Ol Yangpela i Laik Save . . .

Bai Mi Mekim Wanem na Mi No Ken Laikim Moa Dispela Man?

“MI GAT 20 krismas na mi wanpela Witnes Bilong Jehova i baptais pinis. Tasol mi kirap poromanim wanpela man i gat 28 krismas [em man i no bilip]. Mi laikim em na mi ting em i laikim mi. Mi save papamama bai i no amamas, olsem na mi no tokim ol. Taim ol i kisim save, ol i kirap nogut tru na ol i bel hevi. Ol i hatwok long save olsem wanem mi inap laikim wanpela ausaitman.”

Wanpela yangpela meri Kristen, Monique, i bin raitim pas na tok olsem.a Sori tru, wankain samting i painim pinis planti yangpela; ol i kirap laikim o poromanim wanpela i no bilip​—em poroman i no wanbel wantaim ol long ol bilip Kristen na ol lo bilong stretpela pasin. God i no orait long tupela olsem i pren wantaim, na tu, dispela inap bagarapim amamas na bel isi bilong yangpela. Yangpela Ruth i bin kisim save long dispela samting. Em i tok: “Mi bin poromanim wanpela man i no bilip. Tasol mi kisim save olsem, sapos mi laik stap pren bilong Jehova, mi mas lusim dispela man.”

Sapos yu wanpela Kristen, ating yu inap tingim na kolim tok bilong Jems 4:4 long Baibel, em i tok: “Sapos man i laikim pasin bilong graun, em i mekim pasin birua long God. Ating yupela i no save long dispela, a? Olsem na sapos man i laik pren wantaim ol pasin bilong graun, em bai i kamap birua bilong God.” Tasol sapos yu laikim wanpela man i no bilip, ating yu hatwok long bihainim dispela tok. Ating bel bilong yu i hevi tru taim yu save olsem yu mas lusim em, na tingting bilong yu bai bagarap tru. Ating bai yu tok: ‘Bai mi mekim wanem na mi no ken laikim moa dispela man?’

Aposel Pol i tok: “Long tingting bilong mi, mi laikim tumas lo bilong God. Tasol mi lukim narapela lo i stap insait long ol hap bodi bilong mi. Na dispela narapela lo i save pait long lo bilong God i stap long tingting bilong mi. Dispela narapela lo, em i lo bilong sin, na em i wok long kalabusim mi na bosim ol hap bodi bilong mi. O sori, dispela hevi i bagarapim tru tingting bilong mi!” (Rom 7:​22-24) Ating wankain olsem Pol, tingting na bel bilong yu i pait wantaim. Tasol planti yangpela Kristen i winim pinis dispela pait, na i olsem ‘ol i tekewe long paia.’ (Skelim wantaim Jut 23.) Ol i tekewe long paia olsem wanem? Ol i lusim wanpela poroman em ol i save sapos ol i stap pren wantaim, dispela bai nogutim tru ol.

Kisim Sampela Helpim

Tingim Mark: Em i tok, taim em i gat 14 krismas tasol, em i gat “strongpela laik” long wanpela meri i no bilip. Em i wok long haitim tingting bilong em​—em i no askim wanpela long helpim em. Tasol laik bilong em long dispela meri i wok long kamap strong moa. Bihain liklik, Mark i save ringim em long pasin hait. Taim meri i kirap ringim Mark, i no longtaim na papamama bilong em i kisim save long wanem samting i kamap.

Yu no ken popaia olsem, na yu wanpela i wok long stretim hevi, nogat. Sindaun 28:26 i tok: “Sapos man i ting, save bilong em yet inap helpim em long mekim olgeta samting, orait em i no gat gutpela tingting. Tasol sapos man i bihainim pasin bilong gutpela tingting, em bai i stap gut.” Tru tumas, ating dispela hevi i no inap painim yu sapos yu bin tingting gut pastaim, a? Sampela taim i hatwok long tingting stret taim bel na tingting i no stap isi, olsem na i mas i gat wanpela man bilong helpim yumi, em wanpela i tingting klia na em inap skelim gut dispela hevi. Ating papamama inap helpim gut yu​—na sapos ol i lotuim God, ol inap helpim yu moa yet. Ol i save gut long yu, winim ol narapela. Na bipo ol tu i yangpela, olsem na ol inap pilim hevi bilong yu. Long Jop 33:​3, Elihu i tok: “Mi save autim stret olgeta tingting i stap long bel bilong mi.” Olsem wanem? Bai yu autim stret olgeta tingting i stap long bel bilong yu long papamama na askim ol long helpim yu?

Wanpela yangpela, Jim, i bin mekim olsem. Em i gat bikpela laik long wanpela meri wanskul. Em i tok: “Bihain mi askim papamama long helpim mi. Dispela i nambawan samting i bin helpim mi long daunim dispela laik. Papamama i helpim mi tru.” Jim i pilim tru sori na helpim bilong papamama, na em i tok: “Mi ting i gutpela sapos ol narapela yangpela Kristen i toktok gut wantaim papamama bilong ol​—no ken pret. Ol bai pilim tingting bilong yu.”

Narapela yangpela, Andrew, em i gat wankain hevi, tasol em i kisim sampela helpim long narapela rot. Em i bin go long wanpela kibung sekit bilong ol Witnes Bilong Jehova, na em i tok: “Wanpela tok i sutim tru bel bilong mi. Wasman sekit i givim strongpela tok long pasin bilong poromanim man o meri i no Kristen. Mi save mi mas stretim tingting bilong mi kwiktaim.” Olsem na em i mekim wanem? Pastaim em i toktok wantaim mama bilong em, em i stap wanpis, na gutpela tok bilong mama i bin helpim em. Bihain em i go lukim wanpela elda long kongrigesen bilong ol Witnes Bilong Jehova, na em i givim sampela helpim moa long em. Long ol man i gat hevi, ol elda i olsem “ol ples hait ol manmeri i ken i go na hait long en long taim bilong bikpela win na ren.” (Aisaia 32:2) Ating gutpela sapos yu go lukim wanpela elda na kamapim hevi bilong yu long em, a?

Lusim Olgeta

Taim papamama bilong Mark i kisim save olsem em i prenim hait wanpela meri, wantu ol i bel hevi. Mark i tok: “Ol i tokim mi stret mi mas lusim dispela pren. Tasol pastaim mi sakim tok bilong ol. Mipela i tok kros na mi go long rum bilong mi na pasim dua. Bihain liklik, mi skelim gut ol samting, na mi save olsem, tingting bilong mitupela long ol samting mitupela i laik mekim i narapela narapela kain. Mitupela i no inap kamap gutpela poroman tru.” Em nau, sapos yu tingim gut ol samting na yu no giamanim bel bilong yu, dispela inap helpim yu long bosim gut bel. Askim yu yet olsem: ‘Dispela man o meri i wanbel wantaim mi long ol mak mi putim, na ol bilip bilong mi, na ol stretpela lo mi bihainim? Sapos mitupela i marit, em bai helpim mi long lotuim God? Em i givim bel tru long ol samting bilong spirit olsem mi mekim? Mipela inap holim wankain tingting na wok gut wantaim?’​—Skelim wantaim 2 Korin 6:​14-18.

Tasol ating bai yu hatwok liklik long lusim dispela poroman. Monique, bipo yumi stori long em, em i tok: “Tupela taim mi mekim traim long lusim pren bilong mi, tasol mi no inap. Mi no laik lusim em olgeta. Mi autim tok long em, long wanem, mi laik bai em i bilip long Jehova. Na wanpela taim em i kam long miting long Sande. Tasol em i no givim bel liklik long bilip long Jehova. Olsem na mi save mi mas lusim em olgeta.”

Dispela i kirapim yumi long tingim tok bilong Jisas long Matyu 5:30. Em i stori long ol samting em inap pasim yumi long go insait long Kingdom bilong God​—ating ol i bikpela samting tru long yumi, kain olsem han sut bilong yumi. Tasol Jisas i tok: “Yu mas katim na tromoi. Mobeta wanpela hap bodi bilong yu i lus, na yu no mekim sin, na bodi bilong yu olgeta i no i go long [Gehena, NW; olsem pinis olgeta].” Bilong bihainim dispela tok, yu mas strongim bel na “mekim tok tru” long poroman bilong yu. (Efesus 4:25) Long wanpela hap i gat planti man i stap​—nogut yutupela tasol i stap​—yu mas tokim stret poroman bilong yu, yu no laik pren moa wantaim em. Yangpela meri, Sheila, i tok: “Mi kirap mekim sampela samting, na dispela i bin helpim mi. Mi no save sindaun moa wantaim em na kaikai long belo. Na mi no save bung moa wantaim em long taim ol i makim bilong stadi long skul. Mi tokim em stret, mitupela i no ken stap pren moa.” Wanpela meri Kristen, Pam, i bin mekim wankain pasin, na em i tok: “Bihain mi tokim em, em i mas lusim mi olgeta, na mi no save toktok moa wantaim em.”

Daunim Bel Hevi

Bihain long yutupela i bruk, yu inap pilim wankain olsem man bilong raitim Song, em i tok: “Bel bilong mi i gat bikpela hevi tru, na mi bagarap. Long olgeta de mi sori na krai tasol.” (Song 38:6) I no gat rong sapos yu bel hevi inap liklik taim. Baibel i tok, i gat “taim bilong krai.” (Saveman 3:4) Tasol bel hevi i no inap stap oltaim. Bihain em bai pinis. Mark i tok: “Tru mi bin bel hevi inap liklik taim. Papamama bilong mi i save na ol i kirapim mi long bung moa yet wantaim ol narapela yangpela Kristen. Dispela i bin helpim mi tru.” Na Andrew, em tu i bin bel hevi taim em i lusim poroman bilong em, em i tok: “Ol elda i helpim mi. Na tu, mi wok strong moa long autim tok na long pas gut wantaim sampela brata Kristen ol i gutpela pren bilong mi.” Em nau, yu mas wok strong long mekim ol wok bilong spirit. (1 Korin 15:58) Ating sapos yu mekim sampela wok o eksasais, dispela tu inap helpim yu. No ken stap wanpis. (Sindaun 18:1) Wok long tingim ol gutpela samting na ol samting yu ken amamas long en.​—Filipai 4:8.

Na tingim: Jehova bai amamas long yu bin strongim bel na mekim pasin i stret. Em i laik yu mas beten oltaim long em bilong em i ken helpim na strongim yu. (Song 55:22; 65:2) Yangpela Sheila i tok: “Mi bin beten planti taim.” Tru tumas, i hatwok long lusim wanpela poroman, em inap nogutim yu long ol samting bilong spirit. Sheila i tok moa: “Maski mitupela i bruk pinis, sampela taim mi tingim em na mi laik save long wanem samting em i mekim. Tasol mi no inap senisim tingting bilong mi, long wanem, mi save mi amamasim Jehova.”

[Ol Futnot]

[Piksa long pes 13]

Tokim poroman stret, yutupela i no ken stap pren moa