Lele ʻi he Lová mo e Kītaki

“Tau kitaki atu ʻetau lele he fakapuepue kuo tala humaki mai kiate kitautolu.”—HEP. 12:1.

1, 2. Ko e hā naʻe fakahoa ki ai ʻe he ʻapositolo ko Paulá ʻa e ʻalunga moʻui ʻa e Kalisitiané?

ʻI HE taʻu taki taha, ʻoku fakahoko ʻa e ngaahi malafoni he ngaahi feituʻu lahi. Ko e kau lele ʻoku taku ko e lelei tahá ʻoku nau kau ki he lová mo e taumuʻa pē taha—ke ikuna. Ko e tokolahi taha ʻo e niʻihi kehe ʻoku kaú ʻoku kiʻi taha hifo ʻenau taumuʻá. Kia kinautolu, ko hano ʻosiki pē ʻa e lová ko ha lavameʻa ia ke pōlepole ai.

² ʻI he Tohi Tapú, ko e ʻalunga moʻui ʻa e Kalisitiané kuo fakahoa ia ki ha fakapuepue pe lova. Ko e ʻapositolo ko Paulá naʻá ne fakahanga ʻa e poini ko ení ki he tokanga ʻa hono ngaahi kaungā Kalisitiane ʻi Kolinitō ʻo e kuonga muʻá ʻi heʻene ʻuluaki tohi kia kinautolú. Naʻá ne tohi: “ʻIkai ʻoku mou ʻilo, ko e kakai ʻoku lele ʻi he fakapuepue ʻoku nau lele kotoa pe, ka ko e toko taha pe ʻoku maʻu ʻa e koloa? Ke hange ko ia hoʻomou lele, koeʻuhi ke mou maʻumaʻu lelei.”—1 Kol. 9:24.

 3. Ko e hā naʻe lave ai ʻa Paula ko e tokotaha lele pē taha ʻoku ikuná?

³ Naʻe pehē koā ʻe Paula ko e tokotaha pē ʻi he kau Kalisitiane ko iá te ne maʻu e koloa pe pale ʻo e moʻuí pea ko e kotoa e toengá te nau lele noa pē? ʻIkai ʻaupito! Ko e kau lele ʻi he ngaahi feʻauhí kuo nau ako mo feinga mālohi mo e taumuʻa ke hoko ko e tokotaha ikuna. Naʻe fiemaʻu ʻe Paula hono kaungā Kalisitiané ke nau feinga mālohi ʻi he founga ko iá ʻi heʻenau kumi ki he moʻui taʻengatá. Ko e fai peheé, ʻe lava ai ke nau ʻamanaki ke maʻu ʻa e pale ʻo e moʻuí. ʻIo, ʻi he lova faka-Kalisitiané, ko kinautolu kotoa te nau fakaʻosí te nau ikuna ʻa e pale ko iá.

 4. Ko e hā ʻoku tau fiemaʻú ke fakakaukau ai fekauʻaki mo e lova ʻoku fokotuʻu mai ʻi muʻa ʻiate kitautolú?

⁴ Ko e ngaahi lea ko iá ʻoku fakalototoʻa, kae fakatupu fakakaukau, ki he kotoa ko ia kuo nau kau he lova ki he moʻuí ʻi he ʻaho ní. Ko e hā hono ʻuhingá? Koeʻuhi ko e palé—pe ko e moʻui ʻi hēvani pe moʻui ʻi he Palataisi ʻi he māmaní—ʻoku taʻealafakatataua. Ko e moʻoni, ko e lová ʻoku lōloa mo faingataʻa; ʻoku lahi ʻa e ngaahi fakafaingataʻaʻiaʻangá, ngaahi fakahohaʻá, mo e ngaahi faingataʻa ʻi he halá. (Mt. 7:13, 14) Ko e meʻa fakamamahí, ko e niʻihi kuo nau māmālie hifo, tuʻu, pe aʻu ʻo tō ʻi he halá. Ko e hā ʻa e ngaahi tōʻanga mo e ngaahi faingataʻa ʻoku ʻi he lova ki he moʻuí? ʻE lava fēfē ke ke fakaʻehiʻehi meiate kinautolu? Ko e hā ʻe lava ke ke faí ke fakaʻosi pea ikuna ai ʻa e lova ko iá?

Fiemaʻu ʻa e Kītaki ki he Ikuná

 5. Hangē ko ia ʻoku lēkooti he Hepelu 12:1, ko e hā ʻa e lave naʻe fai ʻe Paula ki ha lová?

⁵ ʻI heʻene tohi ki he kau Kalisitiane Hepelū ʻi Selusalema mo Siuteá, naʻe toe fai ai ʻe Paula ʻa e lave ki he ngaahi tafaʻaki ʻo e sipoti pe lova ʻatelitá. (Lau ʻa e Hepelu 12:1.) Naʻe ʻikai ngata pē ʻene fakahanga ʻa e tokangá ki he ʻuhinga ʻo e kau ki he lová ka naʻá ne toe fakahaaʻi mo e meʻa kuo pau ke fai ʻe ha taha ke ikuna aí. Ki muʻa ke tau sivisiviʻi ʻa e faleʻi fakamānavaʻi ʻa Paula ki he kau Kalisitiane Hepeluú ke sio ko e hā e ngaahi lēsoni ai maʻatautolú, tau lāulea angé ko e hā naʻá ne fakaʻaiʻai ʻa Paula ke fai ʻa e tohí pea ko e hā naʻá ne feinga ke fakalototoʻaʻi ʻene kau lautohí ke faí.

 6. Ko e kau Kalisitiané naʻa nau ʻi he malumalu ʻo e tenge fē mei he kau taki lotú?

⁶ Ko e kau Kalisitiane he ʻuluaki senitulí, tautefito ki he faʻahinga naʻa nau nofo ʻi Selusalema mo Siuteá, naʻa nau fehangahangai mo e ngaahi ʻahiʻahi mo e faingataʻa lahi. Naʻa nau ʻi he malumalu ʻo e tenge lahi mei he kau taki lotu Siú, ʻa ia naʻa nau kei ngāueʻaki ʻa e tākiekina mālohi ki he kakaí. Ki muʻá, ko e kau taki ko ení ne nau lavameʻa ʻi hono fakahalaiaʻi ʻa Sīsū Kalaisi ko ha tokotaha fakafepaki pea tāmateʻi ia ko ha tokotaha faihia. Pea naʻe ʻikai haʻanau teu ke tuku ʻenau fakafepakí. ʻI he tohi ʻa Ngāué, ʻoku tau lau ai ʻa e fakamatala hokohoko fekauʻaki mo ʻenau ngaahi fakamanamaná mo e ʻohofi ʻo e kau Kalisitiané, ʻo meimei kamata pē hili ʻa e ngaahi meʻa naʻe hoko fakaemana ʻi he Penitekosi ʻo e 33 T.S. Naʻe ʻai moʻoni ʻe he meʻá ni ʻa e moʻuí ke faingataʻa ki he kau faitōnungá.—Ng. 4:1-3; 5:17, 18; 6:8-12; 7:59; 8:1, 3.

 7. Ko e hā ʻa e ngaahi taimi faingataʻa naʻe hoko ki he kau Kalisitiane ʻa ē naʻe tohi ki ai ʻa Paulá?

⁷ Ko e kau Kalisitiane ko iá naʻa nau toe moʻui he vahaʻa taimi ki muʻa pē pea ngata ʻa e fokotuʻutuʻu ʻo e ngaahi meʻa faka-Siú. Ne tala ʻe Sīsū kia kinautolu fekauʻaki mo e fakaʻauha ka hoko hifo ki he puleʻanga ʻo e kau Siu taʻefaitōnungá. Naʻá ne toe tala foki ki hono kau muimuí fekauʻaki mo e ngaahi meʻa ʻe hoko ki muʻa pē he ngataʻangá, ʻo ʻoange ai kia kinautolu ʻa e ngaahi fakahinohino pau ʻo e meʻa ke fai ke hao moʻui aí. (Lau ʻa e Luke 21:20-22.) Ko e hā leva, te nau faí? Naʻe fakatokanga ʻa Sīsū: “Ka mou lamasi kimoutolu, naʻa ʻiloange ʻe mafatukituki homou loto, ko e meʻa ʻi he faʻa kai, mo e faʻa inu, mo e faʻa lotomoʻua ki he moʻui ni, pea lapasi kimoutolu ʻe he ʻaho ko ia ʻo hangē ko ha hele puna.”—Luke 21:34.

 8. Ko e hā nai kuó ne fakatupunga ʻa e kau Kalisitiane ʻe niʻihi ke māmālie hifo pe tuʻú?

⁸ ʻI he taimi naʻe fai ai ʻe Paula ʻene tohi ki he kau Hepeluú, ko e mahili atu ia e meimei taʻu ʻe 30 talu hono fai ʻe Sīsū ʻa e fakatokanga ko iá. Naʻe fēfē hono uesia ʻe he faai mai e taimí ʻa e kau Kalisitiane ko iá? Naʻe tō e niʻihi ʻi he ngaahi tengé mo e fakahohaʻa ʻo e moʻui fakaʻahó pea ʻikai lava ke fai ha laka ki muʻa fakalaumālie ʻa ia ne mei fakaivimālohiʻi ai kinautolú. (Hep. 5:11-14) Ngalingali naʻe ongoʻi ʻe he niʻihi ʻe mātuʻaki faingofua ange ʻa e moʻuí kapau naʻa nau ʻalu fakataha pē mo e tokolahi ʻo e kau Siu takatakai ʻia kinautolú. Ko e kau Siu ko iá, ko e moʻoni, naʻe ʻikai te nau liʻaki fakaʻaufuli ʻa e ʻOtuá; naʻa nau kei muimui pē ki heʻene laó ʻi ha tuʻunga. Ko e kau Kalisitiane kehé naʻe fakalotoʻi pe fakailifiaʻi ʻe he faʻahinga ʻi he fakatahaʻangá ʻa ia naʻa nau kei longoaʻa ʻi he pipiki ki he Lao ʻa Mōsesé mo e tukufakaholó. Ko e hā nai naʻe leaʻaki ʻe Paula ʻe tokoni ki hono fanga tokoua Kalisitiané ke ʻāʻā fakalaumālie ai pē pea kītaki ʻi he lová?

9, 10. (a) ʻI he ofi ki he ngataʻanga ʻo e Hepelū vahe 10, ʻoku tau lau ai ʻa e fakalototoʻa fē ʻa Paulá? (e) Ko e hā naʻe tohi ai ʻa Paula fekauʻaki mo e ngaahi ngāue ʻo e tui ʻa e kau fakamoʻoni ʻo e kuonga muʻá?

⁹ ʻOku mahuʻinga ke fakatokangaʻi ʻa e founga naʻe feinga ai ʻa Paula, ʻi he malumalu ʻo e fakamānavaʻi fakaʻotuá, ke fakaivimālohiʻi ʻa e kau Kalisitiane Hepeluú. ʻI he vahe 10 ʻo ʻene tohí, naʻe fakahaaʻi ai ʻe Paula ko e Laó ko ha “ʻata pe ʻo e ngaahi lelei ka hoko” pea fakahāhaaʻi māʻalaʻala ʻa e mahuʻinga ʻo e feilaulau huhuʻi ʻa Kalaisí. Ofi ki he fakaʻosinga ʻo e vahe ko iá, naʻe naʻinaʻi ai ʻa Paula ki heʻene kau lautohí: “He ʻoku tuha mo kimoutolu ʻa e kitaki; koeʻuhi ke mou fai ke ʻosi ʻa e finangalo ʻo e ʻOtua, ʻo mou lavaʻi ʻa e talaʻofa. He ʻoku toe pe ha kiʻi momoʻi taimi, pea haʻu ʻa Tuʻunukumai; ʻio, ʻe ʻikai te ne fakatotoka.”—Hep. 10:1, 36, 37.

¹⁰ ʻI he Hepelū vahe 11, ʻoku fakamatalaʻi pōtoʻi ai ʻe Paula ʻa e ʻuhinga ʻo e tui moʻoni ki he ʻOtuá. Pea ʻokú ne fakatātaaʻi ai ʻaki ʻa e ngaahi faʻifaʻitakiʻanga fakahisitōlia ʻo e kau tangata mo e kau fefine ʻo e tuí. Ko ha afe ʻikai fiemaʻu ia? ʻIkai ʻaupito. Naʻe ʻilo ʻe he ʻapositoló, naʻe fiemaʻu ke ʻilo ʻe hono ngaahi kaungālotú koeʻuhi ko ʻenau tuí ʻe fiemaʻu ki ai ʻa e ngāue loto-toʻa mo e kītaki. Ko e faʻifaʻitakiʻanga lelei naʻe fokotuʻu ʻe he kau sevāniti faitōnunga ʻa Sihova ʻo e kuonga muʻá naʻe fakaivimālohiʻi ai ʻa e kau Hepeluú ke feangainga mo e ngaahi ʻahiʻahí mo e ngaahi faingataʻa naʻa nau fehangahangai mo iá. Ko ia ai, hili hono fakalau ʻa e ngaahi ngāue ʻo e tui ʻa e kau mateaki ko ia ʻi he kuohilí, naʻe lava ai ʻa Paula ke pehē: “Pea ko e meʻa ʻi he kapuʻi ʻa kitautolu ʻe ha ʻao kau fakamoʻoni ʻoku fuʻu pehe fau, ko ia ke tau huʻihuʻi ʻa e fakamamafa kotoa pe, mo e angahala ʻoku tau moʻuangofua ki ai, pea tau kitaki atu ʻetau lele he fakapuepue kuo tala humaki mai kiate kitautolu.”—Hep. 12:1.

“ʻAo Kau Fakamoʻoni”

11. ʻI he fakakaukau fekauʻaki mo e ‘fuʻu ʻao kau fakamoʻoni’ ʻe lava ke ne uesia fēfē kitautolu?

¹¹ Ko e ‘ʻao kau fakamoʻoni pehē faú’ naʻe ʻikai ko ha kau mamata pe kau tuʻu ʻataʻatā pē, hangē ko e laú, ʻa ia naʻa nau ʻi ai pē ke mamata he lová pe ke sio ki he ikuna ʻenau tokotaha ʻatelita pe timi ʻoku nau saiʻia aí. Ka, naʻa nau kau, hangē ko e kau lele ʻi ha lová. Pea naʻa nau lele pea ʻosiki lavameʻa ia. Neongo kuo nau mate he taimí ni, ʻe lava ke fai ʻa e fakakaukau atu kiate kinautolu ko ha kau lele taukei ʻa ia ʻoku lava ke nau fakalototoʻaʻi ʻa e kau lele foʻou ʻi he lová. Sioloto atu ki he anga e ongoʻi ʻa ha tokotaha feʻauhi kapau naʻá ne ʻilo ʻoku takatakai, pe mamata, kiate ia ʻa e niʻihi ʻo e kau lele lavameʻa tahá. ʻIkai ʻe ueʻi ai ia ke ne fai hono lelei tahá pe naʻa mo e fakalaka atu ai? Ko e kau fakamoʻoni ʻo e kuonga muʻá ʻe lava ke nau fakamoʻoniʻi ko ha lova fakaefakatātā pehē, tatau ai pē pe ʻoku faingataʻa fēfē, ʻe lava ke ikunaʻi ia. Ko ia ai, ʻi hono tauhi maʻu ʻi he ʻatamaí ʻa e faʻifaʻitakiʻanga ʻo e “ʻao kau fakamoʻoni,” ʻe lava ke maʻu ʻe he kau Kalisitiane Hepelū ʻo e ʻuluaki senitulí ʻa e loto-toʻa pea ‘kitaki atu ʻenau lele he lová’—hangē ko e lava ʻe kitautolu he ʻaho ní.

12. ʻOku feʻungamālie fēfē kiate kitautolu ʻa e ngaahi faʻifaʻitakiʻanga naʻe lave ki ai ʻa Paulá?

¹² Ko e tokolahi ʻo e kau faitōnunga ne lave ki ai ʻa Paulá naʻe ʻi ai honau ngaahi tuʻunga meimei tatau mo kitautolu. Ko e fakatātaá, naʻe moʻui ʻa Noa ʻi he taimi naʻe ngata ai ʻa e māmani ki muʻa he lōmakí. ʻOku tau moʻui ʻo ofi ki he ngataʻanga ʻo e fokotuʻutuʻu ʻo e ngaahi meʻa lolotongá. Naʻe fiemaʻu ʻa ʻĒpalahame mo Sela ke na liʻaki hona fonua tupuʻangá kae tuli ki he lotu moʻoní pea tatali ki he fakahoko ʻo e talaʻofa ʻa Sihová. ʻOku ekinakiʻi kitautolu ke tau siʻaki kitautolu pea maʻu ʻa e hōifua ʻa Sihová mo e ngaahi tāpuaki ʻokú ne tuku tauhi maʻatautolú. Naʻe fāifononga holo ʻa Mōsese ʻi ha toafa fakailifia, ʻo huʻu atu ki he Fonua ʻo e Talaʻofá. ʻOku tau ʻi ha hala ʻoku fou atu ʻi he fokotuʻutuʻu ʻo e ngaahi meʻa tei mate ko ení, ʻo huʻu atu ki he māmani foʻou kuo talaʻofá. Ko e meʻa ne hokosia ʻe he kau tangata ko ení, ko ʻenau ngaahi lavameʻá mo ʻenau ngaahi tōnounoú, pea pehē ki honau ngaahi mālohingá mo e ngaahi vaivaiʻangá, ʻoku taau moʻoni ke tau tokanga ki ai.—Loma 15:4; 1 Kol. 10:11.

Naʻa Nau Lavameʻa—Anga-Fēfē?

13. Naʻe fehangahangai ʻa Noa mo e ngaahi pole fē, pea ko e hā naʻá ne fakamafeia ia ke ikuʻi iá?

¹³ Ko e hā naʻá ne fakamafeia ʻa e kau sevāniti ko eni ʻa Sihová ke nau kītaki pea lavameʻa ʻi he lová? Fakatokangaʻi ʻa e meʻa naʻe tohi ʻe Paula fekauʻaki mo Noá. (Lau ʻa e Hepelu 11:7.) “ʻA e lomaki, ko e fuʻu vai ke ʻufiʻufi ʻa e fonua, [ʻa ia te ne] fakaʻauha ʻa e kakano kotoa pe” ko e meʻa ia “kuo teʻeki hamai” kia Noa. (Sen. 6:17) Ko e meʻa ia ne teʻeki ai hoko ki muʻa, ko e meʻa mātuʻaki taʻehanotatau. Kae kehe, naʻe ʻikai ke tukunoaʻi ia ʻe Noa ko ha meʻa ʻoku ngali taʻemalava pe naʻa mo taʻemoʻoni. Ko e hā hono ʻuhingá? Koeʻuhi naʻá ne maʻu ʻa e tui ko ha meʻa pē naʻe leaʻaki ʻe Sihova, ʻe fai ia ʻe Sihova. Naʻe ʻikai ongoʻi ʻe Noa ko e meʻa naʻe kole ange ke ne faí naʻe fuʻu faingataʻa. Ka, “naʻa ne fai ia.” (Sen. 6:22) ʻI he fakakaukau ki he meʻa kotoa naʻe pau ke fai ʻe Noá—langa e ʻaʻaké, tānaki e fanga manú, fakafonu e ʻaʻaké ʻaki e meʻakai maʻá e tangatá mo e fanga manú, malangaʻi ha pōpoaki fakaefakatokanga, pea tauhi e fāmilí ke mālohi fakalaumālie—naʻe ʻikai ko ha ngāue siʻisiʻi ke fai “ia.” Kae kehe, ko e tui ʻa Noá mo e kītakí naʻe iku ia ki he moʻui mo e ngaahi tāpuaki maʻana pea ki hono fāmilí.

14. Ko e hā ʻa e ngaahi ʻahiʻahi naʻe kātekina ʻe ʻĒpalahame mo Selá, ʻo ʻomi ai ʻa e lēsoni ko e hā maʻatautolu?

¹⁴ Ko ʻĒpalahame mo Sela ʻokú na hoko mai ʻi he lisi ʻa Paula ʻo e “kapuʻi ʻa kitautolu ʻe ha ʻao kau fakamoʻoni.” Naʻá na mavahe ʻaupito mei heʻena moʻui anga-maheni ʻi ʻUá, pea ko hona kahaʻú naʻe hā taʻepau. Naʻá na fakamoʻoniʻi ʻena hoko ko e ongo faʻifaʻitakiʻanga ʻo e tui taʻemauea mo e talangofua ʻi he ngaahi taimi faingataʻá. ʻI hono fakatahaʻi ʻa e kotoa ʻo e ngaahi feilaulau naʻe loto-lelei ʻa ʻĒpalahame ke fai maʻá e lotu moʻoní, naʻe feʻunga hono ui ia “ko e tamai ʻanautolu kotoa pe ʻoku tui.” (Loma 4:11) Naʻe lave pē ʻa Paula ki he ngaahi poini mahuʻingá, kuo alāanga ʻene kau lautohí mo e ngaahi fakaikiiki ʻo e moʻui ʻa ʻĒpalahamé. Neongo ia, ko e lēsoni naʻe ʻomi ʻe Paulá ʻoku mālohi: “Ko kinautolu ni kotoa pe [kau ai ʻa ʻĒpalahame mo hono fāmilí] naʻa nau pekia tui pe, kuo ʻikai te nau lavaʻi ʻa e ngaahi talaʻofa; ka kuo nau sio ki ai mei he mamaʻo, pea kuo nau fetapa ki ai, pea kuo nau fakaha, ko e ʻāunofo mo e muli kinautolu ʻi mamani.” (Hep. 11:13) ʻOku hā mahino, ko ʻenau tui ki he ʻOtuá mo honau vahaʻangatae fakafoʻituitui mo iá naʻe tokoniʻi ai kinautolu ke nau lele ʻi he lová mo e kītaki.

15. Ko e hā naʻá ueʻi ʻa Mōsese ke moʻui ʻo hangē ko ia naʻá ne faí?

¹⁵ Ko Mōsese ko e sevāniti alafaʻifaʻitakiʻanga ia ʻe taha ʻa Sihova ʻi he haʻohaʻonga ʻo e “ʻao kau fakamoʻoni.” Naʻe liʻaki ʻe Mōsese ha moʻui tuʻumālie mo monūʻia, “heʻene fili muʻa ke kaungā-ngaohikovia mo e kakai ʻa e ʻOtua.” Ko e hā naʻá ne ueʻi ia ke fai peheé? Naʻe tali ʻe Paula: “Naʻa ne sio fakamamaʻu atu ki he totongi. . . . Naʻa ne kitaki heʻene sio ki he Tuʻi Taʻehamai.” (Lau ʻa e Hepelu 11:24-27.) Naʻe ʻikai fakahohaʻasi ʻa Mōsese ʻe he “maʻu fakataimi pe ha malie tuʻu he angahala.” Ko e ʻOtuá mo ʻene ngaahi talaʻofá naʻe mātuʻaki moʻoni kia Mōsese ʻo ne fakahāhā ai ʻa e loto-toʻa anga-kehe mo e kītaki. Naʻá ne feinga mālohi taʻehela ʻi hono tataki ʻa e kau ʻIsilelí ki tuʻa mei ʻIsipite ki he Fonua ʻo e Talaʻofá.

16. Ko e hā naʻe ʻikai hoko ai ʻo mamahi ʻa Mōsese ʻi he ʻikai ke fakaʻatā ia ke hū ki he Fonua ʻo e Talaʻofá?

¹⁶ Hangē ko ʻĒpalahamé, naʻe ʻikai hokosia ʻe Mōsese ʻa e fakahoko ʻo e talaʻofa ʻa e ʻOtuá ʻi he taimi naʻá ne moʻui aí. ʻI he ene ke hū atu ʻa e kau ʻIsilelí ki he Fonua ʻo e Talaʻofá, naʻe tala kia Mōsese: “Te ke mamata tonu ki he fonua; ka ʻe ʻikai te ke hu ki ai, ki he fonua ʻoku ou foaki ki haʻa Isileli.” Naʻe hoko eni koeʻuhi ki muʻa angé ko ia mo ʻĒlone, ʻi hono fakaʻitaʻi ʻe he kakai angatuʻú, naʻá na “fai hala [ki he ʻOutá] ʻi he lotolotonga ʻo haʻa Isileli ʻi Vai-Melipa.” (Teu. 32:51, 52) Naʻe hoko ʻa Mōsese ʻo mamahi pe ʻita? ʻIkai. Naʻá ne fakahaaʻi ha tāpuaki ki he kakaí pea fakaʻosiʻaki ʻa e ngaahi lea ko ení: “Monuʻiaā ka ko koe, Isileli: Ko hai ʻoku hange ko koe, ko e kakai fakamoʻui ʻe he ʻEiki, ʻa ia ko e pa ʻo ho tokoni, mo e heleta ʻo ho langilangi!”—Teu. 33:29.

Lēsoni Maʻatautolu

17, 18. (a) ʻI heʻetau lova ki he moʻuí, ko e hā ʻe lava ke tau ako mei he “ʻao kau fakamoʻoni”? (e) Ko e hā ʻe lāulea ki ai ʻi he kupu hoko maí?

¹⁷ Mei heʻetau fakamanatu ʻa e moʻui ʻa e niʻihi ʻo e faʻahinga ko ia naʻe faʻuʻaki ʻa e “kapuʻi ʻa kitautolu ʻe ha ʻao kau fakamoʻoni,” ʻoku hā mahino kia kitautolu ke lele ʻi he lova ki he ngataʻangá, kuo pau ke tau maʻu ʻa e tui kakato ki he ʻOtuá mo ʻene ngaahi talaʻofá. (Hep. 11:6) ʻE ʻikai lava ʻa e tuí ke ʻi he ngaahi tuliki pē ʻetau moʻuí; ʻoku fiemaʻu ke ʻi he tuʻunga ia ʻi lotó. ʻI he ʻikai hangē ko e faʻahinga ʻoku ʻikai tuí, ʻoku lava ʻa e kau sevāniti ʻa Sihová ke sio fakalaka atu ʻi he lolotongá. ʻOku tau lava ʻo sio atu “ki he Tuʻi Taʻehamai” pea lele ʻi he lová mo e kītaki.—2 Kol. 5:7.

¹⁸ Ko e lova faka-Kalisitiané ʻoku ʻikai faingofua koeʻuhi ko e moʻui ʻaki ʻa e tuí ʻoku ʻikai ʻaupito faingofua. Kae kehe, ʻoku malava kia kitautolu ke ʻosiki lavameʻa ʻa e lová. ʻI he kupu hokó, te tau lāulea ai ki ha toe tokoni ʻoku tau ala maʻu.

ʻE Lava Ke Ke Fakamatalaʻi?

• Ko e hā naʻe tohi fuoloa ʻe Paula fekauʻaki mo e “kau fakamoʻoni” faitōnunga ʻo e kuonga muʻá?

• ʻE lava fēfē ʻe he sioloto atu ki hono “kapuʻi ʻa kitautolu ʻe ha ʻao kau fakamoʻoni” ʻo fakalototoʻaʻi kitautolu ke lele ʻi he kītakí?

• Ko e hā kuó ke ako mei he lāulea ki he faʻahinga faitōnunga ʻo e “kau fakamoʻoni” hangē ko Noa, ʻĒpalahame, Sela, mo Mōsesé?

[Fakatātā ʻi he peesi 19]

Ko ʻĒpalahame mo Sela naʻá na loto-lelei ke liʻaki ʻa e ngaahi fiemālie ʻo ʻUá