Buk Song
Tok i go long dairekta; singim long nek ol i kolim “Ol Plaua Lili.”* Singsing bilong ol pikinini man bilong Kora.+ Maskil.* Singsing bilong man i laikim meri.
45 Planti gutpela nius i pulap long bel bilong mi.
Mi tok olsem: “Mi bai mekim wanpela song i stori long wanpela king.”+
Maus bilong mi i olsem pen*+ bilong wanpela sekreteri.*+
2 King, yu luk nais tru. I no gat narapela man i olsem yu.
Ol tok i kamap long maus bilong yu* i gutpela tru.+
Olsem na God i blesim yu inap oltaim oltaim.+
3 Yu strongpela man,+ na yu gat biknem na namba.+
Yu mas pasim bainat bilong yu+ long sait bilong yu.
4 Yu gat namba na yu go na winim pait;+
Yu ron long hos bilong yu na go pait bilong helpim ol man i gat pasin daun na bilong helpim tok i tru na stretpela pasin.+
Na rait han bilong yu bai mekim* ol samting em ol man bai pret nogut tru long en.
5 King, ol spia bilong yu i sap tru na i sutim ol manmeri na ol i pundaun long ai bilong yu;+
Na ol spia bilong yu i sutim lewa bilong ol birua bilong king.+
6 God em i sia king bilong yu inap oltaim oltaim;+
Na stik bilong king* bilong kingdom bilong yu, em i stik bilong stretpela pasin.+
7 Yu bin laikim tru stretpela pasin,+ na yu bin heitim tru pasin nogut.+
Dispela i as na God, em God bilong yu, i bin anointim* yu+ long oil bilong amamas+ winim ol arapela king.*
8 Olgeta klos bilong yu i gat gutpela smel bilong mer* na aloe na kasia;*
Ol i bilasim haus king long aivori,* na musik ol i pilaim long ol instramen i gat string i mekim yu i amamas.
9 Ol pikinini meri bilong ol king i stap wantaim ol meri i gat biknem long haus king bilong yu.
Na kwin i sanap long rait sait bilong yu. Em i putim bilas gol ol i bin wokim long gol bilong Ofir.+
10 Pikinini meri, yu mas putim gut yau na harim;
Yu mas lusim tingting long ol manmeri bilong yu na ol lain i stap long haus bilong papa bilong yu.
11 Yu mekim olsem na bai king i lukim yu i naispela meri tru na em bai laikim yu,
Em i bikman bilong yu,
Olsem na yu mas brukim skru long em.
12 Pikinini meri bilong Tair bai bringim presen i kam long yu;
Na ol maniman tu bai i kam long yu na bai yu ken orait long ol.
13 Insait long haus king, pikinini meri bilong king i luk nais tru;
Em i werim klos em ol i bilasim long tret gol.
14 Na taim ol i bringim em i go long king, em i werim klos ol i bin wivim gut tru.*
Na ol yangpela meri* em ol i poroman bilong em, ol i bihainim em i go sanap long ai bilong yu.
15 Ol bai i amamas na belgut tru;
Ol bai go insait long haus bilong king.
16 Na king, ol pikinini man bilong yu bai i senisim ol tumbuna bilong yu.
Yu bai makim ol long i stap ol prins long olgeta hap bilong graun.+
17 Bai mi tokaut long nem bilong yu long olgeta lain i kamap bihain bihain.+
Olsem na ol lain pipol bai litimapim nem bilong yu inap oltaim oltaim.