Ol Man Inap “Lus Long Solwara”
LONG nait, wanpela sip i gat 276 pasindia i kam klostu long wanpela ailan bilong solwara Mediterenian. Skin bilong ol boskru na ol pasindia i no gat strong moa, long wanem, inap 14 de strongpela win i sakim nabaut sip bilong ol long biksi. Long taim san i wok long kamap ol i lukim wanpela pasis, na ol i laik stiaim sip i go sua long dispela hap. Tasol poret bilong sip i pas strong long wesan, na si i paitim stan bilong sip na brukim. Olgeta man i lusim sip na ol i kamap long nambis bilong Malta—sampela i subim wara na kamap long nambis na sampela i hangamap long plang o sampela narapela samting na ol i trip i go sua. Skin bilong ol i kol na strong bilong ol i pinis, na ol i hatwok long lusim biksi. Wanpela bilong ol pasindia em aposel Kristen Pol. Ol i laik kisim em i go long Rom bilong kamap long kot.—Aposel 27:27-44.
Taim sip i bagarap long ailan Malta, dispela em i no namba wan taim bikpela hevi i painim Pol long solwara na klostu em i dai. Sampela yia paslain long dispela hevi i kamap, em i tok: “Tripela taim sip mi stap long en, em i bagarap, na wanpela nait na wanpela san mi trip i stap long solwara.” Na em i tok moa olsem, klostu em i “lus long solwara.” (2 Korin 11:25-27) Pasin bilong raun long solwara i bin helpim Pol long mekim wok God i givim long em olsem wanpela aposel “bilong ol arapela lain.”—Rom 11:13.
Long taim bilong ol aposel ol sip i raun i go inap long wanem ol hap? Olsem wanem pasin bilong raun long sip i helpim lotu Kristen i go kamap long ol narapela narapela hap? Ol man inap raun gut long sip? Ol i bin mekim wok long wanem kain sip? Sindaun bilong ol pasindia long sip i olsem wanem?
Ol Rom i Mekim Bikpela Wok Long Ol Sip
Ol Rom i kolim solwara Mediterenian olsem Mare Nostrum—olsem Solwara Bilong Yumi. Ol Rom i bosim hap bilong solwara ol sip i raun long en, na dispela em i bikpela samting long ami bilong ol na long sampela narapela samting tu. Planti taun bilong ol kantri em Gavman Rom i bosim ol i stap long nambis, na ol narapela taun i kisim kago bilong ol long rot bilong ol dispela taun. Olsem: Ples ol sip bilong Rom i sua long en em Ostia, na Korin i gat tupela ples ol sip i save sua long en, em Lekiam na Senkria, na Antiok bilong Siria i kisim ol kago long rot bilong Selusia. Ol sip i bin raun gut long solwara namel long ol dispela taun, na dispela i helpim gut pasin bilong salim kwik tok i go i kam, na i helpim gavman Rom long bosim gut ol provins bilong en.
Na tu, Rom i mekim bikpela wok long ol sip bilong kisim kaikai i kam long ol. Inap wan milion manmeri i sindaun long Rom, olsem na ol i mas i gat planti wit—inap olsem 250,000 ton i go inap 400,000 ton long olgeta yia. Ol i kisim we dispela wit? Flavius Josifas i kamapim tok bilong Herot Agripa Namba 2, olsem: Inap 8-pela mun long wanpela yia Not Afrika i salim kaikai i kam long Rom, na Isip i salim wit bilong helpim dispela taun long ol narapela 4-pela mun. Planti tausen sip i insait long dispela wok bilong bringim wit i kam long dispela taun.
Bilong inapim laik bilong ol Rom long kisim ol gutpela gutpela samting, ol sip i save kisim kain kain samting i kam. Ol sip i bringim ain na bras samting, ston, na ston mabel, i kam long Saiprus, kantri Grik, na Isip. Na ol diwai i kam long Lebanon. Wain i kam long Smerna, ol galip samting i kam long Damaskus, na ol det i kam long Palestain. Wel sanda na raba i kam long Silisia, gras bilong sipsip i kam long Miletus na Laodisia, ol laplap samting i kam long Siria na Lebanon, ol retpela laplap i kam long Tair na Saidon. Ol pen bilong penim laplap i kam long Taiataira, na glas i kam long Aleksandria na Saidon. Silk, koten, tit bilong elefan, na kari samting, ol i kam long Saina na India.
Yumi ken tok wanem long dispela sip em Pol i bin raun long en na i bagarap long Malta? Em wanpela sip bilong karim wit, na em i ‘bilong taun Aleksandria na i laik i go long Itali.’ (Aposel 27:6) Sampela famili bilong Grik na Fonisia na Siria ol i bosim ol lain sip bilong karim wit, na ol yet i makim ol samting bilong ol sip olsem boskru samting. Tasol gavman i rentim ol sip. Man bilong raitim stori bilong ol samting i bin kamap bipo, em William M. Ramsay, i tok: “Olsem long wok bilong kisim takis, gavman yet i no stretim na kisim ol samting bilong sip na painim boskru bilong mekim dispela bikpela wok—gavman i givim dispela wok long ol lain i wok kontrak.”
Bilong pinisim raun bilong em i go long Rom, Pol i kalap long wanpela sip i gat piksa bilong “tupela pikinini man bilong god Sus” long poret bilong en. Dispela sip tu i bilong Aleksandria. Em i bin sua long taun Puteoli long Pasis Bilong Nepels, em hap planti lain sip bilong karim wit i save sua long en. (Aposel 28:11-13) Kirap long Puteoli—nau ol i kolim Posuoli—ol i karim kago i go long Rom long rot o ol i putim kago long ol liklik sip na ol dispela sip i bihainim nambis i go long hap bilong not, na bihain ol sip i bihainim wara Taiba i go insait tru long Rom.
Ol Pasindia Long Ol Kago-Sip
Bilong wanem Pol na ol soldia i was long em, ol i raun long wanpela kago-sip? Bilong bekim dispela askim yumi mas save, raun bilong ol man long solwara olsem pasindia long wanpela sip i olsem wanem long dispela taim.
Long taim bilong ol aposel i no gat ol sip bilong karim ol pasindia tasol. Ol man i save raun long ol kago-sip. Na kain kain man i raun long ol dispela sip—man i wok long gavman, saveman, man bilong autim tok, glasman, man bilong wokim ol piksa samting, man bilong pilai spot, bisnisman, turis, na man i go lotu long narapela hap.
Tasol i gat ol liklik sip i bin karim ol pasindia na kago long ol wara klostu long nambis. Ating taim Pol i stap long Troas em i kisim kain sip olsem bilong go “long Masedonia.” Sampela taim ating Pol i kalap long ol liklik sip taim em i go i kam long Atens. Na ating Pol i bin kisim wanpela liklik sip taim em i lusim Troas na raun long ol ailan klostu long nambis bilong Esia Maina bilong go long taun Patara. (Aposel 16:8-11; 17:14, 15; 20:1-6, 13-15; 21:1) Ol i mekim wok long ol liklik sip bilong go hariap long wanpela hap, tasol ol i no inap go longwe long nambis. Olsem na ol sip i kisim Pol i go long Saiprus na bihain long Pamfilia, na ol sip em i bin raun long en bilong lusim Efesus na i go long Sisaria na lusim Patara i go long Tair, em ol sip i bikpela liklik. (Aposel 13:4, 13; 18:21, 22; 21:1-3) Sip em Pol i bin stap long en na i bagarap long Malta, em tu i wanpela bikpela sip. Ol dispela kain sip i bikpela olsem wanem?
Tok bilong sampela buk i mekim na wanpela saveman i tok: “Wanpela liklik [sip] ol man bilong bipo ol i amamas long mekim wok long en i gat olsem 70 i go 80 ton. Bikpela bilong planti sip long taim bilong ol Grik em 130 ton. Planti taim ol man i bin mekim wok long ol sip i bikpela moa, olsem 250 ton. Long taim bilong ol Rom, bilong mekim wok bilong king ol i raun long ol bikpela sip, ol i laikim ol sip i gat 340 ton. Ol bikpela sip tru i raun long dispela taim i gat olsem 1300 ton, na ating sampela i bikpela moa.” Wanpela stori ol i bin raitim long yia 150 C.E. samting i tok, i gat wanpela sip bilong Aleksandria na i bilong karim wit, nem bilong en Isis, na longpela bilong en i winim 55 mita, na braitpela bilong en inap olsem 14 mita, na ples bilong putim kago em i go daun olsem 13 mita, na ating em inap karim olsem 1,000 ton wit na sampela handet pasindia.
Olsem wanem ol i lukautim ol man i raun long ol sip i karim wit? Nambawan wok bilong ol sip em bilong karim ol kago, olsem na ol i no tingim tumas ol pasindia. Ol i no givim kaikai o narapela samting long ol—ol i givim wara tasol. Ol pasindia i slip long dek bilong sip. Ating long nait ol i putim sampela haus sel samting na long moningtaim ol i rausim gen. Ol i larim ol pasindia long mekim wok long haus kuk bilong sip, tasol ol pasindia yet i mas bringim kaikai i kam na ol samting bilong kukim kaikai, na waswas, na slip—olsem ol sospen na sitbet samting.
Ol Inap Raun Gut Long Solwara?
Ol man i raun long sip long taim bilong ol aposel ol i mas lukim gut ol samting, long wanem, ol i no gat ol masin na kompas samting bilong stiaim sip. Olsem na taim ol i lukim gut ol samting, kirap long pinis bilong mun Me na i go inap long namel bilong mun Septemba, ol inap raun gut. Long tupela mun paslain na tupela mun bihain long dispela taim, ol bisnisman i raun long solwara ol i save ol inap kisim bagarap. Tasol long taim bilong kol, planti taim smok na ol klaut i karamapim ol mak bilong graun, na long san ol klaut i haitim san na long nait ol i haitim ol sta. Kirap long Novemba 11 i go inap long Mas 10, ol sip i no save raun (long tok Latin ol i kolim mare klausum)—ol bai raun tasol sapos ol i mas mekim hariap wanpela samting. Ol sip i raun long mun Oktoba samting, ating taim nogut inap kamap na ol i mas stap long ol pasis bilong ol narapela kantri bilong hait long ol bikpela win long taim bilong kol.—Aposel 27:12; 28:11.
Tru, ol sip inap kisim bagarap long solwara na ol i no inap raun long olgeta mun, tasol olsem wanem? Pasin bilong raun long sip i winim pasin bilong raun long graun? Yes, em i win! Taim man i raun long sip, skin i no save les tumas, na em i no save tromoi bikpela mani tumas, na em inap kamap hariap moa long wanpela hap, winim raun long graun. Sapos i gat strongpela win liklik, sip inap raun olsem 150 kilomita long wanpela de. Sapos man i raun long lek, em inap raun olsem 25 i go 30 kilomita long wanpela de.
Win i bikpela samting bambai sip inap raun hariap. Sip i lusim Isip na i go long Itali, long olgeta taim em i mas winim ol strongpela win, maski em gutpela taim bilong ol sip i raun. Sotpela rot ol sip i ken bihainim bilong kamap long Itali em long rot i go long ailan Rodes o Maira o wanpela narapela taun i stap long nambis bilong provins Lisia long Esia Maina. Wanpela taim dispela sip Isis, em sip bilong karim wit, em i bin lusim Aleksandria na strongpela win i kamap na sip i lusim rot em i mas bihainim, olsem na em i anka long Pireus inap 70 de bihain long em i lusim Aleksandria. Sapos dispela sip i gat ol win i kam long hap bilong not-wes long baksait bilong en, em inap lusim Itali na go bek long Aleksandria insait long 20 i go inap 25 de. Sapos man i wokabaut long lek na i no gat ren samting, em i mas lusim olsem 150 de bilong mekim wankain raun.
Gutnius i Go Kamap Long Planti Kantri
Pol i bin save olsem sapos sip i raun long taim nogut, em inap kisim bagarap. Em i bin tokim boskru olsem ol i no ken raun long pinis bilong mun Septemba o kirap bilong mun Oktoba, em i tokim ol: “Yupela ol man, harim. Mi save, sapos yumi go nau, bai yumi painim taim nogut tru, na planti samting bai i lus. I no ol kago na sip tasol bai i lus. Nogat. Yumi bai lusim laip bilong yumi tu.” (Aposel 27:9, 10) Tasol kepten bilong ol soldia i sakim dispela tok, olsem na sip i bagarap long Malta.
I go inap long pinis bilong wok misineri bilong em, Pol i bin kisim bikpela hevi long sip inap 4-pela taim. (Aposel 27:41-44; 2 Korin 11:25) Tasol maski ol man bilong autim tok long bipo ol i save olsem bikpela hevi inap painim ol taim ol i raun long sip, ol i no larim dispela samting i pasim ol long raun. Ol i mekim wok long olgeta kain rot bilong raun bambai ol inap autim gutnius bilong Kingdom i go long olgeta hap. Ol i bihainim tok bilong Jisas, olsem na ol manmeri long olgeta hap i harim gutnius. (Matyu 28:19, 20; Aposel 1:8) Pasin bilong ol long givim bel tru long autim tok, na bilip bilong ol man i bihainim gutpela piksa bilong ol, na spirit holi bilong Jehova i bin stiaim ol, ol dispela samting i mekim na gutnius i bin go kamap long olgeta hap bilong graun.
[Piksa Kredit Lain long pes 31]
Pictorial Archive (Near Eastern History) Est.