Ol i Bin Painim Wanem Samting Long Jesril?

PLES em taun Jesril bilong bipo i bin stap long en, i bin stap nating inap planti handet yia. Long wanpela taim bipo, dispela taun i bikpela samting long ol stori bilong Baibel long ol samting i bin kamap long bipo. Tasol long nau, ol gutpela samting bilong en i pinis, na bikpela hap graun i karamapim dispela taun na em i stap olsem wanpela hip graun tasol. Nau long dispela taim, ol saveman bilong painim ol samting bilong bipo ol i kirap skelim ol pipia ston samting bilong taun Jesril. Ol dispela ston i givim wanem save long yumi long ol stori bilong Baibel?

Jesril Long Baibel

Dispela taun i stap long hap is bilong Ples Daun Bilong Jesril, na Jesril i stap long wanpela hap graun bilong Israel bilong bipo i gat gutpela gris long en. Liklik maunten More i stap long hap not long hapsait bilong ples daun, em ples ol Midian i bin wokim kem taim ol i redi long pait long Jas Gideon na ami bilong em. Long hap bilong is, hulwara bilong Harot i stap long as bilong maunten Gilboa. Ami bilong Gideon i gat planti tausen man long en, na long dispela hap Jehova i daunim namba bilong ami i go daun long 300 man bambai em i ken kamapim klia strong bilong em long kisim bek lain bilong em, na i no gat wok long strongpela ami bilong helpim ol. (Hetman 7:​1-25; Sekaraia 4:⁠6) Long maunten Gilboa, ol Filistia i bin daunim namba wan king bilong Israel, em Sol, long wanpela bikpela pait, na ol i kilim i dai Jonatan na tupela narapela pikinini man bilong Sol, na Sol i kilim i dai em yet.​​—⁠1 Samuel 31:​1-5.

Ol stori bilong Baibel long taun Jesril i kamapim narapela narapela samting bilong en. Ol i stori long ol bikman bilong Israel i bin lusim God na ol i bin mekim wok nogut long namba bilong ol long bosim ol man, na tu, ol i stori long pasin bilong ol wokboi bilong Jehova long givim bel na long stap gut long Em. Inap wan tausen yia samting paslain long Krais, Ahap, king bilong 10-pela lain bilong Israel bilong not, em i sanapim haus king bilong em long Jesril, maski Samaria em i biktaun bilong kantri. (1 King 21:⁠1) Jesebel em meri bilong Ahap na em i no bilong lain Israel. Em i stap long taun Jesril taim em i salim tok i go long profet bilong Jehova, em Elaija, na em i tok Elaija bai dai. Jesebel i kros, long wanem, Elaija i no pret long kilim i dai ol profet bilong Bal bihain long Elaija i bin mekim ol samting long maunten Karmel bilong makim husat em i God tru.​​—⁠1 King 18:⁠36–19:⁠2.

Bihain, wanpela pasin nogut tru i bin kamap long Jesril. Ol i kilim i dai Nabot bilong Jesril. King Ahap i bin mangal long gaden wain bilong Nabot. Taim king i tok em i mas kisim dispela hap graun, Nabot i tok: “Bipo yet dispela hap graun i bilong ol lain tumbuna bilong mi, na nau mi holim i stap. Olsem na long nem bilong Bikpela, mi no inap givim long yu.” Ahap i no amamas liklik long dispela gutpela bekim. Kwin Jesebel i lukim king i bel hevi, olsem na em i stretim rot bilong kot giaman i ken kamap, na ol i sutim tok long Nabot olsem em i bin toknogutim God. Ol i tok Nabot i gat asua na ol i tromoi ston long em na kilim em i dai, na king i kisim gaden wain bilong em.​​—⁠1 King 21:​1-​16.

Ol i mekim dispela pasin nogut tru, olsem na Elaija i tok profet olsem: “Taim Jesebel i dai, ol dok bai i kaikai bodi bilong en klostu long banis bilong taun Jesril.” Na dispela profet i tok moa: ‘Sapos sampela man long famili bilong Ahap i dai insait long taun, orait bai ol dok i kaikai bodi bilong ol. Tru tumas, long taim Ahap i stap king, olgeta laik na tingting bilong en i strong long mekim pasin nogut long ai bilong Bikpela. Bipo i no gat wanpela man i mekim kain pasin olsem. Meri bilong en Jesebel tasol, i bin grisim em long mekim ol dispela sin.’ Tasol Ahap i daunim em yet taim Elaija i tokaut long strafe bilong Jehova, olsem na Jehova i tok dispela strafe i no ken painim ol taim Ahap i stap laip yet. (1 King 21:​23-​29) Baibel i tok, long taim bilong Elisa, em senis bilong Elaija, ol i makim Jehu long kamap king bilong Israel. Taim Jehu i raun long karis na i go insait long taun Jesril, em i tokim ol man long tromoi Jesebel i go daun long windo bilong haus king, na lek bilong ol hos i krungutim em. Bihain, ol i kisim save olsem ol dok i bin kaikai bodi bilong em, na bun bilong het, na lek, na han tasol bilong em i stap. (2 King 9:​30-​37) Laspela stori bilong Baibel long samting bilong taun Jesril, em stori bilong ol man i bin kilim i dai 70 pikinini man bilong Ahap. Jehu i bungim het bilong ol long tupela hip long dua bilong taun Jesril, na bihain em i kilim i dai ol narapela bikman na pris, em ol i bin insait long ol samting nogut bilong wok king bilong Ahap.​​—⁠2 King 10:​6-​11.

Ol Saveman i Bin Painim Wanem Samting?

Long 1990, tupela lain i bung wantaim bilong digim graun em taun Jesril i bin stap long en. Wanpela yunivesiti (Institute of Archaeology of Tel Aviv University), em David Ussishkin i go pas long wok bilong en, na wanpela skul (British School of Archaeology) long Jerusalem, em John Woodhead i go pas long wok bilong en, ol i mekim dispela wok wantaim. Long 1990 i go inap 1996, namel long 80 na 100 volantia ol i wok long dispela ples inap 7-pela hap taim (wan wan hap taim em inap olsem 6-pela wik).

Long nau, pasin bilong ol saveman bilong painim ol samting bilong bipo i olsem: Ol i skelim ol samting bilong ples ol i painim insait long graun, na ol i no larim ol tingting ol man i kisim pinis i stiaim wok bilong ol. Olsem na taim ol saveman i skelim ol kantri em Baibel i stori long en, ol i no save bilip tasol long stori bilong Baibel. Ol i mas skelim gut olgeta narapela buk i stori long dispela na ol samting ol i painim long ples ol i digim. Tasol olsem John Woodhead i tok, i no gat narapela rait bilong bipo i stori long taun Jesril, sampela sapta bilong Baibel tasol i stori long en. Olsem na i stret ol i skelim ol stori bilong Baibel na ol yia Baibel i kolim. Wok bilong ol saveman bilong painim ol samting bilong bipo i bin kamapim klia wanem samting?

Taim ol i painim ol pipia ston bilong banis na ol sospen graun, ol i kisim save olsem ol dispela samting i bin stap wan tausen yia paslain long Krais, olsem na em ol samting i bin stap long taim Baibel i tok taun Jesril i bin stap. Tasol taim ol i wok long digim yet dispela ples, ol i painim planti samting ol i kirap nogut long en. Namba wan samting em olsem: Dispela ples i bikpela tru na ol banis bilong en i traipela. Ol saveman i bin ting bikpela bilong dispela ples na ol banis bilong en i wankain olsem bilong taun Samaria bilong bipo, em biktaun bilong kingdom bilong Israel. Tasol taim ol i wok long digim graun, ol i luksave olsem bikpela bilong Jesril i winim tru bikpela bilong Samaria. Longpela bilong banis bilong taun inap olsem 300 mita na braitpela bilong en inap olsem 150 mita, olsem na bikpela bilong dispela ples wantaim ol banis bilong en i winim inap 3-pela taim olgeta narapela taun bilong Israel i bin stap long dispela taim. Bikpela baret i raunim dispela taun, olsem na long as bilong banis graun i go daun inap 11-pela mita. Profesa Ussishkin i tok, ol i bin wokim ol dispela kain baret long taim bilong ol man i bin raitim Baibel, long narapela taim nogat. Em i tok: ‘Mipela i no bin painim dispela kain samting long Israel i go inap long yia 1000 C.E. samting.’

Narapela samting ol i kirap nogut long en i olsem: I no gat ol bikpela haus long namel bilong taun. Taim ol i bin wokim taun, ol i bin kisim i kam planti retpela graun bilong wokim insait long banis wanpela stretpela hap graun i antap tru. Wanpela ripot (Second Preliminary Report) i stori long wok bilong digim graun long Tel Jesril na ripot i tok, dispela stretpela hap graun i antap tru inap makim olsem Jesril i no ples bilong king tasol. Ripot i tok: “Mipela i laik tok, ating Jesril em i nambawan ples bilong ami bilong ol king bilong Israel long taim bilong lain king Omrait [em Omri na ol tumbuna pikinini bilong em] . . . na dispela em i ples bilong ol hos na karis bilong king na ples bilong skulim ol lain ami.” Bikpela bilong stretpela hap graun na bikpela bilong banis i mekim na Woodhead i ting, dispela em i wanpela hap ol i bin mats long en bilong soim strong bilong ami i raun long karis, em wanpela ami i winim olgeta narapela ami long Midel-Is long dispela taim.

Ol saveman i gat bikpela laik long save long ol pipia ston bilong dua bilong banis em ol i painim taim ol i digim graun. Ol ston i kamapim olsem i gat wanpela bikpela dua i gat 4-pela rum long en. Tasol insait long planti handet yia ol man i bin stilim planti ston long dispela hap, olsem na ol saveman i no inap tokaut stret long dispela samting. Woodhead i ting ol ston i stap i soim olsem dua bilong banis i gat 6-pela rum, em bikpela bilong en i wankain olsem bikpela bilong ol dua bilong banis ol i painim long Megido, Hasor, na Geser.a

Ol samting ol saveman i painim i kamapim klia olsem dispela taun i bin stap inap sotpela taim tasol, maski em i bin stap long gutpela hap graun na ami inap mekim gut wok bilong en long dispela hap. Woodhead i tok, taun Jesril i gat strongpela banis, tasol ol i bin mekim wok long en inap sampela yia tasol. Dispela samting i no bin painim planti narapela ples em Baibel i stori long en, olsem Megido, Hasor, na biktaun Samaria, em planti taim ol i bin wokim gen, na skruim ol i go bikpela, na ol man i bin sindaun long ol dispela taun long narapela narapela hap taim. Bilong wanem ol i no mekim wok long Jesril inap longpela taim, maski em i stap long gutpela hap tru? Woodhead i tok, Ahap na ol bikman long lain bilong em ol i tromoi nating planti mani samting bilong Jesril, olsem na kantri i laik bagarap long ol samting bilong mani. Dispela i kamap ples klia long strong na bikpela bilong Jesril. Ating nupela gavman aninit long Jehu i no laik ol man i ting Jehu na gavman bilong em i wankain, olsem na ol i lusim dispela taun.

Inap long nau, olgeta samting ol i painim insait long graun i kamapim klia olsem Jesril em i wanpela bikpela taun bilong Israel inap wan tausen yia samting paslain long Krais. Ol banis na bikpela bilong taun i kamapim klia olsem Jesril em i ples King Ahap na Jesebel ol i bin stap long en. Ol samting i makim olsem i no gat planti man i bin sindaun long Jesril long dispela taim stret olsem Baibel i stori long en. Olsem: Kwiktaim Jesril i kamap strongpela taun long taim Ahap i stap king, tasol bihain, ol i daunim dispela taun taim Jehova i tokim Jehu long “kilim i dai olgeta arapela famili bilong Ahap i stap long Jesril, wantaim ol ofisa bilong Ahap na ol gutpela pren bilong en na ol pris bilong en. Em i no larim wanpela i stap. Nogat tru.”​​—⁠2 King 10:⁠11.

Ol Yia Bilong Ol Samting i Kamap Long Jesril

John Woodhead i tok: “Long wok bilong painim ol samting bilong bipo, i hatwok tru long makim wanpela samting i olsem as bilong makim ol de na yia em samting i bin kamap long en.” Olsem na taim ol saveman i skelim ol samting ol i bin painim insait long 7-pela yia ol i digim graun long Jesril, ol i skelim ol dispela samting wantaim ol samting ol saveman i bin painim insait long graun long ol narapela ples. Dispela i bin kirapim ol saveman long skelim gen ol samting na long tok pait long en. Bilong wanem? Long wanem, kirap long taim saveman Yigael Yadin i bin digim graun long Megido bihain long 1960 i go inap long 1970 samting, planti saveman i bilip olsem em i bin painim banis na ol dua bilong banis bilong taim bilong King Solomon. Tasol nau, banis, na sospen graun, na ol dua bilong banis em ol i bin painim long Jesril, dispela i mekim na sampela i no wanbel wantaim dispela tingting bilong planti saveman long dispela tok.

Olsem: Ol sospen graun ol i bin painim long Jesril i wankain stret olsem graun bilong Megido em Yadin i bin tok em bilong taim Solomon i bin mekim wok king. Pasin bilong wokim dua bilong banis na bikpela bilong graun dispela tupela taun i sindaun long en i wankain liklik, tasol i no wankain olgeta. Woodhead i tok: “Olgeta samting mipela i painim i makim olsem taun Jesril i bin stap long taim bilong Solomon, o ol banis samting ol i painim long ol narapela hap [Megido na Hasor] ol i bilong taim bilong Ahap.” Baibel i kamapim klia olsem taun Jesril i bin stap long taim bilong Ahap, olsem na Woodhead i ting yumi ken bilip olsem ol dispela banis samting i bilong taim Ahap i bin mekim wok king. David Ussishkin i tok: “Baibel i tok Solomon i mekim ol samting bilong strongim Megido​—⁠Baibel i no tok em i wokim ol dispela dua bilong banis mipela i painim.”

Ol Inap Save Long Ol Samting i Bin Kamap Long Jesril?

Olsem wanem? Ol dispela samting ol saveman i painim, na ol tok pait i kamap bihain long en, yu ting dispela i makim olsem yumi no inap bilip long tok bilong Baibel long Jesril o long Solomon? Tok pait bilong ol saveman i no save mekim wanpela samting long tok bilong Baibel, long wanem, as bilong wok bilong skelim ol samting bilong bipo i narapela kain long as bilong Baibel long stori long ol dispela samting. Dispela wok i save kamapim ol narapela narapela askim, na wanem samting i bikpela samting long dispela wok, em tu i narapela kain long tok bilong Baibel. Yumi ken tok olsem man bilong stadi long Baibel na saveman bilong painim ol samting bilong bipo ol i olsem tupela man i raun long wankain rot. Wanpela man i draivim ka long rot, na narapela i wokabaut long arere bilong rot. Ol samting ol i lukluk na tingting long en i narapela narapela. Tasol planti taim tingting bilong narapela i strongim tingting bilong narapela​—⁠tupela tingting i no pait wantaim. Pasin bilong skelim tingting bilong dispela tupela man inap mekim na yumi kisim gutpela save.

Baibel i stori long ol samting i bin kamap bipo na long ol man bilong bipo; ol saveman i skelim ol samting ol inap painim yet insait long graun bambai ol i ken kisim save long ol dispela samting bilong bipo na long ol manmeri bilong bipo. Tasol olgeta samting bilong ol dispela olpela samting i no stap, na ol man inap kisim kain kain tingting long en. Long wanpela buk (Archaeology of the Land of the Bible​—⁠10,000−586 B.C.E.) Amihai Mazar i tok long dispela samting, olsem: ‘Wok bilong painim ol samting bilong bipo insait long graun, em i wanpela wok man i no inap mekim nating, na tu, em i mas lain na kisim save long mekim. Pasin bilong bihainim stret lo long dispela wok i no makim olsem olgeta taim wok i kamap gutpela, nogat; em i bikpela samting long ol man i bosim wok ol i redi long senisim pasin bilong ol long wok sapos ol i mas mekim olsem, na ol yet i mas tingim sampela samting ol i ken mekim. Skul na ol samting saveman i save kisim bilong helpim em long mekim wok ol i bikpela samting, tasol pasin, na save, na gutpela tingting bilong em tu i bikpela samting.’

Ol samting ol saveman i painim insait long graun i kamapim klia olsem bipo Jesril em i bikpela taun bilong king na ami, na dispela taun i bin stap inap sotpela taim tasol long taim Ahap i bin mekim wok king​—⁠olsem Baibel i tok long en. Ol man i bin kamapim planti narapela askim em ol saveman bilong painim ol samting bilong bipo ating ol bai skelim inap planti yia yet. Tasol Tok Bilong God, em Baibel, i wok yet long toktok klia long ol samting, na helpim yumi long save gut long olgeta samting i bin kamap, em samting ol saveman i no inap mekim.

[Futnot]

[Ol Piksa long pes 26]

Ol i digim graun bilong painim ol samting bilong bipo long Jesril

[Piksa long pes 28]

Wanpela imis bilong ol Kenan ol i painim long Jesril