Fai ke ʻIlo “ʻa e ʻAtamai ʻo Kalaisí”

“‘Ko hai kuó ne hoko ʻo ʻilo ʻa e ʻatamai ʻo Sihová, ke lava ke ne fakahinohinoʻi ai ia?’ Ka ʻoku tau maʻu ʻe kitautolu ʻa e ʻatamai ʻo Kalaisí.”—1 KOLINITO 2:​16, NW.

 1, 2. ʻI heʻene Folofolá, naʻe vakai ai ʻa Sihova ʻoku feʻunga ke fakaeʻa ʻa e hā fekauʻaki mo Sīsuú?

NAʻE fōtunga fēfē ʻa Sīsū? Naʻe lanu hā hono louʻulú? hono kilí? hono ongo matá? Naʻá ne māʻolunga fēfē? Ko e hā hono mamafá? ʻI he faai mai ʻa e ngaahi senitulí, ko e ngaahi fakahāhaaʻi fakaetāfakatātā ʻo Sīsuú kuo maliu ia mei he tuʻunga totonú ʻo ngali kehe. Kuo fakatātaaʻi ia ʻe he niʻihi ʻokú ne ngali tangata mo longomoʻui, lolotonga ia ʻoku tāfakatātaaʻi ia ʻe he niʻihi ʻokú ne ngāvaivai mo tuletule.

² Kae kehe, ko e Tohitapú ʻoku ʻikai te ne fakahanga ʻe ia ʻa e tokangá ki he fōtunga ʻo Sīsuú. Ka, ʻoku vakai ʻa Sihova ʻoku feʻunga ke fakaeʻa ha meʻa ʻoku mahuʻinga mamaʻo ange: ko e tokotaha naʻe fēfē ʻa Sīsū. Ko e ngaahi fakamatala Kōsipelí ʻoku ʻikai ngata pē ʻenau fakamatalaʻi ʻa e meʻa naʻe leaʻaki mo fai ʻe Sīsuú ka ʻoku nau toe fakaeʻa ʻa e loloto ʻo e ongoʻi pea mo e sīpinga ʻo e fakakaukau naʻe ʻi mui ʻi heʻene ngaahi leá mo ʻene ngaahi ngāué. ʻOku fakamafeia kitautolu ʻe he ngaahi fakamatala fakamānavaʻi ʻe fā ko ení ke tau fakasio ai ki he meʻa naʻe lave ki ai ʻa e ʻapositolo ko Paulá ko e “ʻatamai ʻo Kalaisí.” (1 Kolinito 2:​16, NW) ʻOku mahuʻinga ke tau hoko ʻo maheni mo e ngaahi fakakaukau, ngaahi ongoʻi, pea mo e angaʻitangata ʻo Sīsuú. Ko e hā hono ʻuhingá? ʻI he ʻuhinga ʻikai toe siʻi hifo he uá.

 3. ʻI heʻetau hoko ko ia ʻo maheni mo e ʻatamai ʻo Kalaisí ʻe lava ai ke ʻomi kiate kitautolu ʻa e ʻilo fē?

³ ʻUluakí, ko e ʻatamai ʻo Kalaisí ʻokú ne ʻomi kiate kitautolu ha fakaataata ki he ʻatamai ʻo Sihova ko e ʻOtuá. Naʻe fuʻu maheni vāofi ʻaupito ʻa Sīsū mo ʻene Tamaí ʻo malava ai ke ne pehē: “ʻOku ʻikai ha toko taha ʻoku ne ʻilo pe ko hai ʻa e Foha, ngata pe ʻi he Tamai; pe ko hai ʻa e Tamai, ngata pe ʻi he Foha, pea mo ha taha ʻe loto ʻe he Foha ke fakaʻilo ia ki ai.” (Luke 10:22) ʻOku hangē pē ia naʻe pehē ʻe Sīsū, ‘Kapau ʻokú ke loto ke ʻilo pe ʻoku fēfē ʻa Sihova, sio kiate au.’ (Sione 14:9) Ko ia ai, ʻi he taimi ʻoku tau ako ai ki he meʻa ʻoku fakaeʻa ʻe he ngaahi Kōsipelí ʻo fekauʻaki mo e anga ʻo e fakakaukau mo e ongoʻi ʻa Sīsuú, ʻoku tau iku leva ai ʻo ako ki he anga ʻo e fakakaukau mo e ongoʻi ʻa Sihová. ʻOku fakamafeia ʻe he ʻilo peheé kitautolu ke tau ʻunuʻunu ofi ange ai ki hotau ʻOtuá.—Semisi 4:8.

 4. Kapau ko e moʻoní ia ke tau ngāue ʻo hangē ko Kalaisí, ko e hā kuo pau ke tau tomuʻa akó, pea ko e hā hono ʻuhingá?

⁴ Ko hono uá, ko ʻetau ʻilo ko ia ʻa e ʻatamai ʻo Kalaisí ʻoku tokoni ia kiate kitautolu ke “muimui ofi, ʻo topuvaʻe taha mo ia.” (1 Pita 2:21) Ko e muimui kia Kalaisí ʻoku ʻikai ko hono toutou leaʻaki pē ʻa ʻene ngaahi leá mo faʻifaʻitaki ki heʻene ngaahi ngāué. Koeʻuhi ko e leá mo e ngaahi ngāué ʻoku tākiekina kinautolu ʻe he ngaahi fakakaukaú mo e ngaahi ongoʻí, ko e muimui kia Kalaisí ʻoku fiemaʻu ia ke tau fakatupulekina ʻa e “fakakaukau fakaeʻatamai” tatau mo ia naʻá ne maʻú. (Filipai 2:​5, NW) ʻI hono fakalea ʻe tahá, kapau ko hono moʻoní ia ke tau ngāue hangē ko Kalaisí, kuo pau ke tau tomuʻa ako ke fakakaukau mo ongoʻi hangē ko iá, ʻa ia, ko e fai ki he lelei taha ʻo ʻetau malava ʻi he tuʻunga ko e faʻahinga taʻehaohaoa ʻo e tangatá. Tau hanga muʻa, ʻaki ʻa e tokoni ʻa e kau tohi Kōsipelí, ʻo fakasio ki he ʻatamai ʻo Kalasí. Te tau tomuʻa lāulea ki he ngaahi moʻoniʻi meʻa ʻa ia naʻa nau tākiekina ʻa e anga ʻo e fakakaukau mo e ongoʻi ʻa Kalaisí.

Ko ʻEne ʻI Ai Ki Muʻa Peá Ne Tangatá

 5, 6. (a) Ko ʻetau ngaahi feohí ʻe malava ke nau uesia fēfē kitautolu? (e) Ko e hā ʻa e feohi naʻe maʻu ʻe he ʻAlo ʻuluaki ʻo e ʻOtuá ʻi hēvaní ki muʻa ke ne haʻu ki māmaní, pea ko e hā ʻa e ola naʻe hoko kiate ia ʻi he meʻá ni?

⁵ Ko hotau ngaahi kaungāmeʻa ofí ʻe malava ke nau uesia kitautolu, ʻo tākiekina ʻetau ngaahi fakakaukaú, ngaahi ongoʻí, mo ʻetau ngaahi ngāué, ki he lelei pe ki he kovi.a (Palovepi 13:20 [Lea Fakatātā, PM]) Fakakaukau atu ki he ngaahi feohi naʻe maʻu ʻe Sīsū ʻi hēvani ki muʻa peá ne haʻu ki māmaní. Ko e Kōsipeli ʻa Sioné ʻokú ne ʻave ʻa e tokangá ki he ʻi ai ki muʻa pea tangata ʻa Sīsuú ʻi heʻene hoko ko ia ko “Folofola,” pe Tangata-Lea, ʻa e ʻOtuá. ʻOku pehē ʻe Sione: “ʻI he kamataʻanga kuo ʻi ai ʻa Folofola, pea naʻe feangai mo e ʻOtua ʻa Folofola, pea naʻe ʻOtua ʻa Folofola. Ko e toko taha ko ia naʻe ʻi he kamataʻanga, ʻo feangai mo e ʻOtua.” (Sione 1:​1, 2) Koeʻuhí naʻe ʻikai ke ʻi ai ha kamataʻanga ia ʻo Sihova, ko e ʻi ai ko ia ʻa Folofola mo e ʻOtuá mei he “kamataʻanga,” kuo pau pē ko e lave ia ki he kamata ʻo e ngaahi ngāue fakaefakatupu ʻa e ʻOtuá. (Sāme 90:2) Ko Sīsuú ko e “ʻuluaki ia naʻe fakatupu.” Ko ia ai, naʻá ne ʻi ai ia ki muʻa ʻi hono fakatupu ʻo e ngaahi meʻamoʻui laumālie kehé pea mo e ʻuniveesi fakamatelié—Kolose 1:15; Fakahā 3:14.

⁶ Fakatatau ki ha ngaahi fakafuofua fakasaienisi, ko e ʻuniveesi fakamatelié kuo ʻi ai ia ʻo ʻikai toe siʻi hifo ʻi he taʻu ʻe 12 piliona. Kapau ko e ngaahi fakafuofua ko iá ʻoku fakaofiofi ʻi he tonú, ko e ʻAlo ʻuluaki ʻo e ʻOtuá naʻá ne fiefia ʻi ha feohi vāofi mo ʻene Tamaí ʻi he ngaahi taʻu taʻefaʻalaua ki muʻa ʻi hono fakatupu ʻo ʻĀtamá. (Fakafehoanaki mo Maika 5:2.) Ne fakatupulekina leva ai ha haʻi anga-ʻofa mo loloto ʻi hona vahaʻá. ʻI he fakasino mai ʻa e potó, ko e ʻAlo ʻuluaki ko ení ʻi he ki muʻa peá ne hoko ʻo tangatá, ʻoku fakahaaʻi ia ʻo pehē: “Ko hono [Sihova] fiefiaaga au i he aho kotoabe, bea naaku fiefia mau ai be i hono ao.” (Palovepi 8:​30, PM) ʻOku pau pē ko hono fakamoleki ko ia ha ngaahi kuonga taʻefaʻalaua ʻi he feohi vāofi mo e Matavai ʻo e ʻofá, ne maongo loloto ia ʻi he ʻAlo ʻo e ʻOtuá! (1 Sione 4:8) Ko e ʻAlo ko ení naʻá ne hoko ʻo ʻilo mo tapua mai ʻa e ngaahi fakakaukau, ngaahi ongoʻi, mo e ngaahi founga ʻa ʻene Tamaí he naʻe ʻikai malava ia ʻe ha toe taha kehe.—Matiu 11:27.

Moʻui mo e Ngaahi Tākiekina Fakaemāmani

 7. Ko e hā ʻa e taha ʻo e ngaahi ʻuhinga naʻe fiemaʻu ai ki he ʻAlo ʻuluaki ʻo e ʻOtuá ke haʻu ki māmaní?

⁷ Naʻe kei toe lahi ʻa e meʻa ke ako ʻe he ʻAlo ʻo e ʻOtuá, he ko e taumuʻa ia ʻa Sihová ke teuʻi hono ʻAló ke hoko ko ha Taulaʻeiki Lahi manavaʻofa, ʻoku malava ke “kaungāongoʻi mo hotau ngaahi vaivaiʻangá.” (Hepelu 4:​15, NW) Ke aʻusia ʻa e ngaahi fiemaʻu ki he ngafa ko ení ko e taha ia ʻo e ngaahi ʻuhinga naʻe haʻu ai ʻa e ʻAló ki he māmaní ko ha tangatá. ʻI hení, ʻi heʻene hoko ko ha tangata ʻoku kakano mo totó, naʻe fakaeʻa ai ʻa Sīsū ki he ngaahi tuʻunga mo e ngaahi tākiekina ʻa ia naʻá ne sio hifo pē ki ai ki muʻa mei hēvani. Ka kuó ne malava eni he taimí ni ke aʻusia ʻa e ngaahi ongoʻi mo e ngaahi fakaueʻiloto fakaetangatá ʻi he fuofua taimí. ʻI he taimi ʻe niʻihi naʻá ne ongoʻi helaʻia, fieiniua, mo fiekaia. (Mātiu 4:2; Sione 4:​6, 7) Ko e toe hulu angé, naʻá ne kātekina ʻa e tuʻunga kotoa pē ʻo e faingataʻá mo e mamahí. Ko ia ai, naʻá ne “ako ʻa e talangofuá” ʻo ne hoko ʻo taau kakato ki hono ngafa ko e Taulaʻeiki Lahí.—Hepelu 5:​8-10, NW.

 8. Ko e hā ʻoku tau ʻilo fekauʻaki mo e konga ki muʻa ʻo e moʻui ʻa Sīsū ʻi māmaní?

⁸ Fēfē ʻa e ngaahi meʻa naʻe hokosia ʻe Sīsū lolotonga ʻo e konga ki muʻa ʻo ʻene moʻui ʻi he māmaní? Ko e fakamatala ki heʻene kei tamasiʻí ʻoku fuʻu nounou ʻaupito. Ko hono moʻoní, ko Mātiu pē mo Luke naʻá na fakamatalaʻi ʻa e ngaahi meʻa naʻe hoko takatakai ʻi hono ʻaloʻí. Naʻe ʻiloʻi ʻe he kau tohi Kōsipelí ia ko Sīsuú naʻe moʻui ia ʻi hēvani ki muʻa ʻi heʻene haʻu ki māmaní. Ko ʻene ʻi ai ko ia ki muʻa peá ne hoko ko e tangatá, ʻokú ne fakamatalaʻi ʻo hulu ange ʻi ha toe meʻa, pe ko e tangata ia naʻe fēfē. Kae kehe, naʻe tangata fakaʻaufuli ʻa Sīsū. Neongo naʻá ne haohaoa, naʻe kei pau pē ke ne tupu hake mei he tuʻunga ko e pēpeé ʻo fou atu ʻi he tuʻunga tamasiʻí mo e talavoú ʻo aʻu ki he fuʻu lahi, lolotonga kotoa ia naʻá ne ako pē. (Luke 2:​51, 52) ʻOku fakaeʻa mai ʻe he Tohitapú ʻa e ngaahi meʻa pau fekauʻaki mo e konga ki muʻa ʻo e moʻui ʻa Sīsuú ʻa ia ʻoku ʻikai ha veiveiua naʻá ne laveʻi ia.

 9. (a) Ko e hā e meʻa ʻokú ne fakahaaʻi ko Sīsuú naʻe fāʻeleʻi mai ki ha kiʻi fāmili masiva? (e) ʻI he faʻahinga ʻātakai fēfē ʻoku ngalingali naʻe tupu hake ai ʻa Sīsuú?

⁹ ʻOku hā mahino, ko Sīsuú naʻe ʻaloʻi mai ia ki ha fāmili masiva. ʻOku fakahaaʻi eni ʻi he feilaulau naʻe ʻomi ʻe Siosefa mo Mele ki he temipalé ʻi he ʻaho ʻe 40 nai hili hono ʻaloʻí. ʻI he ʻikai ʻomi ha kiʻi sipi tangata ko ha feilaulau tutú mo ha kiʻi foʻi lupe pe ko ha foʻi kulukulu ko ha feilaulau angahalá, naʻá na ʻomi ʻe kinaua ha “ongo kulukulu, pe ko ha lupe mui ʻe toko ua.” (Luke 2:24) Fakatatau ki he Lao ʻa Mōsesé, ko e feilaulau ia ko ení ko ha tokonaki ia maʻá e masivá. (Livitiko 12:​6-8) ʻI he faai mai ʻa e taimí, naʻe tupulaki ʻa e kiʻi fāmili masiva ko ení. Naʻe maʻu ʻe Siosefa mo Mele ha fānau kehe ʻo ʻikai siʻi hifo ʻi he toko onó, fakafou ʻi he founga fakanatulá pē, hili hono ʻaloʻi fakaemana ʻo Sīsuú. (Matiu 13:​55, 56) Ko ia, ko Sīsuú naʻe tupu hake ia ʻi ha fuʻu fāmili lahi, ngalingali ʻi ha ngaahi tuʻunga anga-maheni.

10. Ko e hā ʻokú ne fakahaaʻi ko Mele mo Siosefá ko e ongo meʻa manavahē-ʻOtua?

¹⁰ Naʻe ʻohake ʻa Sīsū ʻe ha ongo mātuʻa manavahē-ʻOtua ʻa ia naʻá na tokanga kiate ia. Ko ʻene faʻeé, ʻa Mele, ko ha fefine ia naʻe tuʻu-ki-muʻa. Manatuʻi ʻa e taimi naʻá ne fakafeʻiloaki ai kiate iá, naʻe pehē ʻe he ʻāngelo ko Kepalelí: “Siʻotoʻofa, ʻa koe kuo ʻofeina: ʻoku ʻiate koe ʻa e ʻEiki.” (Luke 1:28) Ko Siosefa foki ko ha tangata ia naʻe anga-līʻoa. Naʻá ne fai tōnunga ʻi he taʻu taki taha ʻa e fononga kilomita ko ia ʻe 150 ki Selusalema ki he Pāsová. Naʻe kau foki ki ai mo Mele, neongo ko e kakai tangatá pē naʻe fiemaʻu ke nau fai peheé. (Ekisoto 23:17; Luke 2:41) ʻI ha taimi pehē ʻe taha, ko Siosefa mo Mele, hili ia haʻana kumi tōtōivi, naʻá na ʻilo ʻa e taʻu 12 ko Sīsuú ʻi he temipalé ʻi he haʻohaʻonga ʻo e kau faiakó. Ki heʻene ongo mātuʻa loto-hohaʻá, naʻe pehē ʻe Sīsū: “ʻIkai naʻa mo ʻilo kuo pau ke u ʻi he ngaue [“fale,” NW] a ʻeku Tamai?” (Luke 2:49) “Tamai”​—ko e foʻi lea ko iá kuo pau pē naʻe ʻi ai hano ʻuhinga māfana mo papau ki he kiʻi talavou ko Sīsuú. Ko e taha ʻo e ʻuhinga, ʻoku hā mahino ne ʻosi fakahā kiate ia ko ʻene Tamai totonú ko Sihova. Tānaki atu ki aí, kuo pau pē naʻe hoko ʻa Siosefa ko ha tamai ohi lelei kia Sīsū. Kuo pau pē ʻe ʻikai ke fili ʻe Sihova ha tangata anga-fefeka mo anga-fakamamahi ke ne ʻohake ʻa Hono ʻAlo ʻofaʻangá.

11. Ko e hā ʻa e ngāue naʻe ako ʻe Sīsuú, pea ʻi he ngaahi taimi ʻo e Tohitapú, ko e hā naʻe kau ki he ngāue ʻi he malaʻe ko ení?

¹¹ Lolotonga hono ngaahi taʻu ʻi Nasaletí, naʻe ako ai ʻa Sīsū ki he ngāue fakatufungá, ngalingali mei heʻene tamai ohi ko Siosefá. Naʻe mātuʻaki pōtoʻi ʻa Sīsū ʻi he ngāue ko iá ʻo ui ai ia “ko e tufunga.” (Maake 6:3) ʻI he ngaahi taimi ʻo e Tohitapú, naʻe ngāue ʻa e kau tufungá ʻi hono langa ʻo e ngaahi falé, ngaohi ʻo e naunau falé (ʻo kau ai ʻa e ʻū tēpile, ʻū sea iiki, ʻū sea loloa), mo hono ngaohi ʻo e ngaahi naunau fāmá. ʻI heʻene Dialogue With Trypho, ko Justin Martyr, ʻo e senituli hono ua T.S., naʻá ne tohi fekauʻaki mo Sīsū: “Naʻá ne angaʻaki ʻa e ngāue ko ha tufunga ʻi heʻene ʻi he haʻohaʻonga ʻo e tangatá, ʻo ngaohi ʻa e ngaahi palau mo e ngaahi ʻioke.” Ko e ngāue peheé naʻe ʻikai faingofua, he ko e tokotaha tufunga ʻo e kuohilí ngalingali naʻe ʻikai ke ne malava ʻo fakatau mai ʻene papá. ʻOku ngalingali ange, naʻá ne ʻalu ʻo filifili ha fuʻu ʻakau, tā hifo ia, pea ʻave ʻa e ʻakaú ki ʻapi. Ko ia, mahalo pē naʻe ʻosi ʻilo ʻe Sīsū ia ʻa e ngaahi faingataʻa ko ia ʻo e maʻu ʻo ha maʻuʻanga moʻuí, ʻi he alea mo e kau kasitomá, pea fakahoko ʻa e ngaahi fiemaʻú.

12. Ko e hā ʻokú ne fakahaaʻi naʻe mate moʻoni ʻa Siosefa ki muʻa ʻia Sīsuú, pea ko e hā naʻe pau ke ʻuhinga ki ai eni kia Sīsuú?

¹² ʻI he tuʻunga ko e foha lahí, ʻoku ngalingali naʻe tokoni ʻa Sīsū ki hono tokangaʻi ʻo e fāmilí, tautefito talu mei heʻene hā ko ia naʻe ʻuluaki mate ʻa Siosefa ia ʻia Sīsū.b Naʻe pehē ʻe he Zion’s Watch Tower ʻo Sanuali 1, 1900: “ʻOku fakahā ʻe he talatukufakaholó naʻe mate ʻa Siosefa lolotonga ʻoku kei siʻi ʻa Sīsū, pea ko e tokotaha ki muí naʻá ne fai ʻa e ngāue tufungá peá ne hoko ai ko e poupou ki he fāmilí. ʻOku maʻu ʻe he meʻá ni ha poupou ʻi he fakamoʻoni faka-Tohitapu ko ia ko Sīsū tonu naʻe ui ia ko ha tufunga, pea ko ʻene faʻeé mo hono fanga tokouá ʻoku fakahaaʻi kinautolu, ka ʻoku tukunoaʻi ʻa Siosefa ia. (Maake 6:3) . . . ʻOku mātuʻaki hangehangē leva, ko e vahaʻa taimi lōloa ko ia ʻo e taʻu ʻe tahavalu ʻo e moʻui ʻa hotau ʻEikí, mei he taimi ʻo e meʻa naʻe hoko [ʻa ia ʻoku hiki ʻi he Luke 2:​41-49] ki he taimi ʻo hono papitaisó, naʻe fakamoleki ia ʻi hono fakahoko ʻa e ngaahi ngāue anga-maheni ʻo e moʻuí.” Ko Mele mo ʻene fānaú, kau ai mo Sīsū, ngalingali naʻa nau ʻilo ʻa e mamahi ko ia ʻoku iku ki ai ʻi he taimi ʻoku mate ai ha husepāniti mo ha tamai ʻofeiná.

13. ʻI he taimi naʻe kamata ai ʻa Sīsū ʻi heʻene ngāue fakafaifekaú, koe hā naʻe fai ai ia ʻaki ʻa e ʻilo, vavanga, mo e ongoʻi loloto naʻe ʻikai malava ke maʻu ia ʻe ha toe tangata kehé?

¹³ ʻOku hā mahino, ko Sīsuú naʻe ʻikai ke ʻaloʻi mai ia ki ha moʻui faingofua. Ka, naʻá ne hokosia ʻi he fuofua taimí ʻa e moʻui ʻa e kakai lāuvalé. Pea ʻi he 29 T.S., naʻe hoko ai ʻa e taimi kia Sīsū ke ne fakahoko ʻa e vāhenga-ngāue fakaʻotua ko ia naʻe fakatatali kiate iá. ʻI he faʻahitaʻu fakatōlau ʻo e taʻu ko iá, naʻe papitaiso ai ia ʻi he vaí pea naʻe fakatupu ai ia ko ha ʻAlo fakalaumālie ʻo e ʻOtuá. ‘Naʻe matangaki ʻa e langí kiate ia,’ ʻo fakahā mahino ai te ne malava he taimí ni ke manatuʻi ʻene moʻui ʻi hēvani ki muʻa peá ne hoko ko e tangatá, ʻo kau ai ʻa e ngaahi fakakaukau mo e ngaahi ongoʻi naʻe ō fakataha mo iá. (Luke 3:​21, 22) Ko ia ʻi he taimi naʻe kamata ai ʻa Sīsū ʻi heʻene ngāue fakafaifekaú, naʻe fai ia ʻi he ʻilo, vavanga, mo e ongoʻi loloto ʻa ia naʻe ʻikai malava ke maʻu ʻe ha toe tangata kehe. ʻI he ʻuhinga lelei, naʻe līʻoa ʻe he kau tohi Kōsipelí ʻa e lahi taha ʻo ʻenau ngaahi meʻa naʻe tohí ki he ngaahi meʻa naʻe hoko ʻi he ngāue fakafaifekau ʻa Sīsuú. Neongo naʻe pehē, naʻe ʻikai malava ke nau hiki ʻa e meʻa kotoa naʻe leaʻaki mo fai ʻe Sīsuú. (Sione 21:25) Ka ko e meʻa naʻe fakamānavaʻi kinautolu ke nau hikí ʻokú ne fakamafeia ai kitautolu ke tau fakasio ki he ʻatamai ʻo e moʻungaʻi tangata lahi taha kuo moʻui maí.

Ko e Meʻa Naʻe Hoko ki Ai ʻa Sīsū ʻi Heʻene Hoko ko ha Tokotahá

14. ʻOku anga-fēfē hono fakahāhaaʻi ʻe he ngaahi Kōsipelí ʻa Sīsū ko ha tangata manavaʻofa māfana mo e ngaahi ongoʻi lolotó?

¹⁴ Ko e angaʻitangata ʻo Sīsū ʻoku eʻa mai mei he ngaahi Kōsipelí, ko ha tangata ʻoku manavaʻofa māfana mo ongoʻi loloto. Naʻá ne fakahāhaaʻi ha ngaahi tali fakaeongo lahi: naʻá ne fakaʻofaʻia ʻi ha kilia (Maake 1:​40, 41); mamahi ʻi he ongongataʻa ʻa e kakaí (Luke 19:​41, 42); houhau totonu ki he kau fetongi paʻanga mānumanú (Sione 2:​13-​17). Ko ha tangata ʻo e kaungāongoʻi, naʻe malava ke ueʻi ʻa Sīsū ke ne tutulu, pea naʻe ʻikai te ne fūfuuʻi ʻene ngaahi ongoʻí. ʻI he taimi naʻe mate ai ʻa siʻono kaumeʻa ko Lasalosí, ko e ʻasi mai ʻa e tangi ʻa Mele, ko e tuofefine ʻo Lasalosí, naʻe mātuʻaki maongo loloto ia kia Sīsū ʻo ne hoko ai ʻo fakatōloʻimata, ʻo ne tutulu ʻi he vakai tonu ki ai ʻa e niʻihi kehé.​—Sione 11:​32-​36.

15. Naʻe anga-fēfē ʻa e hā mahino ʻa e ngaahi ongoʻi manavaʻofa ʻa Sīsuú ʻi he founga ko ia ʻo ʻene vakai mo ʻene fakafeangai ki he niʻihi kehé?

¹⁵ Ko e ngaahi ongoʻi manavaʻofa ʻa Sīsuú naʻe tautefito ʻene hā mahinó ʻi he founga ko ia ʻo ʻene vakai mo ʻene fakafeangai ki he niʻihi kehé. Naʻá ne aʻu atu ki he masivá mo e faingataʻaʻiá, ʻo tokoniʻi kinautolu ke nau ‘ʻilo ha mālōlō ʻi honau laumalié.’ (Mātiu 11:​4, 5, 28-30) Naʻe ʻikai ke ne fuʻu femoʻuekina ki hono fai ha tali ki he ngaahi fiemaʻu ʻa e faingataʻaʻiá, tatau ai pē pe ko ha fefine ʻau naʻá ne ala fakalongolongo pē ki hono kofú, pe ko ha kui kolekole ʻa ia naʻe ʻikai malava ke fakasīlongoʻí. (Mātiu 9:​20-22; Maake 10:​46-52) Naʻe sio ʻa Sīsū ki he lelei ʻi he niʻihi kehé pea fakaongoongoleleiʻi kinautolu; neongo ia, naʻá ne toe loto-lelei ke ʻoatu ha valoki ʻi he taimi naʻe fiemaʻu aí. (Mātiu 16:23; Sione 1:47; 8:44) ʻI ha taimi ʻa ia naʻe maʻu ai ʻe he kakai fefiné ha ngaahi totonu siʻisiʻi pē, naʻe fakafeangai ʻa Sīsū ia kiate kinautolu ʻi ha tuʻunga fakangeingeia mo e fakaʻapaʻapa mafamafatatau. (Sione 4:​9, 27) ʻOku mahino ai, ʻa e loto-lelei ha kulupu ʻo ha kau fefine ke tauhi kiate ia ʻaki ʻenau ngaahi koloa pē ʻanautolú.​—Luke 8:3.

16. Ko e hā ʻokú ne fakahāhaaʻi ko Sīsuú naʻá ne maʻu ha vakai mafamafatatau ki he moʻuí mo e ngaahi meʻa fakamatelié?

¹⁶ Naʻe maʻu ʻe Sīsū ha vakai mafamafatatau ki he moʻuí. Ko e ngaahi meʻa fakamatelié naʻe ʻikai ke mahuʻinga muʻomuʻa ia kiate ia. ʻI he tuʻunga fakamatelié, ʻoku hā, naʻá ne maʻu ha meʻa mātuʻaki siʻisiʻi pē. Naʻá ne pehē naʻe “ʻikai siʻa potu ke ʻolunga ki ai hono ʻulu.” (Mātiu 8:20) ʻI he taimi tatau, ko Sīsuú naʻe fakalahi ai ʻa e fiefia ʻa e niʻihi kehé. ʻI he taimi naʻá ne ʻalu ai ki ha kātoanga mali—ko ha meʻa anga-maheni naʻe fakaʻilongaʻiʻaki ʻa e ngaahi fasi, hiva, mo e fakafiefia—ʻoku hā mahino naʻe ʻikai te ne ʻi aí ke ʻai ke taʻeoli ʻa e kātoangá. Ko e moʻoni, naʻe fakahoko ai ʻe Sīsū ʻa ʻene fuofua maná. ʻI he taimi naʻe ʻosi ai ʻa e uainé, naʻá ne liliu ʻa e vaí ko e uaine lelei, ko ha inu “aia oku fakafiefiaʻi ae loto oe tagata.” (Sāme 104:​15, PM; Sione 2:​1-11) Naʻe malava leva ai ke hoko atu ʻa e ngaahi fakafiefiá, pea ko e tangata malí mo e fefine malí ne ʻikai ha veiveiua ʻena hao ai mei haʻana mā. Ko ʻene mafamafatataú naʻe toe tapua ia ʻi he lahi mamaʻo ko ia ʻa e meʻa naʻe hoko ʻoku lave ki ai ʻi he taimi naʻe ngāue fuoloa ai mo mālohi ʻa Sīsū ʻi heʻene ngāue fakafaifekaú.—Sione 4:34.

17. Ko e hā ʻoku ʻikai fakaʻohovale ai ʻa e hoko ʻa Sīsū ko ha Faiako Mataotaó, pea ko e hā naʻe tapua mai mei heʻene ngaahi akonakí?

¹⁷ Ko Sīsuú ko ha Faiako Mataotao. Ko e lahi ʻo ʻene akonakí naʻe tapua mai ai ʻa e ngaahi meʻa moʻoni ʻo e moʻui fakaʻahó, ʻa ia naʻá ne maheni lelei mo ia. (Mātiu 13:33; Luke 15:8) Ko e founga ʻo ʻene faiakó naʻe taʻehanotatau—ʻa ʻene mahino, faingofua, mo ʻaonga maʻu pē. ʻOku toe mahuʻinga ange ʻa e meʻa naʻá ne akoʻí. Ko ʻene ngaahi akonakí naʻe tapua mai ai ʻa ʻene holi loto-moʻoni ke maheni ʻa ʻene kau fanongó mo e ngaahi fakakaukau, ngaahi ongoʻi, mo e ngaahi founga ʻa Sihová.​—Sione 17:​6-8.

18, 19. (a) Ko e hā ʻa e ngaahi lea fakatātā māʻalaʻala naʻe fakamatalaʻiʻaki ʻe Sīsū ʻa ʻene Tamaí? (e) Ko e hā e meʻa ʻe lāulea ki ai ʻi he kupu hono hokó?

¹⁸ ʻI hono faʻa toutou ngāueʻaki ʻa e ngaahi talanoa fakatātaá, naʻe fakaeʻa ai ʻe Sīsū ʻa ʻene Tamaí ʻaki ʻa e ngaahi lea fakatātā māʻalaʻala ʻa ia ʻoku ʻikai ke ngalongofua. Ko e meʻa ia ʻe taha ke talanoa ʻi ha ngaahi tuʻunga fakalūkufua ʻo fekauʻaki mo e meesi ʻa e ʻOtuá. Ko e toe meʻa kehe ʻaupito ia ke fakatatau ʻa Sihova ki ha tamai faʻa fakamolemole ʻa ia ʻoku mātuʻaki maongo loloto ki ai ʻa e ʻasi mai hono foha kuo toe fokí ʻo ne ‘lele, ʻo taupe ʻi he uʻa ʻo e fohá, ʻo ne ʻuma lolomi kiate ia.’ (Luke 15:​11-24) ʻI hono talitekeʻi ha anga-fakafonua mālohi ʻa ia naʻe sio lalo ai ʻa e kau taki lotú ki he kakai lāuvalé, naʻe fakamatalaʻi ai ʻe Sīsū ko ʻene Tamaí ko ha ʻOtua fotungofua ʻa ia naʻá ne hōifua ange ki he ngaahi kole ʻa e tokotaha tānaki tukuhau anga-fakatōkilaló ʻi he lotu fiehā ʻa e Fālesi hīkisiá. (Luke 18:​9-14) Naʻe fakatātaaʻi ʻe Sīsū ʻa Sihova ko ha ʻOtua tokanga ʻa ia ʻokú ne ʻafioʻi ʻa e taimi ʻoku tō ai ha kiʻi foʻi misi ki he kelekelé. “ʻOua te mou manavahe,” ko e fakapapauʻi ange ia ʻa Sīsū ki heʻene kau ākongá, “ʻoku mou mahuʻinga kimoutolu ʻi ha fanga misi tokolahi.” (Mātiu 10:​29, 31) ʻOku mahino pē, ʻa e ofo ʻa e kakaí ʻi he “akonaki” ʻa Sīsuú ʻo tohoaki ai kinautolu kiate iá. (Mātiu 7:​28, 29) He ko ē, ʻi he taimi ʻe taha naʻe nofo ofi maʻu pē ha “fuʻu kakai” kiate ia ʻi he ʻaho ʻe tolu, naʻa mo ʻenau ō taʻemeʻakaí pē!​—Maake 8:​1, 2.

¹⁹ ʻE lava ke tau fakamālō he kuo fakaeʻa mai ʻe Sihova ʻi heʻene Folofolá ʻa e ʻatamai ʻo Kalaisí! Ka ʻe lava fēfē leva haʻatau fakatupulekina mo fakahāhaaʻi ʻa e ʻatamai ʻo Kalaisí ʻi heʻetau ngaahi feangainga mo e niʻihi kehé? ʻE fai ʻa e lāulea ki he meʻá ni ʻi he kupu hono hokó.

[Fakamatala ʻi lalo]

ʻOkú Ke Manatuʻi?

• Ko e hā ʻoku mahuʻinga ai ke tau hoko ʻo maheni mo e “ʻatamai ʻo Kalaisí”?

• Ko e hā ʻa e feohi naʻe maʻu ʻe Sīsū ʻi heʻene ʻi ai ki muʻa peá ne hoko ko e tangatá?

• Lolotonga ʻene moʻui fakaemāmaní, ko e hā ʻa e ngaahi tuʻunga mo e ngaahi tākiekina naʻe hokosia ʻe Sīsū ʻi he fuofua taimí?

• Ko e hā ʻoku fakaeʻa ʻe he ngaahi Kōsipelí ʻo fekauʻaki mo e angaʻitangata ʻo Sīsuú?

[Fakatātā ʻi he peesi 10]

Naʻe tupu hake ʻa Sīsū ʻi ha fuʻu fāmili lahi, ngalingali ʻi ha ngaahi tuʻunga anga-maheni

[Fakatātā ʻi he peesi 12]

Naʻe ofo ʻa e kau faiakó ʻi he mahino mo e ngaahi tali ʻa e taʻu 12 ko Sīsuú