʻokú ne māʻoniʻoni.—Lau ʻa e Loma 4:20-22.

¹⁸ ʻOku ʻikai lava ke ʻuhinga iá ne ʻikai ha angahala ʻa ʻĒpalahame ʻi he lolotonga ʻa e tauhi kia Sihova ʻi he faai mai ʻa e ngaahi hongofuluʻi taʻú. ʻIkai, naʻe ʻikai te ne māʻoniʻoni ʻi he ʻuhinga ko iá. (Loma 3:10, 23, PM) Kae kehe, ʻi hono poto taʻefakangatangatá, naʻe fakakaukauʻi ʻe Sihova ʻa e tui anga-kehe ʻa ʻĒpalahamé mo ʻene ngaahi ngāue naʻe tupu mei aí. Naʻe ngāueʻi ʻe ʻĒpalahame tautefito ʻa e tui ki he “hako” naʻe talaʻofá ʻe hoko mai ia ʻi hono laine hohokó. Ko e Hako ko iá naʻe fakamoʻoniʻi ko ia ʻa e Mīsaiá, pe Kalaisí. (Sen. 15:6; 22:15-18) Fakatatau ki ai, makatuʻunga he “totogi huhui aia oku ia Kalaisi Jisu,” ʻoku malava ai ke fakamolemoleʻi ʻe he Fakamaau fakaʻotuá ʻa e angahala naʻe hoko ʻi he kuohilí. Ko ia ai, ko ʻĒpalahame mo e kau tangata kehe ʻo e tui he taimi ki muʻa ʻi he Kalisitiané te nau maʻu ha toetuʻu.—Lau ʻa e Loma 3:24, 25, “PM”; Sāme 32:1,  2.

Maʻu ha Tuʻunga Māʻoniʻoni he Taimí Ni

19. Ko e hā ʻoku totonu ai ke hoko ko e fakalototoʻa ki he tokolahi he ʻahó ni ʻa e vakai ʻa e ʻOtuá fekauʻaki mo ʻĒpalahamé?

¹⁹ Ko e moʻoniʻi meʻa ko ia ko e ʻOtua ʻo e ʻofá naʻá ne lau ʻa ʻĒpalahame ʻokú ne māʻoniʻoní ʻoku totonu ke fakalototoʻa ia ki he kau Kalisitiane moʻoni he ʻaho ní. Naʻe ʻikai lau ia ʻe Sihova ʻokú ne māʻoniʻoni ʻi he ʻuhinga ʻokú ne fai ki he faʻahinga naʻá ne paniʻaki ʻa e laumālié ke nau hoko ko e “kaungā-ea mo Kalaisi.” Ko e tokolahi fakangatangata ʻo e kulupu ko iá ʻoku “fakaului ki he faʻahinga tapu” pea ʻoku tali kinautolu ke nau hoko ko e “ngaahi foha ʻo e ʻOtua.” (Loma 1:7; 8:14, 17, 33) ʻI hono kehé, naʻe hoko ʻa ʻĒpalahame ko e ‘kaumeʻa ʻo e ʻOtuá’—pea naʻe hoko ia ki muʻa ke fai ʻa e feilaulau huhuʻí. (Sem. 2:23, Ko e Taulua; Ai. 41:8) Fēfē leva ʻa ʻene fekauʻaki mo e kau Kalisitiane moʻoni ʻoku nau ʻamanaki ke moʻui ʻi he Palataisi fakaemāmani ʻe toe fakafoki maí?

20. ʻOku ʻamanekina ʻe he ʻOtuá ʻa e hā mei he faʻahinga ko ia ʻokú ne vakai ki ai he ʻahó ni ʻoku nau māʻoniʻoni, hangē ko ia naʻá ne ʻamanekina meia ʻĒpalahamé?

²⁰ Kuo teʻeki ke maʻu ʻe he faʻahinga ko ení ʻa e ‘meʻaʻofa taʻetotongi ʻo e māʻoniʻoní’ fakataha mo e vakai atu ki he moʻui fakahēvani fakafou he “totogi huhui aia oku ia Kalaisi Jisu.” (Loma 3:24, PM; 5:15, 17, NW) Ka neongo ia, ʻoku nau ngāueʻi ʻa e tui lahi ki he ʻOtuá mo ʻene ngaahi tokonakí, pea ʻoku nau fakahāhā ʻenau tuí ʻaki ʻa e ngāue lelei. Ko e taha ʻo e ngāue ko iá ko hono “malangaʻaki ʻa e Puleʻanga ʻo e ʻOtua, ʻo . . . akoʻaki ʻa e ngaahi meʻa ʻoku kau ki he ʻEiki ko Sīsū Kalaisi.” (Ng. 28:31) Ko ia ai, ʻoku lava ke vakai ʻa Sihova ki he faʻahinga ko ení ʻoku nau māʻoniʻoni ʻi he ʻuhinga tatau mo ʻene vakai kia ʻĒpalahamé. Ko e meʻaʻofa ʻoku maʻu ʻe he faʻahinga peheé—ʻa e kaumeʻa mo e ʻOtuá—ʻoku kehe ia mei he ‘meʻaʻofa taʻetotongi’ naʻe maʻu ʻe he kau paní. Ka neongo ia, ko ha meʻaʻofa moʻoni ia ʻoku nau tali ʻi he houngaʻia lahi.

21. Ko e hā e ʻaonga ʻoku ala maʻu koeʻuhi ko e ʻofa mo e fakamaau totonu ʻa Sihová?

²¹ Kapau ʻokú ke ʻamanaki ke maʻu ʻa e moʻui taʻengata ʻi he māmaní, ʻoku totonu ke ke ʻiloʻi ko e faingamālie ko ení ʻoku ʻikai hoko mai ia kiate koe koeʻuhí ko ha ngāue taʻehanotaumuʻa ʻa ha pule fakaetangata. ʻI hono kehé, ʻoku tapua atu ai ʻa e taumuʻa fakapotopoto ʻa e Hau Fakalevelevá. Kuo fou ʻa Sihova ʻi he sitepu hokohoko ke fakahokoʻaki ʻene taumuʻá. Ko e ngaahi sitepu ko ení kuo fehoanaki ia mo e fakamaau totonu moʻoní. ʻIkai ngata aí, kuo tapua atu ai ʻa e ʻofa lahi ʻa e ʻOtuá. Ko ia naʻe lava ai ke pehē ʻe Paula: “Ko e ʻOtua ʻoku ne fakaha ʻa e moʻoni o ʻene ʻofa aʻana kiate kitautolu ʻi he pekia ʻa Kalaisi maʻatautolu, lolotonga ʻoku tau kei angahala.”—Loma 5:8.

[Fakamatala ʻi lalo]

ʻOkú Ke Manatuʻi?

• Naʻe maʻu ʻe he fānau ʻa ʻĀtamá ʻa e tukufakaholo ko e hā, pea ko e hā hono olá?

• Naʻe anga-fēfē hono tokonaki ha fetongi huhuʻi fehoanakimālié, pea ʻi he ʻuhinga fē ne ʻi ai ai ha fehoanakimālié?

• Ko e meʻaʻofa ʻo e lau ʻokú ke māʻoniʻoní naʻe ʻoatu ai ʻa e ʻamanaki ko e hā kiate koe?

[Fakatātā ʻi he peesi 13]

Ne faiangahala e tangata haohaoa ko ʻĀtamá. Ne fai ʻe he tangata haohaoa ko Sīsuú ha “fetongi huhuʻi” fehoanakimālie

[Fakatātā ʻi he peesi 15]

Ko e ongoongo lelei—fakafou ʻia Sīsuú ʻe lava ke lau ai ʻoku tau māʻoniʻoni!