Vahe 5

Founga ke Hanganaki Mavahe Ai mei he Māmaní

“Oku ikai o mamani akimoutolu.”—SIONE 15:19, PM.

 1. Ko e hā naʻe fakamamafaʻi ʻe Sīsū he lolotonga ʻa e pō fakaʻosi ʻo ʻene ʻi he māmaní ʻi hono tuʻunga ko ha tangatá?

LOLOTONGA ʻa e pō fakaʻosi ʻo Sīsū ʻi he māmaní ʻi hono tuʻunga ko ha tangatá, naʻá ne fakahaaʻi ai ʻene tokanga lahi ki ha kahaʻu lelei ʻa hono kau muimuí. Naʻe aʻu ʻo ne lotu fekauʻaki mo e meʻá ni, ʻo ne pehē ki heʻene Tamaí: “ʻOku ʻikai te u pehē, ke ke toʻo kinautolu mei māmani, ka ke ke taʻofi kinautolu mei he Fili. ʻOku ʻikai te nau ʻo māmāni, hange ko au, ʻoku ʻikai te u ʻo māmāni.” (Sione 17:15, 16) ʻI he kole loto-moʻoni ko ʻení, naʻe fakahāhaaʻi fakatouʻosi ai ʻe Sīsū ʻene ʻofa loloto ki hono kau muimuí pea mo e mahuʻinga ʻo ʻene lea naʻá ne fai ki muʻa ange ʻi he pō ko iá ki he niʻihi ʻo kinautolu: “Oku ikai o mamani akimoutolu.” (Sione 15:19, PM) ʻOku hā mahino, naʻe mahuʻinga lahi kia Sīsū ke hanganaki mavahe hono kau muimuí mei he māmaní!

 2. Ko e hā ʻa e “mamani” ko ia naʻe ʻuhinga ki ai ʻa Sīsuú?

² Ko e “mamani” naʻe lave ki ai ʻa Sīsuú ʻoku ʻuhinga ia ki he kotoa ʻo e faʻahinga ʻo e tangatá ʻoku nau mavahe mei he ʻOtuá, ʻo puleʻi ʻe Sētane, pea pōpula ki he laumālie siokita mo loto-mahikihiki ʻoku tupu meiate iá. (Sione 14:30; Efeso 2:2; 1 Sione 5:19) Ko e moʻoni, ko e “takaua [mo e] mamani [ko iá] ko e fakafili ia ki he ʻOtua.” (Semisi 4:4) ʻE lava fēfē leva ki he faʻahinga kotoa ʻoku nau loto ke nofo maʻu ʻi he ʻofa ʻa e ʻOtuá ke nau ʻi he māmaní kae mavahe mei ai? Te tau lāulea ki he ngaahi founga ʻe nima: ʻi he mateaki maʻu pē ki he Puleʻanga ʻo e ʻOtuá ʻi he malumalu ʻo Kalaisí pea tuʻu-ʻatā ʻi he ngaahi meʻa fakapolitikale ʻo e māmaní, ʻi hono talitekeʻi ʻa e laumālie ʻo e māmaní, ʻi he hoko ʻo fakanānā ʻi hotau valá mo e teuteú, ʻi hono tauhi hotau matá ke huʻufataha, pea ʻi hono tui hotau teunga tau fakalaumālié.

MATEAKI MO TUʻU-ʻATĀ MAʻU PĒ

 3. (a) Naʻe anga-fēfē ʻa e vakai ʻa Sīsū ki he ngaahi meʻa fakapolitikale ʻo hono taimí? (e) Ko e hā ʻoku lava ai ke pehē ʻoku ngāue ʻa e kau muimui pani ʻo Sīsuú ko e kau fakafofonga? (Fakakau ai ʻa e fakamatala ʻi laló.)

³ ʻI he ʻikai ke kau ʻi he ngaahi meʻa fakapolitikale ʻo hono taimí, naʻe tokangataha ʻa Sīsū ia ki he malanga fekauʻaki mo e Puleʻanga ʻo e ʻOtuá, ʻa e founga-pule fakahēvani ʻi he kahaʻú ʻa ia te ne Tuʻi aí. (Taniela 7:13, 14; Luke 4:43; 17:20, 21) Ko ia, ʻi he taimi naʻá ne ʻi he ʻao ai ʻo Kōvana Ponitō Pailato ʻo Lomá, naʻe malava ʻe Sīsū ke ne pehē: “Ko hoku puleʻanga ʻoku ʻikai ʻo e maama ko eni.” (Sione 18:36) ʻOku faʻifaʻitaki ʻa hono kau muimui faitōnungá ki heʻene faʻifaʻitakiʻangá ʻaki ʻenau mateaki kia Kalaisi mo hono Puleʻangá pea ʻi heʻenau fanongonongo ʻa e Puleʻanga ko iá ki he māmaní. (Mātiu 24:14) “Ko ia ko e kau fakafofonga kimautolu ʻo Kalaisi,” ko e tohi ia ʻa e ʻapositolo ko Paulá. “Ko ʻemau kole ʻeni ʻoku fai ko e fetongi ʻo Kalaisi, Tuku ke fai homou fakalelei mo e ʻOtua.”a—2 Kolinito 5:20.

 4. Kuo anga-fēfē hono fakahāhā ʻe he kau Kalisitiane moʻoní kotoa ʻa e mateaki ki he Puleʻanga ʻo e ʻOtuá? (Sio ki he puha ʻi he peesi 52.)

⁴ Koeʻuhi ʻoku fakafofongaʻi ʻe he kau fakafofongá ha tuʻunga-pule pe fonua muli, ʻoku ʻikai te nau kaunoaʻia ʻi he ngaahi meʻa fakalotofonua ʻo e ngaahi fonua ʻoku nau ngāue aí; ʻoku nau tuʻu-ʻatā maʻu pē. Kae kehe, ʻoku poupouʻi ʻe he kau fakafofongá ʻa e founga-pule ʻo e fonua ʻoku nau fakafofongaʻí. Ko e meʻa tatau pē ʻi he fekauʻaki mo e kau muimui pani ʻo Kalaisí, ʻa ē ko hoʻonautolú “kolo ʻoku tuʻu ʻi langi.” (Filipai 3:20) Ko hono moʻoní, koeʻuhi ko ʻenau malangaʻi faivelenga ʻa e Puleʻangá, kuo nau tokoniʻi ai ʻa e laui miliona ʻo e “fanga sipi kehe” ʻa Kalaisí ke nau “fakalelei mo e ʻOtua.” (Sione 10:16; Mātiu 25:31-40) ʻOku ngāue ʻa e fanga sipi kehe ko ʻení ko e kau talafekau ʻa Kalaisi ʻi he poupou ki he fanga tokoua pani ʻo Sīsuú. ʻI he tuʻunga ko e tākanga fāʻūtaha pē ʻe taha ʻoku nau poupouʻi ʻa e Puleʻanga Faka-Mīsaiá, ʻoku tauhi maʻu ai ʻe he ongo kulupú ni fakatouʻosi ʻenau tuʻu-ʻatā ʻaupito pē mei he ngaahi meʻa fakapolitikale ʻo e māmaní.—Aisea 2:2-4.

 5. ʻOku anga-fēfē ʻa e kehe ʻa e fakatahaʻanga Kalisitiané mei ʻIsileli ʻo e kuonga muʻá, pea ʻi he founga fē ʻoku fakahaaʻi ai ʻa e kehe ko ʻení?

⁵ ʻOku ʻikai ko e ʻuhinga pē ʻo e tuʻu-ʻatā ʻa e kau Kalisitiane moʻoní ko ʻenau mateaki kia Kalaisí. ʻI he ʻikai ke hangē ko ʻIsileli ʻo e kuonga muʻá, ʻa ē naʻa nau maʻu ha fonua mavahe ne foaki ange ʻe he ʻOtuá, ko ha konga kitautolu ia ʻo ha fetokouaʻaki ʻi māmani lahi. (Mātiu 28:19; 1 Pita 2:9) Ko ia, kapau te tau poupouʻi ʻa e ngaahi faʻahi fakapolitikale fakalotofonuá, ʻe kau kovi lahi ʻaupito ia fakatouʻosi ki heʻetau tauʻatāina ʻo e leá ʻi he fekauʻaki mo e pōpoaki ʻo e Puleʻangá pea mo ʻetau fāʻūtaha faka-Kalisitiané. (1 Kolinito 1:10) ʻIkai ngata aí, ʻi he lolotonga ʻo e taimi taú, te tau faitau pē ai ki hotau ngaahi kaungātuí, ʻa ē ʻoku tuʻutuʻuni mai ke tau ʻofa ki aí. (Sione 13:34, 35; 1 Sione 3:10-12) Ko ia ai, ko e ʻuhinga lelei naʻe tala ai ʻe Sīsū ki heʻene kau ākongá ke ʻoua te nau toʻo heletaá. Naʻe aʻu ʻo ne tala kiate kinautolu ke nau ʻofa ʻi honau ngaahi filí.—Mātiu 5:44; 26:52; sio ki he puha “ʻOku Ou Tuʻu-ʻAtā Maʻu Pē?” ʻi he peesi 55.

 6. ʻOku anga-fēfē ʻa e kaunga ʻa hoʻo fakatapui ki he ʻOtuá ki ho vahaʻangatae mo Sisá?

⁶ ʻI he tuʻunga ko e kau Kalisitiane moʻoní, kuo tau fakatapui ʻetau moʻuí ki he ʻOtuá, ʻikai ki ha tangata, pe ki ha kautaha fakaetangata, pe puleʻanga. ʻOku pehē ʻe he 1 Kolinito 6:19, 20: “ʻOku ʻikai ʻamoutolu ʻa kimoutolu? He naʻe fakatau kimoutolu ʻaki ha totongi.” Ko ia, lolotonga hono ʻoange kia “Sisa” ʻa e meʻa ʻoku ʻaʻaná ʻi he founga ko e fakaʻapaʻapa, ngaahi tukuhau mo e moʻulaloa fakangatangatá, ʻoku ʻoange ʻe he kau muimui ʻo Sīsuú “ki he ʻOtua ʻa e ngaahi meʻa ʻa e ʻOtua.” (Maake 12:17; Loma 13:1-7) ʻOku kau heni ʻenau lotú, ʻenau ʻofa loto-ʻaufuatoó mo ʻenau talangofua mateakí. ʻO ka fiemaʻu, ʻoku nau mateuteu ke foaki ʻenau moʻuí maʻá e ʻOtuá.—Luke 4:8; 10:27; Ngāue 5:29; Loma 14:8.

TALITEKEʻI ʻA E “LAUMALIE ʻOKU ʻO MAMANI”

7, 8. Ko e hā ʻa e “laumalie ʻoku ʻo mamani,” pea ʻoku anga-fēfē ʻa e “ngaue” ʻa e laumālie ko iá ʻi ha taha?

⁷ Ko e toe founga ʻe taha ʻoku hanganaki mavahe ai ʻa e kau Kalisitiané mei he māmaní ko hono talitekeʻi ʻa hono laumālie koví. Naʻe tohi ʻe Paula: “Talaʻehai ko e laumalie ʻoku ʻo mamani kuo mau maʻu, ka ko e Laumalie ʻoku haʻu mei he ʻOtua.” (1 Kolinito 2:12) Naʻá ne pehē ki he kau ʻEfesoó: “Naʻa mou fou ai ʻi muʻa ʻi he ʻalunga . . . fakaemaama-ko eni, ʻi he ʻalunga ʻo e ʻeiki ʻo e puleʻanga ʻo e ʻatā [pe ʻeá], ko e ʻeiki ʻo e faʻahinga laumalie ʻoku lolotonga ngaue ni ʻi he hako ʻo talangataʻa.”—Efeso 2:2, 3.

⁸ Ko e ‘ʻea,’ pe laumālie ʻo e māmaní, ko ha foʻi mālohi taʻehāmai mo faitākiekina ia ʻokú ne fakaʻaiʻai ʻa e talangataʻa ki he ʻOtuá pea pouaki “ʻa e holi ʻo e kakano, mo e holi ʻo e mata.” (1 Sione 2:16; 1 Timote 6:9, 10) Ko e “puleʻanga” pe mafai ʻo e laumālie ko ʻení ʻokú ne faitākiekina fakafou ʻi heʻene fakamānako ki he kakano angahalaʻiá, ʻi heʻene olopotó, ʻi heʻene taʻeʻunuá, pea ʻi he hangē ko e ʻeá, ʻi heʻene maʻu ʻa e tafaʻaki kotoa pē. ʻIkai ngata aí, ʻokú ne “ngaue” ʻi ha taha ʻaki ʻene fafangaʻi māmālie ia ʻaki ʻa e ngaahi anga taʻefakaʻotua, hangē ko e siokita, loto-mahikihiki, mānumanu pea mo e laumālie ʻo e tauʻatāina fakaeʻulungāangá mo e angatuʻú.b Ko hono ʻai mahinó pē, ʻoku fakatupunga hokohoko ʻe he laumālie ʻo e māmaní ʻa e ngaahi anga ʻo e Tēvoló ke tupu ʻi he loto ʻo ha tangata.—Sione 8:44; Ngāue 13:10; 1 Sione 3:8, 10.

 9. ʻI he ngaahi founga fē ʻe lava ke hū ai ʻa e laumālie ʻo e māmaní ki hotau ʻatamaí mo hotau lotó?

⁹ ʻE lava ke faiaka ʻa e laumālie ʻo e māmaní ʻi ho ʻatamaí mo ho lotó? ʻIo, kapau pē te ke fakaʻatā ia ʻaki hoʻo fakavaivai hoʻo maluʻi koé. (Palovepi 4:23) ʻOku faʻa kamata olopoto ʻene tākiekiná, ʻaki nai ha ngaahi feohi mo ha faʻahinga ʻoku hā nai ʻo ngali ko ha kakai lelei, ka ko hono moʻoní, ʻoku ʻikai te nau ʻofa kia Sihova. (Palovepi 13:20; 1 Kolinito 15:33) ʻE lava foki ke ke toe maʻu ʻa e laumālie kovi ko iá fakafou ʻi ha ngaahi tohi taʻefeʻunga, ngaahi saiti ʻInitaneti fakalielia pe tafoki mei he moʻoní, fakafiefia ʻikai lelei mo e ngaahi sipoti feʻauʻauhi lalahí—ko hono moʻoní, ʻoku fakafou mai ʻi ha taha pē pe ko ha meʻa pē ʻokú ne fakahoko mai ʻa e fakakaukau ʻa Sētané pe ko ʻene fokotuʻutuʻú.

10. ʻE lava fēfē ke tau talitekeʻi ʻa e laumālie ʻo e māmaní?

¹⁰ ʻE lava fēfē ke tau talitekeʻi ʻa e laumālie fakatuʻutāmaki ʻo e māmaní pea tauhi maʻu kitautolu ʻi he ʻofa ʻa e ʻOtuá? ʻAki pē ʻetau fakaʻaongaʻi kakato ʻa e ngaahi tokonaki fakalaumālie ʻa Sihová pea ʻi heʻetau lotu maʻu pē ʻo kole hono laumālie māʻoniʻoní. ʻOku lahi mamaʻo ʻa Sihova ʻi he Tēvoló pe ko e māmani fulikivanu ʻi he malumalu ʻo e pule fakasētané. (1 Sione 4:4) Ko ia, he mahuʻinga lahi ē ke tau nofo ofi kia Sihova ʻi he lotu!

HOKO ʻO FAKANĀNĀ ʻI HOTAU VALÁ MO E TEUTEÚ

11. Kuo anga-fēfē hono tākiekina ʻe he laumālie ʻo e māmaní ʻa e ngaahi tuʻunga ʻo e valá?

¹¹ Ko ha fakahāhā ki tuʻa ʻo e laumālie ko ia ʻokú ne tākiekina ha taha ko hono valá, teuteú mo ʻene maʻá. ʻI he ngaahi fonua lahi, kuo tōlalo ʻaupito ai ʻa e ngaahi tuʻunga ʻo e valá ʻo pehē ai ʻe ha faipolokalama televīsone ʻe taha kuo vavé ni ke ʻikai toe lava ke fakafaikehekeheʻi ʻa e kau paʻumutú ia. Naʻa mo e tamaiki fefine ʻoku teʻeki ai ke nau aʻu ki honau taʻu hongofulu tupú kuo tākiekina kinautolu ʻe he taʻau ko ʻení—“ʻo fakaeʻa lahi mai ʻa e sinó, ʻo ʻikai fakanānā,” ko e lau ia ʻa ha nusipepa ʻe taha. Ko e toe taʻau ʻe taha ko e ʻai vala ʻi ha founga nōnoaʻia ʻoku tapua mei ai ha laumālie ʻo e angatuʻu pea pehē ki he mole ʻo e ngeiá mo e tokaʻi-kitá.

12, 13. Ko e hā ʻa e ngaahi tefitoʻi moʻoni ʻoku totonu ke ne puleʻi hotau valá mo e teuteú?

¹² ʻI he tuʻunga ko e kau sevāniti ʻa Sihová, ʻoku totonu ai ke tau loto ke hā matamatalelei, ʻa ia ʻoku ʻuhingá ke ʻai vala ʻi ha founga ʻoku maau, maʻa, fakafiemālie pea feʻunga mo e meʻa ʻoku hokó. ʻI he taimi kotoa pē, ʻoku totonu ke hā mei hotau fōtunga hā maí ʻa e “anga-fakanānā mo e fakapotopoto,” ʻa ia ʻi he ʻalu fakataha mo e “ngaahi ngāue lelei” ʻoku taau ki ha taha pē—tangata pe fefine—“ʻokú ne taku ʻoku tauhi ki he ʻOtuá.” Ko hono moʻoní, ko ʻetau tokanga tefitó, ʻoku ʻikai ko hono tohoakiʻi mai ʻa e tokangá kiate kitautolu, ka ke ‘tauhi [kitautolu] ʻi he ʻofa ʻa e ʻOtuá.’ (1 Timote 2:9, 10, NW; Siutasi 21) ʻIo, ʻoku tau fiemaʻu ke hoko ko hotau teunga fakaʻofoʻofa tahá “ʻa e tangata fufū ʻo e loto, . . . ʻa ia ko e meʻa mahuʻinga ʻaupito ʻi he ʻafio ʻa e ʻOtua.”—1 Pita 3:3, 4. 

¹³ Toe manatuʻi foki, ko hotau ngaahi sīpinga valá mo e teuteú ʻoku malava ke ne tākiekina ʻa e anga ʻo e vakai mai ʻa e niʻihi kehé ki he lotu moʻoní. Ko e foʻi lea faka-Kalisi ʻoku liliu ko e “anga-fakanānā,” ʻi hono ngāueʻaki ʻi ha ʻuhinga fakaʻulungāangá, ʻokú ne fakahaaʻi mai ʻa e foʻi fakakaukau ʻo e ʻapasia, māluʻia mo e fakaʻapaʻapaʻi ʻo e ngaahi ongoʻi pe fakakaukau ʻa e niʻihi kehé. Ko ia ai, ʻoku totonu ko ʻetau taumuʻá ke ʻai ke mahuʻinga ange ʻa e konisēnisi ʻo e niʻihi kehé ʻi heʻetau totonu ʻoku tau taukaveʻí. Hiliō he meʻa kotoa, ʻoku tau loto ke ʻoatu ʻa e lāngilangí kia Sihova mo ʻene kakaí pea ke fakaongoongoleleiʻi kitautolu ko e kau faifekau ʻa e ʻOtuá, ʻo fai ʻa e meʻa “kotoa pe ke ongoongolelei ai ʻa e ʻOtua.”—1 Kolinito 4:9; 10:31; 2 Kolinito 6:3, 4; 6:19 (2Ko 7:1, PM).

14. ʻI he fekauʻaki mo hotau fōtunga hā maí mo e fakamaʻá, ko e hā ʻa e ngaahi fehuʻi ʻoku totonu ke tau ʻeke hifo kiate kitautolú?

¹⁴ Ko hotau valá, teuteú mo ʻetau maʻá ʻoku toe mahuʻinga ange ia ʻi he taimi ʻoku tau kau ai ʻi he ngāue fakafaifekaú pe maʻu ha fakataha faka-Kalisitiane. ʻEke hifo kiate koe: ‘ʻOku hanga ʻe hoku fōtunga hā maí mo e fakamaʻa fakafoʻituituí ʻo tohoaki mai ha tokanga taʻetotonu kiate au? ʻOku fakamaaʻi ai ʻa e niʻihi kehé? ʻOku ou lau ʻeku ngaahi totonu ʻi he ongo tafaʻaki ko ʻení ʻoku mahuʻinga ange ia ʻi he hoko ʻo taau ki he ngaahi monū ʻo e ngāué ʻi he fakatahaʻangá?’—Sāme 68:6; Filipai 4:5; 1 Pita 5:6.

15. Ko e hā ʻoku ʻikai fokotuʻu mai ai ʻe he Folofola ʻa e ʻOtuá ha ʻotu tuʻutuʻuni ki he valá, teuteú mo e fakamaʻá?

¹⁵ ʻOku ʻikai ke fokotuʻu mai ʻe he Tohi Tapú ia ki he kau Kalisitiané ha ʻotu tuʻutuʻuni ki he valá, teuteú mo e fakamaʻá. ʻOku ʻikai ha loto ʻa Sihova ke taʻofi ʻetau tauʻatāina ke filí pe ko hono ngāueʻaki ʻetau ngaahi malava fakaefakakaukaú. ʻI hono kehé, ʻokú ne fiemaʻu mai ke tau hoko ko e kakai matuʻotuʻa ʻoku fakaʻuhinga ʻi he ngaahi tefitoʻi moʻoni ʻo e Tohi Tapú pea “fakafou ʻi hono ngāueʻakí ko ʻenau ngaahi mafai fakaefakakaukaú kuo akoʻi ai ke ne fakafaikehekeheʻi fakatouʻosi ʻa e tonú mo e halá.” (Hepelu 5:14, NW) Sinoemeʻa, ʻokú ne fiemaʻu mai ke puleʻi kitautolu ʻe he ʻofá—ʻofa ki he ʻOtuá mo e kaungāʻapí. (Maake 12:30, 31) ʻI loto ʻi he ngaahi fakangatangata ko iá, ʻoku ʻi ai ʻa e malava ki ha kehekehe lahi ʻi he valá mo e teuteú. Ko e fakamoʻoni ki he meʻá ni ʻoku malava ke mātā ia ʻi he fuʻu kakai tokolahi teunga fakaʻofoʻofa mo fiefia ʻo e kakai ʻa Sihová tatau ai pē pe ko fē ha feituʻu ʻi he māmaní ʻoku nau fakatahataha ai.

TAUHI HOTAU MATÁ KE “HUʻUFATAHA”

16. ʻOku anga-fēfē ʻa e kehe ʻaupito ʻa e laumālie ʻo e māmaní ia mei he meʻa naʻe akoʻi ʻe Sīsuú, pea ko e hā ʻa e ongo fehuʻi ʻoku totonu ke tau ʻeke hifo kiate kitautolú?

¹⁶ Ko e laumālie ʻo e māmaní ʻoku kākā pea ʻokú ne ueʻi ʻa e laui miliona ke nau hanga ki he paʻangá mo e ngaahi meʻa fakamatelié ke maʻu ai ʻa e fiefiá. Kae kehe, naʻe pehē ʻe Sīsū: “Neongo oku fuʻu lahi ʻa e koloa ʻa ha taha, ka ʻoku ʻikai hoko ai ʻo tautau ʻene moʻui ki heʻene ngaʻotoʻota.” (Luke 12:15) Lolotonga ʻoku ʻikai ko hano poupouʻi ha moʻui anga-fefeka, pe mātuʻaki fakataputapui, naʻe akoʻi ʻe Sīsū ko e moʻuí mo e fiefia moʻoní ʻoku maʻu ia ʻe he faʻahinga ʻoku nau “ʻiloʻi ʻa ʻenau fiemaʻu fakalaumālié” pea mo e faʻahinga ʻoku nau tauhi maʻu ha mata “huʻufataha,” ʻa ia ʻoku hanga ki he taumuʻa pē ʻe taha, ko e tokangataha ki he ngaahi meʻa fakalaumālié. (Mātiu 5:3, NW; Mt 6:22, 23) ʻEke hifo kiate koe: ‘ʻOku ou tui moʻoni ki he meʻa naʻe akoʻi ʻe Sīsuú, pe ʻoku tohoaki au ia ʻe he “tamai ʻo e loí”? (Sione 8:44) Ko e hā ʻoku fakahaaʻi ʻe heʻeku ngaahi leá, ngaahi taumuʻá, ngaahi meʻa ʻoku ou fakamuʻomuʻá mo ʻeku founga moʻuí?’—Luke 6:45; 21:34-36; 2 Sione 6.

17. Tala mai ʻa e niʻihi ʻo e ngaahi ʻaonga ʻoku maʻu ʻe he faʻahinga ko ia ʻoku nau tauhi maʻu ha mata huʻufatahá.

¹⁷ “ʻOku fakamoʻoniʻi ʻa e māʻoniʻoni ʻa potó ʻe heʻene ngaahi ngāué,” ko e lea ia ʻa Sīsuú. (Mātiu 11:19, NW) Fakakaukau angé ki ha niʻihi pē ʻo e ngaahi ʻaonga ʻoku maʻu ʻe he faʻahinga ko ia ʻoku nau tauhi maʻu ha mata huʻufatahá. ʻOku nau maʻu ʻa e fakaivifoʻou moʻoni ʻi he ngāue ʻo e Puleʻangá. (Mātiu 11:29, 30) ʻOku nau fakaʻehiʻehi ai mei he ngaahi loto-moʻua tōtuʻá pea nau hao ai mei he mamahi fakaʻatamai mo fakaeongo lahi. (1 Timote 6:9, 10) ʻI he fiemālie ʻi he maʻu ʻo e ngaahi fiemaʻu pau ʻo e moʻuí, ʻoku nau maʻu ai ʻa e taimi lahi ange ki honau fāmilí mo e ngaahi kaungāmeʻa Kalisitiané. ʻOku holo ange nai ai ʻenau mohé. (Koheleti 5:12) ʻOku nau maʻu ʻa e fiefia lahi ange ʻo e foaki atú, ʻo fai pehē ʻi ha founga pē ʻoku nau malava aí. (Ngāue 20:35) Pea ʻoku nau “tupulekina ʻi he ʻamanaki lelei” pea maʻu ʻa e nonga mo e fiemālie ʻi loto. (Loma 15:13; Mātiu 6:31, 32) ʻOku taʻefakatataua moʻoni ʻa e ngaahi tāpuakí ni!

TUI “KAKATO ʻA E TEUNGA TAU”

18. ʻOku anga-fēfē hono fakamatalaʻi ʻe he Tohi Tapú hotau filí, mo ʻene ngaahi foungá, pea mo e natula ʻo ʻetau faitaú?

¹⁸ Ko e faʻahinga ʻoku nau tauhi kinautolu ʻi he ʻofa ʻa e ʻOtuá ʻoku toe maluʻi fakalaumālie kinautolu meia Sētane, ʻa ia ʻokú ne loto ke kaihaʻasia mei he kau Kalisitiané, ʻo ʻikai ko ʻenau fiefiá pē, kae toe pehē foki ki he moʻui taʻengatá. (1 Pita 5:8) Naʻe pehē ʻe Paula: “Talaʻehai ko ʻetau milimilisino ni ko e fai mo ha toto mo kakano; kaekehe, ko e fai mo e faʻahinga pule, mo faʻahinga maʻu tuʻunga, mo e houʻeiki fakaleveleva ʻo e fakapoʻuli ni, mo e ngaahi kongakau laumalie ʻa e kovi ʻi he ngaahi feituʻu ʻo langi.” (Efeso 6:12) ʻOku fokotuʻu mai ʻe he foʻi lea “milimilisino” ko ʻetau faitaú ʻoku ʻikai vāmamaʻo—ʻo hangē ha faitau mei he maluʻanga ʻo ha potu fufū—ka ko e mata ki he mata. ʻIkai ko ia pē, ko e ngaahi foʻi lea ko e “faʻahinga pule,” “faʻahinga maʻu tuʻunga” mo e “houʻeiki fakaleveleva” ʻoku hā mei ai ko e ngaahi ʻohofi mei he nofoʻanga laumālié ʻoku mātuʻaki fokotuʻutuʻu maau mo palaniʻi lelei.

19. Fakamatalaʻi ʻa e teunga tau fakalaumālie ʻo e Kalisitiané.

¹⁹ Kae kehe, neongo ʻa e ngaahi vaivai mo e ngaahi fakangatangata fakaetangatá, ʻe lava ke tau ikuna. Anga-fēfē? ʻAki hono tui “kakato ʻa e teunga tau kuo ʻoatu ʻe he ʻOtuá.” (Efeso 6:13, Ko e Taulua) ʻI hono fakamatalaʻi ʻa e teunga tau ko iá, ʻoku pehē ʻe he Efeso 6:14-18: “Ko ia ke mou tuʻu, kuo nonoʻo ʻaki homou kongaloto ʻa e fai moʻoni, pea kuo ʻai ʻa e kofutau ko e maʻoniʻoni, pea kuo mou topuvaʻe ʻaki ʻa e ʻosi teuteu mei he Kosipeli fakamelino; kaeʻumaʻā kuo mou toʻo ʻa e pa ko e tui, ʻa ia te mou lava ʻaki ke tamateʻi ʻa e ngaahi ngahau vela kotoa pe ʻa e Fili. Pea mou maʻu ʻa e tatātau [pe ʻamanaki] ko e fakamoʻui, mo e heletā ʻa e Laumalie, ʻa ia ko e Folofola ʻa e ʻOtua: pea ʻi he faingamalie kotoa pe mou fai hoʻomou lotu ʻi he Laumalie ʻaki ʻa e faʻahinga hu kehekehe mo e kole.”

20. ʻOku anga-fēfē ʻa e kehe hotau tuʻungá mei he tuʻunga ʻo ha sōtia moʻoni?

²⁰ Koeʻuhi ko ha tokonaki ia ʻa e ʻOtuá, kuo pau ke maluʻi kitautolu ʻe he teunga tau fakalaumālie ko iá, kehe pē ke tau tui ia ʻi he taimi kotoa pē. ʻI he ʻikai hangē ko e kau sōtia moʻoní, ʻa ia ʻoku malava ke nau mālōlō fuoloa mei he taú, ʻoku ʻi ha faitau taʻemālōlō ʻa e kau Kalisitiané ia ʻi he vahaʻa ʻo e moʻui mo e mate ʻa ia ʻe toki ngata kae ʻoua kuo fakaʻauha ʻe he ʻOtuá ʻa e māmani ʻo Sētané pea lī ki he luo taʻehanotakelé ʻa e kau laumālie fulikivanú kotoa. (Fakahā 12:17; 20:1-3) Ko ia ʻoua ʻe foʻi kapau ʻokú ke faitau mo e ngaahi vaivai pe ngaahi holi fehālaakí, he kuo pau ke tau “tokeia” kitautolu koeʻuhi ka tau kei faitōnunga ai pē kia Sihova. (1 Kolinito 9:27) Ko hono moʻoní, ko e taimi ʻoku ʻikai ai ke tau milimilisinó ʻoku totonu ai ke tau loto-moʻuá!

21. ʻI he founga fē pē te tau lava ai ke ikuna ʻi heʻetau faitau fakalaumālié?

²¹ ʻIkai ko ia pē, heʻikai malava ke tau ikuna ʻi he faitau ko ʻení ʻi hotau mālohí pē. Ko ia ai, ʻoku fakamanatu mai ʻe Paula kiate kitautolu ʻa e fiemaʻu ke lotu kia Sihova “ʻi he faingamalie kotoa pe . . . ʻi he Laumalie.” ʻI he taimi tatau, ʻoku totonu ke tau fanongo kia Sihova ʻaki hono ako ʻene Folofolá pea feohi mo hotau ngaahi “kauga tau” ʻi he faingamālie kotoa pē, he ʻoku ʻikai ko kitautolu pē ʻi he faitau ko ʻení! (Filimone 2, PM; Hepelu 10:24, 25) Ko e faʻahinga ʻoku nau faitōnunga ʻi he kotoa ʻo e ngaahi tafaʻakí ni ʻe ʻikai ngata pē ʻi heʻenau ikuná ka te nau toe malava ke taukapoʻi mālohi ʻenau tuí ʻi hono poleʻí.

MATEUTEU KE TAUKAPOʻI HOʻO TUÍ

22, 23. (a) Ko e hā kuo pau ai ke tau mateuteu maʻu pē ke taukapoʻi ʻetau tuí, pea ko e hā ʻa e ngaahi fehuʻi ʻoku totonu ke tau ʻeke hifo kiate kitautolú? (e) Ko e hā ʻa e tuʻunga-lea ʻe fai ki ai ʻa e lāulea ʻi he vahe hoko maí?

²² “Koeuhi oku ikai o mamani akimoutolu,” ko e lau ia ʻa Sīsuú, “oku fehia ai a mamani kiate kimoutolu.” (Sione 15:19, PM) Ko ia ai, kuo pau ki he kau Kalisitiané ke nau mateuteu maʻu pē ke taukapoʻi ʻenau tuí pea ke fai ia ʻi ha founga fakaʻapaʻapa mo anga-malū. (1 Pita 3:15) ʻEke hifo kiate koe: ‘ʻOku ou mahinoʻi ʻa e ʻuhinga ʻoku tuʻu ai ʻa e Kau Fakamoʻoni ʻa Sihová ʻi he taimi ʻe niʻihi ʻo kehe ia mei he fakakaukau manakoá? ʻI he fehangahangai mo e pole ke tuʻu ʻo kehe peheé, ʻoku ou tui pau fakaʻaufuli ko e meʻa ʻoku leaʻaki ʻe he Tohi Tapú pea mo e kalasi tamaioʻeiki anga-tonú ʻoku tonu? (Mātiu 24:45; Sione 17:17) Pea ʻi he hoko mai ke fai ʻa e meʻa ʻoku tonu ʻi he vakai ʻa Sihová, ʻoku ou mateuteu ke ʻoua ʻe ngata pē ʻi heʻeku hoko ʻo kehé ka ke u toe laukauʻaki ʻeku kehé?’—Sāme 34:2; Mātiu 10:32, 33.

²³ Neongo ia, ko ʻetau holi ko ia ke hanganaki mavahe mei he māmaní ʻoku faʻa ʻahiʻahiʻi ia ʻi ha ngaahi founga olopoto ange. Ko e fakatātaá, hangē ko ia naʻe lave ki ai ki muʻa angé, ʻoku feinga ʻa e Tēvoló ke tauheleʻi ʻa e kau sevāniti ʻa Sihová ki he māmaní fakafou ʻi he fakafiefia fakamāmaní. ʻE lava fēfē ke tau fili ʻa e fakafiefia lelei ʻa ia te tau kei ongoʻi foʻou ai fakataha mo ha konisēnisi maʻá? ʻE fai ʻa e lāulea ki he tuʻunga-lea ko iá ʻi he vahe hoko maí.

[Fakamatala ʻi lalo]

[Puha ʻi he peesi 52]

TUʻU-ʻATĀ ʻA E MUʻAKI KAU KALISITIANÉ

ʻOku ʻomai ʻe he hisitōlia fakamāmaní ha fakamoʻoni feʻungaʻānoa naʻe tuʻu-ʻatā fakapolitikale mo fakaʻehiʻehi maʻu pē mei he taú ʻa e muʻaki kau Kalisitiané. ʻOku pehē ʻe he tohi The Beginnings of Christianity: “Ko e kau fokotuʻu ʻo e lotu faka-Kalisitiané naʻa nau tokanga fakamākukanga ke ʻoua naʻa tupu ha faʻahinga hehema ke kaunoa fakahangatonu ai ʻi he fokotuʻutuʻu pule fakapolitikale naʻe fokotuʻú.” ʻI he tuʻunga meimei tatau, ʻoku pehē ʻe he tohi ko e On the Road to Civilization: “Naʻe ʻikai loko mahinoʻi pea naʻe ʻikai loko leleiʻia ʻa e faʻahinga naʻa nau puleʻi ʻa e māmani fakapanganí ʻi he muʻaki lotu faka-Kalisitiané. . . . Naʻe fakafisi ʻa e kau Kalisitiané ke kau ʻi ha ngaahi ngafa pau ʻo e kau tangataʻifonua Lomá. . . . Naʻe ʻikai te nau maʻu ha lakanga fakapolitikale.”

ʻI he fekauʻaki mo e muʻaki kau Kalisitiané mo e ngāue fakakautaú, naʻe pehē ʻe ha teolosia Siamane ko Peter Meinhold: “Ko e hoko ko ha Kalisitiane pea mo ha sōtiá naʻe vakai ki ai ʻoku hōhoatamaki.” ʻI he ʻēsei “Ko ha Fekumi ki he Hōhoamālie ʻa e Taú mo e Ngaahi Tefitoʻi Moʻoni ʻa e Lotu Faka-Kalisitiané,” ʻa e faʻutohi fakalotu ko Jonathan Dymond, naʻá ne tohi ai ʻo pehē ʻi ha taimi hili ʻa e pekia ʻa Sīsuú, ko Hono kau muimuí “naʻa nau fakafisi ke kau ʻi he [taú]; tatau ai pē pe ko e hā hono ngaahi nunuʻá, pe ko e manuki, pe tuku pilīsone, pe mate.” Naʻe tānaki atu ʻe Dymond: “Ko e ngaahi moʻoniʻi meʻá ni ʻoku ʻikai ala fakaʻikaiʻi.” Ko e toki taimi pē “naʻe ʻuliʻi ai ʻa e lotu faka-Kalisitiané,” ko e lau ia ʻa ha faʻutohi ʻe taha, naʻe hoko ai ʻa e kau Kalisitiané ko ha kau sōtia.

[Puha/Fakatātā ʻi he peesi 55]

ʻOKU OU TUʻU-ʻATĀ MAʻU PĒ?

Tefitoʻi moʻoni: “Ko hoku puleʻanga ʻoku ʻikai ʻo e maama ko eni.”—Sione 18:36.

Ngaahi fehuʻi ke ʻeke hifo kiate koe

▪ Te u fakamatalaʻi fēfē ʻa e ʻuhinga ko ha founga lotu ʻaitoli ai ʻa e salute ki he fuká?c—Ekisoto 20:4, 5; 1 Sione 5:21.

▪ ʻI hono fakamatalaʻi ʻa ʻeku taʻekau ki ha ngaahi kātoanga fakafonua ʻe niʻihi, ʻe anga-fēfē ʻeku fakahaaʻi ʻa ʻeku fakaʻapaʻapa loloto ki he faʻahinga ʻoku ʻikai te mau tui tataú?—1 Pita 3:15.

▪ Ko e hā ʻa e ngaahi ʻuhinga ʻoku ʻikai ke u poupou ai ki ha ngaahi faʻahi fakapolitikalé pe ko hono fai ha faʻahinga ngāue fakakautau pē?—Sione 13:34; 1 Sione 3:10-12.

[Fakamatala ʻi lalo]

[Fakatātā ʻi he peesi 57]

ʻOku fakalāngilangiʻi ʻa Sihova ʻi hoku fōtunga hā maí?