Fakalāngilangiʻi ʻa Sihova ʻAki Hono Fakahāhā ʻa e Ngeia

“[Ko Sihová] ko e koto ngeia mo langilangi ʻa ʻene faianga.”—SĀME 111:3.

1, 2. (a) ʻE fēfē haʻo fakamatalaʻi ʻa e “ngeiá”? (e) Ko e hā ʻa e ngaahi fehuʻi ʻe lāulea ki ai ʻi he kupu ko ení?

ʻI HONO kole ke ne fakamatalaʻi ʻa e foʻi lea ko e “ngeiá,” naʻe tali leva ʻa e taʻu hongofulu ko Madison ʻo pehē, ko e “Teunga Lelei.” Ko e meʻa ʻoku ʻikai nai ʻiloʻi ʻe he kiʻi taʻahine ko iá ʻoku lau ʻa e Tohi Tapú ʻo fekauʻaki mo e ʻOtuá ‘ʻokú ne kofuʻaki ʻa e ngeia.’ (Sāme 104:1) Ki he faʻahinga ʻo e tangatá, ko hono fakahāhā ʻa e ngeiá ʻoku kau nai ki ai he taimi ʻe niʻihi ʻa e teunga leleí. Hangē ko ení, naʻe fakaʻamu ʻa e ʻapositolo ko Paulá ki he kakai fefiné ke nau “teuʻaki kinautolu ʻa e kofu ʻoku ngali ke ʻai, pea ō mo e angamā mo e angafakamaʻumaʻu: ʻo oua ʻe fai ʻaki ʻa e fafatu ʻo e louʻulu, pe ko e koula mo e mataʻitofe mo e kofu mahuʻinga.” (1 Tim. 2:9) Ka ko e ʻulungāanga fakangeingeia ʻoku fakalāngilangiʻi ai ʻa e “ngeia [mo e] langilangi” ʻo Sihová ʻoku mahulu atu ia ʻi he meʻa ko iá.—Sāme 111:3.

² ʻI he Tohi Tapú, ko e foʻi lea faka-Hepelū ki he “ngeiá” ʻoku toe lava ke liliu ia ko e “lāngilangi,” “molumalu,” “kolōlia,” mo e ongoongolelei.” Fakatatau ki he fakamatala ʻa e tikisinale ʻe taha, ko e “ngeiá” ko e “anga pe tuʻunga ʻo e taau, fakalāngilangiʻi pe fakahīkihikiʻi.” Pea ʻoku ʻikai ha taha ʻe taau ke fakalāngilangiʻi mo fakahīkihikiʻi lahi ange ʻia Sihova. Ko ia ai, ʻi he tuʻunga ko ʻene kau sevāniti fakatapuí, ʻoku totonu ke tau lea mo ngāue ʻi he tuʻunga fakangeingeia. Kae kehe, ko e hā ʻoku lava ke ngāue ai ʻa e faʻahinga ʻo e tangatá ʻi he tuʻunga ngeiá? ʻOku anga-fēfē hono ʻai ke hā mahino ʻa e ngeia mo e lāngilangi ʻo Sihová? ʻOku totonu ke fēfē ʻene kaunga kiate kitautolu ʻa e ngeia ʻo e ʻOtuá? Ko e hā ʻoku lava ke akoʻi mai ʻe Sīsū Kalaisi fekauʻaki mo hono fakahāhā ʻa e ʻulungāanga ko ení? Pea ʻe lava fēfē ke tau fakahāhā ʻa e ngeia fakaʻotuá?

ʻUhinga ʻe Lava Ke Tau Ngāue Ai Fakataha mo e Ngeiá

3, 4. (a) ʻOku totonu ke fēfē ʻetau tali ki he ngeia kuó ne tuku mai kiate kitautolú? (e) Ko hai ʻoku tuhu fakaekikite ki ai ʻa e Sāme 8:5-9? (Sio ki he fakamatala ʻi laló.) (f) Ko hai naʻe tuku ki ai ʻe Sihova ʻa e ngeia ʻi he kuohilí?

³ Koeʻuhi naʻe ngaohi kinautolu ʻi he ʻīmisi ʻo e ʻOtuá, ʻoku maʻu ʻe he faʻahinga kotoa ʻo e tangatá ʻa e malava ke ngāue fakataha mo e ngeia. Naʻe fakangeingeiaʻi ʻe Sihova ʻa e ʻuluaki tangatá ʻaki hono fakanofo ia ke ne tokangaʻi ʻa e māmaní. (Sen. 1:26, 27) Naʻa mo e hili e tō ʻa e tangatá mei he tuʻunga haohaoá, naʻe toe fakamatalaʻi ʻe Sihova ʻa e fatongia ʻo e tangatá ʻi he fekauʻaki mo e māmaní. Ko ia ai, ʻoku kei “fakakalauni” pē ʻe he ʻOtuá ʻa e tangatá ʻaki ʻa e ngeia. (Lau ʻa e Sāme 8:5-9.)a Ko e ngeia kuo tuku mai kiate kitautolú ʻoku fiemaʻu ai ha tali fakangeingeia—ʻa ia ko hono fakahīkihikiʻi ʻa e huafa molumalu ʻo Sihová ʻaki ʻa e fakaʻapaʻapa mo e ngeia.

⁴ Kuo foaki ʻe Sihova ha tuʻunga ʻo e ngeia tautefito ki he faʻahinga ʻoku nau fai ʻa e ngāue toputapu kiate iá. Naʻe fakangeingeiaʻi ʻe he ʻOtuá ʻa ʻĒpeli ʻaki hono tali ʻene feilaulaú, pea talitekeʻi ʻa e feilaulau naʻe fai ʻe hono taʻokete ko Keiní. (Sen. 4:4, 5) Naʻe fakahinohino kia Mōsese ke ne ‘tuku ha konga ʻo hono ngeiá’ kia Siosiua, ko e tangata naʻe teu ke ne fetongi ia ʻi he hoko ko e taki ʻo e kau ʻIsilelí. (Nom. 27:20, NW) ʻI he fekauʻaki mo e foha ʻo Tēvita ko Solomoné, ʻoku pehē ʻe he Tohi Tapú: “Naʻe tuku ʻe Sihova ke fuʻu eʻa ʻa Solomone ki Isileli katoa, pea ne ʻange kiate ia ha fotu [pe ngeia] fakatuʻi, ʻa ia kuo teʻeki ke maʻu ʻe ha Tuʻi Isileli muʻa.” (1 Kal. 29:25) ʻE foaki ʻe he ʻOtuá ʻa e ngeia makehe ki he kau Kalisitiane pani ʻe toetuʻú, ʻa ia kuo nau talaki faitōnunga ʻa e “naunau ʻo e teunga ʻo hono puleʻanga.” (Sāme 145:11-13) ʻI hono fakavīkivikiʻi pehē ʻo Sihová, ʻoku toe maʻu ai ʻe he fuʻu tokolahi fakautuutu ʻo e “fanga sipi kehe” ʻa Sīsuú ha ngafa faitāpuekina mo fakangeingeia.—Sione 10:16.

ʻAi ʻo Hā Mahino ʻa e Ngeia mo e Lāngilangi ʻo Sihová

 5. ʻOku lahi fēfē ʻa e ngeia ʻo Sihová?

⁵ Naʻe hiva ʻa e tokotaha-tohi-saame ko Tēvitá ʻi ha foʻi hiva ʻoku fakafaikehekeheʻi ai ʻa e lahi ʻo e ʻOtuá mei he siʻisiʻi ʻa e tangatá: “ʻE Sihova, ko homau ʻEiki, hono ʻikai fungani [pe molumalu] ho huafa ʻi mamani! ʻA ia kuo ke fakaheka ho teunga [pe ngeiá] ki he ngaahi langi.” (Sāme 8:1) Mei he ki muʻa ʻi he fakatupu ʻo e “ngaahi langi mo mamani” ʻo fakalaka atu ʻi he fakahoko maʻongoʻonga ʻo e taumuʻa ʻa e ʻOtuá ke ngaohi ʻa e māmaní ko ha palataisi pea ʻohake ʻa e fāmili ʻo e tangatá ki he haohaoá—mei ʻitāniti ki ʻitāniti—ko e ʻOtua ko Sihová ʻa e Tokotaha molumalu mo fakangeingeia taha ʻi he ʻunivēsí.—Sen. 1:1; 1 Kol.1Ko 15:24-28; Fkh. 21:1-5.

 6. Ko e hā naʻe pehē ai ʻe he tokotaha-tohi-sāmé ʻoku teungaʻaki ʻe Sihova ʻa e ngeiá?

⁶ He maongo moʻoni ē ki he tokotaha-tohi-saame manavahē-ʻOtuá ʻa e taimi ko ia naʻá ne sio ai ki he tuʻunga lōngonoa fisifisimuʻa ʻo e langí ʻi ha pō fetuʻua, ʻi hono teuteuʻi ʻaki ʻa e “ngaahi siueli” fetapakí! ʻI he ofoofo ʻi he anga hono hanga ʻe he ʻOtuá ʻo “folahi ʻa e langi hange ha tatau,” naʻe fakamatalaʻi ʻe he tokotaha-tohi-sāmé ʻa Sihova ʻokú ne teungaʻaki ʻa e ngeia koeʻuhi ko ʻEne pōtoʻi fakaefakatupu fisifisimuʻá. (Lau ʻa e Sāme 104:1, 2.) Ko e ngeia mo e lāngilangi ʻo e Tokotaha-Fakatupu taʻehāmai, māfimafi-aoniú ʻoku mahino ia ʻi heʻene ngaahi ngāue hā maí.

7, 8. Ko e hā e fakamoʻoni ʻo e ngeia mo e lāngilangi ʻo Sihova ʻoku tau sio ai ʻi he langí?

⁷ Hangē ko ení, fakakaukau atu ki he kaniva Milky Way. ʻI he fuʻu vaha noa kāfakafa ko eni ʻo e ngaahi fetuʻú, palanité, mo e sisitemi solá, ʻoku hā ai ʻa e foʻi palanite ko Māmaní ko ha kiʻi meʻa valevale ʻa hono lahí ʻo hangē ko e foʻi ʻoneʻone ʻe taha ʻi ha fuʻu matātahi lahi. He ko ē, ko e kaniva ko ení pē taha ʻoku ʻi ai ʻa e ngaahi foʻi fetuʻu laka hake he 100 piliona! Kapau ʻe lava ke ke lau taʻetuku ʻa e foʻi fetuʻu taki taha ʻi he houa ʻe 24 he ʻaho, ʻe feʻunga mo e taʻu ʻe 3,000 kae toki aʻu ai hoʻo laú ki he 100 pilioná.

⁸ Kapau ko e kaniva Milky Way pē taha ʻoku ʻi ai ʻa e foʻi fetuʻu ʻe 100 piliona, fēfē leva ʻa e toenga ʻo e ʻunivēsí? ʻOku fakafuofua ʻe he kau ʻasitalōnomá ko e Milky Way ko e taha nai ia ʻo e ngaahi kaniva ko hono lahí ʻoku mei he 50 piliona ki he 125 pilioná. Ko e foʻi fetuʻu ʻe fiha ʻoku ʻi he ʻunivēsí fakakātoa? Ko e talí ʻoku ʻikai moʻoni lava ke makupusi ia ʻe hotau ʻatamaí. Neongo ia, ko Sihová “ʻoku ne lau ʻa e ngaahi fetuʻu pe ʻoku fiha; ʻoku ne fakahingoa honau kotoa.” (Sāme 147:4) ʻI he ʻiloʻi ko Sihova ʻokú ne kofuʻaki ʻa e ngeia mo e lāngilangi peheé, ʻikai ʻoku ueʻi ai koe ke ke fakavīkivikiʻi ʻa hono huafa lahí?

9, 10. ʻOku anga-fēfē hono fakahīkihikiʻi ʻo e poto ʻa hotau Tokotaha-Fakatupú ʻi hono tokonaki mai ʻo e maá?

⁹ Tau hiki he taimí ni ʻetau sió mei he ngaahi langi molumalú ki ha meʻa anga-maheni ʻo hangē ko e foʻi maá. Ko Sihova ʻoku ʻikai ngata pē ko e “ʻAfio naʻa ne ngaohi ʻa e langi mo e fonua” ka ko ia foki “ʻa e tufa-ma ki he fiekaia.” (Sāme 146:6, 7) Ko e “ngeia mo langilangi” ʻo e ʻOtuá ʻoku tapua atu ia ʻi heʻene ngaahi fuʻu ngāué, ʻo kau ai ʻene tokonaki mai ʻa e ngaahi ʻakaú ʻa ia ʻoku ngaohi mei ai ʻa e maá. (Lau ʻa e Sāme 111:1-5.) Naʻe akoʻi ʻe Sīsū ʻa hono kau muimuí ke nau lotu: “Ke ke foaki mai he ʻahoni haʻamau meʻakai [pe mā].” (Mt. 6:11) Ko e maá ko ha meʻakai tefito ia ʻa e kakai tokolahi ʻi he kuonga muʻá, ʻo kau ai ʻa e kau ʻIsilelí. Neongo ʻoku vakai ki he maá ko ha meʻakai faingofua, ko e ngāue fakakemikale ʻokú ne liliu ha ngaahi meʻa tefito ke hoko ko e foʻi mā ifó ʻoku ʻikai ke faingofua.

¹⁰ ʻI he taimi naʻe hiki ai ʻa e Tohi Tapú, naʻe ngāueʻaki ʻe he kau ʻIsilelí ʻa e mahoaʻa uité pe paʻalé mo e vai ki hono ngaohi ʻo e maá. Naʻe ngāueʻaki he taimi ʻe niʻihi ʻa e lēvaní, pe ʻīsité, ʻi he ngaohi maá. Ko e ngaahi meʻa faingofua ko ení ʻoku fakatahaʻi ia ke faʻuʻaki ha ngaahi komipauni kemikale fakaofo ʻoku nau fengāueʻaki. Ko e anga tofu pē ʻo e ngāue fakataha ʻa e ngaahi komipauni ko ení ʻoku ʻikai ke mahinoʻi kakato. ʻIkai ngata aí, ko e founga hono fakamolū ʻo e maá ʻi he sinó ko ha toe ngāue fihi fakaofo ia ʻe taha. Tā neʻineʻi ke hiva ʻa e tokotaha-tohi-sāmé: “Hono ʻikai ko e fuʻufuʻunga meʻa hoʻo ngaahi ngaue, ʻe Sihova! pea ko e poto kuo ke ngaohi ʻaki hono kotoa”! (Sāme 104:24) ʻOku ueʻi tatau koe ke ke fakahīkihikiʻi ʻa Sihova?

ʻOku Ueʻi Fēfē Koe ʻe he Ngeia mo e Lāngilangi ʻo e ʻOtuá?

11, 12. Ko e fakalaulauloto ki he ngaahi ngāue fakaefakatupu ʻa e ʻOtuá ʻe lava ke kaunga fēfē ia kiate kitautolu?

¹¹ ʻOku ʻikai fiemaʻu ke tau hoko ko e kau ʻasitalōnoma ka tau toki ofoofo ai ʻi he langí he poʻulí pe hoko ko e kau kēmisi ka tau toki ifoʻia ai ʻi he maá. Kae kehe, ke mahinoʻi ʻa e lāngilangi ʻo hotau Tokotaha-Fakatupú, ʻoku fiemaʻu ke tau vaheʻi ʻa e taimi ke fakalaulauloto ai ki he ngaahi ngāue ʻa hono nimá. Ko e hā ʻe lava ke fai maʻatautolu ʻe he fakalaulauloto peheé? Ko e olá ʻoku tatau pē mo e fakalaulauloto ki ha toe faʻahinga ʻe taha ʻo e ngaahi ngāue ʻa Sihová.

¹² ʻI he fekauʻaki mo e ngaahi ngāue lalahi naʻe fakahoko ʻe Sihova maʻa Hono kakaí, naʻe hiva ʻa Tēvita: “Te u fakalaulauloto ki he ngaue fakaofo aʻau, ʻa e fakangeingei ʻo e langilangi ʻo hoʻo fotu.” (Sāme 145:5) ʻOku tau fakahaaʻi ʻa e tokanga ki he ngaahi ngāue ko ení ʻaki hono ako ʻa e Tohi Tapú pea vaheʻi ʻa e taimi ke fakalaulauloto ai ki he meʻa ʻoku tau lau ʻi aí. Ko e hā e ola ʻo e fakalaulauloto ko ení? ʻOku fakautuutu ai ʻetau mahinoʻi ʻa e ngeia mo e lāngilangi ʻo e ʻOtuá. Ko e moʻoni, ʻoku ueʻi leva ai kitautolu ke tau kau fakataha mo Tēvita ʻi hono fakalāngilangiʻi ʻa Sihova mo pehē: “Ko hoʻo ngaahi meʻa lalahi ko au te u fakalautelaua.” (Sāme 145:6) Ko e fakalaulauloto ki he ngaahi ngāue fakaofo ʻa e ʻOtuá ʻoku totonu ke ne fakaivimālohiʻi hotau vahaʻangatae mo Sihová pea ueʻi ai kitautolu ke talanoa ki he niʻihi kehé fekauʻaki mo ia ʻi he faivelenga pea mo e loto-ʻalovili. ʻOkú ke talaki faivelenga ʻa e ongoongo leleí pea tokoniʻi ʻa e kakaí ke nau houngaʻia ʻi he ngeia, lāngilangi mo e molumalu ʻo e ʻOtua ko Sihová?

Tapua Haohaoa ʻe Sīsū ʻa e Ngeia ʻo e ʻOtuá

13. (a) Fakatatau ki he Taniela 7:13, 14, ko e hā naʻe foaki ʻe Sihova ki hono ʻAló? (e) ʻI hono tuʻunga ko e Tuʻí, ʻoku anga-fēfē ʻa e feangainga ʻa Sīsū ki he faʻahinga ʻokú ne pule ki aí?

¹³ Ko e ʻAlo ʻo e ʻOtuá, ʻa Sīsū Kalaisi, naʻá ne fanongonongo faivelenga ʻa e ongoongo leleí pea fakalāngilangiʻi ʻa ʻene Tamai fakahēvani ngeia mo molumalú. Naʻe foaki ʻe Sihova ki hono ʻAlo-tofu-pē-taha-ne-fakatupú ʻa e ngeia makehe ʻaki hono ʻoange kiate ia ʻa e ‘hau mo e puleʻanga.’ (Lau ʻa e Taniela 7:13, 14.) Neongo ia, ko Sīsuú ʻoku ʻikai hīkisia pe fakamakehekehe. ʻOkú ne kehe ʻaupito—ko ha Pule manavaʻofa ia ʻokú ne mahinoʻi ʻa e ngaahi ngataʻanga ʻo e faʻahinga ʻoku pule ki aí pea ʻoange kiate kinautolu ha tuʻunga ngeia. Vakai angé ki ha fakatātā ʻo e anga ʻo e feangainga ʻa Sīsū ko e Tuʻi-Fakanofó ki he kakai naʻá ne fetaulaki mo iá, tautefito ki he faʻahinga naʻe ʻikai fiemaʻu pea hā ngali ʻikai ʻofa ai ha tahá.

14. Naʻe anga-fēfē ʻa e vakai ki he kau kiliá ʻi ʻIsileli ʻo e kuonga muʻá?

¹⁴ Ko e kakai naʻe puke ʻi he kiliá ʻi he kuonga muʻá naʻa nau faʻa hokosia ha mate māmālie fakamamahi. ʻOku uesia māmālie ʻe he mahakí ʻa e ngaahi konga ʻo e sino ʻo e tokotaha puké. Ko hono fakamoʻui ha kiliá naʻe vakai ki ai ʻoku faingataʻa tatau pē mo hono fokotuʻu hake ha taha mei he maté. (Nom. 12:12; 2 Tuʻi 5:7, 14) Naʻe fakahaaʻi ʻoku taʻemaʻa ʻa e kau kiliá pea naʻe fehiʻanekinaʻi pea kapusi kinautolu mei he sōsaietí. ʻI he taimi naʻa nau fakaofiofi ai ki he kakaí, naʻe pau ke nau kaila fakatokanga: “Taʻemaʻa! taʻemaʻa!” (Liv. 13:43-46) Ko ha tokotaha kilia naʻe hangē ia ha taha kuo maté. Fakatatau ki he ngaahi fakamatala faka-Lāpaí, naʻe fakaʻatā ha tokotaha kilia ke haʻu ʻo ngata pē ʻi he mita nai ʻe 1.7 mei ha taha pē. Naʻe lēkooti ʻo pehē ko e taimi naʻe vakai atu ai ha taki lotu tonu ki ha tokotaha kilia, naʻa mo e ʻi he mamaʻó, ʻokú ne tolomakaʻi ia ke ne ʻalu ʻaupito ki he mamaʻó.

15. Naʻe anga-fēfē ʻa e fakafeangai ʻa Sīsū ki ha kilia ʻe taha?

¹⁵ Kae kehe, ʻoku taau ke fakatokangaʻi ʻa e fakafeangai ʻa Sīsū ki ha kilia naʻe haʻu ʻo kōlenga ke ne fakamoʻui ia. (Lau ʻa e Maake 1:40-42.) ʻI he ʻikai te ne tuli ʻa e kiliá, naʻe feangainga ʻa Sīsū ki he tangata kuo fakaʻehiʻehiʻí ʻi ha founga manavaʻofa mo fakangeingeia. Ko e meʻa naʻe mamata ki ai ʻa Sīsuú ko ha tangata fakaʻofa naʻá ne fiemaʻu ha fakafiemālie. ʻI he uhu ki hono mafú, naʻe ueʻi ai ʻa Sīsū ʻe heʻene ongoʻi manavaʻofá ke ne fai leva ha meʻa. Naʻá ne kakapa atu, ala ki he kiliá, pea fakamoʻui ia.

16. Ko e hā ʻa e lēsoni kuó ke ako mei he anga ʻo e fakafeangai ʻa Sīsū ki he niʻihi kehé?

¹⁶ ʻI he tuʻunga ko e kau muimui ʻo Sīsuú, ʻe lava fēfē ke tau faʻifaʻitaki ki he founga naʻe tapua atu ai ʻe Sīsū ʻa e ngeia ʻo ʻene Tamaí? Ko e founga ʻe taha ko hono ʻiloʻi ko e faʻahinga kotoa ʻo e tangatá—tatau ai pē pe ko e hā honau tuʻungá, moʻuí pe taʻumotuʻá—ʻoku tuha mo e fakalāngilangi pea mo e fakaʻapaʻapa. (1 Pita 2:17) Tautefito ki he faʻahinga ʻi he ngaahi tuʻunga tauhí, hangē ko e ngaahi husepānití, ngaahi mātuʻá, mo e kau mātuʻa Kalisitiané, ʻoku fiemaʻu ke fakangeingeiaʻi ʻa e faʻahinga ʻoku nau tokangaʻí pea tokoniʻi kinautolu ke nau tauhi maʻu ʻenau tokaʻi-kitá. ʻI hono fakamamafaʻi ko ha fiemaʻu eni ki he kau Kalisitiane kotoa pē, ʻoku pehē ʻe he Tohi Tapú: “ʻI hoʻomou ʻofa ki he kainga lotu, fai ʻo hange ko ha kainga moʻoni; ʻi he fakaʻapaʻapa mou tāimuʻa kimoutolu.”—Loma 12:10.

Fakahāhā ʻa e Ngeia ʻi he Lotú

17. Ko e hā ʻoku lava ke tau ako mei he Tohi Tapú ʻo fekauʻaki mo hono fakahāhā ʻo e ngeia ʻi he ʻunuʻunu kia Sihova ʻi he lotú?

¹⁷ ʻOku totonu ke fai ʻa e tokanga makehe ki hono fakahāhā ʻa e fakangeingeiá ʻi he taimi ʻoku tau ʻunuʻunu ai kia Sihova ʻi he lotú. “Lama ho vaʻe ʻi hoʻo ʻalu ki he fale ʻo Elohimi,” ko e lau ia ʻa e Koheleti 5:1. Ko Mōsese mo Siosiua fakatouʻosi naʻe fekauʻi ke na vete hona senitoló ʻi he taimi naʻá na ʻi ha feituʻu toputapu ai. (Eki. 3:5; Sios. 5:15) Naʻe pau ke na fai eni ko ha fakaʻilonga ʻo e fakaʻapaʻapa pe ʻapasia. Naʻe pau ki he kau taulaʻeiki ʻIsilelí ke nau tui ha talausese mutu līneni “ke kofuʻaki ʻenau telefua.” (Eki. 28:42, 43) Naʻe taʻofi heni haʻanau hā taʻetaau ʻi he taimi naʻa nau ngāue ai ʻi he ʻōlitá. Ko e mēmipa kotoa ʻo e fāmili ʻo ha taulaʻeiki naʻe pau ke nau poupouʻi ʻa e tuʻunga fakaʻotua ʻo e ngeiá.

18. ʻOku anga-fēfē hono fakahāhā ʻa e ngeiá ʻi heʻetau lotu kia Sihová?

¹⁸ Ko e ngeia leva ʻo e lotú, ʻoku kau ki ai ʻa e fakalāngilangi mo e fakaʻapaʻapa. Ke taau mo e fakalāngilangi mo e fakaʻapaʻapá, kuo pau ke tau ngāue ʻi he tuʻunga fakaʻapaʻapa. Ko e ngeia ʻoku tau fakahāhaá kuo pau ke mahulu atu ia ʻi ha fakangalingali pē pe ko ha fakahāhā pē ʻi tuʻa. ʻOku totonu ke fakalaka atu ia ʻi he meʻa ʻoku sio ki ai ʻa e mata ʻo e tangatá ki he meʻa ʻoku vakai mai ki ai ʻa e ʻOtuá—ko hotau lotó. (1 Sam. 16:7; Pal. 21:2) Ko e ngeiá ʻoku totonu ke hoko ia ko hotau konga pea kaunga ki heʻetau tōʻongá, ko ʻetau fakakaukaú, ko hotau vahaʻangatae mo e niʻihi kehé, naʻa mo e founga ʻo ʻetau vakai mo ongoʻi fekauʻaki mo kitautolú. Ko e moʻoni, ʻoku totonu ke hā mahino ʻa e ngeiá ʻi he taimi kotoa pē pea ʻi he meʻa kotoa pē ʻoku tau leaʻaki mo faí. ʻI he fekauʻaki mo hotau ʻulungāangá, tōʻongá, mo e valá mo e teuteú, ʻoku tau tokanga ki he ngaahi lea ʻa e ʻapositolo ko Paulá: “Kaeʻumaʻā ʻoku mau tokanga ke ʻoua naʻa ai ha tūkiaʻanga ʻe tupu ʻi haʻamau meʻa, naʻa lauʻi ʻa e lakanga. Kae kehe ʻoku mau fai ʻa e meʻa ʻoku tāu mo e kau sevaniti ʻa e ʻOtua.” (2 Kol.2Ko 6:3, 4) ʻOku tau ‘teungaʻia ʻi he meʻa kotoa pe ʻi he tokateline ʻa hotau ʻOtua Fakamoʻuí.’—Tai. 2:10.

Hokohoko Atu Hono Fakahāhā ʻa e Ngeia Fakaʻotuá

19, 20. (a) Ko e hā ha founga lelei ke fakangeingeiaʻi ai ʻa e niʻihi kehé? (e) ʻI he fekauʻaki mo e ngeiá, ko e hā ʻoku totonu ke hoko ko ʻetau fakapapaú?

¹⁹ ʻOku fakahāhā ʻa e ngeia ʻe he kau Kalisitiane paní, ʻa ia ko e ‘kau fakafofonga kinautolu ʻo Kalaisi.’ (2 Kol.2Ko 5:20) Ko e “fanga sipi kehe,” ʻa ia ʻoku nau poupou mateaki kiate kinautolú, ko e kau talafekau ngeia kinautolu ki he Puleʻanga Faka-Mīsaiá. Ko ha ʻamipasitoa pe ko ha talafekau ʻokú ne lea loto-toʻa fakataha mo e ngeia maʻa hono puleʻangá. Ko ia ai, ʻoku totonu ke tau lea fakataha mo e ngeia mo e loto-toʻa ʻi he poupou ki he founga-pule ʻa e ʻOtuá, ʻa e Puleʻangá. (Ef. 6:19, 20) Pea ʻi he taimi ʻoku tau ʻoatu ai ki he niʻihi kehé ʻa e ‘ongoongo leleí,’ ʻikai ʻoku tau ʻoatu ai kiate kinautolu ʻa e ngeia?—Ai. 52:7.

²⁰ ʻOku totonu ke tau fakapapau ke fakalāngilangiʻi ʻa e ʻOtuá ʻaki ʻetau fakatatau ki hono ngeiá. (1 Pita 2:12) Tau fakahāhā maʻu pē ʻa e ʻapasia loloto kiate ia, ki heʻene lotú, pea ki hotau kaungālotú. Pea ʻofa ke hōifua ʻa Sihova, ʻa ia kuó ne teungaʻaki ʻa e ngeia mo e lāngilangí, ʻi heʻetau founga fakangeingeia ʻo e lotu kiate iá.

[Fakamatala ʻi lalo]

ʻE Fēfē Haʻo Tali?

• Ko hono ʻiloʻi ʻa e lāngilangi ʻo e ngeia ʻo Sihová ʻoku totonu ke kaunga fēfē ia kiate kitautolu?

• Ko e hā ʻe lava ke tau ako fekauʻaki mo e ngeiá mei he anga ʻo e fakafeangai ʻa Sīsū ki ha kilia ʻe taha?

• ʻE lava fēfē ke tau fakalāngilangiʻi ʻa Sihova ʻi ha ngaahi founga fakangeingeia?

[Fakatātā ʻi he peesi 12]

Naʻe anga-fēfē hono fakangeingeiaʻi ʻe Sihova ʻa ʻĒpelí?

[Fakatātā ʻi he peesi 14]

Ko e ngaahi ngāue lalahi ʻa Sihová ʻoku aʻu ʻo hā mahino ia ʻi he tokonaki mai ʻo e maá

[Fakatātā ʻi he peesi 15]

Ko e hā naʻá ke ako fekauʻaki mo e ngeiá mei he anga ʻo e fakafeangai ʻa Sīsū ki ha kilia ʻe taha?

[Fakatātā ʻi he peesi 16]

Ko e lotu fakangeingeiá ʻoku kau ki ai ʻa hono fakalāngilangiʻi ʻo Sihova