Olsem Wanem Ol Misin i Bin Kamap Samting Bilong Dispela Graun
LOTU Kristen i bin kirap long taim gavman bilong Rom i bosim planti kantri, tasol bihain dispela gavman i pundaun, na planti saveman i tok, long dispela taim lotu Kristen i daunim lotu haiden na i kamap strong. Tasol wanpela bisop Angliken, em E. W. Barnes, i tok: ‘Taim dispela gavman wantaim ol bikpela save samting bilong dispela graun i pundaun, lotu Kristen tu i no stap moa olsem gutpela lotu em Jisas i bin kirapim; nau em i olsem samting bilong bungim ol lain man i bruk nabaut na bai ol i ken pas wantaim gen.’—The Rise of Christianity.
Tasol inap sampela handet yia bihain long taim bilong Jisas, ol man i tok ol i Kristen ol i stap narapela kain na ol i no bihainim pasin na tingting bilong ol Rom. Tasol ol i wok long kisim sampela bilip na pasin bilong lotu i no wankain olsem lotu Kristen tru, olsem Jisas na ol aposel i tok pinis ol bai mekim. (Matyu 13:36-43; Aposel 20:29, 30; 2 Tesalonaika 2:3-12; 2 Timoti 2:16-18; 2 Pita 2:1-3, 10-22) Bihain ol i no sakim moa pasin na bilip bilong ol Grik na Rom, na nau ol i kisim pasin bilong ol dispela lain (olsem ol bung na amamas bilong makim ol bikpela de bilong ol, na lotuim god-mama, na god triwan), na bilip bilong ol (olsem man i gat tewel), na pasin bilong bosim lotu (olsem lain pris pasto). Nau lotu Kristen giaman i kamap, na ol haiden i laikim na ol i kam insait, na ol king bilong Rom i wok long pinisim, tasol ol i no inap, olsem na ol i orait long en na ol i ting em bai helpim wok bilong ol.
Pasin Bilong Graun i Daunim
Augustus Neander i stori long ol misin na i tok, taim lotu “Kristen” i pren wantaim ol lain bilong graun, em inap bagarap. Em i tok, ‘sapos lain Kristen i no stap narapela kain long ol man bilong graun, ol i no inap i stap gutpela moa olsem bilong pastaim, na maski ol i ting ol i helpim ol man long tanim bel, ol man bilong graun bai bungim pasin na laik bilong ol yet wantaim lotu na nau lotu i no gat strong moa na i olsem lotu Kristen tru i dai pinis.’—General History of the Christian Religion and Church, Volyum 2, pes 161.
Dispela samting i bin kamap. Bihain liklik long yia 300, king bilong Rom, em Konstantin, em i mekim wok long dispela lotu Kristen giaman na bai em i ken strongim gavman bilong em i laik bagarap. Em i no tambuim moa ol man i gat nem Kristen, na ol namba samting em ol pris haiden i holim, em i larim ol pris bilong misin tu i mekim. Wanpela buk (The New Encyclopædia Britannica) i tok: ‘Konstantin i mekim na bai ol Kristen i no stap narapela kain moa long ol man bilong graun; ol i kamap wankain na ol i holim ol wok bilong graun na helpim ol haiden long kam insait long dispela lotu.’
Lotu Em Gavman i Stiaim
King Julian i kamap bihain long Konstantin (yia 361-363), na em i laik mekim dai lotu Kristen na kamapim bek lotu haiden, tasol em i no inap, na 20 yia bihain king Teodosius i stap na em i tambuim lotu haiden na em i tok, ol man i mas bilip long God Triwan na bihainim lotu “Kristen,” em lotu bilong gavman bilong Rom. Saveman Henri Marrou bilong Frans i tok: ‘Taim wok king bilong Teodosius i pinis, lotu “Kristen,” olsem lotu Katolik, i stap olsem lotu bilong olgeta hap em gavman bilong Rom i bosim.’ Nau lotu Kristen tru i dai pinis, na lotu Katolik i stap olsem lotu “bilong dispela graun.” Em i narapela kain tru long lotu em Jisas i bin kirapim, na em i tokim lain bilong em: “Yupela i no man bilong dispela graun.”—Jon 15:19.
Louis Rougier, em wanpela saveman bilong Frans, em i tok: ‘Taim lotu Katolik i wok long kisim ol kantri, lotu Kristen i wok long senis senis, na bihain em i kamap narapela kain tru. Bipo em lotu bilong ol rabisman, na lain bilong en i mas givim kontribusen na bai em i ken mekim wok bilong en, tasol nau em i kamap strong na daunim ol narapela lotu, na taim em i no inap bosim gavman, em i wok wantaim gavman.’
Bihain liklik long yia 400, Ogastin bilong lotu Katolik i raitim stori (The City of God) long tupela taun, ‘wanpela em taun bilong God na wanpela em taun bilong ol man bilong graun.’ Tasol stori bilong em i no tok, ol Katolik i narapela kain long ol man bilong graun, nogat. Profesa Latourette i tok: ‘Ogastin i save, taun bilong graun na taun bilong heven i wok wantaim.’ Ogastin i bin lainim ol man olsem: ‘Kingdom bilong God i kirap pinis long graun taim misin [Katolik] i kirap.’ (The New Encyclopædia Britannica, Macropædia, Volyum 4, pes 506) Tok bilong Ogastin i makim olsem Misin Katolik i insait tru long ol wok politik bilong dispela graun.
Gavman i Bruk
Teodosius i dai long yia 395 na gavman bilong Rom i bruk i go tupela hap, em gavman bilong Is o Bisantin, na gavman bilong Wes. Biktaun bilong Is em Konstantinopel (bipo em Bisantiam, na nau em Istanbul). Na biktaun bilong Wes em Ravena long Itali (bihain long yia 402). Nau ol misin i bruk long ol samting bilong politik na ol samting bilong lotu. Long hap bilong Is, misin i bihainim tingting bilong Yusibius bilong Sisaria (em i stap long taim bilong Konstantin). Yusibius i no bihainim lo bilong ol Kristen i tok, no ken bungim lotu wantaim ol samting bilong politik. Em i ting, sapos king wantaim olgeta hap em i bosim i kamap Kristen, Misin na Gavman bai pas wantaim olsem wanpela lain Kristen, na king bai stap olsem maus bilong God long graun. Ol lotu Otodoks i bin bihainim dispela tingting (olsem lotu na politik i mas pas wantaim) inap planti handet yia. Long wanpela buk (The Orthodox Church) bisop bilong Misin Otodoks, em Timothy Ware, i tok: ‘Pasin bilong litimapim kantri na gavman bilong ol, dispela i olsem wanpela hevi bilong Misin Otodoks inap 1,000 yia.’
Long hap bilong Wes, ol Jeman i daunim laspela king bilong Rom long 476, na nau bikpela gavman bilong Rom long Wes i pinis. Wanpela buk (The New Encyclopædia Britannica) i tok: ‘Long dispela taim wanpela nupela strongpela samting i kamap, em Misin bilong Rom, em misin bilong bisop bilong Rom. Dispela misin i ting em i senis bilong olpela gavman bilong Rom i bin pinis.’ Na buk i tok: ‘Ol pop bilong Rom i kirap long bosim lotu na gavman bilong ol man, na ol i tok ol i holim tupela bainat wantaim, na Krais i givim wok long ol long bosim lotu long ol samting bilong spirit, na bosim ol gavman long ol samting bilong graun.’
Ol Misin Talatala
Kirap long yia 500 samting na i go inap long yia 1400 samting, Misin Otodoks na Misin Katolik i bin insait tru long ol wok politik na ol pait na ol wok bilong graun. Na olsem wanem long taim ol lain i kirap na bruk long Misin Katolik na ol lotu Talatala i kirap bihain long yia 1500? Ol dispela lotu i kirap na bihainim gen lotu Kristen tru na i stap narapela kain long ol man bilong dispela graun, o nogat?
Nogat. Buk hia (The New Encyclopædia Britannica) i tok: ‘Sampela bikman bilong ol lotu Talatala, olsem Luter, na Kalvin, na sampela bilong ol Angliken, ol i holimpas bilip bilong Ogastin long misin wantaim gavman i mas pas wantaim. Long dispela taim bipo i gat 3-pela bikpela lain Talatala i stap, na gavman bilong kantri Saksoni (long Jemani) na Inglan na Swiselan i helpim ol, olsem gavman i bin mekim long misin bilong bipo.’
Taim ol misin Talatala i kamap, dispela i no helpim ol misin long kirap bihainim stret ol lo na pasin bilong lotu Kristen tru, nogat. Ol i stap olsem yet, na planti ol misin moa i kamap, na ol i grisim ol gavman na helpim ol long taim bilong pait. Misin Katolik na Misin Talatala yet i bin kirapim sampela pait bilong lotu. Long wanpela buk (An Historian’s Approach to Religion) Arnold Toynbee i stori long dispela samting na em i tok: ‘Ol Katolik na Talatala long Frans na Netelan na Jemani na Aialan ol i mekim ol pait nogut, na narapela lain i laik daunim narapela lain; na ol lain bilong lotu Talatala tu i mekim olsem long Inglan na Skotlan; narapela i laik bagarapim narapela.’ Na long nau tu ol misin i insait long ol samting bilong politik na ol i pait, olsem nau ol i mekim long Aialan na long hap bilong Yugoslavia, na dispela i brukim ol man na ol i no inap i stap wanbel wantaim. Olsem na yumi save, Misin Katolik, na Misin Otodoks, na ol Misin Talatala ol i insait tru long ol wok politik bilong dispela graun.
Orait, yumi laik save, long nau i gat lotu Kristen tru i stap na i no insait long ol wok bilong graun na wok politik samting? Stori i kam bihain long dispela bai toktok long dispela samting.
[Blok/Piksa long pes 10, 11]
OLSEM WANEM MISIN I KAMAP LOTU BILONG KANTRI
LOTU KRISTEN i no samting bilong ol man bilong dispela graun. (Matyu 24:3, 9; Jon 17:16) Tasol ol stori i tok, 300 yia samting bihain long Krais, lotu Kristen i bin kamap lotu bilong Rom. Dispela i kamap olsem wanem?
Long taim bilong Niro (yia 54-68) na i go inap 250 yia samting bihain ol king bilong Rom i bin mekim nogut long ol Kristen o ol i larim ol narapela man i mekim. King Galienus (yia 253-268) i putim tok long ol man i no ken mekim nogut moa long ol. Tasol tambu i stap yet long lotu Kristen. Bihain long Galienus, ol i mekim nogut yet long ol Kristen, na long taim bilong Diokletian (yia 284-305) na ol king i kamap bihain long em, bikpela hevi na pen moa i painim ol Kristen.
Senis i kamap bihain liklik long yia 300, em taim bilong King Konstantin bilong Rom. Ol i tok, em i bin “tanim bel” na kamap “Kristen” na nau em i bilong “lotu Kristen.” Wanpela buk (New Catholic Encyclopedia) i tok: ‘Konstantin i tok em i Kristen, tasol em i kisim baptais taim em i slip long bet na i laik dai; kisim baptais pinis, na nau em i dai.’ Long yia 313 em wantaim Laisinius, em helpim bilong em, ol i pinisim tambu i stap long lotu Kristen, na buk i tok, dispela em bikpela senis tru i painim lotu Kristen.
Tasol wanpela buk (The New Encyclopædia Britannica) i tok: ‘Konstantin i no makim lotu Kristen i stap lotu bilong kantri Rom.’ Saveman Jean-Rémy Palanque bilong Frans i tok: ‘Konstantin i kisim lotu Kristen, tasol lotu haiden i stap olsem lotu bilong Rom, na em i larim ol i stap olsem.’ Profesa Ernest Barker (The Legacy of Rome) i tok: ‘Konstantin i bin kamapim laik bilong em, tasol lotu Kristen i no kamap olsem lotu bilong ol Rom. Em i orait tasol long lotu Kristen i stap olsem wanpela lotu bilong sampela Rom. Inap 70 yia moa ol Rom i bihainim yet olpela lotu bilong ol haiden.’
Tasol long dispela taim lotu Kristen i stap olsem wanpela lotu em gavman bilong Rom i orait long en. Tasol yumi laik save, wanem taim lotu Kristen i kamap olsem nambawan lotu bilong kantri Rom? Wanpela buk (New Catholic Encyclopedia) i tok: ‘Ol bikman bilong Rom ol i bihainim yet pasin bilong Konstantin, tasol Julian nogat [yia 361-363]; em i putim planti hevi long lotu Kristen, i go inap long em i kisim bagarap. Bihain moa Bikpela Teodosius [yia 379-395] i stap nambawan bilong gavman bilong Rom, na em i makim lotu Kristen tasol i mas i stap olsem lotu bilong Rom, na em i daunim lotu haiden.’
Wanpela saveman bilong Baibel, em F. J. Foakes Jackson, em tu i bin tok olsem. Em i man bilong raitim stori bilong ol samting i bin kamap bipo, na em i tok: ‘Konstantin i bin orait long lotu Kristen i stap long Rom. Na Teodosius i mekim na lotu Kristen i pas wantaim gavman, na nau ol man bilong lotu Katolik i mas bilip long God Triwan, olsem Papa na Pikinini na Spiritu Santu i bikpela wantaim. Nambawan bilong gavman i strong ol i mas bihainim dispela lo, na nau lotu Katolik tasol i kamap lotu tru bilong Rom.’
Jean-Rémy Palanque i tok: ‘Teodosius i bin sakim ol lotu haiden, tasol em i bin wok long helpim lotu Katolik long kamap strong. Long yia 380 em i putim lo olsem ol man i stap aninit long em ol i mas bihainim bilip bilong Pop Damasus na long bisop bilong Aleksandria na ol i mas daun long tupela na ol i no ken bihainim narapela lotu, nogat. Ol i mas i stap Katolik tasol. Olsem na nau ol man i no fri moa long ol samting bilong lotu. Nau ol i mas bihainim tok bilong ol dispela bikman, na ol dispela bikman i subim ol long bilip long lotu Katolik tasol, maski ol i laik o ol i no laik. Na long bikpela Bung bilong Konstantinopel (yia 381) ol i tambuim ol narapela lotu na i tokim ol bisop long mekim olsem. Nau lotu Kristen [bilong God Triwan] i stap tru olsem lotu bilong kantri Rom. Misin i pas wantaim gavman na narapela i helpim narapela.’
Olsem na dispela lotu i kamap olsem lotu bilong Rom long bipo, em i no gutpela lotu Kristen olsem bilong taim bilong ol aposel. Nogat tru. Em i lotu Katolik bilong God Triwan em King Teodosius Namba I i bin subim ol man long bihainim, na em i lotu bilong Misin Katolik, na em i samting bilong dispela graun tasol.
[Kredit Lain]
Emperor Theodosius I Real Academia de la Historia, Madrid (Foto Oronoz)
[Piksa Kredit Lain long pes 8]
Scala/Art Resource, N.Y.