“ʻOku ʻOfa ʻa e ʻOtua ki ha Taha ʻOku Vekeveke Foaki”

KO SIHOVA ʻoku fakasino mai ai ʻa e loto-fiefoakí. Ko e moʻoni, ʻoku pehē ʻe he Tohitapú ko ia ʻa e Tokotaha-Foaki ʻo e “foaki lelei kotoabe moe foaki haohaoa kotoabe.” (Semisi 1:​17, PM) Ko e fakatātaá, fakakaukau atu ki he ngaahi meʻa naʻe fakatupu ʻe he ʻOtuá. Naʻá ne ngaohi ʻa e meʻakai ʻa ia ʻoku vovo, ʻo ʻikai ke taʻehanoifo; ko e ngaahi matalaʻiʻakau lanu kehekehe, ʻo ʻikai hala mo ha lanu; ngaahi tō fakaholomamata ʻa e laʻaá, ʻo ʻikai ke nenefu. ʻIo, ko e tafaʻaki kotoa pē ʻo e fakatupu ʻa Sihová ʻoku ʻomai ai ʻa e fakamoʻoni ʻo ʻene ʻofá mo e loto-fiefoakí. (Sāme 19:​1, 2; 139:14) ʻIkai ko ia pē, ko Sihová ko ha Tokotaha vēkeveke foaki. ʻOkú ne fiefia ʻi he fai lelei maʻa ʻene kau sevānití.​—Sāme 84:11; 149:4.

Naʻe fekauʻi ʻa e kau ʻIsilelí ke nau fakahāhā ʻa e loto-fiefoaki ʻa e ʻOtuá ʻi heʻenau feangaingaʻakí. “ʻE ʻikai te ke fakafefeka ho loto ki ho tokoua masiva na pea ʻe ʻikai te ke fakanimamaʻu ki ai,” ko e tala ange ia ʻe Mōsese kiate kinautolú. “Kuo pau te ke ʻange, pea ʻe ʻikai mamahi ho loto ʻi hoʻo ʻange ki ai.” (Teutalonome 15:​7, 10) Koeʻuhi ko e foakí naʻe pau ke haʻu ia mei he lotó, naʻe pau ai ke fiefia ʻa e kau ʻIsilelí ʻi he ngaahi ngāue loto-fiefoakí.

Naʻe ʻoange ki he kau Kalisitiané ʻa e enginaki meimei tatau. Ko e moʻoni, naʻe pehē ʻe Sīsū ʻoku ʻi ai ʻa e “monuʻia lahi ʻi he fai ha foaki atu.” (Ngāue 20:35) Ko e kau ākonga ʻa Sīsuú ko e faʻifaʻitakiʻanga ia ʻi he vēkeveke foakí. Ko e fakatātaá, ʻoku pehē ʻi he Tohitapú ko e faʻahinga ko ia naʻa nau hoko ko e kau tui ʻi Selusalemá naʻa “nau fakatau atu honau ngaahi tofiʻa mo e ngaʻotoʻota; mo nau tufa ʻa e paʻanga naʻe maʻu ai ki he kakai kehekehe, ʻo fakatatau ki heʻenau masiva.”​—Ngāue 2:​44, 45.

Ka ko e kau Siutea loto-fiefoaki ko ení naʻa nau tō ki he masivá ki mui. ʻOku ʻikai ke fakamahinoʻi ʻe he Tohitapú ia ʻa e meʻa ko ia naʻá ne ʻomai kinautolu ki honau tuʻunga ko iá. ʻOku pehē ʻe he kau mataotao ʻe niʻihi ko e honge ʻoku lave ki ai ʻi he Ngāue 11:​28, 29 ʻoku ngalingali ko e tupuʻangá ia. Kae kehe, ko e kau Kalisitiane Siuteá naʻa nau ʻi ha ngaahi tuʻunga mātuʻaki faingatāmaki, pea naʻe loto ʻa Paula ke fakapapauʻi ʻe tokangaʻi ʻenau ngaahi fiemaʻú. ʻE anga-fēfē haʻane fai ia?

Ko ha Tātānaki Maʻá e Masivá

Naʻe kole ʻa Paula ki he tokoni ʻa e ngaahi fakatahaʻanga ʻi he feituʻu mamaʻo ʻo hangē ko Masitōniá, pea naʻá ne fokotuʻutuʻu ki ha tātānaki ke ʻave maʻá e kau Kalisitiane masiva ʻaupito ʻi Siuteá. Naʻe tohi ʻa Paula ki he kau Kolinitoó: “Hange ko ia naʻa ku tuʻutuʻuni ki he ngaahi siasi ʻi Kaletia, ke pehe pe hoʻomou fai ʻe kimoutolu. ʻI he ʻuluaki ʻaho ʻo e uike kotoa pe, ke taki taha taʻofi ʻi ʻapi, ʻo tauhi, ha meʻa kuo hulu atu ʻi heʻene koloa.”a​—1 Kolinito 16:​1, 2.

Naʻe fakahangahanga ʻa Paula ke ʻoatu fakavavevave ʻa e paʻanga ko ení ki he fanga tokoua ʻi Selusalemá, ka naʻe tuai ʻa hono tali ʻe he kau Kolinitoó ʻa e ngaahi fakahinohino ʻa Paulá. Ko e hā hono ʻuhingá? Naʻa nau ongonoa ki he faingataʻaʻia ʻa honau fanga tokoua ʻi Siuteá? ʻIkai, he naʻe ʻilo ʻe Paula ko e kau Kolinitoó naʻa nau “hulu atu ʻi he meʻa kotoa pe​—ʻi he tui, mo e akonaki, mo e ʻilo loloto, mo e feinga kehekehe.” (2 Kolinito 8:7) Hangehangē, naʻa nau mātuʻaki femoʻuekina ʻi he tokangaʻi ʻo e ngaahi meʻa mahuʻinga kehe ʻa ia naʻe lave ki ai ʻa Paula ʻi heʻene ʻuluaki tohi kiate kinautolú. Ka ʻi he taimi ko ení naʻe ʻi ai ʻa e fiemaʻu fakavavevave ki he tuʻunga ʻi Selusalemá. Ko ia, naʻe lave ʻa Paula ki he ʻīsiu ko iá ʻi heʻene tohi hono ua ki he kau Kolinitoó.

Kole ki ha Tokoni Loto-Fiefoaki

ʻUluakí, naʻe talanoa ʻa Paula ki he kau Kolinitoó ʻo fekauʻaki mo e kau Masitōniá, ʻa ia ko ha faʻifaʻitakiʻanga ʻenau tali ki he feinga tokoní. “Neongo naʻe ʻahiʻahiʻi kinautolu ʻaki ha fuʻu mamahi,” ko e tohi ia ʻa Paulá, “naʻe opeope ʻenau fiefia: pea neongo e ʻangoʻango ʻenau masiva, ka ka mahake mei ai ha fuʻu koloa foaki.” Naʻe ʻikai fiemaʻu ke toe uki ʻa e kau Masitōniá ia. ʻI hono kehé, naʻe pehē ʻe Paula “kuo nau fai ki he ngātanga o ʻenau mafai, ʻio, ʻo mahili atu; pea ko e langaʻi ʻe kinautolu, heʻenau kole fakamātoato ke mau ofa ʻo tuku ke nau kau ʻi he [tokoní].” Ko e vēkeveke loto-fiefoaki ʻa e kau Masitōniá ʻoku toe ngali kehe lahi ange ia ʻi heʻetau vakai atu ko kinautolú tonu naʻe “ʻangoʻango ʻenau masiva.”​—2 Kolinito 8:​2-4.

ʻI hono fakahīkihikiʻi ʻo e kau Masitōniá, naʻe feinga ai ʻa Paula ke langaʻi hake ha laumālie fakavahavahaʻa ʻi he lotolotonga ʻo e kau Kolinitoó? ʻIkai ʻaupito, he naʻá ne ʻilo naʻe ʻikai ko ha founga totonu ia ki he fakaueʻilotó. (Kaletia 6:4) ʻIkai ko ia pē, naʻá ne ʻiloʻi naʻe ʻikai fiemaʻu ke fakamaaʻi ʻa e kau Kolinitoó ki hono fai ʻa e meʻa ʻoku totonú. Ka, naʻá ne falala naʻe ʻofa moʻoni ʻa e kau Kolinitoó ʻi honau fanga tokoua Siuteá pea nau holi ke foaki ki he feinga tokoní. “ʻI he taʻu kuo hili,” ko ʻene tala ange ia kiate kinautolú, “naʻa mou kamata . . . ʻo ʻikai ʻi hono kamata fai pe ʻo e meʻa, ka ʻi hono oʻi foki.” (2 Kolinito 8:​10) Ko e moʻoni, ʻi he ngaahi tafaʻaki ʻe niʻihi ʻo e feinga tokoní, naʻe hoko ai ko ha faʻifaʻitakiʻanga ʻa e kau Kolinitoó tonu. “ʻOku ou ʻilo hoʻomou loto-fie-fai; ʻio, ko ia ia ʻoku ou faʻa polepole ai ʻiate kimoutolu ki he kau Masitonia,” ko e tala ange ia ʻe Paula kiate kinautolú, ʻo tānaki atu: “Ko hoʻomou fai velenga ko ia naʻe oʻi ai ʻa e toko lahi [ʻo kinautolu].” (2 Kolinito 9:​2, fakaʻītali ʻamautolu.) Neongo ia, ʻi he taimi ko iá, naʻe fiemaʻu ki he kau Kolinitoó ke fakahanga ʻenau faivelengá mo e mateuteu ʻo ʻenau fakakaukaú ki he ngāue.

Ko ia, naʻe tala ange ʻe Paula kiate kinautolu: “Ke taki taha fai ki he meʻa kuo ne tuʻutuʻuni ʻi hono loto; pea ʻoua ʻe fai ʻi he mamahi, pe ko e puʻia; he ʻoku ʻofa ʻa e ʻOtua ki ha taha ʻoku vekeveke foaki.” (2 Kolinito 9:7) Ko e taumuʻa leva ʻa Paulá, naʻe ʻikai ko hono uki ʻa e kau Kolinitoó, koeʻuhi heʻikai lava ke hoko ha taha ko e tokotaha vēkeveke foaki ʻi hono fakamālohiʻí. ʻOku hā mahino, naʻe mahalo ʻa Paula kuo ʻosi ʻi ai ʻa e fakaueʻiloto totonú, ko e tokotaha taki taha kuó ne ʻosi tuʻutuʻuni ke foaki. Tānaki atu ki aí, naʻe tala ʻe Paula kiate kinautolu: “Kapau ko loto fiefai ʻoku taʻutu mai, ko ʻene hoifua ai ʻa e ʻEiki ʻoku fakafuofua ʻaki ʻa e meʻa ʻoku ne maʻu, ʻo ʻikai ʻaki ʻa e meʻa ʻoku ʻikai te ne maʻu.” (2 Kolinito 8:​12) ʻIo, ʻi he ʻi ai ʻa e tuʻunga mateuteú​—ʻi hono ueʻi ha taha ʻe he ʻofá​—ko e meʻa ʻokú ne foakí ʻe fakahōifua ia ki he ʻOtuá, tatau ai pē pe ʻoku hā ngali siʻi hono lahí.​—Fakafehoanaki mo Luke 21:​1-4.

Kau Vēkeveke Foaki he ʻAho Ní

Ko e feinga tokoni maʻá e fanga tokoua Siuteá ʻokú ne tokonaki mai ha faʻifaʻitakiʻanga lelei ʻaupito ki hotau ʻahó ni. Kuo fakahoko ʻe he Kau Fakamoʻoni ʻa Sihová ha feingangāue fakamalanga ʻi māmani lahi, ʻo ʻomi ʻa e meʻakai ki he laui miliona ko ia ʻoku nau honge fakalaumālié. (Aisea 65:​13, 14) ʻOku nau fai eni ʻi he talangofua ki he fekau ʻa Sīsuú: “Ko ia ke mou ō, ʻo ngaohi ʻa e ngāhi kakai kotoa pe ko ʻeku kau ako, ʻi he papitaiso kinautolu . . . mo e akoʻi kinautolu ke tauhi ʻa e ngāhi meʻa kotoa pe kuo u tuʻutuʻuni atu.”​—Mātiu 28:​19, 20.

Ko hono fakahoko ʻo e ngāué ni ʻoku ʻikai ko ha meʻa faingofua. ʻOku kau ki ai ʻa hono tauhi ʻa e ngaahi ʻapi fakamisinale pea mo e ngaahi vaʻa laka hake he lauingeaú takatakai ʻi he māmaní. ʻOku toe kau ki ai ʻa e langa ʻo e ngaahi Fale Fakatahaʻanga mo e ngaahi Holo ʻAsemipilī koeʻuhi ke maʻu ai ʻe he kau lotu ʻa Sihová ha ngaahi feituʻu feʻunga ke fakataha ai mo fefakalototoʻaʻaki. (Hepelu 10:​24, 25) ʻI he taimi ʻe niʻihi, ʻoku toe tokonaki foki ʻe he Kau Fakamoʻoni ʻa Sihová ha foaki tokoni ki he ngaahi feituʻu kuo fakaʻauha ʻe he fakatamaki fakanatulá.

Fakakaukau atu foki, ki he fakamole lahi ʻi he pulusí. Ko e ʻavalisí, ʻi he uike taki taha, ʻoku laka hake he ngaahi tatau ʻe 22,000,000 ʻo e Taua Leʻo pe ngaahi tatau nai ʻe 20,000,000 ʻo e Awake! ʻoku pulusí. ʻOku tānaki atu ki he meʻakai fakalaumālie ko eni ʻoku tokonaki maʻu peé ʻa e ngaahi tohi, ngaahi polosiua, ngaahi tepi kāsete, mo e ngaahi tepi vitiō ʻe laui miliona ʻa ia ʻoku faʻu ʻi he taʻu taki taha.

ʻOku poupouʻi fēfē ʻa e ngāue kotoa ko ení? ʻAki ʻa e ngaahi tokoni loto-fiefoaki. ʻOku fai eni, ʻikai ʻi he fai fakahāhā pe mei ha taumuʻa siokita, ka ke fakatupulekina ʻa e lotu moʻoní. Ko ia, ko e ngaahi foaki peheé ʻokú ne ʻomai ʻa e fiefia ki he tokotaha foakí, fakataha mo e tāpuaki ʻa e ʻOtuá. (Malakai 3:​10; Mātiu 6:​1-4) Naʻa mo e fānau ʻi he lotolotonga ʻo e Kau Fakamoʻoni ʻa Sihová ʻoku nau fakahaaʻi ʻenau hoko ko e kau nima-homo, vēkeveke foaki. Ko e fakatātaá, hili e fanongo ki he fakaʻauha naʻe fakatupunga ʻe ha afā ʻi he konga ʻe taha ʻo e ʻIunaite Seteté, naʻe foaki ai ʻe ha kiʻi taʻu fā ko Allison ʻa e US$2. “Ko e paʻanga kotoa eni ʻi heʻeku pangikeé,” ko ʻene tohí ia. “ʻOku ou ʻilo kuo mole mei he fānaú ʻa e kotoa ʻo ʻenau ngaahi meʻa vaʻingá mo e ngaahi tohí, mo ʻenau ʻū tamapuá. Mahalo pē ʻe lava ke mou ngāueʻaki ʻa e paʻanga ko ení ke fakatau mai ʻaki ha tohi maʻa ha kiʻi taʻahine ʻi hoku taʻú.” Ko Maclean, taʻu valu, naʻá ne tohi ʻo pehē naʻá ne fiefia ʻi he ʻikai mate ha taha ʻo e fanga tokouá ʻi he afaá. Naʻá ne tānaki atu ki ai: “Kuó u maʻu ʻa e US$17 ʻi hono fakatau atu fakataha mo ʻeku tamaí ha ngaahi tāpuniʻi vaʻe meʻalele. Naʻe teu ke u fakatau mai ʻaki ha meʻa ʻa ʻeku paʻangá, ka naʻá ku fakakaukau leva ʻo fekauʻaki mo e fanga tokouá.”​—Toe sio ki he puha ʻi ʻolungá.

Ko e moʻoni, ʻoku fiefia ʻa e loto ʻo Sihová ke sio fakatouʻosi ki he taʻu siʻi mo e taʻumotuʻa ʻoku nau fakamuʻomuʻa ʻa e ngaahi meʻa ʻo hono Puleʻangá ʻaki ʻa e ‘fakaʻapaʻapa kiate ia ʻaki ʻenau koloá.’ (Palovepi 3:​9, 10) Ko e moʻoni, heʻikai moʻoni malava ke fakatuʻumālieʻi ʻe ha taha ʻa Sihova, he ʻoku ʻaʻana ʻa e meʻa kotoa pē. (1 Kalonikali 29:​14-​17) Ka ko hono poupouʻi ʻo e ngāué ko ha monū ia ʻokú ne ʻoange ai ʻa e faingamālie ki he tokotaha lotú ke fakahāhā ʻa ʻene ʻofa kia Sihová. ʻOku mau fakamālōʻia ʻa e tokotaha kotoa kuo ueʻi ia ʻe hono lotó ʻi ha founga pehē.

[Fakamatala ʻi lalo]

[Puha ʻi he peesi 26, 27]

Ngaahi Founga ko ia ʻOku Fili ki Ai ʻa e Niʻihi ke Foaki ʻa e Ngaahi Meʻaʻofa ki he Ngāue ʻi Māmani Lahí

ʻOku tuku mavahe pe vaheʻi ʻe he tokolahi ha paʻanga, ʻa ia ʻoku nau tuku ki he ngaahi puha meʻaʻofa kuo leipolo: “Ko e Ngaahi Meʻaʻofa ki he Ngāue ʻa e Sōsaietí ʻi Māmani Lahí​—Mātiu 24:14.” ʻI ha māhina taki taha ʻoku ʻoatu ai ʻe he ngaahi fakatahaʻangá ʻa e paʻanga ko ení ki he ngaahi ʻuluʻi ʻapitanga ʻo e māmaní ʻi Brooklyn, Niu ʻIoké, pe ki he ʻōfisi vaʻa fakalotofonuá.

Ko e ngaahi tokoni paʻanga loto-fiefoakí ʻe lava ke ʻoatu fakahangatonu ia foki ki he Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-​2483, pe ki he ʻōfisi ʻo e Sōsaietí ʻoku ngāue ʻi ho fonuá. ʻE lava ke tokoni ʻaki nai ʻa e ngaahi siueli pe ngaahi koloa mahuʻinga kehe. Ko ha tohi nounou ʻo fakamatalaʻi ai ko ha meʻaʻofa fakahangatonu ia ʻoku totonu ke ʻave fakataha ia mo e ngaahi tokoni ko ení.

Fokotuʻutuʻu ʻo e Tokoni Fai Fakatuʻunga

ʻE lava ke ʻoatu ki he Sōsaieti Taua Leʻó ha paʻanga ʻi he malumalu ʻo ha fokotuʻutuʻu makehe, ʻa ia kapau ʻe ʻi ai ha fiemaʻu fakafoʻituitui ʻa e tokotaha foakí, ʻe toe fakafoki mai kiate ia ʻene meʻaʻofá. Ki ha fakamatala lahi ange, kātaki ʻo fetuʻutaki ki he Treasurer’s Office ʻi he tuʻasila kuo hiki ʻi ʻolungá.

Foaki ʻOsi Palani

Tānaki atu ki he ngaahi meʻaʻofa paʻanga fakahangatonú mo e ngaahi tokoni paʻanga fai fakatuʻungá, ʻoku ʻi ai ʻa e ngaahi founga kehe ʻo e foakí ke ʻaonga ki he ngāue ʻo e Puleʻangá ʻi māmani lahí. ʻOku kau ki heni ʻa e:

Maluʻi: ʻE lava ke tohi-tuku nai ki he Sōsaieti Taua Leʻó ha tohi fakamoʻoni maluʻi moʻui pe ko ha fokotuʻutuʻu ʻo ha vāhenga mālōlō.

Ngaahi ʻAkauni Pangikē: Ko e ngaahi ʻakauni pangikeé, ngaahi tohi fakamoʻoni fakahuú, pe ko e ngaahi ʻakauni vāhenga mālōlō tāutahá ʻe lava ʻo tuku nai ia ke maluʻi pe ʻai ke totongi atu ia ʻi he maté ki he Sōsaieti Taua Leʻó, ʻo fakatatau ki he ngaahi fiemaʻu ʻa e pangikē fakalotofonuá.

Ngaahi ʻInasi mo e Ngaahi Pōnite: ʻE foaki atu nai ʻa e ngaahi ʻinasi mo e ngaahi pōnite ki he Sōsaieti Taua Leʻó ko ha meʻaʻofa fakahangatonu pe ʻi ha malumalu ʻo ha fokotuʻutuʻu ʻa ia ʻe hokohoko ai hono totongi ʻo ha paʻanga hū mai ki he tokotaha foakí.

Kelekele: ʻE lava nai ke foaki ha konga kelekele ʻe ala fakatau ki he Sōsaieti Taua Leʻó ʻi hano fai ha meʻaʻofa fakahangatonu pe ʻi hano tauhi ha kelekele ʻo e tokotaha foakí, ʻa ia ʻe lava ke hokohoko atu ʻene nofo aí ʻi he lolotonga ʻa ʻene kei moʻuí. ʻOku totonu ke fetuʻutaki ʻa e tokotaha ko iá ki he Sōsaietí ki muʻa ke ʻoatu ha kelekele ki he Sōsaietí.

Ngaahi Tohi-Tuku mo e Ngaahi Talāsiti: ʻE tohi-tuku nai ha koloa pe paʻanga ki he Sōsaieti Taua Leʻó fakafou ʻi ha tohi-tuku fakahoko fakalao, pe ko e hingoa ʻo e Sōsaietí ʻe tohi-tuku ki ai ha aleapau ʻo ha talāsiti. Ko ha talāsiti ʻoku maʻu ʻaonga mei ai ha kautaha fakalotu te ne tokonaki mai nai ha ngaahi ʻaonga pau fakaetukuhau.

Hangē ko ia ʻoku ʻuhinga ki ai ʻa e kupuʻi lea “foaki ʻosi palaní,” ko e faʻahinga tokoni ko ʻení ʻoku fiemaʻu anga-maheniʻaki pē ha palani ʻi he tafaʻaki ʻa e tokotaha foakí. Ke tokoni ki he faʻahinga tāutaha ʻoku nau holi ke tokoniʻi ʻa e Sōsaietí fakafou ʻi ha founga ʻo e foaki ʻosi palaní, kuo teuteu ai ʻe he Sōsaietí ha polosiua lea faka-Pilitānia kuo fakakaveinga ko e Planned Giving to Benefit Kingdom Service Worldwide. Naʻe hiki ʻa e polosiuá ko e tali ia ki he ngaahi fakaʻekeʻeke lahi kuo maʻu ʻe he Sōsaietí ʻo fekauʻaki mo e ngaahi meʻaʻofá, ngaahi tohi-tukú, mo e ngaahi talāsití. ʻOku toe ʻi ai foki ʻa e fakamatala ʻaonga ʻoku tānaki atu ki ai ʻo fekauʻaki mo hono palani ʻo e kelekelé, paʻangá, mo e tukuhaú. Pea ʻoku faʻufaʻu ia ke tokoniʻi ʻa e faʻahinga tāutaha ʻi he ʻIunaite Seteté ʻa ia ʻoku nau palani ke ʻai ha meʻaʻofa makehe ki he Sōsaietí he taimí ni pe ko hono tuku ʻo ha tohi-tuku ʻi he maté ke nau fili ha founga ʻaonga mo feʻunga taha ʻi he fakakaukau ki honau fāmilí mo e ngaahi tuʻunga fakafoʻituituí.

Hili hono lau ʻo e polosiuá mo e maʻu faleʻi mei he Tesi Foaki ʻOsi Palaní, kuo malava ai ʻa e tokolahi ke tokoni ki he Sōsaietí pea ʻi he taimi tatau, ʻokú ne maʻu ʻa e ʻaonga lahi mei he ngaahi ʻaonga fakaetukuhau ʻi he fai peheé. Ko e Tesi Foaki ʻOsi Palaní ʻoku totonu ke fakaʻekeʻeke ki ai pea maʻu ha tatau ʻo ha fakamoʻoni papau ʻo fekauʻaki mo ha taha pē ʻo e ngaahi fokotuʻutuʻú ni. Ko kinautolu ʻoku mahuʻingaʻia ʻi ha polosiuá pe ʻi ha taha pē ʻo e ngaahi fokotuʻutuʻu foaki ʻosi palani ko ení ʻoku totonu ke ne fetuʻutaki ki he Tesi Foaki ʻOsi Palaní, ʻi he fai tohi pe ʻi he telefoni, ki he tuʻasila ʻoku hiki ʻi laló pe ki he ʻōfisi ʻo e Sōsaietí ʻa ia ʻoku ngāue ʻi ho fonuá.

Planned Giving Desk

Watch Tower Bible and Tract Society of Pennsylvania

100 Watchtower Drive, Patterson, New York 12563-​9204

Telefoni: (914) 878-​7000

[Puha ʻi he peesi 28]

Ko e Kau Vēkeveke Foaki Foki mo e Fānaú!

ʻOku ou loto ke ʻoatu eni kiate kimoutolu ke ngaohi mai ʻaki ha ngaahi tohi lahi ange maʻa kimautolu. Naʻá ku tātānaki ʻa e paʻanga ko ení ʻi heʻeku tokoni ki heʻeku tangataʻeikí. Fakamālō ʻaupito atu ki he ngāue mālohi kotoa ʻoku mou faí.​—Pamela, taʻu fitu.

ʻOku ou ʻoatu ʻa e US$6.85 ke tokoni ki hano langa ʻo ha toe ngaahi Fale Fakatahaʻanga. Naʻá ku maʻu ia ʻi he faʻahitaʻu māfana ko ení ʻi heʻeku fakatau atu ha inu lēmani.​—Selena, taʻu ono.

Naʻá ku tauhi hake ha motuʻa-moa ʻa ia naʻá ku maʻu mei ai ha moa taʻane mo ha toe motuʻa-moa ʻe taha. Naʻá ku fakatapui ʻa e moa fakaʻosí maʻa Sihova. Naʻe faifai pē ʻo ne fanauʻi ha moa ʻe tolu, ʻa ia naʻá ku fakatau atu. ʻOku ou ʻoatu heni ʻa e paʻangá maʻá e ngāue ʻa Sihová.​—Thierry, taʻu valu.

Ko e paʻanga kotoa eni ʻoku ou maʻú! Kātaki ʻo ngāue-fakapotopoto-ʻaki ia. Naʻe faingataʻa ʻa hono tātānakí. Ko e $21 ena.​—Sarah, taʻu hongofulu.

Naʻá ku ikunaʻi ʻa e pale ʻuluakí ʻi ha ʻasainimeni fakaako, ko ia naʻe pau ai ke u hoko atu ki he feʻauhi fakafeituʻú. Naʻá ku toe ikunaʻi ai foki ʻa e pale ʻuluakí peá u pale ua leva ʻi he ngaahi feʻauhi fakaʻosi fakavahé. Ki he kotoa ʻo e ngaahi meʻá ni, naʻá ku maʻu ai ha paʻanga. Naʻá ku loto ai ke vahevahe mo e Sōsaietí ʻa e niʻihi ʻo e paʻanga ko iá. ʻOku ou ongoʻi naʻe malava ke u ikunaʻi ʻa e ngaahi palé ni koeʻuhi ko e ako kuó u maʻu ʻi he Akoʻanga Fakafaifekau Fakateokalatí. Naʻá ku ongoʻi loto-falala ʻi hono ʻoatu ʻa ʻeku fakamatalá ʻi muʻa he kau fakamāú.​—Amber, kalasi hono onó.

ʻOku ou saiʻia ke ʻoatu eni kiate kimoutolu maʻa Sihova. ʻEke kiate ia pe ko e hā ke fai ʻaki iá. ʻOkú ne ʻafioʻi ʻa e meʻa kotoa pē.​—Karen, taʻu ono.

[Fakatātā ʻi he peesi 25]

Ko e ngaahi ngāue ʻa e Kau Fakamoʻoni ʻa Sihová ʻoku poupouʻi ia ʻaki ʻa e ngaahi tokoni loto-fiefoaki