Babilon−As Bilong Lotu Giaman

“EM I bagarap! Babilon i bagarap pinis, na em i brukim pinis olgeta imis bilong ol god bilong Babilon!” Aisaia i tok profet hia long taun Babilon bilong bipo. Em i wanem kain taun? Yumi mas save long dispela bambai yu ken save gut long dispela Bikpela Babilon bilong nau.−Aisaia 21:​9, NW.

Taun Babilon bilong bipo em i gat ol god man na god meri bilong ol haiden. Profesa S. H. Hooke i raitim stori long wanpela buk (Babylonian and Assyrian Religion) na em i tok: ‘Long taun Babilon god Maduk i stap namba wan long ol narapela god ol man i save lotuim. . . . Long taim bilong Nebukatnesa Namba 2 i gat 58 haus lotu bilong ol god, na i gat planti haus lotu moa tu ol i stap. Olsem na yumi ken save, ol pris i holim bikpela namba long mekim wok bilong ol namel long ol man bilong dispela bikpela taun.’ Sampela man i tok, haus lotu bilong Maduk long Babilon em i gat 55 liklik rum lotu long arere bilong en. Long nau tu ol haus lotu i gat sampela ol rum long arere bilong en em i bilong lotuim ol namba 2 god na ol santu na Maria samting!

Taun Babilon i as ples bilong lotuim ol god giaman. Sampela man i tok, ol pris na ol man i givim bel long lotu ol i mekim gut long ol imis na piksa bilong ol god giaman, na ol i ting ol dispela samting i olsem ol namelman bilong helpim ol man long lotuim ol god; ol i bin bilasim ol dispela imis long ol gutpela laplap na bis na paspas na ring, na ol i slipim long ol gutpela bet, na sampela taim ol i kamautim na karim raun long ol hap, na ol i putim long karis na bot na ol i raun.a Long nau tu ol lotu i mekim wankain pasin! Long nau tu ol i lotuim ol god giaman na imis na piksa na santu na Maria long ol lotu bilong Hindu na Buda na Katolik, na long nau tu ol i karim raun ol god giaman bilong ol long ol rot na taun na wara na solwara, wankain olsem ol i bin mekim long Babilon long bipo!

Na yumi ken skelim narapela samting tu bilong Babilon bilong bipo wantaim ol lotu bilong nau na yumi ken save i wankain. Dispela buk ensaiklopedia i stori long god meri bilong ol Babilon na i tok: ‘Ol man i lotu long em ol i litimapim nem bilong em na ol i kolim em bikpela meri, na mama bilong marimari, na mama bilong harim beten, na mama bilong helpim yumi na bringim tok long God, na mama bilong givim laip long ol samting na long ol man.’ Na yumi ken skelim ol dispela tok wantaim wanpela beten bilong El Santo Rosario (Roseri Holi o Santu Korona), em i olsem: ‘O Bikpela Kwin, yu save sori long mipela na long olgeta de yu helpim mipela long planti samting, na mipela tenkyu long yu; o Bikpela Meri, yu mas sori long mipela na larim mipela i stap aninit long yu long nau na long olgeta taim bihain na bai yu ken lukautim mipela.’

Ol i beten long husat? Planti man bai tok, “Long Virgo Maria.” Dispela tok i stret liklik. Ol i save beten olsem long Maria. Tasol buk Las Grandes Religiones Ilustradas i tok, dispela tok paslain long dispela beten hia em i stori long Ista, em “Bikpela meri bilong maritpasin,” na em i god meri bilong pasin bilong kamapim ol pikinini, na bilong maritpasin, na bilong pait. Long sampela piksa bilong em ‘em i holim pikinini man i stap long susu bilong em.’b Dispela i narapela samting i makim ol lotu bilong nau i wankain olsem bilong Babilon bilong bipo.’

Na i gat sampela ol narapela samting bilong olpela Babilon em i wankain olsem ol samting bilong ol lotu bilong nau, olsem: Ol Babilon i bin tok man i gat tewel, na ol i bilip long god triwan, Na ol lotu bilong nau i tok ol man i gat tewel, na ol i bilip long god triwan. Yumi tingim ol dispela samting na yumi save, dispela nem Bikpela Babilon em i makim stret olgeta lotu giaman wantaim, em Seten i bosim.

Babilon i Hambak na Birua long Lotu i Tru

Na Babilon i bin birua tu long lain Isrel bilong bipo, em lain bilong Jehova. Ol Babilon i rabisim trupela lotu bilong ol, na long yia 607 paslain long Jisas, ol Babilon i bagarapim haus lotu long Jerusalem na ol i kisim ol gutpela plet dis samting i bilong wokim lotu bilong Jehova. Na bihain, taim Belsasa i wokim bikpela kaikai, ol i mekim wok nogut long ol dispela samting holi bilong Jehova.−Danyel 5:​3, 4.

Na long nau tu Bikpela Babilon i no malolo long mekim nogut long lotu i tru. Ol pasto i save kirapim ol man long mekim nogut long ol Witnes Bilong Jehova, na planti taim ol i pren wantaim ol man bilong politik na kirapim ol long putim hevi long ol Witnes.

Ol i bin mekim olsem long 1917, na planti taim moa. Long 1917 ol Witnes i wokim wanpela buk (The Finished Mystery) na ol misin long Kanada na Amerika i lukim sampela hap tok long en na ol i giaman na i tok, buk hia i mekim tok birua long kantri. Long dispela taim Kanada na Amerika i stap long pait. Orait, ol dispela misin i tokim gavman long tok bilong dispela buk, na gavman i bilipim tok bilong ol, na nau gavman i mekim nogut long ol Witnes. Profesa Martin Marty i raitim stori bilong dispela long wanpela buk (Modern American Religion−The Irony of It All) na em i tok: ‘Ol misin i birua long Witnes, na taim kot i makim 20 yia kalabus bilong ol Witnes, ol misin i amamas.’

Tasol sampela mun bihain kot i senisim tok na ol i tok, ol Witnes i no gat rong. Nau ol misin i mekim wanem? Buk hia i tok, ‘ol i no amamas long dispela.’ Ol Witnes tasol i holimpas lo bilong Baibel, ‘na dispela i mekim gavman i kros long lotu bilong ol.’ Long bipo na i kam inap long nau i no gat wanpela taim ol Witnes i bin pren wantaim ol bikpela man bilong politik o wok wantaim ol. Taim Hitler i bosim Jemani ol i no mekim, na taim ol Fasis i bosim Itali na Spen na Potyugal, ol i no bin mekim.

Babilon i Kisim Nogut

Olsem na Revelesen i tok stret taim em i tok, Bikpela Babilon “i bin kilim i dai ol manmeri bilong God na ol man i bilip long Jisas na i autim nem bilong em. Na mi lukim dispela meri em i dringim blut bilong ol na i kamap longlong,” na “God i lukim dispela taun i gat asua bilong kilim i dai ol profet na ol manmeri bilong em. Na olgeta man long graun ol birua i bin kilim ol i dai, asua bilong dispela tu em i stap long Babilon tasol.” Long bipo na i kam inap nau ol lotu i bin insait long ol pait o i orait long ol pait, na ol i bin putim hevi long ol Kristen tru.−Revelesen 17:6; 18:⁠24.

Bikpela Babilon, em olgeta lotu giaman wantaim, inap longtaim em i bin amamas long ol samting bilong skin na long holim bikpela namba na strong. Tasol wanpela ensel i toksave long Jon na i tok, taim i laik kamap na bai dispela bikpela pamukmeri i pinis. Baibel i tok: “Em i singaut strong tru, i tok: ‘Bikpela taun Babilon em i bagarap pinis! Em i bagarap pinis! Nau em i kamap ples bilong ol spirit nogut ol i stap long en. Ol spirit nogut, na ol pisin doti, na ol pisin nogut tru, ol tu i stap long en.’ ”−Revelesen 18:⁠2.

Wanem taim bai Babilon i bagarap? O em i bagarap pinis, o nogat? Em i bagarap olsem wanem? Bagarap bilong em bai mekim sampela samting long yu, o nogat? Bai yumi toktok long ol dispela samting long narapela Wastaua bilong bihain.

[Ol Futnot]

[Ol Piksa long pes 8, 9]

Lotu bilong ol Babilon bilong bipo em i as bilong Bikpela Babilon