Olsem Wanem Long Lotu na Ol Bilip Giaman?

LONG Sarere Jun 11, 1983, ol man i stap long Ailan Java long Indonesia ol i ran i go insait long ol haus bilong ol na ol i wok long pasim ol dua na windo na ol hul. Bilong wanem ol i mekim olsem? Long wanem, san i laik karamap na hait na go tudak, na ol man i ting tewel bilong en bai go insait long haus bilong ol na ol bai kisim bagarap.

Na long ol kantri i stap rabis ol i gat sampela kain bilip olsem, na ol i givim bel long en olsem ol i mekim samting bilong lotu. Olsem na long sampela hap bilong Afrika ol man i no save wokabaut long 12 klok belo, long wanem ol i ting “ol bai kamap longlong.” Na ol i tambuim ol pikinini bilong ol long kaikai kiau, nogut pikinini “i kamap stilman.” Ol papamama i no save kolim hamas pikinini bilong ol, “nogut sanguma i harim ol i hamas na sanguma i kisim sampela.”−Buk African Primal Religions.

Ol lain bilong hap bilong Wes ol i save lap long ol dispela kain pasin na ol i tok, ol bilip giaman na stori bilong ol tumbuna i as bilong ol dispela pasin na em pasin haiden. Tasol i no pasin bilong ol haiden tasol. Dokta Wayland Hand i tok, ol lain i stap long olgeta hap bilong graun ol i save bihainim sampela bilip giaman olsem. Dokta Hand na wanwok bilong em, Dokta Tally, tupela i raitim pinis wan milion kain bilip giaman olsem bilong ol Amerika.

Sampela man, em ol i tok ol i Kristen, ol i laik kisim save long ol samting bai painim ol long bihain, na ol i save skelim ol sta. Sampela taim ol hetman bilong lotu i orait long ol man i mekim ol dispela pasin na bihainim ol dispela bilip giaman. Long Janueri 10, 1982, bikpela man bilong lotu Grik Otodoks bilong Is, nem bilong em Vasilios, em i bosim bung bilong Misa long bikpela de bilong lotu ol i kolim Epifeni. Wanpela nius (New York Post) i stori long dispela samting na i tok, ol i bung ausait na Vasilios i tromoi wanpela kruse gol i go insait long Wara Is na em i tokim ol man, sapos wanpela i laik kalap i go daun insait long wara na kisim bek dispela kruse, ol gutpela samting bai painim dispela man inap long olgeta taim bihain.

Olsem wanem? Bilip bilong ol Kristen i wankain long ol dispela kain pasin na bilip? Wanpela man bilong raitim ol buk em i tok, ol man i lusim bilip, em ol i save bihainim pasin bilong ol tumbuna na ol bilip giaman. Olsem na lotu Kristen i mas traim stretim tingting kranki bilong ol man i bihainim ol dispela kain pasin na bilip giaman, a?

Lotu—Em i Save Daunim Pret Ol Bilip Giaman i Kamapim?

Lotu i tru em inap mekim, na long taim bilong ol aposel bilong Krais em i save mekim. Ol Kristen bilong pastaim ol i stap namel long ol manmeri i bihainim ol bilip giaman bilong ol Rom, tasol ol i givim baksait long ol dispela bilip. Tasol bihain long taim ol aposel i dai pinis, ol tok bilong lotu giaman na ol bilip giaman i wok long kam insait long ol kongrigesen. (1 Timoti 4:​1, 7; Aposel 20:30) Na sampela man insait long kongrigesen Kristen ol i kirap na ol i laik antap long ol narapela na bosim ol, ol i kamap olsem ol pris na pasto. Wanpela buk (A History of the Christian Church) i tok, ol dispela pris na pasto i orait long ol man i lukluk long ol sta bambai ol i ken save long ol samting bai kamap bihain, na ol i orait long ol i bihainim ol narapela bilip giaman. Bihain moa ol i tok, ol dispela bilip na pasin em i bilip na pasin bilong Kristen.

Na olsem wanem long nau? Long nau tu ol misin i no gat tok long ol dispela kain pasin na bilip. Long Suriname ol man i tok ol i Kristen na tumbuna bilong ol i bilong Afrika, ol i save putim paspas long han bilong ol bilong sakim ol spirit nogut. Wanpela man i tok, ‘long olgeta taim ol i pret i stap; taim ol i kaikai o wok o slip, ol i pret long ol spirit nogut.’ Na planti milion man bilong olgeta hap ol i save pret long tewel bilong ol man i dai pinis. Na ol misin i strongim ol dispela bilip giaman bilong ol.

Yumi ken tingim samting i bin kamap long Ailan Madagaska long hap bilong Afrika. Ol lotu i tok ol i Kristen, ol i salim ol misineri bilong ol i go long dispela hap na lainim ol man long bilip bilong ol dispela misin. Tasol ol dispela man i no laik lusim ol bilip giaman bilong ol. Orait, ol misin i mekim wanem long dispela samting? Wanpela nius (Daily Nation) bilong Kenya i tok, ol misin i no strong long ol man i mas lusim olpela bilip bilong ol; ol misin i no gat tok long ol man i bihainim yet ol bilip giaman na stori bilong ol tumbuna. Olsem na long nau planti man long Madagaska i tok ol i Kristen, tasol ol i pret long tewel bilong ol tumbuna i dai pinis! Ol i save singautim pris o pasto i kam na blesim bun bilong ol tumbuna, na bihain ol i bekim gen ol dispela bun i go bek long matmat. I olsem ol misin i helpim dispela tok giaman olsem sapos yumi bihainim ol pasin ol bilip giaman na stori bilong ol tumbuna i as bilong en, yumi inap singautim o grisim God o Seten o ol tumbuna i dai pinis long givim sampela samting long yumi o helpim yumi.

Na i wankain long Saut Afrika tu. Bikpela hap lain bilong Saut Afrika (inap 77 pesen) ol i tok ol i Kristen, tasol ol dispela planti milion man ol i bihainim yet tingting bilong ol tumbuna haiden. Ol i save pret long ol tewel bilong ol tumbuna i dai pinis. Ol i save go long lotu long ol misin, tasol dispela i bilong ai tasol; long bel bilong ol ol i bilip yet long ol bilip giaman na stori bilong ol tumbuna.

Tasol lotu i tru i save rausim dispela bilip kranki long tingting bilong man, na bai em i no pret moa. Olsem wanem lotu i tru i helpim man long stretim tingting bilong em? Lotu i tru i givim stretpela save long man. Save long wanem samting? Na man i mas mekim wanem bilong kisim dispela save?