Long Pasin Sori Lukautim Ol Gutpela Sipsip Bilong Jehova
OL ELDA i putim gut yau long tok bilong aposel Pol. Ol i bin lusim Efesus na wokabaut inap 50 kilomita bilong i kam long Miletus na harim ol tok Pol i laik givim long ol. Nau ol i bel hevi tru long harim olsem ol i no inap lukim em moa. Olsem na ol i save, ol tok nau Pol i laik givim long ol i bikpela samting tru. Em i tokim ol: “Yupela i mas was gut long yupela yet, na long olgeta manmeri long sios bilong God, em ol dispela manmeri em i bin baim long blut bilong Pikinini bilong em yet. Na Holi Spirit i makim yupela i stap wasman bilong ol dispela sipsip bilong God.”—Aposel 20:25, 28, 38.
Ating ol dispela elda bilong Efesus i pilim tru dispela tok bilong Pol long mekim wok wasman. Ol i save long wok ol man i save mekim bilong was long ol sipsip tru long hap bilong Efesus. Na ol i save long ol tok bilong Olpela Testamen i gat planti stori long ol wasman bilong sipsip. Na ol i save long tok bilong Jehova, em i tok em i olsem Wasman bilong lain bilong em.—Aisaia 40:10, 11.
Pol i tokim ol dispela elda ol i mas “was gut” long lain “sipsip” bilong God, em ol i stap “wasman” bilong ol. Ol i mas lukautim gut lain bilong God olsem wasman bilong sipsip i save lukautim gut lain sipsip bilong em na em i sori long ol.
Long nau i no planti elda i save long wok bilong lukautim ol sipsip tru. Tasol planti taim Baibel i save toktok long ol sipsip tru na ol wasman tru bilong sipsip, na sampela taim Baibel i mekim tok piksa long en. Olsem na tok bilong Pol i stret long dispela taim bipo na long nau tu. Na yumi ken lainim planti samting long stori bilong ol wasman bilong sipsip long bipo em God i amamas long ol. Gutpela pasin na wok bilong ol inap helpim ol elda bilong nau na bai ol i ken save ol i mas i gat wanem kain pasin bambai ol i ken mekim pasin sori na lukautim gut lain bilong God.
Devit, Strongpela Wasman Bilong Sipsip
Taim yumi tingim ol wasman bilong sipsip long taim bilong Baibel, yumi save tingim Devit, long wanem, pastaim em i wanpela wasman bilong sipsip. Sapos yumi save long stori bilong Devit, bai yumi save, wok bilong was long ol sipsip i no wanpela wok i gat nem. Taim profet Samuel i laik makim wanpela pikinini man bilong Jesi long kamap king bilong Israel bihain, pastaim ol i no tingim Devit. Tasol taim Jehova i sakim ol sevenpela bikbrata bilong Devit, long dispela taim tasol ol i kamapim nem bilong Devit. Long dispela taim em i “wok long lukautim ol sipsip.” (1 Samuel 16:10, 11) Tasol ol dispela yia Devit i bin lusim long lukautim ol sipsip, dispela i bin lainim em long mekim bikpela wok bilong lukautim lain Israel, olsem wasman bilong ol. Song 78:70, 71 i tok: “God i makim Devit, wokman bilong en, na i kisim em long wok bilong lukautim ol . . . sipsip. Na God i putim em . . . i stap wasman bilong ol manmeri bilong God.” Olsem na i stret tru long Devit i bin raitim dispela gutpela singsing long Song 23, namba wan tok i olsem: “Bikpela em i wasman bilong mi.”
Olsem Devit i bin mekim, ol elda long kongrigesen Kristen i mas mekim pasin daun taim ol i mekim wok olsem nambatu wasman, na ol i no ken tingting long kisim biknem. Olsem Pol i bin tokim Timoti, ‘man i laik kisim wok wasman, em i laikim gutpela wok,’ em i no laikim biknem.—1 Timoti 3:1.
Tru, wok bilong Devit long lukautim ol sipsip tru em wanpela wok i no gat nem, tasol sampela taim wasman bilong sipsip i mas i gat strongpela bel. Wanpela taim laion i holim wanpela sipsip bilong papa bilong Devit na karim i go, na wanpela bea tu i mekim olsem, tasol Devit i no pret—em i kilim dispela tupela animal i laik bagarapim sipsip. (1 Samuel 17:34-36) Laion inap kilim ol animal i bikpela tru long em. Na ol braunpela bea bipo ol i save raun long Palestain, hevi bilong ol long skel em inap 140 kilogram, na sapos ol i paitim dia long strongpela han bilong ol, ol inap kilim dia.
Pasin bilong Devit long tingim gut na lukautim ol sipsip bilong papa i olsem gutpela piksa ol wasman bilong kongrigesen Kristen i ken bihainim. Pol i toksave long ol elda bilong Efesus long ol “weldok nogut tru” bai i kam namel long ol, na “ol bai i bagarapim ol sipsip.” (Aposel 20:29) Long nau tu, sampela taim ol wasman Kristen i mas i gat strongpela bel na bai ol i ken was gut long ol sipsip bilong Jehova na ol sipsip i ken i stap gutpela long ol samting bilong spirit, nogut birua i laik bagarapim ol.
Tru, wasman i mas strong long lukautim ol sipsip, tasol em i mas mekim pasin isi na pasin sori, olsem Devit na Gutpela Wasman Krais Jisas i bin mekim. (Jon 10:11) Ol elda i save, ol sipsip i bilong Jehova yet, olsem na ol i no ken mekim hatpela pasin long ol na “stap olsem bikman na daunim dispela ol manmeri God i bin putim long han bilong” ol.—1 Pita 5:2, 3; Matyu 11:28-30; 20:25-27.
God Bai Skelim Wok Bilong Ol
Bipo Jekop tu em i wanpela wasman bilong sipsip. Em i pilim olsem em i gat wok long lukautim olgeta wan wan sipsip i stap long han bilong em. Em i bin lukautim gut ol sipsip bilong tambu papa bilong em Laban, olsem na taim em i mekim dispela wok i go inap 20 yia pinis, Jekop inap tok: “Oltaim olgeta lain sipsip na meme bilong yu ol i karim gut ol pikinini. Na mi no bin kaikai wanpela sipsip man bilong yu. Taim wel abus i kilim wanpela sipsip o meme, mi no save bringim long yu na soim yu. Nogat. Mi yet mi save bekim dispela sipsip o meme i lus.”—Stat 31:38, 39.
Ol wasman bilong kongrigesen Kristen ol i save tingim moa yet ol sisip em Nambawan Wasman, God Jehova, i bin “baim long blut bilong Pikinini bilong em yet.” (Aposel 20:28; 1 Pita 2:25; 5:4) Pol i kamapim klia dispela bikpela wok elda taim em i tokim ol Kristen Hibru, ol man i go pas long lukautim kongrigesen “ol i save was long yupela oltaim. Na bihain bai ol i mas tokim God long olgeta wok ol i bin mekim.”—Hibru 13:17.
Jekop i bin wok long san na long nait long lukautim ol sipsip, na em i mas daunim ol laik bilong em yet long mekim dispela wok wasman. Em i bin tokim Laban: “Planti taim san i kukim mi nogut tru. Na planti taim long nait kol i bagarapim mi, na mi no save slip gut.”—Stat 31:40.
Na i wankain tu long planti gutpela elda Kristen long nau. Dispela i kamap ples klia long stori bilong wanpela, olsem: Wanpela brata i gat sik na ol i putim em long hap bilong haus sik em i bilong ol man i gat bikpela sik tru. Famili bilong em i stretim rot na bai ol i ken i stap klostu long em long haus sik long san na long nait. Bilong strongim bel bilong em, wanpela elda i senisim taim bilong mekim sampela wok bilong em na bai em i ken i go lukim sikman wantaim famili bilong em long olgeta de. Tasol ol dokta samting i mas mekim planti wok long ol sikman long dispela hap bilong haus sik, na dispela i mekim na sampela taim elda i no inap i go lukim em long san. Olsem na planti taim elda i mas i go long haus sik long biknait. Tasol em i amamas long mekim. Em i tok, “Mi save mi mas i go long taim i stret long sikman—i no long wanpela taim i stret long mi.” Taim bikpela sik bilong man i pinis liklik, ol i putim em long narapela hap bilong haus sik, tasol elda i wok yet long go lukim em long olgeta de bilong strongim bel bilong em.
Wok Wasman Bilong Moses
Baibel i tok, Moses em i “man bilong daunim em yet, na i no gat wanpela man long dispela graun i save daunim em yet inap olsem Moses.” (Namba 12:3) Tasol pastaim Moses i no olsem. Taim em i yangpela man em i bin kilim i dai wanpela Isip, long wanem, dispela Isip i bin paitim wanpela wantok Israel. (Kisim Bek 2:11, 12) Man i gat pasin daun em i no save mekim olsem, a? Tasol bihain God i makim Moses long bringim bikpela lain Israel, inap olsem sampela milion, ol i go brukim bikpela ples drai nating na kamap long Graun Bilong Promis. Olsem na Moses i mas kisim sampela save moa.
Bipo Moses i bin skul long “olgeta gutpela save bilong ol Isip,” tasol em i mas lain yet bambai em i ken i stap wasman bilong lain bilong God. (Aposel 7:22) Orait, em bai lain long wanem samting moa? Inap 40 yia God i larim Moses i mekim wok bilong was long ol sipsip long hap bilong Midian. Taim em i lukautim ol sipsip bilong tambu papa Jetro, Moses i lain long kisim ol gutpela pasin olsem no ken les kwik, pasin isi, pasin daun, isi long ol man, no ken kros kwik, bosim skin. Na em i lain tu long bilip na wetim Jehova. Em nau, wok bilong was long ol sipsip i bin lainim em gut na bai em inap i stap gutpela wasman long lain Israel na lukautim gut ol.—Kisim Bek 2:15–3:1; Aposel 7:29, 30.
Ol elda tu i mas kisim dispela gutpela pasin bambai ol i ken lukautim gut lain bilong God long nau. Pol i tokim Timoti, “Wokman bilong Bikpela . . . i mas mekim gutpela pasin long olgeta man . . . na painim ol gutpela rot bilong skulim ol manmeri long ol pasin God i laikim. Em i mas wok isi na stretim tingting bilong ol man bilong sakim tok.”—2 Timoti 2:24, 25.
Ating sampela taim elda bai bel hevi, long wanem, em i hatwok long kisim sampela gutpela pasin olsem. Tasol em i no ken les. Moses i mas lain planti yia long kisim ol pasin bilong inapim em long mekim gutpela wok wasman. Sapos elda i wok strong, bihain bai em i kisim ol pasin bilong gutpela wasman.—Lukim 1 Pita 5:10.
Ating yu wanpela elda, tasol yu no kisim bikpela wok olsem ol narapela elda. Sapos olsem, ating Jehova i larim yu i lain long kamapim moa yet ol pasin bilong gutpela wasman, olsem Jehova i bin mekim long Moses. Jehova i save tingim yu. Tasol yumi mas ‘daunim yumi yet na i stap aninit long ol arapela manmeri bilong God. Yumi save, God i save daunim ol man i apim nem bilong ol yet, tasol em i save marimari na mekim gut long ol man i daunim ol yet.’ (1 Pita 5:5-7) Sapos yu wok strong na lain long kamapim moa yet ol dispela gutpela pasin, Jehova bai givim bikpela wok moa long yu, olsem em i bin mekim long Moses.
Jehova i Laikim Tru Olgeta Sipsip
Ol wasman bilong sipsip long taim bilong Baibel ol i save tingim olgeta wan wan sipsip. Na ol wasman bilong kongrigesen tu i mas mekim olsem. Pol i tok: “Yupela i mas was gut long . . . olgeta . . . sipsip bilong God.” (Aposel 20:28) Husat i insait long dispela ‘olgeta sipsip bilong God’?
Jisas i mekim tok piksa long wanpela man i gat wan handet sipsip, tasol wanpela i lus na kwiktaim em i kirap painim bambai em i ken kisim i kam bek long lain sipsip. (Matyu 18:12-14; Luk 15:3-7) Na olsem tasol ol wasman i mas tingim gut olgeta wan wan insait long kongrigesen. Maski wanpela i no autim tok o em i no kam long ol miting Kristen, em i insait yet long lain “sipsip bilong God” na ol elda i gat wok long lukautim em tu, long wanem, Nambawan Wasman, em Jehova, bai skelim ol long dispela wok tu.
Wanpela lain elda i bin tingting planti long sampela insait long kongrigesen i no autim tok moa o i kam long miting. Orait, ol elda i wokim wanpela lista i gat nem bilong ol dispela manmeri, na ol i wok strong long i go lukim olgeta wan wan na helpim ol long kam bek insait long banis sipsip bilong Jehova. Insait long tupela yia hap tasol, ol i helpim 30 samting long kirap gen long mekim wok bilong Jehova. Wanpela i bin lusim wok bilong Jehova inap 17 yia!
I gat narapela samting tu na ol wasman i pilim tru bikpela wok bilong ol long lukautim gut ol sipsip. Jehova “i bin baim [ol sipsip] long blut bilong Pikinini bilong em yet.” (Aposel 20:28) Pe bilong baim ol dispela gutpela sipsip i bikpela tumas—i no gat narapela pe i winim dispela. Na yumi ken tingim ol planti planti aua yumi save lusim bilong painim na helpim olgeta wan wan man i kain olsem sipsip! Orait, yumi mas wok strong olsem bilong helpim olgeta sipsip long i stap insait long banis sipsip bilong God. Olgeta wan wan sipsip i gutpela samting tru long God.
Sapos wanpela bilong lain sipsip i mekim bikpela rong, ol elda i gat wok yet long tingim em na mekim pasin isi long em na traim helpim em long tanim bel. (Galesia 6:1, 2) Tasol sori tru, sampela taim wanpela insait long kongrigesen i mekim bikpela rong na em i no bel hevi long rong bilong em na tanim bel. Orait, ol wasman i gat wok olsem Baibel i makim bilong lukautim ol narapela insait long lain sipsip, nogut pasin bilong dispela man i kalap long ol na bagarapim ol.—1 Korin 5:3-7, 11-13.
Tasol Jehova em i nambawan gutpela piksa bilong mekim pasin marimari long ol sipsip i lus. Em yet i tok: “Sapos sampela sipsip i lus, bai mi go painim ol na kisim bek ol. . . . Na sapos sampela i kisim bagarap na ol i gat sua, orait bai mi pasim ol sua. Na sapos sampela i gat sik, orait bai mi mekim sik bilong ol i orait gen.” (Esekiel 34:15, 16; Jeremaia 31:10) Jehova i laik bai ol wasman bilong kongrigesen i ken bihainim dispela pasin bilong em, olsem na em i wokim rot bambai ol i ken i go lukim ol rauspela man em ol inap long tanim bel. Dispela pasin marimari ol wasman i mekim bilong kisim bek ol sipsip i lus em i bin kamapim gutpela samting. Wanpela sista i kam bek pinis na em i tok: “Taim ol elda i kam lukim mi, dispela i strongim bel bilong mi na i kirapim mi long kam bek.”
Yumi save, dispela tok Pol i bin givim long ol elda bilong Efesus long Miletus i sutim ol yet na ol wasman bilong nau. Pol i kolim dispela tok “wasman” bambai ol elda i ken pilim ol gutpela pasin ol wasman i mas mekim—olsem pasin daun na strongim bel na no ken pret, olsem Devit i bin mekim; na ol i mas givim bel long mekim wok bilong ol na lukautim gut ol sipsip, olsem Jekop i bin mekim long san na long nait; na ol i mas orait long lain moa long mekim gut wok wasman, olsem Moses i bin mekim. Tru tumas, ol dispela man em Baibel i stori long ol, ol i stap olsem gutpela piksa tru bilong helpim ol elda long kisim na kamapim ol gutpela pasin bilong wasman bambai ol inap lukautim gut “olgeta manmeri . . . bilong God . . . em i bin baim long blut bilong Pikinini bilong em yet.”