Ol Naispela Tren Stesin Insait Long Graun Long Mosko

WANPELA MAN LONG RASIA I RAITIM DISPELA STORI BILONG KIRAP!

I NO hatwok long save, stesin bilong ol tren (ol i kolim sabwe, o Metro) i save raun insait long graun ol i stap we. Planti manmeri i wok long go insait long wanpela dua bilong i go insait long graun. Antap long dua wanpela hap rait M, i lait strong long retpela kala. Wantu ol dua i op na mi go insait. Mi lukim ol manmeri i hariap long go daun long lata na mi no lukim ol moa​—i olsem ol i go insait long wanpela hul. Pastaim mi wet liklik. Bihain mi bosim pret na mi bihainim ol.

Em namba wan taim mi bin stap long wanpela sabwe. Na dispela sabwe i gat biknem​—em Metro Bilong Mosko! Long nau ol man inap raun long ples antap, na brukim liklik samting tru ol i kolim atom, na katim na stretim kru bilong het i gat sik, orait olsem wanem na wanpela sabwe i bikpela samting na i gat nem?

Ol i bin tokim mi olsem Metro Bilong Mosko em i gutpela tru, ating em i winim ol narapela sabwe long olgeta hap. Wanpela savetok bilong Rasia i tok: ‘Sapos ai bilong yu yet i lukim wanpela samting wanpela taim tasol, dispela i winim ol stori yu harim long en wan handet taim.’ Olsem na taim mi go long kibung intenesenel bilong ol Witnes Bilong Jehova long Mosko long Julai 1993, mi gat bikpela laik long raun long Metro.

Olsem Wanem Em i Kamap

Long 1902 wanpela saientis na ensinia bilong Rasia, em Bolinsky, em i tok i gutpela sapos ol i kamapim wanpela rot bilong tren bilong kisim ol man i go raun arere long banis bilong Kremlin, na raunim namel bilong biktaun. Tasol long dispela taim kaunsil bilong Mosko i no laik. Orait 10-pela yia bihain, kaunsil i tingting strong long wokim kain rot bilong tren olsem​—em bai namba wan bilong dispela kain long Rasia​—tasol Namba Wan Pait i kirap long 1914 na dispela i pasim ol. Ol i no bin mekim sampela samting moa i go inap long 1931. Long dispela taim wanpela komiti (Central Committee of the Communist Party of the Soviet Union) i tok, ol i mas wokim rot bilong tren insait long graun long Mosko. Olsem na Rasia i kamap kantri namba 11, na Mosko i kamap biktaun namba 17 long wokim kain samting olsem.

Metro Bilong Mosko i opim namba wan rot bilong tren​—em inap olsem 11 kilomita​—long 7 klok long moningtaim long Me 15, 1935; em 3-pela yia tasol bihain long ol i kirap long wokim. Fopela tren i raun long 13 stesin, na ol inap karim 200,000 pasindia long wanpela de. Ol man Mosko na ol man i kam long ol narapela hap ol i kirap nogut long en. Em nupela samting na i narapela kain tru! Long apinun ol man i save sanap long lain na wet​—ol i laik insait long ol namba wan lain pasindia. Bipo na long nau tu, ol man i save amamas long lukim dispela sabwe.

Kirap long 1935 na i kam inap nau ol i bin wokim 9-pela rot bilong tren i karamapim 200 kilomita olgeta, na i gat 149 tren-stesin. Klostu olgeta narapela rot bilong raun, olsem balus na bot, ol i save wok wantaim Metro. Ating ol man Mosko bai hatwok tru sapos i no gat Metro, long wanem, olgeta de inap 9 milion pasindia i save raun long en​—winim namba bilong ol lain bilong Finlan inap 2-pela taim. Tasol ol pasindia i save raun long sabwe bilong Landon na Nu Yok Siti, sapos yu bungim tupela wantaim, namba bilong ol pasindia bilong Metro i winim dispela inap 2-pela taim.

Insait Long Stesin

Yu laik save wanem samting i stap 20 plua daunbilo insait long graun? Wanpela lata wokabaut i karim yumi i go daun kwiktaim. Em wanpela bilong 500 lata wokabaut i stap long olgeta hap bilong sabwe, na sapos yumi lainim olgeta wantaim, arere i go long arere, em bai winim 50 kilomita. Taim lata i wokabaut i go daun, em i spit inap wanpela mita long wanpela sekon​—winim spit bilong ol lata wokabaut long ol narapela kantri inap 2-pela taim. Man! Taim em i karim yumi i go daun, yumi kirap nogut tru!

Nau yumi kam insait pinis long stesin Maiakofskaya. Stail bilong en i olsem bilong wanpela haus king​—i no olsem bilong wanpela tren-stesin. I hatwok long bilip olsem mipela i stap insait long graun. Mi no bin lukim kain naispela stail olsem, na mi no bin ting bai mi lukim insait long graun. Nau mi save i gat wanem as na long wanpela so intenesenel bilong kamapim stail bilong ol haus samting (1937 i go 1939), ol i bin givim prais olsem biknem long 5-pela stesin bilong Metro Bilong Mosko, na dispela stesin tu i kisim wanpela. Long ol 149 stesin, wan wan tasol i gat nambawan stail olsem bilong stesin Maiakofskaya; tasol planti bilong ol nupela tu i gat stail stret​—olgeta wan wan i gat bilas bilong en yet.

Klostu olgeta stesin ol i bilasim long ston mabel, seramik, granit, em ol i bin kisim long 20 narapela narapela hap bilong Rasia. Taim ol man i lukim ol dispela ston ol i tingim sampela samting bilong Rasia bilong bipo. Olsem na wanpela piksa bilong stori long Metro i gat rait olsem: ‘Kantri olgeta i givim sampela samting bilong wokim Metro Bilong Mosko.’ Ol i mekim bikpela wok long ston granit bilong wokim plua, long wanem, granit i save stap longtaim. Em bikpela samting, long wanem, planti manmeri i save go i kam long ol stesin long olgeta de.

Taim mipela i lukim ol naispela samting bilong stesin, mipela lukim ol tren i siksti i go i kam. Inap 90 sekon tasol bihain long wanpela tren i lusim stesin, bai yu lukim ol lait bilong narapela i wok long kam klostu. Ol tren i save kam klostu klostu olsem? Nogat. Em long taim bilong ol manmeri i go i kam long wok tasol. Long ol narapela taim, wanpela i save ran 3-pela o 5-pela minit bihain long narapela.

Mipela i no sindaun gut yet long tren na mipela i pilim tren i kirap i go na wantu em i kisim nambawan spit bilong en. Em i spit long wanpela rot i go insait long graun​—braitpela bilong en i olsem 6 mita​—na sampela taim spit bilong tren em inap olsem 100 kilomita long wanpela aua. Olsem na yu inap raun long olgeta hap bilong Metro insait long 6-pela aua tasol! Ol lain Mosko i ting Metro i winim ol narapela rot bilong raun, long wanem, em i spit moa, na tu, pe i liklik na yu inap sindaun gut. Long Julai 1993, long taim bilong kibung intenesenel bilong ol Witnes Bilong Jehova, pe bilong raun long Metro​—maski we we​—em 10 rubel o wanpela toea tasol.

Ol tren i save kam klostu klostu, olsem na ating yu laik save olsem wanem ol inap spit tru olsem. Em i no hatwok long save. Ol i wokim wanpela samting i save bosim spit bilong tren​—draiva i no gat wok long bosim. Dispela i mekim na ol tren i no bam. Dispela samting bilong bosim ol tren i save pasim ol tren na ol i no ken go klostu tumas bambai draiva i gat taim inap long pasim tren na i stret long spit bilong en. Olsem: Sapos wanpela tren i spit olsem 90 kilomita long wanpela aua na em i go klostu tumas long narapela tren​—olsem abrusim mak bilong pasim tren i ran long dispela spit​—brek bilong tren yet bai wok, draiva i no gat wok long putim brek. Na tu, i gat wanpela samting i givim toksave long ensinia bilong tren i go pas olsem tren i kam bihain em i stap klostu. Ol dispela samting bilong bosim spit bilong ol tren i mekim na no gat bagarap samting i kamap. Ating dispela tasol i mekim na ol man Mosko i raun long Metro ol i save stap isi, a? Planti bilong ol i sindaun isi na kaunim buk. Ol i no pret​—ol i save ol bai kamap gut long hap ol i go long en.

Ol Lait na Win

Long olgeta de, kirap long moningtaim tru, taim ol i kirapim ensin bilong ol tren na planti handet tausen lait i kamap, planti milion manmeri i kirap wokabaut insait long ol tren-stesin bilong kamap long ol tren. Long wanpela de inap 3,200 tren bai wok. Long de olgeta, dua bilong ol tren bai op na pas. I mas i gat bikpela hap paua bilong wokim ol dispela samting, a?

Taim ol dispela samting i wok, bikpela hat tru i save kamap, na sampela hat i go insait long graun klostu. Tasol hap hat i stap yet inap mekim na ol stesin na ol rot i go insait long graun bai hat tumas. Orait, ol i mekim wanem? Long olgeta wan wan stesin i gat wanpela masin bilong pulim win i kam insait na rausim tu, na em i save senisim win olgeta inap 4-pela taim long olgeta wan wan aua. Olsem na maski ol man i pas pas long Metro, oltaim yu inap pulim klinpela win. Planti i ting dispela masin win bilong Metro Bilong Mosko i nambawan long olgeta hap.

Tasol long taim bilong kol dispela hat i gutpela, na ol i no gat wok long putim wanpela masin samting bilong hatim stesin; em long ol haus antap na long hap bilong kam insait long stesin tasol. Ol tren, na ol planti tumas manmeri, na graun yet, em i bin bungim hat long taim bilong san​—ol dispela samting i tromoi planti hat inap long ol stesin i ken i stap gutpela.

Ol i Tok Amamas Long En

Wanpela liklik buk i gat ol piksa bilong soim rot long ol man i laik raun long Metro. Buk i tok olsem: ‘Planti man i ting Metro Bilong Mosko i gutpela tru, winim planti narapela stesin long olgeta hap. Ol samting bilong ol tren-stesin, olsem ol rot bilong tren, ol paip, ol waia bilong paua samting, ol i kamapim klia bikpela save moa bilong ol ensinia i bin wokim; na ol man i stailim ol samting bilong stesin, ol i hapman tru long wok bilong ol. Ol dispela stesin i no olsem stesin tasol​—ol i olsem ol gutpela haus i gat nambawan stail tru. Ol i bilasim long ston mabel, granit, ain, ol lait i narapela kain, ol piksa ston, ol piksa ol i wokim long glas i gat kala kala, na sampela samting moa. Ol nambawan man long kantri i gat save long wokim ol haus na penim ol piksa [ol man bilong wokim ol piksa ston tu], ol i bin helpim wok bilong bilasim ol stesin.’

Mi wanbel long dispela tok, long wanem, mi bin go long Mosko na lukim Metro. Planti i bin stap wantaim mi long kibung, ol tu i kirap nogut long en. Wanpela man Jeman i tokim mi olsem: “Taim mi go insait long stesin mi ting mi stap insait long wanpela haus musik i gat ol naispela naispela lait. Mi amamas tru long en.” Wanpela man Amerika i kirap nogut long ol tren i save ran long taim stret, na ples i klin, na ol samting i wok stret. Na wanpela man Saibiria i bin kam long kibung, em i kirap nogut long ol tren-stesin i bikpela tru.

Sapos bihain yu go raun long Mosko, mi laik kirapim yu long i go lukim ol dispela naispela tren-stesin insait long graun. Tingim: ‘Sapos ai bilong yu yet i lukim wanpela samting wanpela taim tasol, dispela i winim ol stori yu harim long en wan handet taim.’

[Piksa Kredit Lain long pes 15]

Sovfoto/Eastfoto

[Ol Piksa long pes 16, 17]

Sampela naispela tren-stesin bilong Mosko

[Kredit Lain]

Photo credits (kirap long han kais antap i go long han sut): Laski/Sipa Press; Sovfoto/Eastfoto; Sovfoto/Eastfoto; Laski/Sipa Press; Laski/Sipa Press; Sovfoto/Eastfoto