Kisim Save Long Olgeta Tok i Tru!
WANPELA man nem bilong em Fransisko i tok: “Mi no bin lukim dispela nem long Baibel bilong mi.” Em i toktok wantaim wanpela Witnes Bilong Jehova na ol i toktok long dispela nem Jehova. Tru, em i no inap lukim nem bilong God long Baibel bilong em, em wanpela Baibel ol i bin wokim long 1969 (Baibel Almeida long tok Potugal), long wanem nem bilong Jehova i no i stap. Fransisko em i bilong Brasil na em i wanpela Katolik, em i go long Misa long olgeta Sande na em i save amamas long kaunim Baibel long haus bilong em. Tasol em i laik save long dispela nem Jehova.
God Em i Husat?
Long wik antap, dispela Witnes i kisim wankain Baibel i kam, tasol ol i bin wokim long 1966. Tupela i skelim tok long Buk Song 83:18 long dispela Baibel bilong 1966 na 1969 na ol i lukim wanem samting? Baibel bilong 1966 i tok olsem: “Yu wanpela tasol, nem bilong yu em JEHOVA, yu God Antap Tru, yu save bosim olgeta hap bilong graun”! Tasol long Baibel bilong 1969, ol i putim “BIKPELA,” ol i no putim “JEHOVA” long dispela ves. Witnes i tok: “Lukim, ol i senisim wanpela samting long dispela ves.” Na em i askim Fransisko: “ ‘Bikpela’ i no wanpela nem tru, a?” Fransisko i tok: “Tru.” Em i kros liklik na em i tok: “Olsem wanem na ol i mekim olsem?”
Dispela i kirapim tingting bilong em na em i laik kisim sampela save moa long nem bilong God. Olsem: Fransisko i lukim wanpela bikpela buk bilong Katolik (The Catholic Encyclopedia bilong yia 1910) i tok: “Jehova em i nem tru bilong God long Olpela Testamen.” Em i kisim sampela save moa olsem: Long “Olpela Testamen,” em bikpela hap tok bilong en ol i bin raitim long tok Hibru, dispela nem i stap inap olsem 7,000 taim. I no stret long wanpela man bilong tanim tok i ken senisim nem tru bilong Jehova na raitim Bikpela. Fransisko i laik kisim stretpela save long dispela nem Jehova, na em i bin kisim dispela save long rot bilong Baibel yet, na i gat wanpela man i bin helpim em long kisim dispela save.
Jisas Em i God, o Nogat?
Long tok i kamap paslain long dispela, yumi bin stori olsem ol lotu bilong dispela graun i senisim o paulim planti tok i tru. Taim ol Witnes Bilong Jehova i go long haus bilong ol man na autim tok, ol inap kisim save long bilip bilong ol man. Tru, bilip bilong ol man bilong narapela narapela ples i no wankain, tasol sampela bilip i wankain. Olsem: Sapos yu askim wanpela man olsem ‘God em i husat?’ sampela man bai tok, ‘Jisas.’ Taim ol i bekim tok olsem, ol i laik tok Jisas em i God I Gat Olgeta Strong. Tasol dispela tok i tru o nogat?
Tingim dispela ol samting: Jisas i beten long Papa bilong em, na em i tok, “Laip bilong i stap gut oltaim, em i olsem: Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) Jisas i tok, Papa bilong em long heven em ‘wanpela tasol em i God tru,’ a? Em i no tok, em yet i God tru. Olsem na i stret ol disaipel bilong Jisas i tokim Jisas: “Tru tumas, yu Pikinini Bilong God.” Jisas yet i tok: “Mi Pikinini Bilong God.” Olsem na stori tru bilong Jisas i olsem, em i no God Antap Tru, em i Pikinini bilong God Jehova.—Matyu 14:33; Jon 10:36.
Wanem Samting Bai Painim Dispela Graun?
Wanem samting bai painim ol manmeri bilong dispela taim nau na dispela graun? Wanpela man, bipo em i stap presiden bilong Amerika, em John F. Kennedy, em i mekim wanpela tok long bikpela kibung bilong Yunaitet Nesen, na em i tok: “Yumi gat strong bilong helpim ol man bilong nau long i kamap gutpela, winim ol man i stap long bipo, o yumi gat strong bilong pinisim ol.” Ol bikman bilong graun long nau i gat wankain tingting. Taim ol Witnes Bilong Jehova i autim tok, planti taim ol i save harim ol man i tok, ol i bilip olsem paia o pait nuklia bai pinisim dispela graun. Bilong strongim dispela bilip sampela i kamapim tok bilong Kamapim Tok Hait 21:1, em i tok: “Mi lukim nupela skai na nupela graun i stap. Namba wan skai na namba wan graun i go pinis olgeta. Na solwara i no i stap moa.”
Planti taim Baibel i kolim dispela tok “graun” bilong makim ol manmeri i stap long graun. Olsem: Long 2 Pita 3:7 Baibel i tok: “Graun i wetim de bilong bikpela kot i kamap.” Long Kamapim Tok Hait 21:1 Baibel i tok, “namba wan graun i go pinis,” dispela i makim olsem ol man nogut bai pinis; i no makim olsem dispela graun yumi stap long en bai pinis. Long dispela rot bai paradais inap kamap gen long dispela graun. (Luk 23:43; 2 Tesalonaika 1:6-9; Kamapim Tok Hait 21:4) Na dispela tok i stret wantaim olgeta narapela tok bilong Baibel, em i tok klia olsem dispela graun yumi stap long en i no ken pinis. Olsem Buk Song 104:5 i tok: “Yu bin putim dispela graun i stap long ples bilong en, na graun i stap strong olgeta. Em i no inap surik liklik. Nogat tru.” (Skelim Saveman 1:4.) Tru tumas, Jehova i wokim graun “bilong olgeta samting i ken i stap long en” inap oltaim oltaim.—Aisaia 45:18.
Bilong Wanem Yumi Mas Kisim Gut Olgeta Tok i Tru?
Ol dispela tok yumi stori pinis long en i kamapim ol bilip giaman bilong planti man long nau. Tasol taim ol Witnes Bilong Jehova i autim tok na wanpela man i laik harim na skelim ol tok olsem Fransisko i bin mekim, ol Witnes i amamas, long wanem nau rot i op long ol bilong toktok wantaim man long tok i tru bilong Baibel.
Sapos yumi no kisim save long olgeta tok i tru, yumi inap lus long sampela gutpela samting. Olsem: Taim Jisas i stap long graun planti man i ting olsem Jisas em i wanpela man nating, olsem wanpela pikinini bilong Maria na Josep, na bipo em i wanpela kamda long Nasaret. Olsem na ol i no putim gut yau long tok bilong em. Tru, Jisas em i pikinini bilong Maria, em spirit holi i bin kamapim em long bel bilong Maria, na Josep em i waspapa bilong em, na tru em i bin mekim wok kamda. (Mak 6:3) Tasol olsem wanem? Dispela em olgeta stori tru bilong Jisas? Nogat! Em hap stori tasol, long wanem Jisas em i wanpela bikpela Man—em i dispela man God i salim i kam bilong kisim bek ol man, na bihain bai em i kamap “King bilong olgeta king”! (Kamapim Tok Hait 17:14; Luk 1:32-35; Aposel 2:36) Planti man ol i kisim save long hap stori tasol bilong Jisas, olsem na ol i lus long kisim wanpela gutpela samting ol i no inap kisim gen, em olsem: Amamas bilong i stap gutpela pren bilong Jisas taim em i stap long graun.
Wok Strong long Painim Olgeta Tok i Tru
Ol man bilong kaunim Baibel ol i save gut long taun Beria (nau ol i kolim Veroia) long provins Masedonia long bipo, long wanem ol man bilong dispela taun i bihainim gutpela pasin. Ol i bihainim wanem gutpela pasin? Long Aposel 17:11, Baibel i tok: “Ol i harim tok bilong Pol, na ol i laikim tru. Na long olgeta de ol i save ritim na skelim tok i stap long buk bilong God, bilong ol i ken save, tok bilong Pol em tru, o nogat.” Ol i mekim olsem na wanem samting i bin kamap? Aposel 17 Ves 12 i tok: “Planti manmeri bilong ol Juda i bilip. Na planti Grik i gat nem, ol tu i bilip, ol man na meri wantaim.”
Ol profet bilong God long bipo, ol tu “i bin wok strong long painim as bilong dispela tok bilong God i kisim bek yumi” long rot bilong dispela man God i salim i kam. (1 Pita 1:10) God i blesim hatwok bilong ol. I gat wanpela rot tasol bilong kisim save long olgeta tok i tru i stap long Baibel em olsem: Yu mas wok strong long painim painim ol dispela tok na skelim gut.
Ating yu bai ting olsem, ‘Bai mi kirap mekim olsem wanem?’ Wanpela meri i stap long Brasil em i kaunim sampela nius Kristen, na bihain em i tok: “Kwiktaim mitupela [em wantaim man bilong em] i save mipela mas kisim sampela save moa olsem, bilong bekim ol planti askim bilong mipela. . . . Olsem wanem mipela ken kisim wanpela Baibel na ol narapela buk bilong helpim mipela long save moa long Papa bilong yumi long heven?” Em i bihainim stretpela rot bilong kisim dispela save, em olsem: Em i mas kaunim Baibel wantaim ol buk bilong Baibel i kamapim tok i tru. Sapos yu tu yu laik kisim save long olgeta tok i tru, orait kamapim laik bilong yu long God Jehova na askim em long helpim yu. Na tingim dispela tok em inap strongim bel bilong yumi: “Sapos wanpela man namel long yupela em i sot long gutpela tingting, orait em i mas beten long God i givim tingting long em, na bai God i givim em. God i save givim planti samting long olgeta man, na em i no save tok kros long man i askim em. Tasol dispela man i mas bilip tru na i beten long God. Em i no ken lusim bilip liklik na i ting olsem, ‘ating God bai i givim dispela long mi, o nogat?’ ”—Jems 1:5, 6.
Planti milion manmeri i save toktok wantaim ol Witnes Bilong Jehova long ol tok bilong Baibel, na ol i wok strong long painim na skelim gut ol tok bambai ol i ken save long tok i tru. Sapos yu kisim dispela stretpela save long God na Krais Jisas, na yu bihainim, bai yu inap kisim laip i stap oltaim. (Jon 17:3) Yu inap kisim dispela gutpela samting sapos yu wok strong long painim olgeta tok i tru na yu kisim save long en.
[Piksa long pes 7]
Stori tru tru bilong Jisas i olsem: Em i man God i salim i kam; em i no kamda tasol