Aisaia
2 Dispela em samting Aisaia, pikinini man bilong Emos, i bin lukim long samting bai painim Juda na Jerusalem:+
2 Long taim bilong las de,
Dispela maunten em haus bilong Jehova i sanap long en
Bai kamap strong tru na stap antap winim ol arapela maunten,+
Na em bai go antap moa winim ol liklik maunten,
Na planti lain manmeri bai go long en.+
3 Na planti lain manmeri bai go na tok:
“Kam, yumi go antap long maunten bilong Jehova
Long haus bilong God bilong Jekop.+
Em bai skulim yumi long ol pasin bilong em,
Na bai yumi wokabaut long ol rot bilong em.”+
4 Em bai stap olsem jas namel long planti lain manmeri
Na stretim tok wantaim planti manmeri.
Bai ol i paitim bainat bilong ol i kamap ain bilong brukim graun
Na paitim spia bilong ol i kamap naip bilong wokim gaden.+
Wanpela kantri i no inap apim bainat na pait long narapela kantri,
Na bai ol i no skul moa long pait.+
5 O lain bilong Jekop, yupela kam,
Na yumi wokabaut long lait bilong Jehova.+
6 God, yu bin givim baksait long ol manmeri bilong yu, em lain bilong Jekop,+
Bikos ol i pulap tru long ol samting bilong hap Is;
Ol i save wokim mejik+ olsem ol Filistia,
Na ol i gat planti pikinini bilong ol man bilong narapela ples.
7 Silva na gol i pulap tru long graun bilong ol,
Ol i gat planti gutpela gutpela samting na i no gat pinis bilong ol.
Ol hos i pulap tru long graun bilong ol,
Ol i gat planti karis na i no gat pinis bilong ol.+
8 Ol yusles god i pulap tru long graun bilong ol.+
Ol i brukim skru long wok bilong han bilong ol yet,
Long ol samting em pinga bilong ol yet i bin wokim.
9 So man i brukim skru, em i semim em yet,
Na yu no inap lusim rong bilong ol.
10 Go insait long bikpela ston na haitim yupela yet long das
Bikos long bikpela belhat bilong Jehova we i mekim man i pret
Na long bikpela glori na namba bilong em.+
11 Ai bilong ol man i gat pasin antap bai sem pipia,
Na ol man i gat pasin hambak bai daunim ol yet.
Long dispela de, Jehova wanpela tasol bai kisim biknem.
12 Long wanem, dispela de i bilong Jehova, bosman bilong bikpela lain ami.+
Dispela de bai painim olgeta man i gat pasin antap na pasin bilong apim ol yet,
Em bai painim olgeta man, maski ol i gat biknem o ol i no gat nem,+
13 Em bai painim olgeta diwai sida bilong Lebanon, em ol i traipela na i antap tru,
Na olgeta diwai ok bilong Basan,
14 Em bai painim olgeta maunten i antap tru
Na olgeta liklik maunten i antap,
15 Em bai painim olgeta longpela taua na olgeta strongpela banis,
16 Em bai painim olgeta sip bilong Tarsis+
Na olgeta naispela bot.
17 Man i gat pasin antap i mas daunim em yet,
Na ol man i gat pasin hambak i mas daunim ol yet.
Long dispela de, Jehova wanpela tasol bai kisim biknem.
18 Ol yusles god bai pinis olgeta.+
19 Na ol manmeri bai go insait long ol keiv bilong ol bikpela ston
Na go insait long ol hul bilong graun,+
Bikos long bikpela belhat bilong Jehova we i mekim man pret
Na long bikpela glori na namba bilong em,+
Long taim em i kirap long mekim graun i pret na guria.
20 Long dispela de, ol man bai kisim ol yusles god bilong ol, em ol i bin wokim long silva na gol,
Em ol i bin wokim bilong ol yet long brukim skru long en,
Na tromoi ol i go long ol liklik rat na ol blakbokis,+
21 Na bai ol i ken go insait long ol hul bilong ol bikpela ston
Na go insait namel long ol bikpela ston long maunten,
Bikos long bikpela belhat bilong Jehova we i mekim man i pret
Na long glori na bikpela namba bilong em,
Long taim em i kirap long mekim graun i pret na guria.
22 Yupela i mas lusim pasin bilong trastim wanpela man nating,
Husat i olsem win em i save pulim long nus bilong em.
Em bai helpim yupela olsem wanem?