‘Laspela Birua’ Bai Pinis!

TAIM yu pikinini yet, ating yu pret long tudak. Ating ol stori nating i mekim na yu pret. Tasol taim yu laik slip, papa o mama i putim lam i lait klostu, na yu no pret moa!

Planti man i save pret long i dai. Tasol sapos yu save long ol samting tru i kamap long man i dai, bai yu no pret.

Save Long Birua Bilong Yu

King Solomon bilong Israel long bipo em i saveman na em i tok: “Ol man i gat laip i . . . save bai ol i dai. Tasol ol man i dai pinis, ol i no inap save long wanpela samting.” (Saveman 9:⁠5) Baibel i tok klia, man i dai pinis em i no gat laip na em i no gat save o tingting. God i as bilong dispela tok i stap long Baibel bilong yu.

Aposel Kristen Pol i tok piksa long dai olsem: “Dai, we stap strong bilong yu long daunim ol man? Dai, we stap spia bilong yu bilong bagarapim ol man?” Spia i kamapim dai em wanem samting? Pol i tok: “Spia bilong dai em sin tasol.” (1 Korin 15:​55, 56; Hosea 13:14) Dispela spia i bin kamap olsem wanem? Pol i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” (Rom 5:12) Aposel i kamapim klia husat dispela “wanpela man,” em i tok: “Olgeta man bilong lain bilong Adam ol i save dai.” (1 Korin 15:22) Tru tumas, long pasin bikhet bilong namba wan tumbuna bilong yumi, em Adam, spia bilong dai i painim yumi olgeta.​—⁠Stat 3:​1-19.

Sapos yu no gat sik, na yu stap long gutpela ples wantaim famili bilong yu, em ol i laikim yu tumas, yu no laik i dai, a? Tasol olsem Baibel i tok, “taim nogut i save painim yumi olgeta” na yumi dai. (Saveman 9:11) Yumi no save wanem samting bai painim yumi long tumora. (Jems 4:14) Tasol yumi save tru, yumi olgeta i gat sin na yumi save dai. Olsem na dai i olsem wanpela birua i bihainim yumi na i laik holimpas yumi.

Taim Wanpela Famili Bilong Yumi i Dai

Taim dai i bagarapim wanpela long famili bilong yumi, dai i kamap birua tru bilong yumi. Wanpela meri i gat bikpela sik na em i save em bai i dai, na em i tokim man bilong em: “Yu bai pilim bikpela hevi moa.” Bilong wanem em i tok olsem? Long wanem Baibel i tok, man i dai pinis em i “no inap mekim wok o tingting o kisim gutpela tingting na save.” (Saveman 9:10) Man i dai pinis em i no pilim hevi moa. Tasol ol famili na pren bilong em i stap yet, ol i pilim nogut tru​—⁠bel bilong ol i hevi tumas. Olsem wanem? I gat rot bilong mekim gut bel bilong ol?

Planti tok bilong mekim gut bel bilong ol em i stap long Baibel, em Tok bilong God. Sapos ol i kaunim ol song long Baibel na tingim gut tok bilong ol, dispela bai mekim isi bel bilong ol. Wanpela song i tok: “Yumi litimapim nem bilong Bikpela. Olgeta de em i save karim ol hevi bilong yumi.”​—⁠Song 68:19.

Kongrigesen Kristen tu inap strongim bel bilong ol. Aposel Pol i tok, sapos man bilong wanpela meri i dai pinis, kongrigesen i mas mekim gut long em. Na sapos em i gat ol pikinini o ol tumbuna pikinini, em ol inap lukautim em, orait “long ai bilong God em wok bilong [ol long] lukautim gut dispela mama bilong ol.” Na Pol i tok: “Long lista bilong ol meri man bilong ol i dai pinis, yu ken raitim nem bilong dispela kain meri tasol, em meri i winim 60 krismas pinis na . . . em i gat nem olsem meri bilong mekim ol kain kain gutpela wok . . . olsem bilong lukautim gut ol pikinini bilong en na bilong givim kaikai samting long ol man i kam long narapela ples na . . . bilong helpim ol manmeri i gat hevi.” (1 Timoti 5:​3, 4, 9, 10) Ol Witnes Bilong Jehova long nau tu i save helpim na strongim ol wanlotu i gat hevi.

Ol man o meri i hevi long man i dai pinis, ol i hatwok long daunim bel hevi bilong ol. Wanpela man, em meri bilong em i dai tupela yia bipo, em i tok: “Mi laikim tumas meri bilong mi. Taim em i dai, dispela em i nambawan bikpela hevi i bin painim mi, na mi hatwok long karim.” Sapos man o meri i marit longtaim liklik na em i pas tru wantaim poroman, orait taim poroman i dai, dispela man o meri i save bel hevi tru. Husat inap helpim em?

Ol gutpela poroman Kristen inap helpim em. Baibel i tok: “Ol gutpela pren i save laikim yumi long olgeta taim,” na long taim bilong hevi ol i sambai long yumi olsem “brata” bilong yumi. (Sindaun 17:17) Sapos poroman bilong wanpela man o meri i dai pinis, dispela man o meri i mas i gat ol gutpela pren bilong helpim em. Ol pren i gat gutpela tingting bai kirapim em long toktok, maski em i krai tu. Kristen i karim pinis dispela kain hevi, ating em inap mekim ol gutpela tok bilong “strongim bel” bilong dispela man o meri, olsem Baibel i tok. (1 Tesalonaika 5:14) Taim wanpela marit i dai pinis, poroman bai stap wanpis na bel hevi, na ating em i laik kamapim hevi bilong em long narapela. Tasol sapos em i meri na em i laik kamapim long wanpela man, tupela i mas was gut, nogut traim i painim ol.​—⁠1 Pita 2:⁠12.

Gutpela rot bilong daunim dispela kain bel hevi, em olsem: Mekim bikpela wok bilong helpim ol narapela. Em hatwok, long wanem, yu pilim olsem ol narapela i mas helpim yu! Tasol sapos yu tingim ol narapela na wok long helpim ol, dispela bai helpim yu long daunim bel hevi bilong yu. Jisas i tok: “Amamas bilong man i givim samting long ol arapela man, dispela i winim amamas bilong man i kisim samting bilong em yet.”​—⁠Aposel 20:35.

Daunim Strong Bilong Dai

Sapos binatang i kaikaim yu, bai yu pilim bikpela pen, na dispela inap bagarapim yu. Sapos yu rausim spia bilong en long skin, bai pen i pinis. Tasol yu ting i gat rot bilong rausim spia bilong dai long skin bilong yumi?

Pol i tok, sin em i spia bilong dai, na bihain em i tok: “Yumi tenkyu long God. Long strong bilong Bikpela bilong yumi Jisas Krais, God i save strongim yumi na yumi winim pait.” (1 Korin 15:57) Olsem wanem Krais i helpim yumi long winim pait na daunim strong bilong dai? Krais yet i tok: “Pikinini Bilong Man . . . i kam bilong  . . . givim laip bilong em bilong baim bek planti manmeri.” (Matyu 20:28) God i givim Pikinini bilong em olsem ofa bilong baim bek ol man, na ol man i bilip long dispela Pikinini, em Krais Jisas, na long dispela ofa, orait dai ol i kisim long Adam i no inap bagarapim ol olgeta; ol i no ken lus.​—⁠Jon 3:⁠16.

Jisas i mekim sampela tok i strongim tru bel bilong yumi, em i tok: “Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.”​—⁠Jon 5:​28, 29.

Planti handet yia paslain, profet Aisaia i bin tok: “Em [God Jehova] bai i pinisim dai tru na . . . mekim drai wara bilong ai bilong olgeta manmeri.” (Aisaia 25:⁠8) Na long Kamapim Tok Hait 21:​4, Baibel i mekim gutpela tok promis olsem: “[God] bai i mekim drai wara i stap long ai bilong olgeta . . . Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” Dispela tok bilong Baibel inap strongim bel bilong ol manmeri i hevi long man i dai pinis, na bai ol i no “sori tumas, olsem ol arapela manmeri i no bilip long God na i no wetim taim bilong kirap bek.”​—⁠1 Tesalonaika 4:⁠13.

Tingim ol gutpela samting God i laik mekim bilong helpim ol man, olsem Baibel i stori long en: Klostu nau bai ‘bikpela hevi tru’ i pinisim pasin nogut nau i stap long graun. (KTH 7:14) Ol man i bihainim lotu giaman bai ol i pinis. Bai i no gat moa ol gavman na bikpela bisnis i mangalim mani, em ol i mekim na ol bikpela hangre na bikpela pait i kamap long graun. Krais bai kalabusim Satan, em yet i mekim na dai i painim planti man. Na bihain bai Krais i kirap bosim graun inap 1,000 yia, na bai em i mekim wok long ofa bilong em na helpim ol man. Ol man i dai pinis bai ol i kirap bek; lait bilong Tok bilong God bai pinisim ol bilip giaman long dai, em birua bilong ol man. Olgeta manmeri i stap long dispela gutpela taim bihain, bai ol i gat rot bilong kisim save long ol lo bilong God na bihainim ol stretpela pasin em i makim.​—⁠Sindaun 4:18; Aposel 24:15; Hibru 2:​14, 15; KTH 18:​4-8; 19:​19-21; 20:​1-3.

Pol i tok, ‘bihain bai Krais i putim kingdom long han bilong God. Em i mas i stap king inap long em i daunim olgeta birua, na em bai pinisim dai tu, em laspela birua.’ (1 Korin 15:​24-26) Olgeta samting nogut sin bilong Adam i bin kamapim bai pinis. Bai i gat laspela traim, na ol man i stap gut long God bai winim dispela traim. (KTH 20:​4-10) Skin na tingting bilong ol bai gutpela olgeta, olsem na bai ol i no i stap inap 70 o 110 yia​—⁠bai ol i stap oltaim oltaim. Em gutpela presen tru ol bai kisim long God long rot bilong dispela Pikinini em i laikim tumas!​—⁠Rom 6:⁠23.

Orait, yu inap i stap hamas yia? Yu inap i stap oltaim oltaim. Nau yu stap long “taim bilong las de,” olsem na ating bai yu no i dai. (Daniel 12:4; Jon 11:​25, 26; 17:⁠3) Sapos yu bihainim laik bilong God, yu inap winim taim bilong las de na i stap yet long nupela taim God i tok promis long en.​—⁠2 Pita 3:13.

Sapos yu lapun, yu mas save, yu inap i dai. Tasol yu ken amamas long tingting long kirap bek. Tasol ating yu tingting long famili bai stap olsem wanem long nupela taim. Yu no ken tingting planti, Jehova bai stretim olgeta samting bambai ol manmeri i stap gut long em oltaim ol inap i stap amamas oltaim.

“Taim bilong las de” bilong pasin nogut Satan i bin kamapim long graun i laik pinis nau, na nogut yu larim pasin bilong pret long i dai i pasim yu na yu no mekim wok bilong Jehova long dispela taim. (2 Timoti 3:⁠1) Sapos wanpela long famili bilong yu i dai, yu mas save, em bilong liklik taim tasol. (KTH 20:​13, 14) Yu mas bilip tru olsem ol man i dai pinis bai ol i kirap bek. Na yu ken save, sapos yu winim taim bilong bikpela hevi tru na yu stap long nupela taim o yu dai na kirap bek na yu stap long nupela taim, tok promis bilong God i no inap lus nating​—⁠laspela birua, em dai, em bai pinis tru.​—⁠KTH 7:​9, 14.

[Piksa long pes 5]

Ol gutpela poroman Kristen inap strongim bilip bilong ol man i hevi long man i dai pinis

[Piksa long pes 7]

Taim wanpela famili bilong yu i dai, wok strong long helpim ol narapela na dispela bai daunim bel hevi bilong yu