Ol Kristen na Ol Lain Bilong Graun Long Nau
“Bai ol i . . . givim pen na hevi long yupela, . . . na . . . bai ol i bel nogut tru long yupela, long wanem, nem bilong mi em i stap long yupela.”—MATYU 24:9.
OL KRISTEN bilong pastaim i bin stap narapela kain long ol man bilong dispela graun. Taim Jisas i beten long Papa Jehova long heven em i tok long ol disaipel olsem: “Tok bilong yu, mi givim pinis long ol. Na ol manmeri bilong dispela graun ol i save birua long ol, long wanem, ol . . . i no bilong dispela graun, olsem mi tu mi no bilong dispela graun.” (Jon 17:14) Taim ol i bringim Jisas i go long Pontius Pailat Jisas i tok: “Kingdom bilong mi em i no bilong dispela graun.” (Jon 18:36) Nupela Testamen wantaim ol man bilong raitim stori bilong ol samting i bin kamap bipo ol i tok klia olsem lotu Kristen bilong pastaim i no insait long ol wok bilong dispela graun.
2 Olsem wanem? Bihain Jisas i bin tok, senis bai kamap long i stap bilong lain bilong em wantaim ol lain bilong dispela graun, na ol man bilong graun bai tanim bel na kamap Kristen na long dispela rot Kingdom bai kamap? Nogat. Na taim Jisas i dai pinis, God i no bin kirapim lain bilong em long raitim kain tok olsem long Baibel. (Jems 4:4 [em i raitim paslain liklik long yia 62]; 1 Jon 2:15-17; 5:19 [em i raitim long yia 98 samting]) Baibel i tok, Jisas bai kamap king long taim em i “kam bek” na em “i kam wantaim bikpela strong” na pasin bilong dispela graun “i laik pinis” na “las de i kamap.” (Matyu 24:3, 14, 29, 30; Daniel 2:44; 7:13, 14) Jisas i bin kolim mak bilong taim em i kam pinis na stap, olsem taim bilong pa·rou·siʹa bilong em. Em i tokim lain tru bilong em olsem: “Long dispela taim bai ol i kisim yupela bilong givim pen na hevi long yupela, na bai ol i kilim yupela i dai. Na olgeta lain manmeri bai ol i bel nogut tru long yupela, long wanem, nem bilong mi em i stap long yupela.”—Matyu 24:9.
Ol Kristen Tru Bilong Nau
3 Wanem lain lotu bilong nau ol i gat nem long bihainim stret ol lo Kristen na ol i stap narapela kain long ol man bilong dispela graun na ol man i mekim nogut long ol? Wanem lain Kristen i stap long olgeta hap na i wankain olsem ol Kristen bilong pastaim, olsem ol buk i stori long ol? Wanpela bikpela buk (New Catholic Encyclopedia) i tok: ‘Ol man i bin ting lain Kristen bilong pastaim ol i man nating tasol na ol i bin bruk tasol long lain Juda; tasol bilip bilong ol i narapela kain long ol narapela bilip, na ol i strong long bihainim, na ol i autim tok bilong Krais long olgeta hap bilong Judia na Samaria na i go inap long olgeta hap bilong graun (Aposel 1:8).’—Volyum 3, pes 694.
4 Buk i tok, ol man i bin ting ol Kristen bilong pastaim i ‘man nating tasol’ na bilip bilong ol ‘i narapela kain’ na ‘ol i strong long bihainim.’ Na nau buk i stori long ol Witnes Bilong Jehova long nau, na i tok: ‘Ol i bilip strong olsem klostu nau pasin bilong dispela graun bai pinis, na dispela bilip i kirapim ol long givim bel long autim tok bilong Jehova na tokim ol man long Kingdom bai kam. Ol tok bilong Baibel tasol i as bilong bilip bilong ol na pasin ol i bihainim. Bilong i stap Witnes tru ol i mas mekim gutpela wok bilong autim tok.’—Volyum 7, pes 864-865.
5 Olsem wanem ol bilip bilong ol Witnes Bilong Jehova i narapela kain? Dispela buk (New Catholic Encyclopedia) i kolim sampela olsem: ‘Ol i tok, God Triwan i giaman na i bilong ol haiden, na Jisas i nambawan Witnes Bilong Jehova, na em i “wanpela god” (Jon 1:1), na em i stap aninit long Jehova tasol, na taim em i stap man long graun em i bin dai na em i kirap gen olsem spirit, na em i Pikinini bilong Jehova na em i no inap i dai moa. Pen na dai bilong em i olsem pe bilong kisim bek ol man na bai ol i ken i stap laip oltaim long graun; na “planti manmeri tru” (KTH 7:9) bilong ol trupela Witnes bai stap long Paradais long graun, na 144,000 tasol (KTH 7:4; 14:1, 4) bai stap wantaim Krais long heven. Ol man nogut bai bagarap; ol Witnes i save baptais na i go insait long wara, na i bilong makim olsem ol i dediket long God Jehova long mekim wok bilong em; ol i no save kisim blut, na ol i gat strongpela lo long ol samting bilong marit na long i stap tambu long mekim maritpasin sapos i no stret ol i mekim.’ Tru, ating ol Witnes Bilong Jehova tasol i bihainim ol dispela samting, tasol as bilong en em ol tok bilong Baibel.—Song 37:29; Matyu 3:16; 6:10; Aposel 15:28, 29; Rom 6:23; 1 Korin 6:9, 10; 8:6; KTH 1:5.
6 Dispela buk (New Catholic Encyclopedia) i bilong Misin Katolik, na i tok, long 1965 (ating ol i bin raitim dispela tok long dispela taim) ‘ol Witnes i no ting ol i insait long ol wok na tingting na pasin bilong ol man bilong graun long hap ol i sindaun long en.’ Ating man i bin raitim dispela tok em i ting, taim lain Witnes i go bikpela na ol i kamap olsem wanpela bikpela lotu na i no olsem wanpela liklik lain nating, ol bai insait long pasin bilong dispela graun. Tasol long nau ol Witnes Bilong Jehova i kamap bikpela moa, winim 4 milion, na ol i no insait long pasin bilong dispela graun, nogat. Ol i stap narapela kain yet, olsem ol Kristen tru bilong pastaim. “Ol i no bilong dispela graun,” olsem Jisas tu “i no bilong dispela graun.”—Jon 17:16.
Ol i Stap Narapela Tasol Ol i No Birua
7 Long wanpela buk (Early Christianity and Society) Robert M. Grant i kamapim tok bilong Jastin Matir bilong bipo, em i man bilong helpim bilip bilong ol Kristen. Em i tok: ‘Sapos ol Kristen i laik pait na daunim gavman, ol bai wok hait, tasol king i bin amamas long ol, long wanem, ol i stap isi tasol na bihainim lo.’ Na ol Witnes Bilong Jehova long nau tu i stap olsem. Ol i gat nem olsem ol man i save stap isi na bihainim lo na tok bilong gavman. Ol gavman i save, ol i no ken pret long ol Witnes bai kamapim sampela pait samting na putim hevi long gavman, nogat.
8 Wanpela man bilong Not Amerika i raitim tok olsem: ‘Sapos man i ting ol Witnes Bilong Jehova i laik kirapim pait bilong daunim gavman, dispela man em i longlong; ol i no inap mekim olsem na bai gavman i mas tingting planti long ol. Ol i no man bilong pait, nogat tru; ol i save sindaun gut na i stap isi tasol.’ Long wanpela buk (L’objection de conscience) Jean-Pierre Cattelain i tok: ‘Ol Witnes i save daun tru long gavman na bihainim ol lo. Ol i save tromoi takis, na ol i no gat tok long ol wok bilong gavman, na ol i no gat tingting long pait wantaim gavman, long wanem, ol i no insait long ol wok samting bilong dispela graun. Tasol sapos gavman i tok ol i mas givim laip bilong ol long gavman tasol, ol i no save mekim olsem, long wanem, ol i givim pinis laip bilong ol long God.’ Ol i kain olsem ol Kristen bilong bipo.—Mak 12:17; Aposel 5:29.
Ol Gavman i No Bin Save Gut Long Ol
9 Planti king bilong Rom i no bin save gut long ol Kristen long bipo, na ol i mekim nogut long ol. Wanpela buk bilong bipo (The Epistle to Diognetus) i kamapim as bilong dispela na i tok: ‘Ol Kristen i stap namel long ol man bilong graun, tasol ol i stap narapela kain.’ Tasol long Namba 2 Bung Bilong Vatiken ol i wokim Konstityusen bilong Sios na i tok, ‘taim ol Katolik i laik painim kingdom bilong God, ol i mas insait long ol wok bilong graun na wok long helpim ol man bilong graun long kamap holi.’
10 Saveman E. G. Hardy i tok, ol king bilong Rom i bin ting ol Kristen bilong bipo ‘i pipia lain tasol na ol i givim bel long samting i no gat as bilong en.’ Na saveman Étienne Trocmé bilong Frans em tu i tok, ‘ol bikman bilong Grik na Rom i bin tingim ol Kristen i olsem pipia lain bilong hap bilong Is na pasin bilong ol i narapela kain.’ Plini Namba 2 bilong Bitinia em i holim wok gavman bilong Rom, na em wantaim King Trajan i bin raitim pas i go i kam, na ol pas i kamapim klia olsem ol i no bin save gut long lotu Kristen. Na i olsem tu long nau, ol gavman i no save gut long ol Witnes Bilong Jehova, na ol i nolaik tru long ol. Tasol ol Witnes i no save kirap nogut long dispela samting.—Aposel 4:13; 1 Pita 4:12, 13.
‘Ol i Toknogutim Dispela Lain’
11 Ol man i no bin laikim ol Kristen bilong bipo, na Baibel i tok: “Long olgeta ples, ol manmeri i save mekim tok nogut long dispela nupela lain i bin kamap namel long yumi.” (Aposel 28:22) Long yia 150 samting, haidenman Selsus i bin tok, ol Kristen i olsem ol pipia lain long ai bilong ol narapela man. Na nau ol man i save tok, ol rabisman tasol i save kamap Witnes Bilong Jehova. Augustus Neander i bin raitim stori bilong ol samting bilong lotu na i tok: ‘Ol Kristen bilong bipo i stap nating tasol olsem man i dai pinis, na ol i no mekim sampela gutpela wok bilong helpim ol man, na ol man i tok, sapos olgeta man i stap olsem, ol samting bai bagarap.’ Na ol Witnes bilong nau ol i no insait liklik long ol wok bilong politik, olsem na ol man i tok, ol i olsem han bilong diwai i drai pinis na ol i no mekim sampela samting bilong helpim wok bilong graun, na i no gat wok long ol i mas i stap. Tasol ol i no inap helpim wok politik, long wanem, ol i helpim wok bilong Kingdom bilong God, na ol i tokaut olsem dispela Kingdom tasol inap stretim ol hevi, na ol wok politik nogat. Ol Witnes i bilipim tok bilong aposel Pol, em i tok: “Yu mas i stap gutpela soldia bilong Krais Jisas na karim hevi bilong dispela wok . . . Yu save long pasin bilong ol soldia. Taim ol i mekim wok soldia, ol i no save holim ol arapela kain wok wantaim. Nogat. Ol i save mekim gutpela wok soldia tasol.”—2 Timoti 2:3, 4.
12 Long wanpela buk (A History of Christianity) Profesa K. S. Latourette i tok: ‘Ol Grik na Rom i bin bel nogut long ol Kristen, long wanem, ol Kristen i no laik helpim ol long taim bilong pait. Long olgeta stori ol i bin raitim kirap long taim bilong Jisas na i go inap 300 yia bihain na ol i stap yet long nau, i no gat wanpela stori i tok ol Kristen i bin insait long wanpela pait.’ Na long narapela buk (The History of the Decline and Fall of the Roman Empire) Edward Gibbon i tok: ‘Ol Kristen i no inap mekim wok soldia o wok majistret o wok king, long wanem, ol i stap pinis long wok i holi moa.’ Na ol Witnes Bilong Jehova tu i stap olsem. Ol i no save go insait long ol pait. Ol i bihainim tok bilong Aisaia 2:2-4 na Matyu 26:52.
13 Ol birua i tok, ol Witnes i mekim ol famili i bruk. Tru, sapos wanpela bilong famili em i laik kamap Witnes Bilong Jehova, na ol narapela i no laik bai em i mekim olsem, nau famili i no stap wanbel. Tasol Jisas i tok dispela samting bai kamap. (Luk 12:51-53) Na dispela i no as na planti marit i bruk. Long Frans, long olgeta 3-pela 3-pela marit, i gat wanpela em man o meri i no Witnes, tasol i no planti i katim marit, long wanem, aposel Pol na aposel Pita i bin givim strongpela tok bilong God long ol Kristen i marit long ol poroman i no bilip, na ol Witnes Bilong Jehova i wok strong long bihainim dispela tok. (1 Korin 7:12-16; 1 Pita 3:1-4) Sapos kain marit olsem i bruk, klostu olgeta taim em poroman i no Witnes em i laik katim marit. Tasol planti tausen bilong dispela kain marit i no bruk, long wanem, narapela i tanim bel na nau em tu i kamap Witnes na bihainim ol tok bilong Baibel.
Kristen i No Bilip Long God Triwan
14 Ol Rom i bin tok, ol Kristen i no save bilip long God. Augustus Neander i tok long buk bilong em: ‘Ol man i bin sutim tok long ol Kristen na i tok, ol i haiden na ol i no bilip long ol god.’ Ol dispela Kristen i save lotu long Bikpela God tru, em Man i bin wokim olgeta samting, na ol i no save lotuim ol god giaman, tasol ol dispela haiden yet i bin lotu long ol samting em “ol man yet i bin kisim ol diwai na ston na i wokim.”—Aisaia 37:19.
15 Na long nau tu i wankain. Sampela bikman insait long ol lain i gat nem Kristen ol i tok, ol Witnes Bilong Jehova i no Kristen tru, long wanem, ol i no save lotu long God Triwan. Ol misin i tok, ‘Kristen em i man bilong bilip olsem Krais em i God.’ Tasol wanpela buk dikseneri i kolim stret husat i Kristen tru, na i tok, “Kristen em i man bilong bilip long Krais Jisas na i bihainim ol tok bilong em,” na “lotu Kristen i wanpela lotu em tok bilong Krais Jisas i as bilong en, na ol i bilip olsem em i pikinini bilong God.” Orait, wanem lain tasol i bilip olsem dispela buk dikseneri i tok?
16 Ol Witnes Bilong Jehova i bilipim tok bilong Jisas yet, em i bin tok: “Mi Pikinini Bilong God.” (Jon 10:36; lukim tu Jon 20:31.) Ol Witnes i bilipim tok bilong aposel Pol, em God i bin kirapim em long tokaut stret olsem Krais em i husat tru, na wanpela Baibel (The New Jerusalem Bible) i kolim stret dispela tok olsem: “Em i kain olsem God, tasol em i no bin tingting long kamap wankain stret olsem God yet.” (Filipai 2:6) Wanpela buk (The Paganism in Our Christianity) i tok: ‘Jisas i no bin tok em i hap bilong wanpela God Triwan, na long Nupela Testamen i no gat dispela tok God Triwan. Misin i kamapim dispela tok 300 yia bihain long taim Bikpela bilong yumi i dai. Ol haiden i as bilong dispela bilip long God Triwan.’ Ol Witnes Bilong Jehova i save bilip long ol tok bilong Baibel long ol samting bilong Krais. Ol i Kristen—ol i no bilip long God Triwan.
Klia Long Ol Narapela Lotu
17 Ol i sutim tupela tok moa long ol Witnes Bilong Jehova, olsem: Ol i tok, ol Witnes Bilong Jehova i no save bung wantaim ol narapela lotu long ol samting bilong lotu, na ol i strong long subim ol man long kam insait long lotu bilong ol. Ol man bilong bipo i bin sutim wankain tok long ol Kristen bilong pastaim. Misin Katolik, na Misin Otodoks, na Misin Talatala, ol i insait tru long ol wok bilong dispela graun, tasol ol Witnes Bilong Jehova i olsem Jisas na ol i no insait long ol samting “bilong dispela graun.” (Jon 17:14) Olsem na ol i no inap tru long wok wantaim ol narapela lotu i lainim ol man long ol pasin na bilip i no stret wantaim lotu Kristen tru.
18 Husat inap sutim tok long ol Witnes Bilong Jehova na tok, ol i gat rong long wanem ol i wankain olsem ol Kristen bilong pastaim na ol i bilip olsem lotu bilong ol tasol i trupela lotu? I no gat wanpela man inap tok olsem, nogat tru. Misin Katolik i save tok, ol i wok wantaim ol narapela lotu, tasol ol i gat tupela maus, long wanem, ol i tok tu olsem: ‘Mipela Katolik i bilip olsem Misin Katolik tasol i trupela lotu, na lain aposel i as bilong dispela lotu, na Bikpela Jisas i givim wok long mipela tasol long bringim dispela lotu i go long olgeta man taim em i tokim ol aposel olsem, “go mekim olgeta lain manmeri i kamap disaipel bilong mi.” ’ (Vatican Council II, “Declaration on Religious Liberty”) Tasol i olsem dispela kain bilip i no inap kirapim ol Katolik long givim bel long i go mekim ol man i kamap disaipel.
19 Tasol ol Witnes Bilong Jehova i givim bel tru long mekim dispela wok. Ol i gat strongpela laik long autim tok i go i go inap long mak God yet i laikim. (Matyu 24:14) Ol i strong long mekim dispela wok bilong autim tok, tasol ol i no save subim ol man, nogat. Ol i sori long ol, na dispela i as na ol i givim bel long autim tok long ol. Ol i no laik bai sampela man i lus. Ol i laik bai planti manmeri ol i ken tanim bel na bai ol i ken i stap laip na no ken bagarap. (1 Timoti 4:16) Olsem ol Kristen bilong pastaim, ol Witnes tu i stap olsem Pol i tok: “Yupela yet i no ken tingting long kros na pait. Oltaim yupela i mas painim rot bilong i stap wanbel wantaim olgeta man.” (Rom 12:18) Long narapela stori i kamap bihain long dispela bai yumi stadi long olsem wanem ol i save mekim ol dispela samting yumi bin kolim hia.
Bilong Tingim Gen
◻ Ol Kristen bilong pastaim i narapela kain olsem wanem? Olsem wanem ol Witnes i wankain olsem ol?
◻ Olsem wanem ol Witnes i kamapim klia olsem ol i save stap gut aninit long gavman?
◻ Ol bikman bilong bipo i bin ting olsem wanem long ol Kristen? Olsem wanem long nau?
◻ Ol Witnes i bilip olsem ol i holim tok i tru, na dispela i kirapim ol long mekim wanem?
[Askim Bilong Stadi]
1. Wanem mak bilong lotu Kristen bilong pastaim?
2. (a) Bihain, taim lotu Kristen i go bikpela, lain bilong Jisas i mas senis na kamap wankain olsem ol man bilong graun, o nogat? (b) Kingdom bilong Jisas i mas kamap long taim ol man bilong graun i tanim bel pastaim, o nogat?
3, 4. (a) Wanpela bikpela buk bilong ol Katolik i tok wanem long ol Kristen bilong pastaim? (b) Dispela buk i tok, wanem samting bilong ol Kristen bilong pastaim i wankain olsem ol Witnes bilong nau?
5. (a) Olsem wanem bilip bilong ol Witnes Bilong Jehova i narapela kain? (b) Kolim sampela bilip bilong ol Witnes i kamapim klia olsem bilip bilong ol i stret wantaim tok bilong Baibel.
6. Witnes Bilong Jehova i strong yet long holim wanem kain pasin? Bilong wanem ol i mekim olsem?
7, 8. Olsem wanem ol Witnes Bilong Jehova i wankain olsem ol Kristen bilong bipo?
9. Kolim wanpela bikpela samting bilong ol Kristen bilong bipo i narapela kain long ol Katolik bilong nau?
10. (a) Ol gavman bilong bipo i bin ting olsem wanem long ol Kristen? (b) Ol bikman bilong graun i ting olsem wanem long ol Witnes Bilong Jehova long nau? Ol Witnes i ting olsem wanem long dispela samting?
11. (a) Ol man bilong bipo i bin tok wanem long ol Kristen bilong bipo? Ol man bilong nau i tok wanem long ol Witnes Bilong Jehova? (b) Bilong wanem ol Witnes Bilong Jehova i no insait long ol samting bilong politik?
12. Wanem narapela samting bilong ol Witnes em i wankain olsem ol Kristen bilong pastaim?
13. Ol birua i sutim wanem tok long ol Witnes? Tasol olsem wanem long marit bilong ol Witnes?
14. Ol man i bin sutim wanem tok long ol Kristen bilong bipo? Tasol ol dispela man yet i bin mekim wanem?
15, 16. (a) Sampela man bilong lotu i save tok wanem long ol Witnes Bilong Jehova? Tasol yumi gat wanem askim long dispela samting? (b) Olsem wanem yumi ken save ol Witnes Bilong Jehova i Kristen tru?
17. Bilong wanem ol Witnes i no wok wantaim ol narapela lotu long ol samting bilong lotu?
18. (a) Ol Witnes i ting ol tasol i bihainim trupela lotu, na bilong wanem ol narapela lain i no ken sutim tok long ol long dispela samting? (b) Ol Katolik i bilip olsem lotu bilong ol i trupela lotu, tasol dispela bilip i no kirapim ol long mekim wanem?
19. (a) Ol Witnes i gat strongpela laik long mekim wanem? Wanem as na ol i laik mekim olsem? (b) Long narapela stori bihain, bai yumi toktok long wanem samting?
[Piksa long pes 12]
Ol Witnes Bilong Jehova i gat strongpela laik long autim tok i go inap long God i ting em inap
[Piksa long pes 17]
Pailat i tok: “Lukim. Em hia dispela man”—em i no bilong dispela graun.—Jon 19:5
[Kredit Lain]
“Ecce Homo” by A. Ciseri: Florence, Galleria d’Arte Moderna / Alinari/Art Resource, N.Y.