ʻOkú Ke Tauhi Maʻu Hoʻo “Pā Lahi ko e Tuí”?

1-2. (a) Fakatatau ki he ʻEfesō 6:16, ko e hā ʻoku fiemaʻu ai kiate kitautolu ʻa e “pā lahi ko e tuí”? (e) Ko e hā ʻa e ongo fehuʻi te tau lāulea ki aí?

ʻOKÚ KE maʻu ʻa e “pā lahi ko e tuí”? (Lau ʻa e ʻEfesō 6:16.) ʻOku ʻikai ha veiveiua ʻoku pehē. ʻI he hangē ko ha pā lahi ʻa ia ʻokú ne maluʻi ʻa e konga lahi ʻo e sinó, ko hoʻo tuí ʻe maluʻi ai koe mei he tākiekina taʻetāú, anga-fakamālohí mo e anga-taʻefakaʻotua ʻa e fokotuʻutuʻu fakameleʻi ko ení.

² Kae kehe, ʻoku tau lolotonga moʻui ʻi he “ngaahi ʻaho fakaʻosí,” pea ko ʻetau tuí ʻe hokohoko atu hono ʻahiʻahiʻí. (2 Tīm. 3:1) ʻE lava fēfē ke ke sivisiviʻi hoʻo pā ʻo e tuí ke ke fakapapauʻi ʻoku mālohi? Pea ʻe lava fēfē ke ke hanganaki puke maʻu hoʻo paá? Tau lāulea angé ki he tali ʻo e ongo fehuʻi ko iá.

 3. Ko e hā naʻe fai ʻe he kau sōtiá ki heʻenau paá, pea ko e hā hono ʻuhingá?

³ ʻI he taimi ʻo e Tohi Tapú, ko e kau sōtiá naʻe faʻa ʻi ai ʻenau pā naʻe kofuʻaki ʻa e leta. Naʻe fakalolo ʻe he kau sōtiá ʻa e paá ke tolonga ʻa e letá pea ʻai ke ʻoua ʻe ʻumeʻumea ʻa e ngaahi konga ukameá. Kapau naʻe ʻiloʻi ʻe ha sōtia ʻoku maumau ʻene pā, naʻá ne fakapapauʻi ke fakaleleiʻi ia koeʻuhi ke ne mateuteu maʻu pē ai ki he tau hokó. ʻOku anga-fēfē hono ngāueʻaki ʻa e fakatātā ko iá ki hoʻo tuí?

 4. Ko e hā kuo pau ai ke ke sivisiviʻi hoʻo pā ʻo e tuí, pea ʻoku totonu ke fēfē hoʻo fai iá?

⁴ Hangē ko e kau sōtia ʻi he kuonga muʻá, kuo pau ke ke sivisiviʻi mo tokangaʻi maʻu pē hoʻo pā ʻo e tuí koeʻuhi ke ke mateuteu maʻu pē ki he taú. ʻI he tuʻunga ko e kau Kalisitiané, ʻoku tau kau ki ha faitau fakalaumālie pea ko hotau filí ʻoku kau ai ʻa e ngaahi laumālie fulikivanu. (ʻEf. 6:10-12) Heʻikai lava ʻe ha taha ʻo tokangaʻi hoʻo pā ʻo e tuí. ʻE lava fēfē ke ke fakapapauʻi ʻokú ke mateuteu ke fehangahangai mo e ngaahi ʻahiʻahí? ʻUluakí, kuo pau ke ke lotu ʻo kole ʻa e tokoni ʻa e ʻOtuá. Pea ʻe fiemaʻu leva ke ke ngāueʻaki ʻa e Folofola ʻa e ʻOtuá ke ne tokoniʻi koe ke maʻu ʻa e vakai ʻa e ʻOtuá. (Hep. 4:12) ʻOku pehē ʻe he Tohi Tapú: “Falala kia Sihova ʻaki ho lotó kotoa, pea ʻoua naʻá ke falala ki hoʻo mahino pē ʻaʻaú.” (Pal. 3:5, 6) ʻI he fakakaukau atu ki aí, fēfē ke ke vakaiʻi angé ʻa e ngaahi fili ʻe niʻihi naʻá ke toki fai ki mui ní? Ko e fakatātaá, naʻá ke fekuki mo ha palopalema lahi fakapaʻanga? Naʻá ke manatuʻi ʻa e talaʻofa ʻa Sihova ʻi he Hepelū 13:5: “ʻE ʻikai ʻaupito te u mavahe meiate koe, pea ʻe ʻikai ʻaupito te u liʻaki koe”? Naʻe ʻoatu ʻe he talaʻofa ko iá kiate koe ʻa e tuipau ʻe tokoniʻi koe ʻe Sihova? Kapau ko ia, ʻoku fakahaaʻi ai ʻokú ke tauhi hoʻo pā ʻo e tuí ke ʻi ha tuʻunga lelei.

 5. Ko e hā nai ʻa e meʻa te ke maʻu ʻi hoʻo sivisiviʻi hoʻo tuí?

⁵ ʻI hoʻo sivisiviʻi fakalelei hoʻo tuí te ke ʻohovale nai ʻi he meʻa te ke maʻú. Te ke lāuʻilo nai ki he ngaahi vaivaiʻanga kuo fuoloa hoʻo maʻu kae ʻikai ke ke ʻiloʻi. Ko e fakatātaá, te ke ʻiloʻi nai ko e loto-moʻua tōtuʻá, loí mo e fakalotosiʻí kuó ne maumauʻi hoʻo tuí. Kapau kuo hoko eni kiate koe, ʻe lava fēfē ke ke maluʻi hoʻo tuí mei haʻane toe maumau lahi ange?

 6. Ko e hā ʻa e fakatātā ʻe niʻihi ʻo e loto-moʻua ʻoku leleí?

⁶ Ko e ngaahi loto-moʻua ʻe niʻihi ʻoku lelei. Ko e fakatātaá, ʻoku lelei ke tau hohaʻa ke fakahōifuaʻi ʻa Sihova mo Sīsū. (1 Kol. 7:32) Kapau ʻoku tau fai ha angahala mamafa, ʻoku tau loto-moʻua ke fakaleleiʻi ʻetau kaumeʻa mo e ʻOtuá. (Saame 38:18) ʻOku tau toe loto-moʻua ke fakahōhōʻiaʻi hotau hoa malí pea tokanga ki he lelei ʻa e ngaahi mēmipa hotau fāmilí mo e kaungātuí.​—1 Kol. 7:33; 2 Kol. 11:28.

 7. Fakatatau ki he Palōveepi 29:25, ko e hā ʻoku ʻikai fiemaʻu ai ke tau manavahē ki he tangatá?

⁷ ʻI he tafaʻaki ʻe tahá, ko e loto-moʻua tōtuʻá ʻe lava ke ne maumauʻi ʻetau tuí. Ko e fakatātaá, te tau hohaʻa maʻu pē nai fekauʻaki mo hono maʻu ha meʻakai mo e vala feʻunga. (Māt. 6:31, 32) Ke fakalato ʻa e hohaʻa ko iá, te tau tokangataha nai ki hono maʻu ʻa e ngaahi koloa fakamatelié. ʻE aʻu ʻo lava ke tau fakatupulekina ha ʻofa ki he paʻangá. Kapau ʻoku tau fakaʻatā ia ke hoko, ko ʻetau tui kia Sihová ʻe hoko ʻo vaivai pea te tau tofanga ʻi ha maumau fakalaumālie mafatukituki. (Mk. 4:19; 1 Tīm. 6:10) Pe ʻe maʻukovia nai kitautolu ʻe ha loto-moʻua tōtuʻa ʻe taha​—ko e hohaʻa tōtuʻa ko ia ke maʻu ʻa e leleiʻia ʻa e niʻihi kehé. ʻE laka ange nai ai ʻetau manavahē ki hono manukiʻi pe fakatangaʻi kitautolu ʻe he tangatá ʻi heʻetau manavahē ke taʻefakahōifuaʻi ʻa Sihová. Ke maluʻi kitautolu mei he fakatuʻutāmaki ko iá, kuo pau ke tau kōlenga kia Sihova ke ne ʻomai ʻa e tui mo e loto-toʻa ʻoku fiemaʻu ke tau fekuki ai mo e polé.​—Lau ʻa e Palōveepi 29:25; Luke 17:5.

 8. ʻOku totonu ke fēfē ʻetau fakafeangai ki he ngaahi loí?

⁸ Ko Sētane, “ko e tamai ia ʻa e loí,” ʻokú ne ngāueʻaki ʻa e faʻahinga ʻoku ʻi hono malumalú ke fakamafola ʻa e ngaahi loi fekauʻaki mo Sihova pea mo hotau fanga tokouá mo e fanga tuofāfiné. (Sione 8:44) Ko e fakatātaá, ko e kau tafoki ʻo fakafepaki ki he moʻoní ʻoku nau pulusi ʻa e ngaahi loi pea mioʻi ʻa e ngaahi moʻoniʻi meʻa fekauʻaki mo e kautaha ʻa Sihová ʻi he ngaahi uepisaití pea mo e televīsoné mo e ngaahi mītia kehe. Ko e ngaahi loi ko iá ʻoku kau ʻi he “ngaahi ngahau vela” ʻa Sētané. (ʻEf. 6:16) ʻOku totonu ke fēfē ʻetau fakafeangai kapau ʻoku tala mai ʻe ha taha ʻa e ngaahi loi ko iá? ʻOku tau talitekeʻi ia! Ko e hā hono ʻuhingá? Koeʻuhi ʻoku tau tui kia Sihova pea ʻoku tau falala ki hotau fanga tokouá. Ko hono moʻoní, ʻoku tau fakaʻehiʻehi ʻaupito mei he fetuʻutaki mo e kau tafoki ʻo fakafepaki ki he moʻoní. ʻOku ʻikai ke tau fakaʻatā ha taha pe ko ha meʻa pē, kau ai ʻa e fieʻiló, ke ne taki atu kitautolu ke fakafekiki mo kinautolu.

 9. ʻE lava fēfē ke uesia kitautolu ʻe he fakalotosiʻí?

⁹ Ko e fakalotosiʻí ʻe lava ke ne fakavaivaiʻi ʻetau tuí. Heʻikai lava ke tau tukunoaʻi ʻetau ngaahi palopalema fakafoʻituituí. Ko hono moʻoní, ʻoku taʻefakapotopoto ia ke tau fai pehē. Pea ʻi he taimi ʻe niʻihi te tau ongoʻi loto-siʻi nai. Ka kuo pau ke ʻoua te tau fakaʻatā ʻetau ngaahi palopalemá ke ne puleʻi ʻetau fakakaukaú. Kapau ʻe pehē, ʻe ngalo nai ai ʻiate kitautolu ʻa e ʻamanaki fakaofo kuo foaki mai ʻe Sihová. (Fkh. 21:3, 4) Ko e ongoʻi loto-siʻí ʻe lava ke ne holoki hotau iví pea ʻai kitautolu ke tau foʻi. (Pal. 24:10) Ka ʻoku ʻikai pau ia ke hoko mai kiate kitautolu.

10. Ko e hā ʻokú ke ako mei ha tohi naʻe fai ʻe ha tuofefine ʻe taha?

¹⁰ Fakakaukau angé ki he anga hono tauhi maʻu ʻe ha tuofefine ʻi ʻAmelika ʻene tuí lolotonga ʻene tokangaʻi hono husepāniti ʻoku puke lahi. ʻI ha tohi ki he ʻuluʻi ʻapitangá, naʻá ne pehē: “Ko homa tuʻungá kuo fakamafasia mo fakalotosiʻi ʻi he taimi ʻe niʻihi, ka ko ʻema ʻamanakí ʻoku mālohi. ʻOku ou houngaʻia moʻoni ʻi he fakamatala kuó ma maʻu ke fakaivimālohiʻi ʻaki ʻema tuí pea fakalototoʻaʻi ai kimaua. ʻOkú ma fiemaʻu moʻoni ʻa e akonaki mo e fakalototoʻa ko ení. ʻOkú ne tokoniʻi kimaua ke hokohoko atu pea ke kātekina ʻa e ngaahi ʻahiʻahi ʻa Sētané.” ʻOku tau ako mei he fakamatala ʻa e tuofefine ko ení ʻe lava ke tau ikuʻi ʻa e fakalotosiʻí! Anga-fēfē? Vakai ki hoʻo ngaahi palopalemá ko ha ʻahiʻahi ia meia Sētane. ʻIloʻi ko Sihova ʻa e Matavai ʻo e fakafiemālié. Pea houngaʻia ʻi he meʻakai fakalaumālie ʻokú ne tokonaki maí.

11. Ke sivisiviʻi ʻa e tuʻunga ʻoku ʻi ai ʻetau tuí, ko e hā ʻa e ngaahi fehuʻi ʻoku totonu ke tau ʻeke hifó?

¹¹ ʻOkú ke sio ki ha tafaʻaki ʻi hoʻo pā ʻo e tuí ʻoku fiemaʻu ke fakaleleiʻi? ʻI he ngaahi māhina kuo maliu atú, naʻe malava ke ke fakaʻehiʻehi mei he loto-moʻua tōtuʻá? Naʻá ke talitekeʻi ha tenge ke fanongo ki he ngaahi loi ʻoku fakamafola ʻe he kau tafoki ʻo fakafepaki ki he moʻoní pea ʻikai fakafekiki mo kinautolu? Pea naʻe malava ke ke fekuki mo e fakalotosiʻí? Kapau ko ia, ʻoku ʻi ha tuʻunga lelei ʻa hoʻo tuí. Ka kuo pau ke tau hanganaki ʻāʻā koeʻuhí ʻoku ʻi ai mo e ngaahi meʻatau kehe ʻa Sētane ʻokú ne feinga ke fakafepakiʻi ʻaki kitautolu. Tau lāulea he taimí ni ki ha taha ʻo kinautolu.

12. Ko e hā ʻe lava ke hoko kapau te tau tuli ki he meʻa fakamatelié?

¹² Ko e tuli ki he meʻa fakamatelié ʻe lava ke ne fakaleluʻi kitautolu pea ʻai ke tau fakaliʻeliʻaki ʻetau pā ʻo e tuí. Naʻe pehē ʻe he ʻapositolo ko Paulá: “ʻOku ʻikai ha tangata ʻoku ngāue ko ha sōtia te ne fakakau ia ʻi he ngaahi meʻa fakapisinisí, koeʻuhí ke ne maʻu ai ʻa e hōhōʻia ʻa e tokotaha ko ia naʻá ne fakahū ia.” (2 Tīm. 2:4) Ko hono moʻoní, ko e kau sōtia Lomá naʻe ʻikai ʻatā ke nau kau ʻi ha faʻahinga ngāue kehe. Ko e hā ʻe hoko kapau ʻe tukunoaʻi ʻe ha sōtia ʻa e fiemaʻu ko iá?

13. Ko e hā heʻikai kau ai ha sōtia ʻi he meʻa fakapisinisí?

¹³ Sioloto atu ki he meʻá ni. ʻOku teuteu ha kulupu ʻo e kau sōtiá ki he taú mo ʻenau heletaá ʻi he pongipongí, ka ʻoku puli ʻa e toko taha. ʻOku ʻalu ʻa e sōtia ko iá ki kolo ʻo tokangaʻi ʻene falekai. ʻI he efiafí, ʻoku fakamoleki ʻe he kau sōtiá ʻa e taimi ke vakaiʻi honau teunga taú pea fakamata ʻenau ngaahi heletaá. Ka ko e toko taha ʻoku haʻana ʻa e falekaí ʻokú ne fakamoleki hono taimí ʻi he teuteu ʻa e meʻakai ke fakatau ʻi he ʻaho hokó. Kae kehe, ʻi he pongipongi hokó, ʻoku ʻoho fakafokifā ʻa e filí. ʻOku ngalingali ko fē ʻa e sōtia ʻe mateuteu ki he taú peá ne maʻu ʻa e hōhōʻia ʻa hono ʻeikitaú? Pea ko hai te ke loto ke tuʻu ho tafaʻakí​—ko ha sōtia naʻe tokangataha ke mateuteu pe ko e taha naʻe fakaleluʻí?

14. ʻI he tuʻunga ko e kau sōtia ʻa Kalaisí, ko e hā ʻoku tau fakamahuʻingaʻí?

¹⁴ Hangē ko ha sōtia lelei, ʻoku ʻikai ke tau hoko ʻo fakaleluʻi mei heʻetau taumuʻa tefitó​—ʻa hono maʻu ʻa e hōifua ʻa hotau ʻEikitaú, ʻa Sihova mo Kalaisi. ʻOku tau vakai ki ai ko ha meʻa ia ʻoku mahuʻinga mamaʻo ange ʻi hono maʻu ha meʻa pē ʻoku tuʻuaki mai ʻe he māmani ʻo Sētané. ʻOku tau fakapapauʻi ʻoku tau maʻu ʻa e taimi mo e ivi ʻoku fiemaʻu ki he tauhi kia Sihová pea tauhi ke ʻi ha tuʻunga lelei ʻa ʻetau pā ʻo e tuí mo e toenga hotau teunga tau fakalaumālié.

15. Ko e hā ʻa e fakatokanga naʻe ʻomai ʻe Paulá, pea ko e hā hono ʻuhingá?

¹⁵ Kuo pau ke tau ʻāʻā maʻu pē! Ko e hā hono ʻuhingá? Naʻe fakatokanga ʻa e ʻapositolo ko Paulá “ko e faʻahinga ko ia ʻoku nau fakapapauʻi ke nau koloaʻiá” ʻe ‘takiheeʻi kinautolu mei he tuí.’ (1 Tīm. 6:9, 10) Ko e kupuʻi lea “takiheeʻi” ʻoku fakahaaʻi ai ʻe lava ke fakaleluʻi kitautolu ʻi he feinga ke maʻu ʻa e ngaahi koloa ʻikai fiemaʻú. ʻE lava ai ke tau fakaeʻa atu hotau lotó ki he “ngaahi holi fakasesele mo fakatupu maumau lahi.” ʻI he ʻikai fakaʻatā ʻa e ngaahi holi ko iá ki hotau lotó, kuo pau ke tau vakai ki honau tuʻunga totonú​—ko e ngaahi meʻatau fakatupu maumau.

16. ʻOku totonu ke ueʻi kitautolu ʻe he fakamatala ʻi he Maʻake 10:17-22 ke tau fakakaukau ki he ngaahi fehuʻi fē?

¹⁶ Mahalo ʻoku tau maʻu ʻa e paʻanga feʻunga ke fakatau mai ha ngaahi meʻa fakamatelie lahi. ʻOku tau fai ha meʻa ʻoku hala kapau ʻoku tau fakatau mai ʻa e ngaahi meʻa ʻoku tau loto ki ai ka ʻoku ʻikai ke tau loko fiemaʻu? ʻIkai. Kae fakakaukau atu ki he ngaahi fehuʻi ko ení: Neongo kapau ʻoku lava ke tau fakatau ha meʻa, ʻoku tau maʻu moʻoni ʻa e taimi mo e ivi ke ngāueʻaki mo tokangaʻi ia? Pehē foki, te tau hoko nai ʻo fuʻu pipiki tōtuʻa ki heʻetau ngaahi koloá? ʻE fakatupunga kitautolu ʻe heʻetau pīkitai ki he ngaahi meʻa fakamatelié ke tau hangē ko e kiʻi talavou naʻá ne talitekeʻi ʻa e fakaafe ʻa Sīsū ke fakalahi atu ʻene ngāue ki he ʻOtuá? (Lau ʻa e Maʻake 10:17-22.) He lelei mamaʻo ange ē kiate kitautolu ke tau maʻu ha moʻui faingofua pea vaheʻi hotau taimi mahuʻingá mo e iví ke fai ʻa e finangalo ʻo e ʻOtuá!

17. Ko e hā ʻoku totonu ke ʻoua ʻaupito naʻa ngaló?

¹⁷ Kuo pau ke ʻoua ʻaupito naʻa ngalo ʻiate kitautolu ʻoku tau kau ki ha tau pea kuo pau ke tau mateuteu ke faitau ʻi he ʻaho taki taha. (Fkh. 12:17) Heʻikai lava ke puke ʻe hotau fanga tokouá mo e fanga tuofāfiné ʻetau pā ʻo e tuí maʻa kitautolu. Kuo pau kiate kitautolu ke tau hanganaki puke maʻu ia.

18. Ko e hā naʻe hanganaki puke maʻu ai ʻe he kau sōtia ʻi he kuonga muʻá ʻenau paá?

¹⁸ ʻI he kuonga muʻá, naʻe maʻu ʻe ha sōtia ʻa e fakalāngilangi koeʻuhi ko ʻene toʻa ʻi he taú. Ka te ne ongoʻi fakamāʻia kapau naʻe ʻikai ke ne foki ki ʻapi mo ʻene paá. Naʻe tohi ʻe he faihisitōlia Loma ko Tasitusí: “Ko e mole ʻa e pā ʻa ha tokotaha ko e meʻa fakamā tahá ia.” Ko e ʻuhinga ia ʻe taha naʻe fakapapauʻi ai ʻe he kau sōtiá ke hanganaki puke maʻu ʻenau pā.

19. ʻE lava fēfē ke tau hanganaki puke maʻu ʻetau pā ʻo e tuí?

¹⁹ ʻOku tau hanganaki puke maʻu ʻetau pā ʻo e tuí ʻaki ʻa e maʻu tuʻumaʻu ʻa e ngaahi fakataha faka-Kalisitiané pea talanoa ki he niʻihi kehé fekauʻaki mo e huafa ʻo Sihová mo hono Puleʻangá. (Hep. 10:23-25) Tānaki atu ki aí, ʻoku tau lau ʻi he faʻa lotu ʻa e Folofola ʻa e ʻOtuá ʻi he ʻaho kotoa pea ngāueʻaki ʻene akonakí mo e tatakí ʻi he meʻa kotoa ʻoku tau faí. (2 Tīm. 3:16, 17) Pea heʻikai leva ke ʻi ai ha meʻatau ʻoku faʻu ʻe Sētane ke fai mai ʻaki ha kovi te ne fakatupunga ha maumau tuʻuloa kiate kitautolu. (ʻAi. 54:17) Ko ʻetau “pā lahi ko e tuí” te ne maluʻi kitautolu. Te tau tuʻu maʻu, uouongataha mo hotau fanga tokouá mo e fanga tuofāfiné. Pea te tau fai ʻa e meʻa lahi ange ʻi hono ikunaʻi pē ʻetau ngaahi faitau fakaʻahó​—te tau maʻu ʻa e monū ʻo e tuʻu ʻi he tafaʻaki ʻo Sīsuú ʻi heʻene ikunaʻi ʻa e faitau mo Sētane pea mo hono kau muimuí.​—Fkh. 17:14; 20:10.