Fakaivimālohiʻi Hoʻo Tuí ʻi he Meʻa Kuo Fai ʻa e ʻAmanaki ki Aí

1, 2. (a) Ko e hā ʻoku kehe ai ʻa e ngaahi meʻa ʻoku tau ʻamanaki ki aí mei he ngaahi meʻa ʻoku ʻamanaki ki ai ʻa e kakai kehé? (e) Ko e hā te tau lāulea ki ai ʻi he kupu ko ení?

KUO ʻomai ʻe Sihova ʻa e ngaahi meʻa fakaofo ke tau ʻamanaki ki ai. Kuó ne talaʻofa te ne fakamāʻoniʻoniʻi hono huafá pea ʻai ke fai hono finangaló ʻi hēvani mo māmani. (Māt. 6:9, 10) Ko e ngaahi meʻa mahuʻinga taha ia ʻoku tau fakatuʻotuʻa atu ki aí. Kuo toe talaʻofa ʻe Sihova te ne fakapaleʻi kitautolu ʻaki ʻa e moʻui taʻengatá, ʻi hēvani pe ʻi māmani. He talaʻofa fakafiefia ē! (Sione 10:16; 2 Pita 3:13) Pea ʻoku tau fakatuʻotuʻa atu ke sio ki he hokohoko atu hono tataki mo poupouʻi ʻe Sihova ʻa hono kakaí ʻi he ngaahi ʻaho fakaʻosi ko ení.

² ʻOku pehē ʻe he Tohi Tapú ko e tuí “ko e ʻamanekina ʻosi fakapapauʻi ia” ʻo e meʻa ʻoku tau ʻamanaki ki aí. ʻOku ʻuhinga ení ko e faʻahinga ʻoku nau maʻu ʻa e tuí ʻoku nau fakapapauʻi moʻoni ko e ngaahi meʻa kuo talaʻofa mai ʻe Sihová ʻe hoko moʻoni. (Hep. 11:1) ʻI he tafaʻaki ʻe tahá, ʻoku ʻamanaki mo fakaʻamu ʻa e kakai tokolahi ki ha ngaahi meʻa, ka ʻoku ʻikai lava ke nau fakapapauʻi pe ʻe hoko moʻoni ʻa e ngaahi meʻa ko iá. Ko e fakatātaá, ʻoku ʻamanekina nai ʻe ha tokotaha ke ne ikuna ʻa e lulú, ka ʻoku ʻikai lava ke ne fakapapauʻi moʻoni te ne ikuna ia. ʻI he kupu ko ení, te tau sio ai ki he meʻa ʻe lava ke tau fai ke fakaivimālohiʻi ʻetau tui ki he ngaahi talaʻofa ʻa e ʻOtuá. Te tau toe lāulea ai ki he founga ʻe lava ai ʻe he tui mālohí ʻo tokoniʻi kitautolu he taimi ní.

 3. Ko e hā ʻoku tau tui ai ʻe hoko moʻoni ʻa e ngaahi talaʻofa ʻa e ʻOtuá?

³ Naʻe ʻikai ke fanauʻi mai kitautolu fakataha mo e tuí. Ke maʻu ʻa e tuí, ʻoku fiemaʻu ke tau fakaʻatā ʻa e laumālie māʻoniʻoni ʻo e ʻOtuá ke ne tataki hotau lotó. (Kal. 5:22) ʻE lava ke tokoniʻi kitautolu ʻe he laumālie māʻoniʻoní ke tau ʻiloʻi ʻa Sihova. ʻI he taimi ʻoku tau mahinoʻi ai ʻokú ne māfimafi-aoniu mo potó, ʻoku tau tuipau ʻokú ne maʻu ʻa e malava ke fakahoko kotoa ʻa e meʻa kuó ne talaʻofa ki aí. ʻOku lave ʻa Sihova tonu ki heʻene ngaahi talaʻofá ʻo hangē kuo ʻosi hokó ʻi heʻene pehē: “Kuo hoko ia!” (Lau ʻa e Fakahā 21:3-6.) ʻOku tau ʻilo ʻoku fakahoko maʻu pē ʻe Sihova ʻene ngaahi talaʻofá. Ko ia ʻa e “ʻOtua Falalaʻanga.” Ko e ʻuhinga ia ʻoku tau tui ai ki he meʻa kotoa ʻokú ne tala mai fekauʻaki mo e kahaʻú.​—Teu. 7:9.

 4. Ko e hā naʻe tui ki ai ʻa e kau sevāniti ʻa e ʻOtuá ʻi he kuohilí?

⁴ ʻOku tala mai ʻi he Hepelū vahe 11 ʻa e hingoa ʻo e kau tangata mo e kau fefine ʻe toko 16 naʻe mālohi ʻenau tui ki he ngaahi talaʻofa ʻa Sihová. ʻOku toe lave ai ki he niʻihi kehe tokolahi naʻa nau fakahōifuaʻi ʻa Sihova “koeʻuhi ko ʻenau tuí.” (Hep. 11:39) Naʻa nau tatali kotoa ki he “hako” naʻe talaʻofa ʻe Sihová. Naʻa nau ʻiloʻi ko e “hako” ko ení te ne fakaʻauha kotoa ʻa e ngaahi fili ʻo e ʻOtuá pea toe ʻai ʻa e māmaní ko ha palataisi. (Sēn. 3:15) Pea ko e kau sevāniti ko eni ʻa e ʻOtuá naʻa nau tui mālohi ʻe toe fakafoki kinautolu ʻe Sihova ki he moʻuí. Ko e moʻoni, naʻe ʻikai ke nau fakatuʻotuʻa atu ki he toetuʻu ke moʻui ʻi hēvani, koeʻuhí naʻe teʻeki ai ke ʻai ʻe Sīsū ke malava ia. (Kal. 3:16) Ka, naʻa nau fakatuʻotuʻa atu ke moʻui taʻengata ʻi he māmaní ʻi ha palataisi fakaʻofoʻofa.​—Saame 37:11; ʻAi. 26:19; Hōs. 13:14.

5, 6. Ko e hā naʻe fakatuʻotuʻa atu ki ai ʻa ʻĒpalahame mo hono fāmilí? Naʻe anga-fēfē hono ʻai ke mālohi ʻenau tuí? (Sio ki he ʻuluaki fakatātā ʻi he kupú ni.)

⁵ ʻOku lave ʻa e Hepelū 11:13 fekauʻaki mo e kau sevāniti faitōnunga ʻa Sihová: “ʻI he tuí ko e faʻahingá ni kotoa naʻa nau mate, neongo naʻe ʻikai te nau maʻu ʻa e fakahoko ʻo e ngaahi talaʻofá, ka naʻa nau sio atu ki ai mei he mamaʻó pea naʻa nau talitali lelei ia.” Naʻa nau fakatuʻotuʻa atu ki he māmani foʻoú pea sioloto atu ʻoku nau moʻui ʻi ai. Ko e taha ʻo kinautolu ko ʻĒpalahame. Naʻe pehē ʻe Sīsū ko ʻĒpalahamé “naʻá ne fiefia lahi ʻi he ʻamanaki ke mamata” ki he taimi ko iá. (Sione 8:56) Naʻe toe fakatuʻotuʻa atu ʻa Sela, ʻAisake, Sēkope, mo e niʻihi kehe tokolahi ki he taimi ʻe pule mai ai ki he māmaní kotoa ʻa e Puleʻangá ʻa ia “ko hono tokotaha palaní mo e tokotaha langá ko e ʻOtuá.”​—Hep. 11:8-11.

⁶ Naʻe anga-fēfē hono ʻai ke mālohi ʻe ʻĒpalahame mo hono fāmilí ʻenau tuí? Naʻa nau hokohoko atu ʻi he ako fekauʻaki mo Sihová. ʻI he taimi ʻe niʻihi, naʻe folofola ʻa e ʻOtuá kia kinautolu fakafou ʻi he kau ʻāngelo, ngaahi vīsone, pe ngaahi misi. Mahalo pē naʻa nau toe ako mei he faʻahinga taʻumotuʻa faitōnungá pe mei he ngaahi tohi motuʻá. Naʻe ʻikai ʻaupito ngalo ʻia ʻĒpalahame mo hono fāmilí ʻa e ngaahi talaʻofa ʻa e ʻOtuá, pea naʻa nau saiʻia ke fakalaulauloto ki ai. Ko hono olá, naʻe ʻikai haʻanau veiveiua ki hono fakahoko ʻe Sihova ʻene ngaahi talaʻofá. Naʻa nau nofoʻaki mateaki kiate ia neongo ʻa e taimi naʻa nau tofanga ai ʻi he ngaahi faingataʻá pe fakatangá.

 7. Ko e hā kuo ʻomai ʻe Sihova ke fakaivimālohi ʻetau tuí, pea ko e hā ʻoku fiemaʻu ke tau faí?

⁷ Ko e hā te ne tokoniʻi kitautolu ke tauhi ke mālohi ʻetau tuí? Kuo ʻomai ʻe Sihova ʻa e Tohi Tapú ke akoʻi mai kia kitautolu ʻene ngaahi talaʻofa ki he kahaʻú. ʻI he Tohi Tapú, ʻokú ne fakahaaʻi mai ʻa e meʻa ʻoku fiemaʻu ke tau fai ke fiefia aí. Ko e ʻuhinga ia ʻoku lelei ai ke tau lau fakaʻaho ʻa e Tohi Tapú mo muimui ki heʻene tatakí. (Saame 1:1-3; lau ʻa e Ngāue 17:11.) ʻOku toe ʻomai ʻe Sihova ʻa e “meʻakaí ʻi he taimi totonu” fakafou ʻi he “tamaioʻeiki anga-tonu mo potó.” (Māt. 24:45) Hangē pē ko e kakai ʻa Sihova ʻi he kuohilí, ʻoku fiemaʻu maʻu pē ke tau lau ʻa e ngaahi talaʻofa ʻa e ʻOtuá pea fakalaulauloto fakamātoato ki ai. ʻE tokoni eni ke tau nofoʻaki mateaki ai ki he ʻOtuá pea fakatuʻotuʻa atu ki he taimi ʻe pule mai ai hono Puleʻangá ki he māmaní kotoa.

 8. ʻE lava fēfē ʻe he lotú ke fakaivimālohiʻi ʻetau tuí?

⁸ Ko e hā ʻa e toe meʻa naʻe tokoni ki he kakai ʻa Sihova ʻi he kuohilí ke ʻai ke mālohi ʻenau tuí? Naʻa nau lotu kia Sihova ʻo kole ʻene tokoní, pea ʻi heʻenau sio ki hono tali ʻenau ngaahi lotú, naʻe mālohi ange ai ʻenau tuí. (Nehe. 1:4, 11; Saame 34:4, 15, 17; Tan. 9:19-21) ʻI he founga tatau, ʻi heʻetau ʻilo ʻoku fanongo mai ʻa Sihova ki heʻetau ngaahi lotú pea ʻomai ʻi he taimi totonu ʻa e meʻa tofu pē ʻoku tau fiemaʻú, ʻoku mālohi ange ai ʻetau tui kiate iá. (Lau ʻa e 1 Sione 5:14, 15.) ʻOku toe fiemaʻu ke tau “hanganaki kole” kia Sihova ke ʻomai hono laumālie māʻoniʻoní koeʻuhi ke tau lava ʻo maʻu ʻa e tui lahi ange.​—Luke 11:9, 13.

 9. Ko e hā ʻa e ngaahi meʻa ʻoku totonu ke tau lotu fekauʻaki mo iá?

⁹ ʻI he taimi ʻoku tau lotu ai kia Sihová, ʻoku totonu ke ʻoua te tau kole pē ke ne ʻomai ʻa e meʻa ʻoku tau fiemaú. ʻOku totonu ke tau toe fakamālō kiate ia pea fakahīkihikiʻi ia ʻi he ʻaho kotoa pē. He ko hono moʻoní, kuó ne fai ʻa e ngaahi meʻa fakaofo lahi ʻaupito! (Saame 40:5) ʻOku toe lotu foki ʻa e kakai ʻa Sihová maʻa honau fanga tokoua takatakai ʻi he māmaní. Ko e fakatātaá, ʻoku tau “manatuʻi ʻa e faʻahinga ʻoku tuku pilīsoné.” ʻOku tau toe lotu maʻá e “faʻahinga ʻoku nau takimuʻa.” ʻI heʻetau ʻiloʻi ʻa hono tali ʻe Sihova ʻetau ngaahi lotú, ʻoku mālohi ange ai ʻetau tui kiate iá pea tau ʻunuʻunu ofi ange ai kiate iá.​—Hep. 13:3, 7.

10. Ko e hā naʻá ne tokoniʻi ʻa e tokolahi ke nau loto-toʻa mo hanganaki mateaki ki he ʻOtuá?

¹⁰ ʻI he Hepelū vahe 11, naʻe pehē ai ʻe he ʻapositolo ko Paulá: “Naʻe maʻu mai ʻe ha kau fefine ʻenau kau maté fakafou ʻi he toetuʻú; ka naʻe fakamamahiʻi ha kau tangata kehe koeʻuhí naʻe ʻikai te nau tali ha tukuange fakafou ʻi ha faʻahinga totongi huhuʻi, koeʻuhí kae lava ke nau aʻusia ha toetuʻu lelei ange.” (Hep. 11:35) Naʻe kātekina ʻe he tokolahi ʻa e ngaahi ʻahiʻahí pea hanganaki mateaki ki he ʻOtuá koeʻuhí naʻe mālohi ʻenau tui ki he toetuʻu naʻe talaʻofa ʻe he ʻOtuá. Naʻa nau ʻiloʻi ʻe fakafoki mai kinautolu ʻe Sihova ki he moʻui ʻi he kahaʻú, pea te nau moʻui taʻengata ʻi he māmaní. Fakakaukau kia Nēpote mo Sākalaia. Naʻe tolomakaʻi kinaua ʻo na mate koeʻuhí ko ʻena talangofua ki he ʻOtuá. (1 Tuʻi 21:3, 15; 2 Kal. 24:20, 21) Naʻe lī ʻa Taniela ki he ʻana ʻo e fanga laione fekaí, pea lī hono ngaahi kaumeʻá ki ha afi vela kakaha. Naʻa nau loto-lelei ke mate kehe pē ke ʻoua naʻa nau taʻemateaki kia Sihova. Naʻe tui mālohi ʻa e kau tangata ko ení ʻe ʻomai ʻe Sihova hono laumālie māʻoniʻoní pea tokoniʻi kinautolu ke nau kātekina ʻa e ngaahi faingataʻa ko iá.​—Tān. 3:16-18, 20, 28; 6:13, 16, 21-23; Hep. 11:33, 34.

11. Ko e hā ʻa e ngaahi ʻahiʻahi naʻe kātekina ʻe he niʻihi ʻo e kau palōfitá koeʻuhí ko ʻenau tuí?

¹¹ Ko e kau palōfita tokolahi, naʻe manukiʻi pe tuku pilīsone kinautolu ʻo hangē ko Maikaia mo Selemaiá. Ko e niʻihi, hangē ko ʻIlaisiaá, naʻa nau “ʻalu fano holo ʻi he ngaahi toafa mo e ngaahi moʻunga mo e ngaahi ʻana mo e ngaahi luo ʻo e māmaní.” Ko kinautolu kotoa naʻa nau kātaki ʻa e ngaahi ʻahiʻahi mo hanganaki mateaki ki he ʻOtuá koeʻuhí naʻa nau ‘ʻamanekina ʻosi fakapapauʻi ʻo e meʻa kuo fai ʻa e ʻamanaki ki ai.’​—Hep.  11:1, 36-38; 1 Tuʻi 18:13; 22:24-27; Sel. 20:1, 2; 28:10, 11; 32:2.

12. Ko hai ʻa e faʻifaʻitakiʻanga lelei taha ʻe lava ke tau faʻifaʻitaki ki aí? Ko e hā naʻá ne tokoniʻi ia ke ne kātaki ʻi he ngaahi ʻahiʻahí?

¹² Naʻe kātekina ʻe Sīsū Kalaisi ʻa e ʻahiʻahi faingataʻa tahá pea hanganaki mateaki kia Sihova. Ko e hā naʻá ne tokoniʻi ia ke ne kātakí? Naʻe pehē ʻe Paula: “He ko e meʻa ʻi he fiefia ko ia naʻe fokotuʻu ʻi muʻa ʻiate iá naʻá ne kātakiʻi ai ha ʻakau fakamamahi, ʻo tukunoaʻi hono fakamāʻí, pea kuó ne nofo hifo ʻi he nima toʻomataʻu ʻo e taloni ʻo e ʻOtuá.” (Hep. 12:2) Naʻe fakalototoʻaʻi leva ʻe Paula ʻa e kau Kalisitiané ke nau “fakakaukau fakalelei atu” ki he faʻifaʻitakiʻanga ʻa Sīsuú. (Lau ʻa e Hepelū 12:3.) Hangē ko Sīsuú, ko e kau Kalisitiane tokolahi ʻi he ʻuluaki senitulí naʻa nau mate koeʻuhí naʻa nau mateaki kia Sihova. Ko e taha ʻi he faʻahinga ko ení ko ʻAnitipasa. (Fkh. 2:13) Kuo ʻosi maʻu ʻe he kau Kalisitiane ko iá honau palé, ʻo kehe ia mei he kau sevāniti ʻa e ʻOtuá ki muʻa ʻiate kinautolú ʻa ia naʻa nau fakatuʻotuʻa kinautolu ki he moʻui ʻi he māmaní. (Hep. 11:35) Hili atu ʻa e taimi mei he hoko ʻa Sīsū ko e Tuʻi ʻi he 1914, ko e kau Kalisitiane pani naʻe maté naʻa nau toetuʻu ki he moʻui taʻefaʻamate ʻi hēvani, pea te nau pule fakataha mai mo ia ki he faʻahinga ʻo e tangatá.​—Fkh. 20:4.

13, 14. Ko e hā ʻa e ngaahi ʻahiʻahi naʻe kātekina ʻe Rudolf Graichen, pea ko e hā naʻá ne tokoniʻi ia ke ne hanganaki mateaki ki he ʻOtuá?

¹³ ʻOku muimui ʻa e kau sevāniti ʻe laui miliona ʻa e ʻOtuá ki he faʻifaʻitakiʻanga ʻa Sīsuú. ʻOku nau fakalaulauloto ki he ngaahi talaʻofa ʻa e ʻOtuá pea hanganaki mateaki kiate ia lolotonga ʻa e ngaahi ʻahiʻahí. Fakakaukau kia Rudolf Graichen, ʻa ia naʻe fāʻeleʻi ia ʻi Siamane ʻi he 1925. ʻI heʻene kei siʻí, naʻe hanga ʻe heʻene ongo mātuʻá ʻo tautau ha ngaahi fakatātā Fakatohitapu ʻi honau falé. Naʻá ne pehē: “Ko e fakatātā ʻe taha naʻe hā ai ʻa e ulofi mo e lami, kiʻi tamasiʻi mo e lēpati, ʻuhikiʻi pulu mo e laione​—ʻoku nau melino kotoa, ʻo taki ʻe ha kiʻi tamasiʻi.” (ʻAi. 11:6-9) Naʻe tokoni eni kia Rudolf ke ne fakakaukau lahi ki he māmani palataisí pea fakaivimālohiʻi ʻene tui ki aí. Ko hono olá, naʻá ne hanganaki mateaki kia Sihova neongo naʻe fakatangaʻi fefeka ia ʻi he ngaahi taʻu lahi ʻe he Kesitapo Nasí mo e Communist Stasi ʻa Siamane Hahaké.

¹⁴ Naʻe kātekina ʻe Rudolf ʻa e ngaahi ʻahiʻahi lahi kehe. Naʻe mate ʻene fineʻeikí ʻi he mahaki taifusí ʻi he kemi fakamamahi ʻi Ravensbrück. Naʻe fakamoʻoni ʻene tangataʻeikí ʻi ha tohi ʻa ia naʻe pehē ai heʻikai te ne toe hoko ko e taha ʻo e Kau Fakamoʻoni ʻa Sihová. Ka naʻe kei mālohi pē ʻa e tui ʻa Rudolf. Hili hono tukuange ʻa Rudolf mei he pilīsoné, naʻá ne ngāue ko ha ʻovasia sēketi. Naʻe fakaafeʻi leva ia ki he Akoʻanga Kiliatí pea vaheʻi ki he fonua ko Sili, ʻa ia naʻá ne toe ngāue ai ko ha ʻovasia sēketi. Naʻe mali ai mo ha tuofefine misinale, ko Patsy. Ka ko e meʻa fakamamahí, ʻi ha taʻu ʻe taha ki mui ai naʻe mate ʻena kiʻi pēpē fefiné. Hili atu ha taimi mei ai, naʻe toe mate mo Patsy. Naʻá ne taʻu 43 pē. Neongo ʻa e ngaahi ʻahiʻahi kotoa ko ení, naʻe hokohoko atu pē ʻa e tauhi ʻa Rudolf kia Sihová. Neongo ʻene taʻumotuʻá mo mahamahakí, naʻá ne kei tāimuʻa tuʻumaʻu pē mo hoko ko e mātuʻa. ʻE lava ke tau lau ʻa e talanoa ki heʻene moʻuí ʻi he ʻīsiu ʻo e The Watchtower ʻo ʻAokosi 1, 1997, peesi 20-25.^[1] (Sio ki he fakamatala ʻi he ngataʻangá.)

15. ʻOmai ʻa e faʻifaʻitakiʻanga ʻe niʻihi ʻo e fanga tokoua mo e fanga tuofāfine he ʻahó ni ʻoku nau tauhi fiefia kia Sihova neongo hono fakatangaʻi kinautolú.

¹⁵ ʻI he ʻahó ni, ko e tokolahi hotau fanga tokouá mo e fanga tuofāfiné ʻoku nau tauhi fiefia kia Sihova neongo hono fakatangaʻi anga-fefeka kinautolú. ʻOku tuku pilīsone ʻa e lauingeau ʻo kinautolu ʻi ʻElitilia, Singapoa mo Kōlea Tonga koeʻuhí ko ʻenau fakafisi ke “toʻo ʻa e heletaá.” (Māt. 26:52) Ko e fakatātaá, ko Isaac, Negede, mo Paulos, kuo tuku pilīsone kinautolu ʻi ʻElitilia ʻo laka hake ʻi he taʻu ʻe 20! Kuo ngaohikoviʻi anga-kakaha kinautolu ʻi ai. Pea lolotonga ʻa e kotoa ʻo e ngaahi taʻu ko ení, kuo ʻikai ke nau malava ʻo mali pe tokangaʻi ʻenau ngaahi mātuʻá. Ka, ʻoku nau mateaki kia Sihova pea ʻoku mālohi ʻenau tuí. Naʻa mo e kau leʻo ʻi he pilīsoné ʻoku nau fakaʻapaʻapaʻi kinautolu he taimí ni. ʻOku ʻi ai ʻa e tā ʻo e fanga tokoua ko ení ʻi he uepisaiti jw.org. ʻOku nau malimali pē neongo ʻenau faingataʻaʻiá.

16. Ko e hā ʻoku hanga ʻe he tui mālohí ʻo tokoniʻi koe ke ke faí?

¹⁶ Ko e tokolahi taha ʻo e kakai ʻa Sihová kuo ʻikai ke tuku pilīsone kinautolu pe fakamamahiʻi anga-kakaha ʻo hangē ko hotau fanga tokoua naʻa tau toki lave ki aí. Ka kuo faingataʻaʻia ʻa e tokolahi koeʻuhí ko e masivá, fakatamaki fakanatulá, pe ngaahi tau fakalotofonuá. Kuo muimui ʻa e niʻihi ʻi he faʻifaʻitakiʻanga ʻa ʻĒpalahame, ʻAisake, Sēkope mo Mōsesé pea tukuange ʻenau hoko ʻo ʻiloá pe tuʻumālié kae tokangataha ki he tauhi kia Sihová. Ko e hā ʻokú ne tokoniʻi hotau fanga tokouá ke nau hanganaki tauhi fiefia kia Sihová? Ko ʻenau ʻofa kiate iá mo e mālohi ʻenau tui ki heʻene ngaahi talaʻofá. ʻOku nau ʻilo te ne fakapaleʻi ʻene kau sevāniti faitōnungá ʻaki ʻa e moʻui taʻengata ʻi he māmani foʻoú, ʻa ia heʻikai ke toe ʻi ai ha fakamaau taʻetotonu.​—Lau ʻa e Saame 37:5, 7, 9, 29.

17. ʻE anga-fēfē haʻo ʻai ke mālohi hoʻo tuí, pea ko e hā te tau lāulea ki ai ʻi he kupu hoko maí?

¹⁷ ʻI he kupu ko ení, kuo tau sio ai ki he hoko ʻa e tuí “ko e ʻamanekina ʻosi fakapapauʻi ia ʻo e meʻa kuo fai ʻa e ʻamanaki ki ai.” Ke maʻu ʻa e tui ko iá, ʻoku fiemaʻu ke tau lotu kia Sihova mo fakalaulauloto maʻu pē ki heʻene ngaahi talaʻofá. Te tau malava leva ai ke kātekina ha ʻahiʻahi. ʻI he kupu hoko maí, te tau lāulea lahi ange ki he ʻuhinga ʻo hono maʻu ʻa e tuí.