Wok Strong Long Mekim Ol Samting Bambai God i Ken Kisim Bek Yu!
“Ol pren tru bilong mi, . . . yupela i mas wok strong long mekim ol samting bambai God i ken kisim bek yupela, na mekim long pasin bilong pret na guria.”—FILIPAI 2:12, NW.
“OLSEM WANEM? Mama i bin karim yu olsem?” Dispela askim em i wanpela het-tok i bin kamap long skin bilong wanpela nius em planti man i save kaunim. Aninit long en i gat sampela tok olsem: ‘Ol pasin bilong yu, na wanem rot yu laik bihainim long i stap bilong yu. Ol nupela save ol i kisim i soim olsem yu bin kisim ol dispela pasin long papamama bilong yu.’ Ating kain tok olsem i mekim na sampela i ting ol i no inap senisim ol samting i kamap long i stap bilong ol.
1, 2. Wanem sampela tingting i bin kirapim planti man long pilim olsem ol i no inap senisim ol samting i kamap long i stap bilong ol?
2 Na sampela i ting, papamama i no bin mekim gut wok bilong ol olsem papamama, o tisa bilong ol i no bin mekim gut wok tisa bilong em, na dispela i mekim na nau i stap bilong ol i no gat amamas long en na ol i no inap senisim dispela samting. Ol i ting ol bai mekim ol wankain popaia olsem papamama i bin mekim, na ol bai mekim ol samting em laik nogut bilong skin i kirapim ol long mekim, na ol i no inap i stap gut long Jehova—o yumi ken tok, ol i ting ol i mas popaia long makim wanem rot ol i laik bihainim, na ol i no inap abrusim dispela samting. Tasol yu ting Baibel i skulim yumi olsem? Tru, i gat sampela man bilong lotu ol i strong long tok, Baibel i skulim yumi long kain tok olsem dispela—olsem God i makim pinis ol samting i mas painim yumi. Dispela bilip bilong ol i olsem: Long bipo yet God i makim pinis olgeta wan wan samting bai kamap long i stap bilong yu.
3 Ol dispela kain kain tingting i gat wanpela samting long en i wankain tasol, olsem: Yu no inap makim rot yu yet yu laik bihainim, na yu no inap senisim ol samting i kamap long i stap bilong yu. Tasol dispela kain tok inap bagarapim bel bilong yumi, a? Na nau dispela i mekim na hevi bilong yumi i go bikpela. Sindaun 24:10 i tok: “Sapos taim nogut i painim yu na bun bilong yu i slek, orait yu no gat strong tru.” Tasol i gat wanpela tok bilong Baibel inap strongim bel bilong yumi, em i tok yumi inap ‘wok strong long mekim ol samting bambai God i ken kisim bek yumi.’ (Filipai 2:12, NW) Orait yumi ken mekim wanem na bai yumi bilip strong long dispela gutpela tok bilong Baibel?
Yumi Gat Wok Long Strongim Yumi Yet
4. Tru, 1 Korin 3:10-15 i toktok long wokim haus long ol samting i no save paia, tasol dispela i no makim wanem samting?
4 Yumi ken tingim dispela tok piksa bilong Pol i stap long 1 Korin 3:10-15. Em i toktok long wanpela wok Kristen bilong wokim haus, na insait bilong dispela tok piksa inap makim wok bilong God insait long kongrigesen na ausait tu. Olsem wanem? Pol i makim olsem sapos wanpela disaipel i tingting pinis long mekim wok bilong Jehova na em i stap gut long dispela rot em yet i bin makim, dispela em wok bilong ol man i bin skulim em, na sapos em i no laik bihainim dispela rot, em asua bilong ol yet? Nogat, i no olsem. Pol i laik kamapim klia olsem tisa i mas wok strong tru long wokim gut haus. Tasol olsem yumi bin lukim long stori i kamap paslain long dispela, Pol i no tok, sumatin o disaipel i no inap makim wanem rot em yet i laik bihainim. Tru, dispela tok piksa bilong Pol i toktok long wok yumi mekim long ol narapela, na i no long wok yumi mekim bilong strongim yumi yet. Yumi inap save long dispela, long wanem, Pol i tok, sapos man i no wokim gut haus, orait wok bilong em bai lus, tasol em yet i no ken lus. Tasol sampela taim dispela tok piksa bilong Baibel i makim wok yumi mekim long yumi yet.
5. Wanem ol tok bilong Baibel i makim olsem ol Kristen i mas mekim wanpela samting long ol yet olsem wokim haus?
5 Yumi ken tingim Jut 20, 21: “Yupela ol brata tru, oltaim yupela i mas larim bilip bilong yupela i strongim bel bilong yupela, em dispela gutpela bilip God yet i bin givim long yupela. Na oltaim yupela i mas prea long strong bilong Holi Spirit. God i save laikim yupela tru, na yupela i mas i stap klostu long em na larim em i laikim yupela oltaim.” Dispela tok ol i tanim olsem “strongim,” Jut i kolim long wankain tok Grik olsem Pol i kolim long 1 Korin sapta 3, olsem “wokim haus.” Tasol i olsem Jut i laik tok, yumi mas wokim yumi yet antap long strongpela ston, em bilip bilong yumi. Taim Luk i raitim tok piksa bilong Jisas long man i bin wokim haus bilong em antap long ol bikpela bikpela ston insait long graun, em i kolim wankain tok Grik bilong “ston” olsem Pol i kolim long tok piksa bilong em long wok Kristen bilong wokim haus. (Luk 6:48, 49) Na tu, Pol i kolim dispela tok piksa bilong haus ol i wokim antap long “ston” taim em i tokim ol wanlain Kristen long ol i mas wok long kamap strong long ol samting bilong spirit. Em nau, Baibel i skulim yumi olsem yumi mas mekim yumi yet i kamap strong, olsem yumi wokim haus.—Efesus 3:15-19; Kolosi 1:23; 2:7.
6. (a) Stori long olsem wanem sampela i bin wok bung wantaim na nau wanpela disaipel Kristen i kamap, olsem wanpela haus ol i wokim. (b) Olgeta wan wan disaipel i gat wanem wok ol yet i mas mekim?
6 Olsem wanem? Wok bilong kamapim wanpela Kristen, olsem man i wokim haus, em i wok bilong wanpela man tasol? Orait yu ken ting olsem yu laik wokim wanpela haus. Yu go lukim wanpela man i gat save long wokim piksa bilong haus. Yu tingting pinis olsem yu yet bai mekim planti wok bilong wokim dispela haus, tasol yu baim wanpela man bilong wokim haus na em i ken wok wantaim yu na tokim yu long pasin bilong wokim gut haus. Sapos em i putim simen i go pas gut long strongpela ston insait long graun, na em i helpim yu long save gut long mekim wok long dispela piksa bilong haus, na em i tokim yu long ol gutpela kain samting yu ken baim bilong mekim dispela wok, na em i skulim yu long planti samting bilong wokim haus, bai yu tok, em i bin mekim gutpela wok. Tasol olsem wanem sapos yu sakim ol tok bilong em, na yu baim ol samting i gat liklik pe tasol o yu baim ol pipia samting, na yu no bihainim gut piksa bilong haus? Orait sapos haus i pundaun, yu no inap tok em asua bilong dispela man bilong wokim haus o man bilong wokim piksa bilong haus, a? Na i wankain tu long disaipel Kristen. Sampela man i bin wok bung wantaim, na nau wanpela haus, olsem wanpela disaipel, i kamap. Jehova yet em i Saveman bilong wokim piksa bilong haus. Taim gutpela Kristen, olsem “wanwok bilong God,” i skulim wanpela sumatin na helpim em long kamap strong, Jehova i save helpim dispela Kristen long mekim wok bilong em. (1 Korin 3:9) Tasol sumatin tu i gat wok. Bihain, em wok bilong em yet long makim wanem rot em i laik bihainim. (Rom 14:12) Sapos em i laik kisim ol gutpela pasin Kristen, orait em i mas wok strong long kisim ol dispela pasin, olsem wokim i kamap strong insait long em yet.—2 Pita 1:5-8.
7. Sampela Kristen i gat wanem hatwok? Wanem samting inap mekim gut bel bilong ol?
7 Tasol yu ting dispela i makim olsem ol pasin yumi bin kisim long papamama, na ol pasin bilong ples yumi go bikpela long en, na pasin bilong ol tisa bilong yumi long skulim yumi, ol dispela samting i samting nating tasol? Nogat tru. Baibel i makim olsem ol dispela samting i bikpela samting na ol inap kirapim yumi long bihainim sampela kain pasin o tingting. Planti pasin bilong sin ol i stap pinis long skin bilong yumi taim mama i karim yumi, na i hatwok tru long daunim. (Song 51:5; Rom 5:12; 7:21-23) Ol samting papamama i skulim pikinini long en, na sindaun bilong em, dispela em i strongpela samting tru bilong stiaim pikinini long bihainim gutpela pasin o pasin nogut. (Sindaun 22:6; Kolosi 3:21) Jisas i krosim strong ol hetman bilong lotu Juda long ol samting nogut wok tisa bilong ol i bin mekim long ol man. (Matyu 23:13, 15) Long nau, ol kain samting olsem i wok long mekim sampela samting long yumi olgeta. Olsem: Sampela long lain bilong God ol i kisim hatwok long ol hevi i bin painim ol taim ol i pikinini yet. Yumi mas mekim gut long ol na sori long ol. Na ol i ken tingim ol tok bilong Baibel na ol i ken save, i no olsem ol i mas mekim ol wankain popaia olsem papamama i bin mekim o ol i no inap i stap gut long God. Dispela save inap mekim gut bel bilong ol. Orait yumi ken tingim stori bilong sampela king bilong Juda na bai yumi inap klia gut long dispela samting.
Ol King Bilong Juda—Ol i Bihainim Rot Ol Yet i Makim
8. Papa bilong Jotam i no stap olsem gutpela piksa, tasol Jotam i makim wanem rot em yet i laik bihainim?
8 Usia i bin kamap king bilong Juda taim em i gat 16 krismas tasol, na em i stap king inap 52 yia. Inap planti yia insait long dispela taim, em i wok long “mekim gutpela pasin long ai bilong Bikpela, olsem papa bilong en Amasia i bin mekim.” (2 King 15:3) Jehova i mekim gut long em na em i winim planti pait. Tasol sori tru, Usia i hambak long strong bilong em na em i ting em i samting tru. Em i kisim pasin antap na em i bikhet long Jehova na em i go long alta bilong kukim ofa bilong smok i gat gutpela smel, em wanpela wok ol pris tasol inap mekim. Ol pris i krosim em, tasol em i belhat long dispela tok bilong ol. Orait nau Jehova i pinisim hambak bilong em—wantu sik lepra i kisim em na em i mas lusim haus king na em wanpela tasol i stap, i go inap long taim em i dai. (2 Stori 26:16-23) Orait pikinini bilong em, Jotam, em i lukim pasin bilong papa na em i mekim wanem? Dispela inap mekim na yangpela Jotam bai i bel nogut long Jehova i bin givim strafe long papa. Na pasin bilong ol manmeri tu inap stiaim Jotam, long wanem, ol i save mekim ol pasin bilong lotu i no stret. (2 King 15:4) Tasol Jotam i makim rot em yet i laik bihainim. “Jotam i mekim gutpela pasin long ai bilong Bikpela.”—2 Stori 27:2.
9. I gat wanem ol samting i stap bilong stiaim Ahas i go long gutpela rot? Tasol em i bihainim wanem kain pasin long i stap bilong em?
9 Jotam i bosim Juda inap 16 yia, na insait long ol dispela yia em i stap gut long Jehova. Olsem na pikinini bilong em Ahas inap lukim na bihainim dispela gutpela pasin bilong papa. Na i gat sampela samting moa inap stiaim Ahas long mekim gutpela pasin. Em i bin i stap long taim ol gutpela profet olsem Aisaia, Hosea, na Maika ol i mekim wok bilong autim tok profet long Juda. Tasol em i makim rot nogut em i laik bihainim. “Em i no mekim stretpela pasin long ai bilong Bikpela, olsem tumbuna bilong en, Devit, i bin mekim. Nogat.” Em i wokim ol imis bilong god Bal na lotu long en, na em i kukim sampela pikinini man bilong em long paia bilong givim olsem ofa long ol god bilong ol haiden. Maski i gat ol man i stap olsem gutpela piksa tru bilong stiaim em i go long gutpela rot, em i no stap gutpela king na wokman bilong Jehova—em i pundaun olgeta long mekim ol dispela wok.—2 Stori 28:1-4.
10. Ahas em i wanem kain papa? Tasol pikinini bilong em, Hesekia, i makim wanem rot em yet i laik bihainim?
10 Long ol samting bilong lotu tru bilong God, Ahas em i wanpela papa nogut tru. Tasol Hesekia i no inap makim husat man bai kamap papa bilong em, a? Ol dispela pikinini man em Ahas i bin kilim ol i dai bilong mekim ofa long Bal, yumi ken ting ol i brata bilong Hesekia yet. Orait ol dispela samting nogut long sindaun bilong Hesekia taim em i liklik yet, yu ting dispela i mekim na nau Hesekia i mas bihainim pasin i no stret na em i no stap gut long Jehova? Nogat tru. Long Juda i no gat planti gutpela king, tasol Hesekia em i wanpela gutpela king tru—em i stap gut long God, na em i gat gutpela tingting na save, na Jehova i laikim em tumas. “Bikpela i stap wantaim Hesekia na i helpim em.” (2 King 18:3-7) Na i gat as na yumi ken bilip olsem, taim Hesekia i yangpela yet na em i no kamap king yet, spirit bilong God i bin kirapim em long raitim Song 119. Sapos olsem, orait yumi ken save long as na em i bin raitim tok olsem: “Bel bilong mi em i hevi tru.” (Song 119:28) Maski planti hevi tru i painim Hesekia, em i larim Tok bilong Jehova i stiaim wokabaut bilong em. Song 119:105 i tok: “Tok bilong yu i olsem lam bilong helpim mi long wokabaut stret, na i olsem lait bilong soim rot long mi.” Tru tumas, Hesekia i makim rot em yet i laik bihainim—na em i makim rot i stret.
11. (a) Papa bilong Manase i bihainim gutpela pasin tru, tasol Manase i mekim wanem pasin bikhet moa yet long Jehova? (b) Taim Manase i lapun pinis, em i makim wanem rot em i laik bihainim? Dispela inap skulim yumi long wanem samting?
11 Tasol long wanpela gutpela king tru bilong Juda, i gat wanpela king nogut tru i kamap. Pikinini bilong Hesekia, em Manase, em i helpim pasin bilong lotuim ol god giaman, na mekim wok bilong ol spirit nogut, na olkain pasin nogut tru bilong bagarapim man. Baibel i tok: “Bikpela i tokim Manase wantaim ol manmeri long givim baksait long ol dispela pasin nogut bilong ol,” na ating em i givim dispela tok long ol long rot bilong ol profet. (2 Stori 33:10) Stori bilong ol Juda i tok, taim Manase i kisim dispela tok, em i kirap na putim tok long ol i mas kisim so na katim bodi bilong Aisaia long tupela hap. (Skelim wantaim Hibru 11:37.) Yumi no save olsem dispela tok i tru o nogat, tasol Manase i no putim yau liklik long ol tok lukaut God i bin givim long em. Em i bin kukim sampela pikinini man bilong em yet long paia olsem ofa taim ol i stap laip yet, wankain olsem tumbuna bilong em Ahas i bin mekim. Tasol taim em i lapun, sampela bikpela hevi tru i painim dispela man nogut, na em i tanim bel na senisim pasin bilong em. (2 Stori 33:1-6, 11-20) Stori bilong em i skulim yumi olsem maski man i makim rot nogut tru bilong bihainim, i no olsem God i no inap kisim em bek. Em inap senisim pasin bilong em.
12. Emon na pikinini bilong em, Josaia, i makim wanem narapela narapela rot ol i laik bihainim long mekim wok bilong Jehova?
12 Pikinini bilong Manase, em Emon, em inap kisim sampela gutpela tingting long pasin bilong papa bilong em long tanim bel. Tasol Emon i makim rot nogut em i laik bihainim. Em i “wok long mekim sin moa moa yet,” i go inap long taim sampela lain i kilim em i dai. Tasol pikinini bilong em Josaia i narapela kain long papa bilong em. Ol samting i bin painim tumbuna bilong em, em i larim ol dispela samting i skulim em. Taim em i gat 8-pela krismas tasol em i kamap king. Taim em i gat 16 krismas, em i kirap long lotu long Jehova, na long olgeta taim bihain em i gutpela king tru na em i stap gut long Jehova. (2 Stori 33:20–34:5) Em i makim rot em yet i laik bihainim—na em i makim rot i stret.
13. (a) Stori bilong ol dispela king bilong Juda yumi bin kamapim, em i skulim yumi long wanem samting? (b) Wok bilong papamama long skulim pikinini, em i bikpela samting olsem wanem?
13 Dispela stori yumi bin mekim long 7-pela king bilong Juda i skulim yumi long wanpela bikpela samting. Sampela king nogut tru ol i gat pikinini i gutpela tru, na sampela king i gutpela tru, ol i gat pikinini i nogut tru. (Skelim wantaim Saveman 2:18-21.) Tasol dispela i no makim olsem ol papamama i no gat wok long skulim pikinini, nogat. Ol papamama i save skulim pikinini long rot ol i laik bai em i bihainim, ol i save givim rot long pikinini long kamap wokman bilong Jehova na stap gut long em. (Lo 6:6, 7) Tasol sampela pikinini, maski papamama i stap gut long God na i wok strong long skulim ol, ol i makim rot nogut ol yet i laik bihainim. Na sampela pikinini, maski papamama i no bin mekim gutpela pasin liklik, ol yet i gat laik long givim bel long Jehova na mekim wok bilong em. Jehova i mekim gut long ol, olsem na ol samting ol i mekim long i stap bilong ol i kamap gutpela. Ating sampela taim yu save tingting, bai yu bihainim wanem rot? Orait tingim sampela gutpela tok bilong Jehova i ken soim yu olsem yu inap tru long makim rot i stret long bihainim!
Jehova i Save Bilip Long Yu!
14. Olsem wanem yumi save, Jehova i save long ol mak yumi no inap winim?
14 Jehova i save lukim olgeta samting. Sindaun 15:3 i tok: “Bikpela i save lukim olgeta samting i kamap long olgeta hap. Em i lukim ol gutpela man na ol man nogut tu.” King Devit i tok long Jehova olsem: “Ai bilong yu i lukim mi taim mi stap blut yet insait long bel bilong mama, na taim i no gat wanpela hap skin bilong mi i kamap yet, yu raitim pinis olgeta hap skin bilong mi long buk bilong yu.” (Song 139:16, NW) Olsem na Jehova i save long ol pasin kranki i stap long skin bilong yu na yu hatwok long daunim—maski yu bin kisim long papamama o yu bin kisim long ol narapela rot na yu no inap abrusim. Jehova i save gut long ol samting dispela i bin mekim long yu. Em i save long ol mak yu no inap winim. Na em i save marimari tu long yumi. Em i no strong long yumi mas mekim ol samting em yumi no inap mekim.—Song 103:13, 14.
15. (a) Ol man em ol i bel hevi stret long pasin ol narapela i bin mekim long ol, wanem samting inap mekim gut bel bilong ol? (b) Jehova i mekim gutpela pasin na em i givim wanem wok long yumi olgeta wan wan?
15 Tasol Jehova i no tingim yumi olsem man em sindaun bilong em o ol samting i bin painim em bipo i nogutim em na em i no inap helpim em yet. Sapos ol samting nogut i bin painim yumi bipo, yumi ken save, Jehova i nolaik tru long ol pasin nogut ol narapela i bin mekim long yumi, na dispela save inap mekim gut bel bilong yumi. (Song 11:5; Rom 12:19) Tasol sapos long laik bilong yumi yet yumi kirap na bihainim rot nogut, yu ting Jehova bai lukautim yumi na bai hevi i no ken painim yumi long dispela? Nogat tru. Baibel i tok: “Olgeta man wan wan bai i karim hevi bilong pasin ol yet i mekim.” (Galesia 6:5) Jehova i mekim gutpela pasin na em i bin makim wok bilong yumi ol manmeri olsem: Em wok bilong yumi yet long makim rot yumi laik bihainim, olsem yumi bai mekim pasin i stret na mekim wok bilong em. Dispela i stret wantaim tok Moses i bin givim long ol Israel: “I gat rot bilong i stap gut na rot bilong i dai. Long wanpela rot God bai i mekim gut long yupela, na long narapela rot bai yupela i painim bagarap. Orait nau yupela i mas makim wanem rot yupela i laik bihainim. . . . Tasol mi laikim yupela i mas bihainim rot bilong i stap gut.” (Lo 30:19) Jehova i bilip olsem yumi tu inap makim rot i stret long bihainim. Yumi save olsem wanem?
16 Tingim tok bilong aposel Pol, em i tok: “Olsem na ol pren tru bilong mi, . . . yupela i mas wok strong long mekim ol samting bambai God i ken kisim bek yupela, na mekim long pasin bilong pret na guria, [long wanem,] yumi save, God i save wok insait long bel bilong yupela. Em yet i kirapim laik bilong yupela bilong mekim ol pasin em i laikim, na em i givim yupela strong bilong mekim ol dispela pasin.” (Filipai 2:12, 13, NW) Wanpela tok Grik ol i tanim olsem “wok strong,” i makim olsem man i wok i go bilong pinisim wanpela wok. Olsem na God i no bin makim long bipo yet olsem yumi bai pundaun o lusim wok bilong em na yumi no inap senisim dispela samting. God Jehova i bilip olsem yumi inap mekim wok em i bin givim long yumi—em dispela wok bai yumi mekim i go na nau God i ken kisim bek yumi; sapos em i no bilip olsem, orait em i no inap kirapim Pol long raitim dispela tok. Tasol olsem wanem yumi inap winim dispela wok? Yumi no inap mekim long strong bilong yumi yet. Sapos yumi yet i gat strong long mekim, orait i no gat wok long yumi mas “pret na guria.” Jehova ‘i save wok insait long bel bilong yumi,’ olsem spirit holi bilong em i save wok insait long tingting na bel bilong yumi, na i helpim yumi na bai yumi gat ‘laik long mekim ol pasin em i laikim.’ Em i mekim pasin sori na helpim yumi olsem, orait i no gat as na bai yumi no inap makim rot i stret long bihainim na i stap gut long dispela rot, a? Nogat tru!—Luk 11:13.
17. Yumi inap senisim wanem ol pasin bilong yumi yet? Olsem wanem Jehova i save helpim yumi long mekim olsem?
17 Tru, bai i gat sampela hevi i laik pasim rot bilong yumi na yumi mas winim—ating inap planti yia yumi bin mekim sampela pasin kranki na kisim sampela pasin nogut long ol narapela man, na dispela inap paulim tingting bilong yumi. Tasol spirit bilong Jehova bai helpim yumi na yumi inap winim ol dispela hevi! Olsem Pol i bin tokim ol Kristen long Korin, Tok Bilong God i gat bikpela strong na em inap “brukim ol strongpela banis,” olsem ol samting i pas strong tru long yumi. (2 Korin 10:4) Jehova inap helpim yumi long senisim tru pasin bilong yumi. Baibel i tok yumi mas ‘rausim olpela pasin’ na “kamap ol nupela manmeri, em ol manmeri God i mekim ol i kamap nupela na . . . pasin bilong ol i stretpela olgeta na i holi tru.” (Efesus 4:22-24) Olsem wanem? Spirit bilong Jehova em inap helpim yumi tru long senisim pasin bilong yumi olsem? Em inap tru! Spirit bilong God i save kamapim ol gutpela kaikai tru long yumi—olsem ol gutpela gutpela pasin em yumi olgeta i laik kisim. Namba wan em pasin bilong laikim tru ol narapela.—Galesia 5:22, 23.
18. Olgeta wan wan man na meri i gat tingting, ol yet inap makim wanem rot bilong bihainim? Dispela i mas helpim yumi long pasim tok long bel olsem yumi bai mekim wanem?
18 Em nau, dispela i kamapim long ples klia wanpela bikpela tok i tru i mekim gut bel bilong yumi, olsem: God Jehova inap long laikim moa yet ol man, na i no gat mak bilong en—em inap mekim i go olgeta, na em i bin wokim yumi i kain olsem em yet. (Stat 1:26; 1 Jon 4:8) Olsem na yumi yet inap makim rot bilong yumi, olsem yumi bai laikim tru Jehova. Na pasin bilong laikim tru God Jehova, dispela yet i makim samting bai painim yumi bihain, na i no ol pasin yumi bin mekim bipo, o ol pasin kranki yumi bin kisim, o sin yumi kisim long papamama na em i laik stiaim yumi long mekim rong. Adam na Iv i mas i gat dispela pasin bilong laikim tru God Jehova bambai ol inap i stap gut long em long Iden. Yumi olgeta wan wan i mas laikim em tru olsem, bambai yumi ken abrusim bagarap long Armagedon na winim laspela traim long pinis bilong Wan Tausen Yia Bilong Krais i Stap King. (KTH 7:14; 20:5, 7-10) Yumi olgeta wan wan, maski yumi gat wanem kain sindaun, yumi inap kisim dispela pasin bilong laikim tru Jehova. (Matyu 22:37; 1 Korin 13:13) Orait yumi mas pasim tok long bel long laikim tru Jehova na mekim dispela laik i go bikpela tru olsem yumi wokim wanpela haus, na yumi mekim olsem i go inap oltaim oltaim.
Yu Ting Olsem Wanem?
◻ Wanem sampela tingting bilong ol man i pait wantaim tok bilong Baibel olsem yumi olgeta wan wan i mas karim hevi bilong ol samting yumi mekim?
◻ Olgeta wan wan Kristen i mas mekim wanem long ol yet, olsem wokim haus?
◻ Olsem wanem stori bilong ol king bilong Juda i kamapim klia olsem olgeta wan wan man i save makim rot ol yet i laik bihainim?
◻ Olsem wanem Jehova i strongim bel bilong yumi olsem yumi inap makim stretpela rot bilong bihainim, maski famili o ol wanples samting i mekim ol pasin i no stret?
3. Baibel i givim wanem gutpela tok long yumi olsem yumi yet inap mekim ol samting na bai i stap bilong yumi i gutpela long bihain?
16. Taim yumi ‘wok strong long mekim ol samting bambai God i ken kisim bek yumi,’ olsem wanem yumi inap winim dispela wok?
[Piksa long pes 15]
Ol pasin yu bin kisim long papamama, yu ting dispela i makim ol samting bai painim yu bihain?
[Piksa long pes 17]
Maski papa i no stap olsem gutpela piksa, King Josaia i makim rot em yet bai bihainim, olsem em bai mekim wok bilong God