Ripot long Wok Bilong Kingdom
Ol Misineri Long Brasil i Amamas Long Bung Gen Wantaim
Long dispela taim i gat 67 misineri bilong Skul Giliat ol i wok i stap long Brasil, na 63 ol i kam bung wantaim long brens-ofis na yu inap lukim ol long dispela piksa. Ol i bung long Novemba 18, 1986, taim A. D. Schroeder bilong Lain Bilong Bosim Ol Witnes em i kam lukim brens. Lain Bilong Bosim Ol Witnes i stap long Bruklin, Nu Yok.
Inap olsem 41 yia bipo, olsem long Novemba 17, 1945, tupela misineri bilong namba wan klas bilong Skul Giliat i bin kam long Brasil. Wanpela, em Charles Leathco (em i sanap long baksait, long namel, long han kais) em i amamas long i kam bung wantaim Brata na Sista Schroeder, long wanem taim em i go long Skul Giliat, Sista Charlotte Schroeder em i wanpela wanskul bilong em, na Brata Schroeder em i wanpela tisa bilong ol.
Tupela misineri bilong namba wan klas i kam long Brasil na bihain 258 misineri i bin i kam wok long Brasil. Inap olsem 16 ol i bilong Brasil. Wanpela, em Augusto Machado (em i stap long namba wan lain i sindaun paslain, long han kais) em i kisim save long tok i tru long wanpela misineri bilong pastaim, na em i go long Skul Giliat, na bihain ol i salim em i kam bek long Brasil. Em i bin mekim wok long brens-ofis inap 30 yia pinis na nau em i kodineta bilong Komiti Bilong Brens. Planti misineri i no mekim wok misineri moa, tasol gutpela wok ol i bin mekim i stap yet. Long 1945 i gat 344 man bilong autim tok bilong kingdom ol i stap long Brasil; tasol nau dispela lain i go bikpela na i laik winim 200,000. Long yia bilong wok bilong 1986, long wanpela mun bikpela lain tru ol i autim tok, winim olgeta narapela mun—inap olsem 196,948 ol i autim tok.
Ol misineri long Brasil, ol yangpela wantaim ol lapun, ol i amamas long bung gen wantaim na stori long ol gutpela wok i bin kamap insait long dispela 41 yia i go pinis.