Ol i Kisim Save Long Daunim Pen

BIPO sampela dokta tasol i save gut long olsem wanem yumi pilim pen, na long nau tu planti dokta i no save gut. Dokta John Liebeskind, bipo em i presiden bilong lain International Pain Foundation, em i bin tok: ‘Ating i no gat tru wanpela skul bilong ol man i laik kamap dokta i save tromoi 4-pela aua insait long 4-pela yia long skulim ol sumatin long save gut long glasim na stretim pen.’

Tasol nau ol dokta i kisim nupela save long pen na ol i wok strong long stretim. Olsem na ol man i gat hevi long dispela samting i ken amamas. Nius American Health i tok: ‘Yumi olgeta i ken amamas, long wanem, nau ol dokta i save, dispela kain pen i save stap oltaim em i no olsem pen nating, em wanpela sik tru na ol inap stretim.’ Dispela tingting i mekim na nau i gat planti klinik moa i kamap bilong helpim ol man i gat pen.

Ples Bilong Stretim Pen

Dokta John J. Bonica i bin kamapim namba wan klinik long Amerika i save mekim wok long kain kain rot bilong helpim ol man i gat pen. Em i tok: ‘Inap long 1969 i gat 10-pela kain klinik tasol long olgeta hap graun.’ Tasol insait long 25 yia i go pinis, winim 1,000 klinik i kamap bilong helpim ol man i gat pen. Mausman bilong wanpela lain i save helpim ol man i gat dispela kain pen i save stap oltaim, em i tok, ‘klostu olgeta de i gat ol nupela klinik i kamap.’a

Tingim dispela samting! Dokta Gary Feldstein long Nu Yok Siti i tok: ‘Bipo ol man i gat bikpela pen i mas raun inap sampela handet o tausen kilomita bilong kamap long wanpela klinik bilong helpim ol, tasol nau nogat. I gat ol klinik klostu.’ Tru tumas, sapos yu karim hevi long pen na i gat ol dokta i save gut long rot bilong stretim, em wanpela gutpela samting tru, a? 

Inap planti yia baksait bilong Linda Parsons i pen. Linda em i meri bilong wanpela wasman bilong raun long lain Witnes Bilong Jehova. Maski em i go long planti dokta, pen i no pinis. Man bilong Linda i tingting planti long hevi em i karim, olsem na long Me 1993 em i skelim buk telefon na lukim ol namba long lista bilong pen. Em i lukim namba bilong wanpela klinik bilong pen klostu long hap ol i stap long en long sauten Kalifonia. Em i ring na sampela de bihain Linda i go lukim dokta.

Linda i mas go long klinik 3-pela taim long olgeta wik na em i mas mekim sampela samting long haus bilong helpim baksait bilong em. Sampela wik bihain Linda i pilim baksait i orait liklik. Man bilong em i tok: ‘Wanpela apinun Linda i tokim mi em i kirap nogut tru, long wanem, pen i liklik tasol.’ Sampela mun bihain Linda i no go planti taim moa long klinik.

Long planti klinik bilong pen ol i mekim wankain samting ol dokta i bin mekim bilong helpim Linda. Kain klinik olsem i gat ol dokta i gat bikpela save long pen, na Dokta Bonica i tok, dispela ‘i gutpela rot bilong helpim man i gat dispela kain pen i save stap oltaim.’ Olsem wanem ol i bin helpim Linda?

Sampela Rot Bilong Stretim Pen

Wanpela liklik buk bilong klinik i save stori long ol samting bai painim man taim em i kam long klinik namba wan taim, olsem: ‘Dokta bai glasim skin bilong sikman bilong painim as bilong pen. Bihain dokta bai stori long sampela rot ol i laik mekim wok long en na ol i ting i stret bilong helpim sikman. Dokta bai mekim wok long sampela rot bilong helpim skin bilong sikman long kamapim marasin endofin (em marasin skin yet i save kamapim), na dispela marasin i mekim na man i no ken pilim pen tumas, na tingting planti, na skin i no gat laik long kisim ol marasin bilong kilim pen.’

Ol dokta i bin givim akupanksa long Linda, na TENS, em olsem wanpela masin i gat paua long en na i save kirapim ol rop wailis, olsem nev. Na dokta i givim wanpela liklik masin TENS long Linda bilong mekim wok long en long haus. Na narapela rot, em dokta i lainim Linda long skelim pen i save stap long skin na bosim skin na traim daunim dispela pen.

Na tu, ol dokta i bin rapim strong ol masol bilong Linda na em i mas eksasais, olsem na taim skin bilong em inap, ol i lainim em long mekim sampela eksasais long jimnesiam bilong klinik. Eksasais i bikpela samting bilong helpim Linda. Taim man i gat dispela kain pen i save stap oltaim, skin i no save kamapim planti marasin endofin, olsem na eksasais i gutpela bilong kirapim skin long kamapim endofin. Tasol em bikpela samting long helpim man i gat pen long mekim eksasais i stret bilong helpim em.

Planti man, na Linda tu, taim ol i kam long klinik ol i bin dring planti marasin bilong kilim pen. Tasol bikpela wok bilong ol dispela klinik em long helpim ol man long lusim marasin bilong kilim pen. Olsem na i no longtaim tumas na Linda i lusim dispela marasin. Taim Linda i lusim marasin bilong kilim pen skin bilong em i no karim hevi, na wankain samting i painim planti man taim ol i mekim olsem. Dokta Ronald Melzack i stori long taim ol i ‘skelim 10,000 man em paia i kukim skin bilong ol na haus sik i mas givim strongpela marasin long ol bilong kilim pen. Tasol maski nau sampela bilong ol i save mekim nabaut long drak, ol dokta i ting ol dispela marasin ol i bin kisim long haus sik i no as na nau ol i kalabus long drak.’

Sampela taim tingting na bel bilong man i mekim na em i gat dispela kain pen i save stap oltaim, olsem na ol klinik i wok long helpim man long lain long lusim tingting long pen. Dokta Arthur Barsky, em wanpela profesa long Harvard Medical School, em i tok: ‘Samting man i ting bai kamap, o em i tingting planti long hevi bilong em​—olgeta dispela samting inap mekim na bel i stap isi o nogat.’ Olsem na ol dokta i helpim sikman long tingim ol narapela samting na ol i no ken tingim tumas pen bilong ol.

Samting Bilong Stretim Pen

Ol dispela nupela klinik bilong helpim man i gat pen, ol tasol i rot bilong helpim man? Tru, ol samting ol dispela klinik i mekim inap helpim man i gat pen, tasol sikman i mas tingting gut taim em i tingting long go long wanpela klinik o dokta samting. Tasol em i no ken ting olgeta pen bilong em bai pinis.

Tingim dispela stori: Stephen Kaufman, bipo em i bin insait long spot Olimpik long apim ol hevipela ain. Tasol taim wanpela raskol i sutim em long nek em i bagarap stret, long wanem, em i kisim dispela kain pen i save stap oltaim. Inap 8-pela mun em i insait long wanpela klinik bilong stretim pen, na taim em i pinis em inap go bek long wok mani. Bihain em inap apim gen ol hevipela ain. Tasol dispela man i tok: ‘Planti taim mi pilim olsem ol pinga bilong lek i insait long hatwara.’

Olsem na maski yumi i amamas long nupela save ol saveman i kisim long pen, yumi save ol i no inap truim tok promis bilong Baibel olsem: ‘Bai ol i no kisim pen gen.’ (KTH 21:4) Orait, olsem wanem pen bai pinis?

[Ol Futnot]

[Ol Piksa long pes 9]

Sampela rot ol i mekim bilong helpim man i gat pen, na masin i wok long paua bilong kirapim ol nev, em tu wanpela rot

[Kredit Lain]

Courtesy of Pain Treatment Centers of San Diego