Ol “Breteren Bilong Polan”—Bilong Wanem Ol Man i Mekim Nogut Long Ol?

Long 1638, palamen bilong Polan i mekim wanpela samting nogut tru long wanpela liklik lain bilong lotu ol i kolim Breteren Bilong Polan. Ol i bagarapim wanpela haus lotu na masin bilong prinim buk samting bilong dispela lain. Ol i pasim Yunivesiti Bilong Rakau, na ol profesa i bin skulim ol man long yunivesiti, ol i mas go sindaun long narapela kantri.

Twenti yia bihain, palamen i mekim wanpela samting moa. Palamen i tokim olgeta memba bilong dispela lain, ating ol inap olsem 10,000 o sampela moa, long lusim kantri. Olsem wanem dispela hevi i go bikpela olsem long wanpela kantri, em long dispela taim, ol i tok em wanpela kantri i winim ol narapela kantri long Yurop long mekim gut long ol lotu? Ol Breteren Bilong Polan i bin mekim wanem na ol man i mekim nogut tru olsem long ol?

DISPELA hevi i bin kamap taim bikpela kros i kamap insait long Misin Kalvin Bilong Polan. Wanpela bikpela samting ol i tok pait long en, em tok bilong God Triwan. Ol hetman bilong wanpela lain insait long misin bilong tingim ol nupela bilip samting, ol i sakim dispela tok, long wanem, em i no wanpela tok i stap long Baibel. Dispela i mekim ol hetman bilong misin i kros, na dispela lain i bruk long misin.

Ol Kalvin i kolim dispela lain i no wanbel long tingting bilong ol, olsem lain Arius.a Tasol ol man i insait long dispela nupela lain, ol i kolim ol yet olsem Kristen o Breteren Bilong Polan. Narapela nem bilong ol, em lain Sosinus. Dispela nem i kam long Lailius Sosinus, em wanpela man bilong Itali em tingting bilong Servitus i bin stiaim em, na kandere bilong em, em Faustus Sosinus, em i bin go long Polan na kamap wanpela hetman long dispela nupela lain bilong lotu.

Long dispela taim wanpela bikman bilong Polan, em Yan Sienienski, em i laik givim dispela nupela lain bilong lotu ‘wanpela ples ol i ken stap isi long en na longwe long ol man’ na bai ol i ken kamap strong. King bilong Polan i orait long dispela, olsem na Sienienski i kamapim taun bilong Rakau; bihain dispela taun i kamap nambawan ples bilong lain Sosinus long Polan. Sienienski i orait long ol man bilong Rakau i mekim planti samting i stret ol i ken mekim, olsem stap fri bilong mekim lotu.

Ol man bilong wokim kain kain samting, ol dokta, ol man bilong wokim marasin, ol man nating, ol man i gat nem na ol i bilong narapela narapela lotu, ol i kam sindaun long dispela nupela taun. Na tu, ol pasto bilong Polan, Lituenia, Transilvenia, Frans, na Inglan, ol i kam long dispela taun. Tasol i no olgeta bilong ol dispela nupela man i kam long Rakau ol i wanbel long ol bilip bilong lain Sosinus, nogat. Olsem na inap 3-pela yia, olsem kirap long 1569 i go inap 1572, Rakau i kamap wanpela taun bilong pulim tok lotu i go i go. Wanem samting i kamap long dispela?

Misin i Bruk

Lain Sosinus yet i bruk; sampela ol i bihainim ol tingting i narapela kain long tingting bilong ol narapela. Tasol maski i gat sampela samting ol i no wanbel long en, ol bilip bilong tupela lain wantaim i narapela kain long ol narapela misin. Ol i sakim tok long God Triwan; ol i no laik bihainim pasin bilong baptaisim pikinini; ol i no holim gan na mekim pait, na ol i no laik mekim wok gavman.b Na tu, ol i no bilip long wanpela ples nogut bilong kisim pen olsem bikpaia samting. Long olgeta dispela samting, ol i givim baksait long lotu ol man i kisim long ol tumbuna em planti man i save bihainim.

Ol pasto bilong lain Kalvin na ol pris Katolik tu, ol i birua nogut long dispela lain. Tasol ol pasto bilong lain Sosinus inap skulim ol man long tingting bilong ol, long wanem, long dispela taim ol man i orait long ol narapela lotu. Tupela king bilong Polan, em Sigismun Namba 2 Ogastus na Stiven Batori, ol i bin wok strong long kamapim dispela tingting bilong orait long ol narapela lotu.

Bikpela Wok Bilong Budni

Wanpela Baibel ol Kalvin i bin tanim na planti man i save mekim wok long en long dispela taim, em i no helpim planti man i kaunim. Ol i no bin tanim dispela Baibel long ol tok ples bilong pastaim, nogat, ol i bin tanim long Baibel Vulgate em ol i bin wokim long tok Latin, na long wanpela Baibel long tok Frans bilong dispela taim. Wanpela buk i tok: ‘Ol i no raitim stret tru ol tok, ol i bin tingim tasol pasin bilong raitim ol tok, olsem em i mas naispela.’ Ol i bin raitim planti popaia long dispela Baibel. Olsem na ol i askim wanpela saveman, em Simon Budni, long stretim dispela Baibel. Em i tingting long wokim gen dispela Baibel, long wanem, em i ting em bai hatwok moa long stretim. Budni i kirap mekim dispela wok long yia 1567 samting.

Taim Budni i wok long tanim tok, em i skelim gut tru olgeta wan wan tok na ol narapela tok em insait bilong en i wankain. Bipo i no gat wanpela man long Polan i bin mekim kain pasin olsem. Long ol hap em i hatwok long tanim tok Hibru i go long tok Polan, em i raitim tok long arere bilong pes wankain stret olsem long tok Hibru. Taim em i mas mekim, em i raitim ol nupela tok, na tu, em i mekim wok long tok Polan ol man i save mekim wok long en olgeta taim. Em i gat tingting long givim long ol man i save kaunim Baibel, wanpela Baibel i bihainim gut tok bilong Baibel Hibru, na tok bilong en i no paul liklik.

Long 1572, ol i prinim Baibel olgeta bilong Budni. Tasol ol lain bilong prinim dispela Baibel ol i senisim sampela tok bilong Budni long Ol Skripsa Grik. Maski ol i mekim olsem, Budni i kirap na tanim gen Ol Skripsa Grik, na dispela wok i pinis tupela yia bihain. Ol Skripsa Grik Budni i tanim gen i nambawan tru, winim ol narapela Baibel ol man i bin tanim bipo long tok Polan. Na tu, long planti hap bilong Baibel em i putim bek nem bilong God, em Jehova.

Klostu long yia 1600 i go inap long 1630 samting, Rakau, nambawan biktaun bilong dispela nupela lain bilong lotu, em i kamap ples tru bilong ol samting bilong lotu na save. Ol hetman na ol man bilong raitim buk long lain Breteren Bilong Polan, ol i wokim ol liklik nius na buk samting long dispela ples.

Ol i Kirapim Ol Man Long Skul

Wok bilong ol Breteren long wokim ol buk samting i strong moa long yia 1600 samting taim ol i kirap mekim wok long wanpela masin long Rakau. Dispela masin inap wokim ol liklik pepa na ol bikpela buk long sampela tok ples. I no longtaim na Rakau i kamap nambawan taun bilong prinim ol buk samting, winim ol narapela taun long Yurop i gat gutpela save long prinim ol buk. Ol i ting, insait long 40 yia ol i bin prinim 200 buk long dispela masin long Rakau. Ol Breteren i gat wanpela faktori bilong wokim pepa i stap klostu long Rakau, na faktori i bin kamapim gutpela pepa tru bilong prinim ol dispela buk.

Kwiktaim ol Breteren Bilong Polan i luksave olsem ol i mas skulim ol wanbilip na ol narapela man. Bilong mekim olsem, ol i kamapim Yunivesiti Bilong Rakau long 1602. Ol pikinini man bilong ol Breteren Bilong Polan na ol pikinini man bilong ol Katolik na Talatala tu, ol i skul long dispela yunivesiti. Maski dispela yunivesiti em i wanpela skul bilong lotu, ol i skulim ol man long ol narapela samting tu. Olsem: Ol narapela tok ples, stretpela pasin ol i mas mekim long ol man, ol samting bilong mani, ol samting i bin kamap bipo, ol samting bilong lo, ol tok bilong pulim tingting bilong man, ol lo i bosim ol samting long graun na long antap, pasin bilong bungim ol namba, wok dokta samting, na spot. Yunivesiti i gat bikpela laibreri, na em i bin wok long kisim planti buk moa, long wanem, ol i gat masin bilong prinim buk.

Bihain long yia 1600, i olsem lain bilong ol Breteren Bilong Polan bai go bikpela moa. Tasol dispela i no bin kamap.

Misin na Gavman i Pait Long Ol

Wanpela man (Zbigniew Ogonowski) bilong lain Polish Academy of Sciences, em i tok: “Long yia 1628 samting, i stap bilong lain Arius long Polan i wok long bagarap kwiktaim.” Dispela i kamap, long wanem, ol pris Katolik i wok strong moa long mekim sampela samting. Ol pris i bin painim kain kain rot bilong pundaunim ol Breteren Bilong Polan, olsem long rot bilong bagarapim nem bilong ol. Na ol i no hatwok long mekim olsem taim gavman i senis long Polan. Nupela king bilong Polan em Sigismun Namba 3 Vasa, na em i wanpela birua bilong ol Breteren Bilong Polan. Ol man i kam bihain long kisim wok bilong em, olsem Jon Namba 2 Kasimir Vasa, ol tu i helpim wok bilong Misin Katolik long daunim ol Breteren.

Pasin birua i go bikpela tru taim ol i sutim tok long sampela sumatin long Yunivesiti Bilong Rakau, olsem long laik bilong ol yet ol i bin mekim nogut long kruse. Dispela samting i kamap olsem rot bilong daunim Rakau olsem nambawan biktaun bilong ol Breteren Bilong Polan. Long kot bilong palamen ol i sutim tok long bos bilong yunivesiti olsem, taim em i helpim Yunivesiti Bilong Rakau na masin bilong en bilong prinim ol buk, em i strongim ‘pasin nogut long i go nabaut.’ Ol i sutim tok long ol Breteren Bilong Polan olsem ol i laik daunim gavman, na ol i insait long ol pati nogut na dring na kaikai planti tumas, na ol i save pamuk. Palamen i tok ol i mas pasim Yunivesiti Bilong Rakau, na masin bilong prinim ol buk na haus lotu bilong ol Breteren Bilong Polan, ol i mas bagarapim. Ol i tokim ol Breteren long lusim taun. Ol profesa bilong yunivesiti i mas lusim kantri. Sapos ol i no go, ol i mas i dai. Sampela Breteren Bilong Polan ol i bin go sindaun long sampela hap ol inap stap gut long en, olsem Silesa na Slovakia.

Long yia 1658, palamen i putim tok olsem, insait long 3-pela yia ol Breteren Bilong Polan i mas salim graun samting bilong ol na go long narapela kantri. Bihain ol i sotim dispela hap taim i go long tupela yia. Man i laik bihainim ol bilip bilong ol Breteren bihain long dispela hap taim, ol bai kilim em i dai.

Sampela bilong lain Sosinus ol i go sindaun long Netelan, na long dispela hap ol i bin wok yet long prinim ol buk samting. Long Transilvenia, ol i gat wanpela kongrigesen i go inap long yia 1700 samting. Long ol miting bilong ol, em ol i bin mekim inap 3-pela taim long olgeta wik, ol i bin mekim ol singsing i save litimapim nem bilong God, na ol i harim tok bilong lotu, na ol i kaunim katekismo, em wanpela buk ol Breteren i bin wokim bilong kamapim ol bilip bilong ol. Bilong helpim kongrigesen long i stap klin, ol i givim tok long ol wanbilip bilong stretim ol, na bilong strongim ol, na sapos ol i mas mekim, ol i rausim wanbilip long kongrigesen.

Ol Breteren Bilong Polan ol i man bilong stadi gut long Baibel. Ol i kisim save long sampela gutpela tok i tru bilong Baibel, na ol i no pret long autim ol dispela tok long ol narapela man. Tasol bihain, ol i go nabaut long Yurop, olsem na ol i hatwok moa long i stap wanbel. Bihain ol Breteren Bilong Polan i lus olgeta.

[Ol Futnot]

[Piksa long pes 23]

Haus, bipo em haus bilong wanpela pasto bilong lain Sosinus

[Ol Piksa long pes 23]

Antap: Rakau long nau; long han sut em haus bruder ol i kamapim long 1650 bilong pinisim olgeta samting bilong lain Arius; daunbilo: Long dispela hap ol pris Katolik i sanapim wanpela kruse bilong kirapim kros wantaim ol Breteren Bilong Polan

[Piksa Kredit Lain long pes 21]

Title card of Biblia nieświeska by Simon Budni, 1572