Ples Bilong Bikpela Mani

Wanpela man long Guam i raitim dispela stori bilong Kirap!

OL AILAN bilong Yap i stap long solwara Pasifik. Ol i naispela ples tru na ol i no hat o kol tumas na ol i gutpela ples we ol man i painim ples bilong malolo ol i ken kam long ol dispela ailan. Tasol ol man i kam raun long dispela ailan ol i save kirap nogut long lukim ol manmeri i larim mani bilong ol i stap nating arere long rot. Na ol dispela mani i bikpela tru!

Long olgeta hap bilong ailan bai yu lukim ol raunpela ston i stap long fran bilong ol haus na arere long ol rot. Long tok ples bilong ol Yap ol i save kolim ol dispela ston olsem rai, na ol i mani bilong ol asples. Tru, sampela manmeri i larim ol ston mani bilong ol i stap long banis bilong ol yet, tasol planti narapela i putim long ol hap i olsem beng bilong ol. Long ol dispela hap i no gat ol sekiuriti na ol wokman bilong beng long helpim ol man. Ating yu no lukim wanpela haus long dispela hap em mani i stap long en. Ol i no haitim ol dispela mani, ol mani i stap ples klia long dispela ples. Ol i sanap klostu long ol diwai kokonas na ol banis, na olgeta mani i gat hul namel long ol. Braitpela bilong sampela i olsem 4 mita na hevi bilong ol inap winim 5 ton.

Long hap yu stap long en, yu inap karim ol koin bilong yu long poket, tasol long Yap ol koin i bikpela tru, ol i no inap fit insait long wanpela ka. Long 1931 na i kam inap nau ol i no moa wokim dispela ston mani. Tasol ol i mekim wok yet long en olsem mani long ol dispela ailan. Olsem wanem ol i bin kirap mekim wok long dispela narapela kain mani?

Hatwok Long Kisim

Wanpela stori bilong ol tumbuna long bipo i tok, sampela lain bilong Yap i go long ailan Palau na ol i kisim sampela naispela ston. Ol i kisim ol dispela ston i go bek long Yap, na ol manmeri long Yap i kirap yusim ol dispela ston olsem mani bilong ol. Ol i kirap katim ol ston i go kamap raunpela olsem mun na ol i wokim hul long namel bilong ol ston.

Ol lain bilong Yap i bin skelim gut wanem kain ston ol bai kisim. Ol i laikim tupela ston em nau ol i save kolim aragonite na calcite. Aragonite em samting i stap insait long graun na long ol pel tu, na calcite em wanpela hap bilong ston mabol. Taim ol man i katim gut dispela tupela ston, ol i luk nais tru, tasol dispela tupela ston i no stap long Yap. Olsem na ol lain bilong Yap i bin go long Palau bilong kisim ol dispela ston. Palau i stap longwe inap 400 kilomita long saut-wes bilong Yap, olsem na bilong i go long Palau ol i mas raun long kanu inap 5-pela de long solwara.

Taim ol i kamap long Palau, pastaim ol i kisim tok orait long hetman bilong Palau na bihain ol i go katim ol ston. Ol i save mekim wok long tul bilong ples long katim ol ston i stap aninit long graun na sapim i go kamap raunpela. Bilong kisim wanpela mani, ol i save hamarim na sapim ston inap sampela mun na sampela taim inap sampela yia!

Ol i save wokim hul namel long ol ston bambai ol i ken putim ol pos diwai i go insait na karim ol i go long nambis. Orait taim ol i kisim i go daun pinis long nambis, ol i save putim long ol kanu o long ol bet ol i wokim long mambu. Bilong kisim wanpela bikpela ston i go, ol i save sanapim ston long solwara na ol i save wokim wanpela bikpela bet i raunim ston. Ol i apim sel, na pul strong tru, na pulim dispela bet i gat ston long en i go bek long Yap.

Ol i mekim dispela olgeta wok long han tasol, na bagarap inap painim ol. Yes, planti ol i kisim bagarap o ol i dai taim ol i wok long katim ol ston na taim ol i kisim ol ston long ples ol i katim na i go long nambis. Na taim ol i raun long kanu i go bek long Yap ol inap kisim bagarap tu. Yu inap lukim ol ston mani i stap long as bilong solwara long hap bilong Yap na Palau, na dispela i kamapim klia olsem i no olgeta mani na ol man i kisim ston long Palau i bin go kamap gut long Yap. Tasol dispela mani i stap long as bilong solwara i bilong wanpela man long Yap. Ol dispela ston mani i gat strong yet bilong baim ol samting wankain olsem ol ston mani i stap long Yap.

Hamas Pe Bilong En?

Taim wanpela man i salim sampela samting na narapela man i baim long ston rai bilong em, orait dispela man i salim samting bai i no inap kisim rai i go long narapela hap, em bai larim ston i stap long wankain hap. Planti bilong ol dispela ston mani i bin stap long wanpela hap tasol inap planti yia na ol i stap longwe long papa bilong ol. I hatwok long stilim ol ston mani.

Sapos wanpela stilman i gat laik long stilim wanpela ston mani, orait em i mas i gat bikpela strong inap long em i ken karim dispela ston i go na em i no ken wari long ol man bai ting olsem wanem long em. Tasol i hatwok long em i mekim olsem, long wanem, ol neiba i save long papa bilong olgeta wan wan ston mani, na ol i save tingim gut ol samting bilong ol narapela man.

Olsem wanem yu ken save long strong bilong wanpela ston mani long baim ol samting? Pastaim yu mas lukim sais bilong en, na em i naispela na ol i bin sapim gut o nogat. Orait nau yu skelim wanem taim ol i bin kisim dispela ston. Em i bin stap hamas yia? Ol i bin hatwok tru long katim na sapim? Taim ol i kisim i kam long Yap, klostu sampela man i bin dai o lusim laip bilong ol? Man i kamap papa bilong dispela ston em i gat wanem kain namba? Ston mani bilong hetman bilong ples i gat bikpela pe winim bilong ol man nating.

Long 1960, taim wanpela beng bilong narapela kantri i baim wanpela ston mani em i longpela winim 1 mita, ol man long ol narapela hap i kisim save long em i bin stap hamas yia. Ol i bin mekim wok long en kirap long 1880 samting. Ol i bin yusim dispela ston bilong baim ol man i bin wokim wanpela haus. Narapela taim wanpela lain i givim dispela ston i go long ol lain bilong narapela ples long ol i bin mekim wanpela gutpela danis. Na bihain wanpela man i bin givim long narapela man bilong kisim kapa bilong haus. Tasol taim ol man i mekim ol dispela samting, ol i no bin kisim dispela ston i go long narapela hap, nogat, em i stap tasol long wankain hap, na ol i no bin raitim stori bilong ol dispela samting. Ol i mekim olsem, long wanem, olgeta man long Yap i save long husat i papa bilong dispela ston na ol man i bin yusim dispela ston bilong mekim wanem wok long bipo.

Bikpela Sais i No Makim Olsem Bikpela Pe

Planti handet yia i go pinis taim ol i kirap mekim wok long rai, i no gat planti ston mani na pe bilong en i antap tru, olsem na ol hetman tasol inap holim ol dispela ston. Orait long yia 1890 samting, i gat ol tul ol i wokim long ain na ol kago sip, olsem na i no hatwok long ol i katim ol ston na kisim planti i go long Yap, na ol bikpela ston tu. Ol nupela ston ol i kisim i go bek ol i bikpela winim ol ston bilong pastaim, tasol ol i no gat bikpela pe, long wanem, ol man i no bin bihainim pasin bilong ples long katim ol dispela ston.

Long 1929 ol i kaunim ol ston na ol i painimaut olsem i gat 13,281 i stap​—winim ol manmeri i stap long ol ailan! Dispela i senis taim Wol Woa 2 i kamap. Ol ami i kisim planti bilong ol dispela ston na sampela ol i brukim bilong wokim ples balus na ol strongpela banis. Inap olsem 50 pesen tasol bilong ol ston i stap. Orait bihain ol man bilong bungim bungim ol samting ol i kam na kisim sampela ston i go. Long nau, gavman bilong Yap i makim ol ston i stap yet olsem samting bilong ples na ol i lukautim.

Yap em i no ples i gat planti mani. Tasol ol manmeri bilong Yap i save larim mani bilong ol i stap ples klia long rot we olgeta man i ken lukim!

[Ol Mep long pes 14]

(Bilong save ol dispela rait i stap we long pes, lukim buk o magasin)

Japan

SOLWARA PASIFIK

Filipins

Saipan

Guam

Yap

Palau

[Kredit Lain]

Globe: Mountain High Maps® Copyright © 1997 Digital Wisdom, Inc.

[Piksa long pes 15]

“Beng” bilong ston mani

[Piksa long pes 16]

Hevi bilong sampela mani long Yap i winim 5 ton