Tokanga Fekauʻaki mo e Ngaahi Taumuʻa ʻo e Lotó

“Ko e fungani ʻi he meʻa kākā ka ko e loto, pea ʻoku hilio hono kovi,” ko e lau ia ʻa e Tohi Tapú. (Sel. 17:9) ʻI he taimi ʻoku mātuʻaki holi ai hotau lotó ki ha meʻa, ʻikai ʻoku tau kumi ki ha ngaahi ʻuhinga ke fakahoko ai ʻene ngaahi taumuʻá?

ʻOku fakatokanga mai kia kitautolu ʻa e Folofolá: “ʻOku ʻalu hake mei he lotó ʻa e ngaahi fakaʻuhinga fulikivanu, ngaahi fakapō, ngaahi tono, ngaahi feʻauaki, ngaahi kaihaʻa, ngaahi fakamoʻoni loi, ngaahi tōʻonga taʻetoputapuʻia.” (Māt. 15:19) ʻE lava ʻe hotau lotó ke ne kākaaʻi kitautolu pea taki atu ai ki heʻetau fakatonuhiaʻi ha tōʻonga ʻa ia ʻoku fepaki mo e finangalo ʻo e ʻOtuá. Pea heʻikai nai ke tau fakatokangaʻi ʻa e meʻa kuo hokó ka ʻi he toki hili ʻetau fai ha tōʻonga taʻefakapotopoto. Ko e hā ʻe lava ke ne tokoniʻi kitautolu ke ʻiloʻi ai ʻa e ngaahi taumuʻa hotau lotó ki muʻa ke tau fou ʻi ha ʻalunga halá?

ʻILOʻI HOʻO NGAAHI TAUMUʻÁ—ANGA-FĒFĒ?

Lau fakaʻaho ʻa e Tohi Tapú pea fakalaulauloto ki he meʻa ʻoku leaʻaki aí. “Ko e folofola ʻa e ʻOtuá ʻoku moʻui pea ko e koto mālohi pea ʻoku māsila ange ia ʻi ha faʻahinga heletā fakatoumata pē pea ʻoku ngalo atu ia ki loto ʻo aʻu ʻo ne vaetuʻua ʻa e tangata ʻi tuʻá mei he laumālié,” ko e tohi ia ʻa e ʻapositolo ko Paulá. Ko e pōpoaki ʻa e ʻOtuá ʻoku maʻu ʻi he Tohi Tapú “ʻoku malava ke ne vavanga ki he ngaahi fakakaukau mo e ngaahi taumuʻa ʻo e lotó.” (Hep. 4:12) ʻI he sio hifo kia kitautolu ʻi he fakamaama ʻo e meʻa ʻoku leaʻaki ʻe he Folofolá ʻe lava ke hoko moʻoni ia ko ha tokoni mālohi ʻi hono ʻiloʻi ʻa e ngaahi taumuʻa ʻo e lotó. He mātuʻaki mahuʻinga ē ke tau lau fakaʻaho ʻa e Folofola ʻa e ʻOtuá pea fakalaulauloto ki he meʻa ʻoku leaʻaki aí, ʻo tau mahinoʻi ai ʻa e ngaahi fakakaukau mo e anga ʻo e vakai ʻa Sihová!

Ko hono tali ʻa e akonaki Fakatohitapú pea ngāueʻaki ʻa e ngaahi tefitoʻi moʻoni ʻa e Tohi Tapú ʻe lava ke ʻi ai hono ola ki hotau konisēnisí—ko e tufakanga ʻi loto ʻa ia ‘ʻoku faifakamoʻoni.’ (Loma 9:1) Ko e leʻo hotau konisēnisí ʻe lava ke ne taʻofi kitautolu mei hono fakatonuhiaʻi ha ʻalunga hala. Tānaki atu ki aí, ʻoku ʻi he Tohi Tapú ʻa e ngaahi faʻifaʻitakiʻanga ʻe lava ke hoko “ko ha fakatokanga ia kiate kitautolu.” (1 Kol. 10:11) Ko e ako mei aí ʻe lava ke ne taʻofi ai kitautolu mei he fou atu ʻi he ʻalunga ʻoku halá. Ko e hā ʻoku totonu ke tau taki taha faí?

Lotu ki he ʻOtuá ke ne tokoniʻi koe ke ke ʻiloʻi ʻa e ngaahi taumuʻa ho lotó. Ko Sihova ʻokú ne “sivi ʻa e loto.” (1 Kal. 29:17) ʻOkú ne “lahi ange ia ʻi hotau lotó pea ʻokú ne ʻafioʻi ʻa e ngaahi meʻa kotoa pē.” (1 Sio. 3:20) ʻOku ʻikai lava ke kākaaʻi ʻa e ʻOtuá. Kapau ʻoku tau fakahaaʻi tauʻatāina ʻetau ngaahi hohaʻá, ngaahi ongoʻí, mo ʻetau ngaahi holí ʻi he lotu, ʻoku lava ʻe Sihova ke ne tokoniʻi kitautolu ke tau ʻiloʻi ʻa e ngaahi taumuʻa hotau lotó. ʻOku aʻu ʻo lava ke tau kole ki he ʻOtuá ke ne ‘fakatupu ʻiate kitautolu ha loto maʻa.’ (Saame 51:10) Ko ia ai, ʻi hono ʻiloʻi ʻa e ngaahi hehema hotau lotó, ʻoku ʻikai totonu ke tau tukunoaʻi ʻa e tokonaki ʻo e lotú.

Tokanga lolotonga ʻa e ngaahi fakataha faka-Kalisitiané. Ko ʻetau tokanga ki he meʻa ʻoku ʻomai ʻi he ngaahi fakataha faka-Kalisitiané ʻoku lava ke tokoniʻi ai kitautolu ke tau fai ha vakai faitotonu ki hotau tangata ʻi lotó—ʻa hotau lotó. Neongo heʻikai ke tau maʻu nai ha fakamatala foʻou ʻi he fakataha kotoa pē, ko ʻetau ʻi aí ʻoku tau mahinoʻi lelei ange ai ʻa e ngaahi tefitoʻi moʻoni Fakatohitapú pea pehē ki he ngaahi fakamanatu mahuʻinga ʻa ia ʻoku tokoni kia kitautolu ke tau sivisiviʻi ai ʻa e ngaahi taumuʻa ʻo e lotó. ʻI hono fakaleleiʻi hotau tangata ʻi lotó, ko e ngaahi tali hotau fanga tokouá mo hotau fanga tuofāfiné ʻoku toe mahuʻinga foki. (Pal. 27:17) Ko hono fakamavaheʻi kitautolu kae ʻikai maʻu tuʻumaʻu ʻa e feohi faka-Kalisitiane ʻi he ngaahi fakatahá ʻoku lava ke fakatupu maumau kia kitautolu. ʻOku lava ke taki atu ai ki heʻetau ‘nofoʻaki kumi ʻa e holi ʻatautolú.’ (Pal. 18:1) Ko ia ʻoku fakapotopoto ke tau ʻeke hifo, ‘Ko ʻeku tōʻongá ia ke maʻu ʻa e ngaahi fakatahá kotoa pea maʻu ʻaonga mei ai?’—Hep. 10:24, 25.

KO FĒ ʻE TAKI ATU KITAUTOLU KI AI ʻE HOTAU LOTÓ?

Ko hotau loto kākaá ʻoku lava ke ne takiheeʻi kitautolu ʻi he ngaahi tafaʻaki lahi ʻo e moʻuí. Tau sivisiviʻi angé ʻa e tafaʻaki ʻe fā: ko e tuli ki he ngaahi meʻa fakamatelié, ko hono ngāueʻaki ʻa e inu ʻolokaholó, ko ʻetau fili ʻa e ngaahi feohí, pea mo e fakafiefia ʻoku tau faí.

Ko e tuli ki he ngaahi meʻa fakamatelié. Ko e holi ke fakatōliʻa ʻetau ngaahi fiemaʻu fakaesinó ʻoku fakanatula pē. Kae kehe, naʻe ʻomai ʻe Sīsū ha faʻifaʻitakiʻanga fakaefakatokanga fekauʻaki mo hono fakamahuʻingaʻi taʻetotonu ʻa e ngaahi meʻa fakamatelié. ʻI he taha ʻo ʻene ngaahi talanoa fakatātaá, ʻoku fakaafeʻi ai kitautolu ʻe Sīsū ke tau fakakaukau ki he tuʻunga ʻo ha tangata koloaʻia ʻa ia naʻe fonu ʻa hono ngaahi feleokó. Ko ia ai, naʻe ʻikai ha feituʻu ke tānaki ki ai ʻa e fua mei ha toe utu-taʻu lelei ʻe taha. Naʻe fakakaukau ai ʻa e tangatá ke holoki hono ngaahi feleokó kae langa ha ngaahi feleoko lalahi ange. Naʻá ne fakaʻuhinga: “Te u tānaki ki ai ʻa e kotoa ʻo ʻeku uité mo e kotoa ʻo ʻeku ngaahi meʻa leleí, pea te u pehē kiate au: ‘Kuó u tātānaki ʻa e ngaahi meʻa lelei lahi ʻi he ngaahi taʻu lahi; te u mālōlō ā, kai, inu, mo u fiefia.’” Kae kehe, naʻe ʻikai ke fakakaukau ʻa e tangata koloaʻia ko ení ki ha moʻoniʻi meʻa taʻealakalofi: Ko ʻene moʻuí ʻoku lava ke ngata ʻi he pō pē ko iá.—Luke 12:16-20.

ʻI heʻetau fakaʻaʻau ke motuʻa angé, te tau hoko ʻo hohaʻa nai fekauʻaki mo hono fokotuʻutuʻu ha maluʻanga fakamatelie ki heʻetau taʻumotuʻá ʻo malava ke kamata ai ke tau fakatonuhiaʻi ha ngāue ʻovataimi ʻi he ngaahi efiafi fakatahá pe kamata ke fakaliʻeliʻaki hotau ngaahi fatongia faka-Kalisitiané ʻi ha faʻahinga founga. ʻIkai ʻoku totonu ke tau maluʻi kitautolu mei ha hehema pehē? Pe ʻoku tau kei talavou nai pea tau ʻiloʻi ʻoku ʻikai ha ngāue ʻoku toe lelei ange ʻi he ngāue taimi-kakató. Neongo ia, ʻoku tau tautoloi ʻa e ngāue tāimuʻá, ʻo fakaʻuhinga ʻoku totonu ke tau ʻuluaki hoko ʻo malu fakapaʻanga? ʻIkai ʻoku totonu ke tau fai hotau lelei tahá he taimí ni ke tau koloaʻia ai ki he ʻOtuá? Ko hai ia ʻokú ne ʻilo pe te tau kei moʻui ʻapongipongi?

Ko hono ngāueʻaki ʻa e inu ʻolokaholó. “Oua naa ke kau moe kakai faa inu ke kona,” ko e lau ia ʻa e Palōveepi 23:20 (PM). Kapau ʻoku holi lahi ha taha ki he inu ʻolokaholó, te ne fakatonuhiaʻi nai ʻa e inu maʻu peé. Te ne pehē nai ʻokú ne inú ke maʻu ai ha nonga, kae ʻikai ko ʻene inú ke konā. Kapau ʻoku tau fiemaʻu ʻa e ʻolokaholó ke maʻu ai ha nonga, mahalo ʻoku taimi ke tau fai ha sivisiviʻi faitotonu ʻa e hehema hotau lotó.

Ko ʻetau fili ʻa e ngaahi feohí. Ko e moʻoni, ʻoku fetuʻutaki ʻa e niʻihi mo e kau taʻetuí—hangē ko ia ʻi he ʻapiakó, ʻi he ngāueʻangá, pea ʻi he taimi ʻoku nau kau atu ai ʻi he ngāue fakafaifekaú—pea ʻoku taʻealakalofi. Ka ko ha tuʻunga kehe ʻaupito ia ke feohi mo kinautolu, naʻa mo hono fakatupulekina ha vahaʻangatae vāofi mo kinautolu. ʻOku tau fakatonuhiaʻi ʻa e feohi ko iá ʻi he pehē ʻoku nau maʻu ʻa e ngaahi ʻulungaanga lelei lahi? “ʻOua naʻa takihalaʻi kimoutolu,” ko e fakatokanga ia ʻa e Tohi Tapú. “Ko e ngaahi feohi koví ʻokú ne maumauʻi ʻa e ngaahi anga ʻoku leleí.” (1 Kol. 15:33) Hangē ko e lava ke ʻuliʻi ʻe ha kiʻi meʻi ʻuli ha vai ʻoku maʻa, ko e kaungāmeʻa mo e faʻahinga ʻoku ʻikai ke nau tōʻongaʻaki ʻa e anga-līʻoa fakaʻotuá ʻoku lava ke ne ʻuliʻi hotau tuʻunga fakalaumālié pea taki atu ai kitautolu ki hono tali ʻa e ngaahi fakakaukau, vala, lea mo e tōʻonga ʻa e māmaní.

Ko e fakafiefia ʻoku tau faí. Ko e ngaahi tekinolosia fakaeonopōní ʻokú ne ʻai ke tau maʻungofua ai ʻa e faʻahinga kotoa ʻo e fakafiefiá, ʻa ia ko e lahi taha aí ʻoku ala fehuʻia pe taʻetotonu ki ha Kalisitiane. Ko e ‘faʻahinga kotoa pē ʻo e taʻemaʻá tuku ke ʻoua naʻa fai ha talanoa ki ai ʻi homou lotolotongá,’ ko e tohi ia ʻa Paulá. (ʻEf. 5:3) Fēfē kapau ʻoku fakamānako ki hotau lotó ʻa e vakai pe fanongo ki ha meʻa ʻoku taʻemaʻa? ʻOku tau fakaʻuhinga nai ʻoku fiemaʻu ki he tokotaha kotoa ha kiʻi mālōlō pe fakafiefia, pea ko e anga hono maʻu ia ʻe ha taha ko ha meʻa fakafoʻituitui pē ia. Kae tuku ke tau tokanga ki he akonaki ʻa Paulá pea ʻoua ʻe fakaʻatā ʻa e taʻemaʻá ke hū mai ki hotau matá pe ki hotau telingá.

ʻE LAVA KE TAU FAI ʻA E NGAAHI LILIU

Kapau ʻoku maʻukovia kitautolu ʻe he ngaahi meʻa ʻoku hehema ki ai ha loto kākā pea angaʻaki hono fakatonuhiaʻi ʻa e ngaahi tōʻonga ʻoku halá, ʻe lava ke tau fai ʻa e ngaahi liliu. (ʻEf. 4:22-24) Fakakaukau ki ha ongo faʻifaʻitakiʻanga ʻe ua ʻi onopooni.

Naʻe pau ke feʻunuʻaki ʻe Mikaelea ʻene fakakaukau fekauʻaki mo e ngaahi meʻa fakamatelié. ʻOkú ne pehē: “Ko au, mo hoku uaifí, mo hoku fohá, ʻoku mau haʻu mei ha fonua ʻa ia ʻoku fai ai ʻa e vakai ʻoku mātuʻaki mahuʻinga ʻa hono maʻu ʻa e tekinolosia mo e ngaahi meʻa fakafiemālie fakamuimui taha mo lelei tahá. ʻI he taimi ʻe taha, naʻá ku līʻoa atu au ke maʻu ʻa e meʻa kotoa te u malavá mei he māmaní, ʻo fakakaukau te u malava ke fai eni ʻo ʻikai hoko ai ʻo tuli ki he meʻa fakamatelié. Naʻe vave ʻeku ʻiloʻi ko e tuli ki he ngaahi koloa fakamatelié ko ha hala ia naʻe ʻikai hano ngataʻanga. Naʻá ku lotu kia Sihova fekauʻaki mo ʻeku ngaahi fakakaukaú mo e ngaahi taumuʻa hoku lotó. Naʻá ku fakahaaʻi kiate ia ʻi he tuʻunga ko ha fāmilí, naʻa mau fiemaʻu ke tauhi kakato kiate ia. Naʻe malava ke mau fai ha fili ke fakafaingofuaʻi ʻemau moʻuí pea hiki ki he feituʻu naʻe lahi ange ai ʻa e fiemaʻú. Taimi nounou mei ai, naʻa mau malava ke tāimuʻa. Kuo mau sio ʻoku ʻikai fiemaʻu kiate kimautolu ha meʻa fakamatelie lahi ka mau toki maʻu ha moʻui fiefia mo kakato.”

ʻOku fakahaaʻi ʻe he hokosia ʻa Lií ʻa e anga hono tokoniʻi ia ʻe he sivisiviʻi-kita faitotonú ke ne liʻaki ʻa e feohi koví. “Koeʻuhi ko ʻeku ngāué,” ko e lau ia ʻa Lií, “naʻá ku toutou feohi ai mo e kau fefakatauʻaki mulí. Naʻá ku ʻiloʻi ʻe ʻi ai ʻa e inu tōtuʻa ʻi he ngaahi fakatahataha ko iá, ka ko e ʻalu ki aí naʻe fakalata ʻaupito kiate au. ʻI he ngaahi taimi lahi naʻá ku ofi ai ki he tuʻunga ʻo e mei konaá, kae ʻi he hili iá naʻá ku ongoʻi fakaʻiseʻisa. Naʻe pau ke u fai hano sivisiviʻi faitotonu hoku lotó. Ko e akonaki ʻa e Folofola ʻa e ʻOtuá mo e ngaahi fokotuʻu ʻa e kau mātuʻá naʻá na tokoniʻi au ke u ʻiloʻi ko e meʻa naʻá ku kumi moʻoni ki aí ko e feohi mo e kakai ʻoku ʻikai ke nau ʻofa kia Sihova. ʻI he taimi ní ʻoku ou fakahoko ʻeku pisinisí fakafou ʻi he telefoní ʻi he lahi taha ʻe ala lavá pea tauhi ki he siʻisiʻi tahá ʻa ʻeku fetuʻutaki mo e kau fefakatauʻakí.”

ʻOku fiemaʻu ke tau faitotonu kia kitautolu pea ʻiloʻi ʻa e ngaahi taumuʻa hotau lotó. ʻI heʻetau fai peheé, ʻoku totonu ke tau kumi ki he tokoni ʻa Sihová ʻi he lotu, ʻo manatuʻi ko ia “oku ne iloʻi ae gaahi mea fufu oe loto.” (Saame 44:21, PM) Kuo toe tokonaki mai ʻe he ʻOtuá ʻene Folofolá, ʻa ia ʻe lava ke hoko ko ha sioʻata kia kitautolu. (Sēm. 1:22-25) ʻOku toe mahuʻinga foki ʻa e ngaahi fakamanatu mo e akonaki ʻoku tau maʻu fakafou ʻi he ʻū tohi faka-Kalisitiané mo ʻetau ngaahi fakatahá! ʻI he ngaahi tokonaki peheé, ʻe lava ke tau maluʻi hotau lotó pea hanganaki ʻaʻeva ʻi he ngaahi hala ʻo e māʻoniʻoní.

[Fakamatala ʻi lalo]

[Fakatātā ʻi he peesi 23]

ʻOku anga-fēfē kaunga ʻa e lau Tohi Tapu fakaʻahó ki hotau lotó?

[Fakatātā ʻi he peesi 23]

Ko ʻetau ngaahi lotú ʻokú ne tokoniʻi kitautolu ke ʻiloʻi ʻa e tangata ʻi lotó

[Fakatātā ʻi he peesi 23]

Ko e ngaahi fakataha faka-Kalisitiané ʻokú ne tokoniʻi kitautolu ke ʻiloʻi ʻa e ngaahi taumuʻa hotau lotó