Jehova i Save Givim Bel Isi na Tok i Tru Moa Yet Long Yumi
“Bai mi helpim dispela taun na bai taun wantaim ol manmeri bilong en i kamap gutpela gen. Na bai mi givim gutpela taim tru long ol.”—JEREMAIA 33:6.
BEL ISI! Em i gutpela samting tru, a? Tasol kirap long bipo bipo yet na i kam inap nau, i no planti man i bin i stap olsem! Na bel isi i no bin i stap long taim bilong yumi. Insait long dispela taim i gat tupela pait nogut tru i bin kamap na i bagarapim planti man tru, winim olgeta pait i bin kamap paslain long en. Bihain long Namba Wan Pait, ol i kamapim Lig ov Nesen bilong mekim olgeta lain i stap gut wantaim. Tasol dispela oganaisesen i pundaun pinis. Orait, bihain long Namba 2 Pait, ol i kamapim Yunaitet Nesen bilong mekim wankain wok. Tasol taim yumi kaunim stori bilong ol pait i kamap long ol nius, yumi lukim olsem dispela oganaisesen tu i laik pundaun.
2 Yu ting yumi ken kirap nogut long ol oganaisesen bilong ol man i no inap kamapim gutaim na bel isi long graun? Nogat tru. Inap 2,500 yia i go pinis, God i bin skulim lain bilong em, em ol Israel, long dispela samting. Inap 600 yia samting paslain long Krais, gavman bilong Babilon i wok long kamap strong na bosim graun, na em i laik kam pait long lain Israel. Israel i singaut long Isip bilong helpim em long i stap gut. Tasol Isip i pundaun long mekim dispela wok. (Jeremaia 37:5-8; Esekiel 17:11-15) Long yia 607 paslain long Krais, ol ami bilong Babilon i brukim banis bilong Jerusalem na kukim haus bilong Jehova. Olsem na long rot bilong dispela bikpela hevi ol Israel i kisim save olsem ol i no ken bilip long ol oganaisesen bilong ol man bai helpim ol long i stap gut. Bel isi bilong ol Israel i pinis na ol Babilon i kisim ol i go kalabus long Babilon.—2 Stori 36:17-21.
3 Tasol taim Babilon i no daunim yet Jerusalem, Jehova i bin tokaut olsem em yet bai kamapim gutpela taim long Israel—ol Isip nogat. Long rot bilong profet Jeremaia Jehova i tok promis olsem: “Bihain bai mi helpim dispela taun na bai taun wantaim ol manmeri bilong en i kamap gutpela gen. Na bai mi givim gutpela taim tru long ol na . . . long dispela taim bai mi mekim ol lain bilong Juda na Israel i stap gut gen. Na bai mi mekim ol i kamap strongpela lain olsem bipo.” (Jeremaia 33:6, 7) Jehova i kirap long truim tok promis bilong em long yia 539 paslain long Krais, taim ol narapela lain i daunim Babilon na ol i larim ol Israel i lusim Babilon. (2 Stori 36:22, 23) Klostu long pinis bilong yia 537 paslain long Krais, wanpela liklik lain bilong Israel i mekim bung bilong Ol Bikpela De Bilong i Stap Long Haus Win—em namba wan taim ol i bin mekim long graun bilong Israel inap 70 yia! Bihain long dispela bung, ol i kirapim wok bilong wokim gen haus bilong Jehova. Ol i ting olsem wanem long dispela samting? Baibel i tok: “Olgeta manmeri i singaut strong na litimapim nem bilong Bikpela, long wanem, ol wokman i putim pinis ol bikpela ston long as bilong banis bilong haus bilong God.”—Esra 3:11.
4 Pastaim ol Israel i amamas long mekim dispela wok, tasol bihain ol birua i mekim nogut long ol na ol i bel hevi na lusim wok bilong wokim gen haus bilong Jehova. Sampela yia bihain, Jehova i givim wok long profet Hagai na profet Sekaraia long kirapim ol Israel long pinisim wok bilong wokim gen haus bilong Jehova. Ating ol Israel i amamas nogut tru taim Hagai i kamapim tok bilong Jehova long dispela haus ol bai wokim, em i tok: “Dispela nupela haus bilong mi bai i kamap gutpela tru na bai i winim olpela haus bilong mi. Na long dispela ples bai mi givim bel isi na planti gutpela samting long ol manmeri bilong mi. Mi God, Bikpela I Gat Olgeta Strong, mi tok pinis.”—Hagai 2:9.
Jehova i Truim Ol Promis Bilong Em
5 Long Buk Sekaraia i gat planti piksa olsem driman na planti tok profet i bin strongim lain bilong God long dispela taim bipo, olsem 500 yia samting paslain long Krais. Na ol dispela tok profet i wok yet long strongim yumi long bilip olsem Jehova bai helpim yumi. Olsem na yumi ken bilip tru olsem Jehova bai givim bel isi long lain bilong em long nau tu. Olsem: Long namba 8 sapta bilong Buk Sekaraia, inap planti taim profet Sekaraia i mekim kain tok olsem: ‘Bikpela I Gat Olgeta Strong i tok olsem.’ Ol dispela tok wan wan i kirapim wanpela toksave bilong God olsem lain bilong em bai stap bel isi. Sampela bilong ol dispela tok promis i bin kamap tru long taim bilong Sekaraia. Olgeta i kamap tru o ol i wok long kamap tru nau long taim bilong yumi.
“Mi Laikim Tumas Ol Jerusalem”
6 Dispela tok i kamap namba wan taim long Sekaraia 8:2, em i tok: “God i tok olsem, ‘Mi laikim tumas ol Jerusalem, olsem na mi laik helpim ol. Mi laikim ol tru olsem na mi belhat long ol birua bilong ol.’ ” Tok promis bilong Jehova long em bai laikim tru lain bilong em, dispela tok i makim olsem em bai strong long kamapim bek bel isi bilong ol. Orait, taim Jehova i kisim ol Israel i kam bek long graun bilong ol na ol i wokim gen haus bilong em, dispela i kamapim klia olsem em i strong long helpim ol.
7 Tasol olsem wanem long ol dispela lain i bin birua long lain bilong Jehova? Em i strong tru long helpim lain bilong em, na olsem tasol em i “belhat” tru long ol dispela birua. Taim ol Juda i lotu long dispela haus bilong God ol i bin wokim gen, ol inap tingim ol samting i bin painim Babilon, nau em i pundaun pinis. Na ol inap tingim ol birua i bin pundaun tru taim ol i laik pasim ol long wokim gen haus bilong God. (Esra 4:1-6; 6:3) Na ol inap tenkyu long Jehova long em i bin truim ol tok promis bilong em. Em i bin strong long helpim ol na ol i win!
“Taun Bilong Mi Tru”
8 Orait, yumi ken tingim namba 2 toksave bilong Jehova em Sekaraia i raitim. Jehova i tok wanem long dispela taim? Em i tok: “Bai mi kam bek na bai mi stap long Jerusalem, em taun bilong mi tru. Na Jerusalem, em maunten bilong mi Bikpela I Gat Olgeta Strong, bai ol i kolim Ples Tambu Bilong Bikpela.” (Sekaraia 8:3) Paslain long yia 607 paslain long Krais, Jerusalem i no taun bilong mekim tok i tru. Ol pris na profet bilong en ol i save giaman, na ol lain bilong en i no stap gut long Jehova. (Jeremaia 6:13; 7:29-34; 13:23-27) Orait nau lain bilong God i wok long wokim gen haus bilong em, na dispela i kamapim klia olsem ol i strong long bihainim lotu i tru. Long spirit Jehova i stap gen long Jerusalem. Bipo ol i bin autim ol tok i tru bilong dispela lotu i tru insait long Jerusalem, olsem na Jehova inap kolim dispela taun olsem “taun bilong mi tru.” Jerusalem i stap antap long maunten, olsem na ol inap kolim olsem ‘maunten bilong Bikpela.’
9 Dispela tupela toksave i bikpela samting long ol Israel bilong bipo, tasol ol i bikpela samting tu long yumi ol man i stap long dispela taim nau. Klostu 80 yia i go pinis, long taim bilong Namba Wan Pait, dispela liklik lain “Israel tru bilong God” em ol inap olsem 3 tausen samting tasol, ol i stap kalabus long ol samting bilong spirit, wankain olsem lain Israel bilong bipo ol i bin i go kalabus long Babilon. (Galesia 6:16) Tok profet i tok ol i stap olsem ol man i dai pinis na skin bilong ol i stap long bikrot. Tasol ol i gat bikpela laik long lotuim Jehova “long strong bilong Holi Spirit na long pasin [olsem tok] i tru.” (Jon 4:24) Olsem na long yia 1919, Jehova i kisim bek ol long kalabus na i olsem em i kirapim bek ol na ol i no stap moa olsem man i dai pinis. (KTH 11:7-13) Em nau, i olsem Jehova i tok ‘Yes’ long askim bilong Aisaia, em i mekim tok profet na i askim olsem: “Ating wanpela kantri inap kamap long wanpela de tasol, a? Ating wanpela bikpela lain manmeri inap kamap wantu tasol, a?” (Aisaia 66:8) Long 1919, lain bilong Jehova i stap gen olsem wanpela lain bilong spirit insait long “kantri” bilong ol yet, olsem kantri bilong spirit i stap long graun.
10 Ol Kristen God i bin makim, ol i stap gutpela insait long dispela kantri na ol i mekim wok bilong Jehova insait long dispela bikpela haus spirit bilong em. Jehova i makim ol olsem “wokboi i gat gutpela tingting,” na ol i kisim wok bilong lukautim olgeta samting bilong Jisas long graun, na nau long yia 1996 ol i holim yet dispela wok. (Matyu 24:45-47) Ol i save gut pinis olsem Jehova “em i as bilong bel isi.”—1 Tesalonaika 5:23.
11 Tasol olsem wanem long ol birua bilong Israel bilong God? Jehova i strong tru long helpim lain bilong em, na olsem tasol em i belhat tru long ol birua bilong em. Long taim bilong Namba Wan Pait, ol bikman bilong ol lotu i holim nating nem Kristen ol i strong tru long pinisim dispela liklik lain Kristen i save autim tok i tru na ol i putim bikpela hevi tru long ol—ol i mekim mekim, tasol ol i no inap pinisim dispela liklik lain. Long taim bilong Namba 2 Pait, ol pris pasto bilong ol dispela lotu ol i stap wanbel long wanpela samting tasol: Maski ol kantri bilong ol i stap birua birua na ol i pait, ol dispela lotu i strong long kirapim gavman bilong ol long daunim ol Witnes Bilong Jehova. Long nau tu, long planti kantri ol bikman bilong lotu i wok long kirapim gavman long pasim o tambuim wok Kristen bilong ol Witnes Bilong Jehova long autim tok.
12 Tasol Jehova i lukim pinis dispela samting. Bihain long Namba Wan Pait, ol lotu i holim nating nem Kristen na ol narapela lotu bilong Bikpela Babilon ol i pundaun. (KTH 14:8) Kirap long 1922 dispela samting i kamap ples klia; ol Witnes Bilong Jehova i kirap long kapsaitim ol samting nogut tru long ol dispela lotu—long rot bilong ol nius samting ol i kamapim long ples klia olsem ol dispela lotu i dai pinis long ol samting bilong spirit, na ol dispela nius samting i toksave olsem bihain ol bai bagarap olgeta. (KTH 8:7–9:21) Yumi save ol i wok yet long kapsaitim ol dispela samting nogut tru long ol lotu i holim nating nem Kristen, long wanem, long Epril 23, 1995, i gat wanpela bikpela tok i kamap long olgeta hap, nem bilong dispela tok, “Klostu Nau Ol Lotu Giaman Bai Pinis,” na bihain long en ol i tilim planti handet milion Kingdom Nius i gat sampela bikpela tok long en.
13 Long nau ol lotu i holim nating nem Kristen ol i stap nogut tru. Long taim bilong yumi, lain bilong ol dispela lotu i kilim i dai narapela narapela bilong ol dispela lotu long ol pait nogut tru, em ol pris pasto i bin givim blesing long ol dispela pait. Long sampela kantri, strong bilong ol dispela lotu i pinis olgeta. God i makim ol pinis bilong bagarap olgeta wantaim ol narapela lotu insait long Bikpela Babilon.—KTH 18:21.
Lain Bilong Jehova i Stap Bel Isi
14 Tasol long dispela yia 1996, lain bilong Jehova i stap bel isi tru long kantri ol i bin kisim bek, olsem namba 3 toksave bilong Jehova i tok: “Bai i no gat pait na trabel i kamap long taun, na ol manmeri inap kamap lapun tru na holim ol stik na wokabaut. Na bai ol i sindaun malolo long olgeta hap bilong taun. Na ol liklik manki bai i pulap long taun, na ol bai wok long pilai pilai i stap.”—Sekaraia 8:4, 5.
15 Dispela gutpela stori i makim wanpela samting yumi kirap nogut long en long dispela taim nogut bilong pait yumi stap long en—wanpela lain ol i stap bel isi. Kirap long 1919, wanpela tok profet bilong Aisaia i kamap tru, em i tok: “Mi Bikpela, mi tok, bel isi bilong mi i ken i stap wantaim ol manmeri i stap klostu na wantaim ol lain i stap long ol longwe ples. Bai mi mekim ol i kamap orait gen na givim gutpela taim long ol. Tasol . . . ol manmeri bilong mekim pasin nogut, bai ol i no inap painim gutpela taim.” (Aisaia 57:19-21) Tru, lain bilong Jehova i no inap abrusim ol hevi bilong dispela taim nogut bilong pait, maski ol i no bilong dispela graun. (Jon 17:15, 16) Long sampela kantri ol i karim bikpela hevi tru, na sampela ol i bin kisim bagarap. Tasol ol Kristen tru ol i stap bel isi long tupela bikpela samting: Namba wan, em “Jisas Krais i mekim [ol] i kamap wanbel wantaim God.” (Rom 5:1) Namba 2, em ol i stap bel isi wantaim ol narapela long lain bilong ol. Ol i wok long kisim “gutpela tingting na save i kam long God,” em “ol i save bihainim klinpela tingting. Na . . . ol i save stap wanbel wantaim ol arapela.” (Jems 3:17; Galesia 5:22-24) Na tu, ol i wetim taim ol bai stap bel isi tru, taim “ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”—Song 37:11.
16 Long nau tu i gat ol “lapun tru” namel long lain bilong Jehova, em ol manmeri God i bin makim ol na ol i tingim yet ol dispela taim oganaisesen bilong Jehova i bin win. Yumi pilim tru pasin bilong ol long i stap gut long Jehova na sanap strong. Ol manmeri God i bin makim ol na ol i yangpela liklik long ol, ol i bin go pas long mekim wok bilong Jehova long taim nogut tru bilong 1930 samting i kam inap long Namba 2 Pait na long ol yia bihain long pait tu, taim lain bilong Jehova i go bikpela tru. Na kirap long 1935 samting, dispela lain “planti manmeri tru” bilong “ol arapela sipsip” ol i kamap ples klia. (KTH 7:9; Jon 10:16) Ol Kristen God i bin makim ol i wok long i go lapun tru, na lain bilong ol i wok long i go liklik tru, olsem na ol arapela sipsip i kisim wok bilong autim tok na ol i mekim i go inap long olgeta hap bilong graun. Nau long dispela taim ol arapela sipsip i wok long kapsait i kam insait long kantri bilong lain bilong God. Long yia i go pinis, inap 338,491 ol i kisim baptais bilong makim olsem ol i dediket long Jehova! Ol dispela nupela manmeri ol i yangpela tru long ol samting bilong spirit. Ol i nupela na bel bilong ol i kirap tru long mekim dispela wok, olsem na ol narapela insait long lain bilong God i amamas tru long ol i kam bung wantaim ol, na nau i gat bikpela lain ol i litimapim nem bilong “God bilong yumi em i save sindaun long sia king bilong en, na Pikinini Sipsip.”—KTH 7:10.
17 Long nau, ‘ol liklik manki i pulap long taun,’ em ol Witnes i gat strong olsem bilong ol yangpela. Long yia bilong wok bilong 1995, ol i kisim ripot long 232 kantri na ailan bilong solwara. Tasol namel long lain God i bin makim na lain arapela sipsip, narapela i no resis long winim narapela, na lain bilong narapela ples i no birua long lain bilong narapela ples, na narapela i no bel nogut long narapela. Olgeta i wok long kamap strong wantaim long ol samting bilong spirit, na pasin bilong laikim tru narapela i pasim ol gut wantaim na ol i stap wanbel. Ol Witnes Bilong Jehova long olgeta hap bilong graun ol i stap olsem brata brata, na dispela em i narapela kain samting tru i kamap long dispela taim nogut bilong pait.—Kolosi 3:14; 1 Pita 2:17.
I Hatwok Tumas Long Jehova?
18 Long 1918, taim lain remnan ol i liklik lain tru inap olsem 3 tausen samting na ol i stap bel hevi long kalabus bilong spirit, i no gat wanpela inap save long ol samting bai kamap bihain insait long oganaisesen bilong Jehova. Tasol Jehova i save—olsem namba 4 toksave olsem tok profet bilong em i tok: “Ol manmeri i stap yet ol i liklik lain tasol, na ol i ting ol dispela samting i no inap i kamap olsem mi bin tok. Tasol mi Bikpela I Gat Olgeta Strong, mi no tingting olsem. Nogat. Mi inap mekim olgeta samting.”—Sekaraia 8:6.
19 Long 1919, spirit bilong Jehova i strongim gen lain bilong em long mekim bikpela wok em bai kamap bihain. Tasol long dispela taim bipo oganaisesen bilong ol manmeri i lotuim Jehova em i liklik tasol, olsem na ol i mas i gat strongpela bilip bambai ol i ken i stap gut long en. Ol i liklik lain tru, na i gat planti samting ol i no klia gut long en. Tasol isi isi Jehova i strongim ol na em inapim ol long mekim wok Kristen bilong autim gutnius na kamapim ol disaipel. (Aisaia 60:17, 19; Matyu 24:14; 28:19, 20) Isi isi Jehova i helpim ol long kisim stretpela tingting long sampela bikpela samting, olsem ol Kristen i no insait long ol samting bilong dispela graun, na Jehova i Bos tru bilong heven na graun. Olsem wanem? I hatwok tumas long Jehova i kamapim laik bilong em long rot bilong dispela liklik lain Witnes? Yumi ken tok, nogat tru! Dispela i kamap ples klia long pes 12 i go inap pes 15 bilong dispela nius, i gat sat i kamapim wok bilong ol Witnes Bilong Jehova long yia bilong wok bilong 1995.
“Bai Mi Stap God Bilong Ol”
20 Namba 5 toksave i stori yet long amamas bilong ol Witnes Bilong Jehova long nau. Jehova i tok olsem: “Ol birua i bin kisim ol manmeri bilong mi i go i stap long ol kantri long hap san i kamap na long hap san i go daun. Na bai mi kisim bek ol dispela manmeri na bringim ol i kam bek na bai ol i stap long Jerusalem gen. Na bai ol i stap manmeri bilong mi na bai mi stap God bilong ol. Na bai mi bosim ol long stretpela pasin oltaim.”—Sekaraia 8:7, 8.
21 Long 1996 yumi inap tok olsem ol Witnes i bin autim gutnius long olgeta hap, kirap long “ol kantri long hap san i kamap” i go inap long ol kantri long “hap san i go daun.” Ol i bin kamapim disaipel long ol manmeri bilong olgeta lain, na ol i bin lukim tok promis bilong Jehova i kamap tru, olsem: “Bai mi yet mi skulim ol pikinini bilong yu, na bai ol i gat gutpela sindaun [olsem bel isi] tru.” (Aisaia 54:13) Yumi stap bel isi, long wanem, Jehova i save skulim yumi. Bilong em i ken mekim olsem, oganaisesen bilong em i bin wokim ol buk na nius samting long 300 samting tok ples. Long yia i go pinis, ol i skruim 21 tok ples moa long dispela namba. Nau ol i wokim nius Wastaua long wankain taim long 111 tok ples, na nius Kirap! long 54 tok ples. Ol kibung nesenel na kibung intenesenel i kamapim long ples klia dispela bel isi i stap insait long lain bilong God. Ol miting i save kamap long olgeta wik ol i mekim yumi i stap wanbel na strongim bel bilong yumi bambai yumi ken sanap strong. (Hibru 10:23-25) Tru tumas, Jehova i save skulim lain bilong em long tok i tru na “long stretpela pasin.” Em i save givim bel isi long lain bilong em. Em i gutpela tru long yumi inap kisim dispela gutpela bel isi!
Yu Inap Stori Long Dispela?
◻ Long taim bilong yumi, olsem wanem Jehova i ‘laikim Israel tru olsem na em i belhat long ol birua bilong ol’?
◻ Long ol kantri i gat bikpela pait tu, olsem wanem lain bilong Jehova i stap bel isi?
◻ Olsem wanem ‘ol liklik manki i pulap long taun’?
◻ I gat wanem ol samting i stap na Jehova inap skulim lain bilong em?
[Askim Bilong Stadi]
1, 2. (a) Taim yumi tingim ol samting i bin kamap bipo na i kam inap nau, yumi ken tok ol lain bilong graun i bin i stap bel isi o olsem wanem? (b) Long yia 607 paslain long Krais, Jehova i skulim Israel olsem wanem long bel isi?
3. Bilong truim tok profet Jehova i bin mekim long rot bilong Jeremaia, wanem ol bikpela samting i kamap na i skulim ol Israel long namba 2 bikpela samting bilong bel isi?
4. Olsem wanem Jehova i bin kirapim ol Israel long wokim gen haus bilong em? Em i mekim wanem tok promis long bel isi?
5. Wanem wanpela bikpela samting bilong sapta 8 bilong Buk Sekaraia?
6, 7. Wanem insait bilong tok bilong Jehova olsem “mi laikim [Saion] tru olsem na mi belhat long ol birua bilong ol”?
8. Long taim bilong Sekaraia, olsem wanem Jerusalem i kamap olsem taun bilong tok i tru na bipo em i no bin i stap olsem?
9. Wanem bikpela senis i painim “Israel tru bilong God” long 1919?
10. Kirap long 1919, ol Kristen God i bin makim ol i kisim wanem ol blesing insait long “kantri” bilong ol?
11. Ol bikman bilong ol lotu i holim nating nem Kristen ol i bin mekim wanem na ol i kamapim klia olsem ol i birua bilong lain bilong God?
12, 13. Olsem wanem Jehova i kamapim belhat bilong em long ol lotu i holim nating nem Kristen?
14. Wanem tok piksa i tok profet long wanpela lain i stap bel isi?
15. Maski ol kantri long graun i mekim ol pait, ol wokman bilong Jehova i kisim wanem bel isi?
16, 17. (a) Olsem wanem “ol lapun tru” na “ol liklik manki” i bin strongim oganaisesen bilong Jehova? (b) Wanem samting i kamapim long ples klia bel isi bilong lain bilong Jehova?
18, 19. Long ol yia bihain long 1919, olsem wanem Jehova i bin mekim wanpela wok, long tingting bilong ol man i hatwok tumas long mekim?
20. Tok profet i makim olsem wok bilong bungim lain bilong God bai i go bikpela inap long wanem mak?
21. Wanem samting i mekim na bel isi bilong lain bilong Jehova i stap yet na i go bikpela moa?
[Sat long pes 12-15]
RIPOT BILONG WOK BILONG OL WITNES BILONG JEHOVA LONG 1995
(Bilong save ol dispela rait i stap we long pes, lukim buk o magasin)
[Piksa long pes 8, 9]
Faiv handet yia samting paslain long Krais, ol Juda i wokim gen haus bilong God ol i kisim save olsem Jehova tasol inap givim bel isi long ol man