Pen i No Wanpela Bikpela Birua Tasol
TAIM skin bilong man i pen olgeta taim, dispela inap bagarapim i stap bilong em. Em i no inap stap bel isi o amamas o wok mani. Sampela i save bel hevi stret na kilim i dai ol yet. Dokta Albert Schweitzer i tok: ‘Pen i save daunim tru ol man, winim indai.’
Planti handet milion manmeri i save karim bikpela pen tru. Wanpela dokta bilong Frans i tok: ‘Sapos yumi inap i stap antap tru long graun, singaut bilong olgeta man i gat pen bai kam antap olsem wanpela bikpela pairap tru.’
Yes, samting aposel Pol i raitim 1,900 yia i go pinis i makim stret taim bilong yumi. Em i tok: “Olgeta samting God i bin wokim, olgeta i pilim pen . . . Na olgeta i krai nogut i stap, i kam inap long nau.”—Rom 8:22.
Ol Bikpela Sik
Long olgeta 8-pela 8-pela man Amerika, wanpela i save karim bikpela pen long sik atraitis. Na baksait bilong planti man moa i pen nogut tru. Na sampela man moa i karim bikpela pen long sik kensa o sik bilong klok.
Het o tit o yau o narapela hap skin bilong planti milion man moa i pen nogut tru. Olsem na long wanpela yia tasol ol Amerika i bin tromoi bikpela mani, olsem 2.1 bilion kina long marasin ol inap baim nating bilong kilim pen. Man! Nau yumi save bilong wanem ol i kolim dispela kain pen olsem ‘bikpela sik i stap hait bilong ol Amerika.’
John J. Bonica i gat bikpela save long pen. Em i tok: ‘Taim yumi tingim bikpela mani ol man i tromoi bilong baim marasin bilong kilim pen, na bikpela pen ol i save karim, kain pen olsem man i save karim long olgeta taim em i winim tru klostu olgeta sik wantaim.’
Pen Inap Pinis?
Planti man i tingim ol dispela samting na sapos yumi tok, ‘Bai i no gat pen moa,’ bai ol i tok, ‘I no inap kain samting olsem i kamap.’ Na ol i ting tok bilong Baibel i no gat as bilong en taim em i tok: “[God] bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.”—KTH 21:4.
Tru, long nau planti man i save kisim pen, tasol i gat as na pen inap pinis. Olsem na wanem insait tru bilong dispela tok bilong Baibel? I gat sampela manmeri i no inap pilim pen; mama i karim ol olsem. Dispela i gutpela samting o nogat? Saveman Allan Basbaum i tok: ‘Sapos man i no inap pilim pen liklik em inap bagarap stret.’
Sapos yu no inap pilim pen na wanpela buk i gat wara i kamap long lek, bai yu no pilim inap long taim bikpela sua i kamap. Wanpela ripot i stori long wanpela liklik pikinini meri i no save pilim pen. Sampela taim papamama i harim smel bilong paia i kukim skin. Taim ol i go painim as bilong dispela samting, ol i lukim pikinini i slipim hap skin bilong em long stov, tasol em i no pilim pen. Tru tumas, pen i no wanpela bikpela birua tasol, nogat; pasin bilong pilim pen inap helpim man tu.
Orait, olsem wanem long dispela tok promis bilong Baibel i tok, “bai ol man i no kisim pen moa”? Olsem wanem? Em i wanpela tok promis yumi laik i kamap na yumi no inap pilim pen moa?
Aiwara Bai Pinis?
Na Baibel i tok: “[God] bai i mekim drai wara i stap long ai bilong olgeta.” (KTH 21:4) Yumi mas tingim dispela tok, long wanem, aiwara i gat wok—wara i kamap long ai i save lukautim ai, olsem pen i save kamap long skin i lukautim skin.
Wara bilong ai i save mekim gut long ai. Sapos i no gat dispela wara i kamap, bai bal bilong ai i go drai. Na taim hap das samting i go insait long ai, aiwara i wasim na rausim. Na i gat marasin laisosaim i stap long wara bilong ai bilong lukautim gut ai na sik i no ken bagarapim. Olsem na aiwara i wanpela gutpela samting God i bin wokim bilong helpim bodi bilong yumi, olsem pen i save helpim yumi tu.—Song 139:14.
Tasol taim man i bel hevi samting em bai krai. King Devit i tok: “Olgeta nait aiwara bilong mi i wasim bet bilong mi. Mi krai moa yet na hetpilo bilong mi i wara olgeta.” (Song 6:6) Taim wanpela gutpela pren bilong Jisas i dai em i “krai.” (Jon 11:35) Laik bilong God long pastaim i olsem em i laik bai ol man i ken i stap gutpela na ol i ken i stap amamas, em i no laik bai ol i hevi na krai. Namba wan man Adam i mekim rong, olsem na sik, pen, hevi, indai, i painim yumi olgeta. (Rom 5:12) Olsem na God i no ken pinisim tru wara i stap long ai bilong man, em bai pinisim ol samting i save givim hevi long man na i mekim aiwara i kamap long ai na em i krai.
Tasol taim Baibel i stori long wanpela kain aiwara bai pinis, orait dispela tok promis long pen bai pinis, em bai kamap tru olsem wanem? Olsem wanem? Sampela taim ol man bai pilim pen i save mekim ol i hevi na krai, a?