Jop
38 Orait long rot bilong traipela win Jehova i bekim tok bilong Jop olsem:+
2 “Husat dispela man i wok long paulim ol tok bilong mi
Na i no kliagut long ol samting na i mekim planti toktok nating?+
3 Sapos yu man tru, orait nau yu mas redi;
Mi bai givim ol askim long yu, na yu mas bekim ol askim bilong mi.
4 Taim mi wokim graun na strongim as bilong en, yu stap we?+
Sapos yu kliagut long dispela, orait yu mas tokim mi.
5 Husat i bin putim ol mak bilong graun? Ating yu save, a?
Na husat i mesarim graun kirap long wanpela sait bilong en i go long narapela sait bilong en?
6 Na ol pos bilong strongim graun i stap antap long wanem samting?
Na husat i bin putim ston bilong kona bilong en?+
7 Taim ol sta bilong moningtaim+ i bin amamas na singaut,
Na olgeta pikinini man bilong God*+ i bin amamas na singaut, yu stap we?
8 Na long taim solwara i bin sut i kam ausait long bel bilong graun,
Husat i bin pasim ol dua bilong en, na solwara i stap insait long mak bilong en?+
10 Na yu stap we taim mi bin makim ol arere bilong solwara
Na dispela i stap olsem ol dua na ol ba i banisim em?+
11 Na taim mi tokim solwara olsem, ‘Weiv bilong yu i ken bruk i kam inap long dispela mak tasol
Na i tambu tru long kalapim dispela mak,’ yu stap we?+
12 Olsem wanem? Ating yu bin makim taim bilong moning i mas kamap, a?
Na ating i gat wanpela taim yu bin tokim tulait long bruk, a?+
13 Na olsem wanem? Ating yu bin tokim tulait long kamap long olgeta hap bilong graun
Na rausim ol man nogut i go, a?+
14 Taim san i kamap, graun i save stap ples klia,
Na ol samting i bilasim graun i save stap ples klia olsem bilas i stap long laplap.
15 Tudak i olsem san bilong ol man nogut, tasol tulait i kamap na i pasim ol
Na mekim ol i lusim ol wok nogut ol i mekim.
16 Olsem wanem? Ating yu bin go daun long as bilong solwara na lukim ol ples wara i save kamap long en, a?
Na yu bin go raun long hap we solwara i dip tru, a?+
17 Na olsem wanem? Yu bin lukim geit bilong dai,+
Na yu bin lukim geit bilong ples i tudak nogut tru?+
18 Dispela graun i bikpela tumas. Ating yu save long olgeta hap bilong en, a?+
Sapos yu save, orait tokim mi.
19 Yu save long rot i go long asples bilong lait, a?+
Na yu save long asples bilong tudak i stap we?
20 Na yu inap kisim ol i go bek long ples bilong ol, a?
Na yu kliagut long rot i go long asples bilong ol?
21 Olsem wanem? Ating yu save pinis long dispela, long wanem, yu bin bon pinis, a?
Na ating yu bin i stap laip longpela taim tru, a?
22 Olsem wanem? Yu bin go lukim ol bakstua bilong sno?+
Na yu bin go lukim ol bakstua em ren ais i stap long en?+
23 Mi bin putim ol dispela samting i stap bilong mi ken mekim wok long en long taim bilong hevi,
Na bilong yusim long taim bilong pait.+
24 Lait* i save bihainim wanem rot na i go nabaut?
Na win bilong hap is i save bihainim wanem rot na i go nabaut long olgeta hap bilong graun?+
25 Na husat i bin wokim baret bilong wara i tait?
Na husat i bin wokim rot bilong ol blakpela klaut bilong ren i save pairap?+
26 Husat i save mekim ren i pundaun long hap we i no gat man i stap long en?
Na husat i save mekim ren i pundaun long ples nating we i no gat man?+
27 Husat i mekim ren i pundaun long ples nating
Na mekim ol gras i gro long dispela hap?+
28 Olsem wanem? Ating ren i gat papa, a?+
Na husat em i papa bilong wara bilong nait?+
29 Na husat i mama bilong ais?
Na husat i wokim smok bilong moning i kol tru i kam long heven?+
30 Na husat i save mekim antap bilong ol wara i kamap strong olsem ston?
Na husat i save mekim antap bilong ol wara i dip tru i kamap ais?+
31 Na olsem wanem? Ating yu inap bungim lain sta ol i kolim Kima na pasim ol i stap wantaim?
Na ating yu inap lusim rop i pasim lain sta ol i kolim Kesil?+
32 Na olsem wanem? Yu ting yu inap makim stret taim em ol lain sta i mas bihainim?
Na yu ting yu inap stiaim ol lain sta ol i kolim Es?*
33 Na ating yu save long ol lo em ol samting bilong ples antap* i save bihainim, a?+
Na ating yu inap mekim ol samting long graun tu i bihainim ol dispela lo?*
34 Olsem wanem? Ating yu inap bikmaus long ol klaut
Na ol i harim tok bilong yu na kapsaitim bikpela ren antap long yu?+
35 Na ating yu inap salim ol laitning i go nabaut?
Na yu ting ol bai kam long yu na i tokim yu olsem, ‘Mi mekim wok bilong yu pinis?’
36 Husat i givim savetingting long ol klaut?*+
Na husat i givim save long ol samting i stap long skai?*+
37 Na husat i gat save inap long kaunim ol klaut?
Na husat inap kapsaitim ol sospen wara bilong heven,+
38 Na i mekim das bilong graun i kamap malumalum,
Na i pas wantaim?
39 Na olsem wanem? Yu inap painim kaikai bilong laion?
Na yu inap givim kaikai long ol yangpela laion na pinisim hangre bilong ol?+
40 Taim ol i stap insait long hul bilong ol,
Na taim ol i wet i stap long ples hait bilong ol bilong kilim i dai ol abus, yu save givim kaikai long ol?
41 Na husat i save redim kaikai bilong ol kotkot,+
Taim ol liklik pikinini bilong ol i singaut long God i helpim ol,
Na ol i raun raun nabaut long wanem ol i no gat kaikai?